مزيكا الزْنِق .. ايقاع القاع

تيار جارف .. وفن متكامل اعجبنا او لم يعجبنا .. له مريدوه الذين يدافعون عنه بضراوة .. ســـاكتب عنه ....عن روادة فنانية موسيقيه وراقصــــيه المشــــهورين

مدخل اول




هذا البوست سيمتد حينا من الزمن مثله من بوست قاموس الراندوق ... لغة قاع المدينة

سلام يا وليد

النحكي ليك القصة

اساسا بداها ترباس، بهبت ثورة الانخاس يوم الجيش للشعب انحاز وكده
وبدأت شعارات نأكل مما نزرع .... الخ من شاكله من شعارات الما عندها ورا تعمل ليها ورا

ما تراه من هذه المزيكا ليست من افرازات المشروع الحضاري، دا ياهو المشروع الحضاري
ذات نفسه، الا تراهم بكل وادي يهيمون ومافي زول سائل فيهم؟؟

الانحطاط الانت شايفو دا والعفانة والمساطيل ديل هم ركيزة المؤتمر الوطني في البقاء
التعفن دا هو من يبقي على جذوة شنو كده مولعة

ديل نتاج المايقوما او من يتسببون في مليء المايقوما بمزيد من السكان

الدكاتوريات بتخلق عفانة في المجتمع كفيلة بانها تخدر الشباب من الالتحاق
باي ندوة مفيدة او محاضرة قيمة

مافي حاجة اسمها فن بظهر برااهو كده، الفن صناعة، تمويل، حماية
المؤتمر الوطني هو من خلق هذا الفن هو من يمول هؤلاء الضائعين
بالاجهزة والبنقو والمخدرات ويحميهم من ما يسمى بشرطة النظام العام
والامن العام والشرطة المجتمعية

لكن الحق ادعوا ليك شباب لندوة عن ماضي وحاضر ومستقبل الحركة الوطنية في السودان
عينك ما تشوف الا النور، سبعة اجهزة امنية على الاقل بكون عندها مندوب حاضر في الندوة
ويوم والتاني تبقى في الطيارة قامت وحفلات الغسيل والمكوى والحلاقة مجاني

هسع الصعاليك ديل فرقهم شنو من قوش وللا غازي صلاح الدين وللا نافع
ناو لو اقتبست ليك كلام من نافع وللا البشير (لمن كان بنضم) واديتو لواحد من الضايعين
ديل نوع:

جلد الكديس بنعمل منو جزمة ايوا
والكورس من وراهو

كديس ... كديس ... كديس (ياخي دي فيها تلاتة نطات كده مجنونة شديد)

يلحس كوعو

والكورس

بوعو بوعو بوعو


يلحس يلحس يلحس

وسلام تانى لى وليد
وهاك يا احمد ابنعوف دليل ردك التحفه

وهاكم اسمعو فن الزنق
واظن انو ما فى وصله وال تمر عبرها هذه الكلمة (............)
بعدين لاحظو للفئة العمرية من خلال حساب الشخص الرافع الفديو

سلامات يا شفت

قبل فترة لقيت صفحة في النت اسمها زنقات وكتمات كلهم سودانيين لكن صراحة ما فهمت الحاصل شنو ... كلامهم عجيب عجيب كده

المهم متابع للبوست يمكن نفهم الحاصل شنو ,,,,

كتمت

كتمت

مرحب ابو ساندرا

يا ود ابنعوف زي كلامك دا بكون قالوه الناس المعتادين على الفنان ابوجلابية و البغني بالرق على الافندية ناس ابراهيم عوض و حسن عطية
القدامك دي ذائقة جيل غير اجيالنا
سمعه و شوفه و غهمو مختلف عننا
ما اي شي ما بنستسيغه معناه نرفضه ونشوفه انحطاط وبسبب الإنقاذ كمان

يا ود البشرى
تجي وترجع ولا احم ولا دستور

بتبالغ ياخ

يا كونت خليك قريب

كان الله هون حا نحاول نفكك الشي ده

شكرا عمار

يا عمار

د. عمر وفردو معلمين

هاهاهاهاهاهاهاهاهاهاهاهاه

مرحب احمد ابن عوف

انا لا استذيق الزنق .. لكني لا امك ان اقول عنه انه ليس بفن ...
ممكن زول ياخد فن الزنق ده من زاوية تانية ويلقاه نضال راسو عديل

وانا اوريك كيف
الايقاع والمزيكا بسلالمها وتناولها - ممكن يجوا يفتونا في الكلام ده ناس المزيكة - ريحتها افريقية بحته .. كل الايقاعات والتونات وحتى الرقص المصاحب رقص افريقي
ممكن يجي زول يقول ليك ده احياء للهوية الذنجية بصورة تانية وتحايل على التعريب والتغريب الحاصل في البلد ... ممكن !!!!
فما تحكم على فن بماعونك فقط وعينك بس
الزنق ده انا في ظني هو حاجة قريبة جدا من الهيب هوب .. ما بتشبهو لكنها قريبة منو .. وشايل من الراب برضو في غناه

نفس كلامك البتقول فيه ده اتقال تبكال عن شباب مصر وشباب تونس
ثم اتى زمن فعرفنا انهم ارجل الشباب في المحيط الحولنا - حتى الان -

من زاوية تانية ايقاع وفن التمتم نشاء في ظروف مشابهة واتقال فيه اكتر من الانت قلته في الزنق ده
الان التمتم ايقاع راقي جدا تقدم عبره رسائل عظيمة

الفن ماعون يا احمد بن عوف
غير مسئول بتاتا عن ماذا سيوضع فيه او ماذا سيغرف .. دي مسئولية من يغرف به

نجي للنقطة المهمة

Quote: لانحطاط الانت شايفو دا والعفانة والمساطيل ديل هم ركيزة المؤتمر الوطني في البقاء التعفن دا هو من يبقي على جذوة شنو كده مولعة

ده كلام حار خلاس
حتى لو كان صحيح .. فهل تفتكر الشباب ديل مسئولين ام ضحايا ؟؟
وهم ما ضحايا الانقاذ لوحدها
هم ضحايانا انا وانت مع الانقاذ
ديل شباب طاشرات واول العشرينات
يعني التكليف بمجابهة الانقاذ اتاهم مؤخرا
ده تكليفنا نحن يا احمد والناس القدامنا وما قدرنا نقوم بيه وغلبنا
فما نرمي تقصيرنا على غيرنا


في الاخر خالص التحايا
بالمناسبة انا ما عاجبني الزنق .. لكن عاوز احلل اول حتين احكم عليه
واحتمال وارد انو في الاخر رائي يكون نفس رائيك

تعرف يا ولي
في الاجازة جيت من برة لقيت ليك ولدي (سبعة سنين)
شغال زنق في نص الحوش
قلت ليه دة شنو الرقيص العجيب دة
قال لي امبارح كانوا في حفلة جيران ناس عمه كلها نطيط زي دة

أول ما وصلنا المغرب شاف ليه بت مغربية مدغلبة كدة
قام قال ليها: عفش


قلت ليه تاني عشان بوديك السودان انا

Quote: الايقاع والمزيكا بسلالمها وتناولها - ممكن يجوا يفتونا في الكلام ده ناس المزيكة - ريحتها افريقية بحته .. كل الايقاعات والتونات وحتى الرقص المصاحب رقص افريقي

ا

صديقي وليد..حبابك
كتر خيرك على هذا الخيط..و يبدو لي مرات العناوين ممكن تكون مضللة.. و ممكن ترفع السوق..

بالنسبة للمزيكا و الرقص مش فيهو ريحة و بس.. الحاجات دي حقت اهلنا الدينكا..و اوضح في شغل دينكا بور..و عملنا المقاربة في الخيط بتاعنا:

أجي يا كدا: تأمل في ظاهرة..!!

و لو لقيت فرقة دخلت ح تلقى بيان بالعمل زي ما بيقولوا العساكر..

غايتو صديقنا احمد ابن عوف استعجل شوية..

جنغلا ساكت يا عمك (مرتضى عبد القادر جاب الــtermonology)

و دمت..
كبر

سلامات يا وليد
الجماعة في السودان لقوا زول جايي بلدنا دي قالوا لينا نرسل ليكم شنو، انا و المدام اتفقنا على نفس الطلب سيديهات
ايمن الربع و رشا الزنجية و نجاة غرزة. و هسه في المشاوير الطويلة بكونوا جزء اساسي في برنامج ما يطلبه الراكبون
في العربية هههههه.
ياخ ديل اولاد تمام و الراستا الربع مجضم الاورغ لمن غلط.

سلامات يا شفت
لو في طريقة تفرتقوا المصطلحات زي زنقة و كجك و قونة يكون كويس
بالمناسبة انت سبقت ود ابنعوف في الحكم على الظاهرة بقولك ايقاع القاع،
يبدو أننا لا نستطيع أن نخفي ضيقنا بالجديد لأنه عادة لا يروق لنا
تحياتي

تحية ياوليد
وتحية لهذا الجيل
جيل يعبر عن اشواقه واحلامه البسيطة
لن تجده في الصالات المغلقة المكندشة
شغله مبذول تحت اي شجرة مثل اي بضاعة مفروشة في السوق

جيل روحه متعبة
يحاول يجمًل واقع مزري لايعرفه غيرهم
خلَوه يحلق بروحه في السماء المحجوبة بالاكاذيب

سلام يا عمار ادريس

Quote: وهاك يا احمد ابنعوف دليل ردك التحفه

وتييييييييييت وتيييييييييييييت وتييييييييييييييت

هههههههه

سلام يا ود البشرى
تحياتي

Quote: يا ود ابنعوف زي كلامك دا بكون قالوه الناس المعتادين على الفنان ابوجلابية و البغني بالرق على الافندية ناس ابراهيم عوض و حسن عطية

غايتو يا ود البشرى غلبتني

قدر ما حاولت اضع او اشبه ناس ابراهيم عوض وحسن عطية بالمساطيل دي ما قدرت
شغلت حساب المثلثات ما نفع، بالهندسة التحليلية ما نفع، مشبت على الفيزياء
ونظرية الضوء وقوانين نيوتن بتاعت الحركة برضو ابت تجي

معقولة يا ود البشرى، معقولة ما قادر تميز بين فن بنتقل ويتتطور كما طبيعة الاشياء
من غير "ربكة" او "ثورة" كما في حالة الانتقال من الطنبرة للشيالين ومن النحاس
للدلوكة للرق للآلات الحديثة مع بقاء الكلمة وتطور بسيط احيانا وكبير في اللحن

معقولة تشبة تطور الكلمة، والاغنية والموسيقى السودانية الذي تم عبر الاجيال المحترمة الانت ذكرتها
وكل جيل يسلم الجيل البعدو الامانة كما هي، بما نراه اليوم من انحطاط؟؟؟

معقولة تشبه ما اتى به ابراهعيم عوض في زمانه بما اتانا به ايمن الربع اليوم؟؟

Quote: القدامك دي ذائقة جيل غير اجيالنا سمعه و شوفه و غهمو مختلف عننا ما اي شي ما بنستسيغه معناه نرفضه ونشوفه انحطاط وبسبب الإنقاذ كمان

لك كامل الحق ان تدافع عنهم، ولي كل الحق ان اردمهم كما اشاء

سلام يا وليد

انا غايتو العندي قلتو، وانت قلت لسه بتتحرى عن الأمر، ومن حقك علي ان احترم النتائج البتصل ليها

لكن النبي فوقكم، اكان تلقوا ليهم مبررات مفلسفة، لانو اليوم لو سألت المعليمن الكبار فيهم
ما بعرفوا يقولوا سطر واحد من الكلام الانت قولتو دا.

بكره ايمن الربع يفتح سودانيز ويحفظ كلامك وكلام ود البشرى ويقشر بيهو في اذاعة مونتكارلو لوووووول
ويزيد ليها شمار وتوم من عنده، من شاكلة

احنا اساسا بنعبر عن ثورة، عن السودان الجديد، الذي طالما هيمنت فيه اذاعة امدرمان وفرضها لونا موسيقيا
واحدا على الشعب المشهور بنتوع ثقافاته واثنياته، نحن انتفضنا على الكلمات المقعرة والتوصيفات المعقدة
والالحان الرتيبة، نحن لدينا جمهور، لم يستمع يوما الى حسن عطية او عثمان حسين، ليس لاننا لم نكن نمتلك
حق تذاكر حضور حفلاتهم وان كانت حقيقة، فانحصر فنهم بين تلك الطبقة المثقفة والمتعملة والتي تمتلك المال
ليحيوا لهم حفلاتهم الوطنية بل وحتى الخاصة، نحن نغني وننشر موسيقانا لتلك الفئة التي تريد ان تفرح وترقص
هكذا على قارعة الطريق، تحت ضل نيمة، خلف الرواكيب والعشش، اولئك البسطاء الذين من حقهم ان يستمعوا للموسيقى
ويطربوا ويزيلوا ما بهم من رهق الحياة ومصاعبها، معظم جمهورنا هو من تلك الفئة المحرومة المسحوقة التي
قد لا تمتلك ثمن غذائها ليومين ثلاثة ولكنهم يبادلوننا التحية بتحية ويبادلوننا البسمة بفرحة ... الخ


هسع كلامي الخارم بارم دا، ممكن فعلا يعبر او يكون اجابة عن انحطاط الفن، لحنا وكلاما وتعبيرا؟؟؟

يا ود ابنعوف ياخي ما ممكن تلغي و تتفه خيارات ومزاج الاخر بالطريقة دي
من باب الديمقراطية ساي وحرية الاختيار ان شا الله
نعم ممكن ترفض الضرب دا من الفن لانه لا يتسق مع ذاءقتك مثلا او ما دخل مزاجك وتنتقده و تبين مواضع الخلل الفيه لكن احكام مطلقة بالانحطاط و السطلي كدا دي مصادرة لحقهم
انا ما واقع لي النوع دا لانو ما بناسب سني ولا بفهمو
لكن لو حتوت ولدي عاجبو ما بتدخل في مزاجه عشان كدا ما بسميه انحطاط لاني بديهي كنت ما ح اقبل لحتوت الانحطاط
بالمناسبة المقارنة مع جيل ابراهيم عوض مش في اللونية او الاداء لكن فكرة التغيير و النقلة و اختلاف الذاءقة بين جيلين

احمد انا زمني دا كلو شايفك تقدمي وديمقراطي السلفية شنو القامت عليك فجاة كدا :)

يا ود ابنعوف ياخي ما ممكن تلغي و تتفه خيارات ومزاج الاخر بالطريقة دي
من باب الديمقراطية ساي وحرية الاختيار ان شا الله
نعم ممكن ترفض الضرب دا من الفن لانه لا يتسق مع ذاءقتك مثلا او ما دخل مزاجك وتنتقده و تبين مواضع الخلل الفيه لكن احكام مطلقة بالانحطاط و السطلي كدا دي مصادرة لحقهم
انا ما واقع لي النوع دا لانو ما بناسب سني ولا بفهمو
لكن لو حتوت ولدي عاجبو ما بتدخل في مزاجه عشان كدا ما بسميه انحطاط لاني بديهي كنت ما ح اقبل لحتوت الانحطاط
بالمناسبة المقارنة مع جيل ابراهيم عوض مش في اللونية او الاداء لكن فكرة التغيير و النقلة و اختلاف الذاءقة بين جيلين

احمد انا زمني دا كلو شايفك تقدمي وديمقراطي السلفية شنو القامت عليك فجاة كدا :)

اي بضاعة جيدة بتفرض نفسها وبتحمل مقومات بقائها
والردئية كفقاعة الصابون لاتحتمل النسمة
المهم في كل هذه الدوشة ان نعطي فرصة لاي إجتهادات فردية او جماعية
نرعى ونشجع ما يستحق الرعاية
المصادرة والافكار السلبية لن تخدم في اي شيئ

كلام كويس يا ود البشرى

اها، انا برفع رجلي من الابنص بتاع البوست دا، لحد ما نحسم الحتة دي في كلامك

Quote: نعم ممكن ترفض الضرب دا من الفن

يجونا الاساتذة ويعرفوا لينا "علميا" كده الوهمة الحاصلة دي ممكن نسميها فن؟؟

اذا طلع ليس بفن، اكون انا زاتو الغطلان الجيت هنا

Quote: احنا اساسا بنعبر عن ثورة، عن السودان الجديد، الذي طالما هيمنت فيه اذاعة امدرمان وفرضها لونا موسيقيا واحدا على الشعب المشهور بنتوع ثقافاته واثنياته، نحن انتفضنا على الكلمات المقعرة والتوصيفات المعقدة والالحان الرتيبة، نحن لدينا جمهور، لم يستمع يوما الى حسن عطية او عثمان حسين، ليس لاننا لم نكن نمتلك حق تذاكر حضور حفلاتهم وان كانت حقيقة، فانحصر فنهم بين تلك الطبقة المثقفة والمتعملة والتي تمتلك المال ليحيوا لهم حفلاتهم الوطنية بل وحتى الخاصة، نحن نغني وننشر موسيقانا لتلك الفئة التي تريد ان تفرح وترقص هكذا على قارعة الطريق، تحت ضل نيمة، خلف الرواكيب والعشش، اولئك البسطاء الذين من حقهم ان يستمعوا للموسيقى ويطربوا ويزيلوا ما بهم من رهق الحياة ومصاعبها، معظم جمهورنا هو من تلك الفئة المحرومة المسحوقة التي قد لا تمتلك ثمن غذائها ليومين ثلاثة ولكنهم يبادلوننا التحية بتحية ويبادلوننا البسمة بفرحة ... الخ

النصيحة لله يا احمد أبنعوف كلامك الخارم بارم أخير من كلامك العديل

تسلم شوقي

حيدر يا حبيبنا

فعلا تحية ليهم

بعملوا فيما يريدون

والعجبو عجبو والما عجبو يشوف البعجبو
هذا لسان حالهم

سعد الدين ازيك ياخ

شايل كراسي وحايم قاعد اجمع في المعلومات زيل شغل قاموس الراندوك

البنلمو كله بنرفعه هنا

تحياتي يا حبوب

سيف النصر محي الدين

اذكر اني كتبت عن حنتي في البورد ده اكتر من مرة

كانت سنة 2002
الحنة دي عملها لي صحبي من اولاد النوبة اسمو على كُنده
جاب غنايين وغنايتين ومعاهم ولد عازف اورقن جديد عمل شغل غريب وجديد

انا كنت العريس وجيت لابس في الحنة الرسمية ردا اي والله ردا
الغنايتين هم رشا بت المورده ونجاة غرزة كانو جداد لنج
وبتاع الاورقن ياهو ايمن الربع

الوكت داك الزنق ما ظهر .. كان زمن الجبجبه
والقسم ده كان جدييييييييييييييييييييييييييييييييييييييييييييييييييد

الشباب بتذكر قسمو في الكراسي فوق
وكيف !

الكرسي يحملوه ما يقارب 8 شباب فوق الروؤس وعلى مد اليدين ليكون في علا مترين تقريبا
ويكون فيه شاب واقف على حيلو ويرقص قسم على المستوى ده

كانت حفلة مجنونة
رشا بت الموردة قالت قطع شك العريس ( اللهو انا ) مسطول

صديقي العزيز جدا كبر

اخبارك ياخ

قد تكون العناوين مضللة .. لكن ياصديق الزنق مباري الهيب هو بالملي .. هو فعلا ايقاع القاع .. ايقاع قاع مدينة امدرمان حيث نشا... امدرمان مثلها مثل مدن السودان وان كانت حسب ما اعتقد اخفهم .. مقسمة طبقات اجتماعية واقتصادية .. ولان الطبقات رصت فيها اثنيات فاصبحت امدرمان والسودان مقسمة اثنيا ..
وبدون مواربة .. يقع العرق الذنجي وثقافته في قاع هذه المدينة .. دي حقيقة قبيحة ... لكنها حقيقة

الشي المزهل انو ثقافة القاع عبر الموسيقي تكتسح الان جميع الطبقات ... كلها

فتحي للموضوع ده ليه ...
لاني مقتنع انو الثقافة هي التي يمكن ان تشك السودان وتوزعو وفقا لمعطيات جديده

لا سلاح ولا حتى حوار

وعشان كده فتحت البوست ده

كبر يا صديقي

والله بالغت عديل ياخ

Quote: و سؤال غريب: لماذ لم يكن الغناء مدخل لفهم السوداني/ة؟ كيف نقرأ.. نفسر.. الثقافة الجانبية في السودان؟ هل المدخل لفهم السودان ، ثقافات السودان ، مجتمعات السودان: هو ما تجود به استمناءات النخبة السودانية التي تحلق في ابراجها العالية ، تلك التي ما انزل الله بها من سلطان ، ام هو فعل خلق الحياة في الحواري.. الشوارع.. ذلك الوعي الذي يتجاوز كل تنقعطات النخبة اياها؟.. هل يستطيع السوداني العادي ، رجلا كان او امراة ان يخلق خطابه الثقافي الخاص، الذي يصلح ، في المستقبل ، مدخل لقراءاة الآشياء و الأوضاع في مجتمع السودان؟.. حينما يتحدث اشخاص مثل : على محمود حسنين.. الصادق المهدي.. حسن الترابي.. مالك عقار.. جبريل ابراهيم.. منى اركوى مناوي.. ياسر عرمان.. على عثمان محمد طه..هل يتحدثون عن واقع اجتماعي؟ ام يتحدثون عن مجتمع مفترض؟.. ثم من هم؟ اقصد الشباب السوداني.. الذي تطربه نفس النغمة ( اجي يا كدا) ، يغني عليها.. يرقص عليها.. و تشكل عنده خطاب اهم من خطاب اهل السلطة و المعارضة..و النخبة ، معا؟,., كيف ننظر اليهم؟ هل هم مجرد حفنة شماشة ما عندها موضوع؟.. هل هم شباب يدري ما يقول و ما يفعل..و بالتالي نسمح لهم بممارسة حقهم في التعبير و بناء الرؤية؟.. ام نسقط عليهم خيباتنا الذاتية من شاكلة الصياعة.. الخيابة.. و احكام القيمة المسبقة التي نحسن صنعتها و اطلاقها على عوهنها؟.. ثم.. عزيزتي القارئة.. عزيزي القارئ.. أي واقع تتفرج عليه؟.. هل هو الواقع الحقيقي بكل خيباته ، تفاصيله ، احلامه الصغيرة..؟..ام هو واقع تخلقه من تصوراتك الخاصة.. و تريد ان تفرضه كثقافة وقيم و موجهات عامة لمجتمع؟ كيف تنظر الى واقعة سيوسولوجيا و انثروبولجيا.. مثل المادة المنشورة علىوسيط فيديو في اليوتوب؟..هل تعتبرها رسالة و تتفاعل معها؟..هل تعتبرها مجرد تسلية عابرة لا معني لها؟..هل تساءلها مقابل قناعاتك الفردية؟..هل تتوقف عندها و لو برهة؟؟؟.. نحن نكتفى بالتأمل و التواصل.. و نهديك ما لا تفكر فيه.. ما لا تنتبه اليه (ربما من كثرة مشاغلك.. او ربما من كثرة تعاليك..!!!).. كبر

المصدر : البوست الجابو كبر

طارق يا حبوب
انا محمد وليد مالي موبايلاتنا كلها زنق

يقعد يشغلها وهو واخواتو يقعدو يتكعوجو

اول ايام كنت بتضايق
هسع بقيت بضحك والله


_____________
الود رجعو السودان صدقني
اخير ليه

الاخ شوقي عمر
تحياتي

Quote: النصيحة لله يا احمد أبنعوف كلامك الخارم بارم أخير من كلامك العديل

تسلم يا حبيب، دا امتحان كبير دا الاسمر زمن الكيزان

يا عمك ديل عندهم نجوم كمان
نجم الكتم
ونجم الزنق

الله سااااالك يا وليد اكان قريبي طارق ود جبرين
خليتو ينحرف كده وللا كده بعد عمره الطويل دا
يبقى لينا بتاع كتمات وزنقات

شوفوا هسع بقى يلقط في شنو ههههههه

الأصدقاء هنا.. حبابكم..
الصديق احمد ابن عوف..تحديدا في حكاية الإنحطاط..و فعلا زي ما قال الصديق ود البشري.. التعود على نمط معين من الموسيقى و الرقص بيقوم يخلق مزاج اشبه بالقانون..و بالتالي بتم محاكمة الأشياء عليه..
النقطة التانية يا احمد قلت ايمن الربع ممكن يشيل الكلام من هنا و يقشر بيهو..و مهما يكن يا صديقي.. ممكن تتعبر شباب فارغ و خاوي نسبة لظروف واقعية كتيرة محيطة بيهم..لكن؟..
لو عاينت لرقصات الدينكا.. تحديد رقص دينكا بور.. ياهو نفس القاعدين يسوا فيهو الشباب ديل..و الريتم نفس الريتم.. يبقى السؤال: كيف قدرو ينقلوا الحاجة دي من الريف لغاية ما تبقى مدينة (يعني جزء من حاجات ناس المدينة)؟..و في نفس الوكت هل نقل مثل هذا جدير بالتأمل ام الإدانة؟..

ارفقت رابط فوق جبت فيدوهات الشباب ديل..و جبت فيديوهات لرقص دينكا بور مصحوبا بنقارتهم.. اضافة لشريط من دارفور (برضك عندهم رقص يعتمد على القفز و لكنه متوحش للغاية الناس ما بتقدر عليهو)..و هنا الشريط و ممكن تتم المقارنة:



الخطاب المصاحب لغنا الشباب في المدينة يمكن هو خطاب ونسة الناس العادية..و يمكن يكون ضعيف جماليا..لكنه بيعبر عنهم و عن حاجاتهم..بالنسبة لي الظاهرة شكلها.. subculture..و الصديقة تيسير قالت اصبحت ظاهرة ثقافة رئيسية..و في كل الأحوال بتدينا فرصة نعاين لناس بيتم اقصائها من مجرى الثقافة الرسمية سواءا على مستوى التمثيل أو على مستوى التأمل و التنظير..!
بس حكاية البنقو السايب ده.. ياها مشكلة.. لأنو البنقو حاجة ضد القانون.. مافي طريقة تبريرها.. ممكن معاينتها كظاهرة اجتماعية جديرة بالمعالجة..!

كبر

Quote: يجونا الاساتذة ويعرفوا لينا "علميا" كده الوهمة الحاصلة دي ممكن نسميها فن؟؟ اذا طلع ليس بفن، اكون انا زاتو الغطلان الجيت هنا

يا ابوحميد القصة مش هي هل دا فن ام وهمة ساكت لكن حق الشباب ديل في ممارسة الوهمة دي و تسميتها كان فن ولاّ غيرو
بعدين يا قريبك الموسيقى و الطرب ديل احساس داخلي وكدا
الواحد بنطط و يتكعوج وينطرب لي رقبتو تاني عايز شنو!
يمكن الموسيقى و الغناء كعلم ومهنة احترافية عندها معاييرها الوضعت بناء على قواعد معينة
لكنها متعددة ومتباينة
يعني قواعد ومعايير الأوبرالي ما بتطبقها على الراب
وقواعد ومعايير رقص الباليه ما تمشي مع الهيب هوب
عموما دا ما الإيشو, المسالة هنا أن الكعوجة دي اي نعم شايفنها كعوجة لكّنها تبقى خيار من احبّها
لغاية ما يكبر ويعقل براه :)

يا ابن عوف كدي قزقز بي دي لحدي ما اجيك بالخبر اليقين

Quote: هيب هوب من ويكيبيديا، الموسوعة الحرة الهيب هوب (بالإنجليزية: Hip hop) هو أحد أنواع الموسيقى والثقافة في الولايات المتحدة الأمريكية. فالهيب هوب تعتبر حركة ثقافية للسود في أمريكا أو الأمريكيين الأفارقة وهم الأمريكيون من أصول أفريقية وقد بدات منذ عام 1970 ونشأت كرد فعل لما تعرضوا له من العنصرية ولاظهار ثقافة وفن مستقل فيهم وكنوع من التعبير عن انفسهم وعن المشاكل من الفقر والبطالة والعنصرية والظلم. يقول باترسون وهواستاذ نشط في موسيقى الهيب هوب "ثقافة الهيب هوب هي رد على الظلم والعنصرية الذي تعرض له السود من البيض وهو أيضا نظام للاتصال بين السود في جميع أنحاء الولايات المتحدة" كان أحد الفوائد التي يتمناها من طور ثقافة الهيب هوب هوب هو إشغال الشباب السود في أمريكا للانضمام لفرق الهيب هوب والمنافسة في الرقص والغناء بدل الانضمام للعصابات والعنف والمخدرات والمشكلة فيما بعد صارت حفلات الهيب هوب مكان الاستعراض الأسلحة والمخدرات وأصبحت العصابات متواجدة ومسيطرة على هذه الحفلات. والهيب هوب لها سمعة سيئة في أوساط الأمريكيين البيض حيث العديد منهم يعتقدون أنه يتكون من الفاحشة والعنف ومناهضة البيض والنساء والحقيقة الملاحظ من ناحية مشاركة النساء السود أنه قليل وأغلب الرابرية رجال ويدخلون العنصر النسائي فقط لتعبير عن الجنس. اللغة المستخدمة في الهيب هوب هي الإنجليزية للأمريكيين من أصول أفريقية (وهناك كلمات ليست إنجليزي تستخدم فمثلا كلمة ديسdis أصبحت من الكلمات المستخدمة بكثرة مع ان ليس لها أصل في اللغة وأصبحت تستخدم حتى مع غير مشجعي هذه الثقافة) وكثير من الكلمات التي دخلت مع ثقافة الهيب هوب. وقد انتشر في السنوات الأخيرة ثقافة الهيب هوب في جميع أنحاء العالم بين فئة الشباب وخصوصا من له اصول أفريقية فانتشر في أوروبا وإفريقيا واسيا وكان أحد أهم الأسباب نفوذ الثقافة الاميركية في جميع أنحاء العالم من خلال السينما أو وسائل الاعلام المختلفة كما أن الهيب هوب يعطي الشباب حرية في التعبير ليست موجودة في أي فن آخر وكذالك السهولة بحيث يستطيع أي رابر كتابة كلمات ووضع موسيقى عليها من خلال برامج كمبيوتر جاهزة وبذلك يصبح رابر. وبالنسبة للراب فهو أحد عناصر ثقافة الهيب هوب الأربعة عناصر ثقافة الهيب هوب الاربعة Afrika Bambaataa مع الدي جي DJ يوتاكا Zulu Nation اليابان, 2004. 1.دي جي DJing دي جي هو فن تشغيل الأقراص الموسيقية والتلاعب بها aerosol paint ادوات الكتابة والرسم على الجدران 2.الكتابة على الجدران (Graffiti): انتشر الكتابة على الجدران في جميع أنحاء أمريكا من أواخر عام 1960 وكتابة الشعارات على الجدران تستخدم كنوع من التعبير من قبل النشطاء السياسيين، وأيضا من قبل عصابات. العلاقة بين الكتابة على الجدران وثقافة الهيب هوب نشأت عندما كان أوائل فنانين الشعارات والكتابة على الجدران أيضا عناصر في فرق الهيب هوب، والتي كانت في مناطق فيها عناصر أخرى من الهيب هوب وفأصبحت كل مجموعه تطور أشكال الفنية. الكتابة على الجدران يمكن تعريفها بأنها تعبير البصري لموسيقى الراب. رقصة البريك دانس في أحد شوارع سان فرانسسكو 3.رقص البريك دانس Breakdance ورقص البريك دانس يكون على موسيقى الهيب هوب وتطور باعتباره جزءا من ثقافة الهيب هوب. وأيضا يمكن تعريفه أنه التعبير الجسدي لموسيقى الراب. وأصبح الآن الرقص في الشوارع بريك دانس له منافسات ومسابقات في أمريكا وخارجها. الرابر Busta Rhymes في حفلة راب في لاست فيقس 4.موسيقى الراب Rap موسيقى الراب هو العنصر الأساسي في ثقافة الهيب هوب. والراب تقريبا يحتل المنطقة الرمادية بين الكلام والنثر والشعر والغناء. ويمكن أن يكون بإيقاع أو بدون. وبختصار نستطيع تعريف الراب بانه موسيقى غنائية سريعة يقوم مؤديها بترديد (وليس غناء) إيقاعي سريع لكلمات الأغنية المكونة من عدد كبير من القوافي تعالج عدد من مواضيع والتي قد تكون شخصية اواجتماعية اوعاطفية اوسياسية وغالبا ما تكون مثيرة للجدل ومتحررة إلى حد كبير فهناك جراة في استخدام أي لفظ بدون أي تحفظ وهذا أكبر مشكلة لأغاني الراب التي تتعاض مع ثقافات وعادات الشعوب العربية. ان مؤدي الراب لا يغني كلمات الأغنية بل يرددها وجمال صوته يعد عاملا ثانويا (ولا ننكر انه يوجد رابرية اصوتهم جميله ولكن عموما غير مهم في أغاني الراب الصوت) فممكن أي شخص يغني راب ولهذا السبب لا يسمى مغني بل مؤدي راب أو رابر Rapper.

المصدر : http://ar.wikipedia.org/wiki/%D9%87%D9%8A%D8%...8_%D9%87%D9%88%D8%A8

كبر يا صديقي
تتصور يا دوب فهمتك قاصد شنو بـ

Quote: كتر خيرك على هذا الخيط..و يبدو لي مرات العناوين ممكن تكون مضللة.. و ممكن ترفع السوق..

ياخ طتلت بوستيك بالعنوان .. ولو كان شفتو ما كان فتحت ده

تابعو ده يا شباب أجي يا كدا: تأمل في ظاهرة..!! واعتبرو حقي ده ملحق ليه

Quote: الله سااااالك يا وليد اكان قريبي طارق ود جبرين خليتو ينحرف كده وللا كده بعد عمره الطويل دا يبقى لينا بتاع كتمات وزنقات شوفوا هسع بقى يلقط في شنو ههههههه

Quote: قام قال ليها: عفش

ما فهمت شئ ؟ عفش كيف ..

علي العموم انا مع حرية هؤلاء الشباب وعدم وصفهم بالانحطاط لان هذه الايقاعات بالنسبه لهم فن وهم محبين لهذه النوعيه من الفن .. ..انا نفسي وجدت نفسي احب بعض الايقاعات ورقصت معهم
...للبهجه حزب في السودان ..انا مع الابتهاج والفرح ولكن ابعدوا المخضدرات عنهم ..

قال ليها عفش و سيدو طفش!
ابوهو منو؟ :)

Quote: قال ليها عفش و سيدو طفش! ابوهو منو؟ :)

اها شيلو حالنا كمان

ما كتبه احد الشباب المهوسين بالذنق

Quote: أول من بدأ في اغاني الزنق هم 1- العازف ايمن الربع 2- المغنية نجاة غرزة .. ثم استمروا .. وظهرت فنانة بعدهم اسمها هبة جبرة ... ثم ظهرت فنانة اخرى وعازف جديد الفنانة هي مودة والعازف هو نيجيري إن الزنق عبارة عن اغاني تتردد بسرعة وبنغمات معينة وصوت معين يحبها الناس الذين يريدون الرقص والانفعال مع الاغاني .. اما الان احسن العازفين هم 1- نيجيري 2- بسطاوي 3- ايمن الربع واحسن المغنيين 1- مودة 2- رمانة 3- سنهوري .. للذنق راقصين محترفين واشهرهم راقص اسمه الجقول . اغاني الذنق تعزف بي اورغن معينيسمى 2000 لانه يعزف الحان مرتفعة وقوية . ومن اشهر اغاني الزنق : تعال يا حبيب ليا ورسل لي تحايا بهواك ما دمت حيه سافر والدنيا مسخت ليا هي اغاني عادية لكن النغمات هلى التي تتغير .. وفي حفلات الزنق تسجل الاغاني من استديوهات كثيرة منها 1- درسو 2- الخفافيش كل يوم يتزايد عدد الفنانين والعازفين في موسيقى الزنق ومن العازفين - نيجيري ، حبشي ، صلا وبسطاوي ومن الفنانين - مودة ، رمانة ، زكريات ، براءة ، هاجر ، سنهوري ، عبد الخالق وسيزيد عددهم اكثر لانهم متعة التوقيع Faris Boss

يا وليد اتا عندك امكانيات تكون public scholar ربنا يحفظك ياخي.


طريقة الحوامة وانت شايل كراسك بتجمع في الظواهر ومفرداتها وعكسها هنا او في اي تانية وبقالب علمي بسيط لا يخلو من اكاديمية هو الخلاني اقول انك مشروع public scholar, ربي يخليك.

الله يخيلك انت ده يالسنوسي

وشكرا كتير ياخ

واحد من مشاكلنا الرئيسية انو تراثنا شفاهي .. لو كنا بنكتب حاجاتنا كان هسع اتقدما لي قدام

تحياتي