المغتربون، البقرة الحلوب

الصادق المهدي فيهو روح النكتة، وزول أديب.. لما مسك رئيس وزراء بعد الانتفاضة في 6 أبريل، قال قولته الشهيرة ( المغتربين هم البقرة الحلوب)..
والله المغتربين أكثر ناس مساكين.. لطشهم كلو كبار .. كبار.. وحياتهم أصبحت غالية، خاصة مغتربي الخليج.. التعليم 95% اصبح خاص.. وناس مافيا المدارس الخاصة، أصبحوا يزيدوا السعر كل صبح جديد.. حتى اتماصت المعونة لتعليم الابناء البيديها ليك مكان شغلك، وأضحت لاتساوي ربع القيمة الحقيقة للمدارس؟ ده حينتو في مدارس عادية مافيها نشاطات وألعاب للأطفال. لو فيها نشاطات، بإسم النشاطات دي، عاد خم وصر.. يضاعفوا السعر ناس المدارس الخاصة.. أما إذا عايز تدخل أولادك منهاج أمريكي والله منهاج بريطاني، عاد شيل شيلتك..
المدرسة الكندية في أبوظبي سعر السنة لطالب في المرحلة الابتدائية 45 ألف درهم في السنة والدولار يساوي 3.68 درهم، إن شاء الله عاد ياربي ناس التعليم يوقفوهن عند حدهن..ستة سنوات نحنا بالحالة دي!
المدرسة الأمريكية سعرها 60 ألف درهم في السنة لطالب
المدارس العادية المافيها نشاط ومنهاجا عربي وكدة 15 ألف درهم في السنةوياها المدخلين كل الغبش فيها أولادهم ودي ذاتا جرستهم جنس جرسة ؟، لامن قالوا الروووب....ويجيك الطالب لازم البيت كلو يحل معاهو ويفهمو من جديد كل شئ.. والأسرة تخلى نشاطا وفرحتا ومرقتا وتقعد قصاد الولد ده! كان أختو الأكبر منو ..كان أمو .. كان أبوه..
والراتب طاح شمار في مرقة..
وهاك يا شيكات للمدارس، وهاك يا صناديق من الحريم عشان فلذات أكبادن يقروا.. لازم جناك يقرا حتى لو متا من الجوع؟
ويالله هاك يا مطارادات من ناس المدارس والبنوك لتسديد الشيكات الطايرة من أولياء الأمور الأصلهم هم كتبوها وما عارفين يسددوها من وين؟ بس كتبوها عشان أولادهم يقروا وكدا.. بعدين الله كريم.. وهاك يا رنين تلفونات من المدارس والبنوك.. وتوبيخ وذم.. نديك يومين تسدد. والله ما تسدد تتواصل التلفونات على راسك صباح مساء من البسوى والما بيسوى..والشرطة قاااعدة
ومع كدة ( المغترب هو البقرة الحلوب) حلوب والله حجيرتي عند بقيرتي يا ناس الضرائب..
لما الكون كلو يصير أزمة أخلاق.. ينتهي طعم كل شئ
المدارس صارت مافيا سوق
والمستشفيات صارت مافيا سوق
والجامعات صارت مافيا سوق
ياخي نحن زمان تعلمنا في السودان وكان يدونا قروش وصابون وظهرة وكراسات وأقلام.. وتصاريح سفر ونثريات إجازة..

Quote: المغتربون، البقرة الحلوب

منصورى سنتك مباركة
بقرة : يجوز!!!!
لكن حلوب دى فيها قولان
فقد مصع الضرع ، يعنى مافى طريقة رضاعة
بعد ده اللا يلوكوهو لواكة ضرع الجن ده،،،

هههههههههه
صديق الموج.. والله بقى ضرع عجوف..
موش زمان يا صديق الموج طلعت فتوى كدة من واحد أستاذ في الأزهر.. وجابوها هنا في المنتدى..
والفتوى قالت : ( إذا انت وزميلتك في المكتب براكم، دي تعتبر خلوة حرام.. بعدين عشان تخلى الخلوة حلال، تقوم ترضع فيها، عشان تبقى أختك من الرضاع وكدا. وتبقى حلال عليك الخلوة!! وجابوا كمان أحاديث وقصص!!
غايتو جنس لولوة!
معقول الدين يبقى حاجات زي دي!
النبي صلى الله عليه وسلم قال :ياابن عمر استفت قلبك، وإن أفتوك ، وافتوك
ياخي زمان الغبش عندنا لابيحتاجوا لى فتوى ولا حاجة
عقلو ده بس!
ميزان الشرع
.......
تعرف عندنا زمان زول عالم في المناصير خريج الأزهر منصوري وزول زاهد في الدنيا
قامت الشؤون الدينية قالت ليهو أنت زول زكي تعال نعينك. وكيل وزارة الشئون الدينية..زمن عون الشريف قاسم..
رفض قال احسن لى أقعد مع مناصيري ديل وآكل خضاري من بابوري دي؟ وأحاضر الناس في الجوامع بما ينفعهم في دينهم
الله يجعل الجنة مثواه
إسمو علي الحسن العديرقاوي
أها جبتو ليك بي حكاية الفتوى دي
.......
واحد في الجامع بعد صلاة الجمعة قام سألو ، قال ليهو يا شيخنا.. أدينا درس في الحلال والحرام عشان نعمل حسابنا وما نقع في الحرام
قام ضحك وقال ليهو
قولته الشهيرة في المنطقة عندنا
قال ليهو ( الغنماية تعرف الحلال والحرام! خليك من بني آدم العندو عقل!)
قال ليهو كيف يا مولانا؟
قال ليهو ( هسي دي الغنماية لما تلقى ليها فرصة في دكان الفراشات، وجات بي جنبهن، تملا جضما من عيش الفراشة بسرعة وتجري جري ... لكن كدي أنت خت ليها عيش في صحن وكورك ليها، شوفا حاتجري منك والله تاكل بإطمئنان)