Post: #1 Title: انتِ اصيله وزيك وين يابت بلدي Author: فاروق عثمان Date: 10-14-2012, 10:36 AM
ما دعاني لفتح هذا البوست هو المناوشات الجندريه التي حدثت في الفتره الماضيه,والتي ربما كانت من قبيل العزه الجندريه والكبرياء النوعي,افضت الي نوع من التمايز والاصطفاف بين نساء ورجال المنبر,واستعملت فيها بعض من الاساليب التي في تقديري جارحه ومؤلمه بعض الشئ. عن نفسي اعتز بسودانويتي ولا افرط فيها واراها الاجمل والافضل,ومن هذا الاعتزاز اعتز وافخر بنساء وبنات وطني,اللائي اراهن الاجمل والاكمل والابهي خُلقا واخلاقا ووعيا,نساء شامخات شموخ مره والتاكا,اصيلات اصالة النيل,باسقات كما النخيل والابونس,جميلات جمال ذات التنوع الذي نعيش فيه,وكما تختلف مقاييس الجمال باختلاف الثقافات,نري جمالنا المتنوع تنوع ثقافاتنا واعراقنا وحضاراتنا فيكبر ماعون الاختيار,عكس اولئك الذين يصفوهن بالقبح والذين تجف مواعين اختيارهم الا علي نوع وجنس واحد. نساء وبنات بلدي اللائي شربن العزه والاباء من مياه هذا النيل ورضعن قيم قل ان توجد في من اجناس الارض,يحترمن المشاعر ويقدرن العشره,نساء يسددن عين الشمس بوعيهن وطيبتهن واخلاقهن الفاضله وجمالهن المميز. انحني اجلالاً وتقديرا لكل نساء وطني,ولو خيرت ملايين المرات وفق اعظم الاغراءات لن اتزوج غير سودانيه. وانتي اصيله وزيك وين يابت بلدي
Quote: نساء وبنات بلدي اللائي شربن العزه والاباء من مياه هذا النيل ورضعن قيم قل ان توجد في من اجناس الارض,يحترمن المشاعر ويقدرن العشره,نساء يسددن عين الشمس بوعيهن وطيبتهن واخلاقهن الفاضله وجمالهن المميز.
أتفق معك جملةً وقطاعي وبالتقسيط ذاتو ... ما أجملهن في كل حاجة .. وأكتر حاجة الحنّية .. ياخي المرأة السودانية دي عندها حنّية تحيّر المحنّة ذاتا ...
المناوشات دي الظاهر قديمة ... الشاعر الكبير ابوامنة حامد عليه الرحمة ألّف قصيدة سال من شعرها الذهب في بت مصرية بتقرا في جامعة القاهرة فرع الخرطوم مجموعة كدة من البنات السودانيات زعلوا كيف الشاعر يتغزل في واحدة ما سودانية قام ابو امنة حامد رد على سال من شعرها الذهب بقصيدة بنحب من بلدنا مابرة البلد مصدر الحكاية دي الموسيقار اسماعيل عبدالجبار في برنامج مطالع النغم سهرة السبت في اذاعة امدرمان
بصراحة وبدون كسير تلج مافي احسن من بناتنا من حيث الحياء والادب والاخلاق: مين في الدنيا دي أجمل من بناتنا الليهن قلوبنا و الفيهن صفاتنا الكامنات في روحنا و العايشات في ذاتنا
Quote: ألّف قصيدة سال من شعرها الذهب في بت مصرية
ما يعادل بلغة اليوم : فتح بوست بعنوان (زواج المصرية احلى زواج)
Post: #7 Title: Re: انتِ اصيله وزيك وين يابت بلدي Author: فاروق عثمان Date: 10-15-2012, 10:13 AM Parent: #3
الاخ مهدي تعرف اول مره اعرف انو سال من شعرها الذهب اتكتبت في مصريه بس زي ما قلت مع توسنامي العرس ده واحد ما جاء قال زواج المصريه احلي زواج,ههههههههههههههه تكون المصريه ما جايبه همها ولا شنو
صبري يا صديق ياخ ما كسير تلج ولا حاجه,بس ده واقع المراه السودانيه لو قارنتها بي اي اخري هي الافضل. ياخ في امراه في الدنيا تغسل وتكوي وتطبخ وتربي وتكون شغاله,وواجباتها الزوجيه تكون قايمه بيها علي الوجه الاكمل,ومتحمله كل الشئ ده بطيب خاطرمع انو ما مفروض عليها ومفروض يكون تشاركي مع الزوج,غير المراه السودانيه
Quote: ياخ ما كسير تلج ولا حاجه,بس ده واقع المراه السودانيه لو قارنتها بي اي اخري هي الافضل. ياخ في امراه في الدنيا تغسل وتكوي وتطبخ وتربي وتكون شغاله, وواجباتها الزوجيه تكون قايمه بيها علي الوجه الاكمل غير المراه السودانيه
الحق حق يا فاروق أخوي ... إذا كانت شغالة أعمال البيت تكون مُناصفة أو الواحد يجيب ليهو شغالة تشتغل بدلاً عنها .. فالحياة الزوجية شراكة بين الطرفين ...
المُشكلة هي إنّو حنّيتها دي بتخلّيها تسكت عن حاجات كتيرة حتى ولو بلغ بها الأمر فراشها ... لكن أهو غايتو في نماذج من الضجر ظهرت في بوست زواج الخوّاجة .. والحق معهن بدون مُكابرة في البحث عن راحتهنَّ وعمَّن يقدّرهن ويتعامل معهنّ بحكم هذه الشراكة ...
Post: #8 Title: Re: انتِ اصيله وزيك وين يابت بلدي Author: فاروق عثمان Date: 10-15-2012, 11:14 AM Parent: #6
صبري ياصديق تعرف عشان كده انا قلت ليك المتحملاهو المراه السودانيه كتير,بعد الحاجات البتعمل فيها دي كلها كمان متحمله كسلنا وعدم مشاركتنا ليها والله تعرس ليك واحده ما سودانيه وتعمل ليك ربع الحاجات دي وتقعد تعمل عمايلك البتعملها للسودانيه تاني يوم تصبح في احمد شرفي ولا حمد النيل
Post: #9 Title: Re: انتِ اصيله وزيك وين يابت بلدي Author: مها عبد الله Date: 10-15-2012, 11:32 AM Parent: #8
Quote: ولو خيرت ملايين المرات وفق اعظم الاغراءات لن اتزوج غير سودانيه
يا راااااااااااااااجل!*
ــــــــــــــــ تنطق كما ينطقها محمد سليمان
Post: #12 Title: Re: انتِ اصيله وزيك وين يابت بلدي Author: Dr Salah Al Bander Date: 10-15-2012, 05:32 PM Parent: #11
صبري يا صديق ياخ ما كسير تلج ولا حاجه,بس ده واقع المراه السودانيه لو قارنتها بي اي اخري هي الافضل. ياخ في امراه في الدنيا تغسل وتكوي وتطبخ وتربي وتكون شغاله, وواجباتها الزوجيه تكون قايمه بيها علي الوجه الاكمل غير المراه السودانيه غايتو محن .... ما مندهش من التصور المتخلف دا عن الحياة الزوجية .... فهو السائد هنا في هذا المنبر .... لكن مستغرب من مها وسارة ... لانو فرحانات لهذه المداخلة .... يعني شقية الحال دي هي المواصفات التي تتفوق بها عن نساء العالم !! ..... والقائمة دي هي التي نتباهى بها بين الأمم ..... ....... حسبي الله ونعم الوكيل !
Quote: صبري يا صديق ياخ ما كسير تلج ولا حاجه,بس ده واقع المراه السودانيه لو قارنتها بي اي اخري هي الافضل. ياخ في امراه في الدنيا تغسل وتكوي وتطبخ وتربي وتكون شغاله, وواجباتها الزوجيه تكون قايمه بيها علي الوجه الاكمل غير المراه السودانيه
غايتو محن .... ما مندهش من التصور المتخلف دا عن الحياة الزوجية .... فهو السائد هنا في هذا المنبر .... لكن مستغرب من مها وسارة ... لانو فرحانات لهذه المداخلة .... يعني شقية الحال دي هي المواصفات التي تتفوق بها عن نساء العالم !! ..... والقائمة دي هي التي نتباهى بها بين الأمم ..... ....... حسبي الله ونعم الوكيل !
صلاح بندر غايتو يادكتره المره دي ذكاءك خانك انا لما اوردت الشئ ده اوردتو بي فهم استغرابي او استنكاري بمعني انو امرأه تعمل كل الحاجات دي واساسا ما مفروضه عليها ومن اولي تكون تشاركيه مع الزوج ورغما عن ذلك تعملها سواء كان بي فهم نابع من الُعرف او الثقافه او عن طيب خاطر,وبرضو تستحمل مسالب الرجل السوداني,مفروض الراجل السوداني يعمل ليها تمثال ان شاء الله المقصد من المداخله وقع ليك والاستغلاق الحاصل انفتح ليك.
الشاربات موية النيل قبل ما تتعكر في بحيرة النوبة .... ما بتلحقن .... تحية ليهن ..امهات واخوات وحبيبات وبنات
Post: #18 Title: Re: انتِ اصيله وزيك وين يابت بلدي Author: مها عبد الله Date: 10-15-2012, 06:39 PM Parent: #14
Quote: غايتو محن .... ما مندهش من التصور المتخلف دا عن الحياة الزوجية .... فهو السائد هنا في هذا المنبر .... لكن مستغرب من مها وسارة ... لانو فرحانات لهذه المداخلة .... يعني شقية الحال دي هي المواصفات التي تتفوق بها عن نساء العالم !! ..... والقائمة دي هي التي نتباهى بها بين الأمم ..... ....... حسبي الله ونعم الوكيل !
تحية طيبة د. صلاح البندر إبتدر صاحب البوست العزيز د. فاروق بدايات البوست وكتب أدناه
Quote: نساء وبنات بلدي اللائي شربن العزه والاباء من مياه هذا النيل ورضعن قيم قل ان توجد في من اجناس الارض,يحترمن المشاعر ويقدرن العشره,نساء يسددن عين الشمس بوعيهن وطيبتهن واخلاقهن الفاضله وجمالهن المميز. انحني اجلالاً وتقديرا لكل نساء وطني,ولو خيرت ملايين المرات وفق اعظم الاغراءات لن اتزوج غير سودانيه. وانتي اصيله وزيك وين يابت بلدي
كون أن المرأة السودانية صبورة وتتحمل عبء كبير يحق لنا كنسوة أن نتفاخر بذلك ، نعم يا دكتور شقية الحال تتفوق على المورتانية وعلى المغربية والفلبينية بصبرها وقوة تحملها بإعتراف الرجل السوداني بذلك ... الحياة الزوجية شراكة بين إثنين ، رحمة ومودة قبل أن تكون غسيل ومكواه وطبيخ وكل هذا ليس بمسبه لها بل إيجابيات تُضاف لها ...
