الخروف المجرتق (دي عادة قديمة) وإلا جديدة (لأني ما شفتها بعيني)

السلام عليكم ورحمه الله وبركاته

قرأت بالأمس في مانشيت بقناة أم درمان

(مخالفة مرورية لفطور عريس وخروف مجرتق)

وجدت الخبر في الإنتباهة

http://alintibaha.net/portal/%D8%B1%D8%A4%D9%...B9%D8%B1%D9%8A%D8%B3
الخبر:
التفاصيل
نشر بتاريخ الثلاثاء, 13 تشرين2/نوفمبر 2012 13:00
مخالفة مرورية لفطور عريس
أوقف مدير شرطة مرور ولاية الخرطوم اللواء د. الطيب عبد الجليل، موكباً يحمل فطور عريس، وحرر لقائدي المركبات مخالفات مرورية بعد استدعاء أقرب دورية مرور. وقال الطيب في مؤتمر صحفي عقد أمس إن «محمل فطور العريس» مخالف للوائح السير، وتسبب في عرقلة الحركة. وقال إن الخروف «المجرتق» والضباح والحلل الكبيرة، شكّلت في مجملها حمولة زائدة بالبوكس.. اللواء الطيب بتعليقاته الساخرة جعل قاعة المؤتمر تضج بالضحك، وقال معلقاً على سرعة شاحنتين عبرتا كوبري المنشية ليل أمس «الكوبري بقى زي صحن الجلي يرجف من أولو لآخرو».

وأزيدكم من العشر بيتين

وأسمحوا لي بما أن الموضوع أتعرض في أحد المنتديات وهو (شبكة ناوا عريس النيل) الكاتب بإسم ( أنباب حاج ) وأنقل لكم ماذا قال وبرضه لو بحثتم عن المنتدى ستجدونه. قال:

كل يوم تتحفنا الصحف السودانية باخبار غريبة وعجيبة بعضها لا يدخل العقل دا اذا اصلا هم خلو فى رؤوسنا عقل مع الصباح كدا قلت ادخل اشوف اخبار البلد شنو بس يا فتاح يا عليم يا رزاق يا كريم اول جريدة فتحتها لقيت لى صورة خروف وزى ما يقولو ناس اللغة العربية كأنه البدر فى ليلة تمامه خروف ناصع البياض اظنو ماخد ليهو حمام باغلى انواع الشامبو وحالقين ليهو قصة اللاعب البرازيلى الشهير اينمار وطبعا عاملين ليهو ميك اب وطالين ليهو شفايفو بروج احمر مع خمسه باندات فى كرعينو وضنبو وحلق فى عضنينو الطوال ديل ومجرتق باغلى انواع الحرير بس تقول ياهو الخروف فرج الكان عاملين ليهو عرسو فى فيلم عادل امام التجربة الدنماركية اصبرو شويه يا جماعه الخروف دا ما عريس دا كان ضمن (37) جردل مليانه باشهى انواع الاكل ومعاهو كميات من الخبائز والحلويات وديل كلهم عبارة عن فطور عريس اى والله فطور عريس اذا كان اهل العروسه عاملين فى الخروف كل البهرجه دى امال العروسة يكونو عاملين فيها شنو ياربى . اسى العريس حيعمل فى الخروف دا شنو لانو بصراحه خروف بالجمال دا كلو خساره ينضبح ويتسلخ والناس تقعد تاكلو دا مفروض تتعمل ليهو بترينه زجاجية وطوالى يشيلوهو على معرض الخرطوم الدولى وتتعرض صورته فى كل وسائل الاعلام عشان العرسان يشوفوهو ويبقى واحد من شروط العرس يا خروف زى دا مع الفطور او خلو عروستكم وفطوركم عندكم ويفتح الله طيب يا جماعه الجرادل ال 37 المشو مع الخروف ديل مش فيهم فطور العريس اها الخروف الاجمل من العروسه دا كان لزومو شنو يمشى معاهم والغريب انك كل ما تقرأ ليك خبر من النوعية دى تلقى مكتوب فى نهاية الموضوع هذه العادات الدخيلة على مجتمعنا والله بقينا ما عارفين الدخيل شنو والمستوطن شنو غايتو المشروع دا دخل مخى يعنى مشروع القمل حاخليهو لى ذات النطاقين والحمير لايوب وعجلات البنات لحيدر شكرى ونهاد العطا وسوف اتفرغ من اليوم للخرفان والحملان ذات اللون الابيض والمشروع دا شكلو حيكون مكلف جدا لانو ما معقول خرفان بالمستوى دا تعيش ليها فى زريبة وتاكل قصب ابو سبعين وتشرب المويه بالجردل لازم تعيش عيشة بطر والسعر حيبدأ من 3 مليون وانت طالع والله يا بلاش دا فطور عريس يا جماعه مو خروف سماية ولا فزع الغالى بى غلاتو وتقولو لى عادات دخيلة ياربى بتكون دخلت من وين والله الهنود ناس العادات والتقاليد الغريبة وعجيبة قالو يطرشنا ما سمعنا بى موضوع زى دا للاسف ما قدرت انزل ليكم صورة الخروف لانو بصراحه ما عرفت
ههههههه

من قلة المخالفات في البلد!!





ثم .. مين جرتق الخرووووف؟

سلامات يا فتحى,,,

ليست جديدة وليست قديمة وقد تكون من إشراقات وإفرازات مشروعنا الحضارى
وتخريبه للمفاهيم وجحافل الأغنياء الجدد وتقليعاتهم وموضاتهم الغريبة التى
تعكس ما وصل إليه الحال,,

داقين فيها حجر دغش؟؟؟

والخروف الأكبر من المجرتق القبضوه ناس الحركة دا بكون العريس شخصيا,,
بام عينى شفت لى موكب فطور عريس فيهو أكتر من عشرة دفارات يتقدمه موتر
تشريفة لفتح الطريق وعدد كبير من الفارهات يا حبيب!!!!!!!!!!!!!!!!


تحياتى,,

الأخوان
محمد عبدالماجد الصايم
وأيمن الطيب

والله أنا منذ السبعينيات وحتى إغترابي منذ عام 1995م وده غير زياراتي للسودان كل عام لم أرى مثل ذلك وحتى الآن ما متخيل الشكل

ياريت واحد يمدنا بصورة حقيقية

ولكم شكري

Quote: ياريت واحد يمدنا بصورة حقيقية

تقصد صورة خروف مجرتق ؟؟؟
فى الأرشيف أكيد طلبك موجود,,

ما كانوا يتموا الموضوع بنعجة مدخنة دخان شاف وادوها شوية خمرة و ألبسوها فى نصها فركة قرمصيص .

القروش المامتعوب عليهاوالمخلوعين وما مستحملين النعمة كتيرين باين لى ربنا يقدرنا نستحمل ونشكر نعموا

أيمن الطيب

هاك (الجرتق ده) ههههه




الأخ/ محمد أحمد سعيد (زي ما بيقولوا عشنا وشفنا)

يا نقد,,,

Quote: أيمن الطيب هاك (الجرتق ده) ههههه

أنا والله خروف مجرتق شفت باقى لي أشوف النعجة المدخنة ومحننة دى ياها الجديدة!!!!



حاجة تجنن..

الأخ أيمن والأخوة المتداخلون

أثناء بحثي عن صورة الخروف المجرتق (بالقوقل) أيضاً وجدت أحدهم قام بتعليق وإسمه (ود كرموش) موقع سودانيز أوت لاين

ود كرموش
26-12-2009, 10:19 PM
وصلني شريط عرس وفيه خروف جرتق والله الخروف الا فاقد العروس
مجرتق ولابس فركة وكمان حريرة
والبنات يغنن ليه خروفنا زينة وحالف يعشينا
أها ياناس دا كلام دا ؟

أيضاً

في منتديات العيلفون وتعليق أحدهم بإسم (ود مانديد) وجدت االآتي:




وكتب معلقاً


للشعوب طرائق شتى في الاحتفال بطقوس الزواج، وقد راجت في بلادنا مؤخرا ظاهرة «فطور العريس» التي تبارت فيها النساء على نحو محير،
ومنها ما ترويه جارتنا عن بعض قريباتها حيث حملت «فطور» عريس ابنتها في«37» جردلاًا,مملوءًا بمختلف اصناف الطعام ومجموعة كبيرة من الأطباق التي تحوي العديد من أنواع الخبائز والحلويات،
أما الخروف المصاحب للفطور فهو وحده حكاية، فقد أصرت على أن يكون أبيض اللون، وعمدت لغسله بالماء والصابون، ثم طبقت عليه نظرية «الميك اب» بطلاء فمه «بالروج» وزينته بخمس «باندات»
في أقدامه الأربعة وذيله، ولم تنس أن «تجرتقه» بوضع الحريرة على أذنه، هذا الحال يُخشى معه أن يضع تجار المواشي أسعارًا خاصة لخروف فطور العريس،
فيصل الخبر لناس الضريبة فيبتدعوا بدورهم ضريبة خروف فطور العريس، ومن يدري ربما تطور الأمر لإنشاء إدارة عموم ضريبة خراف فطور العريس،
ترى كيف تعاملت أسرة العريس مع الخروف المدلل، هل تم ذبحه في وليمة العرس أم وُضع في «فترينة» للعرض؟
وللا إيه؟ --------- غايتو الماعرس اخير يستعد لأي بدع زي كدا

Quote: «الميك اب» بطلاء فمه «بالروج» وزينته بخمس «باندات»

دا لو لمو فيه ناس النظام العام كان لى هسه بجلدو فيهو!!!

أما ناس أمن السودان فأكيد حا يقومو بإجراء اللازم من الأجراءآت المتعارف عليهالديهم

جابت ليها مسخرة خرفان كمانّّّّّّّّّ

المخالفة دي يكون عشان الخروف كان بيتكلم في الآيفون أثناء ما عربية فطور العريس متحركة

Quote: المخالفة دي يكون عشان الخروف كان بيتكلم في الآيفون أثناء ما عربية فطور العريس متحركة

هههههه حلوه يا فيصل والله لغاية اللحظة مندهش

طبعا ده غير ليلة (سد المال) بقينا نشوف فيها العجب (دولارات وريالات ويورو) على أنواع من القوالب ؟؟

يا جماعة الخروف كمان علمو اللحس!
غايتو ناس المشروع بسو العجايب.