إنـتـو دحـيـن الـجـو دا، أكـان فـي اتـبـرا بـس، والـلآ Franchise ؟؟؟

هل في مدينة أُخرى من مُدُن السودان كان الجو فيها
بنفس مستوى الجو في عطبرة ؟؟؟

غايتو أنا خابر الرست هاوُس.
لكن وحات ربي الجو محلو ماني خابرو.

كنت بسمع الجماعة يقولوا، هيييييييييع عاين فلآن
جاي من الجو. لمان أعاين بلقى الأجواء بتاعت فلآن
في السِلِك.

ماهو دور الجو في تكوين ملآمح مدينة عطبرة في ذلك
الزمان ؟؟؟

يامان قبل نغادر عطبرة الحلوة
جابو لينا الجو قريب من حينا
وحات الله وقت المغيرب الخلايق دي رجلينهم ماقادرات تشيلهم
نقوم نضاير فيهم وندخلهم لبيوتهم بالتلتلة
جونا زيو مافي يامان

الغريبة ناس المشروع الحضاري حددوا زمن الاستكانة داخل الجو - الخامسة مساء
نكون قاعدين تسمع بوليس السواري يصفَر في صفارتو "أن اطلعوا ياناس هوي زمن الشربة انتهى"
يجوك من كل زقاق ناس شايلين الباقي في كيس نايلو مخبى في جيب الجلابية
والبتأخر يمسكو يجلدوه

كل جو بما فيه ينضح.
طبعاً في ناس بمناسبة الجو دي بالهم راح لأوزون، وضفاف
النيل وشارعو المشهور في الخرطوم والجلسات الفرايحيّة.
برضو الجو في اتبرا كان فرايحي، والناس كانو بيدخلو الجو
مدبرسين ويطلعو فرايحيين.

Quote: يامان قبل نغادر عطبرة الحلوة جابو لينا الجو قريب من حينا وحات الله وقت المغيرب الخلايق دي رجلينهم ماقادرات تشيلهم نقوم نضاير فيهم وندخلهم لبيوتهم بالتلتلة جونا زيو مافي يامان

سلآمات يا حيدر.
يا سلآم يا اخ، كانت أيام جميلة جد. كنا نمشي السوق الكبير نبيع
التمر، وناس الجو لمان يكونو صارفين يدونا الخدار واللحمة ويوصونا
نوصلآ لأولآدهم في البيت وهم يبقو سادرين. تعرف مرّة حب إستطلآع
مني قلت أمشي أشوف الجو. حسب ذاكرتي الصغيرة في ذلك الزمان
ما بستحضر المكان بالضبط وين ؟ لكن بتذكر يا زول مشيت لقيت لك
المكان ما شاء الله عامر. يا زول البلد هايجة، لحوم وشيات، وحمير،
وناس من كل حدب وصوب، والعكاكيز دي ما تديك الدرب. تصدق جاني
إحساس بأنوا الجو فعلاً مظبّط، والمكان فرايحي شديد. بعد دآك عرفت
الجماعة بيوكحونا بالخدآر ويقوموا فارين علي عجل للجو ليه...

معاوية المدير سلامات

اذكر مرة كنت بفتش لى بيت جماعة اقاربنا فى عطبرة
يظهر والله اعلم طلعته قريب من الجو المهم قابلنى واحد
متصلح تمام وكان ماشى بالناحية التانيه من الشارع قمت
سألتو ياخ عليك الله الحى ده اسمو شنو؟ قال لى والله ما عارف.
قمت قلت ليهو ليه ما عارف انت ما من هنا. قال لى انا من
هنا لكن يا ولدى بدخل الجو ده بالبطارية وبمرق بى صفارة
البوليس...

زمن والله.

Quote: الغريبة ناس المشروع الحضاري حددوا زمن الاستكانة داخل الجو - الخامسة مساء نكون قاعدين تسمع بوليس السواري يصفَر في صفارتو "أن اطلعوا ياناس هوي زمن الشربة انتهى" يجوك من كل زقاق ناس شايلين الباقي في كيس نايلو مخبى في جيب الجلابية والبتأخر يمسكو يجلدوه

يا حيدر ناس الجو ديل زمان بتاعين عضات ومزات، من جو ناس المشروع
الحضاري ديل وحاتك بقو يشربوهو وبطونهم يكوركن. زمان الجو دا 24 ساعة
والبركة مالية البلد عشان الناس نفوسهم كانت خالية من النفاق. هسّع ديل عملوها
مشروع إسلآمي والبلد نشفت بسبب النفاق.
مع الجو برضو كانت الأنادي، وأرض الحيوان. بتذكرن ؟؟؟

تحياتي يا حيدر

لقومة لأتبرا وأهلها ( جوا وبرا وبحرا )

أها أحكيلك حاجة عن جوها :

في واحد يوماتي يمشي الجو ويقيف لط ، عندو أولادو إتنين عتاولة يجو قبال صفارة السواري ودة من إيد ودة من إيد يجروه للبيت.
يوم وهو مجرور شاف ليك جارو شايلنو أولادو في عنقريب وهو واقف ( سلك ... ولاحظ الفرق بين لط وسلك ) ..
قام صاحبنا المجرور من أولادو قال : هيييع .. ديل ال بكَّروا ...

يعني هو جا متأخر وحاسد الزول على شيلتو في العنقريب

واصل

Quote: اذكر مرة كنت بفتش لى بيت جماعة اقاربنا فى عطبرة يظهر والله اعلم طلعته قريب من الجو المهم قابلنى واحد متصلح تمام وكان ماشى بالناحية التانيه من الشارع قمت سألتو ياخ عليك الله الحى ده اسمو شنو؟ قال لى والله ما عارف. قمت قلت ليهو ليه ما عارف انت ما من هنا. قال لى انا من هنا لكن يا ولدى بدخل الجو ده بالبطارية وبمرق بى صفارة البوليس... زمن والله.

سلآمات يا فوزي.
أيّ والله زمن يا فوزي .
عمّك مع إنو بتاع جو لكن طلع مجيّه إمورو كويّس.
ذكرتني، قالوا السر عكاز طشم ووقع في عرآضة
ميدان الكورة، والوآطة كانت المغربية. جات مرا
فايتة شافت الحاجة الوآقعة في الوآطة، إتخلعت وفجأة
عرفت إنو دا السر عكاز. بخلعة قالت، سجمي،،، السر عكاز ؟؟؟!!!
السر عكاز بسرعة قال ليها، لا،،، حامد بريمة...

ود المدير أخبارك

الجو دة زمنو ما حاضرينو - إحنا بتاعين الطلائع
لكن

Quote: الرست هاوُس.

دة عملت فية عرسي

Quote: القومة لأتبرا وأهلها ( جوا وبرا وبحرا )

ابو جهينة يا ريس،
سلآمات.

عارفك حا تجي بجاي، يا ريت ناس اتبرا كلهم يجو
يكلمونا عن أرض الحيوان و الجو و تأثيرهما علي
ثقافة المدينة.
الشي الجميل في عطبرة يا ابو جهينة إنو ناس الجو
والأنادي، وناس الجامع، وأرض الحيوان وناس الخلآوي
كلهم بيتلمو في الحارة والباردة !!!

Quote: عرفت إنو دا السر عكاز. بخلعة قالت، سجمي،،، السر عكاز ؟؟؟!!! السر عكاز بسرعة قال ليها، لا،،، حامد بريمة...

شكرا معاوية
والله ضحكتنى لحد مااتشرقته...شوف الراجل رغم انو لط لكين ردو رباطابى
ما يردو ده لو ما كان هو رباطابى.

زى ما تفضلت والمتداخلين الكرام فعطبرة فعلا مدينة متميزة
ودائما بتدينى الاحساس بان سكانها بتعارفو فان لم تكن المعرفة
الشخصية فانها معرفة انك تتعامل مع شخص قل لن يخذلك.

لك ودى

بعد رحلنا من السيالة ومشينا الواور وكنا ساكنين في جنينة الخواجة
ونقلوني انا وأخواني من مدرسة الحفر (الداخلة الجديدة) لي مدرسة الشروق
وكانت علي بعد 3 (قرعات) من الجو وكثيراً ما كان (الواقفين) سلك يرقدو في فصولها
حتي نوقظهم صباحاً.
ابوي بي عربيتو اللاندروفر التاريخية كان بي يجي يشيلنا بعد الدوام ونحن ماشين
علي البيت كنا بي نمر بالجو وبيوته الطينية وأبوابه المزركشة بالألوان والرسومات
وكانت هناك حلقات من الجالسين حول جرادل المريسة وبأيديهم القرع وحقق التمباك
وأمامهم عكاكيزم.
لما نمر من قدام الجو دايماً ما نصادف (...) تحفه الحالة 17 وما أن يري اللاندروفر
المبجل يتقدِل نحوه حتي يحاول الوقوف (والمريسه تشده) فيتمايل في كل الإتجاهات
وما أن يحازيه اللاند حتي يصيح (لأبي الصلاي الذي ما سف ولا سجر ولا ذاق نشوة القرع)
حتي يصيح بأعلي مافيه:(إتفضل يا حاج أحمد) وأبي يتبسم خلف الدركسون ويهمهم:(الله يصرفك
با (....) هسع دا شيتنا بي يعزمو عليه) .. شكراً .. شكراً يا فلان .. والله مستعجلين.

=========================
الحالة 17 حالة لا تدرك إلا للواصلين

تحياتي أخي العزيز معاوية

أتبرا في الوجدان ما حيينا.
سآتيك بالمزيد من حديثها

دمتم