*العنوان كان مفروض يكون (كديسة مكة، وفار جدة وكدايس وفيران الآخر.. دراسة مقارنة مع توم وجيري) او نحو ذلك .. فآثرنا الابهام (والحال كما مذكور اعلاه) .. وقيل الائهام! هوو نووز!؟
Post: #2 Title: Re: كديسة مكة!! Author: حمد عبد الغفار عمر Date: 10-19-2012, 01:56 PM Parent: #1
سلام قبل ما نفهم أي حاجة
هسة دي كديسة ولا نمر
كدايس مكة لاقيات ضبائح الهدي والضحية دي شبعانات شبع تقيل
وهنا تحديداً -زي ما حيبين لاحقاً- الكديس (عموماً، اينما قذفته الجغرافية) وبمنطوق قوانين الانتخاب والتطور هو متهم ... متهم بانو ما طور ذكاءه ولا حاجة .. بدليل نجاح الكميرا في اصطياد سمنته الظاهرة على اوله (بحسب صديقي خالد بلة الشهير بخالد دلوت الكديس بسمن من وشو بس (بكسر الباء)!!) قول واحد ... (1) 0/1 لجيري واخوانه ("توم اند جيري السغيّر) حسب رواية وجن بتي السغيرة) .. حتى الآن.
والله المذكور -بخير- اعلاه آخر عهدي به وفاة اميرة كرار الف رحمة ونور تغشاها ومحمد ابنها.. اي نواحي العام 2004م .. ؤ دا الوكت الدمغني فيو بنفس التهمة .. (السُمن من الوش (فغط) لا غير)!!
اتمناه بخير اينما مسى
تحياتي ليكم الجوز
---------
(الرغم) في لندن ما بناباهو .. خالد دلوت فررررررر .. لكن كان داير اخبار وشمارات غيرو، راااااقدة (كمية) "لو لسة متذكر مضامين الاحالة دي"
قد يتساءل شليق، علاقة الكديسة بعلامة الترقيم دي (!) شنو .. قيقاراعي دا مكررا لينا؟
في علاقة .. وكمان في علاقة بين الفار و علامة السؤال (؟)!
احيلكم لكتابة قديمة .. اعيد كتابتها هنا:
السؤال خطيئة من عمل الانسان فاجتنبوه . . .
و مسكين الشيطان ، لما نقارنو بعش دبابير احتمالات الاجابة الممكن ينفتح . . .
طبعاً انا مدمن توم اند جيري مرة و في اقصى ممارسة طقسهم الحميم في المطاردة و التلهي باللعبة الوجودية و قانون الطبيعة وشروط البقاء . توم و جيري كانوا في شاهق ما . . . ؤ وقعوا. " جيري " ذكي بحسب رأيي و رأي المؤلف و المخرج و المنتج و المشاهدين جميعاً و بحسب قوانين الطبيعة ودارون همسلف، و شليل، و حسن اولئك رفيقاً . فالفار في سبيل حفظ نوعه والتشبث بحقو في الحياة و قولة " بنرفض نحنا نموت " الاستشهدت بيها صديقة بهناك . وامعاناً في الارتقاء بعد ما اتورط في نشوء لا ايدو و لا كراعو. . لقى نفسه فيه الحلقة الاضعف ، قام عمل شنو؟ لقى ما في غير يبقى اذكي المخلوقات الحائمة على ضهر المجرة . اما " توم " فاكتفى بمنحة الطبيعة وكون انه صاحب القوة وحليف السلطة ( العاقلة ) المسيطرة على الكون " حسب زعمهم /الديني بالذات" و عاش زهو تمتع بجماليات الفكرة . . و ما طور أي شئ!
نرجع لقصة المطاردة او على وجه الدقة الحلقة المعينة في سلسلة الصراع التاريخي دا وفي جدل ( العقل ) و ( العضل ) زي ما بقولوا ناس الكورة او " حمادة امام " تحديداً ... لما سقطوا، جيري بضاءلة حجمه تحول لعقل و تسأل و طلت العلامة الحبيبة " ؟ ". فاستخدم " الحنكول " في رأس العلامة في التشبث في اول نتوء قابله على جدار " كورس الاحتمالات الممكنة " اما صديقنا " توم " خر صريع الدهشة و تعجب من الحاصل (!) بدلاً عن ان يفكر ليه حصل؟ الحل شنو؟ و طلت علامة التعجب " ! " فامسك بها لكن هيهات ان تكتب النجاة لكسلان مندهش .. . لما انتبه لورطتو قام عوج راس الدهشة ليحولها لعلامة " ؟ " لكن كان يلعب خارج الزمن المقرر للنجاة و هناك ليس ثمة " زمن بدل الضائع " . . . فقط " زمن ضائع " زي ما بقولوها ناس الكورة في تحريف وتصحيف بااائن بالضبط لم ينسوا جماعة ديزني ان يسقطونا في خضم كوميديانا السوداء لنرتطم بواقعنا البائس لنتجرأ على الضحك . . . حتى على انفسنا . . . او قول على دقونا الشخصية عديل كدا . . انا شخصياً ضحكي على دقني الما غطيتها وانا مختلس مشاهدة توم اند جيري الساعة الثالثة صباحاً منفرداً و" فادي " مبرري الوحيد غارق في النوم . اها عمك توم لما عدل " ! " لـ " ؟ " كان أوآن السقوط . . و وصل لمستقر له .. او بعربي البطانة " لزم الجابرة تب ". و كاد ان يتوسد التقيلة مع او بدون ثبات أجر ايهما اقرب لتقوى نفسه او صلاح دعوات الحوله.
انتهى النقل المباشر لرواية قيقاراوي ..
-------------
مافي ابن حلال يبرّنا بالحلقة دي ياخي؟ للأسف حتى اسمها ما لقطتو.
Season 3 » Episode #20 - Ah, Sweet Mouse-Story Of Life Next Previous Summary: Tom and Jerry start racing, and Jerry ends up passing Tom several times in one second. Jerry thinks of swords and takes the swords from his thoughts, starting to throw them at Tom, barely missing. Jerry falls and a question mark appears. He holds onto the question mark and grabs the nearest ledge. Tom falls and an exclamation mark appears and while he tries to bend it into a question mark, he falls to the ground. Tom gets stuck in a drain pipe and Jerry frees him by using a horn. Out comes a very long Tom sounding like a train.
Quote: هناك حمولة قداسية في العنوان، ما يؤثر سلبا على الموضوعية في نقد (ستي) الكديسة
اكضب يعني يا ابو الشوش .. الصورة في مكة
ذكرتني ايام العرس .. حاجة فاطنة مرا كانت بتساعد امي، لقيتا بتنضف في (المحلب) .. قلت ليها دا المحلب دا جبتو من المدينة. انقر ما شالت الصلاة على قاطنها (ما عارف دخلو شنو بالضبط مع المحلب، دا ان صحت روايتي النجرتها عن المحلب دي)؟ وكف خمشت ليها خمشة من (المحلب المقدس) وصرتا في ركن توبا.. وهي تردد : اعفي عليك الله خمشت ليها واحدة تانية وانا اردد: صلي على النبي .. صلي على النبي وهي تصلي وتزيدو صلى .. وانا اصلي حتى اولي المافي شنو
امي هارسلف -عندها سكري النوع التقيل داك- مرة ظبطتها ليك تاكل في حلاوة مولد .. كررررررررروم .. كروووووووووم! يا حاجة بتاكلي في شنو؟ السكري!؟ قالت لي بثقة وايمان عميييييييييغ: مولد النبي .. الحبببببببببببة دي ما بعملا!! يا دوب عرفتا ليه لمن نفحص ليها -صايمة- بنلقى السكري 370
------------
من ناحيتن اخرى ..
مرة شفت تجربة لاختبار ذكاء الفار .. جايبين ليو مكعب (صندوق) زجاجي مفتوح من جهة واحدة بس .. جواه قطعة جبنة (الجرذان لا تستطيع مقاومة قطعة الجبنة .. او كما قال هشام آدم) اها المرة الاولى الجهة المفتوحة كانت قصاد الفار .. خمش الجبنة بارتياااااح .. غيروا الاتجاه .. صاحبنا جا ناااابل .. طاخ خبط القزاز .. المرة البعدها جا متريث شوية .. خبطة صغيرة جابت راسو حاود .. حاود ، و حاحا جاي جاي لمن لقى الجهة المفتوحة .. كف نف ختف الجبنة.
Quote: زادت دهشتي عندما عرفت تغيير السلوك الغذائي لقططنا تحديدا على الاقل
منذ التمنينات لاحظت انو الكدايس بقت تاكل عجور .. (ول كديستنا ديك كانت نباتية ما عارف غايتو!!)
--------------
من ناحيتن اخرى .. اسد حديقة (الانعام الجميلة) ! اسمها كدا .. ما يعادل (حديقة الحيوان) بدون جميلة عندنا .. اللسد -ما نتر يوم واحد- مما احرجني جداً مع فادي ولدي .. وطلعني كضاب ساي ما قدرت اقنعو كلو كلو انو الاسد هو ملك الغابة .. مصر انو (القرد) هو الملك .. الوحيد القاعدين نلقاهو مصحصح بالليل داك! لمن نجي قفص اللسد نلقاو راقد قش .. واللبوة هي راجل البيت .. اقصد القفص دا غايتو اشك في انو يكون بياكل لحمة .. دا في احسن الفروض بكون زول شوربة سااااي غايتو اظنو! دا لو ما كان جايبنو بي فيزا (كديسة) ساي!