بالدموع سادومبا يودع الهلال والسودان.. (فيديو)

Quote: الثلاثاء 25 ديسمبر 2012 الساعة 1:40 كتب/ عاصم وراق - صحيفة قوون ______ ذرف الزمبابوي المرعب دموعاً غزيرة أثناء حواره الذي أجرته معه قناة قوون الفضائية أمس عندما عرضت القناة محموعة من أهدافه التي أحرزها خلال مسيرته مع نادي الهلال وقد كنت شاهداً على موجة البكاء الحار التي دخل فيها سادومبا وهو يردد : سأفتقد جمهور الهلال الوفي. هذا وقد بكى العاملون بالقناة لبكاء سادومبا الخلوق صاحب الوفاء النادر فانهمرت الدموع من مآقي الأساتذه الرشيد بدوي عبيد ومحمد حسن حدباي ومعتصم أوشي وكل المهندسين والمذيعين والمذيعات بالقناة. الجدير بالذكر أن سادومبا قد أحرز مائة وخمسين هدفاً منذ توقيعه في صفوف الهلال.

سلام يا بشاري
ما قال الهلال ما اعاد قيده ليه؟
حقيقة أمر محيّر, هل غالى في سعره ولاّ غارزفت اباه

في هذا المشهد شاهد بكاء الزيمبابوي المرعب سادومبا
موقف مؤثر بالجد إذ يبدو انه احب الهلال والسودان
واثبت وفائه لجمهور الهلال باعتذاره لهم وهو ما لم يفعله غيره

Quote: الجدير بالذكر أن سادومبا قد أحرز مائة وخمسين هدفاً منذ توقيعه في صفوف الهلال.

والله (150) هدف عدد ماهين اعتقد ان لا احد ينافسه في ذلك غير كلتشي من جملة المحترفين
الذين تعاقبوا على المريخ والهلال وعموم الأندية السودانية ...

Quote: سلام يا بشاري ما قال الهلال ما اعاد قيده ليه؟ حقيقة أمر محيّر, هل غالى في سعره ولاّ غارزفت اباه

وعليكم السلام يا ود البشـــرى

تسألني أنا ولا تسأل البرير
غايتو البرير دا الا يلحق الهلال آمات طه حتى يرتاح
بالنسبة لي شخصياً أعتبر سادومبا من أنجح المحترفين الذين لعبوا في السودان
الزول دا بالذات مسيرته حافلة مع الهلال وزول محترم جداً ولا بتاع مشاكل ولا حاجة
وقليل الاصابات وهداف من طراز فريد يعني باختصار كدا لاعب مكتمل المواصفات
ويا ريت لو كان المريخ سجلو بدل هيثم مصطفى وعلاء الدين يوسف

غايتو الله يكون في عونكم بس

سألتك يا البشاري عشان في المكتب اليوتيوب مقفول
قلت يمكن سادومبا يكون قال حاجة لكن فهمت من احدى الصحف انو اصلا ما قعدوا معاه أو فاوضوه
طيب على الأقل كان يكرموه ان شا الله بحفلة شاي ووداع يليق بما قدمه
الله يحلّنا منهم ديل ياخ

Quote: طيب على الأقل كان يكرموه ان شا الله بحفلة شاي ووداع يليق بما قدمه الله يحلّنا منهم ديل ياخ

الما عندو خير في اهلو يا ود البشــرى ما عندو خير في غيرهم
تعامل البرير مع هيثم أيضاً غير لائق

تحياتي

Quote: والله (150) هدف عدد ماهين اعتقد ان لا احد ينافسه في ذلك غير كلتشي من جملة المحترفين الذين تعاقبوا على المريخ والهلال وعموم الأندية السودانية ...

والله يا جنابو الزول من ناحية زول ما هين فهو ما هين
وبعدين الزمن وين تلقى لاعب محترف يذرف عليك الدموع ويحب الفريق
كما يفعل سادومبا هنا في هذا الفيديو
عندك زول ناجح جدا معاك (بس يبعد من ضربات الجزاء وضربات الترجيح)
تقوم تسجل محترفين جدد وما عارفهم هل ينجحوا ولا لا؟

سادومبا أحد ضحايا عشوائية البرير
وتحت تحت المحترفين الجدد لم يتسجلوا حتى الآن رسمياً

سلامات


لم أشاهد اللقاء ولكن من حضره ذكر لي بأن سادومبا تفادي الحديث عن البرير و غارزيتو.....


عموما هناك شيئ غير مفهوم و غير طبيعي هو سبب تدهور مستوي سادومبا الاخير ....هل لذلك علاقة بالبرير...أو هيثم ...أو صلاح إدريس أم فقط فني أو ربما من المدرب...

في مباراتي مالي...أخذ فرصته كاملة ...ولم يقل كلمته....بل أضاع ضربة جزاء بصورة غريبة....


نحن نحب سادومبا و الرجل إرتبط بنا ...وهو فنان ولا شك....أتمني أن لا نندم عليه كما ندمنا علي قودوين...



الامين: سادومبا دا كان أفضل ليكم من هيثم.....لكن فهمكم بعيد عن الكورة


تحباتي

الله لا كسبك يا الجهلول البرير خربتها وقعدتا علي تلها
يأخ البرير دا مايقدر يرأس فريق حله ناهيك عن فريق بقامة الهلال
أشوف فيك يوم .




ود البشاري سلام

Quote: الله لا كسبك يا الجهلول البرير خربتها وقعدتا علي تلها يأخ البرير دا مايقدر يرأس فريق حله ناهيك عن فريق بقامة الهلال أشوف فيك يوم .

ولسه يا حبيب البرير لا يملك عقلاً ليفكر به
وإنما عضلات ليضرب بها
لو ما لحق الهلال آماااااات طه ما تديني يدك .. والله صحي

تحياتي

Quote: نحن نحب سادومبا و الرجل إرتبط بنا ...وهو فنان ولا شك....أتمني أن لا نندم عليه كما ندمنا علي قودوين...

حتندموا يا دكتور
وحتندموا كتير كمان التفريط في اعمدة الفريق حاجة ما ساهلة
حتبقى هناك مشكلة تجانس بين اللاعبين عشان تخلق توليفه متوازنه
من اللاعبين اصحاب الخبرة والشباب والهلال فعليا الآن بدون قائد حقيقي في الملعب
وفرط في اميز هداف للفريق بطريقة غريبة جدا

تحياتي

والله يالامين لي زمن ما قعدت استمع لي فيديو حواري زي ما قعدت للفيديو ده
ياخي انا مريخابي لكن من النوع اللي ذكره سادومبا فعندما يلعب الهلال مباراه خارجيه
فانا هلالابي حتى يعود الهلال
الزول ده ادانا نصائح حقو نسمعها كويس ونبطل التعصب الاعمي الدايما مودينا لي ورا
انا لو كنت ادري في الهلال لعملت المستحيل لاعادة تسجيل هذا اللاعب الرهيب الخلوق المهيب
لكن!!!!!!!!!!!!!!!!!!!!!!!!!!!!!!!!!
اااااااااااخ ياسودان

محزن ان تفرط ادارة الهلال الرعناء في هولاء النجوم بمثل تلك الطريقه ..


نتمني التوفيق لسادومبا الوفئ اينما رحل ..


تحياتي يا بشاري

السلام عليكم يا شباب

انا واحد من الناس كنت مستغرب جدا من شطب سادومبا لغاية ما سمعت لي تسجيل لمكالمة هاتفيه للبرير ( و لا ادري مدي قانونية هذا التسجيل لو ما كدا كنت جبته ليكم هنا) ... في هذه المكالمه اتهم البرير سادومبا بتعمد اضاعة ضربة الجزاء و ذلك لمصلحة صلاح ادريس... حقيقة بطني طمت من سادومبا و من كل هؤلاء الذين يلعبون بمشاعرنا لمصالحهم الشخصية و جاء في بالي تصرف المعز و صلاح ادريس ايام كورة النجم الساحلي و برضو تصرف هيثم مصطفي ايام كورة المريخ... غايتو كمية من الانانية و عدم الضمير تخلي الاداري السابق يكيد للاداري الحالي حتي لا يحقق انجاز عجز عنه هو دون النظر الي ان هنالك مشجعين تتحرق اعصابهم و دماءهم املا و لهفة ان يفوز الفريق بكاس تضعه موضعه الصحيح في خارطة الانديه الافريقيه ( هذا اذا كان كلام البرير صحيح)

Quote: محزن ان تفرط ادارة الهلال الرعناء في هولاء النجوم بمثل تلك الطريقه .. نتمني التوفيق لسادومبا الوفئ اينما رحل ..

اسامة الخليفة تحياتي،،

فعلاً محزن جداً والله فراق سادومبا ورحيله بهذه الطريقة
الراجل ما قصر مع الهلال وأفرح الملايين بأهدافه
وفوق ذلك أدبه واحترامه واخلاقه العالية جدا

ربنا يعوضو خير إن شاء الله وسمعت الأهلي المصري يفكر في التعاقد معه
وتلقى اتصالاً من حسام البدري مدرب المريخ الأسبق

كن بخير

Quote: الزول ده ادانا نصائح حقو نسمعها كويس ونبطل التعصب الاعمي الدايما مودينا لي ورا انا لو كنت ادري في الهلال لعملت المستحيل لاعادة تسجيل هذا اللاعب الرهيب الخلوق المهيب لكن!!!!!!!!!!!!!!!!!!!!!!!!!!!!!!!!! اااااااااااخ ياسودان

الموصلي يا فنان الزول دا اتسودن وبقى سوداني اصيل
سيذهب ومعه احترامنا له
وسيبقى في ذاكرة الشعب السوداني هلالاب ومريخاب
انا والله كنت اتمنى تسجيله في المريخ وتجنيسه


تحياتي