اعصار ساندي الاعصار الاعتي في التاريخ بالصور

حكام الولايات الواقعة في طريق مرور ساندي الخطير
كلهم في حالة أجتماع مستمر .
وكلهم أعلنو حالة الطواري وجادين في اخلاء مناطق الساحل وبالقوة من السكان .
ربنا يسلم الجميع

عالم الارصاد الأمريكي المخضرم بريان نوركروس وصف الاعصار
وصف مخيف . وكرر خوفو علي مدينة نيويورك وقال نيويورك من المدن المنخفضة جدا .
والله جد كلام مرعب

غايتو أقبال الناس علي شراء الكميات العجيبة من العيش والدقيق والموية
والاكل الناشف والبطاريات + كلام ناس الارصاد و وصفهم ليه بي ال Superstorm وال Storm Of The Century يخلي الزول يفكر في الشردة بس الزول يشرد وين
و الكتير من مطارات الساحل الشرقي اتسكرت بالطبل الكبار .

ربنا يلطف بينا يا عثمان موسي و يجعله خفيف علينا.

تحياتي و كل عام انت و أسرتك بالف خير و عافية

ربنا يستر عليكم ويغطيكم
علا:

Quote: غايتو أقبال الناس علي شراء الكميات العجيبة من العيش

برضو انتو بتسموه العيش؟ يا سبحان الله
نحن هنا المتخلفين ديل بنقول الخبز ههههههههههه

عيدكم مبارك
وكل سنة وانتو طيبين

الله يستر عليكم ويغطيكم وستكونون بخير بإذنه.

يا حفيظ احفظ
ان شاء الله برداً وسلاما يا عثمان
وكل سكان الولايات التى تمر بها الكارثة
الله يغطى عليكم،،،

عزيزنا شول
سلامات
ياخ حظكم لسع بتمشو فول السندباد بتاع الخرطوم 2 العجيب دأك مع الجماعة . ؟
ياخ اعصار ساندي جهجهنا عديل اليومين دي .
ربك يستر

عزيزنا ود الشيخ
سلامات
الخبز يا أخوي الليلة طار رقبتو دي .
NO خبز
NO لحوح
ربك يلطف بالعباد

عزيزتنا هبة
العيد مبارك عليك
وربك يبعد الخطر البتحدث عنو مركز الاعصار بعد ما أرتفع المد الي 12 قدم .
الساحل الشرقي من حدو لي حدو في حالة طواري غايتو شوفي ليك حلة كرارة جامدة تكفيكم أسبوع .
ربك يستر علي الجميع

الاستعداد لساندي:






ما خلوا كيس (خبز) حايم ... نضفوا ارفف المحلات
نسأل الله لكم السلامة الاخ عثمان

عزيزنا صديق الموج
سلامات
والعيد مبارك عليك والأسرة الكريمة
موية المحيط يا صديق ضاربة فوق
الموج دأفر زي الجبال أهم شيء الكهرباء لوقطعت في البلد دي مصيبة كبيرة .
ربك يهون علي الجميع

عزيزنا مهدي
سلامات
مافي دسكاونت تشتري وتتخارج بسرعة ده لو لقيت حاجتك
الكبسيبة دي يا مهدي من كم يوم قبل وصول الاعصار ساندي .
مشتروات ما حصلت في التاريخ .
خوف عجيب من أنقطاع الكهرباء
شايف ؟
شايف الصور بتحكي كيف حتكون قصة ساندي ؟

ربنا يحفظكم من كل شر يا عثمان

وصف خبير الارصاد مخيف ومزعج جدا

هات اخباركم يا عثمان لحظة بلحظة

Quote: مافي دسكاونت تشتري وتتخارج بسرعة

لو الشي دا عندنا ... المحلات كانت حتستغل الوضع لتلهب ظهر الزباين برفع الاسعار
ان شاء الله ساندي دي تطلع دعاية ساي وكلام تلفزيونات - على وزن كلام جرايد- مرات بنسمع انو الاعصار خفت حدته بعد وصوله البر وتصنف بعدها في درجة اقل على مقياس تصنيف الاعاصير


ساندي عاثت فسادا في منطقة الكاريبي:



... الود دا لحق كيبورديهو:

عزيزنا ودشيقوق
سلامات
القصة صعبة تب يازول
الشعفوفة يا الطيب طيرت دجاج نورث كارولاينا لا عند تورنتو .
يازول هبوب البلد دي تاكل عالي وأطي .
ربك يسلم الجميع

غايتو يا مهدي
شافع هايتي ده لو ما قدر يخمش كيبوردو
كان هسع كنا جدد نا كيبوردينا المسهوك ده .
مسكين شعب الكاريبي
كل سنة كل سنة مجلودين سنة اعصار وسنة زلزال وسنة أسهالات .
ربنا يكون في عون شعوب جزر الكاريبي
أهو الامريكان عندهم ضهر قوي ومستعدين لفعايل الطبيعة . بس الناس ديل مساكين لاحدي ما ميتين بالمسكنة
تخيل جزر كلها مهددة بالمسح وهم برضو ولا هامين ضاربين الشربوت وحادرين لساندي .

ظنيتو حيكون ليل طويل من الخوف والضلام في بعض مناطق جورج تاون وماكلين والاكساندرية فرجينيا
وبعض المناطق في بالتمور والعاصمة وأشنطن

سلامات عثمان
حتى الان الاحوال هادئة جدا الساعة 3:38 صباحا هل هذا هو الهِدؤ الذى يسبق العاصفة
الله يستر

اللهم الطف بعبادك انت بيدك الحول والقوة

يا محمد الشيخ
ونحن كمان ما بنقول لا عيش ولا خبز ولكن بنقول رغيف.. وكلمة خبز دي اظنها كلمة عربية فصيحة وبستعملوها السودانيين في يالدول العربية لكن هنا عودنا اصحاب الدكاكين من اليمانية والمصريين والأتراك بكلمة الرغيف والعيش..
وكل سنة وانتو طيبين
والله يديك العافية
وشكرا عثمان موسى لهذه الأخبار ونحن متابعين البوست عشان نعرف اخباركم في نيويورك ومتابعين التلفزيون وسمعنا هسع قبل شوية ان جزيرة تمثال الحرية غرقت والموية وصلت فوق ركبة التمثال ..
وطبعا نحن في كونتيكيت برضه ما قادرين نعاين حتى من الشباك عشان الأبواب والشبابيك حتطير بعد شوية
والله يديك العافية

عزيزنا عبدالحكم
سلامات
وياخ دعواتك القصة محتاجة دعوات ماكنة دعوات قوية
الاعصار مهدد حياة الناس دي حقيقة .
قوة الطبيعة عجيبة يا عبدالحكم
ربك يهون

عزيزتنا أميرة
سلامات
وربنا يسلمك ويسلم شبابيك كناتيكت الجميلة ونيوهافن الحبيبة
نيوهافن دي عالم مدهش مدهش .
مكتفين يا أميرة قدام الشاشات بنتفرج علي 280 شاشة أمريكية كلها بتتحدث عن ساندي
و ساندي كاسح كسحان ما حصل في التاريخ . ساندي عاصر عصر الجن ساندي الاعصار القاتل زي ما هم قالوا مكتفنا
ومكتف الدنيا كلها
ربك يسلم الجميع

أكتمل تحويل جميع الطائرات الرابضة في عموم مطارات الساحل الشرقي
الي مطارات الولايات القريبة اليابسة .

تحذير شديد اللهجة في نيويورك من تعرض الناس للجرئمة عند الخروج
للمناطق المظلمة بعد قطوعات الكهرباء . تحذير من ما حدث من مشاكل عند قطوعات الكهرباء في العام 2003

غرق السفينة "إتش.إم.إس باونتي" بسبب الإعصار ساندي


لحظة غرق باونتي



تسبب الإعصار ساندي في غرق السفينة "اتش ام اس باونتي" وهي إحدى أشهر السفن الطويلة في العالم أمام سواحل ولاية "نورث كارولينا" بعد أن تركها طاقمها.

ولا يزال اثنان من طاقم السفينة مفقودين بعد إنقاذ 14 شخصا تم اصطحابهم إلى محطة جوية في مدينة إليزابيث سيتي في نورث كارولينا. والسفينة الغارقة التي تزن 400 طن صورة طبق الأصل من السفينة الأصلية التي ظهرت في فيلم "تمرد على السفينة باونتي" من إنتاج شركة "ام جي ام" عام 1962 للنجم مارلون براندو. وظهرت السفينة في عدد من أفلام هوليود مثل "يلو بيرد" و "جزيرة الكنز" و"قراصنة الكاريبيان" للنجم جوني ديب.





مرة اخرى الدعوات لكم بالسلامة

عزيزنا دبس
دبس الرجل الناشط في كل ما يفيد الجالية السودانية
ليك السلامات ياخ .
السبب البصحيك يا دبس لي هسع تب مو ساهل "
3 صباح ؟
ياخ الزول يتوقع تجيو نخلة طايرة بالشباك من هايتي في أي لحظة .
يا دبس عندنا صديق في ميامي جاتو غرفة نوم وفريزر بي البلكونة وبحالة جيدة .
الاعاصير في البلد دي عجيبة
ربنا يسلم الجميع

عزيزنا مهدي
بعد التحية
أكيد بتكون تابعت الحصل في Atlantik City
أتلانتك سيتي غرقت غرق عجيب . ياخ حاول جيب لينا صور أتلانتك سيتي .
الناس هناك تعبانة
والحالة صعبة

نهر تومس في نيوجرسي درس الطبيعة العجيب
كيف تبدل حال النهر الهادي الجميل ؟ حولا

عزيزنا عثمان ما تشوفوا شر وربنا يحفظكم.
آمين

محبتي

الأخ عثمان
نسأل الله أن يحفظكم جميعا
ايام وتعدي شدو الحيل واعملوا حسابكم

Quote: 101 قتيل و6.5 مليون شخص بلا كهرباء بسبب "ساندي" نيويورك، الولايات المتحدة الأمريكية (CNN)-- أعلنت السلطات الأمريكية، فجر الأربعاء، أن الإعصار "ساندي" حصد لغاية الآن 101 قتيل، منذ أن ضرب السواحل الشرقية للبلاد قبل ايام، بالإضافة الى التسبب بقطع الكهرباء عن 6.5 مليون شخص، في أحد أسوأ الأعاصير التي تمر بها الولايات المتحدة الأمريكية.

Quote: وكانت مدينة أتلانتيك في نيوجرسي الأكثر تضرراً، حيث أصبحت عبارة عن امتداد للمحيط الهادئ

Quote: وعلى طول شاطئ اتلانتيك سيتي كانت الكازينوهات والحانات والفنادق التي تستقبل كل سنة أكثر من ثلاثين مليون زائر مغلقة وقد اوصدت أبوابها ونوافذها بألواح الخشب واقامت حواجز من اكياس الرمل وأغلقت الشرطة جميع الطرقات المؤدية الى المدينة.

Quote: توقف الحياة فى مدينة اتلانتك سيتى الأمريكية بسبب إعصار ساندى

Quote: توقف الحياة فى مدينة اتلانتك سيتى الأمريكية بسبب إعصار ساندى واشنطن :د ب ا توقفت آلات لعب القمار عن العمل فى مدينة اتلانتك سيتى عاصمة القمار فى الساحل الشرقي الأمريكي أمس الاثنين بعدما ضربها إعصار ساندى حيث غمرت مياه الفيضانات الشوارع و مزقت أجزاء من ممشاها الشهير. وذكرت صحيفة نيويورك تايمز إن إعصار ساندى وصل ليلة أمس الاثنين بالقرب من نيوجيرسى حيث غمرت مياه بارتفاع 5ر2 متر نحو 70 إلى 80 % من الولاية . وتم إغلاق جميع الطرق المؤدية للمدينة بحيث لا يمكن لاحد دخول المدينة أو مغادرتها. كما فرض عمدة المدينة لورينزو لانجفورد حظر تجول حتى صباح اليوم الثلاثاء .

صور مفبركة لـ ساندي عبر فيسبوك وتويتر

حذف للتكرار

عزيزنا الفاتح ميرغني
سلامات
يا الفاتح مدينة أتلانتك سيتي شكلها بباح .
شكلها كان أسمها الثورة بس بفعل الطبيعة ما بفعل جماعة المشروع الحضاري .
أتلانتك سنة وأحدة وحتقوم أجمل
وكل عام والعالم بخيرين
لك التحية

عزيزنا الكرار
سلامات
اليوم يا الكرار مطار جون كيندي فتح لبض الطائرات
وشوية شوية حتعود الحياة علي ما كانت
لك التحية

عزيزنا الفنان مهدي
ألف شكر علي جلب الصور
كسح ساندي بعد أن ترك الريح تنوح فوق النخل .
واحد يا مهدي جاتو ماكينة قمار من أتلانتك سيتي في بيتو . تخيل ؟
هسع باكر دي يطلع فيلم عن ساندي يكسر الدنيا
تحياتي

الحمدلله على سلامتكم الاخ عثمان وعلى انجلاء الاعصار وبدء الحياة لطبيعتها


اخوك خبير كوارث طبيعية تخصص سيول ...من شدة ما ما خبير وعركتني السيول وعركتها في آخر سيول اجتاحت جدة بتا وقضيت ليلتي في مسجد بعد ان تقطعت بي السبل وعجزت عن الوصول للبيت وفي (سيل) سابق المشوار من المكتب للبيت والذي لا يستغرق سوى ربع ساعة بالسيارة اخد مني حوالي 6 ساعات والله العظيم وفي (سيل) أسبق زرتنا ليك السيول وأنا جاي من مكة ولا اذيع سرا اذا قلت انني مصاب بـ(دوار السيول) ...والله صحي ... الاسم انا قاطعوا من راسي .. مع حركة الموية بدوش طوالي ما عارف القصة شنو ... وعشان اتفادى التحديق والتركيز في مياه السيول الجارية بحاول اشغل نفسي بي اي حاجة ... ان شاء الله دندنة باي اغنية ... الناس بشموني ليك شديد ... لسان حال نظراتهم يقول: دا شنو الفايق دا القاعد يغني في عز البلوى النحنا فيها دي
سيول جدة لا تساوي شيئا من حيث القوة التدميرية اذا ما قورنت بجبروت ساندي لكن هذه السيول تفعل الافاعيل من وفيات لقطوعات كهرباء وجرف سيارات وقطع شوارع
دي صور بعدستي لسيول جدة:

Quote: كسح ساندي بعد أن ترك الريح تنوح فوق النخل . واحد يا مهدي جاتو ماكينة قمار من أتلانتك سيتي في بيتو . تخيل ؟ هسع باكر دي يطلع فيلم عن ساندي يكسر الدنيا

>>>>>>>>>>>>>>>>
اها يا عثمان يا دوبك عرفنا سبب ساندي شنو.. يا ها ماكينات القمار الفي اتلانتيك سيتي . . والقروش اشتتت للفقراء من فعل ساندي .. ومصائب قوم عند قوم فوائد..
. بس انت كان جاتك ماكينة قمار طائرة زي دي وزع قروشها على الفقراء والمساكين وما تشتري بيها عربية..
ولمن شفنا الصور المنزلها مهدي عن مدينة جدة قايلنها في البداية صور لحي العرب في نيويورك .. نفس الشبه والملامح
والله يديك العافية

يا مهدي العنوان المخيف ده كان من عناوين الصحف الأمريكية اليوم
Sandy leaves 50 dead . $50 b mess
بالخط العريض .
ما تتخيل يا مهدي حجم الدمار في الساحل الشرقي بعد يوم الاحد المرعب

أخ عثمان نستأذنك في صور


نجيبا ليك؟

عزيزتنا أميرة
سلامات
نيوجرسي الولاية الرخية والشبعانة يا أميرة الضلام فيها مستمر لاحدي يوم الليلة
نص الولاية جنريترات لشحن التلفونات وقهوة الصباح
ربك يلطف بالعالمين

عزيزنا جلال
سلامات
يازول البوست بوستك أدرع من صور ساندي علي كيفك .
أنا ما عندي معرفة في وضع الصور .
غايتو الاحوال شوية شوية ماشة وأكيد الشعب الأمريكي شعب نشيط و يحب التحدي ويحب بلدو وقادر علي
أعادة الامور .
لك التحية

يا ود موسى الصور أبت تب ضبطتها لي أقل من 40 وأبت تنزل

تكرار

سلام عثمان وضيوفـه..

والحمد لله الذى لا يحمـد على سـاندى ســواه..

أكتب هـذه المداخلة من تايمز اسكوير فى مانهاتن، ونحن فى جيرسى ستى حتى الان لا كهرباء لا موبايل لا إنترنت.. ظلام دامس مطبق ليلا ولا تسير سوى عربات الشرطـة من السابعة مساءً..
نفق هولاند مغلق، ولن يفتح إلا بعد حوالى اسبوع، المترو كذلك.. نيويورك من المنطقـة المالية والمدينة الصينية وحتى شارع 23 غرقانة حتى الان.. فجأة وجدت نفسى فى العصـر الحجرى
لا حول لى ولا قوة.. ملل وعدم مقدرة على فعل أى شئ.. هل هـذه الحضارة خدعـة كبيرة؟ وانها لن تصمد الى الابـد.. أكيد ان الجماعـة الأمريكية التى لا تستعمل وسائل الحضارة وتعيش
فى ولايـة بنسلفانيـا تسخـر منا هـذه الايام وتضحك علينـا.. واحد مصرى قال أمريكا عبارة عن فيشـة (بلك كهرباء) لو جريتو أنتهت..
الان اجلس فى مكدونالد تايمز سكوير، لأن الواى فاى مجانـا ومن الشباك الزجاجى اشاهـد اللواحات الالمترونية الضخمة التى تعرض الدعايات، فى بهرج ومظاهرة تكنولوجيـة لا مثيل لها، ورغم
ذلك فإن نظرتى لها تغيرت الى الابـد.. واراها تتدلى من السماء بخيط واهى سيقطع يوما ما..
المطلوب البحث عن بدائل طبيعيـة للطاقـة، واساليب جديدة لبناء المنازل والعمارات.. بالمناسبـة تايمز اسكوير، ساندى ضرت عمارة بين شارع 56 و 57 ، ناطحـة سحاب جديدة، قبل ايام فقط اجازتها سلطات المدينة
ووقعت على صلاحيتها، رمت كل الجدار الزجاجى من الطوابق العليا (من السبعين وحتى الثمانين).. والامطار تمت الباقى وقفلت الشرطـة الشوارع... غايتو ان شاء الله ما تكون المهندس الذى وقع.. راح فى
امات طـه.
اها راجع جيرسى وعلى الله نلقى فرصـة تانية للكتابة.

الحاجة الكانت معروفة ان (المؤنث) حتى لو فاس مابتقطع الراس لكن مع ساندي الوضع اختلف اذا ما نظرنا للأثر المدمر الذي تركته بعد ما وقفت البلد على كراع واحدة ، بعدين توقيت زيارتها والذي جاء في ذروة الحملة الانتخابية الرئاسية.
لو ما غلطان ادارة اوباما وُفقت الى حد كبير في التعامل مع ساندي وتداعياتها ومعالجة اوباما لهذه الازمة تصب في صالح دعم شعبية اوباما الذي اتبع الحكمة التي تقول العاقل من اتعظ بـ بوش-كاترينا
بحسب الانباء توقف الانشطة الاقتصادية يكبّد نيويورك خسائر تبلغ 200 مليون دولار يوميا والاخبار تقول بان الكهرباء بدات تعود جزئيا للكثير من المناطق ، سمعتا انو انقطاع الكهرباء أثر على النت ويوتيوب وجوجل اعتراهما بعض البطء لفترة والفضل لساندي


سلامات الاخ ابو الريش وحمدا لله على سلامتكم
الطبيعة ليها قوة جبارة والانسان مهما اتقدم في كل المجالات ضعيف امام جبروت قوة الله في الطبيعة


ريثما يتم حل الاشكال الفني الذي منع الاخ جلال من انزال الصور فليسمح لي الاخ عثمان بصور عن المطرة الجات وانا في مكة:


الحرم ... الجو طبيعي


تلبد الجو بالسحب والغبار






السماء وقد بدت صافية بعد توقف المطر



(الامواج المتلاطمة) دي فوق الكُبري في جدة

Quote: حتى لو فاس مابتقطع الراس

الاخت اميرة من الاستثناءات طبعا ... سمعتوا صوت حاجة اتكسرت ؟ دا تلج

شكـرا يا مهدى وبرضو عندى صور لكن الزمن..

بنزلها ان شاء الله قريب

عزيزنا أبوالريش
سلامات
المصري الوهم قال البلد دي عبارة عن فيشة ؟
أكيد ده حسب فهمو .
البلد دي مهما حصل من فعايل الطبيعة بس يفوتن أسبوعين والا أي شيء يكون أجمل من ما كان .
ياخ تتذكر الحصل في هروكين كاترينا ؟
تعال الليلة شوف نيواورليانز بعد الهروكين . تعال شوف المدينة بعد 3 سنة من الدمار الحصل .
الليلة طلبة هندسة المعمار من اليابان والصين بيجو يتفرجو في أطول جدار مانع للفيضانان في العالم . طول الجدار 133 ميل حايط نيواورليانز
من حدها لا حدها .
الجماعة ديل مستعدين ودايرين ساندي يجي تاني عشان تتجدد الحاجات .
وبرضو ساندي بجي بي خيرو يا أبوالريش . المطر خير
يعني ال 50 بليون دولار الراحت في نيويورك حتطلع من حصاد الزراعة في نيوجرسي .
ربنا يحفظ الجميع

من تعليقات صحف اليوم علي بعض الصور المعبرة في نيويورك
( Cars on wednesday drive through a street floode by superstom Sandy in staten Island . N . Y )