ما تتضارا أ مرق بره ........./ أسماء الجنيد

ما تتضارا أ مرق بره
اكسر حاجز الصمت الحرا..
وكورك فينا مليون مرة ..
بى الصاراهو دواخلك..
جوه... وبره
على النبره وشيل العبره
انفض غبار السمح الجوه ..
وازرع فرحك فينا وما تتضارا..
تكبر شدره .. تطرح ثمره
تشيل اليابس ..تطفى الجمره
****
شتت لونك فى لوحات الزمن الاغبر ..
لون بيه الفاضل منو..
يمكن يكبر ويمكن يظهر ..
ويمكن يسطع ويمكن يبهر ..
لامن طيفك يظهر وينضر..
يشيل الحزن الساكن دارنا
وليه يكسر ....
وانضم تانى الفرح ألاخضر
لحن نغم الشجن الباكى ..
دندن نغمو الفيك متحكر
وما تتضارا أمرق بره
اكسر حاجز الصمت الحرا

وكورك فينا مليون مره

*********
التحية لنضال الشعب السوداني الحر
ثورة حتى النصر
أسماء الجنيد

سلام يا اخ صلاح ,, لك التحية والتقدير
شكرا لنشر القصيدة , ومزيدا من الدعم المعنوي لأهلنا فى ربوع الوطن الحبيب
وثورة ثورة حتى النصر إن شاء الله
تسلم والله

الأخت الشاعرة المجيدة أسماء

عمل رائع اتمنى أن يصل للجميع وان نساهم في نشره في الفيس بوك لانو الوسيلة الوحيدةالمتاحة لاهلنا في الداخل

وشكرا لك على المرور والتعليق
دمت
صلاح ابوزيد