مُفْــــردات من العــــامية "الريفيـــية" السُــــودانية

في العامية السودانية، كلمات إن اجتمعت منها ثلاث في جملة، تجعل المستمع

من ناس الخرتوم "أطرش في زفة"، ناهيك من أولاد المغتربين.

في هذا "البوست" سنحاول معاً تناول بعض من هذه الكلمات والألفاظ والمسميات، وسنعكف

على تشكيل كل كلمة أو جملة، إن لزم الأمر، ليتبين للقارئ من الشرائح المشار إليها طريقة نطقها الصحيح.

الكَـشَاشَة: هي الراكوبة، والفرق أن الكَـشَاشَة أخف حجماً من الراكوبة

(نومة ظهرية في كشاشة، وربنا يختيك العتود، والعتود صغير الماعز، لا يَنجَرْ تحت العنقريب يحك ضهرو).

وبعد نويمتك دي، تقوم تندرع في الإبريق الحماك النوم بالصفير، طبعاً النسام يهب وهو يصفر،،، أها تتوضأ

وتسوي صلاتك في تقروقة: والتَقَروُقَــة بِرِشْ بيضاوي من السعف... والبعض يُطلِـقْ عليها اسم التبروقة.

الاستاذ الفاضل جلال جبريل

لك التحية الطيبة

حبيت اكون اول ضيوفك و بالتالى اتمنى الا اكون ثقيل عليك .. !!!

Quote: وتسوي صلاتك في تقروقة: والتَقَروُقَــة بِرِشْ بيضاوي من السعف... والبعض يُطلِـقْ عليها اسم التبروقة

اعرف التبروقة الاحمر و لكن اول مرة ما تحته ..

هل لك ان تفصل عن الاخيرة و فى اى مناطق السودان تتسخدم ..؟

Quote: هل لك ان تفصل عن الاخيرة و فى اى مناطق السودان تتسخدم ..؟

الطيب رحمة سلام مرحب بيك

التبروقة والتقروقة معناهن واحد صلاية بيضاوية الشكل من السعف المضفور

Quote: الكَـشَاشَة: هي الراكوبة، والفرق أن الكَـشَاشَة أخف حجماً من الراكوبة

ودجبرين سلام
وكل سنة وانت طيب

الفرق بين الكشاشة والراكوبة
الراكوبة تقوم على أربعة شعب واربعة عيدان توضع افقية تربط في الشعب مكونة للسقف مسند سطحي يكون فوقه السقف
الركوبة قد تكون قائمة بذاتها في الحوش وقد تكون جوار او امام غرفة

والكشاشة تقوم على شعبتين وثلاثة عيدان افقية تربط في الشعب مكونة العود الاول يربط في الشعبتين ( طرفيه ) العود الثاني
يربط طرفه في شعبة والطرف الثاني يغرز في حائط الغرفة التي تكون امامها الكشاشة وكذلك العود الافقي الثالث ( نفس الشئ )
وهذا يعني ان الكشاشة لاتكون منعزلة عن حائط الغرفة الامامي الذي فيه الباب

تحياتي ومودتي

نجي نمسك الكَـشَاشَة أو الراكوبة ونشوف فيها شنو:

الشِـعْبَة وجمعها شِـعَبْ: مجموعة من العيدان يتم غرزها في الأرض تتخذ شكل حرف الـ "V" عند نهاياتها، توضع

عليها أعواد أخر يمسى الواحد منها "رصاصة" وتُحزم بحبال السعف. ثم يأتي الجريد ومفرده جريدة وهو أعواد

النخل، يُشَدُ ويُثَـبت على الرصاص بالحبال، ثم يوضع الحلفا أو التَبَسْ وهما نوعان من النباتات الصحراوية تنمو

بكثرة في مناطق البطانة والشمالية وصحراء العتمور، يجلبها في السابق الجمالة. بعد وضع الحلفا، يأتي خبير الرواكيب

ومعه أهم معداته وهي "اللارساية" وهي بكل بساطة "سيخة" عادية بطول نصف المتر تقريباً شُكِّلتْ إلى حرف "U" حاد.

بعد وضع الحلفا أو التبس وتوزيعه بالتساوي فوق السطح، يجلس خبير الرواكيب عليه ويغرز اللارساية إلى

الأسفل ليضع له مساعده فيها الحبل وهكذا يؤديان مهمة الإبرة في ماكينة الخياطة.

لمن له إسهامات من خارج البورد

[email protected]

جلال كل عام وانت بخير

غايتوا انا حا اسكن هنا

بالله ما تخلى ليك كلمة واحدة تطير عاوزة اجضم العامية السودانية علشان شيقوق ما يضحك على ويقول مركبة مكنة خواجات

يا حبيب كيفنك
يمين كان رشيت لي كلام اهلي الشوايقة هنا حا تآآآآآآآمن عديل كدة

Quote: يا حبيب كيفنك يمين كان رشيت لي كلام اهلي الشوايقة هنا حا تآآآآآآآمن عديل كدة

ود جبرين خبير العامية الريفية

أود أن أشير إلى أن العامية ليست لها معنى واحد كما يرى البعض، بل وأن لكل منطقة عامية ومفرادات خاصة بها

وقد تتقلص دائرة الخصوصية فيها وتصل إلى حدود القرية الواحدة أو ربما مجموعة من القرى...

ولا أحسب أن التباين سيكون في هذا الشأن كبيراً ..




ودي يا حبيب

Quote: جلال كل عام وانت بخير غايتوا انا حا اسكن هنا بالله ما تخلى ليك كلمة واحدة تطير عاوزة اجضم العامية السودانية علشان شيقوق ما يضحك على ويقول مركبة مكنة خواجات

وضاحة جيبي بنبرك تب

Quote: ودجبرين سلام وكل سنة وانت طيب الفرق بين الكشاشة والراكوبة الراكوبة تقوم على أربعة شعب واربعة عيدان توضع افقية تربط في الشعب مكونة للسقف مسند سطحي يكون فوقه السقف الركوبة قد تكون قائمة بذاتها في الحوش وقد تكون جوار او امام غرفة والكشاشة تقوم على شعبتين وثلاثة عيدان افقية تربط في الشعب مكونة العود الاول يربط في الشعبتين ( طرفيه ) العود الثاني يربط طرفه في شعبة والطرف الثاني يغرز في حائط الغرفة التي تكون امامها الكشاشة وكذلك العود الافقي الثالث ( نفس الشئ ) وهذا يعني ان الكشاشة لاتكون منعزلة عن حائط الغرفة الامامي الذي فيه الباب تحياتي ومودتي

كلامك صحيح يا منسي، لذلك سحبته من المداخلة التي فصلت فيها صناعة الراكوبة

شكراً ليك


............... الصقط أخدكن تب

ما بين راكوبتنا دي وبقية تفاصيل البين حا نعيش حكاوي تفصل لنا معاني مفرداتنا الريفية

ثم سننتقل إلى التِـحْتَـانية وهي الزراعة المحازية للنيل وليست الحواشات عند أهل الجزير ولا المروية بالأمطار

إلى ذلك الحين سنظل رهناً للحلة والبيوت

للراكوبة مكونات، "عاد جينا نقعد في الواطة"، العنقريب وهو لا يحتاج لتفسير وإنما له تفاصيل وأنواع:
أنواعه...
* المَخْـرَتة: ملون ومظركش يستخدم للجرتق،،، عرفتوهو؟
* والنوع الثاني الهبابي: دا الع(.........)يب الصغيروني والخفيف يستخدم في الدكاكين لذلك بعضهم

يُطلق عليه "دكاكيني"، ويقولون قعدة دكاكينية أي مبسطة ومصدر الاسم تراهو الع(.........)يب دا.


* الثالث النوع العادي الذي تطور في الآونة الأخيرة واتخذ بعض ملامح وتفاصيل

المخرتة من ناحية التلوين وزخارف الأرجل.

مكونات العنقريب: الكُـراع والوسادة والمِـرِقْ

- النِساجة أو الوِسّير: وهي عملية حياكة الحِبال في العنقريب ولها نوعان، الدهباية

والعادية. الدهباية تتخذ تشكيلات وزخارف يتفنن النساج في اختيار ألوان الحبال.

دي الكلمة المشفرة فوق دي .... بكري حيرتنا زاتو العنقريب بورديك ماعرفو

اخونا جلال جبريل تحايا ومحبة،


عند بنا الراكوبة، او الكشاشة يحتاج الفرد ان يحفر لكل شعبة حفرة تسمي (النقرة)،
والة الحفر تسمي (عتلة)، وهي ماسورة من الحديد الصلب مدببة عند الرأس، ويحتاج الفرد الي (مسلة)، وهي ابرة كبيرة الحجم تستعمل في تخيط الشوالات المفروقة، وايضا ربما يحتاج الانسان الي (منقاش) وهو معول طبي يصنع من السلك له راسين، ويستعمل لاستخراج (السريحة)، وهي عبارة عن الاعواد الصغيرة التي تدخل جسد الانسان من الاعود، مثل (المرق) وهو اكبر العيدان المستعمل في بناء الراكوبة.




بوست جميل جد.

Quote: عند بنا الراكوبة، او الكشاشة يحتاج الفرد ان يحفر لكل شعبة حفرة تسمي (النقرة)،

شكراً ياسنوسي للإضافة

عوافى آ ود جبرين..
آزول السفاية ما دفنت الناس ديل..
كدى بى اللوال جيب الدهسير و سو الصريف.

أها بعد ما الزول صلى الضُطـُر في التقروقة

وفتح الرادي وسمع برنامج عالم الرياضة، وفي حتتو ديك عِـرِف الجابو باظ الخرتوم

منو، بالمناسبة من أصواتن بس، الباظ يقيف يسمع الناس البتنضم يعرف الجا منو...
يقوم يقول بسم الله وينده للغدا... الغدا هيييي
الغدا: صحن مفنقل في نص الصينية، تبخ، وصحن سلطة وعجور وطماطم وجرجير، وملاحة

شطة. أكل غداهو داك وقام على بهايم البيت، بقيرة للحليب وغنيمات.

يقوم يسوي شنووو؟ يعشيهن

للبهائم وجبتان فقط في اليوم، الصباحية تسمى الغدا، حوالي الساعة 10 ص، والتانية تسمى بالعشاء، مواعيدا

العصر ومعاها بيشربن استعداداً للحليب عند المغربية الذي غالباً ما تصاحبه وجبة "العَـلوق" وهي مكونة

من عيش فتريتة مدروش أو بذرة مولاص.

هذا فيما يخص بهائم البيت.بهائم الخلاء ترعى على نفس الوتيرة السابقة مع تغيير طفيف في التوقيت، مثل

شرابها الذي يسمى الضِمي وهو ورودها مكان الماء حفيراً كان أم نهر النيل، والثانية نادرة الحدوث لبعد

مناطق الرعاة من مصدر المياه النيل، لذلك يستعينون في العصر الحالي بتناكر المياه الحديثة.

وعند المغربية يجي الحليب ودي قصتنا وحكايتنا الجاية...

Quote: عوافى آ ود جبرين.. آزول السفاية ما دفنت الناس ديل.. كدى بى اللوال جيب الدهسير و سو الصريف.

أسامة سلام

لا داخل آجنا وتنقر عتبت الباب لاطقك في راسك

.

آجنا ها.. عنقريبك دا بتهوزز كدى مالو.. ظنيتو دايرلو ترتق..

Quote: ظنيتو دايرلو ترتق..

حبابك أسامة

الشي مو ترتق ........ تكِـكْ,,, وهو قطعة من الخشب يتم غرزها في

مكان دخول الوسادة والمِـرِق عشان العنقريب يخلي السلسكة ويثبت

جايز الاسم مختلف عندكم

ماكطيب آود آود جبرين....
فى ناس بقولولو تك تك وناس بقولولو ترتق وانتو عندكم تك..
العامية دى غزيرة خلاااس. الشايقية عندهم حاجة إسمها تتق خاصة بالساقية..
عنقريبك ماتنسى تكربو آجنا.. لو ما كربتو ببقى حفرة.

الاخ جلال
كل عام وانت بخير
نساجة العنقريب كانت بالحبال، قبل ظهور سيور البلاستيك، واخوك يا ما نسج، وكانت ثلاثة انواع، بلدي وهي نساجة عادية ما فيها اي فن ودرجة ثالثة، والدرحة الثانية كانت نساجة دنقلاوي وهي اكثر تطورا من البلدي، أما قمة الفن فكانت في نساجة (السجادة)، حيث تظهر المهارات والفنون في تشكيل المثلثات والمربعات، لكن شغل السجادة ما تجاري لأنه يحتاج شوية وقت، ولا يناسب زحمة ايام الأعياد، وشغل البلدي سريع لكنو مرفوض، ما ينفع إلا لعنقريب راكوبة، أو عنقريب (تكل) - التكل هو المطبخ.

Quote: استعداداً للحليب عند المغربية الذي غالباً ما تصاحبه وجبة "العَـلوق" وهي مكونة من عيش فتريتة مدروش أو بذرة مولاص.

في وجبة (special) خصوصا للحوامل عبارة عن (امباز) وهو نفاية السمسم المضغوط وشكلها مغري جدا.
إذا لحست واحدة من الغنم الدقيق أو شربت من خمارة العجين، فاياك ان تجعلها تشرب ماء بعد الحادث، الحل في تعطيشها لمدة زمنية ثم تعطي الماء بجرعات قليلة

Quote: في وجبة (special) خصوصا للحوامل عبارة عن (امباز) وهو نفاية السمسم المضغوط وشكلها مغري جدا. إذا لحست واحدة من الغنم الدقيق أو شربت من خمارة العجين، فاياك ان تجعلها تشرب ماء بعد الحادث، الحل في تعطيشها لمدة زمنية ثم تعطي الماء بجرعات قليلة

كفيت وأوفيت يا بركات خليك قريب

Quote: الشِـعْبَة وجمعها شِـعَبْ: مجموعة من العيدان يتم غرزها في الأرض تتخذ شكل حرف الـ "V" عند نهاياتها، توضع عليها أعواد أخر يمسى الواحد منها "رصاصة" وتُحزم بحبال السعف. ثم يأتي الجريد ومفرده جريدة وهو أعواد النخل، يُشَدُ ويُثَـبت على الرصاص بالحبال، ثم يوضع الحلفا أو التَبَسْ وهما نوعان من النباتات الصحراوية تنمو بكثرة في مناطق البطانة والشمالية وصحراء العتمور، يجلبها في السابق الجمالة. بعد وضع الحلفا، يأتي خبير الرواكيب ومعه أهم معداته وهي "اللارساية" وهي بكل بساطة "سيخة" عادية بطول نصف المتر تقريباً شُكِّلتْ إلى حرف "U" حاد. بعد وضع الحلفا أو التبس وتوزيعه بالتساوي فوق السطح، يجلس خبير الرواكيب عليه ويغرز اللارساية إلى الأسفل ليضع له مساعده فيها الحبل وهكذا يؤديان مهمة الإبرة في ماكينة الخياطة.

تعرف يا جلال البوست دا حا يكون اجمل يوست لعام 2013
بس أدي كل شئ حقو قبل ان تمشي لمفردة جديد
خلينا في الشعبة .. والكشاشة ,, والراكوبة .. والسقف الذي يأتي ضمناً حتى نعرف كيف يكون سقف الراكوبة الكشاشة والبيت ( الغرفة )
مفرد الرصاص
وكما اوضحت انت هي عيدان صغيرة حجماً لكن بنفس طول العيدان الأفقية أعلى الراكوبة ( العيدان الافقية في الراكوبة يكون عددها كما أسلفنا أربعة ) ..
وفي الكشاشة ( ثلاثة عيدان افقية ) .. وفي الغرفة يكون ( المرق أو كمرة الحديد )
المرق ( وهو عود كبير من السنط أو الدوم أو ما شابه )
الغرفة أو الراكوبة الفرق بينهما :
في الغرفة تستند العيدان الأفقية على الحيطان ( جمع حائط لو صحَّ )
وفي الراكوبة تكون الشعب وعليها العيدان الأفقية في مقام الحيطان حتى يقوم عليها السقف

الرصاص سوف نفرد له مداخلة
ونسمع ما قال الشاعر محمد طه القدال
في قصيدته ( خمسين سنة )
في المرق

قال
سبلوقاتنا ما صبّن
سبالق جارنا سوّن جوووو
ويا دميع السحاب نوّح
ويامعز اللبن دغّن
ويا البقر الطلق بوّح
جفل في الزيفة ديك روّح
ويا الكللاب يسوّن هووو
وقاك حتى الجداد كيّك
ويا مرق السنط سيّك
وتسمع بردلُب حيطة
يا ابو مروة يا أبومروة
بيت حاجة م خريف دركان
تجيك من الفريق عيطة

مرق السنط سيّك اي بقى يسوي سيييك سيييك وداي يقع

ويقول في نفس القصيد يصف البيت بعد سيك المرق

وكان إشتت الرصاص
وكان الساس حتل وإنماص

وشن فضل في البيت بعد أن تشربت حيطانه وسيك المرق واشتت الرصاص
رب بقع والجوة جوة والبرة برة


بعد ان ماصت المطر البيت وداير يقع

الرصاص
وهي عيدان اصغر حجما ولكن متساوية في الطول مع العيدان الأفقية
وفوق الرصاص بجي الجريد ومن فوق الجريد بجي البروش ثم التبن والحلفا
ومن فوقها بتجي الريقطا ( والريقطا هي تراب اسود معروف )
وبعد دا كلو يزبل السقف حتى لا يزيل الهواء التراب والتبن والحلفا

وكان إشتت الرصاص
وكان الساس حتل وإنماص

Quote: تعرف يا جلال البوست دا حا يكون اجمل يوست لعام 2013

أكيد جكيل بي مداخلاتك يا ود أعمي

يامنسي حكاية كل مفردة قصادا أبيات شعر دي حاجة ممتازة بس أنا مرات الذاكرة بتخوني ياخ

Quote: ساجة العنقريب كانت بالحبال، قبل ظهور سيور البلاستيك، واخوك يا ما نسج، وكانت ثلاثة انواع، بلدي وهي نساجة عادية ما فيها اي فن ودرجة ثالثة، والدرحة الثانية كانت نساجة دنقلاوي وهي اكثر تطورا من البلدي، أما قمة الفن فكانت في نساجة (السجادة)، حيث تظهر المهارات والفنون في تشكيل المثلثات والمربعات، لكن شغل السجادة ما تجاري لأنه يحتاج شوية وقت، ولا يناسب زحمة ايام الأعياد، وشغل البلدي سريع لكنو مرفوض، ما ينفع إلا لعنقريب راكوبة، أو عنقريب (تكل) - التكل هو المطبخ.

الاستاذ جلال جبرين وضيوفك الكرام بوست رائع وجميل اها نساج عنقريبكن وانواعو التلاتة دي في كردفان ودارفور
اسمها 1- جناح الرَّهو 2- خرق النِّعامة 3- النساجة

محبتي

ما تنسى الدراو يا المنسى.. والحصير.. والقنا..
برضو فى ناس بيستخدمو شقايق الدوم..
وانواع أخرى من العيدان..
ويقال للعيدان البيرقدن فوق المرق "الضلع"..
وعلى ذلك فالمرق شيال تقيلة.. ولذلك العبادى قال فى المك نمر
على لسان طه البطحانى ضو الصهيباب:

التلب اللزوم مدخور يشيل العايلة
يقدل بى مهل فوقو الحمول الهايلة
ياك مرق القبايل فيك تسند المايلة
فراج كربة الهم أب قبايلا جايلة

Quote: ما تنسى الدراو يا المنسى.. والحصير.. والقنا.. برضو فى ناس بيستخدمو شقايق الدوم.. وانواع أخرى من العيدان.. ويقال للعيدان البيرقدن فوق المرق "الضلع".. وعلى ذلك فالمرق شيال تقيلة.. ولذلك العبادى قال فى المك نمر على لسان طه البطحانى ضو الصهيباب: التلب اللزوم مدخور يشيل العايلة يقدل بى مهل فوقو الحمول الهايلة ياك مرق القبايل فيك تسند المايلة فراج كربة الهم أب قبايلا جايلة

نواصل يالبيتي

Quote: الاستاذ جلال جبرين وضيوفك الكرام بوست رائع وجميل اها نساج عنقريبكن وانواعو التلاتة دي في كردفان ودارفور اسمها 1- جناح الرَّهو 2- خرق النِّعامة 3- النساجة

عبيد الطيب شكراً للإضافة ... وياريت كلما نقول شيء تدينا البعادلو عندك كردفان ودارفو

لأنو في إختلاف كبير جداً في مفردات العامية

والإختلاف الموجود في مسميات النِسَاجة مصدره - على ما أظن - استخدام الغرب لحبال جلد البقر والتي تسمى القِــدْ

لا حول الله البوست دا كان غاتس وين؟
عارف يا جلال امبارح كتبت لي مداخلة فيهو
الليلة جيت فتشتها ما لقيتها شكلي كدا ما اعتمدتها
لكن ملحووووقة وهادي قعدة وفرجخة في البوست دا
غايتو يا جلال جبريل طلعته زول بيئة جد جد
عارف لو كان بيدي ما كان سميتها العامية كان سميتها اللغة السودانية
لأن معظمها مفهوم بالضرورة لكل السودانيين وهي لهجة محببه جدا وحنينه في نفس الوقت

تحياتي يا حبيب

Quote: غايتو يا جلال جبريل طلعته زول بيئة جد جد

الأمين ود البشاري الله يجازي محنك

يابا البيئية بتاعتي دي - إن صح نسميها - مبارياني في أي حتة

بلاها ما بنبقا

بقينا دخلة على زريبة الغنم... مفرادتها:

* مايخص الغنم "الضان والماعز"

الخُرتَاية: من القماش محبوكة بإبرة اليد على شاكلة شنطة اليد يُغطى بها (ضرع) الغنماية

عشان جناها ما يرضع ويكمل اللبن، خصوصاً وأن العادة المتبعة، هي إطلاق سراح الغنم

خلال فترة الظهيرة. يقولون الغنماية رضعت يعني جات قريب المغرب للحليب ولامن مشو

يحلبوها لقو الخرتاية مافي.

الصُرار: بعض الناس يستعينون بوسيلة أخرى لمنع، العتود والحَمَلْ، وهما صغيرا الماعز

والضأن على التوالي، هذه الوسيلة عبارة عن شريط من القماش، بعد انتهاء عملية الحليب، يتم

وضع مجموعة من مخلفات الغنم "البعر" في إناء مخصص ويبلل بحبة لبن ويخلط بالقماش

ويلف به حلمة ضرع الغنماية أو النـ عجة.

أثناء الحليب لابد من مراعاة الآتي:

- الحرص على إبعاد الصغير لمسافة ليست ببعيدة ليغري أمه حتى تدر اللبن.

- ثم يطلق لها بعد نهاية العملية مع ترك كمية تكفيه، خصوصاً إن كان جديد. بعد فترة غير

مهم أن نعطيه اللبن، لأنو بعد فترة بكون أكل القش وهنا بيقولو خلالس البهم دا (قَـرَمْ) .

up

Quote: الصُرار: بعض الناس يستعينون بوسيلة أخرى لمنع، العتود والحَمَلْ، وهما صغيرا الماعز والضأن على التوالي، هذه الوسيلة عبارة عن شريط من القماش، بعد انتهاء عملية الحليب، يتم وضع مجموعة من مخلفات الغنم "البعر" في إناء مخصص ويبلل بحبة لبن ويخلط بالقماش

ود جبريل حبابك اها صرار الضأن بكون بي (الدُّكرة) وهي لحاية شجر الكِتر ؤ ببلوها ؤبعطنوها في ألمي -الماء يوم الضِّمي اي ورود الضأن
ؤبعدين الحمل إنما قرم القش مابصرو امو والبهيمة الصرارها وقع بسموها بِهِل والماعز غالبا يكون صرارها بالدلق وهو البالي من القماش لكن صغير الماعز اسمو السَّخل او السِّخيل وبعد ما يكبر شوية بسمو العتود
اها دي كلُّو هيِّن الكلام الكِنان..........!
محبتي

وبعضهم يا جلال يفضل استعمال اللجام و الخلال بدل الصرار و الخرتاية..
فأما اللجام فمعروف و أما الخلال فهو عود صغير يبرى من الجيهتين ويغزوهو فى جضوم
البهم من جوة جنب الشلاليف فيمنعه الرضاعة.. و أجود الخلالات هى التى تصنع من السرح
وهو نوع من أشجار الأكاسيا فيما أظن.. عشان كدا الواحد يقول لى من يزعله : أريتك
بى خلال السرح لا ينمد ولا ينطرح!!! وبمناسبة ذكر الحمل فهم يميلون دايما إلى تصغيرها
فيقولون: الحميل بكسر الحاء والميم.. ويحضرنى هنا مربع دوبيت فى غاية الروعة فيه ذكر
الحميل فيه يقول الشاعر:

البروق فى القبلة لحت
والسيول مندلقة زحت
والحميل رابطنو نحط
شم ريحة الدم و بحت

بتشديد الحاء قبل حرف الروى..

الاخ الكريم جلال جبريل والضيوف الكرام،

السلام عليكم وعامكم سعيد،
بوست هادف وتثقيفي خاصةً لحناكيش المدن الكبرى والحناكيش الذين ولدوا و/ او تربوا خارج الحدود. بوست يردنا الي جزورنا السودانية الاصيلة، ويتلمس مكامن الخلق والابداع عند اجدادنا وجدَّاتنا في مختلف بقاع السودان. لقد تفاعلوا ايجابياً مع بيئاتهم وطووعوها لخدمتهم دون الاخلال بها او تدميرها.

الاخ جلال والاخوة المتداخلون، تكتمل الصورة اكثر اذا حاولنا تتبع اصول كل او بعض هذه المفردات العامية، مثلاً; كلمة عنقريب، هل هي نوبية، حبشية، فونجاوية .....الخ.

اخي جلال، استأذنك في فتح بوست مشابه مستوحً من بوستك، يستعرض بعض المفردات العامِّية الريفية في الغرب الكبير (كردفان ودار فور). قد يسأل سائل; لماذا لا تستعرض هذه المفردات هنا؟ سؤال مشروع، والاجابة كاللآتي: هذا البوست بدأ بمفردة واحدة او اثنتين لكن كما ترون، تشعَّب وتمَّدد. وهنالك الكثير من المفردات في الشمال والوسط التى تنتظر الاستعراض والشرح اذا لزم الامر. كما ان العديد من المفردات العامية في الشمال والوسط معروفة ومنتشرة في اغلب اقاليم السودان. لا يمكن ان يقال نفس الشئ عن المفردات العامية الريفية في الغرب الكبير، فهي موقلة في المحلية، وكثيراً ما يتخلى عنها مستخدميها بمجرد انتقالهم الى شمال وسط السودان ويتعلمون المفردات العامية في الشمال والوسط بحكم انها الثقافة الطاقية والمقبولة. لذا فهي تحتاج الى تسليط الضوء عليها بصورة اكبر.

انا زول خرتوم، لكني اعرف الكثير من المفردات العامية الريفية، ولكن ما اجهله منها دون شك، أكثر.
لكم التحية على فتحكم تلك النافذة لالقاء الضوء على ذلك الارث الثر والاصيل، فان دل عن شئ فأنما يدل على اصالتكم.

لكم الود

عثملن دُنقس

Quote: ود جبريل حبابك اها صرار الضأن بكون بي (الدُّكرة) وهي لحاية شجر الكِتر ؤ ببلوها ؤبعطنوها في ألمي -الماء يوم الضِّمي اي ورود الضأن

مِتِيليبة بقر كاجا الشَّواشي ؤنكَّر
والله حِميلة الفوق حوضو عاطن الدُّكَّر
سنيناتك بياض لبن اللَّقوح البُكَّر
ويا الصديق نقيم فاه شامة زي السكَّر

متيليبة تصغير مُتلابة وهي ولد البقر الصغير نقول متلاب ومتلابة ونقول لقحة اي ولدت جديدة ودائما حليبها طيِّب ومرغوب
اما البقرة او الناقة التي مرّ عليها الحول ولم تلد ومازالت حلوب نسمي ولدها حولي من الحول اي مرّ عليه عام ونسميها مُرباع
كاجا قبيلة بشمال كردفان ومشهورين بتربية الأبقار حياهم الغمام -شواشي اي شموس ونوافر عاطن الدُّكر اي وضعها في الماء وتم شرحها سابقا

اما يا استاذ اسامة البيتي عن هذا المقطع
الحميل رابطنو نحَّط
شم ريحة الدَّم وبحَّت
لا اظنه الحميل لأن التنحيط او ينحِّط للبقر وايضا لبقر الوحش (الريل -ام كبجو - الحمره.....الخ)
إتِّي كم جفلتي عِمصاً بي الهكاعة بنحِّط
وسيدك بي ام محيجين الرِّقاقة بمحِّط
العِمص اي المجموعة من ابقار الوحش - الهكاعة اي الأرض المنخفضة قليلا وايضا نسميها الجرح والدَّو ينحّط اي يتناطح فيما بينه
شم ريحة الدَّم وبحَّت
ودائما عند أهل البادية والرَّيف الذي يشم ريحة الدّم ثم يبحت الأرض برجله او يحفرها هو التور -الثور ويرمز ويوصف به الفرسان الشجعان
محبتي

Quote: اما يا استاذ اسامة البيتي عن هذا المقطع الحميل رابطنو نحَّط شم ريحة الدَّم وبحَّت لا اظنه الحميل لأن التنحيط او ينحِّط للبقر وايضا لبقر الوحش (الريل -ام كبجو - الحمره.....الخ)

أستاذ أسامة

أفتكر كلام الأخ عبيد صحيح

لو الشاعر قال فحت أو بحت ممكن يكون الحميل المقصود جنا الضأن

Quote: Quote: اما يا استاذ اسامة البيتي عن هذا المقطع الحميل رابطنو نحَّط شم ريحة الدَّم وبحَّت لا اظنه الحميل لأن التنحيط او ينحِّط للبقر وايضا لبقر الوحش (الريل -ام كبجو - الحمره.....الخ) أستاذ أسامة أفتكر كلام الأخ عبيد صحيح لو الشاعر قال فحت أو بحت ممكن يكون الحميل المقصود جنا الضأن

الأخوين عبيد وجلال.. تحية،

والشكر لعبيد على مداخلته الدسمة..
كلام عبيد يا جلال ممكن يكون صحيح فى بيئته.. وكلام الشاعر صحيح فى بيئته،
و إلا الشاعر ما كان قال: "الحميل رابطنو نحط"!! والحميل الذى عناه الشاعر هو جنا الضان..
والمقصود بالنِّحِيط الفنجطة و التقافز السريع فى المكان.
وعلى هذا، فالعتود جنا الماعز برضو بنحط فى بيئة الشاعر..
وفى بيئة الخليج العربى، يُفحِّط الصَّبَيَّن بسياراتهم!!!
ولربما كان "للنحيط" و "الفحيط" أصل مشترك، و ذلك لتفارب اللفظ والمعنى..

أما النطح و التناطح فهو استعمال الحيوان لرأسه عند الشجار.. وهذا يحدث
من الماعز و الضان و البقر على سواء.. وقد يبلغن من هذا تكسير قرونن الصلبة الطويلة..
وآية أن النطح للماعز كما هو البقر، قول العرب فى الأمر اليقين الذى لا شك فيه:
"لا ينتطح فيه عنزان"..

وقد استعملت كلمة النطح هذه كثيراً فى الشعر السودانى بمعنى
متجه نحو، أو ساير إلى، كما فى قول الحاردلو:

الليلة المعيز ماظنى انا ملاقيهن
ناطحات البطين أدن قليلة قفيهن
سمعن طنة الشادى وكتر صنفيهن
وعند اللاصفرار جفلن بشوف لصفيهن

ف "ناطحات البطين" يعني سايرات في إتجاهه، وقد خلفن قليلة وراءهن (أدَّنْ قليلة قِفِيهن)..


مودتى،

Quote: وكلام الشاعر صحيح فى بيئته، و إلا الشاعر ما كان قال: "الحميل رابطنو نحط"!! والحميل الذى عناه الشاعر هو جنا الضان.. والمقصود بالنِّحِيط الفنجطة و التقافز السريع فى المكان.

البيتي كيف حالك نشكرك كتير جداً لإثراء البوست وفتح باب نقاش ثر وجميل

بالفعل لكل بيئة مصطلحات تختلف من المناطق الأخرى، وهذا أشرنا إليه في بداية البوست لأن السودان

واسع والقبائل لها موروثات خاصة وممارسات تقليدية كثيرة.

جنا الغم كما ذكرت أنت، أول ولادته يسمى السخلة للمؤنث قابلة للتذكير، ويقولون أحياناً البهم وتصغيره بِهِيـم

الشاعر الدكتور محمد ودبادي العكودابي قال في رثاء جدو سعيد العكودابي:

الا سعيد الطلق الزايلة
وخطب بى مالو دارا خالدة
كان عزَام وباعو طويل
بساطو الاحمدى المحضور
غدا وعشيات ملاقية فطور
وديمة ضيوفو ديل فوق ديل
يختف من مطايب الدكة لى ضيفانو
مو ضباح حميل وسـخـيل
طحاناتو ما نامن جبال اللقمة كم عامن
على سمنا مصفى تقيل
ويوم الودع الحبان ونورو الضاوى
غاب تحت التراب ما بان
كان الفقد فيه كبير وكان اليوم ده
ما خاتنو فى الحسبان
وكان ميراثو كل ميراثو
قدحا ناز وسيف فولاذ
وفروة ناس اصال وعزاز
وسبحة ملانة يا حنان يا منان
قبل العم وقبل الخال بكو العدام
بكو الايتام بكى الكرم الصبح مشلول
وكل ابواتو راحو وغابوا فى الرهبان
ونحن عشنا لازمناً قبل ما يبنوا
فيهو البيت يكوسو الطبلة
والجنزير مع البيبان
زمن الصالة والصالون
زمن الرغوة والبالون حليل الكان
حليل الدانقة والديوان
حليل النافق اموالو وتدى يمينو
وما تعرف حسابو شمالو
خليك من يعرفوا فلان
كل فضيلة فى الاجداد ابت ما تبقى فى الاحفاد
ومسكت فى النعوش الطاهرة واندفنت مع الجثمان
وكل مكارم العابرين معاهم راقدة فى شبرين
وبقت امجادنا كانوا زمان.... وكانوا زمان
وبقت امجادنا كانوا زمان....وكانوا زمان

Quote: لحميل رابطنو نحَّط شم ريحة الدَّم وبحَّت

شكرا استاذ البيتي وصاحب البوست استاذ جلال
شوف السياق من - شم ريحة الدَّم ؤبحّت المعروف والمتعارف عليه في الموروث ان الحيوان الذي يشم ريحة الدم ويبدأ في القتال هو
البقر ان كان جاموس او بقر عادي او حتي بقر الوحش ثم يوجد فرق بين النطاح والتنحّط او التنحيط النطاح للبقر والماعز والغنم والصيد
وحتي الحيوان الذي لم تكن له قرون ونسميه بِعامي او ابو كدمول اما التنحِّط فهو للبقر فقط وبقر الوحش لان الحيوانات التي تتناطح تبتعد ثم تضرب بعضها
او تتناطح اما البقر العادي وبقر الوحش يكون نطحها متواصل يعني تتلاقا بقرونها وكل واحد يدفر الاخر وهنا للغلبة للقوي واحيانا يطعنة بقرنه في جزء من جسمة اما الماعز والضأن فتبتعد ثم تضرب او واحد يشِبُّ للأعلي ويضرب الاخر مثل الماعز
محبتي

شكراً الأخ جلال على هذا البوست الدسم

وطالما الحديث عن الماشية أو البهايم

دعني أدلف إلى داخل الزريبة في أرياف الشمال حيث البهايم هناك عادة ما تكون ماعز و ضأن بينما الأبقار موجودة أيضاً ولكن بصورة أقل.
وتسمى البهايم عدة مسميات حسب نوعها مثل (النعجة) و(العبور) و(الخروف) و(الحمل) و(العز) و(التيس) و(العتود) و(السخلة).

(الرعية) تكون دوماً في الصباح أوأحياناً العصر وتكون تحت إشراف الصبية لمنع البهايم من الوصول إلى حيضان البرسيم واللوبا أوغيرها.
بينما تقضي البهايم وقت القيلولة في (التحتانية) بعد أن يتم ربطها تحت ظلال السنط لتستمع بمضغ (البريم) وطبعاً لابد من وجود (الخرطاية) لمنع (العتان) و(الحملان) من الرضاعة.

العصر يتم حش البرسيم واللوبا لتكون جاهزة عند (تسدير) البهايم وإرجاعها إلى الزريبة قبيل المغرب بقليل. ثم بعد المغرب يتم حلب البهايم لتجهيز شاي المغرب وتحضير الروب
طبعاَ وبعدها يمكن للصغار الرضاعة.

العناية بالبهايم تأخذ وقتاً مقدراَ من اليوم وهي متعة لا تضاهيها متعة

تحياتي

Quote: دعني أدلف إلى داخل الزريبة في أرياف الشمال حيث البهايم هناك عادة ما تكون ماعز و ضأن بينما الأبقار موجودة أيضاً ولكن بصورة أقل. وتسمى البهايم عدة مسميات حسب نوعها مثل (النعجة) و(العبور) و(الخروف) و(الحمل) و(العز) و(التيس) و(العتود) و(السخلة). (الرعية) تكون دوماً في الصباح أوأحياناً العصر وتكون تحت إشراف الصبية لمنع البهايم من الوصول إلى حيضان البرسيم واللوبا أوغيرها. بينما تقضي البهايم وقت القيلولة في (التحتانية) بعد أن يتم ربطها تحت ظلال السنط لتستمع بمضغ (البريم) وطبعاً لابد من وجود (الخرطاية) لمنع (العتان) و(الحملان) من الرضاعة. العصر يتم حش البرسيم واللوبا لتكون جاهزة عند (تسدير) البهايم وإرجاعها إلى الزريبة قبيل المغرب بقليل. ثم بعد المغرب يتم حلب البهايم لتجهيز شاي المغرب وتحضير الروب طبعاَ وبعدها يمكن للصغار الرضاعة.

ود المهدي حبابك ونشكرك ياخ على المداخلة الشبعانة دي

أسمح لي أفسر بعض ما ورد فيها من مسميات عمرية:

العبور: هي النعجة في عمر متوسط بين نعجة والغريب الحمل يطلق على عمر الذكر حتى يصير خروف

وكلمة عبور تقاصدها في الماعز عَنَـــاق

Quote: وقد استعملت كلمة النطح هذه كثيراً فى الشعر السودانى بمعنى متجه نحو، أو ساير إلى، كما فى قول الحاردلو:

في شمال المملكة العربية السعودية يستخدم البدو هذه المفردة بنفس المعني (متجه نحو) أو (يلاقي) واسمع القوم هنا يقولون أن فلانا (ناطحني) في الطريق.

جرت العادة في الشعر بعاميتنا السودانية أن تستخدم الكلمة في غير موضعها وتعني المعنى المقصود
فمثلاً ان نستخدم كلمة حميل لصغير الماعز
ومثال لذلك
قال الشاعر خليل فرح في رائعته ( في الضواحي )
ويــا الطبيعة الواديك ساكن
مافي متلك قط في الأماكن
ويــا حلات النال في ثراكن
ويــا جمال البرعن أراكن
بي قافهن تور قرنو ماكن
لا غشن لا شافن مساكن
في الخُزاك والشيح والبراح

وهنا البرعن أراكن ( الظبي .. الغزلان )
والتور هو ذكر الغزلان الفحل
فلا خلاف في ذلك

Quote: يختف من مطايب الدكة لى ضيفانو مو ضباح حميل وسـخـيل طحاناتو ما نامن جبال اللقمة كم عامن

الفهم للشعر بالعامية يوجب التعمق وتفنيت المفردة وبها تصل للمعنى المراد
ومثال هذا البيت الذي أورد أخي جلال

مــو ضباح حميل ######يل

والحمل هنا صغير الضأن الذي بلغ سن يمكن أن يذبح فيها وليس الضيع وهذا النوع من الحملان في هذا العمر يعشق أهل السودان
لحمه ( يقال حمل بج اي لحمه بالوظة بس )

السخيل هو صغير الماعز وكذلك تطلق نفس الكلمة على صغير الظبي

وهناك شئ مهم هذا البيت
مو هنا ليست نافية
بل توكيد لفظي
يفال فلان مو قوي اي امانة ما قوي
مو ضباح اي أمانة ما ضباح ( للتأكيد )

Quote: وهناك شئ مهم هذا البيت مو هنا ليست نافية بل توكيد لفظي يفال فلان مو قوي اي امانة ما قوي مو ضباح اي أمانة ما ضباح ( للتأكيد )

أخ خالد

أنا لي رأي عكس الذي ذكرت ، أفتكر (مو) استخدمها ودبادي في مكانها الصحيح (النفي)

ويقصد أن جده سعيد لم يتعود على ذبح البهايم الصغير وإنما يكرم ضيوفه بالخرفان وما إلى ذلك

أخ خالد

أنا لي رأي عكس الذي ذكرت ، أفتكر (مو) استخدمها ودبادي في مكانها الصحيح (النفي)

ويقصد أن جده سعيد لم يتعود على ذبح البهايم الصغير وإنما يكرم ضيوفه بالخرفان وما إلى ذلك

Quote: أخ خالد أنا لي رأي عكس الذي ذكرت ، أفتكر (مو) استخدمها ودبادي في مكانها الصحيح (النفي) ويقصد أن جده سعيد لم يتعود على ذبح البهايم الصغير وإنما يكرم ضيوفه بالخرفان وما إلى ذلك

ارجع للأبيات الذي قبل البيت هذا ويتضح لك الامر

ولو نفى عن جده سعيد صفة الذبح هذا يعني انه ليس كريم
الشئ الثاني قد تعود الشعراء وصف الممدوح وكرمه عندما يجود بالغاتلي والثمين
الصغير من الهائم هو المقصد
الحلابة و ( ينحر الحلابة ) وهي التي تدر اللبن ويجود بها لضيفه
المقصود كما ذكرت لك مو ضباح ( امانة ما يجود بالحمل الصغير والسخيل الصغير
والله اعلم

Quote: ارجع للأبيات الذي قبل البيت هذا ويتضح لك الامر ولو نفى عن جده سعيد صفة الذبح هذا يعني انه ليس كريم الشئ الثاني قد تعود الشعراء وصف الممدوح وكرمه عندما يجود بالغاتلي والثمين الصغير من الهائم هو المقصد الحلابة و ( ينحر الحلابة ) وهي التي تدر اللبن ويجود بها لضيفه المقصود كما ذكرت لك مو ضباح ( امانة ما يجود بالحمل الصغير والسخيل الصغير والله اعلم

يا خالد لو أي بوردابي غيرك كان اكتفيت بي قولة (ربما اختلاف مناطق) لكن إنت ود منطقتي ودبادي ود منطقتي

إذن نتناقش في الموضوع ولي قدام.... دي الأبيات السابقة للنص

جدى سعيد ولد بادى العكودابى دحين يا ابواتى كان بينكم؟
قالوا اتربى فوق خيلكم ويوم الحارة شايل شيلتو من شيلكم
وقالوا الهيلو، كانت في العرف، هيلكم
يخالطكم قداحة الخير ويتحزم وكت شينكم
قالوا أماتو مو دابن
عقاب التيه ما بهابن
حناضل المره شرّابن
وشكاراتو سمعن قولى قالن سى بدن شكرو
وقالن لى يمين ما قلت فى جدك كلام قدرو
وكل القلتو فيه قليل وما قارب عشر عشرو
الصهالة والوقالة والرقالة وام غره هو ركابن
الجهنية والقطنية والمحوية وام درة الباريها حلابن
العشاية والشاشاية والسباية وام ضرة لى ضيفانو بسخابن
المزروعة والمقروعة والمفدوعة لا برة متمسح ديمة قيسابن
المفزوعة والمقلوعة والممنوعة بالمرة كان من مافى جيابن
راكب الفصلوا انسابن ودايما قدمو فى ركابن
اسود الغابة غلابن وبعرف يكسر انيابن
حلفوا الشافوا قدحو الحار وشافو كتار وماهو كضب
قالوا وساعو مركب زان يشيل اطنان وخرسو هلب
جفير سكينو دمو ينز وداك برادو واسكت كب
اهل السايحة والمتراوحة خاتمة وعاقبة بى قدامو سوا درب
ده ماهو كتير على ولدا مربى على ضفاف النيل
ويوم ولدوه دفنو ابواتو صرتو فوف مراقد الخيل
عكود الكان بعبر الكيل
جاتو الدنيا هينة ولينة بالخيرات مشيلة شيل
سواقى تسوق تلوت الليل
ونخلوا متنى شايل العجوة والقنديل
عيوشو مصوبرات كيمان
وعيش الريف ولد تيمان وخاتى البودة والعسيل
ده شيتا كم دقون شافنو
بين شفقة وحرص عبدنو
والعقال لعابن يسيل
الا سعيد الطلق الزايلة وخطب بى مالو دارا خالدة كان عزام وباعو طويل ......

Quote: الا سعيد الطلق الزايلة وخطب بى مالو دارا خالدة كان عزَام وباعو طويل بساطو الاحمدى المحضور غدا وعشيات ملاقية فطور وديمة ضيوفو ديل فوق ديل يختف من مطايب الدكة لى ضيفانو مو ضباح حميل وسـخـيل طحاناتو ما نامن جبال اللقمة كم عامن على سمنا مصفى تقيل

الخلاف هنا
في كلمة ( مو )

انت قولك انه لا يذبح الحمل والسخيل
اي ذبحه من كبار البهائم
وعرب الخلاء كانوا يتفاخرون بذبح الثمين وغالي على نفوسهم للضيفان
الحلابة غالية ( لانها تنتج )
الدارة غالية ( لما تحمله في بطنها)

العشاية والشاشاية والسباية وام درة لى ضيفانو بسخابن

الحميل والسخيل هما الحمل البج الذي لم يكمل سنته
وليس الرضيع هنا

وهذا قصدي
وبذلك يستوي المعنى
مو ضباح

Quote: قالوا أماتو مو دابن عقاب التيه ما بهابن حناضل المره شرّابن وشكاراتو سمعن قولى قالن سى بدن شكرو وقالن لى يمين ما قلت فى جدك كلام قدرو وكل القلتو فيه قليل وما قارب عشر عشرو الصهالة والوقالة والرقالة وام غره هو ركابن الجهنية والقطنية والمحوية وام درة الباريها حلابن العشاية والشاشاية والسباية وام ضرة لى ضيفانو بسخابن المزروعة والمقروعة والمفدوعة لا برة متمسح ديمة قيسابن المفزوعة والمقلوعة والممنوعة بالمرة كان من مافى جيابن راكب الفصلوا انسابن ودايما قدمو فى ركابن اسود الغابة غلابن وبعرف يكسر انيابن حلفوا الشافوا قدحو الحار وشافو كتار وماهو كضب قالوا وساعو مركب زان يشيل اطنان وخرسو هلب جفير سكينو دمو ينز وداك برادو واسكت كب اهل السايحة والمتراوحة خاتمة وعاقبة بى قدامو سوا درب ده ماهو كتير على ولدا مربى على ضفاف النيل ويوم ولدوه دفنو ابواتو صرتو فوف مراقد الخيل عكود الكان بعبر الكيل جاتو الدنيا هينة ولينة بالخيرات مشيلة شيل سواقى تسوق تلوت الليل ونخلوا متنى شايل العجوة والقنديل عيوشو مصوبرات كيمان وعيش الريف ولد تيمان وخاتى البودة والعسيل ده شيتا كم دقون شافنو بين شفقة وحرص عبدنو والعقال لعابن يسيل الا سعيد الطلق الزايلة وخطب بى مالو دارا خالدة كان عزام وباعو طويل ......

حلفتكم بالله ان تقرأوا هذه الدرر اكثر من مرة وشوفو جمال المفردة ورزانتها واناقتها وشوف الوزن في كل مقطع وشاعرية هذا المبدع
احلف وانا صادق لم اجد احدا في العالمين مدح كريما او فارسا او ملكا او اي احد بهذه الصورة........
استاذ جلال وضيوفك الكرام سلام دكتور خالد المنسي شكرا لهذا العبق في رأي المتواضع ان الدكتور ود بادي اشعر من كتب بعامية الموروث
لم اقل بالعامية السودانية ولكنني اكرر بعامية الموروث السوداني
مو ضباح سخيل ؤ حميل اي لا يذبح لضيوفه السخل والحمل وانما يذبح الأنعام الاخري مثل البقر والأبل
والي وقت قريب بل الي الان عندنا ذبح السخل او العتود او العنبلوك للضيوف عيب
ودبادي دي مبدع حقيقة الله يطول عمرو شوفو (العشاية والشاشيه والسباية وام درة لي ضيفانو بسخابن) اسود الغابة غلابِن ؤبيعرف يكسِّر انيابن
يعني مهما مدحنا الكريم لا نستطيع ان نقول اكثر من انه يذبح اللَّقحة والماخض خلاس هنا منتهي الكرم في الأرياف والبادية
ومهما مدحنا الشجاع لا نستطيع ان نقول اكثر من انه يغلب الاسود وكل الشعر السوداني في الحماسة يدور حول هذا الحيوان الأسد(اسد الخلا - الاسد المربعن..........الخ) لكن ود بادي زاد إبداع بعرف يكسِّر انيابن وولدا بمشي ديدابِن

يا دكتور خالد احسب الي الآن ان شعر ودبادي لم يلق حظه من الأعلام والداير يعرف شاعرية هذا المبدع المدهش ومفردته الموقلة في حفرها للموروث قليقرأ (عودة الدارويش- وجدي سعيد ) عملت تجربة صغيرة في بادية الكبابيش واردت ان اكتشف شاعرية بعض شعراءنا بطريقة اخري
بدأت كل اسبوع اقرأ علي تلامذتي وطلابي مقاطع من بعض شعراء العامية لا حظت اكثر التلاميذ والطلاب يتفاعلون مع شعر ود بادي واصبحوا يرددونه في الاسواق وموارد المياه ثم ايضا قرأت مقاطع من شعر بعض شعراء العامية علي فحول شعراء الدوبيت في البادية ايضا اكثرهم وقف عند هذا المبدع ولذا عرفت شاعرية ودبادي نأسف إذا اخذتكم بعيدا اعذروني لأنني مسكون بهذا الشاعر أقرأ في اشعاره منذ الثمانينات والي الان
كل يوم اكتشف شيئا جديدا في قصائده و لمحبتي لشعره سوف اردفكم ببعض المسميات في العامية
للضأن نقول حمل او حميلة ثم اذا صارت لها سنة نقول تنية واذا صارت لها سنتين نقول رباع واذا صارت لها ثلاثة سنين نقول سديس واكثر من ذلك نقول جامع نقول نعجة تِر اذا مرت علي حميلها ستة اوسبعة اشهروجاء وقت الفكة اي حيالها ولقاحها نقول ترَّها جاها
النَّاقة اللَّقحة هي الوالد جديد ولولدها نقول حوار ثم بعد سنة نقول مفرود ونسميها مُرباع واذا اكمل السنتين نقول ود لبون ثم حِق ثم جَدَع ثم تني ثم رباع
ثم سديس ثم جامع والفحل لأول مرة نسميهو بِكري ويربطون علي عنقه التمايم ونسميها العُقَّاد ودائما للإبل فحلين فحل يهيج في وقت الخريف ويلقح الإبل الي اوائل الشتاء ثم (يَفْدُر)وفحل في وقت الشتاء الي الرِّشاش نتلاقا باكر انشاء الله
محبتي لكم جميعا
في وقت الشِّتاء

Quote: جفير سكينو دمو ينز وداك برادو واسكت كب اهل السايحة والمتراوحة خاتمة وعاقبة بى قدامو سوا درب ده ماهو كتير على ولدا مربى على ضفاف النيل ويوم ولدوه دفنو ابواتو صرتو فوف مراقد الخيل

أخي عبيد الطيب
التحية طيبة سلاااااام
الشكر أجزله مافضت به من كلام طيب في حق هذا الشاعر الفحل
محمد ودسعيد ودبادي العكودابي
دائماَ بقول شعراء المفردة العامية وفحولها كثُر لكن من تهواهم روحي ثلاثة
ود بادي .. والقدال .. وحميد
ودبادي عندما يلقي القصيد يجول بك وتنسى انك تسمع لشعر تسرح بعيد بعيد وتحمل معك في الخيال تلك
اللوحة الجميلة من الحياة في تلك المناطق
انظر اخي لهذه اللوحة التي خطتها ريشة فنان تشكيلي ماهر
فقط في هذه الابيات الاربع قد جمع ثلاثة صفات حميدة لجده
الكرم ( جفير سكينو دمو ينز .. وداك برادو واسكت كِب )
حلال عقد وحكيم ( اهل السايحة والمتراوحة خاتمة وعاقبة بى قدامو سوا درب )
الفروسية والشجاعة ( ويوم ولدوه دفنو ابواتو صرتو فوف مراقد الخيل )
عاد كتير علي ولدا مربى علي ضفاف النيل )

محمد ودبادي رجل كريم ومتواضع ما لي شئ .. لكن لإنسانيته التي دفنت في روحه السمحة
في بيته ذاك الطفل يخدمك حافي لو رفت عينك
تراه سائلا داير شنو اجيبلك شنو حرم تقول عاوز شنو يا سلام علي ود بادي الإنسان التي تربعت طيبة أهلنا فيه
إنسان لو ألتقيته تحلف تقول هسي جا من حجر العسل انه لم يغادرها لحظة .. ولو تحدثت بلغة اهل البندر تحلف انه
مدفونة صرتها في ارقى احياء العاصمة وله في الحديث مقال واسهاب وبلاغة حتى في ونسته العادية
كل منانا زي ما قلت ان يجد فسحة في اعلام حتى ترى كل اعماله النور وينشدها القاصي والداني

Quote: دائماَ بقول شعراء المفردة العامية وفحولها كثُر لكن من تهواهم روحي ثلاثة ود بادي .. والقدال .. وحميد

شكرا دكتور المنسي وعشان بوست الجميل الرائع استاذ جلال عن مفردات بالعامية خلينا بدل تهواهم الرُّوح نقول:-
(ترايمهم الرُّوح) نقول رايمت النَّاقة الحوار اي حنت ورزمت له وآلفته حتي دّرت له الحليب
ونقول فرس فلان شموس ولكنها ترايم صاحبها وهنا تجد معني ترايم كما عندنا في البادية في هذا المقطع وهو جزء من مسدار صديقي (الشنفري الذي غادر ديارنا )
بعد ما رحلت كيف مطر الرِّشاش عدّيت
ؤسبت ديارنا يا زين الرِّجال ؤجفيت
ؤحرقت قلوبنا بي جمر الفُراق ؤ شويت
محال بعدك تِرايم روحنا يا الكاليت
المسدار طويل وفيه بعض من حياة وموروث البادية لو عرفت بريدك سوف ارفدك به ولملاحظاتك القيِّمة
اوكما يقول شاعر الدوبيت المتميز حنفي:-
في ناس أصلي ما لايِمْهُن
العبدو الرِّيال سوّهو كيف دايمهُن
انا لايم رباعتي الرُّوحي بِترايمهُن
وبي النَّضمي الدِّقاق بقدر بجيب تايمهُن
دايمهم من الدّايم والحي الدَّايم هو الله وعندنا في العيد تكون هذه الاهزوجة الجميلة (الله هو الدَّايم كريم هو الدَّايم)
المفردات العايمة هنا
1-رباعتي من رَبيع وربيعك هو صديقك والذي بهايمه بحوار بهايمك اي سعيتو بجوار سعيتك (السَّعية هي النِّعَم من ضأن -بقر -إبل)
محبتي

الاخ جلال لك الحية و لضيوفك مرة اخرى

اعتقد انك لو ربطت المفردة بالمنطقة الجغرافية التى تتداول فيها لكان ذلك انفع و اجدى

قد يكون لكل منطقة استخدام فرق بسيط فى المعنى و فى كثير من الاحيان تتطابق المعانى و كما اشرت لك فى مداخلتى السابقة فكلمة تبروقة منشرة فى كثر من مناطق السودان الاوسط و الغربى الا اننى لم اسمع بالمفردة التى اوردتها انت الا هنا اعلم ان المفردتين اسم لنفس الشئ ...

الكرنك ... فى كثر من مناطق السودان اسم يطلق على البيت البيضاوى الشكل و تبنى جنابه من المواد المحلية او المواد الحديثة و يكون اعلاه مبنى "بالقش" غير القطية و هى مستديرة الشكل و يكون اعلاها مخروطى و هتاك فرق بين القطية و "الدردر" و الاخير يكون اسفله مبنى بالطين الاخضر او بالطوب بيوت "السكة حديد" .. فالكرنك يعرف ب "ضهر التر" فى كسلا غير بقية السودان الاخرى ...

Quote: اعتقد انك لو ربطت المفردة بالمنطقة الجغرافية التى تتداول فيها لكان ذلك انفع و اجدى قد يكون لكل منطقة استخدام فرق بسيط فى المعنى و فى كثير من الاحيان تتطابق المعانى و كما اشرت لك فى مداخلتى السابقة فكلمة تبروقة منشرة فى كثر من مناطق السودان الاوسط و الغربى الا اننى لم اسمع بالمفردة التى اوردتها انت الا هنا اعلم ان المفردتين اسم لنفس الشئ

قيمان مرحب بيك

فكرتك جميلة وحانحاول بقدر الإمكان نضع لكل كلمة صيغة جغرافية... أما حديثي أنا والمنسي فمثاقه منطقة شندي

وأعتقد أن الإختلاف لن يكون كبيراً

Quote: الخلاف هنا في كلمة ( مو ) انت قولك انه لا يذبح الحمل والسخيل اي ذبحه من كبار البهائم وعرب الخلاء كانوا يتفاخرون بذبح الثمين وغالي على نفوسهم للضيفان الحلابة غالية ( لانها تنتج ) الدارة غالية ( لما تحمله في بطنها) العشاية والشاشاية والسباية وام درة لى ضيفانو بسخابن الحميل والسخيل هما الحمل البج الذي لم يكمل سنته وليس الرضيع هنا وهذا قصدي وبذلك يستوي المعنى مو ضباح

يا خالد ياود أعمي

رأي أستاذ عبيد الطيب تطابق مع ما ذكرته لك

Quote: مو ضباح سخيل ؤ حميل اي لا يذبح لضيوفه السخل والحمل وانما يذبح الأنعام الاخري مثل البقر والأبل

Quote: استاذ جلال وضيوفك الكرام سلام دكتور خالد المنسي شكرا لهذا العبق في رأي المتواضع ان الدكتور ود بادي اشعر من كتب بعامية الموروث لم اقل بالعامية السودانية ولكنني اكرر بعامية الموروث السوداني

أستاذ عبيد الطيب

أولا ياخ شكراً جزيلاً على المدخلات الدسمة وحقيقة الدكتور ودبادي شاعر صاحب كلمة ريفية رصينة

له مكانة كبيرة جداً في الريف السوداني ككل.

أتفق معك أنه لم يجد حظه من الإعلام وإمكن دا لي سبب هجرتو من السودان من زمن، لكنه بحال جيد

وصحة جيدة في دولة الإمارات .. وأنا شخصياً أتمنى أن يظهر في أجهزة الإعلام...

تحدثت يا أخ عبيد عن بعض المفردات الموجودة في العامية ولكنك لم تسهب، أرجو منك العودة

ومدنا ببعض الكلمات العامية التي وجدتها مختلفة في بادية الكبابيش، وياريت لو شرحت لينا مسميات

شديد الجمل من المحوية للزمام

Quote: ومدنا ببعض الكلمات العامية التي وجدتها مختلفة في بادية الكبابيش، وياريت لو شرحت لينا مسميات شديد الجمل من المحوية للزمام

شكرا استاذ جلال اولا الجمل نرسنه بالرّسن ثم نسرجه بالسرج وللسّرج ادوات اولا الطافتين واحدة طافة والجمع طُوَف
نصنعها من الجلد ونخيطها بسير رقيق كالخيط ثم نملأ داخلها بالصوف ونضعها واحدة علي غارب البعير والثانية علي السناب ونسميه
الكونيب ثم نضع السرج فوق الطُّوف والسرج مصنوع من الخشب وله ضالفتين نسميها الجوالس وواحدة جالسةوقرنين واشهر الشجر الذي يصنع منه السّرج هو الجوقان ونوسِّر السروج بجلد البعير ويا حبذا رقبة البعير نضع السرج ثم نكْرُب او نربط البِطان او الحقاب عند بعض القبائل ثم المحقبة ونُشبل المخالي وهي ايضا مصنوعة من جلد بقر الوحش او البقر وايضا نشبل الجراب وهو يشبه الجوال ولكن له معلق ومصنوع من الجلد ومن ادوات السرج المردعة او التركيبة وهي ايضا مصنوعة من الجلد ونشبلها علي القرون ونفرشها علي الجوالس ثم الرقبية وهي ايضا من الجلد ونضعها علي غارب البعير لتحمي الرجلين من شعر البعير ثم نفرش الفروة وهي ايضا مصنوعة من جلد اغنام اوبقر (التويلي)لا ادري يقينا ولكننا نستوردها من مصر ثم نشبل الضبية وهي كالخرطاية ولكنها من الجلد ودائما يوضع عليها الجبخانة ثم نفرش البطانية ونمتطي البعير وللبعير ايضا قيد نشبله في رجليه من الأمام ونتركه يرعي العشب ايضا حين يبرك البعيرنشبل عليه العِقال في رجله اليسري اها يا استاذ جلال سرجك وعفش جملك جهذ تب
محبتي

Quote: بعد ما رحلت كيف مطر الرِّشاش عدّيت ؤسبت ديارنا يا زين الرِّجال ؤجفيت ؤحرقت قلوبنا بي جمر الفُراق ؤ شويت محال بعدك تِرايم روحنا يا الكاليت

يا سلام يا العبيد
وانا رايمك في وجه الله
تستل في الرد لتأتي بما هو مفيد
وقالوا أهلنا سيد الكلام والنضمي ما بدورلو رايات
يا سيديامتعنا بهذا الحديث الجميل

ولي قدام
وكل المودة والتحيات للأخ جلال الذي اتاح هذه الفرصة لكي تأخذ هذه المفردة حقها تماماً

Quote: شكرا استاذ جلال اولا الجمل نرسنه بالرّسن ثم نسرجه بالسرج وللسّرج ادوات اولا الطافتين واحدة طافة والجمع طُوَف نصنعها من الجلد ونخيطها بسير رقيق كالخيط ثم نملأ داخلها بالصوف ونضعها واحدة علي غارب البعير والثانية علي السناب ونسميه الكونيب ثم نضع السرج فوق الطُّوف والسرج مصنوع من الخشب وله ضالفتين نسميها الجوالس وواحدة جالسةوقرنين واشهر الشجر الذي يصنع منه السّرج هو الجوقان ونوسِّر السروج بجلد البعير ويا حبذا رقبة البعير نضع السرج ثم نكْرُب او نربط البِطان او الحقاب عند بعض القبائل ثم المحقبة ونُشبل المخالي وهي ايضا مصنوعة من جلد بقر الوحش او البقر وايضا نشبل الجراب وهو يشبه الجوال ولكن له معلق ومصنوع من الجلد ومن ادوات السرج المردعة او التركيبة وهي ايضا مصنوعة من الجلد ونشبلها علي القرون ونفرشها علي الجوالس ثم الرقبية وهي ايضا من الجلد ونضعها علي غارب البعير لتحمي الرجلين من شعر البعير ثم نفرش الفروة وهي ايضا مصنوعة من جلد اغنام اوبقر (التويلي)لا ادري يقينا ولكننا نستوردها من مصر ثم نشبل الضبية وهي كالخرطاية ولكنها من الجلد ودائما يوضع عليها الجبخانة ثم نفرش البطانية ونمتطي البعير وللبعير ايضا قيد نشبله في رجليه من الأمام ونتركه يرعي العشب ايضا حين يبرك البعيرنشبل عليه العِقال في رجله اليسري اها يا استاذ جلال سرجك وعفش جملك جهذ تب محبتي

تتخيل يا أستاذ عبيد السرج دا ممكل يكون مؤلف رسمي وبكل أسف في المتحف السوداني ما عندو مكان

Quote: اولا الجمل نرسنه بالرّسن ثم نسرجه بالسرج وللسّرج ادوات اولا الطافتين واحدة طافة والجمع طُوَف نصنعها من الجلد ونخيطها بسير رقيق كالخيط ثم نملأ داخلها بالصوف ونضعها واحدة علي غارب البعير والثانية علي السناب ونسميه الكونيب

سلام آخوانا.. ماكن طيبين!!
ونشكرك جزيل الشكر يا أستاذ عبيد الطيب، ونشكر صاحب البوست و كل المداخلين.. ما قصرتو تب..
صدقاً لى كلامك يا عبيد.. الطافة و السناب ديل برضهن وردن فى الشعر السودانى..
فالشاعر قال فى جملاً ليهو:

سنابك حدّر الطافة و جرايدك نوا
كورك، سالو مزيكة و رطانة و عوّا

سالو: يعنى سوّالو.. و العوا الكواريك العالية،
خاصة لما تكون فى شكلة!! وأحياناً يقال لها الدَّيَّة..

و يا جلال قريبك ود بادى دا شاعر باتع خلاس..
مرثيته للشاعر اسماعيل حسن هى اللفتت نظرى ليهو.. قال فى مطلعها:

ختى الدمعة فوق الدمعتين ياعين
وبعد الليلة حابساها الدموع لى مين؟

وربما قال "أرمى" بدل "ختى"

وعندو واحدة تانية قال فيها:
الدكن البعدن قربن
فوق صنقور المَحَل اليابس كبّن

والمحل هو القحط والسنين العجاف الشداد تمر بالناس..
ولذلك مادح الجناب النبوى الشريف قال:

من الحلو مابحول
بمدح سيد الفحول
أب علامة..
سيدى الخصب المحول

فالمحول جمع محل..

و الصنقور من الشىء قمته..


إت يا جلال كان كدى بتعرف صاحبى الحاج سالم..
وين الزول دا؟

الاستاذ جلال وضيوفه الكرام



البوست بداية لمشروع ضخم يؤرخ لجانب مهم من الحياة الاجتماعية




--------------

بداية موفقة للعام الجديد



التعديل : للعلامة

السِعن

الكشامبير

الروب الرايب .. جمع الفرصة .. الغباشة

السعن يصنع من جلد صغير الماعز ( العتود )
بدءً لازم اختيار جلد قام بسلخه ضباح ماهر .. حتى لايكون في قد
يدبغ الجلد
ومعروف طريقة الدبغ وفيها
يرش الجلد بملح ويترك ليجف وبعد يدبغ بالقرض المر
تخاط اطرافه ( الأرجل الأربعة والرقبة ويترك الجزء الخلفي مفتوح من خلاله يصب الروب ليخش ومنه تجمع الفرصة باليد ومنه نصب الغباشة )

الروب .. وهو اللبن الرائب ( عملية تخثيراللبن وهي عملية معروفة ) وبعد ان تجمع كمية من اللبن الرائب .. بعدها يصب في السعن ليخش
الخش : هي عملية حركة منتظمة لكي تتجمع الفرصة
الفرصة هي عبارة عن تجمع خلاصة اللبن الرائب الغنية بالدهن

الكشامبير وهي عيدان ثلاثة تشكل في شكل اعمدة هرم .. ( معلاق حلة الابوي ) مربوطة من أعلى ولا تكون العيدان طويلة حتى تمكن المرأة من خش الروب وهي جالسة
يربط السعن في الكشامبير ربطة محكمة ثم تبدأ المرأة في خش اللبن الرائب بحركة منتظمة ( إلى الأمام ثم بنفس الحركة للخلف )

بعد ان تجمع الفرصة .. توضع في نار هادئة لتذوب ويكون الناتج ( سمنة بلدية )
الغباشة : وهي السائل من اللبن الرائب بعد ان تخرج منه الفرصة .. وهو في الطعم السيولة زي ( الايران التركي .. او الكفير المجر .. او البن ابـ في دول الخليج

ههههههههههه ونسوان الزمن دا خلن السعن بقن يجمعنَّ الفرصة في الغسالة الكهربائية
كيف ؟
يوضع اللبن الرائب في اناء بلاستيك له قفل ثم يحكم القفل بشطرطون لاصق حتى لا يندلقالسائل داخل الغسالة .. وترمي الأنا وبه الروب مع الملابس
مع حركة الغسالة تدور بالملابس بحركة منتظمة تتجمع الفرصة
موش بقن حريفات .. بدل ما تتفن في بنبر نصف ساعة أو زيادة تخــش لما يدها تؤلمها

ولي قدام

Quote: لسِعن الكشامبير الروب الرايب .. جمع الفرصة .. الغباشة السعن يصنع من جلد صغير الماعز ( العتود ) بدءً لازم اختيار جلد قام بسلخه ضباح ماهر .. حتى لايكون في قد يدبغ الجلد ومعروف طريقة الدبغ وفيها يرش الجلد بملح ويترك ليجف وبعد يدبغ بالقرض المر تخاط اطرافه ( الأرجل الأربعة والرقبة ويترك الجزء الخلفي مفتوح من خلاله يصب الروب ليخش ومنه تجمع الفرصة باليد ومنه نصب الغباشة ) الروب .. وهو اللبن الرائب ( عملية تخثيراللبن وهي عملية معروفة ) وبعد ان تجمع كمية من اللبن الرائب .. بعدها يصب في السعن ليخش الخش : هي عملية حركة منتظمة لكي تتجمع الفرصة الفرصة هي عبارة عن تجمع خلاصة اللبن الرائب الغنية بالدهن الكشامبير وهي عيدان ثلاثة تشكل في شكل اعمدة هرم .. ( معلاق حلة الابوي ) مربوطة من أعلى ولا تكون العيدان طويلة حتى تمكن المرأة من خش الروب وهي جالسة يربط السعن في الكشامبير ربطة محكمة ثم تبدأ المرأة في خش اللبن الرائب بحركة منتظمة ( إلى الأمام ثم بنفس الحركة للخلف )

شكرا دكتور المنسي الماك منسي والله سماحتك بتنسي الزول عربو والله صباحك نعيم وسرور
بمناسبة الدباغة اولا نعطن الجلد بسطل مملوء بالماء والرَّماد
شوف جمال اهل البوادي المستشفين في كل شئ جمالا كما يقول جماع
احدهم وهو قادمٌ من الجنوب البعيد رحلة النشوق او الشوقارة آنس نارا شبَّت له في القِناف البعيد
شامها ان تكون اوقتدها احدي الحسان للرَّماد (الهبود) لبدغ جلد فانشد قائلا:-
النّاس في القَوّا وإنت مشوقِر
رِعيت عَضاوة الدَّلج الصعيد ناس اوقر
ديك البُهرة في القَف القِنافو مِتوقِر
هبود جلد ابو نُصَّاً رقيق مو مِبوبِر
اولا خاطب بعيره حيث قال عندما ترعي إبل الناس قش القَو وهو القش اليابس انت بترعي قش الخريف الطري (عضاوة)
لأن صاحبك تحرك باكرا لرحلة الجنوب حيث تهطل الامطار باكرا وهذا يدل انه بعيره سمينا وقوي
ثم يخاطبه قائلا اتري تلك النار التي شبّت لاحت لناظرنا اظن قد اوقدتها صاحبة الخصر النحيل
(نُصاً رقيق مو مِبِوبِر) وهذا شبيه بقول المرقش
علي ان سما طرفي لنارٍ يشِبُّ لها بذي الأرطي وقود)
اما السِّعن يا العشي ابولبن حلاة ماهو وحلاة روبو واحيانا نعاوده بمسح القطران حتي لا (يلوبِن) اي يوشل الماء والوشلان
واللُّوبان هي عملية تدفُّق الماء (شويه شويه) من السِّعن والقربة بدون ثقوب اها تعال شوف سلَّم قال شنو
دومَاتَك حاكَن السِّعِن القديم ؤ مِلَبِّن
ؤ رَقَلَك بِمْحَق الحَدَبي الطِّوال ؤ مِدَقِّن
طالْب المِنُّو ما ظَنّيتُو عقلي إيَقَّن
ؤ غَوَّر جَرْحُو في تَمرة فؤادي مِحَقِّن
اها دي كان شرحتها بتفسد المعني
اما الغُباشة الماها دِراشا بشيل الطَشاشة وبتحود العماشة وكمان شيوخنا الشناقيط (المورتانيين)
يحبونها ويتناولونها كثيرا ويسمونها (الزَّريق) كان دايرين بعض مفردات الموروث المعتَّقة وموقلة في القدم
إتاوقوا بوست قصة ابو زيد الهلالي ..وبوست الفكي ابوبعراية)
اها ودعتك الله يا الرايمتو روحي في الله
لكم جميعا محبتي

Quote: دومَاتَك حاكَن السِّعِن القديم ؤ مِلَبِّن ؤ رَقَلَك بِمْحَق الحَدَبي الطِّوال ؤ مِدَقِّن طالْب المِنُّو ما ظَنّيتُو عقلي إيَقَّن ؤ غَوَّر جَرْحُو في تَمرة فؤادي مِحَقِّن اها دي كان شرحتها بتفسد المعني

فعلاً بتفسدو كان فسرتها

كلامك جميل يا عبيد ومليان وشبعان ربنا يديك الصحة والعافية

نحاول نغطي بعض المفردات التي لم يأتي بها حديثنا عن السعية (البــهايم) عشان ننتقل لي محور تاني:

*المحويت: دا حبل بيلفو بيهو كرعين البقرة الوراء لحظة الحلبيب والبقرة الهدية بتتحلب بلا محويت أو بيكون مختوت خفيف.

* (ضلفوها): البــهيمة لامن أضافرينا يطولن خصوصاً البقر، بيجي زول متخصص شايل معداتو وهي منجل "أداة لحش القش"

وبيسخنو ويقطع ليها أضافرينا (ضلوفها) ومفردها ضُلُف. دا بعد ما يكتفوها ويرموها في الواطا.. يعني يضفروليها.


* الوسِم: البهايم بيوسموها ودا أحسن نتناولو مع المتداخلين ... مسميات الوسم وأشكاله وملكيته لكل قبيلة .. فوائده لامن تروح أو تنسرق بهيمة

بتنعرف لو مرقت في أبعد مكان .. يلا إيدكن معانا في الوسم

لمن له كتاباته من خارج البورد نقبل مقالاً قصيراً حول الموضوع

[email protected]

Quote: الروب الرايب .. جمع الفرصة .. الغباشة

حبيبنا المنسي ليك التحيةعلى الكلام الجميل دا

وللروب وخش الروب الصباح، عادات: بما أن عملية خش الروب مرتبطة ارتباط مباشر بلبن البقر وذلك لأن الغنم لا تكفى للروب
إلا نادراً، فإن في منطقتنا - نهر النيل - عادة تتبعها بعض العائلات إلى الآن، ولها شروط وتوقيتات،
* هذه العملية بعد استخراج الفرصة من السعن، تترك كمية كبيرة من الروب يتم توزيعه للجيران كل حسب حالته البعض يفضل
أكله بالكسرة المرة والسكر والآخرين يحولونه إلى ملاح كرارة "نعيمية خفيفة". وهذه العادة محظورة في يوم الأربعاء، لأسباب أحسبها
غير منطقية منهم من يقول أن البقرة - بتموت - وآخرون يرون أن البقرة -بتغرِزْ - أي يتتوقف عن در اللبن. لذلك يتوقف الجيران عن
التمتع بالروب إلى حين يوم الخميس، وهذا اليوم مصدر إختلاف عند البعض.
* لو جاتك كورة لبن من زول لازم ترجعا ليهو فيها شي نظام فال وكدة.

Quote: البوست بداية لمشروع ضخم يؤرخ لجانب مهم من الحياة الاجتماعية

عمر عبد الخالق كيف حالك .... ربنا يقدرنا

الوسِـم عادة ضاربة في القِـدم مارسها العرب منذ الجاهلية

وهي أما بالنار والكي في جسم البهيمة، أو قطعة في مكان وبطريقة معينة في الأذن

لاسيما الأغنام نورد بعض أنواعها:

المحارة والمنقاش: قطعة بالسكين في مؤخرة الأذن في شكل مثلت قاعدته للداخل وأخرى للخارج.

الضبانة : قطع جزء بسيط من الأذن وتركه متدلي

الريشة : قطعة جانبية في الأذن

العقرة : قطع معوج في بطن الأذن

الهلال: قطعة في الأذن على شكل هلال

قطفة: قطع في الأذن الشمال

الـخُـرُس: شرخ في الجانب الخلفي من الأذن

نقيف في القطع على الأذن ونراجع لو نسينا ... بعد داك نجي للوسم بالكي

.

Quote: دومَاتَك حاكَن السِّعِن القديم ؤ مِلَبِّن ؤ رَقَلَك بِمْحَق الحَدَبي الطِّوال ؤ مِدَقِّن طالْب المِنُّو ما ظَنّيتُو عقلي إيَقَّن ؤ غَوَّر جَرْحُو في تَمرة فؤادي مِحَقِّن

داالحديث البخلي الزول يعضي إيديهو
العبيد عليك الله تزيد
نحن كنا موكرين في بلاد طيرا عجم
وجينا قطعنا نصف المسافة ويزيد لبلداً طيرا فكَّ الحنك

أدينا من القطعو اخدر وميل علي الوصف وتعريف المفردة الصعبة
نحن ولاد بندر

تحياتي ومودتي

الاخ العزيز جلال
تحياتى واحترامى
الرجاء مراجعة هذا البوست وابداء الرائ
مع كل ودى واحترامى
محتاجين باحثين فى التاريخ

فى موضوع اللبن والروب نسيتو البخسة و الكمبوت!
ويا عبيد زدنا من النم مع الشرح .. وأنواع الجمال من الحاشى لى التلب

صغير الحس كبير القمة
رخى سماعتو جافل من زوال العمة

عنقك باهي دقسة ؤكَحلي ضامِر هافك
(ؤديسك) كابي مو شَنشُون مغطي أكتافِك
الرَّيم البِِفك بعد الهِجُوع عَسَّافِك
قطر إسنا البِشيل ألْبِل رحيل عَطَّافِك

عنقك باهي -طويل ومدردم -كحلي اي عيونها كحيلة-الدَّيس اي شعرك كابي اي طويل ومتدلي
شنشون اي قصير الرَّيم هو الدعاش- الهجوع هو اخرالليل- العسّاف اي الكبريت وعطر المرأة(الخُمرة)
العطَّاف جمع عطفة وهي الهودج
اها دي ليك يا الرَّايمتني في الله يا دكتور المنسي ويا البيتي وكان مافي مفزور الجراب ملان
لكن ارجعوا لسودانايل
محبتي

Quote: فى موضوع اللبن والروب نسيتو البخسة و الكمبوت!

لم ننسى
وأن ننسى ما بننسى كلمة غرست في أعماقنا
لكن كما ذكر الحبيب ( جلال ) في أول البوست كل يدلي بدلوه وتختلف المفردات من بئة لأخرى
وعاوزين الفايدة تعم ونضف حصيلة من كم المفردة السودانية العميقة لعقولنا الخربة

كدي لو عندك فيهن نم سوو

تحياتي ومودتي اسامة

Quote: عنقك باهي دقسة ؤكَحلي ضامِر هافك (ؤديسك) كابي مو شَنشُون مغطي أكتافِك الرَّيم البِِفك بعد الهِجُوع عَسَّافِك قطر إسنا البِشيل ألْبِل رحيل عَطَّافِك عنقك باهي -طويل ومدردم -كحلي اي عيونها كحيلة-الدَّيس اي شعرك كابي اي طويل ومتدلي شنشون اي قصير الرَّيم هو الدعاش- الهجوع هو اخرالليل- العسّاف اي الكبريت وعطر المرأة(الخُمرة) العطَّاف جمع عطفة وهي الهودج اها دي ليك يا الرَّايمتني في الله يا دكتور المنسي ويا البيتي وكان مافي مفزور الجراب ملان لكن ارجعوا لسودانايل محبتي

عبيد أخوي عساك طيب وشديد
هيييييييييييييييع وكب تبيت لآمن شرطتَّ الجزمة والوحيدة

أها يا أخوي هاك دي من نواحي شندي العزيزة

قول لي البشرى عيني والغميد إجافّو
من الودعونا وتاني ما بنشافو
الشتل البرد ليلو وضرب عسافو
طبّق قلبي في الشنطة ورِكب صفافو

قول لي البشرى الغميد جافاها
ودّر.. بقيت الكلمة بتلافاها
شارطني وشروطو قبيل معاي وفاها
مكنة قلبي حـوّلا بي اليمين لفّاها

ومــا أجمل رائحة العسّاف وكتين يضرب
بتلافاها ( يتلافى الشئ اي يمسكه أو يقبضه أو يلزمه )
يقال آ جنى إتلافى الداهي دا

الغميد (الغمدة اي النوم ) وقال ودبادي
هوى يا وليد ...
حصل صحاك عز الهجعة
صوت شتماً بعيد مخنوق
وجاتك شخرة الطنبارى مشتاقاً
يسوى القوق
ونومك طار واتقسم
والرشرش صبح مفروق
واتلفحت نص من توبك الجرجار
على الدلوكة سايق سوق

بنات حواء هنّا رحمة لنا ... بحمن الغميد

الفنان البشرى جاد السيد مطرب في منطقة شندي من جوير ود ضبعة غرب شندي

Quote: قول لي البشرى عيني والغميد إجافّو من الودعونا وتاني ما بنشافو الشتل البرد ليلو وضرب عسافو طبّق قلبي في الشنطة ورِكب صفاف

النَّاس البريدهن عذبوني صدُّوا جارو ؤجافو
ويا الأستاذ غرامي العذري وين إنصافو
عذاب ريد البنات إن من خِلِق ما شافو
ما قا لولو ناس قيس ليلي هلكو ؤهافو

(هافو اي ماتو )
يا سلام عليك وعلي ودبادي شوف روعة الشعر (حصل صحَّاك عز الهجعة حس نغما بعيد مخنوق
وجاتك شخرة الطمباري مشتاقا بسوِّي القوق) وإتلفحت نص من تويك الجرجارهذا رجل مبدع مبدع ونكهته طااااااااااعمة
لوكنت اتواصل مه لقلت لها شخرة الطمباري غيرها الي (كرَّة الطمباري) لا لا هذا تطاول لشاعرٍ لا افضل عليه احد
اعجبتني مرسيته للضخم حميد وسمعت له شعر نمطي واعجبني شعره النمطي لأنني اتذوقه جيدا تكفي يا دكتور المنسي
إن تمتلك شئ من جديد ود بادي ارفدني به شكرا للفيديو والغنا الطَّاعم

نأسف استاذ جلال علي المشاترة لكن اليك بعض الوسم
الباعج :- (محور)خط افقي علي صفحة البعير وهوموسم بعض قبائل الكبابيش
الضرعات :- (محورين) خطين متوازين علي زند البعير (ضراعه)
الشَّابط:- (محور) خط رأسي غير مستقيم من علي زند البعير والي فوق الركبة
القلادة :-(محور) خط في شكل نصف دائرة علي عنق البعير
الوِتِد:- (محور)خط رأسي مستقيم علي ورك البعير
محبتي

سيد الدار جلال
وضيوفه الكرام العبيد والمنسي
وكل الحبان المتداخلين..لكم السلام والمحبة
قلنا نتاوِق بي فوق الحوش:

عنقك باهي دقسة ؤكَحلي ضامِر هافك
(ؤديسك) كابي مو شَنشُون مغطي أكتافِك
الرَّيم البِِفك بعد الهِجُوع عَسَّافِك
قطر إسنا البِشيل ألْبِل رحيل عَطَّافِك

الكلام السمح دا جابو العبيد , وقد جاء في العامية مرادفاً
لكلمة الديس بمعنى الشعر.
الهِضليم
الوضيب
القُرقُد
الروبة( وهي مؤخِّرة الشعر) الكنينة الروبة تِلِّيها, أفرديها كناية عن الشّبّال.
هذا وأنتم أعلم مني .

كامل الود

http://www.youtube.com/watch?v=A6ypQ_WySsM

شكرا الاستاذ البيتي علي الرابط وعلي عبق البادراب

ابواتك تلوب المابقدو الدانة
والمجنوب بطيبوا ؤبرقعوا الخربانة
واكيد البخاصمهم بضوقوا الهانة
احمد ربي أني الفي طينتم خلقانة

Quote: الروبة( وهي مؤخِّرة الشعر) الكنينة الروبة تِلِّيها, أفرديها كناية عن الشّبّال. هذا وأنتم أعلم مني .

نعم أخي محمد فضل الله المكي
ذكر الشاعر ود النزيها... شاعر أغنية الكنينة
( الكنينة الروبة تلّيها .. الكنينة وخلق اللهأنجضيها .. الكنية الدنيا شن فيها .. بنريد ونموت نخليها )
أعرج شوية
ودالنزيها شاعر له باع طويل في الشعر بالعامية وله الكثير من الاشعار التي تغنو بها في تلك المنطقة وقطعهم اخدر زي ما بقولوا في الحفلةلو عجبو شئ بقطع في ويلحنه طبعاً اللحن في غنا الدلوكة مو قاسي )
ودالنزيها من قرية ساردية ( الشقالوة ) التي أصبحت حي ساردية وهي اقرب شمال مدينة شندي .. والكنينة من حلة المحطة في شندي .. ومن اغانيه الاخر التي تغنى بها الفنان اللحو ( غزلية )
غزلية ويا سلمان ود العِوضية
غزلية يا البادراب بنية بنية
غزلية يا باسبار ابو العونية
جاني مسرح القادرية ..
فتَّ الحابي وهرا للكبيدا هرية

تحياتي محمد فضل الله

قنبور الزوارة

جرت أهلنا في السودان قديما عند قدوم مولود بالذات الذكور يشيلو له الزوارا ( وهي النزر لشيخهم المعروف )
يعني جلال دا زوارته كانت فوق تور الجريف أب عنقريباً طار وركا في بسابر
يترك شعر الرأس في الوسط ويحلق الباقي كل مرة فيصير هذا القنبور طويل ويقصيوم ان يشيلوا الكرامة ويمشن النسوان لقبة الشيخ
المعني بالزوارة ( الكرامة تقدر حسب الحالة المادية لاهل الوليد .. قد تكون خروف ,, ولا لِقيمات ورز .. وقد تكون بليلة عيش )
وبعدها يقص القنبور ...
نحن يا جلال ما حضرنا زمن القنبور والزوارة لكن شيخ حبوبتنا هو تور الجريف ابــ عنقريباً طار وركا في باسبار العوني .. وشيخ اهل والدتنا
حامد ابــ عصا في ام علي .. لكن ما تنكر يا جلال لاني شفتَّ صورة لمحي الدين وعندو قنبور وانت اكبر منه سنا هههههههه

ويالولد البشيل مدقاقو
قولة خير على القمره
يقابل الجاية متحزم
ويدارك الجاية متلزم
كلام فاسك على أرضك
يبقى عديلة يا بيضا
ويبقى زفاف تزغرد ليه قمرية
* * *
وقبال حول تغّيم غيمة قِبلية
ترش الدارة والحدبه الصعيد الحلة
ويا رحمة نداوة الصفقة
في النسمة الصعيدية
ويا جهرة نهار الليلة بدرية
رحيح جنياتنا فى الحدبة الصعيد الحلة


رحمة نداوة الصفقة تعني أو يعني بها الشاعر الجميل القدال

جرت عادة أهلنا لما يفرغ الواحد من صلاته ويرتل اوراد بعدها يتوجه للكريم الأحد الذي لا يرجع منه طالب ومتعشم
صفر اليدين ( وكان الصحابة عليهم رضوان الله عليهم يدعون الله في كل شئ وحتى لو انقطع نعله )
وبعد أن يفرق من الدعاء يصفق يديه ويمسح وجهه بها .. وهذا هو معنى رحمة نداوة الفقة

تحية وأهداء للأخ جلال جبرين من ديار أهلنا الحُنان عونية وكلاين

سلام يا قوم،

البشرى جاد السيد:

يا الجميلين سلام كدي معزوين إتاوقوا سودانايل

Quote: نحن يا جلال ما حضرنا زمن القنبور والزوارة لكن شيخ حبوبتنا هو تور الجريف

دا ودالتويم ،، جنهن يقولولك مودين فلان لي ود التويم عندو غريغران

Quote: نحن يا جلال ما حضرنا زمن القنبور والزوارة

كان ما حصرتو إنت البكون حضرو منو؟ لا تسغر روحك رفاقتك في الشدر وقعن

Quote: الاخ العزيز جلال تحياتى واحترامى الرجاء مراجعة هذا البوست وابداء الرائ مع كل ودى واحترامى

بوست جميل يا بيجاوي لكن مالكن ما علفتوهو كلام؟

المنسي والبيتي وعبيد نأسف للغياب يومين للمشغوليات

.....................................................

فيما ذكرتم في سيرة الدوبيت:

بعد ماكنت متصبين تحلب الشايلة
بقيتا تتاتي حت الوقفة صبحت مايلة
بقت القندفة الكضابة فيك مي خايلا
ليك الفروة لا تغريك هادي الزايلة

الشايلة: البهيمة الوالدة جديدة، ويقول له، كنت متصبين أي كنت قوياً مصدرها صبي. والشايلة يصعب حليبها لكثرته
تتاتي: أي يمشي على مهل
الفروة: صلاية مصنوعة من الجلد بدون إزالة الصوف

ولحين ميسرة
ويفضى ود جبريل

جلال..حبابك يا صديق..
و حبابك الأصدقاء هنا.. قاعدين نساعد بالمتاوقة ساكت..

بالنسبة للصديق محمد فضل الله المكي.. فعلا الهضليم اهلنا قاعدين يشبهو بيهو الشعر الداكن السواد ..طويلة السبيبة..و الهضليم هو ذكر النعام...و الأنثى تسمى الربيداء..!

و يا محمد.. انا كان جدي نصر الدويد.. قاعد يحلق لي..و يخلي لي خمسة قنابير: الأمامية (قودي).. اليمني (ميلي).. اليسرى ( اعدلي).. الأخيرة (سوقي)..و الوسطانية (اركبي اتوهطي)..!
عندنا نوع حلاقة تانية ..وبيخلوا ليك جزء من الشعر على الجانب الأيمن أو الأيسر..أو في وسط الرأس.. و قاعدين نسميهو ( القرن).. و هو حلاقة للأطفال (ذكور و اناث..من عمر خمس سنين و تحت)..و هو يشبه طريقة حلاقة الهنود الحمر الماهوك في امريكا...!

ياريت تحكو لينا عن الشلوخ..اساميها..طقوسها..العمر البيحصل فيهو ..باقي بنياتي سألوني..و ما عرفت التكتح غير اقول ليهن.. ده.. Sudanese Tatoo

في حاجات تانية.. اتذكرت..لو لقينا فرقة نجي نحكي عن معانيها.. لوضع اعتبار البيئة و كده..!!

و كل سنة و الجميع بخير..

كبر

مشغوليات حياة عادية...

وجياييكم واحد واحد