ياجماعة.. بالله نحن ماب نخجل!!

ذكر لي صديق من الأصدقاء وهو يقارن ما بين حال سودانير الناقل الوطني السوداني والخطوط الأثيوبية ، فقال في معرض حديثه أن الخطوط الأثيوبية تمتلك (كم وأربعين طيارة).. وكنت أعتقد أن صاحبي تغير في آخر عمرو وترك فضيلة الصدق التي عرف بها وبدأ (ينجر) من راسو... ولكني قلت: كدي النوصلا آخرا.. وعند قوقل الخبر اليقين. فكتبت جملة Ethiopian airline fleet وتعالوا شوفو... صاحبي أظن معلوماتو قديمة شوية... ما شاء الله اسطول الخطوط الأثيوبية الحالي يتكون من 52 طيارة (أيوة طيارة.. طيارة عديل كدي)... وكمان عندهم 41 طيارة مطلوبة يعني قريب حيكون الأسطول التجاري الأثيوبي عندو 93 طيارة... قديما قال غردون باشا في تقرير كتبه لحكومة جلالة ملكة بريطانيا في القرن التاسع عشر: The sudan is a worthless possession, ever was so and ever also will be so .. ( وترجمة الكلام ما معناهو : إنو السودان من الممتلكات البريطانية التي لا أمل فيها ومقطوع فيها العشم ، هكذا كان وهكذا سيكون ) يا ربي طيارة الجمعة الفاتت الجايي الرياض وصلت ولا لسع؟؟

وللراغبين في التفاصيل، أدخلوا على الرابط دا:
http://www.ethiopianairlines.com/en/...ate/fleet.aspx

.



الاستاذ / مـــــــــامان

تحية طيبة ,,,

Quote: ما شاء الله اسطول الخطوط الأثيوبية الحالي يتكون من 52 طيارة (أيوة طيارة.. طيارة عديل كدي)... وكمان عندهم 41 طيارة مطلوبة يعني قريب حيكون الأسطول التجاري الأثيوبي عندو 93 طيارة.

وما بين انطلاقة الخطوط الإثيوبية في 1945 م والخطوط السودانية في 1952 م سنوات قليلة
ثم تاريخ يقول كلا الشركتين من اعرق وأقدم النواقل الوطنية في افريقيا ........
لكن في تلك اللحظة يتعرض ناقلنا الوطني لتراجع كبير .........
بينما يمضي ناقل الجيران بخطوات كبيرة للأمام






الصورة لرئيس الوزاء الإثيوبي الراحل في احدي طائرات الخطوط الإثيوبية بعد إصرار المضيفات يتصوروا مع ضيفهم الكبير


** أكيد ما في إحساس بالخجل إثيوبيا نظام علماني كافر يحب الدنيا ..... عشان كدة بيجتهد في خطوطوا الجوية ومطاراتوا
ونظامنا نظام رسالي ( لا لدنيا قد عملنا ) ويجتهد بربط المواطن بقيم السماء بصورة مباشره دون (( طائرات ))

_ غايتوا مافي تعليل تاني _

تحياتي

يا عزيزي مامان

عليك الله نخجل من شنو ونخلي شنو؟
البخجل ده العندو الحس والكرامة والنخوة، وطالما دي ما موجودة يبقى الخجل ده يشوفلو جيهة تانية..
شقيش تعاين هناك عشرات الأسباب للخجل:
الاقتصاد، الثقافة، التعليم، الصحة، النقل والمواصلات، الطرق والجسور، الرياضة، ...
ياتو حاجة تشرف وتطرح وشوشنا قدام العالمين؟
نحنا يا مامان أمة فاشلة، ومشكلتنا ما عايزين نعترف بكده..
فاشلين لدرجة حقو يشوفو ليهم جايزة يدونا ليها .. نحنا قادة الفشل والتخريب بدون منافس..
وكضابين وفاكنها في نفسنا وما قادرين نعاين بشكل موضوعي لي روحنا لأنو أفكارنا مغبشة بإرث ملعون يتمثل في أغاني الحماسة التي تؤسس للنفخة الكذابة ونحنا ونحنا البيعطنونا بيها من ضروع اماتنا، ونصدق ونصدق ونصدق، في انتظار الشافع البجي يقول :(لكنك عاري يا سيدي)..
عشان كده اصلو ما حا نقدر نصلح الحال..
،
،

Quote: ** أكيد ما في إحساس بالخجل إثيوبيا نظام علماني كافر يحب الدنيا ..... عشان كدة بيجتهد في خطوطوا الجوية ومطاراتوا ونظامنا نظام رسالي ( لا لدنيا قد عملنا ) ويجتهد بربط المواطن بقيم السماء بصورة مباشره دون (( طائرات ))

لاااااااااايك كبير..

عبد الناصر ياخي والله ضحكتني رغم مرارة الحال..
يديك ألف عافية و"أوسكار" زي ما بقولو الجماعة..
،
،

السلام عليك يا مامان,,

نحن والله بنخجل ونستحى والخجل كاتلنا وبكتلنا كل يوم وما من موضوع الطيارات فقط بل من كل ما يحدث..
السؤال موجه مباشرة لمن نزع الله عنهم فضيلة الخجل والحياء أصحاب الجلود التخينة عديمى الحياء والضمير
والنخوة وأصحاب الوطنية المزيفة,,

ضيعوا البلد وأوصلوها لأسفل سافلين ولسه ماشين فى السكة يمدوا ويكذبوا ويفسدوا ويسرقوا,,
أهانوا تاريخها ومرقوا بكرامة شعبها الأرض,,

أثيوبيا دولة عظيمة وحضارة محفورة فى التاريخ إبحث عن دول أخرى صغيرة ولا تملك ربع إمكانيات أثيوبيا
ستجدهم على حب بلادهم مجتمعين ولها ولشعبها مطورين,,

تحياتى..

.




أول كابتن طيار في الخطوط الاثيوبية Amsale Gualu التي أحتفل بها زملائها بعد أن قادت رحلتها
الداخلية لقندر ومنها لاكسوم ثم عادت لاديس





----------








وللإثيوبيات تاريخ عريق في الطيران و يقول البعض Weyzero Asegedech هي أول إثيوبيا كابتن طيران عسكري في نهاية الحرب العالمية الثانية
في حين يقول أخرون أن Weyzero Mulumebet Emeru التي قطعت تدريبها على الطيران في 1936 في ايطالية ...هي أول إثيوبية كابتن طيران لكن لم تكمل تخصصها



**









و من جنوب السودان عندهم في الخطوط الإثيوبية شابة جنوبية بتعمل كمساعد طيار
وقبل كده كان في بوست عنها في المنبر ..........


تحياتي

عليك الله يا مامان اخوي
نخجل من شنو ونخلي شنو


في كل عام ترزلون

الأستاذ مامان ..


الشى الأكيد إنو عبدالناصر الخطيب دا حا يجيه ليه أى موضوع يتعلق بأثيوبيا حيث أنه مرجعية وصاحب خبرة و ذخيرة لا يستهان بها..

تحياتى لك ولناصر الخطيب..

Quote: ** أكيد ما في إحساس بالخجل إثيوبيا نظام علماني كافر يحب الدنيا ..... عشان كدة بيجتهد في خطوطوا الجوية ومطاراتوا ونظامنا نظام رسالي ( لا لدنيا قد عملنا ) ويجتهد بربط المواطن بقيم السماء بصورة مباشره دون (( طائرات ))

سلام أخ مامان

وأزيدك من الشعر (بيوت)

السودان ثالث أفشل دولة في العالم حسب تقرير منظمة الشفافية الدولة

والخرطوم المدينة رقم 220 في تصنيف جودة الحياة في المدن العالمية متفوقة فقط على انجمينا وبانغي وعاصمة هاييتي بورتوربرينس التي دمرها الزلزال وبغداد التي دمرها أهلها في ذيل القائمة

سيبك من كلام غردون فنحن أهل هذه البلاد والتي لا تزال ترزح تحت ضغوط التيارات الدينية وأخيراً السلفية والشيعية وكلهم لا يرون أي بأس في هذه التقارير

طبعاً لأن الصومال هي مثلهم الأعلى وهي جنة الله في الأرض والطريق المختصر لجنته السماوية ...

أما من عقلاء يقولون (كفى ...؟)

لك التحية

أحمد الشايقي

الإخوان : عبد الناصر/بدري الياس/ أيمن/حمزاوي

أشكركم على مشاركتكم لي في أحزاني على (سفريات الشمس المشرقة) وكما قال شاعرنا حسن الدابي (لي عبراتي بقت غدد)... يا حليلا بلا عدد.. قالوا شالا قطار الأحد.
يا أيمن إنت ماب تفتكر عبد الناصر ليه حق في تعلقو بي أثيوبيا؟ وبكل ما هو اثيوبي؟

.




الاستاذ / مـــــامان ومتداخليه الاكارم

تحية وتقدير ,,,



في تصوري مطار بولي فيهو جزء كبير من ثقافة الناس ديل
الممكن من الشي البسيط يخلوهوا شي في غاية الجمال

مطارهم و البي مقايس مطارات عالمية بيعتبر عادي ...
بس الإثيوبيين مطارهم العادي ده مهتمين جدا في التنظيم
والنظافة والإضاءة والتجهيزات زي الكبارى المعلقة البتاخد المسافر...
من الطائرة مباشرة لداخل صالة الوصول ....
المطار في عضمو غالب البناء هناجر حديد و ألمونيوم وزجاج في مساحات شاسعة جيدة التنظيم
بيوحي أنو ممكن الناس بتكاليف معقولة تبدع تحف معمارية وتديره بمهنية عالية






***
نحنه لما نحب نعمل مطار ... عوزين نصمموا حسب تصميمات بيوت خبرة عالمية
بموصفات تكلف مليارات الدولارات ....... يا ما نعمل مطار خالص


السودان وإثيوبيا ما تقدر تقول عليها دول فقيرة زي ما بصنفهم كتار من الناس
لانو الاتنين عندهم العيب المزمن في عدم القدرة من الاستفادة المثالية من مواردهم
والاتنين ليهم تاريخ عريق من الازدهار والرخاء الاقتصادي في السابق .......

--------




صديق عزيز إثيوبي ساخط على الحال قال لي ناسنا حرامية أى مشروع لازم يختوا شوية
من قروشوا في جيوبهم قلت ليهوا أحمد الله نحنه ناسنا القروش في جيوبهم شوية منها بعملوا بيها مشاريع

بدرى الياس

Quote: لاااااااااايك كبير.. عبد الناصر ياخي والله ضحكتني رغم مرارة الحال.. يديك ألف عافية و"أوسكار" زي ما بقولو الجماعة..

*لانو بالجد ما عندها تعليل ..... الناس بالزمن والخبرة التراكمية بتمشي لقدم
ما بترجع لوراء ..... وجيرانا ديل ما خارقين ده التطور الطبيعي ... فلما تلقي المقارنة محبطة أكيد في سر

Quote: الشى الأكيد إنو عبدالناصر الخطيب دا حا يجيه ليه أى موضوع يتعلق بأثيوبيا

** لانو يا ايمن في ناس تانيين بنعرف عنهم الكتير وهم بجهلوا عننا الكتير
ده بحبطنا ... انا مع الجيران ديل ما بحس الشي ده لانهم طوالي بيدوني إحساس
أنو ديل الناس البستحقوا أني أعرف عنهم اكتر

Quote: يا أيمن إنت ماب تفتكر عبد الناصر ليه حق في تعلقو بي أثيوبيا؟ وبكل ما هو اثيوبي؟

*** في ناس زي محمد أبوبكر ومحمد عبد الوهاب أمان وأدم محمد أمين تعلقهم بالسودان وكل ماهو سوداني
بيحرج الواحد عديل كل ما يتصور معرفة وفهم بعض السودانيين عنهم وعن بلدهم شنو !!!

أخر التجليات قريته قبل كم يوم في النت أنو الناس ديل فقراء لانهم كفار وليس بعد الكفر ذنب
دي كتابات سوداني عن بلد تكاد تتساوي فيهوا نسبة المسلمين والمسيحيين وعرف الاديان من قديم الزمان
يبقي من حق الناس ديل على البعرفهم مننا يكتب عنهم على الاقل نكون ببعض المعرفه بيهم وبي بلادهم




تحياتي لكم جميعا ........

.







The new spirit of Africa روح جديدة من أفريقيا _ بهذه العبارة والأسد الأصفر ( شعار الإثيوبية الشهير ) القريب شديد من شعار البيجو _ عربات فرنسية _
يحلق طيران الجيران لكل محطات العالم تقريبا في مختلف القارات , بطائرات الركاب والشحن الـ cargo





Ethiopian Airlines fly to international destinations in Africa, Middle East, Europe, Asia and North America from its hub in Addis Ababa.
ومع تلك التغطية الواسعة لمحطات العالم , كل الخطوط العالمية المعروفة لديها رحلات لمطار بولي ومنها خطوط لم نعد نشاهدها منذ زمن طويل تهبط في مطار الخرطوم _ للأسف _


**









-----------------------------------------------------
تحياتي