Post: #1
Title: قالوا مطار الخرطوم الجديد جاب خضار .. !!
Author: Emad Abdulla
Date: 10-13-2012, 09:07 AM
أي و الله .. ده الكلام السمعناهو .
بلا مطار جديد بلا كلام فاضي ..
إنتو زاتكم شبه مطار ؟؟ .. و جديد كمان ؟؟
خليكم في مطاركم ( ديوان ميرغني برجوبه ) ده ..
بلا فقر معاكم .
....
ده كلو هيّن ..
يجيب خضار , يجيب مويه , يجيب العيش من القضارف .. ما مشكلة .
المشكلة زرعوا الطماطم و البامية و الجرجير و الكوسه و التبش في الـ run way كيف ؟؟
غايتو الحكومة دي شديدة شِده ..
خضار يقوم في شارع الظلط ؟؟ ..
تكون دي الخبرة " الأجنبية " ؟؟ .. يا ربي ؟!!!
مش في شركات أجنبية خشت المناقصة و جابت عتادها و عدتها و حاجاتها ؟؟ .. و قالوا ح ينفذوا اكبر و أطول ممرات الهبوط و الإقلاع في المنطقة العربية و أفريقيا ؟؟ ..
بيكونوا هم زاتم الخواجات ديل قلبوها سرابات خضار ..
و عوض الله مشى اشتري واطه هناك .. قال ح يستثمرها :
خريف خريفين و ناوي أقلبها فندق .. عشان ح تكون في " محيط " المطار .. فندق خمسة نجوم كبيره .. انا زاتي كويس في شغل الخدمات ده , اقلب ليك الواطة دي فندق تمام ..
حوض سباحه و مهبط هليكوبتر و يكون فيهو جمنازيوم عالمي و جاكوزي اصلي . و الأوض بلكونات بلكونات .. ح اعمل برضو حديقة سطح عشان النزلاء يشربوا الكابوتشينو عصريات كده و هم بيتفرجوا في النيل و الطيارات القايمه و قاعدة .
و يكون الفندق ده " نقطة " إلتقاء الحضارات المختلفه الح تجي تتمنجه في مطارنا الدولي الجديد .. و تعرف البلد دي ما ساهلة .
هسه عوض الله ده يعمل شنو ؟؟
أنا اقترحت عليهو يقلب الواطة دي تلاجة موز .. أبو " نقطه " .
.............
خضار ؟؟ .. مخير الله
عشان كده أنا أتوقع " خضار المطار " ده يكون غالي خلاس ..
تشوفوا براكم .
.............
في معاينات الكلية الحربية زمان قالوا الشغلة إتصفت على كم طالب كده ..
و بقوا بس على معاينة القايد .
الطلبة شايلين هم لأنه الفرص محدوده ..
فيهم طالب شاطر شديد و كل المعاينات و الكشف الطبي و الشنو شنو ديلك نجح فيهم بامتياز ..
المشكلة إنه كان " ألجن " بعيد عنكم .. و الحكاية دي ممكن تطيروا في معاينة القايد .
المهم .. دخل على القايد و بدت الأسئلة . زولنا جاوب على أي سؤال زي الترتيب .. و القايد متحير في الزول الشاطر لكن ألجن ده .
( كمان تجيب ليها ظابط الجن دي شينة شوية .. أفرض بعدين بقى ظابط كبير في الديش و جا يخاطب العساكر , يقوم يقول ليهم : تابول سفا .. تابول إنتباه .. للحلف توول ؟؟!! ) ..
ما جاية .
قام القايد الغتيت أدا ليك زولنا سؤال تعجيزي .. :
- يا طالب . سمعت غنوة : ما بتنشتل الزهرة في الأرض اليباب ؟؟
- ايوه سمحتها يا سحاتتك
- رايك شنو ؟؟
- لايي في سنو سحاتتك ؟؟
- الزهرة دي .. ممكن تنشتل في الأرض اليباب ؟؟
- و اللاي يا سحاتتك لو العنوة دالت تده , أنا ما حندي تلام تاني .
- طيب في الظلط .. الزهرة ممكن تقوم في شارع الظلط ؟؟
( صاحبنا أخد ليهو صننننننه كددددددده , عرف الموضوع بايظ , قلب قدومو و أخد ليهو نفس و فكاها للقايد ) :
- وللاي يا سحاتتك لو ربنا ألاد ليها التيام بتتوم .. في صلحتك الدبيحه دي بتتوم .
...............
أنا غايتو ح أشتري " خضار المطار " يعني ح أشتريهو ..
ح يكون كويس شديد . اخير من خضار بابكر ود التوم ..
عامل حمارتو الشينة دي .
|
Post: #2
Title: Re: قالوا مطار الخرطوم الجديد جاب خضار .. !!
Author: محمد عبد الماجد الصايم
Date: 10-13-2012, 09:12 AM
Parent: #1
أيوا يا عمدة .. زارعين خضار!
لا وكمان بتطلع أخباروا في الجرايد!!
الحكومة قالت بدل ما نأكل الشعب نيم
في قصة المطار دي نأكلم خضار!!
وأهو كلو قايم في صلعة الشعب المسكين!!
|
Post: #3
Title: Re: قالوا مطار الخرطوم الجديد جاب خضار .. !!
Author: محمد البشرى الخضر
Date: 10-13-2012, 09:19 AM
Parent: #2
وينك يا عمدة حمدا لله ع سلامتك
ما فهمت القصة شنو الحكومة زرعت ارض المطار الجديد ولا الاهالي ساكت زرعوه ولا قام براه ؟
|
Post: #4
Title: Re: قالوا مطار الخرطوم الجديد جاب خضار .. !!
Author: محمد عبد الماجد الصايم
Date: 10-13-2012, 09:29 AM
Parent: #3
يااا عمكـ ود البشرى أب نقطة (زي الموز أب نقطة الفوق دا)!!
الجهة الماسكة المشروع زاااتم قالوا
يستثمروا الفرصة ويقبلوا بالأرض!!
موسم موسمين يطلعوا حقهم بعد داكـ يشوفو
موضوع المطار دا دراسة الجدوى بتاعتو شنو!!
_
بعدين يا عمدة .. الشعب زيتو طالع!
لازم الحكومة تساعدو بالخضار!!
|
Post: #5
Title: Re: قالوا مطار الخرطوم الجديد جاب خضار .. !!
Author: بكري عباس علي
Date: 10-13-2012, 11:46 AM
Parent: #4
يا عمدة
المطار خليهو
والخضار جليهو
انت وين يا زول ؟
بالله ما تطول كده تاني
|
Post: #6
Title: Re: قالوا مطار الخرطوم الجديد جاب خضار .. !!
Author: ابو جهينة
Date: 10-13-2012, 12:17 PM
Parent: #5
تحايا يا عماد ومشتاقون
إنت متأكد خضار ؟
لأنو الشي ال بعرفو أنو الشاي بس ال بينزرع في المدرجات.
غايتو أول مرة أشوف خضار مندرج
|
Post: #7
Title: Re: قالوا مطار الخرطوم الجديد جاب خضار .. !!
Author: احمد التجانى احمد
Date: 10-13-2012, 12:41 PM
Parent: #6
غايتو الكم برميل بترول الطلعت عندنا دى سيكت ناس ودول كتار خلاس
على الايمان سمعت من خشم مسئول كبير فى شركة مقاولات كبيرة فى السعوديه
انه التقديم للمناقصة حقت مطارنا الجديد كلفتهم 3 مليون ريال
|
Post: #8
Title: Re: قالوا مطار الخرطوم الجديد جاب خضار .. !!
Author: خالد عبد الله محمود
Date: 10-13-2012, 01:54 PM
Parent: #7
غايتو لو مشروع مطار الخرطوم الجديد ده عندو فايدة واحدة بس تبقي ياها الجابتكـ راجع لينا دي
ليكـ وحشة والله يا عمدة
|
Post: #9
Title: Re: قالوا مطار الخرطوم الجديد جاب خضار .. !!
Author: خالد عبد الله محمود
Date: 10-13-2012, 02:07 PM
Parent: #7
مكرر
|
Post: #10
Title: Re: قالوا مطار الخرطوم الجديد جاب خضار .. !!
Author: محمد عبدالرحمن
Date: 10-13-2012, 02:49 PM
Parent: #9
السعوديين القدموا للمطار ديل بكونوا عايزين يزرعوهو
(ملوخية) ...يمين بالله السعوديين ديل عندهم سماحة ملوخية
(تبت لله) ...بمشى اشتريها من السوق المركزى هنا فى الدوحة ..
بجيبوها معبئة فى كراتين ..اى كراتين ..الكرتونة على
مااذكر ب 20ر تنقص او تزيد قليلا ...شوفو بالله عظمة الخدرة..
كرتونة (راسا عديل ) ومكتوب عليها ...لكن خدرة امانة مامجيهة..
انا طبعا بوصلها البيت بس ...مابورقها ..فات عليكم انكم
تتمتعوا بخدرة السعودية دى ...لكن ال3 مليون بتاعت الراجل
تانى (يحلس كوعو) كان يشوفا ..يمين دى (اتوكرت ) وكرا
يعلم بيهو الله ...الجاتنا فى مطارنا سامحتنا ...والجات السعودية
فى 3 مليونو سامحتو ...ونسعال الله حسن الخاتمة ...
العمدة حبابو العزيز تيرابو ...جاب لينا خبر البشائر ...
انا طبعا بعرف لى بيت عذابة كاااامل هنا فى الدوحة
اى زول تسالو فيهم يقول ليك قطعتى فاتحة فى المطار
عدييييل ...اها بطبع البوست دا وبشيلو ليهم ...
|
|