Post: #1
Title: يعني إلا الليلة نتقطع ؟
Author: أبو ساندرا
Date: 10-07-2012, 01:53 PM
Parent: #0
يحكى عن مجموعة من ظرفاء أم درمان كانوا يغزون بيوت العزاء من اجا وجبة الغداء
وكان لهم طواف ليدلونهم على فراش مؤثرين لأن صوانيهم بتكون مدنكلة وعامرة بالمطايب
وكانوا بيركزوا على احياء بعينها ، مثل الملازمين
صدف ان كان ههناك ثلاث بيوت عزاء إتزامنت و إتجاورت
فتمحن أصحابنا أي فراش يختارون
وصدح أحدهم بالعبارة عنوان البوست ، والتي صارت مثلآ في أمر الحيرة
( يعني نحن الليلة نتقطع ؟ )
سؤال المحتار ذلك تذكرته اليوم وأنا بصدد الإختيار و الإختيارات عصية
مثلآ :
اليوم الأحد ، فعاليات اليوم الثاني لورشة المركز العربي للأبحاث ودراسة السياسات
بعنوان : الإسلاميون ونظام الحكم الديمقراطي .. تجارب و إتجاهات
أمس السبت ظللنا نركض بين قاعتين في شيراتون الدوحة ( الريان و المجلس )
وبينهما رواق مدت عليها صنوف من الطعام ، أميل لأصناف لكن المغني قال : صنوف من الوجد الملح
اليوم ستتكرر نفس الحالة ، في ذات الوقت تعقد ندوة/ ورشة في كل قاعة
فتأملوا العناوين :
1- موقف من المواطنة ، والدولة والعلاقات الدولية ، هذه في قاعة الريان ، والعناوين الصغيرة
مابعد الثورات العربية ، الإصلاح الديني والعلمانية
منظور الحركات الإسلامية تجاه العلاقات الدولية ، التطور والمضامين والممارسات
القوى الإسلامية والتحالفات المبرمة خلال الربيع العربي وبعده
في ذات الوقت في قاعة المجلس ، عنوان رئيس : حركة النهضة وتحديات بناء الدولة في تونس
عناوين فرعية:
- الاسلاميون في تونس وتحديات البناء السياسي والاقتصادي للدولة
- الاسلاميون في تونس ، قضايا المرأة بين مطرقة النص وسندان الواقع
-الاسلاميون والممارسة الديمقراطية في مصر وتونس بعد الثورة ، زؤية نقدية
وهناك 3 عناوين رئيسية أخرى تحتها عناوين فرعية في القاعنين
الترابي سيواصل ما بدأه أمس تحت عنوان : تجربتي الاسلامية بين الفكر والسياسة
ثم ندوة مفتوحة بعنوان : الإسلاميون والتحول الديمقراطي
من ضمن المتحدثين الثلاث ، الدكتور غازي صلاح الدين العتباني
بالأمس قدم الدكتور عبدالوهاب الفندي إنتقادات حادة لدكتور الترابي
|
Post: #2
Title: Re: يعني إلا الليلة نتقطع ؟
Author: أبو ساندرا
Date: 10-07-2012, 01:54 PM
Parent: #1
ما سبق كله كوم
والكلاسيكو الاسباني كوم تاني براهو
الله يعين
|
Post: #3
Title: Re: يعني إلا الليلة نتقطع ؟
Author: أبو ساندرا
Date: 10-07-2012, 01:58 PM
Parent: #2
الاثنين غدآ ، اليوم الختامي ح يكون مسخن
المحاضرة العامة ح يقدمها راشد الغنوشي
بعنوان : التيار الإسلامي وقضايا الدستور الديمقراطي
وجلسات النقاش كلها حول : الإسلاميون والتحول الديمقراطي
|
Post: #4
Title: Re: يعني إلا الليلة نتقطع ؟
Author: محمد مصطفي مجذوب
Date: 10-07-2012, 02:29 PM
Parent: #3
غايتو يا ابوساندرا
عشان انت ابو بنات نقول ليك حسادتا تولدك وليدات يضوقوك الشلهته والجري الجد جد ....
.قال شنو | Quote: أمس السبت ظللنا نركض بين قاعتين في شيراتون الدوحة ( الريان و المجلس ) وبينهما رواق مدت عليها صنوف من الطعام ، أميل لأصناف لكن المغني قال : صنوف من الوجد الملح اليوم ستتكرر نفس الحالة ، في ذات الوقت تعقد ندوة/ ورشة في كل قاعة |
عليك النبي شوف الزولده! ..
انتي وين يا وضاحة ما شايفا ابوساندرا ده بعد ما عالجتو ليهو عيونو بقت عينو قويه كيف ؟
تعال يا ابو البنات و شوف اجتماعاتنا احنا اللامن يدوك فيها ساندويتش كيش وشرم وسموكد سالمون وحاجات تاني كدي لا بتعرفو نجيض واللا بي دمو وتكون واقف قداما محتار زي اللوحة السيرياليه اللا يشرحوها ليك شرح حتي تفتكرانك بتضوق ليها طعم ..مرة كاوتش ...ومرة صرقيل ...ومرة حاجات تاني انا بستحي ما بجيب سيرتا وتتجوغر بالعصير والناس تشفط قدامك في الشامبانيا والواين ابيض واحمر والفودكا والوسكي.. وبعد ده عشان تكون سيفيلايزد لازم غصبا عن عينك .. تتشحط وتقول ليهم شكرا علي الكرم الحاتمي
ينفعك يا يابا المحمر والمقمر .. قول آمين ... بس ادعو لينا معاك
|
Post: #5
Title: Re: يعني إلا الليلة نتقطع ؟
Author: أبو ساندرا
Date: 10-08-2012, 08:16 AM
Parent: #4
محمد مصطفى مجذوب :
| Quote: ينفعك يا يابا المحمر والمقمر .. قول آمين ... بس ادعو لينا معاك |
آميييين ، ومطرح ما يسري يمري ، وكل ينفعه مما تيسر له
أها ، اليوم لائحة الغداء ضمت عدة أطباق بحرية من النوع البيرفع الكفاءة
صدقني لو قلت ليك انا شهدت الوفد الجاي من الخرطوم في الأيام الأولى
وأمس شفتهم بعد اليوم العاشر ، حصل تحسن نوعي في هيئتهم، مع أن بعضهم من أثرياء السلطة
غايتو في الدورة الجاية بنتوسط ليك عند الدكتور النور حمد عشان تصلك دعوة
للمشاركة في الملتقى القادم
بس ملاوز تقوم تختفي وترفض المغادرة
|
Post: #6
Title: Re: يعني إلا الليلة نتقطع ؟
Author: أبو ساندرا
Date: 10-08-2012, 09:20 AM
Parent: #5
التعب الممتع
كان في المساسقة بين القنوات
قناة تعرض الكلاسيكو المثير الممتع و اربعة اهداف أي منها يمثل قمة الروعة
وقناة اخرى تعرض الانتر ميلان و ميلان
وتعادل بهدفين ، أربعة أهداف مصنوعة قاسمت اللقاء بين سان جرمان ومرسيليا
وجبات رياضية غنية جدآ
ومناقشات حيوية ضمتها قاعتين في شيراتون الدوحة
وتوزع البال والمزاج
|
|