انتو يا جماعة مالو البورد ده بقي زي محكمة الأحوال الشخصية ؟؟؟؟

فلان عرس
فلان طلق
فلان ولد الجنا وسمي
وفلان ...
وان شاءالله اصحي والقاه : أتاريه كان حلمة زي ما قال ود اليمني
غايتو للضمان كدي احسن سيد الحوش ده يعمل لينا هامش كدي تحت المنبر يسميهو ( علي كيفك )
وبالتالي هناك العاوز مثني وثلاث ورباع
او عاوز يطلق
او عاوز موريتانية
او تشادية
او منقولية زاتو
او عاوزة خواجة
او ألماني
او بريطاني
كلو علي كيفو

مع انو انا ذاتي بلقي روحي جاري جري علي المواضيع الزي دي
لكن ده بكون من شنو ده؟؟؟؟
امكن عشان ثبات الشارع وكدي
ولا عشان القرف ال نحن فيهو بنكوس لينا لي متنفس تاني ؟؟؟

وبقينا زي شيخنا ود الشايقي تلميذ الخلاوي

مر بالمال والبنون فتنحنح وتبسم
وبآيات الطلاق فتجهم
وبمثني وثلاث ورباع
وقف الشيخ طويييييييييييلا
وقال زي ما جا في القصيدة :
انني قصرت في حق الكتاب
اين مني السرتية
اين مني زوجة بكر صبية
اين من المحلبية
والبخور الأجنبية
وال شنو داك ما عارف

والغربية البوستات الزي دي تلقي الكرعين تتطاقش عليها
واحد بي عمة
وواحد بي بدلة
واحد بي بنطلون سادة
وجكس طالع
وجكس نازل
وجكس حائم
وشكلة قائمة
وانتو احلي
وانتو اشني
وفريق برشلوني التطلع
واخر ايطالي النزعة والهجوم
وواحد دوري ممتاز بس وحامد وشاااااااااااااكر
الحكاية شنو ؟؟؟؟
غايتو حقو نعمل لي دراسة للحكاية دي نشوف اسبابها شنو
ولا نسوق سواقتنا ؟؟؟

غايتو جهجهتوا حياتنا الزوجية زاتو
الواحد يخش بوست تبارك يقول الحمد لله الذي سخر لنا هذا
يخش بوست حليمة يقول اسي دي وقعة شنو الوقعت فيها دي ويفكر يبيع غنيماتوا ويشوف بصارة يمشي يشوف ليه خواجية عيونها زرق وشعرها اشقر عشما في وليد زي كديس الأستبالية ازريق وعيونو خضر
يمرق من ديل كلهم يخش علي بيت اخونا بندر يحجز موريتانيا علي طول
وهو في ده ولا ده
نسمع الكواريك ضربت في بيت تاني قالو صلاح عرس نضال