Post: #1
Title: ليه البلاد ما تُـستباح يوماتي كل ما الليل دخل؟
Author: DKEEN
Date: 10-24-2012, 10:30 AM
Parent: #0
شنو الفضل من حنك سيادة الدولة لهذه الدولة؟؟
شنو البخلي الناس دي تستوزر ناس وترميهم بالقاب زي وزير الدفاع وزير الداخلية ووزير الاقتصاد وماتعرف تعليم عالي..
والدولة لا فيها حربية لا فيها داخلية لافيها اقتصاد ولا تعليم عالي ولا واطي..
الله في سماهو ذاتو بكون هسي مستغرب من هذه المسميات مقارنة مع هذه الكمية من الانتهاكات..
آلهة الاشانتي نفسها بتكون مذهولة بصمود هذا الشعب الهجين غريب الاطوار طويل الصبر..
اما يخجل الصوارمي من منصبه..ام انهم لايقيمون اعتبارا للمتلقين من المواطنين الذين يخاطبونهم مدججين بدبابيرهم وتيجانهم على كتوفهم تملع؟
اما يملون تبريراتهم او يخجلون من تكرار الاسف واحتفاظهم بحقهم في الرد معلبا في مكان بارد زيهم؟
الناس دي صاحية ام على قلوبهم اقفالها؟
خليهو الصوارمي، اما نخجل انحنا من اضنينا ديل؟
هل انحنا صحي مخصيين في نظر الجماعة ديل ولا لي شنو بتعاملو معانا بهذه المرجلة؟!
صواريخ وطيارات وناس تكابس الحدود وناس تكابس الخرطوم وناس تمرق من الخرطوم وناس تموت في المستشفيات وناس تعيش شفتنة وناس تركب من طرف، وناس تاكل مال النبي وناس تاكل نار، وماتعرف تسعين الف زول بدق تاشيرة هروب شهرياً؟؟
شنو يخوانا؟؟
انتو دكيتوها قرباوي وماوريتونا؟؟
القصة دي رفعتو يدكم منها وقاعدين مشاهرة؟؟
يعني اضعف الايمان لو ماقدرتو تلمو البلد دي القو مخارجة لي رقبتكم من الجاييكم ده، انتو فلاحتكم في الدبارات ماقادرين تدبروا مخارجات لي رقابكم؟؟
ماهي البلد خلاص نشفت وعدمت نفاخ النار.. اها تاني حتحلبو شنو؟؟
بعدين وكت ماعندكم البعديكم البحر المالح ده، مالكم مال اسرائيل وحماس ياخي السماء دي انتو طيران الاهالي ده ماقادرين ليهو، مالكم ومال الناس البتنيش بي الريموت وبدون طيار؟
ياخ بطلو الملاوتـــات الانتو موش ماقدرها وبس..بل ومابتشبهكم اصلا..مالكم انتو مال حماس وفلسطين وايــران وكـ.... ام؟
دي سماوات ماعندكم ليها رقبة ولا رادار ولا لون ولا عرق ولا كرموزوم واحد..
اهو ديل مابتفاهمو معاكم ولا بخشو في مفاوضات او بحذروكم عشان تتوبوا الى بارئكم ..
ديل انتو عندهم لاتسووا جناح بعوضة..
يكون راس مالكم قرار من ملازم قاعد في معسكر في بيداء النقب..
اضرب يامعلم... يركب طيارتو كانو ماشي نزهة، واثق من انو السماوات مستباحة، والبلاد مستباحة ومافي زولا بقدر يفتح كنيستو..وماف زول بقول لا.
ولامن وجيع..
بتعاملو معاكم وكانما انتو زريبة في صي..وبعـر في زريبة
ما اكتر من جغرافية عليها شوية خمج وهرجلة وبقر وناس في بيوت وعربات وشوارع مخفجة وشفخانات واسم دولة اعتباطا جنوب خط 22 ش وبس..
بخمشوكم لا احم ولا دستور..
ياخ المستراح مابخشوهو زي مالناس ديل بخشونا!
لا احد يخشى من عاقبة رقيص الرئيس وخطبه الفارغة او من جعجعات ود محمد حسين والوعيد الذي تنوء به خطب الصوارمي..
ماف زول عامل ليكم حساب لانكم مجرد زبالـــة ونكرات مشتتة في مساحات السافنا..
زيكم زي أي شيتا أو زيبرا أو أي مُـكوِن طبيعي انشاته الجغرافية..
بتتنطعوا ساي في مجالس الامم ومنتديات العالم بي جوازات حمراء وانتو مجرد مجاملة كبيرة من عالم لايقل عنكم دناوة..
اهلكتم النسل والاهل والبلاد بوجودكم في الارض فلا بارك الله هذا الوجود ولا الارض التي تسعون عليها..
افهم بس انا؟ البخليكم تلاوو في العالم دي شنو وانتو كهربا ساي متلتلين فيها؟؟
البخليكم تلاووهم شنو وانتو موية شرابنا ماقادرين عليها؟؟
انتو عندكم مترو؟
طيب ياخ مالك والناس العندهم؟؟
انتو بتعرفو ترقصوا دبكة وتقولوا تؤبرني؟ طيب ياخ مال اهلكم انتو ومال الناس البرقصوها او البقولوها..
صلي صلاتك واعبد ربك وموت في مكانك.. ما تطنقع بي عروبية ماعندك فيها سنغل ميتين جين وراثي واحد..
يعني لو القصة دي ساي مشت عشائريات كما قبل العهد التركي موش كان اسلم للبدن واحفظ للفروج واكرم للسامعين؟!
مات الفاتح ود سوسن بت دولة خالتي في الغارة حقت امس..
مات لا ايد لا كراع..
قاعد في امان ربو قدام البيت فاخرجته شظية من اليرموك من امان ربه الكريم الى جواره الكريم..
بقرت شظية من مصنعهم العامر في وسط المعمورة بطنه فانتهى الى خالقه صبياً يافعاً، نضر الوجه بسوم..
ذخيرتها التي ربما كانت في طريقها الى غزة او جنوب كردفان..
الفاتح دنقلاوي ابا عن ام لايعنيه العرب في تخوم الضفة او في القطاع في شي..
مهموم بالشارع وضل البيت ..
ضحية هذا المشروع العروبي المشوه الذي لاعرق له فيه..
لولا ثكنات الجيش التركي الاول في دنقلا ربما ما ضمونا الى هذا المكون المتوتر يافاتح..
تنوح النسوة الان في حوش البيت في ابو ادم ..
ينوحن مرجعين امر النفس لله من قبل ومن بعد.. وإنا لله وإنا اليه راجعون
ينوحن كما اهل الضفة والقطاع....
فسبحان الله الذي جعلنا امه واحدةً وجعل الارض قطع متجاورات والالم واحدٌ منقسمٌ بين عرب 48 وعرب السودان..
وسبحان من جعل دم "فتوحي" تمناً لهذا الشأن الشائه..
وسبحان من جعل نواح الدنقلاويات في حوش في ابو ادم جزءاً من مشهد الضجيج والبكاء العربي العام..
(نحنا البلاد الشاكية جرحها للصديد ..
جاتنا القوافل بالضجيج..
ساقتنا من حلقة رقيص ..
ورتنا كيف كتلوا الحسين..
صلبوا المسيح ...
وبكينا أكتر منها ..
ساقتنا في الاخر عبيد)عاطف خيري
--------------------
سلام يافاتح لك وانت تحت ذاك التراب..
لقد بكيناك كثيرا في المٍ شديد .. ولاتزال خالاتك وحبوباتك يبكين في حوش البيت غير مصدقات ..
ذكراك الان تتقلب في المخايل دون حدود على كل شكل كنته في دنيا الناس..
افزعني ماجرته عليك البلاد والاقدار فالتحقت بالموت صبياً مارايت من دنيا الله شيئا سوى مسغبة البلاد..
توها الحياة قد بداءتك يافاتح..
فعاجلتك اليرموك ببواكير انتاجها فالحقت بالشهداء عنوةً واقتدارا، صبيا تحت التراب
والله ماشفناك كتير في هذه الدنيا يافاتح..
اختارتك شظايا الحديد الاعمى دون الناس جميعاً ودون الشجر والحوائط والمساحات الفارغة..
انتهت دورة الحياة عندك وصحيانك ونومك وسعيك وكل صباك..
من الليلة تاني ما حنشوفك قدام باب البيت تحت الشجرات ديك متونسا او ضاحكا او مرتقبا شيئاً..
-----------------------
والله لانملك إلا ان نقول..
انعـــل ابو اليوم الولدوكم فيهو..البلد خليتوها سهلة ساي ودبارتكم فيما عندكم كتلت عيالنا..عسى الله يرد عليكم اوجاعنا في عيالنا دنيا واخرة بلا رحيم..
|
Post: #2
Title: Re: ليه البلاد ما تُـستباح يوماتي كل ما الليل دخل؟
Author: أبو ساندرا
Date: 10-24-2012, 10:40 AM
Parent: #1
سلام يافاتح لك وانت تحت ذاك التراب..
وفوق في الأعالي ، في الفراديس العلا
|
Post: #6
Title: Re: ليه البلاد ما تُـستباح يوماتي كل ما الليل دخل؟
Author: حيدر حسن ميرغني
Date: 10-24-2012, 10:45 AM
Parent: #2
الرحمة والمغفرة لـ فاتح
ربنا يجمَل أهله بالصبر
ويرفع عثار أهل السودان عموما
|
Post: #7
Title: Re: ليه البلاد ما تُـستباح يوماتي كل ما الليل دخل؟
Author: aydaroos
Date: 10-24-2012, 10:48 AM
Parent: #2
صمت
|
Post: #8
Title: Re: ليه البلاد ما تُـستباح يوماتي كل ما الليل دخل؟
Author: د.رشا عجيب
Date: 10-24-2012, 10:48 AM
Parent: #2
لا حول ولا قوة الا بالله...
له الرحمة والمغفرة باذن الله...وربنا يصبركم .....
موجع جدا هذا الذي يحدث...
|
Post: #3
Title: Re: ليه البلاد ما تُـستباح يوماتي كل ما الليل دخل؟
Author: الشفيع رمزي
Date: 10-24-2012, 10:43 AM
Parent: #1
خالص عزائنا يادكين في فقدكم
وخالص عزائنا في وطن مد حبال صبره او سبهللته لهؤلاء الاوغاد
|
Post: #4
Title: Re: ليه البلاد ما تُـستباح يوماتي كل ما الليل دخل؟
Author: Mahir Mohammed Salih
Date: 10-24-2012, 10:43 AM
Parent: #1
جبر الله كسركم يا دكين ونسأل الله أن يكون مثواه الجنة ،،
لك الله يا وطن ،،
ماهر
|
Post: #5
Title: Re: ليه البلاد ما تُـستباح يوماتي كل ما الليل دخل؟
Author: خضر حسين خليل
Date: 10-24-2012, 10:44 AM
Parent: #1
التعازي يا صديقي في الفاتح
مشيت الصباح وعزيتهم
في كم كمين فاتح امس مشوا لجوار الكريم
خلو الدنيا العامرة دي كلها لا إيدهم لا كراعهم
بشتنونا بالأمس يا دكين
حقرونا والله في روحنا
ذلونا بالأمس يا صديقي
الأمهات والأبهات والأخوات والإخوان والناس التحت
أمس ياخ حسيت بي مهانة وذلة
حسيت بي حقارة عديل
حسيت بإنو نحنا فعلاً أمة جات لكوكب الأرض من دون أي داع
البركة فينا وفيكم ياخ
وفي الخالدين الفاتح
|
Post: #9
Title: Re: ليه البلاد ما تُـستباح يوماتي كل ما الليل دخل؟
Author: esam gabralla
Date: 10-24-2012, 10:51 AM
Parent: #5
أستباحوها و استباحونا يوم قبِلنا بالصمت خيار و رضينا بالتواطؤ مبدأ و لم نرفض حين نصب الأقزام و المشوهون و متضخمو الذوات و أصحاب الأجنده الخاصه جدآ و المسجونون في أوهامهم ... نصبوا أنفسهم قادة لنا ....
و لروح الفاتح السلام
|
Post: #10
Title: Re: ليه البلاد ما تُـستباح يوماتي كل ما الليل دخل؟
Author: اسماء الجنيد
Date: 10-24-2012, 10:54 AM
Parent: #5
يا اللـــــــــــه يا دكين وآآآآ مري عليكم من الحزن المطبوق والوجع الغريق
وبرضو يقولوا مافي ضحاية !!!!!!
وجعني الفاتح يا ود امي , ووجعني وجعك الموكر في الحشا يا دكين
بكيت المر وضقت معاك العلقم الفي حليقك يا حنين
آآآه يا دكين وآآ شريري على سوسن وناس البيت واهل خالتك جملة بدون فرز
وآآ شريري على الوطن الأصبح مشرور حزن بالطول والعرض
ربي يرحمه ويوسده الباردة ويسكنه جنات الفردوس مع الصديقين الأبرار
ربي يعوض شبابه الجنة ويصبر امه المكلومة على الفقد الجلل
ربي يجبر كسركم ويعظم أجركم ويصبركم على الفراق القاسي
لا حولة ولا قوة إلا بالله العلي العظيم
إنا لله وإنا إليه راجعون
|
Post: #11
Title: Re: ليه البلاد ما تُـستباح يوماتي كل ما الليل دخل؟
Author: أحمد ابن عوف
Date: 10-24-2012, 10:56 AM
Parent: #5
لاحول ولا قوة إلا بالله
اللهم اغفر له وارحمه
خالص تعازينا يا دكين ولكل افراد الاسرة
|
Post: #12
Title: Re: ليه البلاد ما تُـستباح يوماتي كل ما الليل دخل؟
Author: نجلاء قرافي
Date: 10-24-2012, 10:57 AM
Parent: #5
دي وجعــــــــــة عظيمة يا دكين
مش على المستوى الشخصي برحيل صبي يافع قطع قلب اماتو الله يجعلو في عليين ويصبرهم يارب
بل على المستوى الانساني ..امس ليلا كان يوم المهانة الكبرى .. والزحف نحو المجهول من المجهول والحكومة في شخيرها واحلامها الوردية .
اصحو ياعالم .. افيقو لترو ماذا انتم فاعلون .
|
Post: #17
Title: Re: ليه البلاد ما تُـستباح يوماتي كل ما الليل دخل؟
Author: محمد أبوالعزائم أبوالريش
Date: 10-24-2012, 11:15 AM
Parent: #12
عزائي صادق لكم يا عزيز ولجميع الأهل.
تقول أخبار البي بي سي (نقلاً عن الخضر بتاع الخرطوم) أن ليس هناك خسائر بشرية.
الفاتح ده ضربتو ملاريا يا مجرمين؟
لا .. موت الفاتح ليس حادث .. بل مدبّر.
ألم تأتِ الشظية التي قتلته من مصنع السلاح؟ هذه الذخيرة تمت صناعتها لتقتل، ولو لم تقتل الفاتح ود سوسن بت دولة، لقتلت فاتح آخر في مكان آخر. نعم، كانت انتقلت إلى (مناطق العمليات) لتقتل وتدمّر وتحرق في مكان آخر من نفس الوطن.
ليس هناك خسائر بشرية؟ ............... إنتو بشر؟
|
Post: #16
Title: Re: ليه البلاد ما تُـستباح يوماتي كل ما الليل دخل؟
Author: صديق الموج
Date: 10-24-2012, 11:10 AM
Parent: #5
رحم الله الفاتح يا دكين
والله اشهد قد زنا الاوغاد البلاد
والله لم يراعو فينا الا ولا ذمة
محيرنى سكاتنا يا دكين
موجعنى خنوعنا..
الموت ولا العيش المهين..
اللهم ارنا فيهم دلائل قدرتك،،،
|
Post: #20
Title: Re: ليه البلاد ما تُـستباح يوماتي كل ما الليل دخل؟
Author: المسافر
Date: 10-24-2012, 11:22 AM
Parent: #5
صادق التعازي يا عزيز
ولأم الفاتح وخالاته الصبر الجميل
لوك الصبر ياولدي
وأقعد على باب الصبر باقي العمر
هذه العاهة التي اصابت جسدنا لا أخالها دائمة
سيكون جسد الفاتح وأقرانه ترياق تشفى به التراب مما أصابها
فلتضمد الحيشان في أبو آدم جراحها ويكفيها نواح
لهم الله
|
Post: #13
Title: Re: ليه البلاد ما تُـستباح يوماتي كل ما الليل دخل؟
Author: أيمن الطيب
Date: 10-24-2012, 10:59 AM
Parent: #1
يا دكين,,
الله يجبر كسركم ويصبركم على حزن فقد إبنكم الفاتح ...
بلد هاملة وما عندها سيد والناس العاملين أسيادا
كلهم قتلة وكذابين ولصوص وسراقين..
يا ناس المشروع أما كفى هذا الشعب المسكين أبواب الجحيم
الوصلتوه ليها!!!
الأ تخجلون من أنفسكم التاريخ خلوه!!!
يومكم قرب وكان ما بيد الشعب المظلوم دا غالبا بيدكم
فأنتم لا تحسنون شيئا مثل طعن بعضكم فى الظهر..
ما يحيرنى أكثر من هذا الواقع المكعوج والمشوه والمؤلم
هو أرزقية وطبالي ومرتزقة هؤلاء الحثالات,,
تم عزلهم وتغييبهم عن الواقع تماما وغسلت أدمغتهم وملوؤوا لهم جيوبهم
وأطلقوهم ليقتلوا باقى الروح الفضلت فينا..بإسم الدين .. وهى لله وهى لله..
الله يحرقكم ويحرق يومكم زى ما حرقتم هذا البلد وإنسانه وإنسانيته وقلوب
رجاله ونسائه,,
|
Post: #14
Title: Re: ليه البلاد ما تُـستباح يوماتي كل ما الليل دخل؟
Author: الرفاعي عبدالعاطي حجر
Date: 10-24-2012, 11:06 AM
Parent: #13
عارفين عالي ما في لكن واطي ......... في كتير يا زول .
.....................................................................حجر.
|
Post: #15
Title: Re: ليه البلاد ما تُـستباح يوماتي كل ما الليل دخل؟
Author: abdelrahim abayazid
Date: 10-24-2012, 11:06 AM
Parent: #13
بالتاكيد الحيكومة لاتعد الفاتح من البشر
لانها مازالت تعلن ان لاخسائر بشرية
خالص العزاء يا دكين لك وللاسرة المكلومة في كبدها
|
Post: #19
Title: Re: ليه البلاد ما تُـستباح يوماتي كل ما الليل دخل؟
Author: ديامي
Date: 10-24-2012, 11:18 AM
Parent: #15
للفقيد الرحمة الواسعة
ولأسرته المكلومة حسن العزاء
( إنا لله وإنا إليه راجعون )
|
Post: #21
Title: Re: ليه البلاد ما تُـستباح يوماتي كل ما الليل دخل؟
Author: Yassir Tayfour
Date: 10-24-2012, 11:24 AM
Parent: #15
|
Post: #18
Title: Re: ليه البلاد ما تُـستباح يوماتي كل ما الليل دخل؟
Author: بله محمد الفاضل
Date: 10-24-2012, 11:16 AM
Parent: #13
البركة فيكم يا دكين
.......
..........
|
Post: #22
Title: Re: ليه البلاد ما تُـستباح يوماتي كل ما الليل دخل؟
Author: محمد البشرى الخضر
Date: 10-24-2012, 11:48 AM
Parent: #18
لا حول ولا قوة إلا بالله
خالص التعازي يا دكين
|
Post: #23
Title: Re: ليه البلاد ما تُـستباح يوماتي كل ما الليل دخل؟
Author: محمد عبد الماجد الصايم
Date: 10-24-2012, 11:52 AM
Parent: #22
لا حول ولا قوة إلا بالله
تقبله الله قبولا حسنا
خالص التعازي لكم وللأسرة الكريمة
|
Post: #24
Title: Re: ليه البلاد ما تُـستباح يوماتي كل ما الليل دخل؟
Author: عبدالوهاب علي الحاج
Date: 10-24-2012, 12:02 PM
رحم الله الفقيد وغفر له ورفعه في عليين
وخالص التعازي للاسرة الكريمة
|
Post: #27
Title: Re: ليه البلاد ما تُـستباح يوماتي كل ما الليل دخل؟
Author: عبدالرحمن الحلاوي
Date: 10-24-2012, 12:11 PM
Parent: #24
للفقيد الرحمنة ولأسرته المكلومة الصبر وحسن العزاء
أما الشعب الفضل يا دكين فهو شعب مدجن خالص لا حيي يرجى ولا ميت فينسى ...وكما تكونوا يولى عليكم ...الشعب يحتاج لثورة على قيمه واخلاقه ولو حدث ذلك لبقى هذا البغاث ساعة .
|
Post: #25
Title: Re: ليه البلاد ما تُـستباح يوماتي كل ما الليل دخل؟
Author: حامد محمد حامد
Date: 10-24-2012, 12:06 PM
احر التعازى وصادق المواساة
والى متى هذا الهوان والاستكبار
|
Post: #26
Title: Re: ليه البلاد ما تُـستباح يوماتي كل ما الليل دخل؟
Author: معاوية المدير
Date: 10-24-2012, 12:06 PM
نسأل الله له الرحمة والمغفرة.
إنا لله وإنا إليه رآجعون.
حسبنا الله ونِعمَ الوكيل...
|
Post: #28
Title: Re: ليه البلاد ما تُـستباح يوماتي كل ما الليل دخل؟
Author: البشير دفع الله
Date: 10-24-2012, 12:19 PM
انا لله وانا اليه راجعون
للفقيد الرحمه والمغفرة ولأسرته الصبر والسلوان
|
Post: #29
Title: Re: ليه البلاد ما تُـستباح يوماتي كل ما الليل دخل؟
Author: تيسير عووضة
Date: 10-24-2012, 12:45 PM
Parent: #18
يا دين النبي من دي كتابة
تصرخ بعلو الصوت وي بيوي بو
قرقيد إكّتيرا 
|
Post: #30
Title: Re: ليه البلاد ما تُـستباح يوماتي كل ما الليل دخل؟
Author: ismeil abbas
Date: 10-24-2012, 12:59 PM
Parent: #29
لاوحول ولاقوة إلا بالله....اللهم أرحمه وصبر أهله.....أحسن الله عزاءكم يا دكين.
حسبى الله عليهم...
|
Post: #31
Title: Re: ليه البلاد ما تُـستباح يوماتي كل ما الليل دخل؟
Author: احمد محمد بشير
Date: 10-24-2012, 01:20 PM
Parent: #30
الاخ دكين ...... لقد عبرت عني تماماً
جريمة .. مخازن في منتصف الاحياء .. معقولة يا جرذان !!!!!!!!!!!!!!!!!!!!!!!!!!!!!!!!!!!!!!
|
Post: #36
Title: Re: ليه البلاد ما تُـستباح يوماتي كل ما الليل دخل؟
Author: osama fadlalla
Date: 10-24-2012, 02:07 PM
Parent: #31
ومن يهن يسهل الهوان عليه .....
ويمشي بيت البكاء ويبكي ...
كم ذي الفاتح ده بكيناه منذ 89
ومن ثم تشفلنا ..اموالنا ... واحوالنا
ويموت من تبقي من الاهل ..
.
.
.
اعذرنا يا فاتح فنحن لانستطيع شيئا
|
Post: #33
Title: Re: ليه البلاد ما تُـستباح يوماتي كل ما الليل دخل؟
Author: ahmed haneen
Date: 10-24-2012, 01:42 PM
Parent: #30
تعازينا ال########ة يا دكين
لا نملك غيرها .. سوي حزن دفين في الأعماق
وشعور مخجل داخلنا.. باننا امة من المخصيين كما قلت
الرحمة للشهيد الفاتح
والصبر الجميل لكل الأسرة
|
Post: #32
Title: Re: ليه البلاد ما تُـستباح يوماتي كل ما الليل دخل؟
Author: احمد الأمين على إدريس
Date: 10-24-2012, 01:34 PM
Parent: #29
تعازينا فى الفاتح وربنا يعظم الاجر ويصبر اهله وذويه
وتعازينا فى هذا البلد المستباح جملة وتفصيلا داخليا وخارجيا
تقرا بهناك شوية اجانب بمشاركة بعض المعفنيين ديل يعيثوا فسادا فى بنك الخرطوم
وتعاين بى هنا تكاد تشوف اوجاع دكين واهل الفقيد بين الحروف بينما الناطق الرسمى ولا هماو وبقول حشايش وشجر وكلام فارغ ماعندو معنى فى مثل هذا التفجير
السوق لظى أخرى بدون تفجير ولا ذخيرة..جهنم دنيوية تلهب ظهور الناس كل ماسولت لهم انفسهم شراء سلعة ما
و..
و...
و...
الله المستعان بس
|
Post: #34
Title: Re: ليه البلاد ما تُـستباح يوماتي كل ما الليل دخل؟
Author: وليد عكاشة
Date: 10-24-2012, 01:56 PM
Parent: #32
كلام مؤلم و حقيقى و صادق .
فرشت مشاعرنا و أحاسيسنا و ألمنا و أسألتنا الحايرة كلها قدامنا نعاين ليها و نتمحّن !!
يا إلهى ماذا فعلنا حتى يحكمنا هؤلاء !! بل يا إلهى ماذا فعل هؤلاء القوم بنا ؟
|
Post: #35
Title: Re: ليه البلاد ما تُـستباح يوماتي كل ما الليل دخل؟
Author: احمد التجانى احمد
Date: 10-24-2012, 02:04 PM
Parent: #32
للفقيد الرحمة ولأسرته حسن العزاء
البركه فيكم يا دكين
إنا لله وإنا إليه راجعون
|
Post: #37
Title: Re: ليه البلاد ما تُـستباح يوماتي كل ما الليل دخل؟
Author: شهاب الفاتح عثمان
Date: 10-24-2012, 02:12 PM
Parent: #35
لا حولا ولا قوةالا بالله
ما ارخص مواطن بلادي على حكومته
خالص العزاء يا دكين لك وللاسرة الكريمة
لا حولا ولا قوةالا بالله
|
Post: #38
Title: Re: ليه البلاد ما تُـستباح يوماتي كل ما الليل دخل؟
Author: saif massad ali
Date: 10-24-2012, 02:14 PM
Parent: #35
لا حول ولا قوة إلا بالله
خالص التعازي يا دكين
|
Post: #39
Title: Re: ليه البلاد ما تُـستباح يوماتي كل ما الليل دخل؟
Author: جدو
Date: 10-24-2012, 02:25 PM
Parent: #35
اللهم أغفر له وأرحمه وألهم آله الصبر الجميل
احسن الله عزاءكم يا دكين..
|
Post: #40
Title: Re: ليه البلاد ما تُـستباح يوماتي كل ما الليل دخل؟
Author: محمد ميرغني عبد الحميد
Date: 10-24-2012, 02:35 PM
Parent: #32
اللهم أكرم نزله ووسع مرقده
اللهم أحسن إليه وأحسن وفاده
اللهم أسكنه فردوسك الأعلى
أحسن عزاء اهله وألزمهم الصبر الجميل
إنا لله وإنا إليه راجعون
ولا حول ولا قوة إلا بالله
أحسن الله عزاءكم دكين
|
Post: #41
Title: Re: ليه البلاد ما تُـستباح يوماتي كل ما الليل دخل؟
Author: شمس الدين ساتى
Date: 10-24-2012, 02:44 PM
Parent: #40
جبر الله كسركم يا دكين ونسأل الله أن يكون مثواه الجنة ،،
لك الله يا وطن ،،
|
Post: #42
Title: Re: ليه البلاد ما تُـستباح يوماتي كل ما الليل دخل؟
Author: شول اشوانق دينق
Date: 10-24-2012, 03:16 PM
Parent: #40
البركة فيكم يا دكين.
|
Post: #43
Title: Re: ليه البلاد ما تُـستباح يوماتي كل ما الليل دخل؟
Author: khaleel
Date: 10-24-2012, 03:24 PM
Parent: #42
البركة فيكم يا دكين
وانا لله وانا اليه راجعون
|
Post: #45
Title: Re: ليه البلاد ما تُـستباح يوماتي كل ما الليل دخل؟
Author: الحاج عبدالرازق الحاج
Date: 10-24-2012, 03:41 PM
Parent: #40
اللهم اسكنه فسح جناتك
انا لله وانا الية راجعون
عظم الله أجركم ورحم الله ما فقدتم
ويارب اجعلها خاتمة الأحزان
غضب الله أت علي الإنقاذيين اللصوص والسفهاء لأمحال ,,
وسفلة الإنقاذ لهم يوم ,, وفجر الخلاص آت بإذن الله ,,
|
Post: #48
Title: Re: ليه البلاد ما تُـستباح يوماتي كل ما الليل دخل؟
Author: عمران حسن صالح
Date: 10-24-2012, 05:49 PM
Parent: #40
| Quote: انعـــل ابو اليوم الولدوكم فيهو..البلد خليتوها سهلة ساي ودبارتكم فيما عندكم كتلت عيالنا..عسى الله يرد عليكم اوجاعنا في عيالنا دنيا واخرة بلا رحيم.. |
عسى الله يرد أوجاع الدشليون صابر
كل واحد شايل صبرو ويردد حسبي الله ونعم الوكيل فيكم .
_________
راجين الكريم
|
Post: #50
Title: Re: ليه البلاد ما تُـستباح يوماتي كل ما الليل دخل؟
Author: عمران حسن صالح
Date: 10-24-2012, 06:09 PM
Parent: #40
| Quote: انعـــل ابو اليوم الولدوكم فيهو..البلد خليتوها سهلة ساي ودبارتكم فيما عندكم كتلت عيالنا..عسى الله يرد عليكم اوجاعنا في عيالنا دنيا واخرة بلا رحيم.. |
عسى الله يرد أوجاع الدشليون صابر
كل واحد شايل صبرو ويردد حسبي الله ونعم الوكيل فيكم .
_________
راجين الكريم
|
Post: #51
Title: Re: ليه البلاد ما تُـستباح يوماتي كل ما الليل دخل؟
Author: نوفل عبد الرحيم حسن
Date: 10-24-2012, 06:15 PM
Parent: #40
صادق العزاء لكم في الفاتح والوطن
|
Post: #54
Title: Re: ليه البلاد ما تُـستباح يوماتي كل ما الليل دخل؟
Author: عثمان دغيس
Date: 10-24-2012, 06:55 PM
Parent: #40
إنا لله وإنا إليه راجعون
ده ما أمرنا به ربنا عند كل مصيبة ..
كل يوم كل السودان مصائب ..
وأكبر مصائبنا إننا فعلاً بقينا نحس بأننا لا نستحق العيش واننا فعلا كما يعتقدون
مخصييييييييين ...
لا حول ولا قوة إلا بالله
|
Post: #60
Title: Re: ليه البلاد ما تُـستباح يوماتي كل ما الليل دخل؟
Author: خالد العبيد
Date: 10-24-2012, 10:18 PM
Parent: #40
لا حول ولا قوة الا بالله...
|
Post: #67
Title: Re: ليه البلاد ما تُـستباح يوماتي كل ما الليل دخل؟
Author: محمد الكامل عبد الحليم
Date: 10-25-2012, 04:54 PM
Parent: #40
تحية...
تتناثر حروف العزاء المر علي كل الجروح ...يغتال اهل المشروع افراح العيد لكل اطفال المسغبة والحزن والرؤي الشاردة تبحث عن وطن معافي..
في المرة السابقة قالوا رب غارة نافعة...ماذا تبقي للمواطن في حلقه ليبصق في وجوههم الخائرة ا ل ج ب ا ن ة .. متي يرحل هؤلاء اللصوص..
|
Post: #44
Title: Re: ليه البلاد ما تُـستباح يوماتي كل ما الليل دخل؟
Author: عمار محمد ادريس
Date: 10-24-2012, 03:29 PM
Parent: #1
انعـــل ابو اليوم الولدوكم فيهو..البلد خليتوها سهلة ساي ودبارتكم فيما عندكم كتلت عيالنا..عسى الله يرد عليكم اوجاعنا في عيالنا دنيا واخرة بلا رحيم..
|
Post: #46
Title: Re: ليه البلاد ما تُـستباح يوماتي كل ما الليل دخل؟
Author: Elawad
Date: 10-24-2012, 04:01 PM
Parent: #44
أحسن الله عزاءكم يا دكين ورحم الفاتح وغفر له. الواحد ذاته ما عارف يقول شنو! يارب تكون آخر الأحزان في ظل هذا النظام.
|
Post: #47
Title: Re: ليه البلاد ما تُـستباح يوماتي كل ما الليل دخل؟
Author: Salah Abdulla
Date: 10-24-2012, 04:12 PM
Parent: #46
الله يرحمك يا الفاتح.
|
Post: #49
Title: Re: ليه البلاد ما تُـستباح يوماتي كل ما الليل دخل؟
Author: حمد عبد الغفار عمر
Date: 10-24-2012, 06:07 PM
Parent: #47
له الرحمة والمغفرة
|
Post: #52
Title: Re: ليه البلاد ما تُـستباح يوماتي كل ما الليل دخل؟
Author: ضحيه ابراهيم
Date: 10-24-2012, 06:20 PM
Parent: #49
صادق التعازى ياعزيز وجبر الله كسركم وغفر للفاتح واسكنه فسيح جناته مع الابرار وصبر والدته واسرته انا لله وانا اليه راجعون
|
Post: #53
Title: Re: ليه البلاد ما تُـستباح يوماتي كل ما الليل دخل؟
Author: معاوية الزبير
Date: 10-24-2012, 06:23 PM
Parent: #52
البركة فيكم يا عزيز
ربنا يرحم الفاتح ويصبّركم على فقده
إنا لله وإنا إليه راجعون
|
Post: #55
Title: Re: ليه البلاد ما تُـستباح يوماتي كل ما الليل دخل؟
Author: عمر موسي منجي
Date: 10-24-2012, 07:18 PM
Parent: #53
للفقيد الرحمة الواسعة
ولأسرته المكلومة حسن العزاء
( إنا لله وإنا إليه راجعون )
|
Post: #56
Title: Re: ليه البلاد ما تُـستباح يوماتي كل ما الليل دخل؟
Author: Rawia
Date: 10-24-2012, 07:41 PM
Parent: #55
وا حرقة حشا سوسن قبايل العيد
الخلا
|
Post: #57
Title: Re: ليه البلاد ما تُـستباح يوماتي كل ما الليل دخل؟
Author: أشرف البنا
Date: 10-24-2012, 09:20 PM
Parent: #56
إنا لله و إنا إليه راجعون ...
أسأل الله له الجنة و لوالديه و لكم و لجميع أهله الصبر و حسن العزاء ...
ليت الفاتح يكون شهيدنا الأول ... و يسيل الدم بعده في أرض الوادي ...
يكفي ما أطفأناه من شموع كفيلة بإشعال جذوة الثورة ...
ليت الفاتح يكون بداية سطر جديد في فصل الثورة ...
حتى متى يا بني وطني ؟؟؟
|
Post: #58
Title: Re: ليه البلاد ما تُـستباح يوماتي كل ما الليل دخل؟
Author: محمد على طه الملك
Date: 10-24-2012, 09:50 PM
Parent: #57
ليرحم الله إبننا الفاتح وليتقبله عنده من الشهداء ..
لا حول ولا قوة إلا بالله,
| Quote: ما اكتر من جغرافية عليها شوية خمج وهرجلة وبقر وناس في بيوت وعربات وشوارع مخفجة وشفخانات واسم دولة اعتباطا جنوب خط 22 ش وبس.. |
وحكام كل ما يفهمونه من سياسة الحكم ..
بوري يزين الصلعة وكرش يتمدد سحتا وحاضر فندم..
إنا لله وإنا إليه راجعون ..
اصدق التعازي لك وللأسرة المكلومة.
|
Post: #59
Title: Re: ليه البلاد ما تُـستباح يوماتي كل ما الليل دخل؟
Author: smart_ana2001
Date: 10-24-2012, 09:55 PM
Parent: #58
لا حول ولا قوة الا بالله.
ربنا يرحم الفاتح و يلهمكم الصبر و حسن العزاء.
|
Post: #61
Title: Re: ليه البلاد ما تُـستباح يوماتي كل ما الليل دخل؟
Author: غادة مكى محمد
Date: 10-24-2012, 10:23 PM
Parent: #59
البركة فيكم وربنا يصبركم
صادق التعازى لك والاسرة الكريمة
ولاحول ولاقوة الا باللة
|
Post: #62
Title: Re: ليه البلاد ما تُـستباح يوماتي كل ما الليل دخل؟
Author: فتحي الصديق
Date: 10-24-2012, 10:42 PM
Parent: #61
أدخله الله الجنان يا دكين ..
التعازي الحارة لك ولأسرتكم .
|
Post: #64
Title: Re: ليه البلاد ما تُـستباح يوماتي كل ما الليل دخل؟
Author: DKEEN
Date: 10-25-2012, 01:58 PM
Parent: #63
كتر خيركم اجمعين..
من هاتف ومن شارك ومن وصلني البيت معزيا ومواسياً..
شكر الله السعي وبارك لكم فيه..
الان اشاهد يجتمع مجلس وزرائنا الموقر يشجب ويندد ..
كلهم تحدثوا اليوم في المجلس..
كلام العاجزين..كلام بالدور ..ذي الكانو اي زول لازم يتكلم..
تجمع بائس وناس نضاف ..ذي اللموهم على عل بتلفونات مدير المجلس وكل زول وهو اي بفكر حيقول شنو في الاجتماع..كلهم تلقاهم كانوا بفكروا في شي يميز خطابهم عن بقية الجمع المجموع على عجل..
بئس المجلس والجلساء..
وبئس القول الذي قيل..
وبئس الوعد ما وعدتم..
الا لعنة الله تغشاكم فتمحق اعمالكم..
اسرائيل ارتكم عجائب ماعندها فخلي حماس والعرب ومجلس الامم ينفعكم ..
ربما كان هذا المجلس سيكون اكثر تعبيرا واكثر قبولا لو انهم من بسم الله ولحدي ماينتهوا يكونوا ساكتين منكسي الرؤوس ..
او على الاقل لو نكسوا رؤوسهم في المجلس دقيقة حداد على انتهاك الحاجة الاسمها "سيادة البلاد"
ربما كان الامر سيكون فيه بعض العزاء..وبعض القبول
بس الناس دي قالت نفس البتقولوا في كل فاجعة..
نفس الكلام نفس البطانة الكهنوت..
نفس الاماني والوعيد..
والان ستخرج نفس المسيرات وتندد ..وسيبتسم النايب الاول والريس وسيلوحون بعصيهم للجمع المتجمهر الصاخب يكبر نفس التكبيرات.. متوعدين بخيبر..
عدد من الوزراء كبير وجديد وفي كم وزير لي نفس الوزارة حضروا في كامل ثيابهم الزاهية وعممهم المطرزة ..
زول قال رادار مافي
يخوانا بي مخصصات وزيرين تلاتة او بدل راتب مدرب المريخ والهلال جيبو لينا رادار الزول السوري الخبت الطيارة التركية ديك
جيبهو انشالله بي رتبة لواء رادار..
ختوهو مع العدة بتاعتو طرف البحر الاحمر ..
لو رمى لينا في كل اربعة طيارة ماخسار..
---------------------------------
والي الخرطوم قال اهم كلام..
قال انو السيد النائب الاول وجه انو الجماعة الماتو ديل يعتمدوا شهداء ..
هل ابكي مجدداً؟
|
Post: #65
Title: Re: ليه البلاد ما تُـستباح يوماتي كل ما الليل دخل؟
Author: كمال عباس
Date: 10-25-2012, 02:26 PM
Parent: #64
سلامات يا عزيزي دكين والبركة فيكم وفي بقية آله وذويه ونسأل الله له الرحمة
والمغفرة....
---------------------------------
| Quote: والي الخرطوم قال اهم كلام.. قال انو السيد النائب الاول وجه انو الجماعة الماتو ديل يعتمدوا شهداء .. هل ابكي مجدداً؟ |
لاعجب ولاغرابة مادام صكوك الغفران أصبحت بيد تتار العصر وسندات الشهادة يصدرها علي عثمان محمد طه! وأضحي عبد الرحيم خازن الجنة وحارس بوابة الفردوس ! ,بعد أن إغتصبوا دنيتنا وإغتالوا فرحتنا وهاهم يسلبون الرب سلطته وينتزعون خاتم إعتماد الشهادة!
** ... دعنا نحسن الظن فيمن "يفوقون سوء الظن العريض" ونفترض أنهم ربما يقصدون بإعتماد الشهادة -أن يقام "عرس شهيد إنقاذي" وزفة ورقص يغني فيه القيقيم ويرقص فيه البشير ! وتداس فيه أحزان الاسر حيث يتغول إنجاس الانقاذ علي خصوصيتها وينتهكون حرمة الفجيعة و الحزن النبيل... فالشهادة لاتوثق مالم يرقص فيها البشير شخصيا!!
** شكرا يادكين علي نفثات القلم الحارقة ولهيب الفجيعة - الذي دونته أسطرا تنبض بالصدق وبالبكاء علي الوطن وعلي شهيد الأسرة الذي راح شبابه الغض ثمنا لأخطاء سياسات الحكومة وتحشرها فيمالايعنيها....
|
Post: #66
Title: Re: ليه البلاد ما تُـستباح يوماتي كل ما الليل دخل؟
Author: نصرالدين صلاح
Date: 10-25-2012, 04:04 PM
Parent: #65
تستباح يا عزيز تستباح و نص وخمسة
بلد يحكمها عواليقها .. عادي يشتمو و يهترو و يقتلون
و يطالبوننا بمسيرة هادرة لرد العدوان
يتكسبوب علي اشلائنا
و يشنفون اذاننا
و يستبيحون بلادنا و يستبيحوننا
مصنع للذخيرة علي قفا صالونات البيوت و الحيشان و ساحات لعب الدافوري و ( التكل )
!!!!!
حولت لقناة السودان اشوف بس الحاصل شنو
لقيت برنامج بتكلم عن التخطيط البشري و الاستراتيجي
و في الشريط الاخباري اسفل القناة
( السودان اول دولة عربية و افريقية توقع علي صندوق التمويل الاصغر بماليزيا )
و برشلونة يفوز 2 صفر ...... الخ الخ الخ
لم اري اي شي يدل علي موت و عدوان و ناس في هلع
نهائي ما جابو سيرة الفاتح و الباقين يا دكين
؟؟
له الرحمة يادكين
البركة فيكم وربنا يصبركم
صادق التعازى لك والاسرة الكريمة
|
|