احذروا أحدث وأخطر تطبيق للآي فون (I phone )

آخر واخطر ما توصلت ليه تكنولوجيا الاتصالات هي آخر تطبيق للآي فون والذى ينقل رائحة المتصل ( لا حظوا أي رائحة !!) الى المتلقي .

قامت إحدى الشركات اليابانية بتطوير تطبيق جديد يستخدم على هواتف "آي فون" تمكن المستخدم من إرسال روائح وعطور للطرف الآخر أثناء إجراء حوار عبر "آي فون".

وذكرت شبكة "CNN" أن الشركة اليابانية "شاكو بيرفيوم" طورت هذا التطبيق الذي يعمل من خلال جهاز صغير الحجم يتم شراءه من قبل المستخدم وتركيبه على مداخل الشحن الكهربائي بالهاتف.وأفادت الشبكة أن عملية إرسال الروائح متزامنة مع الحوارات المتبادلة بين الطرفين، وذلك بعد إرسال مرفق بالرائحة المطلوبة من القائمة التي تقدمها الشركة إلى الطرف الآخر بعد تحميل التطبيق

وأشارت الشبكة أن المرفق يكلف 62.25 دولارا ويستخدم لمرة واحدة، وأن أراد المستخدم إرسال مرفق آخر عليه أن يدفع مجدداً لتحميلها وإرسالها. ولفتت الشبكة إلى أن رائحة العرق لأحد المشاهير من ضمن الروائح المرفقة التي يمكن تحميلها. وبينت الشبكة أن هذه الفكرة سبقتها شركة "سامسونغ" حيث تسعى بإطلاق الروائح من خلال التلفزيون التي تصنعها الشركة تحت مسمى "الآلية الأولية للنظر والشم."


عشان ما تقوا كضاب هاكم الرابط دا :

http://www.alriyadh.com/net/article/777978[/B]

للمنفعة العامة

تاني ماتكلمني وانت مامستحمي ..

سلام ود شيقوق و ود القاضي

يقرأ هذا البوست مع بوست الــدخـــــــــــــــــــــــان بتاع هويدا شرف الدين

فقيرييقرأ هذا البوست مع بوست الــدخـــــــــــــــــــــــان بتاع هويدا شرف الدين

للعلم اى انسان في مكان تفوح منه رائح الدخان

Cannot raise the defence of alibi or seek any benefit of doubt

أرجو أن لا تكون غيبة


ساكحينا يا هويدا إن ذكرناك في غيابك

Quote: ساكحينا يا هويدا إن ذكرناك في غيابك

ساكحينا دي جاية من السنكحة ولا من الاستنكاح ؟!!

وانا ماتكلمني و انت ما متسوك

يا فيصل

وانا ماتكلمني و انت ما متسوك

وما تكلمنى وانت بتقرش في بصلة

ود القاضي

تاني ماتكلمني وانت مامستحمي ..

اعمل حسابك حيجي يوم تشوف تطبيقات تعرفك انت بتفكر في شنو

تاني اى واحد ما يتصل ما لم يتاكد بان محل اتصاله لا تنبعث منها رائحة تسبب ازعاج للطرف المتلقي

وتنبعث رائحة الطلح والكبرييييييييت

لاباس بريحة العنكوليب اذا لم تختلط برائحتك ...

للناس البياكلو البليلة في رمضان
بالله عليكم رسلو لينا رسايل بس

Quote: للناس البياكلو البليلة في رمضان بالله عليكم رسلو لينا رسايل بس

ومش كدا وبس يا ود الشيخ كمان ممكن تكون حبوبتك بتقلى في البن وتطلب منها كرفة او شمامة ، تقوم تجر نفسك كررررررررررر نامن تجيك رعشة

الطيب ..
تحية طيبة وكل سنة وإنت طيب !
مناسبة أحيى فيها أخى وصديقى ودفعتى زميل المنبر أمير قناوى ..
الذى حدثنى عن هذه الفكرة قبل أكثر من ثلاثين عاماً ..
والله العظيم ..
وكان وقتها التلفزيون الملون يا دوب ظهر !!
تصدقوا ..
أمير قناوى يعمل طبيباً الأن فى ألمانيا ..
لا أعرف أنه يذكر حديثه هذا أم لا !!
له ولأسرته التحية والإحترام

شوف بالله الدنيا دى عجيبة كيف ناس البردانة بعرفوا I phone

الاخ ابو دية

سلام

مناسبة أحيى فيها أخى وصديقى ودفعتى زميل المنبر أمير قناوى ..
الذى حدثنى عن هذه الفكرة قبل أكثر من ثلاثين عاماً ..
والله العظيم ..
وكان وقتها التلفزيون الملون يا دوب ظهر !!
تصدقوا ..
أمير قناوى يعمل طبيباً الأن فى ألمانيا ..
لا أعرف أنه يذكر حديثه هذا أم لا !!
له ولأسرته التحية والإحترام

والله كلام مدهش حقيقية

التحية عبر هذا البوست لاخينا قناوي وافراد اسرته الميامين

لكن يا صلاح ما اظن تكون في privacy تاني مع التكنولوجيا دي

وضاحة


شوف بالله الدنيا دى عجيبة كيف ناس البردانة بعرفوا I phone


تاني ابعدي موبايلك بعيد منك لما تقيمي الصلاة

دي نصيحة لله بس من اخيك البعزك شديييييييييد

والله لكن تطورات محرجة جداً

يعني ببساطة تقول للمتصل انت

ريحة البصل المعفن الجنبك دا شنو .









...............................................حجر.

الموضوع ليس كما أورده الإخوة والأخوات هنا
بل هو كما فهمته ليس له علاقة برائحة المتصل أو الروائح التي من حوله ،
بل هو عبارة عن روائح مرفقة مسبقا بالجهاز المتصل بجهاز الهاتف ،
وهذا الجهاز ما هو إلا منتج ارادت الشركة تحقيق مكسب مالي لها من ورائه ويمكن مقاطعته وعدم شرائه.
وبذلك تنتفي خطورته،

ولكم تقديري

Quote: الموضوع ليس كما أورده الإخوة والأخوات هنا بل هو كما فهمته ليس له علاقة برائحة المتصل أو الروائح التي من حوله ، بل هو عبارة عن روائح مرفقة مسبقا بالجهاز المتصل بجهاز الهاتف ، وهذا الجهاز ما هو إلا منتج ارادت الشركة تحقيق مكسب مالي لها من ورائه ويمكن مقاطعته وعدم شرائه. وبذلك تنتفي خطورته،

طيب يا اخي صلاح حمد هل الجهاز المعطر دا ملصق مع الموبايل ولا جوة الموبايل ولا بدوك ليهو انسانية ساى؟

وهل ممكن اقول ليهم انا ما عايز الملحق عايز الجهاز سليقة ساى ؟

Quote: والله لكن تطورات محرجة جداً يعني ببساطة تقول للمتصل انت ريحة البصل المعفن الجنبك دا شنو .

ايو يا الرفاعي وكمان ممكن تكون في سلطنة عمان و تمشي محل العطور و تتصل بأم اولادك وتقول ليها خودك شمي وشوفي العطر البعجبك عشان اخمشو ليك .

Quote: أعلنت شركة "شاكوبوريفيوم" اليابانية عن تطوير تطبيق على جهاز "آيفون" يسمح بإرسال وتلقي روائح بين مرسل ومتلق، وهو بالتأكيد اختراع فريد من نوعه، ومن شأنه أن يحدث ثورة في عالم الاتصالات المربوطة بالأحاسيس. وللحصول على هذه الخدمة المتميزة فما على الراغب بها سوى شراء التطبيق الذي يكلف أكثر من 62 دولاراً أمريكياً، وتحميله على الجهاز الخاص، ويتعين في كل مرة إرسال روائح كهدية للطرف الآخر، تحميل مرفق جديد من موقع شركة "شاكوبورفيوم". ومن الناحية التقنية ولتفسير كيفية عمل هذا التطبيق، ذكرت مجلة "التايمز" الأمريكية أن الشركة اليابانية طوّرت جهازاً صغيراً يتم تركيبه على مداخل الشحن الكهربائي في "آيفون"، ويكون قادراً على استقبال رسالة من هاتف آخر تأمره ببخ رائحة معينة، يكون المرسل قد اختارها من بين العديد من الروائح المعرّفة بالتطبيق لإرسالها إلى الهاتف المتلقي.

المصدر : http://www.haremy.com/vb/showthread.php?t=2658

ياخ ما متسوّك شنو .... وماكل بصل شنو؟

يشهد الله، في ناس بيتكلّموا في الموبايل وهم في (المُستُراح).

__________________


زمان كان في مجلة مصوّرة إسمها (تانتان)، عندهم نوع الإسكتشات الصغيرة البتكون في صفحة واحدة.
المهم ... جايبين مرة واحد من نوع مروجي المبيعات المزعجين، جايب تلفزيون عايز يبيعو لي زبون، وقال ليهو دي تكنولوجيا جديدة، التلفزيون ده بينقل ليك جو ورائحة المكان الذي يبث منه البرنامج. يعني لو في برنامج عن الزهور والربيع وبدأ تصوير في محل زهور، تتحول الغرفة عندك إلى بستان فيه روائح كل الزهور ... ولو كان البرنامج من محل عطور .. تتعطر غرفتك بكل ما في ذلك المحل من عطور ..... إلخ.
يبدو إنو زولك (الزبون) إقتنع واشترى التلفزيون ..... لأنو في اللقطة التانية جايبينو ليك لابس كمامة غاز وشايل بسطونة ويطارد في صاحب التلفزيون .... والراجل يصرخ ويقول ليهو: وأنا من وين كنت حأعرف إنو لحظة فتح التلفزيون كانوا ناقلين برنامج من (مدبغة الجلود)؟

Quote: يشهد الله، في ناس بيتكلّموا في الموبايل وهم في (المُستُراح).

هههههههههههههههها يجازي محنك يا ابا العزائم خربتها طب

يا شيقوق

دا اسمو الموبايل الشمام .

مفهوم أنو الموضوع مرتبط بتطبيقات معينة.

رأيك شنو الواحد يتصل بالموبايل أو السكايب ويتكلم بلغة الاشارة هل يجوز ذلك شرعاً يا مولانا أم أنه يخرق اتفاقية الاستعمال؟


غايتو الموبايل الشمام دا، يكون أبحاثو تمت بتنسيق تام مع شركات اللبان والنعناع، وشركات معجون الأسنان المختلفة لتسويق منتجاتهم.

ذكرتني قصة لطالب ليست مؤكدة – يُـقال إنو بتاع قانون بالمناسبة – لما واحدة زميلة قالت أمام حشد (main رودي) إنها بتكره البسفو التمباك.
فما كان منه وإلاَّ أخرج كيس السعوط ومـدَّ رجليه كما أبي حنيفة، وقـنع بمصيرو.

ريحة الفم ساهلة. رأيك شنو لو جاء يوم الموبايل يكون فييو تطبيق لو فعلتو يوريك الطرف التاني بتكلم حقيقة
ولا بديها شوية بهارات ولا بكـذب مية في المية. يعني كمان يوريك النسبة.
دا الشيء الوحيد الممكن يخلي السودانيين يقللوا من اتصالاتهم. ههههههه .

يا أخي تلقى الواحد متغرب في بلاد الله البعيدة وهاري التلفون مكالمات دولية هو وأسرتو ليل نهار، ونهاية الشهر يقول ليك بإستنكار:
أتخيل، جابوا لي فاتورة بـ 500 دولار (أو ما يعادلها بالريال السعودي) ؟

النور الجيلاني عشرين سنة حاضن التلفون راجي جرسو يرن، ودا بدون شم ريحة من الطرف التاني .

شامي لي ريحة خيانة










شيقا كل سنة انت وضيوفك طبين ويارب تجمعنا واياكم في الحرم

الوليد

Quote: شامي لي ريحة خيانة

قلنا ليكم جاية تطبيقات تكشف البتفكروا فيهو ذاتو

Quote: شيقا كل سنة انت وضيوفك طبين ويارب تجمعنا واياكم في الحرم

اميييييين يا الوليد

ات عارف خالك حسن طه عندو الاي فون 5 دا باخر تطبيقاتو دي

الاخ اسماعيل التاج

والله البوست الجابك دا نعمة

اصلي عارفك ما بتدخل الا في البوستات الناعمة واخوك عمرو ما سوى ليهو بوست ناعم يجيبك

Quote: دا اسمو الموبايل الشمام .

Quote: مفهوم أنو الموضوع مرتبط بتطبيقات معينة.

هههها انا خايف يجي موبايل فيهو تطبيقات تطبق عديل ههههه

Quote: رأيك شنو الواحد يتصل بالموبايل أو السكايب ويتكلم بلغة الاشارة هل يجوز ذلك شرعاً يا مولانا أم أنه يخرق اتفاقية الاستعمال؟

طالما ما بيكون فيهو آكشوال بينيتر ....ن ما بتكون فيهو حرمه يا اسماعيل اخوي - لكن التعزير وارد بحسب راي بعض الائمة

Quote: غايتو الموبايل الشمام دا، يكون أبحاثو تمت بتنسيق تام مع شركات اللبان والنعناع، وشركات معجون الأسنان المختلفة لتسويق منتجاتهم.

ايوا نعم وربما تكون للشركات التي قاومها العضو البرلماني حسب الرسول اسهام في ذلك .

Quote: ذكرتني قصة لطالب ليست مؤكدة – يُـقال إنو بتاع قانون بالمناسبة – لما واحدة زميلة قالت أمام حشد (main رودي) إنها بتكره البسفو التمباك. فما كان منه وإلاَّ أخرج كيس السعوط ومـدَّ رجليه كما أبي حنيفة، وقـنع بمصيرو.

دا بيكون زول ضهاري ساى وقت غلبو يقعد الحديث زى ناس محمد مرتضى قنع منها وقال خربانة خربانة

Quote: ريحة الفم ساهلة. رأيك شنو لو جاء يوم الموبايل يكون فييو تطبيق لو فعلتو يوريك الطرف التاني بتكلم حقيقة ولا بديها شوية بهارات ولا بكـذب مية في المية. يعني كمان يوريك النسبة.

وانا خايف يجي تطبيق معالج للضحك ( مجازا) .... ال premature

Quote: دا الشيء الوحيد الممكن يخلي السودانيين يقللوا من اتصالاتهم. ههههههه .

ابرى المعنى برية - يعني بالطوالة - ما تتلهمو توش يا سمعة - انا خايف بكري ذاتو يكون عندو موبايل فيهو تطبيقات بتوريهو المعني البارينو برية .

Quote: يا أخي تلقى الواحد متغرب في بلاد الله البعيدة وهاري التلفون مكالمات دولية هو وأسرتو ليل نهار، ونهاية الشهر يقول ليك بإستنكار: أتخيل، جابوا لي فاتورة بـ 500 دولار (أو ما يعادلها بالريال السعودي) ؟

ديل في لحظات ما قبل الاتصال ما بيكونوا مقدرين بيصلوا متين - ولما يصلوا نص الطريق تاني ما بحسبوا للقرش اى حساب لحدي يفرغوا الشحنة في بورتسودان بعد داك تااااااااااح عينو تفتح . ات فاكر ساى يا تاج اخوى ؟

Quote: النور الجيلاني عشرين سنة حاضن التلفون راجي جرسو يرن، ودا بدون شم ريحة من الطرف التاني .

اى والله ياهو هنا سامعو :

فاصل ونواصل

يا ود شيقوق

نحن سبقنا شركة ابل وسامسونج في هذا التطبيق قبل عشرون عاماً ، قول لي كيف ؟
أيام الشباب كان لدينا شخص بسيط جداً وكان يصدق المسكين كل قول ، نعود من العمل في بعض المرات نجده يأخذ حماماً وبعدها كان يتطيب بالرائحة وهو في الحمام نقوم بالاتصال هاتفياً على أحد الأصدقاء ونقول ليهو يا خي أضرب عندنا تلفون وحينما يرفع صاحبنا التلفون سلم عليهو وقول ليهو والله يا صلاح ريحتك فايحه ، وبالفعل صاحبنا يطلع من الحمام والهاتف يرن وصاحبنا يرفع السماعة ، ويأتي صوت الطرف التاني ( والله ريحتك سمحة) صاحبنا يصدق وطوالي يرد والله مستحمي حسع .

بالمناسبة القصة واقعية .

ولياب

ازيك

Quote: نحن سبقنا شركة ابل وسامسونج في هذا التطبيق قبل عشرون عاماً ، قول لي كيف ؟ أيام الشباب كان لدينا شخص بسيط جداً وكان يصدق المسكين كل قول ، نعود من العمل في بعض المرات نجده يأخذ حماماً وبعدها كان يتطيب بالرائحة وهو في الحمام نقوم بالاتصال هاتفياً على أحد الأصدقاء ونقول ليهو يا خي أضرب عندنا تلفون وحينما يرفع صاحبنا التلفون سلم عليهو وقول ليهو والله يا صلاح ريحتك فايحه ، وبالفعل صاحبنا يطلع من الحمام والهاتف يرن وصاحبنا يرفع السماعة ، ويأتي صوت الطرف التاني ( والله ريحتك سمحة) صاحبنا يصدق وطوالي يرد والله مستحمي حسع .

اذكر يا ولياب في عام 1982 ذهبت لاسبوع طلاب الهندسة بجامعة الخرطوم وهو عبارة عن معرض تعرض فيه اخر ما وصلت اليه التكنلوجيا في شتى ضروب المعرفة . لا انسي مجموعة من طلاب الهندسة اعتدّت ليها تلفزيونين صغار و بعيدات من بعض واى تلفزيون متوصل بتلفون - انا شخصيا من الناس الذين طلبوا منهم اجراء محادثة من تلفزيون لشخص اخر على التلفزيون التاني - اتخيل كان المتحدث معي امامي في الشاشة صوت وصورة والعكس تماما. اكيد الفكرة تطورت واصبح من الممكن تتصل على حد بالموبايل وصورتك تكون امامه .

اها لو الكلام دا حصل مع نقل ريحة العطر ..

تتصل بي واحد وتشمموا ال ك ل ب البوليسي يجيبوا ليك الضحى اللعلا
جنى

Quote: تتصل بي واحد وتشمموا ال###### البوليسي يجيبوا ليك الضحى اللعلا

انت جنيت؟ هي محتاجة ل###### بوليسي يا جني

نواصل