زول سخيف جدا جدا...يوجد فيديو

I like her .
she is inspiring .


that's my girl









(sent from Samsung tab2)

ترجمة سريعة لمحتويات الفيديو...
السيدة فى الفيديو مقدمة لاحدى البرامج التلفزيونية الاخبارية اليومية فى احدى
المدن الامريكية (غالبا روشتستر..مسقط راس البوردابى على سرالختم)

تقول فى الفيديو انها تود ان تتحدث عن امر صار حديث "المجالس" فى الكميونتى
وفى الفيس بوك ...
جاءتها رسالة من احدى المشاهدين ...مختصر الرسالة ..ان المشاهد ممتعض من ظهورها
فى التلفزيون بوزنها الزائد وانها لم تسعى لانقاصه ..انها بذلك تكون قدوة سيئة للشباب
الناشئ خاصة البنات منهم .... السمنة واحدة من اسوأ الخيارات التى يختارها الانسان واخطرها
فى نهاية رسالتى(يواصل المشاهد) اتمنى ان تكونى قدر المسئولية وتعملى على انقاص وزنك فانك
شخصية عامة يجب علىك تشجيع الناس لحياة صحية معافة...
انتهت ترجمة تلخيص الفيديو

الرد بتاعها كان قوى جدا جدا واترك الميكرفون لاحد عتاة الترجمة

الحبيب النصرى

فتشت للبوست بتاعك عشان اخت فيهو الفديو فلم اجده

الزول السخيف ده فى ويسكانسن اعتقد

لكن عجبنى ردها ......ريحنى فى كنكوجى ده


ما ارح..

غاااااااااااايتو

نحن عرب ساي يا النصري أمين .. بالله عليك ترجم لينا ردها ونكون من الشاكرين ..!!

you Nazir
you spent 4 years in India ;; tourism ???
just kidding .



i will do it when i get home

هاك يا ناذر الترجمة بتاعت الفيديو كله ...بس لازم تفهم خلفية الموضوع..
فى امريكا وكندا فى مشكلة كبيرة جدا فى المدارس وهى الفتونه او الفتوة
وهى بعض الطلبة يقومو بتخويف طلبة اخرين بسبب ضعفهم او لونهم او اى اسباب اخرى

الفتونه منتشرة جدا وفى كل المدارس وضحاياها بعشرات الالاف بعضهم يحاول الانتحار..
الفتونه انتشرت فى الانترنت وكثير من الشباب انعزل داخل غرفتهم خوفا من التهديد

المهم هاك الترجمة على السريع وبدون مراجعة


""""""""""


اود ان اغتنم هذه الفرصة لاتحدث عن امر يخصنى صار حديث المدينة خاصة فى الفيسبوك
يوم الجمعة الماضية وصلتنى رسالة بالايميل عنوانها مسئولية المجتمع تقول الرسالة
تحية جنبفر
من العادة ان لا اشاهد برنامجك التلفزيونى ولكننى اليوم شاهدت جزء فليل من البرنامج لقد اندهشت لانك جسمك
لم تحسن طوال هذه الفترة ..واضح انك لا تعتبرى نفسك قدوة ومثال لبقية الشباب خاصة الفتيات صغيرات السن ..
السمنة من اسوا واخطر العادات التى تصيب الناس
فى الختام اتمنى تعيدى النظر باعتبارك شخصية عامة يفترض ان تشجع الناس لممارسة عادات صحية وغذائية سليمة

انتهت الرسالة

وهنا رد جنيفر

"
نحن فى وسائل الاعلام دائما نتلقى كمية كبيرة من الانتقادية الايجابية ونعتبر ذلك امر طبيعى لكن هذا الايميل
بالتحديد اكثر من ذلك ..هو ليس فقط نقد ..حاولت المستحيل ان اتناسى امر هذه الرسالة التى اذتنى جدا
فى شخصى وفى مظهرى ..زملائى فى العمل لم يستطيعوا الصبرعلى الرسالة خاصة زوجى المذيع الذى يبلغ طوله
سته قدم وثمانية بوصات
زوجى مايك قام بنشر الرسالة فى صفحته فى الفيسبوك ..ما حدث بعد ذلك فهو امر مدهش ..مئات من الاشخاص قامو
بالرد على الرسالة وساعدو فى رفع روحى المعنوى واتخدو موقف مشترك ان هجوم مثل هذا يجب ان لا يحدث ...
قبل ذلك احب ان اقول اننى فعلا زائدة للوزن ..يمكنك ان تطلق على سمينة ...لذلك الشخص الذى كتب تلك الرسالة
هل يظن اننى لا اعرف ان وزنى زائد ..هل عالمك المثالى يمنعنى من رؤية الامر

انت لا تعرفنى ..ولست يصديقى انت لست جزء من عائلتى ثم انك اعترفت انك لا تتابعى برنامجى ..
لا تعرف عنى اى شئ عنى ماعدا ماتراه على الشاشة
انا انسانه ذات مشاعر وليس فقط رقم فى ميزان الوزن ..

اود هنا ان اشير لشئ مهم .. وهى دعوةى لكل شخص منا ليستفيد من هذه التجربة
شهر اكتوبر هو الشهرى القومى لمحاربة الفتونه.

مشكلتى هذه من نوع المشاكل التى تحدث فى المدارس كل يوم كما تحدث ايضا فى الانترنت انه
امر جسيم يواجه النش هذه الايام
انا كأم لثلاث بنات صغار هذا الامر يرعبنى ... عن نفسى لا يهم لانو جلدى تخين .
كلمات تلك الرسالة تعنى لى لاشئ ولكن الذى اغضبنى ان هناك اطفال لا يعرفون التعامل مثل هذه الخطابات
العدوانية فى مدارسهم.
الانترنت اصبحت سلاح ومدارسنا صارت ميدان للمعارك
هذا السلوك السيئ مكتسب من شخص لاخر
هذا الشخص الذى كتب الرسالة غالبا يتحدث امام اطفاله عن المذيعة السمينة فى التلفزيون فى الصباح اطفاله
سياتون للمدارس يسبون باقى الاطفال بانهم سمان

علينا تعليم اطفالنا ان يصبحو مهذبين وليس عدوانيين وعلينا فعل ذلك بالقدوة الحسنة
الكثيرون منكم اتو للدفاع عنى وانا ممتنة بذلك
لجميع زملائى فى العمل ولاسرتى لا استطيع ان اشكركم كفاية ولوقفتكم القوية ضد الفتونه
نحن احسن من اولائك الفتوات
كلمة اخيرة لكل اطفالنا الذى يشعرون بالضياع ..يعانون من زيادة الوزن او العرق او الميول الجنسية
او الاعاقة اسمعنى جيدا لاتنهزم للفتوات ..واجههم كما فعلت انا

شكرا النصري ..

Quote: you Nazir you spent 4 years in India ;; tourism ??? just kidding .

ههههههههه كلو طار لمن جينا السودان دا هههه

بالنسبة للتنمر في المدارس الأمريكية فعلا هو ظاهرة مزعجة وخطيرة جدا الكثير من الأفلام التلفزيونية تتناول تلك الظاهرة مباشرة أو غير مباشرة .. لفت نظري تبني الأتحاد العالمي للمصارعة الأمريكية لحملة ضخمة جدا طافت على معظم مدارس الولايات المتحدة وكانت الحملة تحت شعار dont be a polly .. be a star وكانت تخصص زمنا من بث حلقات المصارعة لبث لقطات من زيارات نجوم المصارعة العالميين للمدارس وتوزيع تي شيرتات واعلام والتوعية بأهمية عدم التنمر على زملائك التلاميذ ...

بالنسبة للمذيعة .. مع أنو كلاما منطقي لكن برضو كلام الزول السخيف فيهو شي من المنطق في رأيي المتواضع ..

مشكور يا النصري ...

الظاهر يا ناذر صاحب البوست هرب بجلده ......


زمان فى امريكا فى واحد صاحبنا كان ببهرنا جدا بمعلوماته ..اها يوم على سرالختم(صاحب البوست)
اكتشف الحقيقة العجيبة ...قال انه ثقافة جعفر (زولنا المطلع) ثقافة جرائد .....

حسى انت يا ناذر واضح انك ثقافتك بتاع امريكا الشمالية ثقافة مصارعة حرة .....
زمان كنت جار الموسيقار بشير عباس ....اكتر شئ كان بدهشنى عنه هو حبه للمصارعة الحرة ...
كان بعرف اسماء المتصارعين وتواريخهم ولمن يحضر حلقة حية على الهواء كانه هلالابى (او مريخابى)
يشاهد هلال مريخ على كاس الممتاز .....

نرجع للموضوع ....المصطلح Bullying لا اعرف له نظير فى العربية ...انت قلت معناه التنمر ..
واضح الاثر الشامى فى اصل الكلمة ...لكنها لا تعكس حقيقة المعنى .....
الكلمة ذات الاصل المصرى فتوة او فتوات اقرب قليلا للمعنى وان كنت اظن ان اللغة العربية
تحتاج لكلمة مطابقة لمعنى الفعل وهو التخويف والاذدراء .....


سخافة صاحب الرسالة تتركز فى تلقى المرسل اليه وكيفية تقبله لها .....
مثلا بسيط ...نحن فى بوست الخاسرون العظام نتجنب تماما استخدام الكلمات الجارحة التى
قد تؤذى احد نسبة لحساسية الموضوع .... فاى موضوع حساس يجب التعامل معه بحذر درء لاى
الم قد يحصل .....

نواصل

and I am much more than just a number on a scale

علي اليمين دي أقوى حتى في الرد...الاستفزاز حار والله ..لكن ردها كان قوي خاصة الحتة دي..


..

.

الحبيب ناذر
الحبيب النصرى
فى حادثة من البوليز حصلت هنا فى روشستر فى بص المدرسة الضحية سيدة تعمل لشركة بص المدرسة ومهمتها ان تجلس فى البص لمراقبة الطلبة وهم يركبون وينزلون من البص بسلام وسلامتهم داخل البص ايضا والجناة طلبة اولاد شفّع كده.. حا اجيب ليكم الفيديو

الفيديو بتاعها ده امريكا كلها شافتو وصورو واحد من الطلبة بالموبايل بتاعو..الشى الحصل انه الناس اتعاطفت معاها من كل فج عميق وبما انها كانت على اعتاب المعاش الناس اتبرعوا وجمعوا ليها اكتر من 800.000$ تمنمية الف دولار

اعتقد انه جمعو ليها حوالى 800.000 دولار

سلام النصري ..

Quote: نرجع للموضوع ....المصطلح Bullying لا اعرف له نظير فى العربية ...انت قلت معناه التنمر .. واضح الاثر الشامى فى اصل الكلمة ...لكنها لا تعكس حقيقة المعنى .....

طيب رايك شنو في مصطلح قندا gunda كنظير له في الهندية ؟!

كنت داير أقول ليك بلطجي لكن دي كتيرة شوية .. فعلا مصطلح فتوة أو فتونة هو الأنسب ..!!

بالله بشير عباس بيحب المصارعة الحرة هههههه والله بيني وبينك المصارعة دي بتتراد وممكن الزول يشوفا على الأقل فيها اثارة أكتر من الملاكمة والباسكت بول ...


ويا علي سر الختم بتاع ثقافة الجرائد .. يا زول وينك إنت ؟؟ طولت ما ظاهر ؟!!

بالنسبة للفيديو .. يا خي والله الموبايلات الفيها كميرات دي بقت تخوف .. زمان السعودية حظرتا .. ما عارف فكت الحظر منها تاني لييه ؟!!

Quote: طيب رايك شنو في مصطلح قندا gunda كنظير له في الهندية ؟!

برضو الـ Ragging ياناذر

Quote: Ragging is a practice in educational institutions in India, Pakistan, Bangladesh and Sri Lanka that involves existing students baiting or bullying new students. It is similar to the American phenomenon of hazing. It often takes a malignant form wherein the newcomers may be subjected to psychological or physical torture.[1][2] Currently, Sri Lanka is said to be the worst affected country in the world

http://en.wikipedia.org/wiki/Ragging

-
سلامات صاحب البوست

Quote: and I am much more than just a number on a scale علي اليمين دي أقوى حتى في الرد...الاستفزاز حار والله ..لكن ردها كان قوي خاصة الحتة دي.. ..

الحبيب محمود مصطفى محمود

انها فعلا جملة معبّرة جدا ..قوية وخطيرة والله

تحياتى ياحبيب

Quote: ويا علي سر الختم بتاع ثقافة الجرائد .. يا زول وينك إنت ؟؟ طولت ما ظاهر ؟!!

ولدنا ناذر

يسال منك الخير يا حبيب

فى واحد عنده talk show فى اذاعة محلية فى روشستر هنا بفتكر انه جنفر دى اعلنت المسالة دى بالطريقة دى فى التلفزيون عشان تطلع ليها بى قرشين تلاتة زى الحبوبة فى البص



وبعدين انت بتسال النصرى يترجم ليك ليه يعنى الحقارة دى؟ انت قايلنى انا قاعد اتنين وعشرين سنة فى ام طرقن عراض ولا شنو
؟

بجيك راجع لى موضوع مهم جدا بخصوص البوليز فى المدارس

Quote: سلامات صاحب البوست

وعليكم السلام ورحمة الله تعالى وبركاته حبيبنا حيدر حسن ميرغنى

اشكرك على اثراء البوست يا اخى

لك عاطر التحايا والود

سلام حيدر ..

Quote: برضو الـ Ragging ياناذر

غايتو قعادك في شرق اسيا نفعك كتير وخلاك تعرف عن عادات الهنود والبنقالة ههههه

مشيت الدكشنري لقيت كلمة راقنق دي عندها كم معنى ..

أنا غايتو لو دايرني أترجم ليك التنمر بالسودانية ما بلقة أحسن من وصف كلمة حقارة ..!!

من احنا في المدارس الابتدائية والمتوسطة اي زول أسمن منك او بيحب يضارب في الفصل كنا بنقول عايهو (الزول دا حقار) ..!!

ما اظن في السودانية عندنا كلمة مرادفة ليها ..


علي سر الختم ..

أنا طلبت ترجمة النصري عشان ولدنا ود الهند وزول مضمون .. لكن ترجمة البواليس دي ما مضمونة هههههههه ...

مش انتو الدرشتو زول في المعسكر امن زيتو طلع وقال ليكم انا عندي ماجستير .. وقلتوا ليهوا هنا ما بنعرف لا ماجستير لا بلهارسيا ولا ناسا غيركم هههههههههههه

شوف الـ Ragging هنا عند الجنسين




ده على خفيف
في نوع تاني يؤدي إلى الـ intensive care unit

Quote: أنا طلبت ترجمة النصري عشان ولدنا ود الهند وزول مضمون

يا ناذر بالله ما تجيب لى سمعة ...نحن ناس المعهد الفنى ......
لكن نفسى امشى الهند سياحة واشوف المنبوذين the Untouchables عايشين كيف ..


يا على السر والله العظيم سمعت بالفيديو بتاع السيدة المسنة وما تعرضت له من
اذى فى البص لكن تجنبت مشاهدته ...ياريت لو اقدر اترجمه بس لغة الاولاد ديل من
الصرة ولتحت .....شئ محزن جدا جدا ...

مرة سالت ولدى هل اتعرض ل bullying فى المدرسة قال انه كان both sides of the fence
معنى كلامه انه فعل bullying تجاه بعض التلاميذ وفى نفس الوقت تعرض هو نفسه لل bullying

انا شخصيا حتى السادسة ابتدائئ كنت مسكين جدا خاصة سمعنا فى بعض الطلبة ينتمون لعصابات معروفة
فى ذلك الوقت جعلنا نخشاهم خوفا من العصابات ....بعد سادسة حصل العكس بقيت ضمن الطلبة الذى
يسخرون من الاخرين ...لم نكن نضرب او نستعمل القوة لكن نضحك ونغرق على كل طالب مسالم خاصة اذا كان
فى حاله ومنزوى ,,,,ازكر مرة كنا نضحك على تلميذ اظنه كان مصاب بنوع من الزكام ...كنا نغرق عليه
ونقول (مع المحاكاة) انه يلحس مخاطه عندما ينزل من انفه .....

يا حيدر القزازة الرافعاها البت دى اوع تقول لى فيها بولندا وكده؟




اللهم اجعله apple juice

Quote: مش انتو الدرشتو زول في المعسكر امن زيتو طلع وقال ليكم انا عندي ماجستير .. وقلتوا ليهوا هنا ما بنعرف لا ماجستير لا بلهارسيا ولا ناسا غيركم هههههههههههه

يانا نحن ذااااااااتنا ههههههههههههههه

ضد الإستقواء والتنمر
من اجل اطفال اسوياء
محبتي

بأمانة ما شايف أي تنمر في رسالة الزول ده !! الزول قال رأيو بكل أدب
لا مقارنة إطلاقاً بين ما فعله التلاميذ في البص للسيدة مع رسالة هذا المشاهد


الزولة دي كبرت الموضوع ساكت

Quote: الزولة دي كبرت الموضوع ساكت

الاخ الحبيب خالد

فى راى بيقول نفس كلامك ده وانه هو رسل ليها رسالة بالبريد الالكترونى وماكان فى داعى انها تعلن الموضوع للملاء وكان بس ترد ليهو بالبريد الاكترونى برضو وبما انه موضوعها ده حصل بعد حادثة الحبوبة الفى البص وكمية القروش الاتجمعت فى ناس كتاااار بفتكرو انه هى عملت كده عشان احتمال يجمعوا ليها قروش برضو

لكن الرسالة كانت قاسية جدا يا خالد مافى شك

تحياتى ياحبيب

تسلم

Quote: ضد الإستقواء والتنمر من اجل اطفال اسوياء محبتي

استاذنا الحبيب السنى

اشكرك على المرور ودمت بالف خير

تسلم