Post: #1 Title: تلفزيون السودان (خمسين سنة من ,,,,,,) Author: عمار عبدالله عبدالرحمن Date: 12-25-2012, 04:06 PM Parent: #0
احتفل تلفزيون السودان بمرور خمسين سنة ..
هل كان تلفزيون وطن ام سلطه ,,.
Post: #2 Title: Re: تلفزيون السودان (خمسين سنة من ,,,,,,) Author: محمد المسلمي Date: 12-25-2012, 04:08 PM Parent: #1
العزيز عمار ٥٠ سنة سجم ورماد
Post: #3 Title: Re: تلفزيون السودان (خمسين سنة من ,,,,,,) Author: Muna Khugali Date: 12-25-2012, 04:44 PM Parent: #2
إزيك يا عمار..
طبعا قناة واحده في الوقت داك وحقت الحكومة.. والحكومة عندها وجهة نظرها المتبنياها.. وبرضه كان فيه حاجات جميلة..
لكن أسة شوف مليون قناة.. واحده فيهم تملا ليك عقلك ووقتك مافي.. بس يملوا ليك عيونك بالألوا والزيطة في أغلب الأوقات..
لسه إحنا متأخرين شديد!
..... .....
تحياتي
Post: #4 Title: Re: تلفزيون السودان (خمسين سنة من ,,,,,,) Author: الطيب الجاك Date: 12-25-2012, 05:07 PM Parent: #3
الأخ/ عمار و المتداخلين الكرام،
سلام و تحية،
تلفزيون السودان كان منبر تثقيفي و ترفيهي بإمتياز، نذكر من الزمن الجميل:
فرسان في الميدان
سير و أخبار (البروفسير الراحل المقيم عبد الله الطيب)
صور شعبية (الطيب محمد الطيب)
سينما سينما (و قت المهندس الأول صاحب الفكرة و أغنية أببا (eagle) ).
كوميديا (يوم التلاتاء لو عندك شنو داك بتأجلو عشان أبوبكر حسن الشريف)
ألحان الغرب (و ده وكت الجيل الذهبي: ليونيل رويتشي، مايكل جاكسون، بوني أم، أببا، بوب مارلي، ....)
أصوات و أنامل ، الصلات الطيبة
إدمون منير و الإبداع بإمكانيات محدودة (كان بقعد يشتغل بالساعات عشان يعمل (عيد سعيد) متحركة).
عالم الرياضة مع مامون الطاهر (كان بساهر الليل كلو عشان يسمع أخبار الرياضة في كل العالم من الراديو و يجي إدينا ملخص عنها قبل مباراة الإسبوع).
للأطفال: ماما عائشة و الجد شعبان و جحا في جنة الأطفال.
الدراما التلفزيونية بميزانيات محدودة جداً قدمت لينا إبداع لا ينسي.
ده تلفزيون السودان الكون وجدانا و ليهو عشق و محبة.
أما ما بعد ذلك من برامج كرتونية تقدمها شخصيات كرتونية بميزانيات مليونية، فدي بخوفو بيها الشفع من نوع (تقعدو ساكت و لا نجيب ليكم قناة السودان!).
إحتراماتي،
Post: #5 Title: Re: تلفزيون السودان (خمسين سنة من ,,,,,,) Author: عمار عبدالله عبدالرحمن Date: 12-25-2012, 05:21 PM Parent: #4
ود المسلمي
Quote: العزيز عمار ٥٠ سنة سجم ورماد
الخمسين سنة دي فيها 2 سنة ديكتاتورية الفريق عبود 16 سنة ديكتاتورية نميري 23 سنة (ولسه) دكتاتورية البشير
التلفزيون كان جهاز لتمرير الاكاذيب الحكومية على الاقل في دكتاتورية البشير وعبود 39 سنة , نشرة اخبار + برامج سياسية + اناشيد تمجيد السلطة (( في ظل هذا الغثاء كانت هنالك ابداعات وجدت طريقها للنشر) يبقى يا ود المسلمي ,,,,,,, الديكتاتوريات العسكرية عقبة اساسية في ما يجرى في التلفزيون واكبر عقبة طبعا جماعتك (البشير وشلته) ,,
Post: #8 Title: Re: تلفزيون السودان (خمسين سنة من ,,,,,,) Author: عبد الناصر الخطيب Date: 12-25-2012, 05:49 PM Parent: #5
.
عمار عبدالله عبدالرحمن ومتداخليه الاكارم
مساء الخير ,,
Quote: فرسان في الميدان
سير و أخبار (البروفسير الراحل المقيم عبد الله الطيب)
صور شعبية (الطيب محمد الطيب)
سينما سينما (و قت المهندس الأول صاحب الفكرة و أغنية أببا (eagle) ).
كوميديا (يوم التلاتاء لو عندك شنو داك بتأجلو عشان أبوبكر حسن الشريف)
ألحان الغرب (و ده وكت الجيل الذهبي: ليونيل رويتشي، مايكل جاكسون، بوني أم، أببا، بوب مارلي، ....)
أصوات و أنامل ، الصلات الطيبة
إدمون منير و الإبداع بإمكانيات محدودة (كان بقعد يشتغل بالساعات عشان يعمل (عيد سعيد) متحركة).
عالم الرياضة مع مامون الطاهر (كان بساهر الليل كلو عشان يسمع أخبار الرياضة في كل العالم من الراديو و يجي إدينا ملخص عنها قبل مباراة الإسبوع).
للأطفال: ماما عائشة و الجد شعبان و جحا في جنة الأطفال.
الدراما التلفزيونية بميزانيات محدودة جداً قدمت لينا إبداع لا ينسي.
وفي الخاطر برضوا ( من ربوع السودان ) محمد البصيري و ( جراب الحاوي ) محمد سليمان ( مسابقات المدارس ) ...............( محطة التلفزيون الاهلية )
( في الكرسي الساخن ) الصحفي المرحوم حسن ساتي ( لو كنت المسؤل ) الصحفي أحمد البلال الطيب ( مطرب الجماهير ) ...............................( أماسي ) ... ( الكون ذلك المجهول ) أنور عثمان ......... ( طبيعة الاشياء ) د. عبد الله الريح .............................
الرياضة أستاذ مامون الطاهر , على الريح , مفتي محمد سعيد , محمد شريف , ............................
تجربة تلفزيون السودان في خمسين عام صعب تقيمه بكلام إنطباعي _ رغم أني حاليا ما قاعد أشوف تلفزيون السودان إلا من وقت لاخر _ لكين لما تكون المسالة تقيم هل كان تلفزيون الحكومة او الشعب أكيد تلفزيون الحكومة .............. ولاسباب منطقية ما بسألوا منها التلفزيون و هو أداة من ادوات السلطة ............. وبدخل في حساباته الاعلامية وتمرير رسائله بقوه لكين في الحساب العام أكيد الناس ما حتهضم جهود مبدعين كتار اسعدونا ببرامجهم علي مدي سنوات طوال ............ أكيد خلاله في ناس عملوا من الفسيخ شربات وقدروا يقدموا برامج واعمال أسعدت الناس وتابعوها باهتمام .... ماحاقول كان الشي الاميز مقارنة بتعدد السودان الاثني والثقافي ....... الكان بالجد ممكن يخلق حالة من التنوع والثراء الغير عادية ..........
عموما لاي وسيط إعلامي الديمقراطية هي الحالة المثالية البتخلي ينطلق بدون قيود يمكن عدم توفره في بلادنا أعاقت وحدت من مسيرة التلفزيون والاعلام بصورة عامة لكين في النهاية في المسيرة الطويلة لواحد من أوئل تلفزيونات أفريقيا وبالمناسبة قبل التلفزيون المصري أكيد في إشراقات حتظل في الخاطر ................
ولكم أطيب تحية ,,,
Post: #7 Title: Re: تلفزيون السودان (خمسين سنة من ,,,,,,) Author: عمار عبدالله عبدالرحمن Date: 12-25-2012, 05:42 PM Parent: #4
دكتورنا الغالي الطيب الجاك
Quote: تلفزيون السودان كان منبر تثقيفي و ترفيهي بإمتياز، :
لانه كان المنفذ الوحيد , ولكن بمجرد انفتحت منافذ اخرى سقط تلفزيون السودان في المنافسة والسبب عائد الى الانظمة العسكرية التى تنظر الى التلفزيون قبل ان يكون وسيلة تثقيف الى اداة لتدجين الشعب وتمرير اكاذيبه ,, وبحساب بسيط اذا جمعت عدد الساعات التى قدم فيها تلفزيون السودان مواد هادفة مقارنة لعدد ساعات بث برامج الكذب والتجهيل السياسي للشعب مقارنة بالبرامج الرائعة التى ظهرت ستجدها لا تذكر , وده بوضح لينا لماذا لم تستطيع هذه البرامج الرائعة ان تطور نفسها الان واصبحت ضمن ذكرياتنا
عــزيزي كان بامكان تلفزيون السودان ان يصبح رائدا لو لا النظم الدكتاتورية ,,,
Post: #6 Title: Re: تلفزيون السودان (خمسين سنة من ,,,,,,) Author: عمار عبدالله عبدالرحمن Date: 12-25-2012, 05:32 PM Parent: #3
حبــاب بت الخليفة
Quote: إزيك يا عمار.. طبعا قناة واحده في الوقت داك وحقت الحكومة.. والحكومة عندها وجهة نظرها المتبنياها.. وبرضه كان فيه حاجات جميلة.. لكن أسة شوف مليون قناة.. واحده فيهم تملا ليك عقلك ووقتك مافي.. بس يملوا ليك عيونك بالألوا والزيطة في أغلب الأوقات.. لسه إحنا متأخرين شديد! ..
تحياتي
مشكلة تلفزيون السودان رغم السبق الزمني الا ان لم يضع لنفسه ضمانات تجعله جهاز اعلامي مستقل مما جعله في خدمة السلطات العسكرية , لاحظي حملات الطرد من الصالح العام في مدى (39 سنة من عمر التلفزيون) مرة بشعارات التطهير واخرى الصالح العام ومجاراة المشروع الحضاري ,, مما ادى لهجرة كثير من الاعلاميين والمبدعين وهذا ادى لحدوث عدم تواصل اجيال , وهذا ما انعكس في القنوات السودانية الاخرى ,,, اما المواد المشرقة التى ظهرت فهذا كان لامكانيات ذاتية تتعلق بمقدم المادة ,,
Post: #9 Title: Re: تلفزيون السودان (خمسين سنة من ,,,,,,) Author: يحي قباني Date: 12-25-2012, 06:25 PM Parent: #6
عمار و الاخوة الافاضل
الإحتفال باليوبيل الذهبى
تلفزيـــــون الســـــودان
ضيوف الحلقة
الأستاذة صفية الأمين " ماما صفية - الأستاذة فتحية محمد أحمد
الأستاذ على الريح و الأستاذ المصور عبد المنعم بريمة
ذكريات الزمن الجميل ... والحسرة على ما ضاع من تاريخنا الفنى الجميل
دعوة للقائمين على الأمر ... وخصوصاً المخرجين الرجاء مشاهدة هذا اللقاء
تقديم الأستاذ طارق كبلو - سهرة من جزئين
Post: #10 Title: Re: تلفزيون السودان (خمسين سنة من ,,,,,,) Author: يحي قباني Date: 12-25-2012, 06:28 PM Parent: #9
الجـــزء الثاني
Post: #11 Title: Re: تلفزيون السودان (خمسين سنة من ,,,,,,) Author: عمار عبدالله عبدالرحمن Date: 12-25-2012, 06:32 PM
عــزيزي عبدالناصر الخطيب
Quote: عموما لاي وسيط إعلامي الديمقراطية هي الحالة المثالية البتخلي ينطلق بدون قيود يمكن عدم توفره في بلادنا أعاقت وحدت من مسيرة التلفزيون والاعلام بصورة عامة لكين في النهاية في المسيرة الطويلة لواحد من أوئل تلفزيونات أفريقيا وبالمناسبة قبل التلفزيون المصري أكيد في إشراقات حتظل في الخاطر ................