نأكل شنو ؟؟؟؟؟؟؟؟؟؟؟؟؟؟؟

الحمد لله علي نعم الله في الأرض ، رغم الظروف الإقتصادية الصعبه الزول بحاول ياكل اكل صحي بس في الفترة الأخيرة الزول بقي ما عارف يأكل شنو؟ العيش أساس وركيزة الحياة مليان بوتاسيم بورميد وبسبب السرطان ودا طبعا البناكلو اليوم كلو الزيت البتباع قالو ذيت مستخدم قبلي كدا وبنقي بالملح ويرجع يعاد يعني التحمير والمشوي كلهم ضاربين وبعملو سرطانات هسع يعني لا عيش ولا زيت طيب لو قلنا ناكل مسلوق ، نسلق شنو؟ شوربات ؟ شوربة فراخ ما عارف الفراخ (غير السعر الغالي ) قالو بحقنوهو بي شنو؟ ما عارفه واللحوم ذاتها بقت ما معروفه (برضو رغم الغلاء) شي لحوم حمير شئ لحوم كلاب الزول بقي لو لقي عضم كبير يقول الليله دا عضم حمار ولو لقي عضم صغير يقول الليله دا عضم ###### ، عشان كدا خلاص الشوربه خليناها طيب نشوف المعلبات وخصوصا الجايه من بره واحدات صلاحياتها منتهيه والتخزين ما سليم غير الماده الحافظه الإنتهت صلاحيتها وانها غاليه وما طيبة المذاق ، طيب أحسن ناكل من منتجات الطبيعه خضروات كدا فإذا الله وفقك ولميت فيها ما عارف مرشوشه بالمبيد الشنو؟ والطماطم كلها منقره والبطاطس رشوها بي شنو والخضره والرجله يعني حتي منتجات الأرض بقت ما طبيعيه وما صالحه للأكل بكثرة المبيدات ، أوكي أوكي نسيب ديل كلهم أحسن نأكل فواكه بس الفواكه دي ذاتها مشكله علبة العنب الصغيره بي كم وقطع شك ما حا تكفيك وجبه وكرتونة التفاح بي كم حاجه ما معقوله خلاص احسن نحن ما نرفع مستوانا نعتمد علي الموز المتعزز اليومين ديل وسعرو اتغير بس الموز ذاتو قالو راشنو بي موية النار ناس حماية المستهلك وفي سوقنا المحلي دا قبضو ناس تلاجات برشو في الموز بي موية النار مووووووووية نااااااااااار عديل كدا يعني لو قررت انك تعتمد علي الموز بمعدل كل وجبه موزه لغاية ما تبقي قرد قطع شك موية النار دي بتقتلك لتقتلك ، خلاص يا جماعه أرجعو للسنة النبوية وصومو اليوم وعيشو علي الأسودين الماء والتمر لكن التمر هو ذاتو وينو غرقهو بي سبب السدود والمويه لا لا لا يطول التلوث قصدي الحديث عنها عشان كدا يا جماعه عندكم خمس حلول وانتو اختارو منها تلاته يا تاكلو نيم يا تاكلو في خاطركم

إبدااااااااااااع يا هويدا


أهو بناكل في خاطرنا

يا ود فقيري سلامات المشكلة بعد ما الخاطر ينتهي الناس تاكل شنو ؟؟؟؟؟؟؟؟؟؟؟؟؟
بعد انت ما من الناس المقصودين في البوست دا انت من الطبقه المرطبه

فعلا يا هويدا دي مشكلة كبيرة وحقيقية ...
وعليك الله سلمي لي علي ناس حماية المستهلك !!!
كلها حقائق للاسف ،،
والحل حل كل الموجودات من اعلي الهرم الي ادني مسعول
يلام بت شرف الدين

Quote: الطبقه المرطبه

أها ولمن نجي نقعد هناك الترطيبة دي ما بتنتهي

نحن غايتو من زماااااان سمعنا نصيحة مصطفي عثمان اسماعيل
وولعنا صاجنا لي العواسة وانا زاتي اتعلمت العواسة...
وبرسلو لي العيش من القضارف...علي شرط يكون مزروع
مطريا...أو قايم ( باروس)...(دي الا يشرحا ود شيقوق)

مع الكسرة بنضيف ملح وموية وشمار وبنتعشي كسرة بي لبن
(حليب) ومرات روب...ولما نشتهي اللحمة بنشرك لي القطا
او السمك...

وعليك الله سلمي لي علي ناس حماية المستهلك !!!الـسـلام علـيـكـم هــويــدا

انـا مع أخوى الـعوض

* كيفيك يا حاج العوض

السلام ليكم تانى

وربــنــا يــحــفــظــكــم .. ويــســتــركــم

قــولــوا آآآآمــييييييييين


آآآآمــيــت[/green]

أكلو نيم...

لأنه نحن السبب ..
سمحنا للكيزان إنقلبو على الديموقراطية
خلايناهم يطلعو في رأسنا لحدي اليوم ده نستاهل نأكل نيم

سلامات يا هويدا


هو يعني الناس لسة ما أكلت نيــم!!\


ده الريس حلقومه وجعه من الصياح: أكلو نيم أكلوا نيم!!!
كلها للجاه والزول الرّاح.......



مودتي

نزار حسين مبالغه والله مفكرين شديد بس الكسره البتاكلوها بالمويه دي ، المويه دي بتجيبوها من وييييييييييين.



يا ود فقيري لما تجو يحلها الف حلال


الاخ انو شكرا ليك علي المرور والله يسلمك


الطيب مصطفي الخوف النيم دا ذاتو بكره يتلوث او يبقي غالي


عبد العزيز عيسي ربنا يدي العافيه بس

شكراً كثيراً أ. هويدا
لقد عبرت من خلال سطورك عن واقع مؤلم حقيقة.
للوهلة الأولى قد يتوقع القارئ أن مقالك كتبتيه للاستهلاك والضحك، بينما المقال ينضح حقائق وحيرة

الأخ نادر والله دا كلام حقيقي ذاتنا غلبنا البناكلو مشكور كتير علي المرور

هدهد

ســـلام ... وليس بالخبز وحده يعيش الانسان
عارفه يا هويدا لما نشوف معاناتكم دي بنحمد الله بكرة وعشيا
في ناس كتار قاعدين بره البلد دي بسبب سهولة الحياة خارجها
عارفه انا طلعت من الســـودان وكنت شغال في بنك السودان
بقســم تقنية المعلومات ولما جيت هنا راتبي هناك كان يساوي راتب
مساعد مدير وأقل من راتبي الهنا ... والله صحي
لكن لأني طلعته قرفان وزهجان بس
السنة الماضية فكرت ارجع نهائي للسودان
والله يا هويدا يمكن زي 100 زول من البعرفهم قالوا لي
يا زول انت جنيت ولا شنو؟ الراجعلها شنو؟
الله يكون في عونكم وعون اهلنا كلهم

تحياتي

ياخ الطلح ذاتو قالوا بقى كعب
بعد دة نقع اللخوخة بس

يا هويدا انصحكم بالاتى

1- الفول

2- الفسيخ

3- الميلوحة

مابتجيكم عوجة

يا قريبي نحن من ولدونا شغالين فسيخ وتركين وفول
يعني نموت كمد نحن ولا شنو

الأخ عصام علي أحمد

سلامات ، والله حلة الفسيخ مكلفه تكليف ميالغه

يا ود جبريل يا مسنوح لكن بي تحت تحت كدا كلامك بالجد صاح بقي لا لون لا ريحة سبحان الله

والله يا الأمين عارف لو كنت شغال إلي الان في البنك المركزي كان الله اداك والله كان رطبت اخر ترطيبه بالإضافة للعربية والبيت غايتو لو كنت بعرفك من الوقت داك كان نصحتك انك ما تسيب البنك المركزي ، المشكلة انك اذا فكرت في الرجوع فلازم تبني الرجعه دي علي اساسات ما ساي كدا يعني عندك بيت حا تعيش كيف ؟ اذا عندك خيارات مالها الرجعه؟ والله العيشه وسط الاهل مافي احلي منها

والله يا الأمين عارف لو كنت شغال إلي الان في البنك المركزي كان الله اداك والله كان رطبت اخر ترطيبه بالإضافة للعربية والبيت غايتو لو كنت بعرفك من الوقت داك كان نصحتك انك ما تسيب البنك المركزي ، المشكلة انك اذا فكرت في الرجوع فلازم تبني الرجعه دي علي اساسات ما ساي كدا يعني عندك بيت حا تعيش كيف ؟ اذا عندك خيارات مالها الرجعه؟ والله العيشه وسط الاهل مافي احلي منها

الأخت / هويدا شرف الدين
تحية وتقدير
وبعد الكلام القلتيهو دا كلو برضو كتير من الناس ما قادرين ياكلوا كويس , اذا كانت وجبة بتتكون من سلطة طماطم بالدكوة بتكلف مبلغ وقدرو , ناهيك عن المحمر والمسلوق , الناس ما بقت بتفكر بطريقتك دي , الناس بقت بتفكر بطريقة أيهم أرخص سعرا , أيهم بشبع وبملأ البطن , أيهم ممكن يكون متوفر ويتلقي في أي وقت , كتير من الأسر أكتفت بوجبتين بس في اليوم وبعض الأسر وجبة واحده رئيسية ويتموها موية وشاي مع انو رطل السكر للشاي بقى باربعه جنيه .

وعليه بالفهم دا يبقى كلامك حول المضار الصحية للطعام فيهو شئ من ( الترطيب ) الاتكلمتي عنو ووجهتيهو لعصام فقيري , أول بالتبادي الزول يملأ بطنو , يسد الرمق يعني عشان يستعدل ويقدر يفكر كويس المضار شنو ووين ؟

حسب ما علمت انو كيلو اللحمه ضان بلدنا بقى 70 جنيه
كيلو الطماطم 8 جنيه
كيلو السكر 7 جنيه

دي أمثلة بس طبعا

Quote: رطل السكر للشاي

يا البشير بعد السلاام والشوق


عاوز أنصحك بالسكر في الشاي دا

خليهو

إنت لسه بتشرب شاي فيهو سكر

عارفك لسه شباب لكن نصيحتي ليك القهوة والشاي بدون سكر

في الأول صعبة لكن بعد كم يوم بتبقى عادي

مع تحياتي

Quote: يا البشير بعد السلاام والشوق عاوز أنصحك بالسكر في الشاي دا خليهو إنت لسه بتشرب شاي فيهو سكر عارفك لسه شباب لكن نصيحتي ليك القهوة والشاي بدون سكر في الأول صعبة لكن بعد كم يوم بتبقى عادي مع تحياتي

مراحب آلاف أخوي عاصم فقيري
التحايا والتقدير
نصيحك مقدرة والله , تعرف ناس السودان بالذات بشربوا السكر بطريقة مبالغ فيها
يا ست الشاي بتكب السكر في الكباية ( بكمشة صغيرة ) ما بمعلقة يعني

لكن هنا بنشرب الشاي والقهوة بسكر خفيف غايتو ( البدون ) دي صعبة شوية , ولكن زي ما قلت المسألة تعود
وخلينا نجرب وان شاء الله نقدر نتعود .

أما عن الشباب وما أدراك فربنا يجبر بخاترك ياخ ,
لكن بعد الاربعين الحسابات بتختلف في زمن الغلاء دا