أدونى النجيضة!!

من سنة 1989م جاتنا حكومة ركبت ضهرنا بالقوة..
لما جونا نعم ماكنا فى رغد من العيش
لكن على الأقل كان الصادق المهدى حر فى لسانو ونحنا حرين فى إضنينا..
وكنا عايشين على حلم بكرة بجى واحد أحسن أو الكعب دا بتحسن..

جونا الجماعة المرة دى من السلاح الطبى محل المريض بتعالج والمكسبور بتجبر والمجروح بتتضمد جراحو..
الناس الدخلو الجيش بسماعتم طلعوا فى الكراسى شايلين كلاشنكوف..
قلبوا الكراسى ودفقوا فتة البوش وقالوا نحنا جايين نوكلكم شية ونحلى ليكم بباسطة باللبن..

وقبل مانقول شى
قالوا حرم ولا كلمة

ومن اليوم داك فقدنا حريتنا فى كل جوارحنا وكمان دخلوا فى راسنا يسوطوا فيهو..
والأحلام أصبحت حبيسة المنام وإلا لو صحيت هذه الأحلام لفاقت على كوابيس وأشباح فى بيوت مغلقة..

الصالح العام شمل تسطيح التعليم الدانى والعالى..
الجامعة التى كانت تعلو طبقاتها أصبحت تتوسع أفقيا فى مساحات شاسعة بينها حواجز إقتصادية مقعدة لكل تطور..

والصالح العام شمل كل إسم يمكن أن يصلح ليكون مرشحا لنقابة عمالية أو مهنية ولم يستثنى إلا نقابة المعوزين والشحادين التى تمددت عضويتها..

إعتصام, إضراب,كلام جرايد, ونسة ضللة, همس ولاتحلم!!

انتخابات ممخوضة مخض البخيلة التى إن استنبح الجيران ك ل بتها قالت لسدنتها بولوا على النار..

الآن تجاوزنا العام الثالث والعشرين فى الحالة دى ولازال فى ناس متمسكين بإزالة النظام سلميا..
23 سنة والكلية الحربية لاتخرج إلا شبابا على الفرازة التى تحف الضمير وتعفى اللحى..
23 سنة والمليشيا تمددت أفقيا ورأسيا..
23 سنة وأصبحنا نصنع السلاح الذى لانمتلك خامه وأدواته ونبيع الأرض التى تنتج الخام الذى عليه تتقاتل الشعوب..

الحال أصبح صفين:
صف قال عايزين نظام يتيح الفرصة للجميع للوصول للحكم بطرق سلمية نزيهة..
وصف قال دونها خرط القتاد( إن شا الله يكون كتبتها صحيحة, باقى قبل ما ابقى عضو فى سودانيزاونلاين كنت شاطر فى اﻹملاء)..

الناس القالوا العايز السلطة يجى بالقوة مستكبرين باستحواذهم على السلاح والسلطة والثروة..

أها فى حلين:
يا نسكت عليهم ونطاطى
أو نغيرهم

والتغيير بطريقين:
ياسلمى يا بالقوة

والسلمى عايز حشد جماهيرى وناس مستعدين يموت منهم زى عشرة ألف وبعدها احتمال ينجحوا واحتمال يكملوا بالسلاح..
وهنالك الحل المسلح ودا البسووا فيهو الناس الآن فى دارفور وجبال النوبة..

النقطة البنلتقى فيها مع حملة السلاح هى استعادة النظام الديمقراطى وإتاحة الفرصة لكل السودانيين بالتساوى..

طيب البمنع شنو نقول ليهم تمام التمام؟

بلة
مساك سعيد وكل عام وانت بخير بمناسبة العام الهجري الجديد

الحركات المسلحة لما يعرف بأهل الهامش هم مصدر رعب وخوف لاهل النيل والوسط عموما نسبة للخوف من النعرات العنصرية التي يرفعوها ضدهم بسبب وبدون وهو ما يصب في مصلحة الإنقاذ . فأهل النيل يقول لسان حالهم نار الإنقاذ ولا جنة غير مضمونه العواقب تضع السلاح علي رقابهم فور انتهاء حكم الإنقاذ

Quote: الحركات المسلحة لما يعرف بأهل الهامش هم مصدر رعب وخوف لاهل النيل والوسط عموما

كيفك يا الزبير
بالمناسبة خالك صاحبى

يا الزبير أنا لما أخرج من كتابة المكاواة والعناد لبعض الأعضاء أعرف تماما أننا نخاف هؤلاء كخوف الظالم من المظلوم..

وكإنسان ولدت وترعرعت وعشت وسط الطبقات الدنيا فى المجتمع أعرف كيف أن البسطاء المظلومين تنسيهم العدالة والمساواة كل مراراتهم!!

Quote: طيب البمنع شنو نقول ليهم تمام التمام؟

الحكومة دي ما ادت اي فرصة للي يختلفو معاها التعامل بالحسني
والربع قرن اللي علي رؤوسنا كلو استهبال وكذب وهمبتة .. بعدين
هما قالو عبارة شهيرة .. اللي عايزا يجي ياخدا بالقوة .. وكلو تمام
يا قول شاعرنا فضيلي جماع .
جمعة مباركة وتحياي دكتور

Quote: بالمناسبة خالك صاحبى

يا بلة أيهم فهم كثر

منتصر صلاح
إسم مفعم بالتفا ؤل

تحياتى ليك وعظيم امتنانى

دكتور أحمد هلول
لازلت أستضئ بصفاء سرسرته كلما تذكرته.
بلغه تحياتى

يا بلة
د احمد محمد علي ليس خالي فقط بل وشيخي أيضا
سابلغلة تحياتك

سلام يادكتور بلة

هاك النجيضة دى:

http://www.aawsat.com/details.asp?section=45&...cle=704493&feature=1

تحياتى

سلام يادكتورة مهيرة

أستاذ أحمد يونس ومن التقى بهم ما ادونا أى نجيضة..
الحكاية كلها إحتمالات وأى احتمال يرمينا تانى فى حضن الجماعة زاتم.

+


"الحركات المسلحة لما يعرف بأهل الهامش هم مصدر رعب وخوف لاهل النيل والوسط عموما نسبة للخوف من
النعرات العنصرية التي يرفعوها ضدهم بسبب وبدون وهو ما يصب في مصلحة الإنقاذ . فأهل النيل يقول لسان
حالهم نار الإنقاذ ولا جنة غير مضمونه العواقب تضع السلاح علي رقابهم فور انتهاء حكم الإنقاذ."


منطق غريب، أهل الهامش يا أخ الزبير ُظلموا منذ أمد سحيق من قبل أقلية هندس وجودها
الأستعمار الغربي. أهل الهامش لا رغبة لهم في التشفي، كل الذي يسعون اليه أن يكونوا أحرار
في بلادهم، فإذا حرية حرية أهل الهامش مرتبطة بخوف أهل الشمال والوسط، فليكن.

Quote: يا الزبير أنا لما أخرج من كتابة المكاواة والعناد لبعض الأعضاء أعرف تماما أننا نخاف هؤلاء كخوف الظالم من المظلوم.. وكإنسان ولدت وترعرعت وعشت وسط الطبقات الدنيا فى المجتمع أعرف كيف أن البسطاء المظلومين تنسيهم العدالة والمساواة كل مراراتهم!!

كلام يوزن بذهب

Quote: منطق غريب، أهل الهامش يا أخ الزبير ُظلموا منذ أمد سحيق من قبل أقلية هندس وجودها الأستعمار الغربي. أهل الهامش لا رغبة لهم في التشفي، كل الذي يسعون اليه أن يكونوا أحرار في بلادهم، فإذا حرية حرية أهل الهامش مرتبطة بخوف أهل الشمال والوسط، فليكن.

الاخ عبد القادر دنقس
ظلم اهل الهامش بين لا يحتاج بشواهد وكل السودان مهمش لا شك في ذلك والشمالية اكثر منطقة مهمشة في السودان
لكن الشعارات العنصرية التي ترفعها الحركات المسلحة في الغرب هي سبب تشكك الشماليون ( أنا اتشكك حتي لا يأتي من يقول من الذي فوضك ) وهذا اصل حديثي وهو لا يحتاج لشرح
السودان كله يعتبر بلد لكل السودانيين بما فيهم اهل الهامش فماذا تعني انهم يريدون ان يكونوا أحرارا في بلادهم هل تدعو لانفصال الغرب مثلا أسوة بالجنوب