مشاهد ليست للمشاهده..!!

مشهد ومشاهد..العايز يشاهد ممكن.. والماعايز ممكن يشهد على المشاهده الحاليه والمشاهدات اللاحقه...مشاهد من الان ومن الامس ومن الغد برضو... اي زول عندو مشكلة بتاعة مشاهده ممكن يشهد انو عندو مشكله في الموضوع ده...واي زول عندو مداخله ممكن يكتبها وهمه في شكل " كك" ...واي زول ما بيخاف من مرتو يرفع ايدو!!
نزل ايدك يازول ..عامل فيها ضبان ضكر...اليوم داك جيت ماشي جم بيتكم لقيتك موقفنك اداره داخليه.. والوليه بتاعتك شابكاك وين حق اللبن ووين حق الفطور ووين حق الصابون...قاعدين يحقحقو فيك لمن طلعت الحقه (بضم الحاء وفتح القاف مع التشديد عليها)...اقعد ساكت وماترفع ايدك...
قاعدين لينا سنين هنا ...نعاين ونتمطق...تفتح خشمك يفكوك بي طوبه ..لمن الطوب الوراي لمن اتلفت لقيتو يبني ليه اوضه (4ْ في 4).
وهمات عجيبه...ماشين جنب الحيطه وخايفين المطره تصب(بضم الصاد)..تكتب حاجه تسمع فارغه..تقول رأيك تجيك طوبه...فترنا من النغمات دي..نمسك ابنصات تاني عشان تسمعو صوت الجاز ده...اسمعوا التقسيمه دي اول حاجه...صوت البخاخ ايقاعو "ريقي" مش روك..الواحد ما فاضي للياي زاتو ..يجي "مساعد" الياي يعمل ليك فيها "شكبزور".
المشاهد ممكن تكون فيها سخانه شديده...والسخانه بتجيب حمار "بفتح الحاء والميم"..فاي واحد حايحس بي سخانه يجيب معاهو تلج...لزوم التبريد والترطيبه..والاخيره لينا منها زمن لكن لسه عشمانين في واحده قدام بيتنا وبيت ناس هناي.

الابنصات دي ما للكل...لي جزء من الكل...لكن المشاهده لاعضاء المنبر والمنابر الجنب المجاوره.

مشهد اول.

ماشي اجيب تلج وجاي

اجازه لمدة اسبوعين من العمل ..تلزم رب الاسره على المكوث بين جدران المنزل..انقضى منها يومان...وبدأ الملل يتسرب اليه ..يلجأ الى الانترنت...ويجد فيه ضالته.
انقضى اليوم الاول معظمه امام شاشة الكمبيوتر..تخللته فترات للصلاه واخرى لتناول وجباته...الزوجه تناظر على مضض .
يوم اخر ..والحال ياهو نفس الحال..ويزيد امتعاض الزوجه.
يوم جديد...واصبح تفاعل صاحبنا مع الانترنت يزداد...الزوجه تمش يجيئة وذهابا..وفجأه جرس الباب يرن.
ياراجل الباب
كويس..ياخي وين البت الشغاله.
دخول لضيف مع زوجته واولاده ...سلام وتحايا حاره "في غاية البرود"...سريعا سأله من اخباره...ووضع "اللابتوب" على رجليه..وهاك يا متابعه.
الضيف المسكين...يتملكه الحرج...فاجابات صاحب المنزل مقتضبه.ليشعر ضيفنا العزيز بالحرج الشديد...ويقف مستأذنآ وينادي على زوجته واولاده..وداع على السريع لركب الضيوف..يجلس صاحبنا بعد ذلك على شاشته.
فتبدأ "النقه"
يا راجل بالغت
شنو
بالغت الراجل قاعد معاك وانت قاعد تطبز لي وما شغال بيه.
تطنيشه
انا بتكلم معاك...ياراجل انت جنيت..ياخي انت زي كانك ماقاعد في البيت..انت مافاضي من السجم ده..انت فيهو شنو الهناي ده قاعد مدنقر كده.. انت انت انت نقه شديده.

الكلام ليك يا المنطط عينيك.