أنا آسف ياخ ...!

كملن شهيرات الصبر

مرقن مسيرة

علي الظروف

لقن الغبائن في الطريق

المعايش
تندهيلك
الغبائن شادا حيلا
التصاريف المحن

يا حقيقتنا
وكضبنا

ابقي قدر الخطوة ديا
وانت ما جايب خبر

انت مسجون جوة خوفك
لما سجانك زهج

وكملن مسيرات الصبر
يات سبيبة
الليلة غاب ؟

ياتو درباً ما سلكتوا
ياتو فرداً ما انهزم
ياتو شعب الله نحنا ؟

عفواً اكتوبر .... الرقم الذي تحاول الاتصال به موقوف من الخدمة مؤقتاً

Quote: ياتو درباً ما سلكتوا ياتو فرداً ما انهزم

بالنسبة للدروب يا خضر ترانا لسه من درب لدرب، اما الهزائم فلنا فيها سجل طويل عريض و لله الأمر من قبل و من بعد.

اكتوبر
يا اكتوبر
جيت مشتاق
حضنك رقراق
ذكّرت الناس
الألم العام
الغضب النام
الحق ينضام
الصوت معبور
السيف مكسور
والساقية تدور
... ... ... ...
وانحنا زمان
(للشمس النايره
قطعنا بحور
حلفنا نموت
أو نلقى النور
وكان في الخطوة
بنلقى شهيد
بي دمو بيرسم
فجر العيد
وما اتراجعنا )
... ... ... ...
يا أكتوبر
هلّيت فِي اللّيل
نقّرت وترنا
تبّيت حفيان
بي غبني فتحت
لقيتك خيل
سلامك حار
وغناك بِندار
في الحال صَحْصَحْت
واتذكرت
القسم الغالي
وصية وذِمّة
وهموم الناس
وعذاب الكلمة.
هاشم صديق

سلام خضر

(ما جف ساق أبريل ... أكتوبر الأخضر)

يا جميلة شكراً للقصيدة ... أكتوبر جاء ياخوانا جانا توووش بلا مقدمات
ونحن نرزح تحت وطأة الكابات والإتفاقات والمساومات

شدو الحيل آناس

مودتي جميلة

يا دكتور ازيك ياخ
معليش للتأخير
قلت لي لسع من درب لي درب
الدروب اتفرزت ياصحبي وليك درب (ولا دربين) مساك الدروب ضهاب) أو كما قال القدال
الله المستعان يا سيف ياخ

أنِحْنا العِشنا ليالى زمان

فى قيود ومظالم وويل وهوان

كان فى صدورنا غضب بركان

وكنا بنقسم بالاوطان

نَسَطَّر اسمك يا سودان

أكتــــــوبر

يا فيصل ياخ ازيك
ياريت لو عندك صور قديمة زي دي تنزلها لينا هنا يا صديقي
وكل اكتوبر وشعبنا طيب

وبجنب القرشي حين دعاه القرشي حتي انتصر

Quote: يا فيصل ياخ ازيك ياريت لو عندك صور قديمة زي دي تنزلها لينا هنا يا صديقي وكل اكتوبر وشعبنا طيب

طلباتك اوامر ياخدورى




الشهيد القرشى



الشهيدد بابكر عبد الحفيظ

هــبـــت الـخـرطـــوم

عبد المجيد حاج الامين ... الكابلي

هبت الخرطوم في جـٌنح الدُّجي
ضمدت بالعزم هاتيك الجراح
وقفت للفجر حتي طلعا
مشرق الجبهةِ مخضوب الجناح
يحمل الفكرة والوعيَ معا
فإلتقينا في طريق الجامعة
مشهداً يا موطني .. ما أروعا

شكراً فيصل يا صديقي علي الهمة جعلها الله في ميزان حسناتك
أكتوبر جانا دافر يا فيصل ونحنا لا نلم سوي إستعادة ما مضي من تجاريب شعبنا
وربنا يغطي عليهو ها الشعب الجميل يافيصل

???

الما عاجبك شنو يا ناصر ؟ مالك مليتنا استفهامات ؟

اناكنت انك بتاسف لى انا

وإتأسف ليك لي شنو يا ناصر مثلاً ؟

نسيت مندى عبرى تبج

كلامك ده ما سليم يا ناصر يا خت الكلام كلو يا مافي داعي للتلميحات .
بالنسبة لي سؤالك نسيت منتدي عبري تبج ؟ بقول ليك لا ما نسيت ولا كان لي أن أنسي

أها الحصل شنو في منتدي عبري تبج ؟

??

يا ناصر


أنا ماشي ياخ

مع السلامة

عارف يا ناصر أنا ممكن أقعد معاك هنا ...سنه ... سنتين تلاتة قدر ما الله ادانا عمر ... عشان أصل معاك لنقطة معينة
إختصرت ده كلو وكتبت ليك إنك ما (صيدتي) ياناصر ... ولاني فريستك .... شفت كيف ؟ كتبت ده ليقيني إنو
أساساً في كون الله ده في مغايص ومنغصات وجودية تنشأ براها كده كما اللابلاب وليقيني إنو هناك ما هو أجمل من
المواصلة في معارك من غير معترك .
لكن سبحان الله قدر ما أقول إتخارج منك بتجيني بي أسلوب يحير الواحد في جملة ما حوله من أشياء . كلامك
واستفهاماتك ومحاولات العجيبة دي لإظهاري ولكأني غلط في حقك غلط يستوجب الإعتذار ما محير بالنسبة
لي علي الإطلاق وفي نفس الوقت غير مقبول .

فيا ناصر ولفائدة (فش الغبائن) كان عندك حاجة قولها طوالي .
وكان عندك حق عندك بديك ليهو كاش داون ، فهات ياخ .