Post: #1
Title: التطور التّقني في الإحسان بالوالدين - توجد نماذج
Author: الطيب شيقوق
Date: 12-26-2012, 07:25 AM
Parent: #0
زمان تعال يا وليد جيب الابريق وافرش التبروقة داير اصلي
زمان امشي يا ولد ارمي كليقة قصب للحمار داك وعلق ليهو بصحن فتريته
زمان امشي يا وليد افتح المخزن وطلع ليك عيش وديهو طاحونة فلان ديك
زمان أمشوا يا وليدات اقبضوا لي الديك اب علاعل داك داير اضبحو اعشيكم بيهو - الوليدات ينقزوا ليك فرحانين ساكين الديك والديك يعوعي كاك كاك كاك لحدى نفسو ينقطع ويندفس ليك تحت العنقريب جوة القطية والفالح في الجنيّات كش يخمشو من جنحاتو ويجيبو لابوهو والاب طوالي سل سكينو من ضرعاتو الله أكبر الله أكبر وكش ضبحو ورماهو بعيد وراح يبتبت ويبتبت لحدى الروح تمرق . يلا يا وليدات امشوا ادوهو امكم خليها تجيه العشاء .
الام استلمت الديك وطوالي صاحت تعالي يا بت امعطي لي ريش الديك دا
زمان تعالي يا بت افتحي السحارة وشيلي الكويرة نعومة ديك امليها رز ووديها لخالتك فلانة النفساء
زمان تعالي يا بت حشي البصلة وقطعي الطماطم وشيلي القيروانة ديك امشي البير او الجمامة جيبي لينا موية
زمان تعالي يا بت امشي الشيخ فلان جيبي لينا منو محاية
لسه نحن مع كيفية الاحسان بالوالدين ايام زمان
اصبروا لي اوريكم التطور التقنى في الاحسان بالوالدين في عصر العولمة
|
Post: #2
Title: Re: التطور التّقني في الإحسان بالوالدين - توجد نماذج
Author: حليمة محمد عبد الرحمن
Date: 12-26-2012, 07:36 AM
Parent: #1
شحتفت روحنا يا مسنوح..
اها بقيتوا تتعشوا قدام الاسكايب؟
هههههههههههههه
|
Post: #3
Title: Re: التطور التّقني في الإحسان بالوالدين - توجد نماذج
Author: الطيب شيقوق
Date: 12-26-2012, 08:00 AM
Parent: #2
حلووووووم جيتي
يلا خودك هذا النموذج من التطور التقني في إحسان بنياتك ليك بقلم الاخ / محمد بلال الذي قال فيه الاتي :
المراة السودانية عندما تتحنن ... أى تضع الحناء ( الاسم العلمي: Lawsonia inermis ) .... فالجميع فى البيت قد دقس ... تشغيلات ذى التشغيلات ...مراسيل ذى المراسيل .. جهجهة ذى الجهجهة ...تعال ياولد أجرى الدكان ..جيب لى حنة ..يا بت أجرى دكان سعيد جيبى لى نشادر .. يا ود رجعا هسي دى حنة دى ! عاين ليها معولقة كيف ! قوليو الحنة (صنع فى الدامر) ! .. يا بت انتى راسك وين .. نشااااااااادر نشاااااااااادر ما باكمباودر .. ارجعى سريع رجع فيك قطر ..يا بت يا سارة تعالى رشرشى لى البرندة دى سريع ما بدور حنة الحر ! و كوركى لى نفيسة جارتنا قولى ليها التمد لى شوية سرتية .. انتو صحن الحنة الشالو منو يشيلكم البوليس ..اى يا بت اعجنيها كويس انتى ما اشتغلتى طلبة قبل كدة ..
و بعد أن تتفرجخ و تتوهط وتتمركز ...و تضع الحناء ..و تلقا يدينا فى وضعية السواقة و عاملات ذى يدين تايسون الملاكم ..تبدا المرحلة التانية من التشاغيل .. يا بت فتشى لى اكياس .. شوفى فوق راس الدولاب انا خاتا لى كيسين ... دا شنو دا جايبا لى كيس اسمنت انتى البلادة ليك شنو !! طالعة لى ابوك ...أجرى لى الدكان خلاس اتناوليهم ...يا ود تعال شغل لى التلفزيون .. سجمى دا شنو الكتل دا جيب لي شى ارفه بيو .. لا لا الانجليزى دا ما بدورو شوف لى مسلسلة .. أطلع القنوات الفوق .. أنزل أنزل لسة .. أطلع .. أنزل .. أطلع .. أنزل !! دقيقة وقف وقف النشوف هناية عرسوها الفى المسلسة دى ! المخروبة دى مختوبة ليها تلتاشر سنة ! خلاس خلاس أقلب .. أقلب .. التلفزيون دا مالو بقا لى مسيخ كدى .. خلاس أقفلو !! يا بت تعالى قولى لى ابوك ادينى موبايلك بدور أتصل بى أمى .. يا بت دا شنو الرامياو لى كدى ! أضربى الرقم تضربك صاقعة .. أى تعالى امسكى لى الموبايل جمب اضانى .. نق نق نق نق نق نق نق نق نق نق ..يا بت اثبتى تتراجفى لى ذى محمد على كلاى ...خلينى النكمل كلامى ... ونق نق نق نق نق نق نق نق ... الرصيد قطع يقطع راسو الراجل دا عمرو ما بشحن بى كرت سمين ... يا بت نادى أختك التبل لى الحنة دى نشفت واتشققت .. أى بليها ...دى شنو الموية البتغلى دى ! .. طقشتيها يطقشك لورى فحم .. جيبى الطربيزة دى واسيها لى !! تعالى طايرة وين ... حكى لى رقبتى دى .. لا لا تحت شوية .. أى خلاس طيرى طار فيك خفاش ..كلمى سارة التخت لى لقمة أكلا ! برجف من الجوع ! .. سارة دى شنو الكسرة دى مالا شوية كدة .. دايرة تغدى كديس ! و الخدرة دى بايتا ليها يويمين .. انتن كان ما كتلتنى ما بترتاحن .. أكلينى واقفة لى ذى عسكرى المرور !
وبعد أن يُرهق الجميع .. و يخرج (زيتهم) .. و يكرهون حياتهم .. تقوم من قعدتا .. بعد عملية الفسخ .. و تقول جملتا الفقاعةةةةةة ( غايتو على قولة المسل : ماحك جلدك مثل ظفرك ) !!!!!!!!!!!!!!!!!!!!!!!!!!!!!!!!!!!!!!!!!!!!!
مخرج : و هكذا انتشرت فى السودان جملة (مالك انتا محنن)!!!!
تنادى ليك شافع .. تقول ليو يا ود أجرى جيب لى كوز موية .. يعاين ليك بكل وقاحة و يقول ليك ( مالك انتا : محنن ؟؟) !!!!!!
بى اس : تستحق كل هذه الخدمة واكثر بكثير ..فما ان تنتهى قصة الحنة حتى تواصل رحلة كفاحها المرهقة و التى تستمر ل حياة كاملة من اجل باقى الاسرة !!
|
Post: #4
Title: Re: التطور التّقني في الإحسان بالوالدين - توجد نماذج
Author: الطيب شيقوق
Date: 12-26-2012, 08:08 AM
Parent: #3
التكليف العصري للاولاد صار من شاكلة
اجري يا ولد موبايلي رن اخمشو جيبو لي سريع
اتاري المتصل ناشف خلاص عامل مسكول بس
طيب يا ولد كدى شوف لي الممسكل دا منو ؟ اضرب لي للممسكل دا - طبعا واحدين من الاباء ما بعرفوا ذاتو كيف يتم الاتصال بالممسكل الناشف .
جات رسالة على موبايل عمك
خليكم معاى اوريكم التطور التقني في الاحسان بالوالدين
طبعا حاجات كتييييييييييييييرة - طولوا لي بالكم بس لحدى اوصلكم للفايبر والواتسابت و التانقو الخطير ( مع هذا الاخير لدينا سوالف وسوالف )
|
Post: #5
Title: Re: التطور التّقني في الإحسان بالوالدين - توجد نماذج
Author: خالد عبد الله محمود
Date: 12-26-2012, 08:18 AM
Parent: #3
| Quote: بى اس : تستحق كل هذه الخدمة واكثر بكثير ..فما ان تنتهى قصة الحنة حتى تواصل رحلة كفاحها المرهقة و التى تستمر ل حياة كاملة من اجل باقى الاسرة !! |
أنت وقت بتخاف طولة اللسان العليكـ شنو ؟ 
|
Post: #6
Title: Re: التطور التّقني في الإحسان بالوالدين - توجد نماذج
Author: الطيب شيقوق
Date: 12-26-2012, 08:39 AM
Parent: #5
| Quote: أنت وقت بتخاف طولة اللسان العليكـ شنو ؟ |
اصبر اصبر بطل الشفقة
|
Post: #7
Title: Re: التطور التّقني في الإحسان بالوالدين - توجد نماذج
Author: Alshafea Ibrahim
Date: 12-26-2012, 08:46 AM
Parent: #5
تحياتي يا ود شيقوق
غايتو الحصل للوالدين من تطور ما مرفوض لزوم تطور الوالدين في روحهم ... وكمية التطورات الما معروف ليها حد تنتهي فيه ... لكن يا شيقوق خلينا نبكي شوية على زمنا كانت فيهو القطية والراكوبة والخلوة والزريبة ... زمنا يعمل فيهو الأبناء كبيرهم وصغيرهم في تناغم وروح من المودة والحب والتسامح ... يازول البنيات الحلوات (فزعن) ومن الفزعة (للوردة) ( لا أقصد الوردة الزهرة الحمراء) - الوردة هنا (موية الشراب) بالمشرع - تعال شوف تنظيف العيش للطاحونة أو تنظيف اللوبا ( للمحراكة) أو تجهيز ( ورق ) كارب مع خبتة بامية ... أخوان البنات شايلين التقيلة بدون ملل أو ضجر ... شيء تصليح زرايب أو تعمير (راكوبة) أو (جلاد) عنقريب ألخ من الأشغال التي تتم بين ( الضحوة) والضهرية ... لا فراغ لا كسل ... تقول دلع الليلة ؟
أخباركم شنو ؟
الشفيع إبراهيم
|
Post: #11
Title: Re: التطور التّقني في الإحسان بالوالدين - توجد نماذج
Author: الطيب شيقوق
Date: 12-26-2012, 10:11 AM
Parent: #7
الشفيع العشاء
| Quote: غايتو الحصل للوالدين من تطور ما مرفوض لزوم تطور الوالدين في روحهم ... وكمية التطورات الما معروف ليها حد تنتهي فيه ... لكن يا شيقوق خلينا نبكي شوية على زمنا كانت فيهو القطية والراكوبة والخلوة والزريبة ... زمنا يعمل فيهو الأبناء كبيرهم وصغيرهم في تناغم وروح من المودة والحب والتسامح ... يازول البنيات الحلوات (فزعن) ومن الفزعة (للوردة) ( لا أقصد الوردة الزهرة الحمراء) - الوردة هنا (موية الشراب) بالمشرع - تعال شوف تنظيف العيش للطاحونة أو تنظيف اللوبا ( للمحراكة) أو تجهيز ( ورق ) كارب مع خبتة بامية ... أخوان البنات شايلين التقيلة بدون ملل أو ضجر ... شيء تصليح زرايب أو تعمير (راكوبة) أو (جلاد) عنقريب ألخ من الأشغال التي تتم بين ( الضحوة) والضهرية ... لا فراغ لا كسل ... تقول دلع الليلة ؟ |
ههههههههها عيييييييييك وحياتك الزمن دا تلقى الوليد ماسك الموبايل يقلب فيهو سااى اكان حبستو علوق حمارك وطاتك اصبحت
انت عارف ليش حمير الزمن دا ما فيهن مروة ؟ دا كلو بسبب الموبايلات دي يا الشفيع اخوى
ياخ ولد الزمن دا لو ماسك ليهو موبايل اكان ابوهو بتونس مع امو !! ما برفع راسو عشان يشوف بتونسوا في شنو او بيعملوا في شنو .
|
Post: #8
Title: Re: التطور التّقني في الإحسان بالوالدين - توجد نماذج
Author: Alshafea Ibrahim
Date: 12-26-2012, 08:46 AM
Parent: #5
تحياتي يا ود شيقوق
غايتو الحصل للوالدين من تطور ما مرفوض لزوم تطور الوالدين في روحهم ... وكمية التطورات الما معروف ليها حد تنتهي فيه ... لكن يا شيقوق خلينا نبكي شوية على زمنا كانت فيهو القطية والراكوبة والخلوة والزريبة ... زمنا يعمل فيهو الأبناء كبيرهم وصغيرهم في تناغم وروح من المودة والحب والتسامح ... يازول البنيات الحلوات (فزعن) ومن الفزعة (للوردة) ( لا أقصد الوردة الزهرة الحمراء) - الوردة هنا (موية الشراب) بالمشرع - تعال شوف تنظيف العيش للطاحونة أو تنظيف اللوبا ( للمحراكة) أو تجهيز ( ورق ) كارب مع خبتة بامية ... أخوان البنات شايلين التقيلة بدون ملل أو ضجر ... شيء تصليح زرايب أو تعمير (راكوبة) أو (جلاد) عنقريب ألخ من الأشغال التي تتم بين ( الضحوة) والضهرية ... لا فراغ لا كسل ... تقول دلع الليلة ؟
أخباركم شنو ؟
الشفيع إبراهيم
|
Post: #9
Title: Re: التطور التّقني في الإحسان بالوالدين - توجد نماذج
Author: ismeil abbas
Date: 12-26-2012, 08:47 AM
Parent: #5
الطيب شيقوق تحياتى.
غايتو جنس اللعن ده ماعندنا .
Quote: طولوا لي بالكم بس لحدى اوصلكم للفايبر والواتسابت و التانقو الخطير ( مع هذا الاخير لدينا سوالف وسوالف )
|
والله التقنية دى ريحت الناس راحة وأنا خايفة تطول غربتنا.
أبوى بالتانقو مجننو جن وألادى بلعبو بيهو لعب..ومرة لبسوهوا طاقية خواجات ورسلوها لى بالواتسب قال ليهم بقيت ديحانقو عديل...قاموا ضحكوا قالوا ليهو إن بتعرف ديحانقو يابابا؟.
الواتسب مع ألأولاد خطوة بخطوة..طلعت من المحاضرة..ركبت الترحيل..وصلت البيت...أنا مع أصحابى..حاجة مفيدة
سمح تشوف تعابير والدينك وهم يقولوا ليك عافيين منك..تقديرى وإحترامى للجميع.
|
Post: #10
Title: Re: التطور التّقني في الإحسان بالوالدين - توجد نماذج
Author: حمزاوي
Date: 12-26-2012, 09:34 AM
زعيم الفقراء ودشيقوق
مسكاقمي
| Quote: زمان امشي يا ولد ارمي كليقة قصب للحمار داك وعلق ليهو بصحن فتريته |
تعرف يا الزعيم لمن تضع العلوق الفتريتة للحمار في صحن ولمن يشبع بيعمل شنو ؟؟؟؟؟
لمن يشبع يقوم ينفخ بي نخرتو ويقول فررررررررررررا جوا الصحن يقوم الفتريتة تتطاير برا الصحن ويجي الطير ويأكل الفتريتة
قالوا لمن علي عثمان طه نائب الرئيس لمن كان بيفتتح في حقل النجمة بتاع البترول واثناء الخطبة بتاعتو قام واحد من اهلنا المسيرية قال يا شيخ علي انتو متين حتقولوا فرررررررررررا مع هز الرأس
قام شيخ علي عثمان سأل الوالي احمد هارون الزول دا بيقصد شنو قام حكى ليه عملية الحمار لمن يشبع من العلوق !!!!!!!!!!!
|
Post: #12
Title: Re: التطور التّقني في الإحسان بالوالدين - توجد نماذج
Author: الطيب شيقوق
Date: 12-26-2012, 10:17 AM
ابو السباع
ازيك يا زعيم
| Quote: والله التقنية دى ريحت الناس راحة وأنا خايفة تطول غربتنا. |
هسه يا ابا السباع تاني في غربة مع الصوت والصورة دي .
بعدين مش نفاق كونك تنزل مطار الخرطوم وتسلم مع حد بالاحضان وامبارح كان معاك صوت صورة ؟
ياخ التكنلوجيا دي كتلت الحنان ذاتو .
Quote: أبوى بالتانقو مجننو جن وألادى بلعبو بيهو لعب..ومرة لبسوهوا طاقية خواجات ورسلوها لى بالواتسب قال ليهم بقيت ديحانقو عديل...قاموا ضحكوا قالوا ليهو إن بتعرف ديحانقو يابابا؟.
الواتسب مع ألأولاد خطوة بخطوة..طلعت من المحاضرة..ركبت الترحيل..وصلت البيت...أنا مع أصحابى..حاجة مفيدة
سمح تشوف تعابير والدينك وهم يقولوا ليك عافيين منك..تقديرى وإحترامى للجميع. |
والله اتاريك انت ذاتك تفتيحة طالما بتابع الوليدات بالواتسابت والجي بي اس يا سمعة .
|
Post: #13
Title: Re: التطور التّقني في الإحسان بالوالدين - توجد نماذج
Author: الطيب شيقوق
Date: 12-26-2012, 10:39 AM
Parent: #12
شيخ حمزاوي
سلام
Quote: تعرف يا الزعيم لمن تضع العلوق الفتريتة للحمار في صحن ولمن يشبع بيعمل شنو ؟؟؟؟؟
لمن يشبع يقوم ينفخ بي نخرتو ويقول فررررررررررررا جوا الصحن يقوم الفتريتة تتطاير برا الصحن ويجي الطير ويأكل الفتريتة
قالوا لمن علي عثمان طه نائب الرئيس لمن كان بيفتتح في حقل النجمة بتاع البترول واثناء الخطبة بتاعتو قام واحد من اهلنا المسيرية قال يا شيخ علي انتو متين حتقولوا فرررررررررررا مع هز الرأس
قام شيخ علي عثمان سأل الوالي احمد هارون الزول دا بيقصد شنو قام حكى ليه عملية الحمار لمن يشبع من العلوق !!!!!!!!!!! |
ههههههههههههههها بالغ
ديل فرررررررر دى ما عندهم الا بعد ينشفوا ريق السودان كلو
|
Post: #14
Title: Re: التطور التّقني في الإحسان بالوالدين - توجد نماذج
Author: الطيب شيقوق
Date: 12-26-2012, 11:06 AM
Parent: #13
تعال يا وليد وصل الاسلاك وشغل لي الكاميرا
|
|