لقاؤنا مع شاب مع جمهورية جنوب السودان..

في غيرما اتفاق بموعد سابق ..وبمصادفه في احدى مقاهي "دبي" نهارآ جهارآ..

جلست ومعي اثنان من الاخوان..في انتظار النادل ان ياتينا بالشاي...

على مقربه منا ...جلس شابين احدهما من السودان والاخر من جنوبه...

تلاقت الاعين في مرات كثيره لتفرض التحايا وجودها..

كيف يا شباب؟

تمام والله

تشربوا شنو

شكرا...نحن طلبنا

لا ياخي طلبتو شنو...لازم تشربوا حاجه على حسابنا.

اصرار و"حلايف" وما ممكن وكيف ياخي..

ياتي الشاي "المنعنع"...ومع انتهاء رشفتين او ثلاث ...وبعد ان بدأ الشاي في تأثيره والكل"مخمخ"
دار بعدها هذا الحوار

كيف احوالك ياخي"السؤال الى الشاب من جنوب السودان"

والله الحمد.

احد الجلوس "شليق شلاقه" ...سأله انت جنوبي

لا ...انا من جمهورية جنوب السودان"قالها بصوت جهور"...

سألته..انت مبسوط لما تقول انا من جمهورية جنوب السودان.
كيف ياخي...احسن لينا انو انفصلنا وريحنا نفسنا.

حاولت ان اعزف على وتر العاطفه...فسألته..ما اشتقتوا لينا في الشمال.

صمت فتره من الزمن...وقال...عايز الجد.

اجبته ...ياريت والله

قال لي ...اشتقنا لي الناس الطيبين

قلت: انت دبلوماسي...وانا ما عايز دبلوماسيه.

قال: انا اتولدت في الشمال...ودرست في الشمال....واتربيت في الشمال ...واصحابي معظمهم من الشمال...بصراحه في حاجات كتيره في الشمال جميله وما بتتنسي.

هدوء خيم على الكل....عبرات ابتلعها البعض.

فاردف الشاب من جمهورية جنوب السودان...ياخي انتو فيكم ناس زي اهلنا ..لكن.... صمت ولم يتكلم بعدها لفتره.

كسر احدهم حاجز الصمت بان اشعل لفافة تبغ وادار صندوق تبغه على المجموعه.

تحدث الشاب...انا بشتاق لي ناس فلان وناس فلان من ...."اشار الى منطقه محدده في الخرطوم"...لكن انتو ماصدقتو انو نحن مشينا وقلتو الحمد لله.

اجبته ياخي انتو ليه دايما ظالمننا.

قال: لا ياخي نحن ماظالمنكم...لكن دي الحقيقه...دائما في حالة نزاع و مشاكل معانا حتى بعد ما سبناكم.

قال الشاب..انتو المؤتمر الوطني ده ما قادرين عليهو.

ضحكت.

قال: البضحكك شنو.

قال احد الشباب...ياخي انتو مش مشيتو مننا كمان عايزين تورونا البحكمن منو.

ضحك الشاب وضحكنا كلنا.

فقال الشاب : مش كده...بس انتو مفروض تعملو خطوه عشان تتحرروا.

قال احدهم: ان شاء الله بعدما تحرروا انتو...ما انتو برضو الحركه الشعبيه فارضه نفسها بدون منافس واي منافس بجزوا ليهم راسو.

تبسم الشاب وقال: الحركه الشعبيه في الجنوب عندها ناس كتيرين وراها والمعرضين بسيطين..عكسكم انتو.

قلت له: انت كنت معارض في السودان للنظام ولا شنو.

انا في السودان ما بقدر انضم لي حزب لانو انا بعتبروني من الجنوب.
اجبته بان هناك الكثيرين من الجنوب ومنضمون الى احزاب من الشمال.

قال: الا يكون شيوعي ولا اخو مسلم...فضحكنا كثيرا....فاردف قائلا..حتى في احزاب الشمال لازم نكون متشاحنين وكل واحد كاره التاني شيوعي واخوان يعني مصيبه جاهزه.

بعد انتهاء الشاي والقهوه ومضي زهاء الساعه والنصف....

قلت : نستاذنكم بعد ده...

يا جماعه اقول ليكم حاجه...نحن لسه بلد جديد لكن اهتمامنا بالتعليم اول شئ عشان كده في بعثات كتيره للدول الخارجيه عشان نمشي نتعلم ونرجع بلدنا..ان شاء الله نتقابل تاني.
قلت ليه نتقابل في الجنوب ولا الشمال.
قال لي الفيزا ليكم بي خمسين دولار بس!!!لكن نتقابل هنا.

تبادل الكل ارقام الهواتف على امل اللقاء مره اخرى...واهداني الشاب عشره جنيهات من عملة جنوب السودان ....العمله على جانبها صورة"جون قرنق"..قلت له دقيقه اديك هديه من عملتنا.

ضحك وقال...انا عملتكم البتتغير زي القميص دي عندي نسخه منها.