المنبر ده رايحه ليه هنايه ولا شنو؟

ياخ ما ممكن الزول ليه كم شهر ما جا حايم في الحله دي
اول ما يجي داخل القي المنبر عجاجتو في السماء,شئ عرس الفلانيه وشئ الخواجه تمام,وشئ الفلبينيه بتسوي والتشاديه ببتعمل
والدخاخين مولعه الف وريحتها تجيب الهناي..............
غايتو زي ما بقول طارق جبريل وحبيب نورا
صقرطه ورقاد واطه................

البوست ما انصرافي كما يبدو في مقدمته ولكنه محاوله لسبر ظاهرة بوستات تصب في محاولة تفكيك ذهنية بنية الوعي التناسلي للسوداني
ومحاوله لممارسة نقد ذات في احتفائنا اللامبرر واعجابنا ببوستات تلمس مدارات الجنس سوا كان ذلك بطريقه واضحه او مغلفه.
وهل اشكالات الزواج ومقارباته التفضيليه من حيث الجنسيه هي مشكلتنا الانيه,ام هي احتفائيه مستتره باستمتاعنا بتناول المسكوت عنه في الجنس نتيجة الكبت والتربيه الصارمه.
ام هو نوع من التغير نتيجة ملل من بوستات السياسه والفكر والثقافه التي اضمحلت وتراجعت نتيجة تسونامي العرس ومحفزاته.
وراجل المره حلو حلا لووووووول.................

طيب قبل ما الواحد يمارس جلد ذات لحدي ما ضهرو يكب الدم لانو انا ذاتي جزء من الظاهره دي وبجي بعد شويه امارس فضح وجلد الذات في ان
لكن كنت يتساءل ليه ضربات الكيبورد بتكون عاليه جدا في بوستات بتاعت عرس عرس,وبوستات الشقئ حبيب نورا الشدر واللباسات وبوستات زيت السمسم وغيرها
الاجابه علي السؤال ده بتوديني لي نتيجتنا الطلعنا بيها فوق دي.
والراجح عندي انو ممكن زول يجي يمارس دور الالفه او الناصح وهو جوه متكيف واتكشم براهو من بوستات زي دي....

اكاد اجزم انو الغالبيه من ناس الحله دي سمعت او طقش اضانها نكته ذات حموله جنسيه واجزم تاني الغالبيه ضحكت منها
انا غايتو نكته مافيها حموله 100 فولت من دي ما بتضحكني زااتو والحكاها لي بقول ده شنو البيضه ده..
وكنا في فترة الثانوي والجامعه نتباري في جلب هكذا نكات دون ان نشعر كقروب او مجموعه باننا قليلي ادب او ما مربين.

اها بدينا جلد الذات او فضحها ليس مهما البته

الشيزوفرنيا الأخلاقيه
المصطلح ده قطع اخدر من عندي بس داير اوضح بيهو حاله ممكن تنابني وتنتاب ناس كتيرين هنا
في احايين كثيره استمتع بقصه او فكاهه ذات حموله جنسيه وفي ذات الاثناء يُفتح بوست من ذات الفصيله لوهله تنتابني رغبه ملحه في تغمص شخصية الناصح
او المصلح ولكن سرعان ما تتلاشي هذه الرغبه حيت اتذكر سفاهتي الانيه قبل قليل,فانصرف عن هذه الفكره متمتما والله الواحد الظاهر بقي عندو شيزوفرنيا اخلاقيه.
السؤال المفصلي هنا هل نحن نتجمل اخلاقيا ام نمارس نفاق ذات حين يكون النقاش جماهيريا ولكن نستمتع حين يكون ذات النقاش نقاش خاص او خلف الاماكن والدوائر المغلقه

حصلت لي قصه,كان في واحد قريب مننا وعندو علاقه ممكن نسميها غير شرعيه,اها صاحبنا ده في يوم وفي نقاش مفتوح عن رواية موسم الهجره للشمال كنا بناقش فيها بُني الوعي
وفق منهج التحليل الفاعل بتاع المفكر الشيخ محمد الشيخ وكنا جرئين جدا,اها زولكم ده جا داخل وشبكنا نصح وارشاد ونقه كتيره,انا الكلام حرقني وقربت اكشف حالو جماهيريا بس اكلت في حناني
وبعد الندوه انتهت زي العاصرني بول جريت عليهو تعال يافلان ياخ انت انا ما عارفك كل يوم بتسوي شنو شنو شابكنا الاخلاق وبتاع,اها اتقهم قام قال لي ياخ انا ما بعملها بالدس لكن........
السؤال هنا هل هناك فرق بين الفعل اذا كان لا اخلاقيا في عرف احدهم ان يفعله سرا او علنا وهل يفرق هذا الشئ في دمغه باللا اخلاقي.

ومن امثلة الشيزوفرنيا الاخلاقيه
ان يتحرر احدهم او احداهن في احد البوستات الخفيفه وياخد راحتو علي الاخر حتي ينسي اين هو ومن هو زاتو
وقبل ان ينقضي اليوم يفتح احدهم بوست من ذات الفصيله وبذات الحموله فياتي ذلك الشخص او الشخصه ممتشقا حسام الفضيله
وصارفا كميه من النقه عن الادب والاخلاق والمفروض والواقع,متناسيا في غمرة انفصامه الاخلاقي هذا ما جاد به قلمه قبل سويعات

سلامات يا دكتور
مصطلح الشيزوفرينيا الأخلاقية قد يكون غير دقيق لتوصيف الحالة البتتكلم عنها
التناقض قد يكون أدق أو التعدد المكاييل و المعايير
عن نفسي مثلا لا أرى حرج في الحديث عن الأمور دي - الجنس وكدا - سواء مزح أو جد و ما بتاكل معاي حكاية المنبر مفتوح و اسر و دكاترة وكلام فارغ
لأنو الناس كبار وما في زول جاي يتقيم اخلاقيا او يتربى هنا
في حين الكذب مثلا و الإفتراء شايفه افظع و اعظم اثرا حتى لو جا في اطار سياسة أو غيرها وكذلك الشتائم و الإساءات
بالنسبة لمسألة النكتة تضحك فيها في مكان و تنتقدها في التاني في التاني فدي طبيعية وليها علاقة بمسألة لكل مقام مقال ومش النكتة فقط حتى الكلام العادي ليهو سياقاتو و أماكنو البكون مقبول فيها
و أماكن أخرى نفس الكلام لا يليق
بالنسبة للسؤال في العنوان عن ماذا دهى المنبر الأيام دي
فاعتقد ليها علاقة بنهاية الزخم الثوري الكان حاصل ايام ثورة يونيو
في نوع من الإحباط كدا - و الله أعلم

المصريين زمان كتبوا عن بئر الحرمان ..


أنا غايتو لما زول أو زولة يكون موضوع حياتو في الدنيا دي الجنس
طوالي بجيني إعتقاد إنو عندو فراغ كبير في الحتة دي
وداير يملاهو بأي طريقة دا لو بيتملي ..

ممكن الزول يتكلم عن الجنس أحياناً كجزء لا ينفصل من تكوين الانسان
لكن يكون هاجسو البنوم وبيصحى بيهو ودايماً داير أو دايرة يوصل للناس إنو هوت ومليان احساس
وشوفوني أنا مليان رجولة ولا أنوثة يبقى حقو الناس توديهو الضل ..



قريت كتاب The fifty shades of Grey؟

الكتاب دا يا فاروق مصنف حالياً بي إنو الأعلى والأسرع مبيعاً في التاريخ
عبارة عن قصة عاطفية آيروتك جداً

تمنين في المية من إفادات الناس القروا الكتاب قالوا أقل من عادي إن لم يكن سيء من ناحية أدبية
النقاد هاجموهو بضراوة
وتم سحبو من كم مكتبة في أمريكية بحجة إنو إباحي

فهل ممكن تلقى تفسير لتصدر الكتاب دا للمرتبة دي؟


غايتو ناس علم النفس قالوا دا حرمان جنسي

الشي التاني:

الإبتذال


والمؤسف والبجيب طمام البطم لما تراهن على ذكاء وإلتقاط القارئ ..

البورد دا رايح ليه عرس ؟ ( تحيول الموقع إلى ماتشينج أو تابلويد)

هاني عربي
شكرا ليك ياخ علي ايراد الرابط

ود البشري ياحبيب
ازيك ياهندسه ومشتاقين
تعرف لما قلت الشيزوفرنيا الاخلاقيه قاصد بيها حالة ازدواجيه اخلاقيه,وامكن انا مصاب بيها,والدليل لو تابعت البوست بتلقي فيهو شئ من تناقض,لانو انا بنتقد ظاهرة فتح مواضيع العرس بالطريقه الكتيره دي
وبرضو ملاحظ فيها كميه من الاسفاف,في نفس الوكت مع انو الناس تاخد راحتها في تناول الحاجات.
عن نفسي ممكن مع خاصتي اقول اي شئ بي اي مقدار من اي حموله جنسيه وما اتحرج لكن في المنبر ما بقدر اجي اقول الكلام ده امكن رهاب اجتماعي من ثقافة العيب او اي شئ او مراعاة مشاعر الغير
المهم ده شعوري.

تيسير ازيك ياخ
وشكرا علي المشاركه الراقيه
والله الكتاب ما قريتو لكن لو عندك طريقه تلمينا فيه بنقراه نب
بتفق معاك كتير في انو اي شخص مهجس بي حاجه وبهاتي بيها بكون عندو فيها اشكال.
المشكله في بوستات العرس كان ممكن كل الزخم ده يتفتح في بوست واحد موضوعي جدا كان حا بكون مفيد وثر في مقارنة زواج الاجنبي او الاجنبيه بزواج السوداني او السودانيه
لكن اختلط السلوك القردي بالكيدي بالابتذال واي زول غنا لي ليلاه وجاء بي اجندتو عشان كده الموضوع بقي لخوخه بتاعت جنس ليس الا.

فاروق..حبابك يا صديق

جلد الذات.. كويس لكن برضك النقد مفيد..عسى و لعل..

التوهان في فقه الكوسان: نقد الفكر اليومي للعوام..!!!

لو لقيت ليك فرقة..

كبر

سلام يافاروق
أولا هناية دى مقصود بيها شنو؟
السؤال لأنى حسبت كل الحاجات الطايرة فى مثل هذه البوستات لقيتا مذكرة..
ويرمز لها بهناى..

ثانيا
نقاش الحاجات السنينة دى لو تم بصورة جادة يبقى زى مفهوم ممارسة الجنس عند البدوى السعودى الذى كان يحاور مصريا..

ثالثا
دعوا البوستات تزهر وعاينوا فى الزهور ولا تقطفوها..

رابعا
لولا شهوتى البطن والفرج لتوقف العالم فى كل نواحيه, لاسياسة لا اقتصاد لا أدب ولا قلة أدب وربما انقرض نهائيا.

Quote: لولا شهوتى البطن والفرج لتوقف العالم فى كل نواحيه, لاسياسة لا اقتصاد لا أدب ولا قلة أدب وربما انقرض نهائيا.

الولية صحتا تمام وعاجباها روحا
وماخذة راحتا شوية في التوب

راجلها قال ليها يا مرة البسي التوب دا كويس

قالت ليهو يا راجل وأما بنعمة ربك فحدّث
قال ليها هي لكن قال حدّث ما قال كورك ..

Quote: الولية صحتا تمام وعاجباها روحا وماخذة راحتا شوية في التوب راجلها قال ليها يا مرة البسي التوب دا كويس قالت ليهو يا راجل وأما بنعمة ربك فحدّث قال ليها هي لكن قال حدّث ما قال كورك ..

بالله ياخى ماتهظرى فى المواضيع الجادة دى..

لكن فى ذمتك شفتى طولة بال راجلا دا؟
بس ان شا الله مايطلع خواجة!


** دا مارد يا تيسير دا اسناك بس
مداخلاتك غميسة وبتحتاج لوقت عشان الواحد يخترع ليها رد!!

سلام يا فاروق

ياخ حمدلاك بسلامة الرجعه لمنبر من لا منبر له
بعد غيابك لشهور .
بالله يا فاروق احكي لينا الشهور القضيته في
ارتريا جارة البحر زي ما قال كجراي و احكي
لينا عنها و عن اصحابنا هناك .





ـــــــــــــــــــــــــــــــــــــ
لو حكيت بضمن ليك البوست دا يضرب بقية
البوستات عشرة صفر بس ركز في حكيك عن
جلد الذات لوووووووووووووب

بله موسي ازيك
ياخ انت اظنك ما فهمت كنتة البوست ده
انا قلت ليك بنتقد في التبعات بتاعت بوستات العرس العرس وما الت اليه
وعرجت علي نقد روحيتي دي زاااتها في عضمها كجزء من الشخصية السودانيه رضي الله عنها
وانو زي ماقال ود البشري لكل مقام مقال والبفوت حدو بتقلب ضدو
يعني من مواضيع جاده وكان ممكن تتناقش بي حفر تقيل في نمطية الشخصيه السودانيه الموضوع قلب لي لغه تاني
ده طبعا مع حق اي زول انو ينوم علي الجنبه البتريحو

كبر يا صديقي
ياخ انت يجوك محزمين
وما تنسي اخوك مؤتمرجي ليه ضل
مؤتمرجي دي مقصود بيها مؤتمر الطلاب المستقلين كانو بقولوها لينا لمن الكيزان كان اسمهم الجبهه الاسلاميه القوميه
كمؤتمرجي عتيق اولا
وكطارح نفسي ناقد جاييك تب
وشكرا علي البوست القيم ده

الزول فيكم داير يرقد رز ما يرقد ياخ
طارق جبريل وحبيب نورة سووا ليكم شنو



فاروق ازيك ابوي







تليشة:
انا بطني طامة ليها اكثر من شهرين

سفيان بشير
ياخ لوك الصبر
عندنا بوست الموسم قريبا علي شاشات سودانيز اونلاين
بطولة
تيجاني كومار الحاج
ناظم الدين علي خان يعقوب
عارف اكبر الصاوي باتشان
حامد شاروخان الناير
و
فايز الدين سليك راجيش
واخرون
لا تفوتكم التحفه الرائعه
ايام في اسمرا
يوجد غناء رقص اكشن واي حاجه زاتو


ازيك ياوغد مشتاقين وتقبل تحيات الشباب

سلامات يا فاروق



في اقلام بتزبط دفة المنبر
بغيابها المركب بتجي على المياه الخفيفة

هسي لو بشاشا، تراجي، معاوية عبيد، محمد سليمان و و
بوستات الجنس كان غرقت في نص البحر


مودتي

طارق جبريل
ازيك ياخ ومشتاقين
ياخ كان بطنك انت طمت فاكهة البورد معناها راحت في حق الله
ياخ انت وحبيب نورا ضربنا بيكم المثل عشان بتمتعو الجماهير دي في حنانها
فشنو يا قريبي ابقي تعال ياخ وبطل حركات رقاد الواطه ههههههههههههههه
من ناحيه راقدين رز الناس دي راقد طحنيه غايتو

الأخ فاروق عثمان لك التحية
يااخي ده حاجة محتاجة دراسة جد جد
وكويس انك فتحت بوست وتم فيهو نقاش اصلا النقاش في حوش بكري ده زااااتو قسمة ونصيب
كنت قد كتبت من قبا اسأل ايضا :
انتو يا جماعة مالو البورد ده بقي زي محكمة الأحوال الشخصية ؟؟؟؟

هناية فسرتها عرسة تبعا للمواضيع السابقة بخصوص العرس سوا من أجنبي ، مورتانية ، مغربية أو حبشية ( بإعتبار زيارتك الأخيرة لأرض الأحباش ) توقعت بوست عن زواج الأحباش أحلي زواج هههههههههههه

الما عاجباهو السودانية / السوداني طوالي يتخارجوا على مورتانيين اون لاين ، فلبينيين أوون لاين ، مغربيين أوون لاين وهلم جرا ويسلمونا باسوورداتهم دي بالله لووووووووووووول

تحية وسلام عزيزي فاروق ومتابعة حتى نجد هناية الرايحة دي

Quote: الما عاجباهو السودانية / السوداني طوالي يتخارجوا على مورتانيين اون لاين ، فلبينيين أوون لاين ، مغربيين أوون لاين وهلم جرا ويسلمونا باسوورداتهم دي بالله لووووووووووووول

سلامات يا فاروق,,

وسجل عندك كمان,,

بالنهار كوريلا و بالليل غوريلا ..!

تحياتى,,