Post: #1
Title: هذا الكلام , كلام غير مفهوم ! .
Author: shaheen shaheen
Date: 11-23-2012, 09:22 AM
1
ملعونة هذى الصحية مع صوت الاذان
الصيحة طالعة كما الفحيح
المُلك لله .. الرزق اصلاً شحيح
معقولة وشك زى قفاك ؟
مقلوبة
بـ الهوبة .. انعدلتا على الصراط المستقيم
يا تقول عديل
او تنخرس
هل انتا يا دكر البنات
وقت الهبوب ما بتنكسر ؟
شن مرقتك والناس نيام ؟
لـ مرقدك اعمل تمام
هذا زمانك يا مهازل
هذا زمان الانبطاح
فـ أترك نطاح الحيطة , يفتكروك عوير
لا فيك رِيالة .. لا سمعنا منك صوت ظُراط
فك تكة السروال
وتكتك
فـ القوانين فى التكية , برضو مُحتاجة لذكاء
داقش , تجد .. ولكل مُحتهدِ مصيبة .. او نصيب .. او وقعة فى البير الغريق
تمبل السلطان , ومخصى القصر , المحظية , والـقـوادة ام سِنة دهب
ديل اصدقاء
فـ اترك سلاحك عند باب القصر .. واربط حصانك , فى خشم باب العدو
ثم انصرف .. بعد الصلاة
هذا زمان الاصدقاء
كن مطمئن
اوعك تئن
اصطحب مرأتك , ومرضك , والعيال
نحو الهلاك
بعد التجشأ , والتمخط , والتبرز , والتسوك , والسعال
والبسملة
يبقى السؤال
يا لاوى بوزك مشمئز او مُنقهر
هل انتا يا دكر البنات
وقت الهبوب ما بتنكسر ؟
شاهين شاهين
|
Post: #2
Title: Re: هذا الكلام , كلام غير مفهوم ! .
Author: shaheen shaheen
Date: 11-23-2012, 04:43 PM
Parent: #1
2
فـى الحـب , انـا زيـك .. زول أهبـل
أهبـل جـداً
ورومـانسـى , وزول حسـاس خـالـص
خـالـص جـداً
الزيـى و زيـك يـا وردة فـى الزمـن القاسـى , ده زول أهبـل وعوير جـداً
جـداً .. جـداً
فيـروزة شـاطىء احـلامى , نـتعاور فى الوطـن الأهبـل
أهبـل جـداً
نـحلم بـ بـكرة وعارفـنو , حـ يـكون اكـعـب من امـبـارح
اكـعـب جـداً
نتعـب مـنه
نلعـب بالمنطـق , حـد نصـله صـارم جـداً
جـداً .. جـداً
شـافع يا شـافعة يا عضـاضـة
يـا السـارقة حــلاوة لبـان مـنى
بسـرق مـن جيبـك تـفاحـة , واديـك كرمـلة ومصـاصـة
وبطـوطـحك فى المرجيحـة كـمان
مـا العيـد بـكرة !
يـوم بكـرة بعيـد عننـا جـداً
جـداً .. جـداً
وبريدك انا بالجد جـداً
أهبل متخلف عقلياً
يا عويـرة .. وفيـروزة شـاطىء
نـتحـدى المنطـق والواقـع
ده الواقع فى بلدنا السمحة
تـافـه جـداً
جـداً .. جـداً .
شاهين شاهين
|
Post: #3
Title: Re: هذا الكلام , كلام غير مفهوم ! .
Author: shaheen shaheen
Date: 11-24-2012, 06:08 PM
Parent: #2
3
تباشير الخريف هلت
تباشير انكسار لاحت
هدوم العيد .. وريحة بسكويت فاحت
طباشير فى الحيط كتبت
(حضرت اليوم ولم اجدك)
وامبارح ولم اجدك
واول اول امبارح
متين اجدك ؟
وتجدينى ؟
وخايف من مطر ليلك .. يبلل لى هدوم عيدى
مطر شكشك على راسى
صلاة العيد جوار بيتكم
اخوض فى الطين
وكيف اصلك ولا اجدك ؟
اصوم فى العيد ؟
صيام العيد حرام شرعا
ولم اجدك
انوم احلم .. عشان القاك
- يا احلام .. يا احلام .
كوابيسك بقت اضغاث
(حضرت اليوم ولم اجدك)
تباشير انكسار لاحت
واعشاب الاسى الظهرت
على سرج الحصان رقدت وارتاحت
وعايز اغرق
وسامع النيل بنادينى
- تعال اغرق .
- تعال اركب على الامواج .
انا مجدوع على شاطئ
طحالب خضرا فى وشى
كلاب ضخمة .. بتنهش فى لحم فخدى
و دود داخل .. و دود طالع
صقور بدات تحوم حولى
بقيت منفوخ
(حضرت اليوم ولم اجدك)
تباشير انكسار لاحت
وريحة بسكويت فاحت
وغربان الفريق صرخت
على سلك العمود ناحت
تباشير الخريف هلت
واحلام العمر ولت
سدود قدامك اتعلت
قدود .. والدود جيوش بتصفى فى دمك
متين اجدك ؟
وتجدينى ؟
وخايف من مطر ليلك .. يبلل لى هدوم عيدى
(حضرت اليوم ولم اجدك)
(حضرت اليوم ولم اجدك)
(حضرت اليوم ولم اجدك)
وسامع النيل بنادينى .
شاهين شاهين
|
Post: #4
Title: Re: هذا الكلام , كلام غير مفهوم ! .
Author: shaheen shaheen
Date: 11-26-2012, 06:30 PM
Parent: #3
4
هى زوجتى
وعشيقتى
وحبيبتى
وصديقتى
وشريكتى
ورفيقتى
وعصيدتى عند الاذان
صمام أمان
زمزمية موية العطشان
وعكازة طريق مليان كلاب
أم العيال
من منبعك حتى المصب .. اهديك سلام .
شاهين شاهين
|
Post: #5
Title: Re: هذا الكلام , كلام غير مفهوم ! .
Author: shaheen shaheen
Date: 11-30-2012, 06:59 AM
Parent: #4
5
لورى الشمالية .. اوعك من الرملة
مابين هذا وذاك
بين ضحكة والدمعة
محبوبتى شايقية
مروية .. نيلية
كـ الطفلة فى الروضة .. ترضع صباع ايدها
سيدى (الحسن) سيدها
تصطاد سمك فى الليل
اصطاد فساتينها .. وثمار بساتينها
وتعوم على جسمى
اغرق .. اناديها
تغسل مناديلها
واشوف قناديلها
تخجل تضاريها
افتح .. اغوص فيها
اغسل عليك شبقى
- ضيعتا لى شبطى .
- شكلك حـ تفضحنى .
- ود عمى بضبحنى .
بين لا .. كفاية .. خلاص
الليل بيسترنا
بس من عيون الناس .. يا ربى استرنا
والذنب ما ذنبى
عسلك وما بيكمل
لما الشمس تطلع .. بتمنى لو ترحل
شان ليل جديد يظهر
تصطاد سمك فى الليل .. واصطاد فساتينها .
شاهين شاهين
|
Post: #6
Title: Re: هذا الكلام , كلام غير مفهوم ! .
Author: shaheen shaheen
Date: 12-02-2012, 06:54 PM
Parent: #5
6
بتسكر والشمس تضحك على حالك
بعد سكرك بتطرش فى حطام ذاتك
وسط كتبك تدس المك
وتبكى على الرصيف وطنك
بتدفع فى فواتيره
منو البدفع تمن كفنك ؟
وتبكى على الرصيف ماشى
تدوس الحسكنيت ماشى
مكسر فى عضم ركبك
كسر عضم الحلم قاسى .
شاهين شاهين
|
Post: #7
Title: Re: هذا الكلام , كلام غير مفهوم ! .
Author: shaheen shaheen
Date: 12-04-2012, 04:25 PM
Parent: #6
7
صباح نادى
صباح الورد يا وردة
صباحك حلبة بالقرفة
صياح الديك
ومع صوتو الصباح يبدأ
صحيت من نومى صحصحتا
متفائل
و بعطر الامل فوحتا
فتحتا الباب
وفى وش النسيم صحتا
- صباح نادى .
اكلم اى زول ماشى
انادى عليك يا بهجة
تردى وانتى مبتهجة
اشوف وشك
يزهزه ابتهاج ذاتى
صباحاتك عسل صافى
صعوبات الحياة سهلة
وامواج الفرح تعلا
صياح الديك
ومع صوتو الصباح يبدأ
صباحك حلبة بالقرفة .
شاهين شاهين
|
Post: #8
Title: Re: هذا الكلام , كلام غير مفهوم ! .
Author: shaheen shaheen
Date: 12-05-2012, 07:27 PM
Parent: #7
8
رُباعيات
(1)
يوم تتولد .. اسمك يكون مولود
وقت الرحيل .. اسمك يكون مرحوم
اركز وشد الحيل
لو تنكسر فى ليل .. اسمك يكون مكسور .
(2)
يا شاهد القبر
ليه أسمى مكتوب فيك وانا عايش ؟
ولا انا ميت ؟
يا دهشتى , يوم ما عرفتا باننى ميت , وانا عايش .
(3)
يا ايها (الصقر) الذى .. عايش بيأكل فى الفتات
ملعون ابوك
خليت سكن قمم الجبال .. وسكنتا فى عشة حمام
انهض وقوم من كبوتك .. اضرب جناحك فى السحاب .
(4)
أكتبينى .. حـ أكتبك
أرسمينى على الجدار .. راح أرسمك
لوينينى بـ لون فراش
اسندينى , اجمعينى , اصنعينى من الشظايا والحطام .
(5)
برد .. برد
برد شتاء .. سقط نزل على قلب
شافك .. سمع حسك
دفا .
(6)
يا حبة (الفياجرا)
طعم الجنس بقى بايخ .. والحب بقى بايخ
النفس مكسورة
المشكلة فينى ؟ .. ولا الحبة مغشوشة ؟ .
(7)
أرنوب
هل يوم شربتا على الغداء .. شوربة أسود ؟
قانون حياة .. يا تركبم يا يركبوك
فى زحمة البشر الوحوش .. اوعك تكون مركوب .
(8)
كما اليمامة .. سكنتى فى قلبى
وانا زى حمامة على السماء .. فارد جناح عشقى
اتشابهت لى الدروب .. وقت المغيب طشيت
وين يا غمام عُشى ؟ .
(9)
يا صباح الخير عليك
كيف حالك .. ازيك
طولتى منى شديد .. يا القهوتك زيك
مشتاقة للمشتاق ؟ .. ولا الزمن نساك ؟ الحلة , ناس حيك .
(10)
وعليكم منى السلام
وعليكم الترحال فى صالة مطار
عليكم السفن الكبيرة
وهى تبحث فى امان الله عن ضوء الفنار .
(11)
قال صاحبى انو القروش هى كل شى
قلتا بحماس انو النضال هو كل شى
مرت سنين
فيها اكتشفتا باننى مهزوم .. وخسران كل شى .
(12)
براك واقف
وتل الرملة فى وشك
وزى ظلك
كما الشجر العنيد شكك .
(13)
فجأة لقيتك وسط اللمة
اتذكرتا الزمن الكان
لما اخدتا فى جيبى عيونك .. لما طلعتا اجيب القمرة
ويوم ما الملل اتمدد بينا .. كسر لينا قصور الرملة .
(14)
الجميع , نفخوا الحنابيك
طارت ملونة .. حلقت
وانا الوحيد
لمن نفختا .. حنبوكتى فجأة اتطرشقت .
(15)
استحميت من شذاك
نشفينى
انغرستا فى طين هواك
طلعينى .
(16)
لعبة حياة
وراء الجنازة كان صراخ الارملة
- طول العمر بلبس سواد .
وبعد سنة .. لبست زفاف !.
(17)
هداك التعب ؟ .. ولا الوجع ؟
الشوق بحر
لو مركبك اتقدا وسط الموج .. ايه العمل ؟
العوم صعب .
(18)
يا صوتنا
شالو السوط , سكتا .. فترك المشى وعبث الأذان فى مالطا
اتجهجهنا .. كب الزوغة فى بلد الله
حتى الصوت خذلنا ! .
(19)
او قوس قزح
او نجمة بردانة وحيدة فى ليل شتاء .. ما قادرة ايدك تلمسها
صياد سمك .. خانو الشبك
او نسمة عابرة على الخلاء .. خايفة العقارب تضربها .
(20)
انام على صدرك الريان
واحكى عن الزمان الكان
تمسحى شعرى بـ يدك
وحجرك يبقى كهف امان .
(21)
استنى فارسك .. مات حصانو على الطريق
استنى بين صخب الضجيج للانتصار .. بين النحيب
استنى فى راس الجبل .. يمكن يصل , منهك , حزين
يا بيانات انتصار الحرب .. منتظرة الحبيب .
(22)
على صهوة خيال جامح
وزى اسطورة فى التاريخ
تعاين للفشل مزروع .. فى ارض الفريق سارح
تقيف تضحك .. وصدرك للرياح فاتح .
(23)
تغادر شواطىء .. تحلم تكون
وتمشى البلاد العجيبة
تقابل وحوش .. تطلع جبال .. وتنطح صخور
وترجع لـ بلدك , عجوز ضهرو محنى .. ترجع تنوم .
(24)
الساعة كم ؟
العمر فضل فيهو كم ؟
الاحتياج هو نوع و كيف .. الاحتياج هو ليس كم
حرمانى لو حسبوهو بالساعات .. ارقام ضياعى حـ تبقى كم ؟
(25)
عازمك معاى .. حاجة باردة وبسكويت
عازمك حديث .. عن نفسى , عن احباطى , عنك
عن زولة فى الماضى البعيد .. نستنى ليها .. زولة فى حاضر قريب
حاجة باردة وبسكويت .
(26)
لسانك حصانك
وشعرك علاجك .. دواءك من هلاكك
فـ أكتب كلامك .. وارسم , وشخبط , وشاغب بحبرك
زمان قد يخونك .. وشعرك حنون , شعرك يصونك .
(27)
والعود فى الظل العليل
كيف يستقيم ؟
والاعوجاج اصبح عديل !
هل قد تعبتا من الطريق ؟ .. ام انتا حاير بيك دليل ؟ .
(28)
صفا .. انتباه
تعظيم سلام .. ارضاً سلاح .. الحب والاناناس علينا
لمة غداء , كسرة وملاح
ونسات لذيذة مع الحبيبة , وارتياح .. اتونسوا , ارموا السلاح .
(29)
ايه فايدة ما تكتب ؟ .. دى حروف كلماتك لو صدقت , برضو حـ تكذب
و مقالك فى نهاية امرو , لا بيعمل ضجة ولا هيصة .. وقت الافطار حـ يكون مفروش فى طربيزة
او يمكن زول مزنوق خالص .. بدل الموية , نضف جعباتو بما تكتب
مهما عملتا برضو حـ تكذب .
(30)
ضد الغروب .. ومع السطوع
العين تشوف العين
الليل خضوع
وبخاف من المجهول , ينط فيك فى الخلاء .. ويعلمك معنى الركوع .
(31)
وهل يمكن .. وسط اكوام زبالتنا , تقوم زهرة ؟
وهل يمكن .. مع السخف السخيف جدا , تجى الفرحة ؟
وهل انتى
ما زلتى , كما كنتى .. على جرح الالم روعة ؟ .
(32)
شمس الله طلعت من جديد .. يوم جديد
حـ يموتوا كم ؟ .. يتولدوا كم ؟
وحـ ينسوا كم ؟
يوم جديد .. وقديم على الاكتاف ركوب الهم .
شاهين شاهين
|
Post: #9
Title: Re: هذا الكلام , كلام غير مفهوم ! .
Author: shaheen shaheen
Date: 12-06-2012, 07:22 PM
Parent: #8
9
سين سلام
تعظيم سلام
يا سلام لو ينقلب هذا السلام قفة ملاح
صمتًا سلاح
بارودك الملعون يكون شارع ظلط
كبريت وكباية لبن مع بسكويت
كفاك اقيف
كفاية دم
هم وغم
مليون من الاميال براح .. تكفى الجميع وبارتياح
فجأة السلام لو ينقلب فدان قطن
فدان قمح
شفخانة فى كل القرى
وبنات مدارس متمخطرين
حاضنين على النهد الشنط
افتح شبابيك للهواء
دايرين نعيش
ناكل سمك , نشرب عصير , ونخمس الشاى التقيل
تحت الشجر يحلو السمر
نقعد ونضحك نستريح
افتح شبابيك للهواء
وطن الجميع وللجميع
للمؤمنين والملحدين والنص دين
عايزين وظايف نشتغل
يمكن بنات كايسة العرس تلقى العريس
صمتًا رصاص .. ملعون ابوك
ملعون ابو الحرب الضروس
ملعونة يا كل الجيوش
ولتحيا نبتة حب خجول
مع طلعة الشمس الضحوك
شاقة الارض زى نبتة الفول الصبوح
هذا السلام لو ينقلب .. انسانة حلوة مشعة بالبهجات
بترش على رمل الطريق افراح
صمتاً عفن اتراح قبيح
نقعد ونضحك نستريح
هيا انقلب , هيا انقلب
وليحيا بينا الحب , ولتحيا الحياة
وليسقط الموت , المقابر , والدمار
وليسقط الموت , المقابر , والدمار
عايزين نعيش
مليون من الاميال براح .. تكفى الجميع وبارتياح
شاهين شاهين
|
Post: #10
Title: Re: هذا الكلام , كلام غير مفهوم ! .
Author: shaheen shaheen
Date: 12-07-2012, 07:43 PM
Parent: #9
10
يا فاطمة
فى زمن الزهايمر .. اذكرينى
والناس بتنسى الناس
فـ كيف تنسينى ؟
سيبانى فى طريق مهجور براى
خطواتى ما تحصل سنينى
فـ تذكرى الماضى اللى كان
يا فاطمة
ارجوك اذكرينى
***
من لوحة التذكار
ومن صورتك معاى
من بسمتك .. من توبك الابيض
ومن علبة سجايرك
والمقالات .. نشرة الاخبار
غمزة عيونك
مشيتك زى عسكرى
شلال انوثتك
رقتك
تكشيرة الوش .. يا هزارك وشدتك
***
يا فاطمة
فى زمن الزهايمر .. والخلعة من وسـخ الزمان
عبث الكتابات والكلام
ضجر السياسة
اليأس من هذا الزحام
الهاوية .. والا مكان
فطومة يا زاد الطريق
فطومة يا كتف الرفيق
فطومة يا قشة غريق
فـ تذكرى المحروق على نار الحريق
***
يا فاطمة
فى زمن الزهايمر
اذكر ويتعبنى التذكر والحنين
فى غابة النسيان اتوه واتذكرك
على صوت تذكر ذكرتك , بتذكرك
ريحة سجايرك .. ضحكتك
الله عليك .. مشتاق شديد لـ قهوتك
احضن اغازل شفتك
الله عليك .
شاهين شاهين
|
Post: #11
Title: Re: هذا الكلام , كلام غير مفهوم ! .
Author: shaheen shaheen
Date: 12-11-2012, 04:39 AM
Parent: #10
11
اهلاً وسهلاً
انتا مين ؟
لما عاينتا فـى مرآية
ما عرفتك
انتا مين يا وش حزين ؟
عاملة ايه فيك السنين ؟
مركب تودى .. التوديك ما بتجيب
انتا مين ؟
يا زول مداقش فى دروب الهجرة
فى جيوب البنطلون شايل حنين
درباً بوديك .. البوديك ما بيجيب
**
ضيعتا وشك يا غريب
ضيعتو فى زحمة رصيف
وصرختا فى الوش البديل
- منو انتا ؟ .. انا شايفك كتير .
انتا مين ؟
يا الماشى حفيان فى الطريق
شاكيك شوك درب المسير
وين الجناحين شان تطير ؟
لا راحة فى الوطن الاساس
لا راحة فى الوطن البديل
**
مكتوب عليك الاندهاش
مقسومة ليك سكة سفر
شنطك مستفة للرحيل
موعود تكون فى الغربة يا بحار غريب
يا غربة فى الوطن الاساس
يا غربة الوطن البديل
**
وشك صرخ فيك
- انتا مين ؟.
رديت
- غريب , داير استريح .
وشك قفل باب وشو فى وشك
وبقيت براك
انسان وحيد .. مهجوم من الامطار .. حزين
موعود تكون فى الغربة يا بحار هجين .
شاهين شاهين
|
Post: #12
Title: Re: هذا الكلام , كلام غير مفهوم ! .
Author: shaheen shaheen
Date: 12-11-2012, 08:28 PM
Parent: #11
12
عام جديد .. جرح قديم
ذكريات .. غبار كثيف
كل عام زى كل عام , لا جديد
عام جديد زى القديم
كل عام وانتى بخير
وكل عام وانا فى انتظار .. فى محطات خالية من ركاب جداد
نفس الملامح والوشوش , نفس الكلام , نفس الشوارع والبيوت
نفس احتياجى اليكى , نفس الاشتهاء
عام جديد والهجر طال , العمر ضاع , الشعر شاب
ضيعنى فيكى سراب لقاء , ولا لقاء !
فى كل عام نفس الوداع .. اتسرسبت قدرة صمودك يا احتمال
حتى الهزايم والضياع زى كل عام
الفرق ايه ؟ بين بكرة , او بعد بكرة , وبعد بعده , الفرق ايه ؟
تكرار لئيم .. نفس السؤال السرمدى , ولا جواب !
فمتى الرحيل ؟
لمتين تأجل فى قرار الانتحار ؟ , فى اى عام ؟
ود يا جـبـان ! .
شاهين شاهين
|
Post: #13
Title: Re: هذا الكلام , كلام غير مفهوم ! .
Author: shaheen shaheen
Date: 12-13-2012, 09:37 PM
Parent: #12
13
اشمعنى من كل البنات اخترتا فاطمة ؟
وعلى الرصيف بتعدى الاف البنات
اشمعنى انت على الرصيف مستنى فاطمة ؟
خبطك زمانك فى قفاك
اشمعنى لما صرختا منه
صرختا فااااطمة ؟
وكتار خلاص الفارقوك
خلوك بدون قشة غريق
اشمعنى فى حرق الحشاء
حرقت حشاءك , ست البنات , الست فاطمة ؟
ما الحكمة من سفرك براك ؟
من غير كتب , وبدون شنط
دون زاد
ودون الست فاطمة
ما المعنى من عبث الحياة ؟
وكتار خلاص على صدرهم ياما بكيت
اشمعنى لما بتبكى هسع
اشمعنى بس بتحن لفاطمة ؟ .
شاهين شاهين
|
Post: #14
Title: Re: هذا الكلام , كلام غير مفهوم ! .
Author: shaheen shaheen
Date: 12-15-2012, 06:33 AM
Parent: #13
14
اكبر منى بـ سنتين
انا كنتا فى خامسة ابتدائى
وانتى فى سادسة ابتدائى
عايدة السنة
وظهرتى كـ الشيطانة يا شيطانة
فى نص الطريق
بين بيت ابوى والمدرسة
- يا حلبى يا ود يا سمح , عندك مجلات ميكى ؟ .
اندهشتا من السؤال
مشروع مثقف من زمان
***
وبدات علاقتنا المريبة
اديها ( ميكى )
اخد ( سمير )
تدينى ( ميكى )
تاخد ( سمير )
وبدات جوابات الغرام , بين المجلات فى الظهور
وبدأ اللهيب
وانا مندهش
تحضنى فى نص الطريق
وانا مندهش
وتبوسنى فى الخشم الصغير
وانا مندهش
وتخت اديا على صدرها الناهد صغير
- اضغط هنا .
واضغط هناك وانا مندهش
وتفح فحيح
- اوعك تكلم زول .
مشروع مثقف من زمان
***
ايام تشيل .. ايام تخت
ايام تسر .. ايام تضر
فى الاربعين
وهى اكبر منى بـ سنتين
لِقيتا فى حفلة عرس
اتغيرت واتبهدلت
وسمعتا قالوا اطلقت
واخوها مات
شقت زحام الحفلة جات
مدت اديها فى صوت حزين
- يا حلبى يا ود يا سمح عندك مجلات ميكى ؟ .
بين الضحك
نزلت دموع
وبكت
بكت شديد
وحضنتها
يا ( ميكى ) عيد ليها الصبا
يا ( ميكى ) عيد ليها الصبا
يا ( ميكى ) عيد ليها الصبا
خليها ترجع بت صغيرة
مليانة بـ قلة ادب , بـ شيطنة
يا ( ميكى ) وحياة الرسول
ما تخلى اقدام السنين
تطلع عليها وتهرسا
يا ( ميكى ) أأأأأأأأأأأأأأأأأأأأأخ .
شاهين شاهين
|
Post: #15
Title: Re: هذا الكلام , كلام غير مفهوم ! .
Author: بدر الدين محمد
Date: 12-15-2012, 07:40 AM
Parent: #14
Quote: سين سلام
تعظيم سلام
يا سلام لو ينقلب هذا السلام قفة ملاح
صمتًا سلاح
بارودك الملعون يكون شارع ظلط
كبريت وكباية لبن مع بسكويت
كفاك اقيف
كفاية دم
هم وغم
مليون من الاميال براح .. تكفى الجميع وبارتياح
فجأة السلام لو ينقلب فدان قطن
فدان قمح
شفخانة فى كل القرى
وبنات مدارس متمخطرين
حاضنين على النهد الشنط
افتح شبابيك للهواء
دايرين نعيش
ناكل سمك , نشرب عصير , ونخمس الشاى التقيل
تحت الشجر يحلو السمر
نقعد ونضحك نستريح
افتح شبابيك للهواء
وطن الجميع وللجميع
للمؤمنين والملحدين والنص دين
عايزين وظايف نشتغل
يمكن بنات كايسة العرس تلقى العريس
صمتًا رصاص .. ملعون ابوك
ملعون ابو الحرب الضروس
ملعونة يا كل الجيوش
ولتحيا نبتة حب خجول
مع طلعة الشمس الضحوك
شاقة الارض زى نبتة الفول الصبوح
هذا السلام لو ينقلب .. انسانة حلوة مشعة بالبهجات
بترش على رمل الطريق افراح
صمتاً عفن اتراح قبيح
نقعد ونضحك نستريح
هيا انقلب , هيا انقلب
وليحيا بينا الحب , ولتحيا الحياة
وليسقط الموت , المقابر , والدمار
وليسقط الموت , المقابر , والدمار
عايزين نعيش
مليون من الاميال براح .. تكفى الجميع وبارتياح
دائماً انت رائع يا صديقي
|
|
Post: #16
Title: Re: هذا الكلام , كلام غير مفهوم ! .
Author: shaheen shaheen
Date: 12-18-2012, 06:30 PM
Parent: #14
15
بين كباية قهوة .. وصرخة شافع بال على نفسه , لباسه اتبلبل
اتـذكـرتـك
والكمسارى بيهرش فينى عشان الباقى
اتـذكـرتـك
لما النور فى الحلة بيقطع .. والكتاحة تغبر بيتنا
اتـذكـرتـك
صوت الموية فى الحنفية زى صوت حسك
كنتا بخت السفة صغيرة دون ما تلاحظى
وانتى بتكرهى ريحة خشمى لما اسف
يعنى خلاص هاجرتى بعدتى فى امريكا
ياأأأأأه !
كنتى بتكرهى فى الضهرية نمشى كتير
تزعلى مرة , مرة بتصرخى , مرة تصهينى .. وانا بستهبل واضغط نهدك دون ما اقصد
- طبعاً قاصد يا مستهبل .
حوش جيرنا الفاضى , فيهو حضنتك .. لما بنوهو
اتـذكـرتـك
يوم خمسنا سيجارة بينسون ... طول اليوم قعدتى تكحى
هل تتذكرى ؟
انا بتذكر .. كنتى قصيرة , لمن احضن راسك كان بيكون فى بطنى
هل مازلتى لسه بعيوة ؟ .. ولا طولتى ؟
انا قصرنى الوجع الغالب
هل تتصورى بت يا روعة ؟
رغم قطار العمر الاوغل .. لسه بمارس قلة ادبى !
وبعد سنين الغيبة الطالت .. هل تتخيلى ؟
لما الباب امبارح دقا .. اتوقعتك .
شاهين شاهين
|
Post: #17
Title: Re: هذا الكلام , كلام غير مفهوم ! .
Author: عمر الفاروق عبد الله الشيخ
Date: 12-18-2012, 07:04 PM
Parent: #16
شعر واضح جدا و صريح جدا وواقعي جدا جدا
هاك ادينا شعر
|
Post: #18
Title: Re: هذا الكلام , كلام غير مفهوم ! .
Author: shaheen shaheen
Date: 12-20-2012, 08:30 PM
Parent: #17
16
سنة واحدة بس
والاربعين حـ يدق على ابواب مدينتك
افتح الباب الكبير
سنة واحدة بس
شمسك خلاص بدات تميل نحو المغيب
سنة واحدة بس
اكوام قزاز مكسور .. وبحثك عن بصير يجبر كسور
يا دون كيشوت العظيم
ضيعتا عمرك يا غبى
ضيعتا عمرك فى طواحين الهواء
- انا بعتقد , انا بفتكر .
- الم الكتابة المؤلمة , وعى الجماهير لو تعى .
امشى اتلهى
شوف ليك فكى
يمكن حجابه يرجع العمر اللى ضاع
وتبدأ صاح
وتنتهى
مثل الجميع ما بيشتهى
والاربعين جاييك جرى
ود يا غبى .
شاهين شاهين
|
Post: #19
Title: Re: هذا الكلام , كلام غير مفهوم ! .
Author: shaheen shaheen
Date: 12-21-2012, 09:17 AM
Parent: #18
مودتى القلبية يا صديقى العزيز بدرالدين الطاهر .
*
تحياتى وتشكراتى العميقة على المداخلة أ/ عمر الفاروق .
|
Post: #20
Title: Re: هذا الكلام , كلام غير مفهوم ! .
Author: shaheen shaheen
Date: 12-25-2012, 10:07 AM
Parent: #19
17
سجمك
رفسك حصان حظك رماك
ركبك ك هم نحسك اساك
وبراك ابكاك التواجد فى الوطن
وبراك ابكاك التشرد فى الغياب
(سيزيف) منو البيشيل معاك ؟
سجمك .. فلا يوجد احد
ووب عليك من صرختك
ووبين عليك من صخرتك
(سيزيف) سجم امك عليك .. فلا احد
(سيزيفنا) لم ينجح احد
والراحة فى ود اللحد
والصخرة قد تدخل معاك
مبروك عليك .. رفسك حصان حظك رماك .
شاهين شاهين
|
|