الثورة مكجوجة براها !!!

من بوست لزميل المنبر أبقوتة
حلف قال خايف يكج الثورة
عشان كدا فضل مايكتب..

الثورة يوم الأحد كانت قوية جدا حتى أفرحتنا ونحن على بعد آلاف الأميال..
لقد أثلجت صدورنا

عملنا داونلود لكل مانملك من الثوريات
وقعدناعلى الكاوتش نتابع المنبر ونتاوق لكل القنوات الفضائية..

ومما زاد فرحتنا أن قناة الجزيرة طنشت الخبر..
فقلنا شكلها كدا المرة دى قوية عشان كدا قناة الكيزان طنشت..

ومصمصنا القهوة ولعنا الطاهر المرضى وشكرنا خالد عويس..

اليوم والذى يؤرخ له باليوم التانى للثورة
فتحنا المنبر ننقر على أيقونة نيو
لقينا المقالات المقتبسة من مواقع أخرى تتحدث عن ثورة الأمس..
قلنا أكيد استراحة محارب..
نط ولد شليق قال: هى نان متين فتروا عشان يرتاحوا..

قلنا اللهم أجعلوا خير وماتكون عزاء أنصار سنة ينتهى بانتهاء الدفن..

سرحنا فى حلم جماعى نرسم سناريو للمواقف المختلفة..

سمعنا زعيم ينادى بنته:
عليك الله أدينى كباية موية سااااقطة واضربى لى نمرة سعادتو..

الموية جات وسعادتو على الخط..
ياسعادتو
طبعا نحنا زى ماعارف لازم نطلع بيان
سعادتو يرد:
نعم نعم بس ماتطلعوا من المتفق عليه
الزعيم:
لالا شجب شجب بس وإدانة وعليهن حبيبة تأييد للثورة

سعادتو:
بس ماتتهوروا وتكترو فى التأييد

مفهوم مفهوم ولو عايز ممكن أقراه ليك فى التلفون قبل النشر

لالا مافى داعى, انت مامنك خوف!!

يودع سعادتو ويلتفت للحضور من أعضاء الحزب
قلنا نخت رجلنا فى الثورة بالبيان دا
فلو نجحت ( يضع سرو فى أضعف خلقو) نكون مشاركين
ولو فشلت (كما كل مرة) نكون عملنا العلينا وفى نفس الوقت مازعلنا سعادتو..

زعيم آخر منافس قاعد يفطر جاهو الولد بالتلفون
الزعيم يوسوس:
دا منو
الولد قافل التلفون بيد وباليد التانية يؤشر على كتفو راسما مقصات وصقور ونجوم وجداد
فعرف الزعيم
وانعدل فى جلسته ورسم ابتسامة هاتفية

باغته سعادتو:
أها حاتعملوا شنو؟
الزعيم: فى شنو؟

سعادتو: ياخى انت عايز تجننى؟
ول عايز تعمل فيها حميل
الجدير بالذكر قبل 24 سنة سعادتو كان يستمتع بتقبيل يد الزعيم وهو من توسط له لدخول الكلية الحربية..

الزعيم: لالا العفو, بس لو قاصد هوجة الطلبة دى ماعندنا معاها شغلة
سعادتو: لا لا انتو لازم تطلعوا بيان كدا للتغبيش..
الزعيم: أكان كدا نكلم واحد من فروعناالفى أمريكا يطلع بيان..
سعادتو: دا عين العقل!!

سعادتو: ياخى الشيوعى دا رافع السماعة شكلو, خلينا نمشى نقابلو بالباب..
وصل سعادتو
وقابل الشيوعى
وأنبه على أن تلفونه مشغول
فقال الشيوعى: نعم كنت فى كونفرنس كول مع قوى الإجماع الوطنى
سعادتو: ياخى خليك معانا عشان عايزين نعرف موقفكم بوضوح..
الشيوعى: يزمجر, انتو مافى أحزاب ماقاعدين تعملوا معاهم أى حاجة, ايش معنى نحنا؟
سعادتو: ياتو أحزاب دى؟
الشيوعى: الليبرالى والخضر والمؤتمر وماشابههم..
سعادتو: يضحك, ياخى انت قايلنا نحنا بنخت راسنا مع الفكة دى؟
الشيوعى: والمطلوب
سعادتو: تتصل على الزعيمين وتعمل زيهم..

دخل الزعيمان والشيوعى فى كونفرس كول
وتونسوا عن المظاهرات والثورة القادمة
واستعرضوا لقاءاتهم مع سعادتو
وقاطعهم الذى يجيد الكلام: قبل ما تتكلموا أعرفوا أن تلفوناتنا دى مسموعة..

فتحدثوا فيما أعطى لهم من حرية فى مثل هذه المواقف..
ولكى يرسموا على موقفهم قناعة ذاتية, وسوسوا:
ياخى الثورة دى دارفورية صرفة
ولو نجحت ناس دارفور ديل حايركبوا فى راسنا
فخليها تنتهى ونخطط للثورة القادمة على مهلنا
أصلن الحكومة دى لوح تلج مختوت فوق تربيزة وبدا يسيح!!

سعادتو فى غرفة التصنت ابتسم ابتسامة عريضة وقال:
المابجى بالكاش بنعرف نجيبوا كيف!!

Quote: الولد قافل التلفون بيد وباليد التانية يؤشر على كتفو راسما مقصات وصقور ونجوم وجداد

ديل كلهن رسمهن؟!!

انا اوريك المشكلة وين يا بله

شفت السرعة والتنافس في فتح البوستات هنا نفسها على الارض

هنا كل مناضل عاوز يكون اول من كتب عن الثورة ويسجل نقطة لصالحه فيعج المنبر ببوستات كتيرة الزول الواحد يكون فاتح 100 بوست كلها عن موضوع واحد
وفي 100 زول زيو وكلها حاجات متشابهة

وكل زول عاوز يفوز بلقب مؤثق الثورة الاول


اها على الارض نفس الشي
كل مجموعة كل حزب كل قروب شغال عشان يقال عنه هو من اشعلها

لسع الناس بتتنافس لاشعال الثورة
لا تتشارك لانجاحها

ودي المشكلة

Quote: ديل كلهن رسمهن؟!!

لزوم الدقة يامريم
أصلا الناس دى دقيقة جدا!!

هههههههههههههههه
والله سيناريو ممتع خلاس .. اكتر حتة عجبتني

Quote: الولد قافل التلفون بيد وباليد التانية يؤشر على كتفو راسما مقصات وصقور ونجوم وجداد فعرف الزعيم وانعدل فى جلسته

وليد الشفت
كيفك يازول

ياخى بكلامك دا طمنتنى على صحة الزعماء الثلاثة أعلاه..

الله يطمنك قول آمين.

محمد هارون حميدان
مرحب

وجاء تفسيرها بقرار جمهورى كالآتى:

الصقور: علامة محاربة الجواسيس
المقصات: مقصات الرقيب
النجوم: التى يراها الشعب فى نص النهار
الجداد: علامة التمكين بطرق ميتافيزقية

ياوليد

ذكرتنى قصة الراجل ووليداتو وحلم اقتناء دحيشة..

الجماعة بعد لأى وجهد جمعوا زبدة من لبن الشاى وس خنوه حتى اكتملت قزازة سمن نضيف..
ختوها قدامن وبدأوا يتحدثون عن بيعها ثم شراء الدحيشة

أصغر الأولاد قال: تجيبوا الدحيشة وانا أول زول أركب فوقا..
ابوه شال العصاية قال ليه: عايز تكسر ضهرا الله يكسر ضهرك
فزلفت العصاية وكسرت قزازة السمن
واندلق على الأرض حلمهم!!

يعنى الامل جلا
يابله,,,
يحلنا الله
من تاس السكرة لله
والسرقة لله

حتى ناصر البطل كتب بوست فى نفس السياق

لكن نقول لم تستوى التنجرة بعد
عاوزة ليها نار شوية

أبقوتة
هذا لايعفيك وناصر البطل من الكج..

بالله المرة الجاية أخدوا إجازة من المنبر حتى نطبخها لكم إسفيريا.

يا بلة يااااا بلة
هلكتنا يا دكتور باصرارك على ضغط الجروح المتقيّحة
ما تخلّينا نستمتع بخيبتنا و نريّح ضميرنا بهتاف هتافين و تضامن تضامنين ومعا معنين إسفيريات و نمش نندمس ننوم نومنا

ودولة الظلم ساعة !
لا تيأس فرحمة الله أكبر من كل ظالم

التنظيم مهم ، الملاحظ خروج الناس إزداد عن يونيو ، ووعي أكبر من الشباب ، حموا نفسهم وقلت الإعتقالات بنسبة كبيرة !

تحية طيبة د. بله وضيوفك الكرام

مكجوج إنت يا بلة
أصبر , لسع ما شوفتوا حاجة , الغريق جاي
كده كده النظام منهار براهو.
اليوم النهار حدثت اشياء كتيرة
وللأسف كنت بعيد من النت
وللاسف البورداب ما وثقوا مظبوط
حتى ظن البعض أن الثورة ستتوقف

اول بوست انفتح في البورد هو هذا البوست
وبرضوا لمن فتحتوا الناس كانت مفتكرة انه الامر عادي وهين
ولدرجة انه البعض كان مستكثر الرد على البوست
طلاب جامعة الخرطوم-النيليين-الاهلية يتظـــاهرون رداًعلى عنصرية الإنقاذ
وبراكم شوفتو المناظر

Quote: شفت السرعة والتنافس في فتح البوستات هنا نفسها على الارض هنا كل مناضل عاوز يكون اول من كتب عن الثورة ويسجل نقطة لصالحه فيعج المنبر ببوستات كتيرة الزول الواحد يكون فاتح 100 بوست كلها عن موضوع واحد وفي 100 زول زيو وكلها حاجات متشابهة وكل زول عاوز يفوز بلقب مؤثق الثورة الاول اها على الارض نفس الشي كل مجموعة كل حزب كل قروب شغال عشان يقال عنه هو من اشعلها لسع الناس بتتنافس لاشعال الثورة لا تتشارك لانجاحها ودي المشكلة

فعلاً دي المشكلة ....

و زد عليها تناقض الأخبار يعني واحد إستعجل ليه بي خبر و أجي واحد تاني إضرب ليك نفس الخبر مع الإختلاف الواضح..

تحياتي و إحترامي للجميع

أبوحتوت يامحمد

والله نفسى أضمن شهوتى السلطة والثروة..

بكون دائما عندى إحساس بالنشوة عندما تبدأ الثورة
أقوم أخت ليك صينية المكرونة بالبشمل فى الفرن
والثورة فى الفرن التانى
واتمنى يستون مع بعض
لكن دايما أجد نفسى بقزقز فى البشمل وبتحسبن على أتنين تلاتة من الشهداء واسمع نشيد الثورة انزلقت!

Quote: التنظيم مهم ، الملاحظ خروج الناس إزداد عن يونيو ، ووعي أكبر من الشباب ، حموا نفسهم وقلت الإعتقالات بنسبة كبيرة !

سلام يامها

كلام حلو
لكن أنا شايف حاجة غريبة المرة دى
وهى اختفاء بوستات ناس الحكومة وشراسة ناس الأمن
وفيما قرأت تواطوء الشرطة والجيش.

Quote: كده كده النظام منهار براهو.

أحمد بشير
انت ماقصرت تب

وكذلك زملاء آخرون

أما إن ذهبنا ورا الإقتباس أعلاه
فنحنا بنرقد تحت الحيطة وانتو جيبوا الظيطة
وعلى كدا تكون نظرية لوح التلج اكتملت!

أبو حسين
احترام متبادل
كلامك وكلام وليد إن صح لايوقف الثورة..

أنا بقول لو انطلق وكيل الزعماء بنكون فى وضع أفضل.

الثوره كان ما قامت من البلد ما بتتسند
الطلاب براهم ما بيقدروا على هذا الجبروت

غايتو خمسة فورات اتكجت وطلعت على مافي
لو مقاولين النضال ديل خلو الخفة وانتظرو يمكن تفور وتدفق
في ناس بحنوني عديل كدا لما يبقى لا قرفنا لا شرارة عاملين حاجة غير نقل الاكاذيب والتهويل وفبركة الصور اي زول اتصلت بيه قال لي الثورة دي عندكم في النت هنا مافي حاجة وديل ناس من مختلف الاتجاهات

رانية
حمد الله على سلامتك
وان شاء الله عافية تمام

ياريت واحد فيهم يروح
الجبروت
أو
الكيزان.

يادكتورة نجاة
المظاهرات يوم الأحد كانت قوية
حتى ملاسى شهد بذلك

بس النفس ماطويل
عشان فى قيادات بتقطع نفس النضال.

سلام يا دكتور

افتقدتك في يوم الاحد وقلت اديك فرصة والا ساعلن ان دكتور بلة التحق بالجبهة مقاتلا لوووووول
للاسف الشديد يا دكتور وحاختها على بلاطة :
لو قتلت الحكومة كل طلبة دارفور وفي الشارع وعلى رؤوس الاشهاد لن يحرك ساكنا في الشعب السوداني الشقيق
الاسباب قالها واحد ساي من غمار الناس في معرض تعليق له على الاحداث
(احنا ما عاجبا نا الحكومة لكن كدي شوف الفوضي الفيها المصريين الما عندهم جنوب زينا داير يهاجمهم ولا عندهم حركات عنصرية في غربهم عايزة تنتقم من الشماليين كلهم )
وجهاز الامن يتعامل بمثل هذا التكتيك لما يقبض اي واحد من غير ابناء غرب السودان اول كلام بيقولو ليهو (المطلعك مع العنصريين الحاقدين ديل شنو)
فشلت المعارضة ان تطرح او تستخدم تكتيك مضاد لهذا العمل والذي اراه ناجحا لحد الان (على مستوى المواطن البسيط لا على مستوى النخبة)
تخيل معي ان يخرج الصادق ولا الميرغني متقدمين انصارهم مطالبين باسقاط الحكومة معرضين انفسهم للاعتقال والضرب
لكن البحصل كالعادة يموت اولاد دارفور ويجي الصادق والميرغني يشيلوها باردة
ــــــــــــــــ
كلامك اعلاه يمكن ان يكون في سببا في زرزرة احدهم بانه سرب لك فحوى المكالمات لوووول

يا محمد ابراهيم يا هندسة شنو الحكاية
انتو الليلة مصرين يعني تختّوها لينا تخخخ بكل صراحتها القبيحة كدا في عينا
ما هندا محمد بشير قاليك الأمور تمام بس هو كان بعيد من النت أمس و الليلة إن شاء الله ح يكون قريب من دغشا بدرييي و الثورة أمورها ح تزبط
ادوها صنّة انت وبلة بس و عيشوا اللحظة - تقرأ الوهمة - زيّنا كدا وما تفوّقونا

Quote: تخيل معي ان يخرج الصادق ولا الميرغني متقدمين انصارهم مطالبين باسقاط الحكومة معرضين انفسهم للاعتقال والضرب لكن البحصل كالعادة يموت اولاد دارفور ويجي الصادق والميرغني يشيلوها باردة

غفر الله لك يا باشمهندس
إنت ما ملاحظ أنو سيد الصادق لديه حاسة قوية جداً تجاه أى ( كركبة ) لذلك تجده دائماً وعند حدوث أيتها كركبة يكون خارج السودان .....؟؟؟
وطبعاً ( الأحباب ) ما بيقصروا على طول بيانهم جاهز أنو رئيس الحزب في زيارة خارجية لارتباطات مبرمجة من زماااان
هسع قصة شهداء جامعة الجزيرة دي فاجأته..... ( فاجأته دي تقرأ مع السيناريو أعلاه للدكتور بلة )


وأنا أتابع المؤتمر الصحفي لجبهة الإنقاذ المصرية ( د. البرادعي ، السيد عمرو موسى ، السيد صباحي ، .... ، .... )
رأيت بعين ( أحلام اليقظة ) سادتنا الكبار يعقدون مؤتمراً شبيهاً ويقفون موقفاً مشابهاً
فتعوذت بالله العظيم من الشيطان الرجيم


___________

سلامات د. بلة

هسع أقول ليك شنو ؟؟

Quote: افتقدتك في يوم الاحد وقلت اديك فرصة والا ساعلن ان دكتور بلة التحق بالجبهة مقاتلا لوووووول

محمد إبراهيم
أنا يوم الأحد كنت ماسك الجدادة عشان كدا المظاهرات ولعت
أما يوم الأثنين كنت بعيد من النت عشان كدا الثورة ما استمرت..

أما حديثك الآخر فقد قاله لى مواطن ربرارى
عندما تساءلنا: لماذا يصمت القادة لما يحدث للدارفوريين بعد غزوة خليل؟
قال الربرارى: ريحة البصل واحدة (الحكومة والمعارضة)

ود البشرى
ماتخرب الموت بالفرفرة!!

Quote: سلامات د. بلة هسع أقول ليك شنو ؟؟

عاطف بن عمر

انا بكتب:
ليك كجوها وصقيرا حام
وانت اكتب لى:
مكجوجة وعا########ى

ياخى حقو بكرى يكشف لينا أعمار زملاء المنبر عشان نعرف أننا مع عجايز زيكم..
قال إيه 1979م كنا فى البركس..

Quote: ياخى حقو بكرى يكشف لينا أعمار زملاء المنبر عشان نعرف أننا مع عجايز زيكم.. قال إيه 1979م كنا فى البركس..

حيا الله صديقنا عبدالكريم
بعد أن طبقت جامعة الخرطوم نظام الإمتحان من الخارج للطلاب المفصولين إلتحق بدفعتنا شاب إسمه عبدالكريم
كل معلوماتنا عنه أنه ( كان ) طالباً بكلية الهندسة وتم فصله أكاديمياً.. سافر لدول أوروبا واحدة واحدة يقرأ سنة اللغة والسنة التمهيدية.. ويغير المساق ... المهم رجع لجامعة الخرطوم بعد كم سنة من الحوامة
أول محاضرة يحضرها معانا دخل دكتور عصام عبدالماجد
تفاجأت القاعة بزميلنا عبد الكريم " عصام... ياخ ما معقول "
كج كج كج عبدالكريم نازل الدرج صوب مقدمة القاعة حيث الدكتور عصام ( المندهش )
صمت القبور
وصل إليه وتوقعنا جميعاً طرد عبد الكريم من المحاضرة إن لم يكن حرمانه من المادة
فاجأنا د. عصام
" عبدالكريم ... والله ما معقول "
أخذه بالحضن

ومن بين الأحضان إلتفت إلينا عبدالكريم

" يا شباب ما تندهشوا .. أنا والدكتور كنا دفعة وااااحدة "



_______________

فيا " شباب " الموقع ما تندهشوا أنا والدكتور بلة أبناء دفعة وااااحدة