نزلت حفلة عرسها في اليوتوب دا سبب الطلاق ! وهو عايز يرجع!؟#أها كيف !

أنا العريس التعيس بطرح مشكلتي عشان تقولوا رأي يساعدنا في حل المشكلة دي طبعا أتتقدمت لعائلة كنا نعرفهم منذ وقت وانقطع التواصل بيننا وبينهم ما كان في اصلا عدنا التواصل من اجل الخطوبة وحصلت على موافقة هذه العائلة دون تردد بزواجي من ابنتهم وتم عقدالقران في منتصف عام2012م طبعا قبل كلو لازم تشوف الزوجة نعم عقدت القران عليها بعد المعاينه والمشاهدة الشريعة وكان فترة مابين الخطوبة والزواج بس شهرين وكان التواصل بيني وبينها عن طريق الهاتف لاني كان لابد أن أعود لموقع عملي وهو الامر الذي ندمت عليه بعدالزواج ندمت لان كل مادار بيني وبينها مكشوف امام اسرتهاجميعا والعالم كلو حتي حفلة العرس بقت حديث الناس في كل الدنيا هذا ماحدث كانت توهمني بانو ما زول عارف حاجه وفي النهاية اتضح العكس طبعا انا كان عندي احساس انو خطيبتي من النوع الذي لايخفي شيء عن وعن وخصوصا صحابتا كان هناك احساس ولكن الاحساس خطر علي الا متاخر؟؟ متين ابتداء وماهي علاماتو التي جعلت هذا الاحساس ينتابني مثلا اقول لها كلمة من باب المداعبه وما الى ذلك تتقبلهابصدررحب وفي اليوم التاني تقول لي كان قصدك امس شنو من الكلمة الفلانيه:اضف الى ذلك سمعتها تقول الكلمة الفلانية مافهمتها ؟اقوليها ماعجبتكم؟؟تقول لالاقصدي أيوة ماعجبتني لالا لم يحدث هذااستمر التواصل على ماهو عليه:ولكن لااعطيها سرا طبعا مااكتشفت صدق احساسي الا بعد الزواج الذي سبق باولقاءبيني وبينا دعنا نتحدث عن المشكلة الاكبر وهي ما فعلته المفاجاءه الكبيرة كيف واحدة محترمة وجامعية تسلوك سلوك زي دا تعرض شريط عرسها في اليوتيوب كل العالم يتفرج عليهو مصيبه وفضيحة أجتماعية لي ولعائلتي والغريبه ما كانا لا ولا العائلة علرفين الا لما هي أتونست مع بت خالي في لندن وقالت ليها هكي الربط لأأتفرجي علي عرسي في اليوتيوب طبعا الرهيبه اللي في لندن أتصلت بقارات الدنيا السبعة كلمت كل الدنيا حتي أمي فالسودان عرفت وأتصلت بي وقالت بالحرف الواحد طلق البت دي ما نافعه معانا ديل حلبه ما بشر وأنا بالحماقة قمت أتصلت بيها وكمان طلقت بدون وعي من الزعل والله القصة ما قصة غيرة ولا شرف بس لانو أمي زعلانه وصور أخواتي في النت ونحن ما كدا يعني ما متحررين ناس مساكين البت فضحتنا وخلاس بقيت عميان الطلاق هو المخرج !!! ماهو خيالالا؟؟حقيقه كيف؟؟؟؟؟؟؟؟؟؟؟؟ مع الخطوبة والشبكة وزي عادة كل البيوت في السودان بعثت مجموعة نساء العايلة و من اقاربي لمنزل اهل خطيبتي: ودفعت دم قلبي وشافوها قالوا ما فيها كلام مؤدبه ولكن محبة اسرتي لهذه العائله خلتهم يعطوني صورة ما صادقة عنها و لاصرارهم على زواجي من هذالعائله؟؟؟؟؟؟؟؟؟؟ بالمناسبة بعد الطلاق والحصل دا أنا متعلق بالبت دي وعايز أرجع ليها تاني و ما عارف بس رأيكم ؟
وشكرا يا زهير لانك عرضت المشكلة علي الناس عشان علي الاقل يقولوا رأي أقدر ألقي بيهو حل


بالله أرجو من الجميع الزول حالتو كعبه شديد كنوا رحماء به

لكم ودي

Quote: بالله أرجو من الجميع الزول حالتو كعبه شديد كنوا رحماء به

تدفع كم ؟؟؟










قاسم المهداوى

يا مهداوى يا اخوي ، الراجل اصلا دافع دم قلبه
خليك رحيم شوية...

Quote: أمي فالسودان عرفت وأتصلت بي وقالت بالحرف الواحد طلق البت دي ما نافعه معانا ديل حلبه ما بشر وأنا بالحماقة قمت أتصلت بيها وكمان طلقت بدون وعي

يعني امك قالت ليك طلقها قمت طلقتها .. بالله انت بشر؟ لا اللذيذة كمان طلقت ( بدون وعي ) لا اخير يكون بوعي!! والله انا لو ابو البنت دي ما برجعها ليك لانك صراحة كدا راجل ما واعي! قال نزلت فيديو في يوتيوب! والمشكلة شنو طيب؟ هي لو خاته انه الفيديو دا حاجة كعبة ما كانت اتصلت بي قريبتك وقالت ليها انا نزلت فيديو بتاعنا .. المسكينة فرحانة بي حفلتها وزواجها بالحلال من راجل للاسف اي كلام .. ياخ الحفلة دي هي موش عندها حق فيها ، ودي حفلتها زي ما حفلتك انت؟ يعني انت لو نزلت الحفلة دي بنفسك في يوتيوب هل كان ممكن زوجتك تطلب الطلاق؟ ولو مشت بيت الطاعة قالت للقاضي عايزة اطلق عشان الراجل دا نزل حفلتنا في يوتيوب باقي ليك بطلقوها؟
الوالدة ليها احترامها لكن انت مسؤول من بنت الناس دي امام ربنا ما والدتك! السلوك المشين دا انت بتتحمل ذنبه امام ربنا ما تلفونك! قال اتصلت وطلقتة! اول حاجة تلفونك دا بله واشرب مويته! واضح انك ما قادر تتعامل مع التكنولوجيا .. تطلق بالتلفون معناتها ممكن تطس ليك واحد بالعربية نظام عايز تهظر معاه وكدا! يا خوي انسى موضوع المرة دي ، انت ما راجل بستامنوك على امراة! قالولي طلقها طلقتها! والله اصبتني بالغثيان ..

الحفلة في الاساس بتاعت بنت الناس المسكينة دي واي واحد تاني ( غير العريس) ضيف في الحفل .. يعني الحفل دي حقتها هي فهمتة؟ اخواتك مع احترامنا ليهم مجرد ضيوف في الحفلة! يبقى هي صاحبة الحق في حفلتها وفي الشريط! يعني لو قالت ما عايزة حفلة ، او ما عايزة تصوير الا تحنسوها! لكن لو اختك قالت ما عايزة تصوير في الحفلة دي بقولوا ليها وانت الدخلك شنو؟ اها الجماعة الضيوف الجو الحفلة ( اخواتك ) وشافوا انه في تصوير كان ممكن يتخارجوا لو ما عاجبهم موضوع التصوير دا .. اما الصور دي تنزل وين بعدين مافي وثيقة قانونية ملزمة عشان يكون في عقوبات مترتبة عليها زي الطلاق! يعني انت انزلت بالبنت دي عقاب ما عنده سند قانوني ولا اخلاقي ، يعني دا ظلم بالدرب عديل كدا! مسالة انحنا ما متحررين وانحنا ما هناي انت لسة بتتكلم بلسان والدتك واخواتك رغم انك عندك اسرة صغيرة الآن مفروض تتكلم باسمها ، يعني صيغة الجمع دي مفروض تكون انت وزوجتك .. كان تقعد معاها وتتفقوا على طبع جديد للاسرة الجديدة ، لكن انت عايز تمشي عليها طباعك انت واخواتك .. موش قلت ليك انت لسة عايش في بيتكم القديم رغم انك انتقلت لي اسرة جديدة صغيرة محتاجة فهم جديد وقوانين جديدة تسنوها انت وزوجتك! يبدو انك استعديت للزواج استعداد مادي فقط!

Quote: بس لانو أمي زعلانه

طلقتا بت الناس بس عشان امك زعلانة ؟ و اسه امك نفعتك بشنو؟ للدرجة دي بنات الناس لعبة رخيصة

Quote: وزي عادة كل البيوت في السودان

مافي شي بخرب علينا غير عاداتنا و تقاليدنا الخاطئة و النحنا ما قادرين نتخلص منها رغم معرفتنا
التامة بانها عادات خاطئة .. لو قدرنا نتحلا من مسألة العادات و ارتقينا بفهمنا شوية في مسائل الزواج لمرحلة العقلانيات بكون اسلم

Quote: بعثت و مجموعة نساء العايلة من اقاربي لمنزل اهل خطيبتي

مصيبة تانية .. إختيار الزوجة بتم بناء على إنطباع اهل الولد عن اهل المطلوبة للزواج .. يعني إستقبلونا كيف ؟ اكلونا شنو و فارشين بيتم كيف.. و للا البعثة النسائية بنت إختيارا ده على اي اساس؟
:

Quote: ودفعت دم قلبي وشافوها قالوا ما فيها كلام مؤدبه

مصيبة تالتة.. الإختيار بناء على السمع و من غير معرفة سابقة للولد بمن يطلبها للزواج نصيحتي ليك في عرستك الجاية كان البت ابت ترجع ليك - انه تكون انت شخصياً بتعرف البت و تكون إختيارك ما إختيار البعثة النسائية الرسلتهم من اهلك..
.لأنه انت الحتعيش معاها ما اهلك .. و ماتبني إختيارك على السمع و ابنيه على المعرفة الشخصية بالإنسانة العايز تتزوجا

Quote: ولكن محبة اسرتي لهذه العائله خلتهم يعطوني صورة ما صادقة عنها و لاصرارهم على زواجي من هذالعائله؟؟؟؟؟؟؟؟؟؟

و ده من اكثر اسباب الطلاق و معظم وقائع الطلاق الحصلت في مجتمعنا بسبب تدخل الأهل -سواء اهل الولد او البنت- في إختيار الزوج\ة

Quote: بالمناسبة بعد الطلاق والحصل دا أنا متعلق بالبت دي وعايز أرجع ليها تاني و ما عارف بس رأيكم ؟

بعد الطلاق البت بقت ليك حلوة؟
دي برضها مشكلة في بعض الرجال السودانيين . البت ما بتحلا ليهم إلا بعد ما تمشي منهم

Quote: وشكرا يا زهير لانك عرضت المشكلة علي الناس عشان علي الاقل يقولوا رأي أقدر ألقي بيهو حل

انت فوق ما قلتا طلقت البت عشان نشرت شريط العرس في النيت!! اسه ليه جاي تنشر مشاكلك في النيت .. الإذدواجية دي اخير اتخلصوا منها يا معشر الرجال
رأي شخصياً ما حيكون في صالحك يا صاحب زهير .. لأنك طلقتا بت الناس عشان امك كانت زعلانة.. بكرة لو اختك زعلت ممكن عادي تطلق بت الناس دي و تخرب بيتا
للمرة التانية.. الزواج رابطة مقدسة بتم باختيارك انت .. و انت و زوجتك البتديروا حياتكم موش والدتك و للا والدتا.. و لازم زواجك ده كان ينتهي النهاية دي.. لأنه انت هنا مجرد ارقوز .. بحركوك الأخرين .. يعني لا انت اخترتا زوجتك ..اختاروها ليك و طلقتها برضو بسبب طرف تاني .. ماممكن كده

منو القال الحلبة مابشر؟؟؟؟

Quote: ديل حلبة ما بشر

كتر خيرك يا أم العريس

اضرب تلفون لى امك تعرس ليك واحدة تانية ....

(بس لو سمحتوا انت وامك ما تقربوا بيتنا لى خطوبة!)

قال دم قلبو قال ... منوّر يا ابو ألب انت ....















... المهم ....

وانت وامك وكت اصلاً ما متحررين ... ما تتكاملوا قيدكم دا تتكمدوا بيهو في أي داهية ... حايب لينا جريرتك دي نناقشها في منبر "متحرر" ليه؟















... المهم .....

ياجماعه براحه علي الراجل الراجل عايز حل

ولكن محبة اسرتي لهذه العائله خلتهم يعطوني صورة ما صادقة عنها
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

وعاوز ترجع لها بعد؟؟؟

قال ليك حلبه ما بشر..
والحلبه ديل وكت ساق اهلو كان لونهم شنو؟
__
يا أبو الزهور زولك ده أمو قالت ليهو عرِس عرَس، قال ليهو طلِق طلَق، خليهو يرجع ليها تاني ؛)

Quote: يا أبو الزهور زولك ده أمو قالت ليهو عرِس عرَس، قالت ليهو طلِق طلَق، خليهو يرجع ليها تاني ؛)

مع عدم تقبلي لموضوع عرض الحفلات الخاصة (كرقيص العروس) او ما يشاكلها مثلا علي النت او اي وسيلة اخري خارج نطاق من يعنيهم الامر إلا انني لا اري فرقا بين عرض حفل العرس وما ينزل علي النت من حفلات سودانية عامة علي اليوتيوب . فليس كل ما نشر في اليوتيوب وغيره مما يسئ . بل لعل النشر في اليوتيوب اصبح من اليات التداخل والتواصل الاكبر وتبقي علي من يعيشون بعقليات تأخرت في فهم معني النشر في اليوتيوب او غيره الارتقاء نحو ما تكفله لهم ولغيرهم آليات الثقافه الحديثة المتجدده من فرص وثقافات متنوعه ومتطوره. ولعل التنازع يبدو جليا في محاولة فهم الفرق بين عرض العروس الجامعيه لحفلة زواجها في اليوتيوب والتي تدخل في اطار (الاشهار) وهو شرط من شروط صحة الزواج وما وقع فيه العريس من (تشهير) اي عرض الحال او بالاصح (شيل الحس) له وللسيده والدته ولبقية اسرته المحافظة وللعائلة سيئة الحظ التي ارتبطت به من التشنيع عليهم واين ؟ في النت ......فصاحب العقل يميز
فسطحية العريس تكاد تقفز قفزا من كل سطر خطه بالالفاظ خاوية مثال (توهمني ) (كل ما دار بيني وبينها مكشوف امام اسرتها جميعا )

Quote: ندمت لان كل مادار بيني وبينها مكشوف امام اسرتهاجميعا والعالم كلو حتي حفلة العرس بقت حديث الناس في كل الدنيا هذا ماحدث كانت توهمني بانو ما زول عارف حاجه

مقارنة بحسن نية العروس وبراءتها في ارسال الرابط حتي لمن تعرف بمن فيهم اهل العريس نفسه . ولعل الامر يبدو غريبا أن تقوم عروس جامعيه مثقفه كما وصفها العريس بارسال الرابط لعدد من الناس ويفوت عليها اشاركه هو فيه لياتي ويحتج (بان كل ما دار بيني وبينها مكشوف) . فحتي وإن لم ترسل له الرابط فهل هو كان يتوقع العريس ان يدخل بيت اسرة لا يعرف عنها شئ ليقترن ببنت لم يلتقيها في حياته ولم يكن يربط بينهما إلا بعض محادثات ثم يقتلع هذه البنت من جذور ما يربط بينها وبين اسرتها ومن هم حولها هكذا بجرة قلم .....
في تقديري إن الفارق الثقافي بين العريس والعريس كبير فمعايير التوافق والتكافؤ لا تتوفر في هذا الارتباط .

أبو الزهور.

القيامة دايره تقوم وأنت لسه في بوستاتك المهببة دي!

كدي نزل لينا الحفلة وبعدين نحكم

يا أخوان كفاية ارحمو العريس دا

الحصل الحصل خلونا نفكر فى المخرج

كيف كان الطلاق هل رجعى ام بائن بينونة كبرى بمعنى لارجعة فيه ( ثلاثة طلقات باللفظ )

وطبعا مع ظهور الفتاوى الحديثة هناك كم يجوز الطلاق بالتلفون والطلاق بالايميل وخلافه

الا انه ولخطورة واقعة الطلاق البائن فهناك من لايجوزه الاحضوريا ومشهودا وباللفظ الشرعى ( ورود لفظ الطلاق ثلاثا )

وهناك نقطة هامة هل المطلقة ترغب فى العودة الى المطلق حتى نبحث فى المخارج الشرعية لهذا الطلاق

مشاركتكم سوف تضيف وتساعد فى الحل

حأحاول اكون طيبة في ردّي ده.. وامسك اعصابي على قدر ما اقدر...

في أزمة ثقة واضحة بين الزوج ده وبين زوجته (سابقاً)... والأزمة دي هي سبب انه طلق (بدون وعي)... يعني الزول ده اتبنت جواه مشاعر كتيرة منها انه ما شاعر بالأمان مع الزولة دي... البت واضح من تصرفاتها البراءة، الزولة البتشرك صاحباتها في (كل شي) وهي على وش زواج... يعني كونها ما تفهمه وتمشي تسأل صاحباتها وتجي بي فهم جديد، ده بخليني كمان اشك انها شهادة عربية (مع الاعتذار لرويحتي دي)... لانه بنات السودان ما بتصرفوا كده... واعيات ومفتّحات... الشي العملته البت ده خلا الراجل ما يستأمنها على اي شي يقوله، وقال بكل ثقة انه كمان ما بديها سر!... طيب انا اظن انه دي ازمة كبيرة جداً، جات وطرحت نفسها وبقوة على رد الفعل الإختاره لما حصلت مشكلة الفيديو... براءة البت دي ممكن هي سبب سوء تقديرها.... زي ما الحفلة دي حفلتها، هي حفلته هو برضه... البت الواعية والزوجة الحكيمة، بتجي تتناقش مع زوجها قبل ما تتخذ قرار زي ده.. لانه القرار ما مفروض يكون حقها براها، على الاقل في الحته دي... يتناقشوا (كأنداد)... اتنين عندهم حاجه مشتركة وعايزين يقرروا فيها قرار معيّن... لما تمشي بي راسها براها وتتصرف هي اتعدّت على حقّه هو كمان... طبعا برجع لإنه الزواج من اساسه بالشكل ده متوقع فيه اكتر من كده، لانه ببساطة اتنين ما بعرفوا بعض... ممكن ناس يكونوا بعرفوا بعض سنين، لما يجوا يتزوجوا يعرفوا حاجات ما كانوا متخيلينها.. فما بالك باتنين اتكلموا بالتلفون كم شهر واتزوجوا....

نصيحتي... اذا انت عايز ترجع البت دي... محتاج تعيد صياغة اسبابك للرجوع... هل لأنك خسرت قروش (فيها)... فما اعتقد انه زواج زي ده حينجح... لو انت عايزها لانك شاريها كزوجه تحترمها وتصونها وتحميها... فإنت محتاج ترجّع ليها الاحساس بالامان، لأنها فقدته... وانت محتاج تكون صريح معاها وتتكلم معاها في الحتة بتاعت انها بتنقل كلامكم دي... فهّمها انه الحاجه دي ما بصح تحصل.. محتاجين تشتغلوا على موضوع الثقة ده عشان المركب تمشي..

تحياتي يا زهير

بالله دا راجل دا

طلقة علشان اموا قالت ليه طلقة


دا زول دلاهة وعبيط وهى زاتها تستاهل علشان تعرس راجل راسوا عند اموا

سلامات يا زهير
الراجل ده قصتو ركيكه وماتدخلش الدماغ ....قصه وهميه من صاحبك ده ...
تحياتي

يا زهير كلم الزول دة وقول ليه
رضا الام من رضا الرب قالت ليك طلقا خلاص كلام وانتهي والبنات علي قفا من يشيل راقدات بنات الناس البعرفو النت والفيس بوك ادوات تواصل وليس للكلام الفارغ
دي من نوع النسوان الما بتاعين قدام
مبروك تحررك بس تاني ما تغلط حب اولا وبعدين عرس فالعرس بدون حب زي الفول من غير زيت ما بتبلع

جاء فى الاثر انه ..
هناك عشر رجال لا يصلحون للزواج

منهم

الأول ابن "ماما" المدلل:
رقيق ولطيف وناعم بعض الشيء ربما يكون لديه "كرش" صغير من أكل "ماما"، يقضي معظم وقت فراغه في البيت. الشيء الذي يشدك إليه في البداية.. أنه يحب مشاهدة برامج المرأة و"طبق اليوم" معك. الشيء المرعب.. أنه سبق وشاهد كل هذه الحلقات.
علامة الخطر: يقول إنك أنت الفتاة التي كانت تحلم بها والدته طوال عمرها لتكون زوجة لابنها ويعرفك عليها في أول لقاء بينكما.
لكي تتخلصي منه اعترفي له أنك تفضلين الرجل الذي ينتقي ملابسه بنفسه ولايعتمد علي ذوق ماما.

كويس السمع كلام أمو ..

رجال آخر زمن . أمى قالت لى !!! والله كلاااااااااااااااام...

Quote: وشكرا يا زهير لانك عرضت المشكلة علي الناس عشان علي الاقل يقولوا رأي أقدر ألقي بيهو حل

الا تزال تبحث عن الحلول عند الناس؟
راجع ما كتبتَ أعلاه ...
كل قراراتك أتت من غيرك ...
وكل مصائبك أتت من غيرك ...
ولا تزال تبحث عن الحلول عند الآخرين!!!
أترك عنك هذا التردد وعدم الحزم ...
حاول إتخاذ هذا القرار بنفسك وتحمل مسئوليته ...

ياجماعه لاتسخروا من الامهات
طاعت الوالدين واجبه
والمسأله محتاجه شويه الحكمه مابين الام والزوجه
ويجب علي الزوجه العرفه الكامله بطبيعت الرجل واسرته قبل ان ترطبت
به لانو يجب ان تتم هذه المسأله قبل الزواج واذا حصلت بعد الزواج بنطبق عليها المثل البقول
(دي الجس البعد الضبح )
ويحاولوا يكيفوا حياتم علي كده هي تحاول تكون قربه من عاداتم وتقاليدم بقدر المستطاع وهو يحاول
يقض الطرف عن بعض الاشياء التي يحس با انها غير مقبوله او غير معتاد عليها اذا كانت لا تمس الشرف
لحدي مايوصلوا لي توافق تام

تخريمه
وبعدين صاحبك دي قاطع الموضوع دي من راسه
لانو انا قدري ما حاولت اخته علي ارض الواقع اجد فيه كثير من التناقض

يازول انت طلقت وانتهيت.. تاني الجقلبه شنو
وبعدين بر الوالدين
+ حلبيه
..
..
..
نقطه سطر جديد

يا زهير

دردق لي الزول ده جيب منو تلفون البت دي اعرسا انا عشان احميها من نوع المتخلف ده

غايتو دا زول الله ساي
لو البت دي بنتي ما برجعها ليه نهائيا مهما كان لانه غير مسؤول وامعة وعايز يرجع العروس للاسباب الغلط
وهي خسر دم قلبو ما محبة بل كنجالات
بعدين امه دي عارفة النت دا شنو معناها امه نفسها عندها من يشحنها ويوجهها
العائلة دي ما فيها رجل رشيد وقايدتنها نسوان جاهلات
اين ابوك من هذا الخمج البتعمل فيه امك واخواتك دا??!!!
.ما ترجع لان سبب الطلاق شريط عرس في يوتيوب ذي اي عرس تاني بنشوفو وما بنقعد نتمعن فيه
بعدين ليه السودانيين نظرتهم سالبة للنت كدا وبفتكروه مكان بطال ??!!
نصيحة ليك انسى البت دي لانها لورجعت بيكون في احساس سالب جواها تجاهك
وتجيبو عيال وتدلقو تعذبوهم معاكم
اخد فترة واتزوج وامسك امك في يد وزوجتك في يد

الاعزاء البورداب وكل العابرين
لكم تحياتي
وبعد يعني الزول دا أقول ليهو شنو طبعا قرأ كلاكم كلوا وهو زعلان جدا قال منو فيكم اللي ما بغلط يعني أنتو عايزين جنازة وتشبعوا فيها لطم المهم هو زول مسكين والله ما عارف مصلحتو وين ونحن نحاول نساعدوا بأي طريقة وكمان (البت قرأت الكلام في النت مشت قالت العمل الفضحية حسي منو فينا) يعني المشاكل في زيادة والله أنا ذاتي بقيت محتار وهو بحملني المسئولية قال كمان أن كنت قاصد ما أعدل كلامو عشان تحصل مشكلة أنا رفعت يدي خليهو يأكل ناروا زول وهم
زهير

سلامات يازهير
أنا من الأول قلت الزول ده وهم والقصه ركيكه وربما القصه ذاتها وهم ...إنت يازهير بتعرف ال-couple ديل شخصيا ؟

و الله يا شيخ دينق
عجبني تعليقك
الناس في شنو و الحسانية في شنو
التحية و كل عام و انتم بخير