عندما قالت لي زميلتي الاسرائيلية (نحن حنشرب كوفي مع اولاد الخرطوم)

زميلتي في العمل شخصية محبوبة جدا من كل زملاء العمل و بشوشة لاقصي الحدود. و بحكم انها اسرائيلية و تتحدث العربية قليلا فدائما تحاول ان تتحدث معي بالعربية و ترجمة بعض الكلمات بين العربية و العبرية. فمثلا عرفت منها انهم يسمون العدس (عداشيا) و رأس السنه (راشاشانة) و كذا هلم جرا.
في عيد الهلاوين الفات اقترحت لي انها ستلبس الزي المغربي و لي ان البس الجلابية السودانية و لكن اعتذرت لها عن الجلابية و اكتفيت بالطاقية الافريقية المزركشة و في تلك المناسبة اخدنا صورة مع بعض بزيها المغربي (بسم الله ما شاءالله)

كنت لفترة من الزمن كلما اجد موضوعا عن اسرائيل اجيب ليها الموضوع و اسألها (ايه البيحصل هناك) و تقوم هي تشرح لي ما جري و ما يجري بخصوص الموضوع.
من ضمن المواضيع التي سألتها عنه كان بخصوص حادث (بصق) علي وجه بنت صغيرة في طريقها الي المدرسة من قبل بعض المتديين المتشددين لانها كانت تلبس ملابس غير محتشمة في نظر رجال الدين و قد اوضحت لي ملابسات الحادث و عن الخلفية الدينية لتلك المجموعة.
مرة اخري كان سؤالي لها عندما تظاهر الشباب الاسرائيلي ضد قرار استثناء بعض الشباب من العمل في الجيش الاسرائيلي و هم شريحة من الشباب الذين اختارو دراسة التوراة لتأهليهم في المجال الديني الدعوي فقط و بذلك حسب القانون الاسرائيلي مثتثنين من اداء الخدمة العسكرية. المظاهرة كانت ضد هذا الاستثناء و قد اوضحت لي سبب تذمر الشباب.

عموما قبل اسبوعين عند حادثة اليرموك السودانية فضلت الا اذكر لها الحادث تفاديا لــ دقيتونا و ما دقيتونا .
قبل يومين جاءتني و سألتني (انت من السودان مش كدا)
You are from Sudan. Right?
قلت ليها بسم الله الرحمن الرحيم يا فلانة. انتي ما عارفاني انا من السودان و كمان في دارفور و كمان عندي ود عمي في بلدكم و تحت حمايتكم. الجد شنو.
قامت ضحكت و قالت لي:
Yesterday my husband brought a magazine
و انا قريت فيهو انو دقيناكم و عندكم مصنع بتاع سلاح برضو دمرناهو ليكم.
قلت ليها النصيحة لله ده الحصل لكن لو غيرتي كلمة دقيناكم دي لحاجة اخف شوية بتكون مقبولة شوية.
ضحكت تاني و قالت لي المرة الجاية عايزن نشرب كوفي مع البويس في الخرطوم.
قلت ليها يعني شنو كلامك ده؟ هل معناتو بتكشفي لي اسرار حكومتكم و تحدي عديل كده كان قدرنا نوقفكم
ضحكت و قالت ما تكون سيلي. انا بقصد انو الجكس الاسرائيلي بحب اللون الاسمر و عشان عايزين سلام معاكم عشان كده في المستقبل بدل الصواريخ دي عادي نكون في سلام و بناتنا يشربن كوفي في الخرطوم و الاولاد برضو لو عايزين.
قلت ليها غايتو السلام ما بناباهو خصوصا مع الجكس الا اولادكم ديلك خلوهم بعيد بعيد.
قعدت و فكرت انو زمان الناس (ألرجالة) خلو كلو شئ و مسكو في موضوع انو قرنق عايز يشرب قهوة مع بنات البندر و عشان كده حلفو دين و ايمان انو ما يحصل. هسي يا جكس السودان الدور جاكم ان شاءالله كان حلفتو دين و ايمان انو ما في جكسويا تشرب قهوة مع البويس حقنكم.
اها رأيكم شنو يا ناس في موضوع السلام و شراب القهوة مع اولاد الخرطوم و ما اظن ناس الاقاليم انكلوديد و برضو الناس الزينا (فقد هرمنا) ما انكلوديد لكن تمنياتنا للجيل الجديد ان يستمتع بلحظات كتلك.

بوست مرح وفيه انسانيه ..
اليهود مسالمين وبالطبع هنالك متشددين في كل الشعوب ..في الغالب اليهود علي قدر عالي من الانسانيه والذكاء ..
شكرا اخي محجوب . ..

محجوب هوووي ما تعمل فيها غمران ..
دى وزيرة خارجتها شربت قهوة بنكهة الجنزبيل مع كبارات بني يعرب ..
أخد ساتر.

Quote: بوست مرح وفيه انسانيه .. اليهود مسالمين وبالطبع هنالك متشددين في كل الشعوب ..في الغالب اليهود علي قدر عالي من الانسانيه والذكاء .. شكرا اخي محجوب . ..

شكرا اخ محب علي المرور و كونك اول المتداخلين و كون البوست مرح.
اتمني ان يجد قسطا من القراءة و ان يكون سببا للسلام الدائم بين الشعوب.

محجوب

والله ناسنا ديل لو لقوها مابيابوها قول ليها متين عشان يستعدو ليكم

Quote: دى وزيرة خارجتها شربت قهوة بنكهة الجنزبيل مع كبارات بني يعرب ..

اهلا بالهبيب محمد طه الملك
يا اخي ناسنا فكوها علي الحديدة ايام الفلاشا
قهوة لوجه الله ما فيها عوجة

مرحب بالقهوة و الكوفي في الخرطوم و ان شاءالله ناس الاقاليم ظاتم انكلوديد

Quote: والله ناسنا ديل لو لقوها مابيابوها قول ليها متين عشان يستعدو ليكم

الهبيب سيف
زميلتي تقصد كل الخير لشعبينا و هي كانت ممتعضة لما تعرض له بلدنا السودان من قبل دولتها و تمنت ان يأتي اليوم الذي سوف يتصافح الناس و يشربو القهوة و الشاي في اي مكان يختارونه.

يا مهجوب
الصورة دي في اوماك وللا عفراء و للا وين بالضبط؟
بعدين جماعتك زمان قالوا شندي ما الخرطوم افرز يا هبيب.

يا استاذ دى بضاعة استراتيجية هامة !!!!.

Quote: يا مهجوب الصورة دي في اوماك وللا عفراء و للا وين بالضبط؟ بعدين جماعتك زمان قالوا شندي ما الخرطوم افرز يا هبيب.

الهبيب سيف
الصورة دي يا مان بتكون في قطر التي اختارت الصداقة البينة علي العنترة الفاضية او ربما حارسات الراحل ملك ملوك افريقيا في احدي زياراته للسودان قبل بناء عفراء مول

المفنوسة رقم ٢ من الشمال دي انا حاجز ليها في طرابيزتنا




ناري الليلة و ناري




قال حسن عيسى قال

مرحبا فى بلدكم الثانى بنات نبى الله اسحق. أبناء عمكم- ابناء نبى الله اسماعيل فى السودان- يرحبون بكم ايما ترحاب. بس صواريخ وطاخ طيخ نهى.
هههههه.
معا للسلام مع كافة شعوب الارض.
.
.

سلامات محجوب

Quote: يا استاذ دى بضاعة استراتيجية هامة !!!!.

الهبيب سيف الاخر
ايه الحاصل يزوروني ثلاثة سيوف في وقت واحد (سيف مساعد و سيف النصر و سيف الدين).
عايزين تجاهدوني و لا شنو!
اني غلبان يا ناس

Quote: المفنوسة رقم ٢ من الشمال دي انا حاجز ليها في طرابيزتنا

الهبيب فيسل
انت و ود شيقوق و ود ايسا كلكم بينطبق عليكم (هرمنا) و لذلك لا في اليمين و لا في الشمال فيش كوفي.

سلام محجوب عبدالله والله ظريف وبوستك سبق صحفى !!!لكن الصواريخ دى ما كان يفكوها مع الاستقلال عشان لما الجكسويات ديل يجن للكوفى يلقننا (يادووب أتخرجنا من كلية الشرطة ) ونشرب معاهن (الكوفى الماخمج ) طبعاً ولاننا أشتغلنا فى بداية عملنا فى جوازات مطار الخرطوم من تأشيرة الدخول بعد أن نعدل حكاية ممسوح الدخول لأبناء نبى الله يعقوب وبناته نقول كده ندق الحنك خاصه أن الفوج الاول بكون (ما بتصاقع فى العربية ) !!! غايتو متأكد المجموعة الاولى دى ما بترجع فيهن واحده قبال ما تقول (عايزة طين البحر أو دومة مره لزوم الموضوع المابجييب سيرتو ) لكن ما بالدس بالحلال وكده وبالرضا وبالدرب العديل وتبقى الزيارة زيارات !!!ياربى أنا فى حلم والله فى علم !!! والله موضوعك سبق صحفى وتحياتى لزميلتك .

Quote: رأس السنه (راشاشانة)

\

ورشاشات يعني شنو عندهم؟

Quote: مرحبا فى بلدكم الثانى بنات نبى الله اسحق

الهبيب امبده
شكرا علي المرور و الترحيب بيهن و عارفين كل اولاد الخرطوم ما بقصرو حتي ناس البطانة ود شيقوق و ود حلفا القديمة لكن عليكم الله شفتو لهسي و لا واحد كعب عالي ما هوب بهنا.
تاري نحنابس الشايلنا الهاشمية و كل ما واحد سيرة السودانية في خشمو نقوم نشيل عكاكيزنا.
دحين نقول البنوت بتاعين الكلاشات ديل عايزات يشربن قهوة مع اولاد الخرطوم نهارا جهارا و ما في واحده فيكن تقول بغم.
الفيكن اتعرفت

اخي محجوب


مشكلتنا انو عاملين اعرب من العرب وفلسطينيين اكتر منهم

يقول المثل التركي ولا المتورك


ياخي نحن بعيدين من المشكله بتاعة العرب دي لا شكلهم ولا بنشبههم

احسن يخلونا في حالنا

ونعيش حبايب مع الجماعه ديل ومع غيرهم

قلت لي شنو يا فيصل ؟؟؟

الهبيب محجوب،

سلام،

والاسرائيلية زميلتك دى يا تكون (بتفسهى/ تفسح) فيك ياتكون انصار سنه يهوديه!
ياخى معقوله بس .. حلنكبيش إسرائيل يجن من تل ابيب مهبه فى عيال سودان مهمشين او من المركز ويدشن مهبتهن ب(كوفى) ياخى ماكان أغير ليهن جبنة أثيوبيا حيث الخضرة والجو الحسن (: !!

باأخى دى محبه (نبتاتيه) ولاجايبه راس ماله.

المهم قول ليها لن نقبل بغير ال (shaken not stirred) وورينا رايا شنو!

تحياتى ياهبيب.

والله اسمارت ياخالد كودي....سلامات محجوب وضيوفه الافاضل

Quote: اخي محجوب مشكلتنا انو عاملين اعرب من العرب وفلسطينيين اكتر منهم يقول المثل التركي ولا المتورك ياخي نحن بعيدين من المشكله بتاعة العرب دي لا شكلهم ولا بنشبههم احسن يخلونا في حالنا ونعيش حبايب مع الجماعه ديل ومع غيرهم قلت لي شنو يا فيصل ؟؟؟

that why we lost the moon while counting the stars

Quote: عملنا فى جوازات مطار الخرطوم من تأشيرة الدخول بعد أن نعدل حكاية ممسوح الدخول لأبناء نبى الله يعقوب وبناته

اهلا بــ ود السقاي و دعني ارحب بك في هذا الوطن الاسفيري و الذي لا يحتاج الي تأشيرة دخول. الغريبة تماما في اسفير السودان احيانا مكتوب (كل الوبسايتس ماعدا سودانيز اونلاين) و لذلك ربما هناك علاقة ما بين هذا المنبر و تأشيرة دخول اسرائيل.
عموما ندعو الله ان ينعم علينا بالسلام مع كل شعوب الارض و الا نعادي الاخرين.

Quote: ورشاشات يعني شنو عندهم؟

العزيز عثمان
انا دائما بسأل ليه المريخاب بسمو الهلالاب (رشاشات) رغم انو الهلال دائما مرشوش.
تاري الشغلانة عندها علاقة برأس السنه اليهودية التي تعتمد علي الهلال

Quote: ياخي نحن بعيدين من المشكله بتاعة العرب دي لا شكلهم ولا بنشبههم احسن يخلونا في حالنا

العزيز طارق ميرغني
شكرا علي مرورك الكريم
الحقيقة ليست المشكلة في عروبة البعض او احساسهم بمعاناة الفلسطينيين. المشكلة في رأي تكمن في ان هؤلاء يستمدون الواقع الوهمي الذي صنعوهو من محاولة تحقير الاخر.
و في كل الاحوال معا لان نجعل خيار السلام هو الاول.

Quote: ياخى معقوله بس .. حلنكبيش إسرائيل يجن من تل ابيب مهبه فى عيال سودان مهمشين او من المركز ويدشن مهبتهن ب(كوفى) ياخى ماكان أغير ليهن

الهبيب خالد
شكرا لمرورك الكريم يا اخي و زي ما قالت الزولة دي انو عندهم معزة خاصة للسودانيين بس بتقول لينا نطلع من حكاية اولاد عمهم ديلك و الامور حتسلك ان شاءالله.

Quote: that why we lost the moon while counting the stars

العزيز جلال الدين
شكرا لمرورك الكريم
ظننت انك من القادمين الجدد و لكن بمراجعة البروفايل لقيتك Veteran
وينك الزمن ده كلو و ما ظاهر
عموما مرحب بقلمك اضافة حقيقية لهذا المنبر

لكن يا اخي حكاية النجوم و القمر ده اوعي يكونو لينا زي هلال و مريخ اللي في الواقع
We lost both of them

Quote: والله اسمارت ياخالد كودي....سلامات محجوب وضيوفه الافاضل

ابن النخيل
اهلا بيك و شكرا علي المرور

*

يقال انه في احدي اجتماعات جامعة الدول العربية ان اقترح الرئيس المصري السابق اضافة السنغال الي جامعة الدول العربية في شخصية رئيسها السابق عبدو ضيوف.
فما كان من ممثل سوريا في الجامعة العربية الا ان قام و قال هذا الكلام:
السودان ابلنا
الصومال ابلنا
بس السنغال هذا ما يصير

و نحن هنا بدورنا نقول لاسرائيل
الصواريخ ابلنا
الجكس الاسرائيلي ابلنا
بس الصقور هذا ما يصير