المريخ يضيف سوءا إلى سيئاته .. أبشروا بطول وكسة يا مريخاب

نقول قولا ويقول آخرين غيره فنصدق وهم من الكاذبين الضآلين ..
يتبع إن الله هون .

عين المريخ العوراء أصلا لا تتحمل مزيدا من التطبيز يا هولاء ...
أحيانا كثيرة أشك والله في صدق إنتماء البعض إلى المريخ وأكاد أجزم بأنهم مجرد سوس ينخر في جسد هذا الكيان
العظيم أفعالا وأقوالا ..
إلى وقت قريب وقبل يسجل المريخ أكبر كارثتين مرتا على الكرة السودانية هيثم وعلاء الدين كان المريخ بلا كورة
فقط ولكنه أصبح الآن لا كورة ولا أخلاق .
والله إنه لإبتلاء عظيم نسأله أن يثيبنا على صبرنا عليه أجرا أعظم ...
خربانة أم بنايا قش ..
يتبع إن الله هون .

نعم وبالحيل يا عصام الحاج
قرار تسجيل هيثم وعلاء إنما هو قرار بهدم قيم ومبادىء مريخيه أرساها بقوة رجاله الأقوياء من لدن شاخور وأبو العائلة وغيرهما من الأفذاذ..
هيثم مصطفي الذي ظل بالهلال طوال 17 عاما لم يقدم ما يشفع له حتي بالبقاء أقل كثيرا من أن تطأ أقدامه باحة النادي العظيم ناهيك من أن
يرتدي شعاره المهيب..
هيثم الذي ظل قاعدة ثابتة وبؤرة للمشاكل التى تحدث للهلال والكرة السودانية لا يستحق أبدا والله فضيلة الإنتماء لنادي كبير يرتفع على ساريته
شعار ينادي بالتربية والأخلاق قبل الرياضة والركض وراء كرة القدم، فلماذا فرضه مجلس الإدارة على المريخاب الأوفياء لتاريخ ناديهم العريق؟
وعلاء الدين الذي باع النادي الذي إكتشفه وقدمه للجمهور والأضواء في غمضة عين ونخوة دون حتي كلمة شكر واحد وإختار المكاسب الإقتصادية
على الولاء بحجة الإحتراف وما شابه من شعارات حنجورية تقال ولا تفعل يفترض، أن تكون عودته للمريخ مثلها وأساطير الغول والعنقاء والخل
الوفي يسمع عنها ولا يراها في الواقع، لأنه مجرد لاعب دافوري يغطي على قلة مقدراته وتواضع موهبته بالرفس والشلاليت والركض وكثير من سوء
السلوك والأخلاق، فلماذا أعاده المريخ بعد كل ما فعله وحتما سيفعله من منغصات ونقائص؟؟
المريخ الذي أعرفه برىء من هوانكم وذلكم يا عصام الحاج الذي تفسخ من وقار المريخ المعروف عنه ونزل عاريا ليرقص مع الراقصين على
حلبة العوك عاك والتمظهر الرخيص .

ملحوظة 1
ملحوظة : ناس عهد الإحتراف وما عارف شنو يمتنعون لأنو الإحتراف في السودان مجرد إسم تمضغه الأفواه الحالمة ولا وجود له .

ملحوظة 2
هذا البوست سيتسمر ولو بالكوبي بيست لهذا الربع والربع المقبل وإلى الموسم الكروي الجديد ليري بعض المحاججين المكابرين صدق ما نقوله
كالعادة قبل أن يتمرضغوا في غيظهم وخيبتهم .

سلام وجمعة مباركة ...

اسئلة ياطلحة تحتاج الى إجابات (الليلة بقيت ليك زي صبري طه) ههههه

1- هيثم هل من الممكن ان يفيد المريخ فنياًأو على الاقل كقائد ميداني (يفتقده المريخ) ؟
2- هل هيثم مفتعل للمشاكل اماانه يكون على صواب في بعض الاحيان ؟
3- هل هيثم (متفلت وغير منضبط) ام انه لم يجد الادارة التى تتفهمه وتفهم نفسياته وتلجمه في نفس الوقت ؟

يازول انتو مش شطبتوة خلاص بطلو الجرسة وجهزو دفاعكم المتهالك ساكت لي باصات هيثم ولمحات العجب

يا زروق كاتب البوست طلحة تنظير وصيفابي ليه ضل الفرق في انه مستقل بي رأيه وما بياكل من لقيمات المرشد البعوسها ليكم

اختلف معاك يا تنظير في انه هيثم سبعطاشر سنة ما قدم شي بل قدم كل شيء للهلال و شطبه بالطريقة دي خطأ عظيم وجلل
لكن تسجيلكم ليه و بالطريقة التي تم بها خطأ اعظم وح يتسبب في مشاكل لا اول لها ولا اخر ليكم

Quote: اختلف معاك يا تنظير في انه هيثم سبعطاشر سنة ما قدم شي بل قدم كل شيء للهلال و شطبه بالطريقة دي خطأ عظيم وجلل لكن تسجيلكم ليه و بالطريقة التي تم بها خطأ اعظم وح يتسبب في مشاكل لا اول لها ولا اخر ليكم

سلام يامحمد
والله انتو ناس عاطفين بدرجه...يااخى هيثم غير منضبط فى الميدان من الله خلقهو...اسأل كل من دربه فى الهلال وقبل اسبوع او اسبوعين كان فى لقاء مع المدرب السابق للهلال العراقى الجنسيه اسمو طار منى عن معاناته مع هيثم وقرار الطيب عبد الله بشطبه لولا الاجاويد...كم من المرات شاهدنا هيثم يحتج على التغيير....هل يعقل ان يجتمع لاعب بمدرب ويقول ليهو انا البحدد متين العب؟ ارجع لمعظم الجرايد عن اول لقاء لهيثم مع غارزيتو....هيثم نصف الموسم الماضى كان متمرد على الهلال ويرفض الذهاب للاقاليم بجحه الاصابه...
اما حديثه الاخير لحبيب البلد ومقابله الشروق دى تشطبو من الاتحاد ككل ....والله لو كان الطيب عبدالله حى شطبو من زمان اسوه ب الدحيش عندما اساء الادب لادراه الهلال...او بالشطب الجماعى لتمرد هلال 92 وتمردهم فى السعوديه.....
ابوتريكه معبود 80 مليون مصرى تخلف عن مباراه السوبر المصرى شهر 9 الماضى وتمت مقاقبته من قبل المدرب ناهيك عن الاداره وتقبل العقوبه بروح رياضيه وقدم اعتذاره لزملائه...اما عالميا فدى قصه فاقل شئ يتم توقيفه وفرض غرامه كبيره عليه...

فيا جماعه فكونا من هيثم...انه موهوب ولكنه غير منضبط وقل عطاءه لتقدم العمر

عمر جنابو السلام عليك .. هيثم مصطفي لن يفيد المريخ فنيا لأن عمره الإفتراضي كلاعب كرة قدم انتهى أولا.. ولأنه نفسيا لن يكون
مهيأ للدفاع عن الشعار الأحمر.. ولأن التجارب المشابهة كلها فشلت تماما بداية من الدحيش وعبده الشيخ وليس نهاية بباكمبا وأدوارد..
أما مسألة سلوكه وأخلاقه فهي لا تحتاج لشاهدين فهيثم لم يترك إداري أو لاعب زميل أو حكم أو اعلامي أو حتي المشجع المسكين
لم يستعديه ويمارس معه سوء السلوك وقلة الأدب، بل حتي الذين هم خارح منظومة العمل الرياضي لم يسلموا من عنجهية
هيثم كما في المطارات والطائرات وغيرها ... هيثم مثال سىء ليس فقط للاعب الكرة بل حتي للسوداني .

طارق زروق السلام عليك وشكرا للمرور يا حبيب .

جرجير السلام عليك قلنا ليك بطولات الدافوري المحلية دي ما إضافات فالهلال حققها قبل حتي أن يولد هيثم مصطفي.

Mohamed Doudi السلام عليك

صدقت فيما قلت فالعاطفة التى يتعامل بها الوسط الرياضي ( إدارة، لاعبين، مدربين، حكام، مشجعين) هي أحد مسببات
البلاء الماحق على الكورة السودانية وليس أدل من ذلك على كلام أخوك ود البشرى الفوق دا .

يتبع ........

(قرار تسجيل هيثم وعلاء إنما هو قرار بهدم قيم ومبادىء مريخيه أرساها بقوة رجاله الأقوياء من لدن شاخور وأبو العائلة وغيرهما من الأفذاذ..)

---------------------------------

سلامات أيها الوصيفابي طلحة ..

اتفق مع عبارتك و اتساءل .... هي بالله الكورة دي ما عندها قيم ومبادئ في حد زاتها؟ لأنو العبارة كان حتكون مختلفة شوية لو كانت: (قرار تسجيل هيثم وعلاء إنما هو قرار بهدم قيم ومبادىء كروية ... لكلا الناديين)
حقيقي تسجيل هيثم مصطفى في فريق المريخ رفع ضغطنا و طمم بطنا و خلانا نفقد الثقة في الكرة السودانية و اللعيبة السودانيين لانها زيرووووو مبادئ و فالصووو اخلاق و قيم ... هيثم مصطفى أثبت أنه لا يتسحق ان يكون في نادي المريخ او أي نادي سوداني آخر ولا يستحق ان يرثى لحاله أو ان يتعاطف معه محبوه فهو لم يضع لهم أدنى اعتبارو كان الهلال بالنسبة إليه (تي شيرت ازرق يخلعه بكل سهولة و يسر ليرتدي غيره ) ... و نادي المريخ أثبت انه ليس بعملاقاً و إنما مراهقاً طائشاً ....الواحد جاهو احساس انو بتفرج على اسبيس توون والا ام بي سي 3 ....

ما احترمتو على الاطلاق هذا الهيثم :-(

لعن الله إبليسهم أجمعين

Quote: إلى وقت قريب وقبل يسجل المريخ أكبر كارثتين مرتا على الكرة السودانية هيثم وعلاء الدين كان المريخ بلا كورة

والله صدقت يا طلحة

بعدين يا رشا ... نقول شنو بس.. دى ادارتنا .. فى الزمن دا .. والله ابو العائلة وشاخور يخيل الى انهم يتململون فى قبورهم من البيحصل دا

والله هاتين الكارثتين لا يشرفنا ان ينتميان الينا .. ويا دوب المشاكل بدت وحتشوفوا قريب

الله فى

يا شمس الدين
ألم تلمح (وصيفابي) ؟
رشا من مهيرات سيد البلد ياخ.









_
تنظير
يعلم الله مشتاق لي ونسة معاكـ ياخ
الله يهون نصلك بالدرب عديل ياخ !

Quote: سلام يامحمد والله انتو ناس عاطفين بدرجه...يااخى هيثم غير منضبط فى الميدان من الله خلقهو...اسأل كل من دربه فى الهلال وقبل اسبوع او اسبوعين كان فى لقاء مع المدرب السابق للهلال العراقى الجنسيه اسمو طار منى عن معاناته مع هيثم وقرار الطيب عبد الله بشطبه لولا الاجاويد...كم من المرات شاهدنا هيثم يحتج على التغيير....هل يعقل ان يجتمع لاعب بمدرب ويقول ليهو انا البحدد متين العب؟ ارجع لمعظم الجرايد عن اول لقاء لهيثم مع غارزيتو....هيثم نصف الموسم الماضى كان متمرد على الهلال ويرفض الذهاب للاقاليم بجحه الاصابه... اما حديثه الاخير لحبيب البلد ومقابله الشروق دى تشطبو من الاتحاد ككل ....والله لو كان الطيب عبدالله حى شطبو من زمان اسوه ب الدحيش عندما اساء الادب لادراه الهلال...او بالشطب الجماعى لتمرد هلال 92 وتمردهم فى السعوديه..... ابوتريكه معبود 80 مليون مصرى تخلف عن مباراه السوبر المصرى شهر 9 الماضى وتمت مقاقبته من قبل المدرب ناهيك عن الاداره وتقبل العقوبه بروح رياضيه وقدم اعتذاره لزملائه...اما عالميا فدى قصه فاقل شئ يتم توقيفه وفرض غرامه كبيره عليه... فيا جماعه فكونا من هيثم...انه موهوب ولكنه غير منضبط وقل عطاءه لتقدم العمر

وعليكم السلام والرحمة يا محمد
ومالو عاطفيين نعم و البنحمله لهيثم المحبة الواحدة دي
ومحبتنا ليه كدا زي ما هو ببشريته وأخطاؤه وعيوبه وعدم كماله
لهيثم عيوب زي ما لي و ليك ولتنظير وللبرير و لغيرهم, نظير المتعة المنحنا ليها و كل صرخة فرح بهدف صنعه من مافي
عليك الله الباص الجدعه لأمبيلي من لمسة واحدة في زنقة أوّل اغسطس ما بغفر ليه
الباص دا كفل لينا الصعود لدور المجموعات لو اراد الله كان ممكن باص زي دا يكفل لينا البطولة في رقبتها
و حديثك عن الإنضباط نعم انا معاك فيه لكن لما الهلال كباره بدقّو الرق المانع شنو لو رقص هيثم !!
حديث الإنضباط دا لو كان في انضباط أو ادارة حقيقية في الهلال او السودان عموما, لكن الحصل لهيثم استهداف و السنة الكاملة القلت ما لعب فيها مقصودة كانت و الدقايق اللعبها اتسبب في حسم الدوري للهلال فيها
شطب هيثم و بالطريقة دي خطأ, لكن وقت البقت بقت ما نعيد الخطأ تاني وننكر على هيثم تاريخه وما قدمه للهلال

Quote: وعليكم السلام والرحمة يا محمد ومالو عاطفيين نعم و البنحمله لهيثم المحبة الواحدة دي ومحبتنا ليه كدا زي ما هو ببشريته وأخطاؤه وعيوبه وعدم كماله لهيثم عيوب زي ما لي و ليك ولتنظير وللبرير و لغيرهم, نظير المتعة المنحنا ليها و كل صرخة فرح بهدف صنعه من مافي عليك الله الباص الجدعه لأمبيلي من لمسة واحدة في زنقة أوّل اغسطس ما بغفر ليه الباص دا كفل لينا الصعود لدور المجموعات لو اراد الله كان ممكن باص زي دا يكفل لينا البطولة في رقبتها و حديثك عن الإنضباط نعم انا معاك فيه لكن لما الهلال كباره بدقّو الرق المانع شنو لو رقص هيثم !! حديث الإنضباط دا لو كان في انضباط أو ادارة حقيقية في الهلال او السودان عموما, لكن الحصل لهيثم استهداف و السنة الكاملة القلت ما لعب فيها مقصودة كانت و الدقايق اللعبها اتسبب في حسم الدوري للهلال فيها شطب هيثم و بالطريقة دي خطأ, لكن وقت البقت بقت ما نعيد الخطأ تاني وننكر على هيثم تاريخه وما قدمه للهلال

سلام تانى ياودالبشرى
والله يا محمد كلنا بنحب هيثم وفنوا ولكنه غير منضبط ومشاكلو كثيره...وحكايه مقصود دى ما منطقيه كلو كلو يااخى والله حكايه الصفر الدولى دى عملت لينا عقده من المريخاب وبالاخص الاخوتى والاخواتى المريخاب فى البيت....ولكن هل يعقل ان بفرض لاعبا رائيه على مدربه؟ مشكله هيثم انو اصطدم بمدرب ليهو شخصيتو وادارى ليهو شخصيتو؟؟ يعنى بالعربى كده فى مدرب فى الدنيا دى عندو لاعب يمكن ان يحسم اى مباراه حتى لو لعب 30 كهيثم يقوم حيقد عليه؟ لا وابدا لا اى مدرب وادارى عاوز ليهو بطوله قاريه عشان يختها فى سيرته الذاتيه....وده نفس الحصل من صلاح الدريس سنه 2007 عندما رفض مشاركه المعز فى مباراه النجم الشهيره وشطب جاستن سنه 2008 فى اخر يوم تسجيل لان جاستن كان كثير الغياب والهروب بدعوى الاصابه لماذا لم يتم اتهام صلاح ادريس حينها بقصد وترصد جاستن؟؟؟؟؟ والله انا لو كنت محل البرير كان شطبت هيثم من بدرى ولكن تداخل السياسه فى الرياضه منع شطب هيثم شهر 6 الماضى....صلاح ادريس وجريدته المشاهد من اكبر اسباب وقوف سيدا وشطبهما..صلاح ادريس عندو اسلوب تشفى زى بتاع الشفع (على وعلى اعدائى) مع العلم بان البرير كان امين مال الهلال لاحد دورات صلاح الرئاسيه....اما علاء فكان تمرده الاخير و عدم اللعب فى دور الاربعه بدواعى الاصابه وعدم حضور التمارين والمؤخرات فدا يشطبو من الاتحاد السودانى عديل كده...الهلال يا محمد منحوس دايما فى الامتار الاخيرة يحصل تشويش مقصود من ابناءة يحول دون محى صفرنا الدولى وامل ان يتغير الوضع قبال ما نموت

دودى

دودى

سلام طلحة وضيوفة

أتفق مع الأخ طلحة 100 %
لولا ضعف الإدارات بالهلال. ولولا لغوسة إتحاد الكرة وحكامه لما واصل هذا الثنائى لعب كرة القدم حتى اليوم

الفرق الأساسى الموسم المنصرم الهلال مدربه من أوربا الغربية (فرنسى) ، هؤلاء شخصياتهم وإحترافيتهم
فوق المكسب المادى، لم يكن ذلك فى صالج هيثم وتابعه. .بينما فى المواسم الأسبق درب الهلال ثلاث برازيلين،
وصربى، غلبانين الفلوس جعلتهم يتغاضون ويسايرون أوضاع خطأ .

مدرب المريخ الكوكى الذى جاء للمريخ ليصنع لنفسه إسماً ومجداً فى مجال التدريب وتسويق نفسه بصورة أفضل
وضع فى إمتحان كبير ، كيف يتعامل مع الثنائى، ويخلق الضبط والربط ...

نادر الفضلى وهمة الحكام دى الله يشفيك منها.
ما فتح بوست رياضى فى هذا المنبر الا ونفثت سمومك ضد الهلال باتهامتك الباطلة للحكام بموالاة الهلال ولاعبيه فما بوست المقارنة بين الدحيش وهيثم مصطفى ببعيد. فياخى عليك الله اخجل شوية ومرة واحدة قول كلام يخش الراس.

سلام ياطلحة

رشا السلام عليك .. زي ما قلتي بالضبط هيثم مصطفي ( الهلال بالنسبة إليه (تي شيرت ازرق يخلعه بكل سهولة و يسر ليرتدي غيره )
لو الجماعة بتاعين العاطفة المتعصبين لهيثم ديل حسبوها بالعقل ح يلقوا أنو خروج هذا اللاعب من الفريق يعتبر أحد أكبر المكاسب .

ساتي السلام عليك وشكرا لمرورك وسندك ياخ ..

نوبي تحياتي ونلتقي قريب إن الله هون .

الفضلي سلامات والحمدلله الذي أذهب عنك بعض غشاوة حبك للمريخ وجعلك تتفق معي (لأول مرة) في موضوع يخص الأحمر الوهيج ..

العمدة تحياتي يا حبيب وبراحة على الباشمهندس ياخ .

عماد محمد
كلامك المهاتر لا لزوم له ولا يعطيك حجة. وأنا لا أكتب رأياً محاباة أو لإقناع نوعية متسلقى الأبراج والإعتصامات وشق الجيوب ، فمجالهم ليس منبر الرأى
ما عندك ماتقوله أمشى نط ليك من برج أو إعتصم أو كيل ليك تراب .. لو فى فايدة تذكر من تعليقك شهدت دون أن تدرى باننى consistent فى تعليقى
عن الموضوع المعين فى بوستات مختلفة.

يتبع إن الله هون

طلحة كل سنة وجميع اهل الرياضة وضيوفك بخير

مرحب كابتن وليد كل عام وأنتم بخير

.........