عمر البشير ... انه على كل شـــئ لقدير!!

اظهار البشـــير بانه هو حلال العقد
او ذلك الفارس الذي يمتطي صهوة جواده الابيض
أو ذلك المخلص والمنحاز الى جانب الوطن والمواطن
لهو امر بالغ السخرية والمضحكة
فلم تعد تلك المكنات تمشـــي على المواطن البسيط ... والله صحي

Quote: البشـــير هو حلال العقد و ذلك الفارس الذي يمتطي صهوة جواده الابيض و ذلك المخلص والمنحاز الى جانب الوطن والمواطن

يلحقنا وينجدنا.

صدقت يا دفعة، هو كذلك.



سلآمات...

Quote: يلحقنا وينجدنا. صدقت يا دفعة، هو كذلك.

أكتر من كدا يا دفعه الله الا يطلع زيتنا ياخ!

أنا غايتو قنعان تب خليهو يقلبني قرد عدييييييييييييل

تحياتي يا معاوية يا دفعة

البشير يعفو عن عن فلان
البشير يامر باطلاق ســـراح فلان
البشير يامر بعلاج فلان
..
..

الخ
الخ

كل هذه وغيرها اصبحت اشياء ممجوجة ومضحكة
فالبشير هو المتسبب في كل ذلك ثم ياتي بكل بساطة
بأن يأمر بايهام الناس بأنه يقف وينحاز الى جانب الوطن
فهو محض تلميع وورنيش لجزمة قديمة ومتسخة لا يظهر الورنيش حسنها
وسناريو لمسرحية سيئة الاعداد والاخراج
ولعل آخـــر هذه الدراما هي أمر سعادته بزيادة الحد الدنى للأجــور

المسرحية الاخيرة بطولة وزير المالية ورئيس الاتحاد العام لنقابات عمال السودان
تساببوا وتجادلوا وتشاتموا عبر الأثير وفي قبة البرلمان
وعلى صفحات الصحف وسوح وسائل الاعلام المختلفة
اتحاد نقابات العمال يصور نفسه منحازاً لقضايا العمال
ووزير المالية يظهر نفسه ممسكا بمال بيت المسلمين
كي لا يدفعه لغير مستحقيه من المسحوقين والعمال الضعفاء
ومع ذلك فهم كمبارس كبير كل يؤدي دوره باتقان
ليأتي البشير الذي هو كل شئ قدير ليأمر بزيادة الأجور



ألم أقل لكم إنه على كل شـــئ قدير؟

Quote: يأمر بايهام الناس بأنه يقف وينحاز الى جانب الوطن فهو محض تلميع وورنيش لجزمة قديمة ومتسخة لا يظهر الورنيش حسنها وسناريو لمسرحية سيئة الاعداد والاخراج ولعل آخـــر هذه الدراما هي أمر سعادته بزيادة الحد الدنى للأجــور

ونزيدك من إندينا

ويامر بقتل مجموعات بشرية كااااااملة

Quote: إنه على كل شـــئ قدير

يا ود البشاري يا حبيب
حيلك حيلك, عارفك زعلان لكن كلمة زي دي كبيرة والله

Quote: اتحاد نقابات العمال يصور نفسه منحازاً لقضايا العمال

أوّل مرّة نشوف لينا إتحاد نقابات عمال رئيسه بروف.
والله صحي...

يا زول هو ال 425 ما بتكفي يوم واحد ..
ولكن بتقعد قدر شنو ..

يامر بزيادة المرتبات !!!!! نعم الامر ..

يصدر البشير قرار زيادة الحد الدنى للأجور قبل نهاية العام بيوم او يومين
حتى يبدأ العام الجديد بمنة من الرئيس على شعبه العامل
وزيادة في الأجر للشعب ليكون الحد الأدنى لها هو 425 جنيه ظناً منه بزيادة اجره عند الله
هذا المبلغ الزهيد الذي قد لا يكفي أي اسرة صغيرة مؤونة المواصلات
ولما كان لا بد لأي مسرحية أن تنجح ان يكون لها تسويق ودعاية واعلان
ها هم اعضاء المؤتمر الوطني يقومون بتلك الدعاية لتصوير الرئيس البشير
بصور المنجد والنصير للشعب في قضاياه العادلة
ويؤمّـن على حق شعبه في الحياة الكريمه بتفضله عليهم بزيادة الأجور ليكون حدها الأدنى
425 جنيه في حين وصلت الأجور الى 5 و6 و7 ، 15 مليون جنيه
فريق التسويق حتى هذه اللحظة يقوم بدوره كما ينبغي
وطبعا لا نريد أن نبهت ســيدهم الرئيس بقولنا إن الشمس تشرق من المشرق
فيبهت كما بهت النمرود بن كنعان من قبل خصوصاً والرئيس يعاني من وجع الحلق
..
..


منذ ان كنا موظفين بالدولة قبل عشرة اعوام يتوقع الموظف العام دوماً
في نهاية السنة مراجعة الأجور وزيادتها
هذه الزيادة كانت تقرها وزارة المالية او مجلس الوزراء
ولا يتدخل فيها الرئيس من قريب أو بعيد
؟

Quote: يا زول هو ال 425 ما بتكفي يوم واحد .. ولكن بتقعد قدر شنو .. يامر بزيادة المرتبات !!!!! نعم الامر ..

ونعم الزيادة ياخ!
الزول دا بكون هسي فاكر نفسه عمل زيادة حقيقية في الاجور
الناس دي ما عايشه في السودان ولا شنو؟
الحد الأدنى للأجور عبارة 250 ريال سعودي
أي ما يعادل 66 دولار امريكي
..
..

___
نسخة لربيع عبد العاطي مع التحية

Quote: يا ود البشاري يا حبيب حيلك حيلك, عارفك زعلان لكن كلمة زي دي كبيرة والله

ود البشـــرى

تحياتي يا حبيب ..
ياخ انا من امبارح مستغرب في حكاية تدخل الرئيس واقراره لزيادة الأجور
والترباله ناسو عايزين يصورهو بمظهر القادر على العطاء
وطبعا انا ما بقصد ما ذهبت اليه
..
..




___
سبحانك اللهم وبحمدك أشهد ان لا آله الا أنت اتوب اليك واستغفرك

Quote: ونزيدك من إندينا ويامر بقتل مجموعات بشرية كااااااملة

غايتو يا احمد كل شـــئ ممكن وجايز في هذا الزمان

وبالطريقة دي بعد شوية ممكن يقول لينا:

يحي من يشاء ويميت من يشاء وهو على كل شئ قدير

يعني معقولة الزول دا يكون ما عارف إنو 425 جنيه دي ما بتسوي شــئ للموظف؟

طيب ياخ وقت ناوي يتدخل ما يرفعها شوية كدا ويخليها معقولة

تحياتي

Quote: أوّل مرّة نشوف لينا إتحاد نقابات عمال رئيسه بروف. والله صحي...

ذلك الفضل من الله يؤتيه من يشاء

عندك اعتراض مثلا؟

س: انت بروفيسور دا يعني شنو؟
ج: بروفيسور دا زول قرت كدا ... قرت كدا ... قرت كدا... لامن شوطنت

ولذلك يا معاوية: ما صاحبنا بمجنون لأنه طالب بزيادة الحد الأدنى للأجور

ود البشاري

عام غلة وبطيخ إنشاء الله

قال ليه داابي ليك - قال ليه بنرااعي ليك

رقيق وزادوه المي !!

بحيراوي

Quote: ياخ انا من امبارح مستغرب في حكاية تدخل الرئيس واقراره لزيادة الأجور والترباله ناسو عايزين يصورهو بمظهر القادر على العطاء وطبعا انا ما بقصد ما ذهبت اليه

الأمين موسى البشارى سلام

إعتدنا أن يصدر البشير وعودا وقرارات ثم يبلعوها له زى الما حصل حاجة

فهل سيُنفذ هذا القرار أم يروح شمار فى مرقة كالعادة .

Quote: إعتدنا أن يصدر البشير وعودا وقرارات ثم يبلعوها له زى الما حصل حاجة فهل سيُنفذ هذا القرار أم يروح شمار فى مرقة كالعادة .

جمال خضر

تحياتي،،
دا قرار أخير عدمو وقرار لا يساوي الحبر الذي كتب به
وربيع عبد العاطي بدل ما يقول متوسط دخل الفرد 800 دولار
كان يقول متوسط صرف الفرد 500 دولار
عشان الحسبة تطلع صاح

خلال اجتماعه بالقصر الجمهوري بقيادات الإتحاد على مقترح العمال بزيادة الحد الأدنى للأجور ليصل لـ(425) جنيهاً بدلاً عن الـ(165) جنيهاً لم تزد منذ العام 2004م، وأمهل الرئيس وزارة المالية أسبوعاً لتوفيق أوضاعها لتطبيق زيادة الـ (100) جنيه منحة الرئيس الأولى للعام 2010م، على أن تطبق الـ (100) جنيه المنحة الثانية والـ (60) جنيهاً الأخرى في بداية شهر يوليو من العام 2013م ، ليطوي بذلك رئيس الجمهورية صفحة من الخلاف استمر لأكثر من (4) أشهر وكاد يفرد نتائج كارثية.


شفت منحة الريس دي كيف
المنحة الاولى والتانية ..
و .. التقول بديها من جيبو ..

وبعد ده كلو ما فاتت ال 60 دولار ....


دي حاجة تفقع المرارة

عشان تعرفو انو البلد دي قاعدة امفكو وان المؤسسات الدستورية عبارة عن ديكور وان افراد المجلس الوطني ليس الا مطبلاتية وكمبارسية لزوم تزيين ما يلزم تزيينه ، ان ميزانية 2013 م تم اقرارها من المجلس الوطني وليس بها زيادات فمن اين سيتم الصرف علي زيادات البشير علما انه قانونا لا يحق للجهه التنفيذية تعديل الميزانية بعد اقرارها من الجهه التشريعية الا بموافقتها
عموما ميزانية السودان منذ عام تسعه وثمانين بيكون المقرر حاجة والمنفذ الفعلي حاجة تانية والمكضبني فليسأل اي قريب له موظف في اي مرفق حكومي هل تفي وزارة المالية ببنود الميزانية واذا كان تنفيذ الميزانية لاي مؤسسة حكومية يزيد عن عشرين بالمائة لزوم التسيير + الرواتب والاجور اكون ما بعرف حاجة

Quote: عشان تعرفو انو البلد دي قاعدة امفكو وان المؤسسات الدستورية عبارة عن ديكور وان افراد المجلس الوطني ليس الا مطبلاتية وكمبارسية لزوم تزيين ما يلزم تزيينه

والريس دا يرقص وين يعني؟
انت كمان ما تبالغ للدرجة وتضايق الزول في ملعبو ووسط جمهوره
البلد ماشه امفكو من زماااااااان يا الزبير اخوي

تحياتي

Quote: خلال اجتماعه بالقصر الجمهوري بقيادات الإتحاد على مقترح العمال بزيادة الحد الأدنى للأجور ليصل لـ(425) جنيهاً بدلاً عن الـ(165) جنيهاً لم تزد منذ العام 2004م، وأمهل الرئيس وزارة المالية أسبوعاً لتوفيق أوضاعها لتطبيق زيادة الـ (100) جنيه منحة الرئيس الأولى للعام 2010م، على أن تطبق الـ (100) جنيه المنحة الثانية والـ (60) جنيهاً الأخرى في بداية شهر يوليو من العام 2013م ، ليطوي بذلك رئيس الجمهورية صفحة من الخلاف استمر لأكثر من (4) أشهر وكاد يفرد نتائج كارثية.

أسبوع واحد بس لتوفيق اوضاعها؟
وزير المالي خليهو يشــد حيلو ويبلع كلامو داك
عارف بعد كدا يا اسامة اخوي جابوها ليهو مقنطرة
رفع الدعم عن المحروقات
زيادة الجبايات
ضرائب على المغتربين
زيادة الجمارك
والدمغات ما تسأل منها (دمغة الجريح، دمغة المطار، دمغة ......... الخ)

عشان الوزير يوفق اوضاعه تب ويصرف للناس دي
واتحداك لو صرفوا بعد شهرين مش اسبوع

Quote: عام غلة وبطيخ إنشاء الله قال ليه داابي ليك - قال ليه بنرااعي ليك رقيق وزادوه المي !!

بحيراوي كيف حالك

والله شكلنا كدا لا ح نلم لا في غلة ولا (بتيخ)
الناس متضايقة شديد ياخ
وعمك دا يجي يزيدهم ملاليم لا تسمن ولا تغني من جوع
بحيراوي هسي لما يقولو ليك الملك تدخل هنا لزيادة الاجور
الدنيا كلها تقيف على فت كراع وبتحصل زيادة زي الزيادة


تحياتي