السلطات اليمنية : ضبط ثلاثة سوادنيين متنكرين بزي نسائي ( صورة ) .. !!

قادمين من المملكة العربية السعودية ..
... ...

ذكرت وزارة الداخلية اليمنية انها ضبطت ثلاثة سودانيين ومصري دخلوا اليمن بطريقة «غير شرعية» وهم يرتدون ملابس نسائية تغطي كامل أجسامهم. وقالت ان الأجهزة الأمنية في مديرية عبس بمحافظة حجة ضبطت الأربعة وهم متنكرين بأزياء نسائيةعلى متن سيارة أجرة من نوع كورلا كانت قادمة من مديرية حرض الحدودية مع السعودية، ومتوجهة إلى مديرية حريب بمحافظة مأرب. وذكرت الوزارة على موقعها على الإنترنت إن الأربعة تتراوح أعمارهم بين 25- 48 عاما. ونقلت على لسان سائق السيارة، وهو من أهالي حريب، قوله إن شخصاً غير معروف كان يقود سيارة لاند كروزر طلب منه إيصال الأربعة إلى منطقة حريب بمأرب وتسليمهم لشخص من أهالي المديرية، ودفع له أجرة الرحلة. وقالت الوزارة انها تحفظت على العرب الأربعة لدخولهم إلى البلاد بطريقة غير شرعية، وفتحت تحقيقاً في الواقعة للتحري عن المضبوطين ومعرفة أسباب دخولهم إلى الأراضي اليمنية بصورة غير قانونية متنكرين بأزياء نسائية.

مصدر الخبر : http://www.slaati.com/inf/news-action-show-id-50345.htm

حقـيقــة والله ، المعايش جبّارة !
---------------
سلام يا عوض .. أخبارك?
وين بوستك اللذيذ بتاع الوزيرة? :-)

ذكرتني قصة عصام الذي تنكر في زي فتاه ومكياج وبتاع ومشى الحفلة شاف واحدة حلوة قعد جنبها وبدأ يكب في النقة وبدا قائلا:
" اسمعي يازولة انا ما بت انا ولد وعجبتيني وما لقيت طريقة اتكلم معاك الا اعمل كدى"
فردت عليه الفتاة:
" ياخوي زح جاي ولا جاي ..........
...............


انا صاحبك خالد"

ناس متسللين من السعودية لليمن يعني على الارجح انهم تبع القاعدة

التحية لكم جميعا

الكثيرون وبعد ان ضاقت بهم السبل اضطروا يركبوا الصعب
الدعوات بالاستقرار للسودان ... مافي احسن من انو الواحد يكون في بلدو بكرامة محفوظة ومصدر دخل يوفر له حياة كريمة بدلا عن المخاطرة ومخالفة القوانين

Quote: على الارجح انهم تبع القاعدة

ما تجيب هوا للناس ديل .. ديل اكيد همهم الاول والاخير هو عدم اثبات خروجهم من السعودية بشكل رسمي عشان اذا فكروا يرجعوا مرة تانية للسعودية يلقوا طريقة وما تظهر معلومة في سجلات الجوازات عن فترة اقامتهم السابقة في السعودية
التحية لكم الاخ سيف النصر

أمر مهين ما كان يجب ان تفعله الحكومة اليمنية لم تقم بطمس او تمويه اوجههم
تشهير ما بعده تشهير وقطعا ستقوم بتسليمهم كسبا للود تحت شعار التعاون الامني ليذوقوا العذاب بما كسبت ايديهم وارجلهم
هؤلاء الاجلاف لا يرعون للاسرى حقوقا يتبجحون السودان الشقيق ويشهرون بمواطنيه!
تبا لهم
جنى

سلام يا اخ مهدي
ما انا البجيب هوا للناس ديل. الجانب الأمني هو الاعتبار الأول في التعامل مع ما يقع بين الحدود السعودية اليمنية. و اعتقد أن
أن اول ما سيواجههم هو الشئ الذي افترضته في مداخلتي السابقة . قد يكونون هاربين من موضوع البصمة ليتمكنوا من دخول البلد
مرة أخرى بصورة سليمة و لكن لو لم يكونوا متسللين اساسا و وجودهم داخل السعودية كان بصورة رسمية و بصماتهم موجودة
في السستم فسيكون امامهم عمل كبير ليتمكنوا من تبرير فعلتهم هذه.

أمر مؤسف أنو الانسان يضطر يعمل كده ...

ولن نعرف حقيقه الأمر الا اذا اتكلم الممسوكين نفسهم ...

واستبعد تماما قصة المعايش ولا الظروف .. لانو اليمن ماهى الخيار الافضل من السعودية ولا السودان
والبطلع من السعودية بالشكل ده لليمن ... اكيد وراهو قصة كبيرة

الناس المتورطين في قضايا الارهاب ومتواجدين حول الحدود السعودية اليمنية اغلبيتهم الساحقة ان لم يكن جميعهم هم من السعوديين، بعد الضربات الامنية الموجعة التي وجهتها لهم السعودية اصبحت هذه الفئة تدير عملياتها من اليمن ، قضايا الارهاب السعوديين بقوا عندهم خبرة كبيرة فيها واعتقد سهل جدا اثبات انو ديل (التلاتة سودانين + المصري) بتاعين معايش واضطرتهم الظروف لأن يضعوا انفسهم تحت رحمة المهربين وما متورطين في الارهاب
الحدود اليمنية مسببة صداع مزمن للسعودية ، في فترة سابقة كان المتطوعون السعوديون يتسللون للعراق عبر الحدود العراقية السعودية وقامت السعودية بضبط حدودها مع العراق بتعزيز نقاط المراقبة واقامت في جزء كبير من الحدود جدار عازل حتى احكمت سيطرتها على تلك المنطقة
الان عندهم مشكلة الحدود اليمنية ففيها حركة تهريب نشطة جدا وكتير من السودانيين والافارقة بيتجمعوا في اليمن ويدخلوا السعودية بشكل غير شرعي تسللا، طبعا دا غير اليُمنا المتسللين للسعودية بحثا عن فرص عمل وهناك قصص كثيرة عن المصاعب التي يواجهها هؤلاء

بعد ان بدأت السعودية في تفعيل الجزاءات بحق المخالفين لأنظمة الاقامة بها بقت في حركة متسللين من السعودية لليمن ومن هناك لبلدانهم الاصلية

مرة اخرى التحية لسيف النصر ولكم المتواجدين

Quote: أمر مؤسف أنو الانسان يضطر يعمل كده ... ولن نعرف حقيقه الأمر الا اذا اتكلم الممسوكين نفسهم ... واستبعد تماما قصة المعايش ولا الظروف .. لانو اليمن ماهى الخيار الافضل من السعودية ولا السودان والبطلع من السعودية بالشكل ده لليمن ... اكيد وراهو قصة كبيرة

امر عادى ويومى العبور الى اليمن بسبب بلاغات الهروب او الفشل فى تجديد الاقامات او التهرب من حظر دخول المملكة لمدة خمسة اعوام بالنسبة لاصحاب تاشيرات العمرة والزيارة الذين لا يلتزمون بمدة التاشيرة وربما يحملون في فيزات عمل معهم
اليمنيين والصوماليين والايثوبيين و الارتريين والسودانيين يعبرون الحدود ومن ثم السفر من هناك وغالبيتهم ربما يكونون فقدوا جوازاتهم ولا يستطيغون الحروج بصورة رسمية وهذا امر معروف
جنى

Quote: امر عادى ويومى العبور الى اليمن بسبب بلاغات الهروب او الفشل فى تجديد الاقامات او التهرب من حظر دخول المملكة لمدة خمسة اعوام بالنسبة لاصحاب تاشيرات العمرة والزيارة الذين لا يلتزمون بمدة التاشيرة وربما يحملون في فيزات عمل معهم اليمنيين والصوماليين والايثوبيين و الارتريين والسودانيين يعبرون الحدود ومن ثم السفر من هناك وغالبيتهم ربما يكونون فقدوا جوازاتهم ولا يستطيغون الحروج بصورة رسمية وهذا امر معروف جنى

تعرف لى طاشرات السنين هنا اول مرة اعرف انو العندهم مشاكل اقامات وسفر بمشو اليمن
السنين الفاتو كانت الخطة مختلفة ما كان بضطرو يسافرو اليمن .. بتنقضى الامور جوه البلد
لكن الظاهر موضوع البصمه لخبط الامور
شكرا جني

ملعوبة يا ود الشيخ ..
ربك يستر الجماعة ما يكونوا من صنف عصام وخالد ..

Quote: حقـيقــة والله ، المعايش جبّارة !

يا ريت يكون موضوع معايش وما يكونوا الجماعة ديل عاملين ليهم كبه ..

Quote: سلام يا عوض .. أخبارك? وين بوستك اللذيذ بتاع الوزيرة? :-)

سلام ورحمة الله عبد الله .. يدك العافية ..
موضوع الوزيرة رخيناهو شوية عشان شفوت الخارجية ما يزعلوا مننا ..

فعلاً عشان موضوع البصمة ... وبكرة حركة يومية بين السعودية واليمن
ما تنخلعوا ساي

الاخ عوض
تحياتى

من الصور انا بقول ديل ما سودانيين (وطبعا
ممكن اكون مخطى اذ اعتبرت شكل الوجوه فقط).

ياخ والله العظيم السودانى بقى مستهدف
بصورة ما عادية.
فى بعض البلاد يقولوا ليك ضبط عاهرة
سودانية ولما الناس تتابع الموضوع
يلقوها كانت تزعم انها سودانية وفى التحقيق
تعترف انها ما سودانية.
طبعا ده ما معناه اننا احسن الشعوب
ولا تصل الينا الشبهات فالخبيث والطيب
موجود لدى الجميع ولكن سمعة السودانى
الطيبة (سابقا) فى الخليج خلقت نوع من الغيرة
لدى بعض الشعوب فجند بعضهمانفسهم للنيل من هذه السمعة
لكنهم استعملوا الصدق والكذب فى آن واحد وتهويل الامور
احيانا اخرى لتحقيق اغراضهم.

كل الود للجميع.

يا زول انت متأكد اللفي الصورة ديل سودانيين ؟؟
ما عارف بس يظهر لي ديل مااااا سودانيين ..

السودان اصبح طارد بصورة غريبة .. واي زول تهبشو يقول ليك عايز اسافر برة السودان ..
الله يعين ..

ديل نسوان السجم
والله كان متنكريين ماعارفه اقسم بالله الا الاعمى المابيفرز الحاجات دى شنو ...غايتو الهادهم ضراهم
تحياتى عوض تسلم يارب ...