دعوه هامه للسودانيين بدوله قطر

يزور الدوحه وفد من بنك البركه السوداني برئاسه نائب المدير العام ومدير فرع المغتربين
وسوف يعقد الوفد لقاء مع الجاليه السودانيه مساء غدا الإثنين 8/أكتوبر/2012 بفندق ميلينيوم السد.
وسيقدم الوفد شرحا للخدمات البنكيه الجديده التي سوف يقدمها البنك في مجال التمويل العقاري وتمويل
تعليم الأبناء والسيارات.

والدعوه لجميع أفراد الجاليه,,,

.

يا كمال إنت بقيت طاشي والا شنو؟

بتعمل دعايات - ومجانية كمان - للمؤسسات الكيزانية؟

بكرة الساعة كم ان شاء الله

بالجد في ناس بقى عندها هوس وجن عديل كدا ضد السودان والكيزان زهللو بيهم
يعني الشعب يطبق يدينو وينتظر معارضتكم المهببة تغير النظام يا ابو الريش
اي حاجة بتفوت حدها بتنقلب الى ضدها

اللقاء سوف يكون فى تمام الساعه الثامنه من مساء غدا
شكرا يا الشيخ على التنبيه .

أبو الريش تحياتى ,,

يازول بنك البركه ده فتح فى السودان من أيام نميرى قبل ما الكيزان يستلموا البلد ,
وهو ملك للشيخ صالح كامل رجل الأعمال السعودى .
وبنك البركه هو الؤسسه المصرفيه الوحيده التى لم يستطع الكيزان إختراقها بالرغم
من محاولاتهم العديده .
فالشيخ صالح كامل رجل قوى وله نفوذ واسع خاصة فى المملكه العربيه السعوديه
التى يعملون لها ألف حساب .
ثم يا أخى إنت عايز المغتربين ديل يكونوا طول عمرهم بقره حلوب ؟؟!!
فإذا كانت هنالك أى جهه يمكن أن يستفيد منها المغترب فائده حقىقيه ومثمره له ولأسرته
فمرحبا بها أى كان توجهها طالما إنها خدمه تقدم له بكل شفافيه وصدق .

دكتوره نجاة ,,

تحياتى وعساك والوليدات بخير ,,
ناس أبو الريش ديل عايزننا نترك الجمل بما حمل
وننسى حقوقنا كسودانيين .
الكيزان مصيرهم إلى زوال طال الزمن أو قصر .

تحياتى ,,

Quote: يازول بنك البركه ده فتح فى السودان من أيام نميرى قبل ما الكيزان يستلموا البلد , وهو ملك للشيخ صالح كامل رجل الأعمال السعودى .

وهو مع بنك فيصل وفروا التمكين الحقيقي من أيام نميري.

إنت قايل الناس ديل بدوا شغلهم بعد الإنفاذ؟

أنشأالله حضور يا كمال

بالله يا كمال بعد يخلصوا من هناك

خليهم يجو علينا بي جاي في السعودية

بارك الله فيك

مناسب

يا كمال

ناس بنك البركة ماجايين السعودية وتحديداً المنطقة الشرقية بمدنها العريضة مثل الدمام والجبيل
بالله أسألهم لينا ياخ لو سمحت أخي كمال

الصادق

Quote: فإذا كانت هنالك أى جهه يمكن أن يستفيد منها المغترب فائده حقىقيه ومثمره له ولأسرته فمرحبا بها أى كان توجهها طالما إنها خدمه تقدم له بكل شفافيه وصدق .

معاكم يا كمال وشكرا لك على الخبر

.......

*

يعطيك العافيــة يازعيـــم



وفي ميزان حسناتك



وانشاء الله ربنا يسهل لينا الحضــور



ومزيــدا من المشاريع الناجحــة



أبومصطفى

حذف للتكرار

لمعرفة الجميع اقول

اولا: إن تعيين وفصل وايقاف عن العمل لمديري كل البنوك في السودان لا يتم ذلك إلا بموافقة محافظ البنك المركزي .. للتوضيح بصورة لا لبس فيها اكرر كل البنوك حكومية كانت ... ام خاصة ، اجنبية عامله في السودان .. او سودانية تعمل في فروع خارج السودان .. محافظ البنك المركزي يملك سلطة مطلقة في الموافقة علي تعيين او رفض تعيين كل المدراء ونوابهم ومساعديهم ..بل له سلطة كاملة في اجازة سياسة البنك الاستثمارية والرسوم ووصل الحال ببنك السودان ان يأمر تحصيل مديونية البنك علي الافراد والمؤسسات ورفع وخفض السقوف الائتمانية بل وإدارة حسابات الافراد والشركات الخاصة وكل اشكال التعامل المالي . فموظفي البنوك في السودان مهما حاولت آلياتهم الاعلامية او التسويقية العمل علي تحسين صورتهم فما هم إلا عبدالمامور

ومن الاحاديث المتداولة في اوساط البنوك عن سلطان محافظ البنك المركزي ومن امثله ماحكي عن كيف إن د. صابر محافظ بنك السودان وصل به الحد الي ايقاف بعض كرام مديري البنوك لمدد تتفاوت لعام او اكثر لا لشئ إلا لعدم استلطافه لهم . ومن هنا يتضح إن الحديث عن كوزنة او توجهات سياسية حديث لا معني له.. فالناس علي دين ملوكهم .. وإذا كان رب البيت للدف ضاربا ..........

ثانيا : علي الرغم مما ذكر عاليه لمعرفة لون البنك السياسي سياسة البنك وتوجهاته لا يكفي النظر للمدير او نوابة ...او من يرأس وفد يقوم بزيارة بلد ما ... بل يجب ان يفحص الناس فريقين من الاهمية في إدارة البنك بمكان. الاول منهما تكوين مجلس إدارة البنك لا سيما الاعضاء المنتدبين او من يمثلون صاحب المال في إدارة شئون البنك والثاني من اللجنة المكلفة بالرقابة الدينية (الشرعية) وهي بمثابة دار افتاء ... وهذان امران في غاية السهوله فما عليكم إلا النظر في موقع المصرف لترون من هم وفي الغالب سيتقراء الناس ميولهم مما سبق لهم من مواقف عرفها الناس عنهم وعرفوا بها

واما عن بنك البركة -السودان . فانا اتحفظ في ابداء رأئي عن محاسن ومساوئ التعامل معه صرف النظر عن سياساته المعلنه او غيرها...واعتبر شهادتي فيه مجروحة ..لتجربة خاصة سابقة لي معه لم تكن نتائجها مرضية بالنسبة لي لفشل البنك في ايفاء التزامه تجاهي وتجاه الفريق الذي عمل معي به علي مدي فات الخمسة اشهر مما اضطرني في بعض الاحيان لدفع بعض استحقاقات العاملين معي في مشاريع البنك من جيبي الخاص هذا علي الرغم من معرفتي واحترامي لعضو البركة المنتدب الاستاذ زيادة عبدالله زيادة ومدير البركة العام عبدالله خيري ونائبه تاج الدين ..بل وصاحب المال نفسه صالح الكامل

الاخ كمال وضيوفه

تحياتي

شفت البوست متاخر جدا فيا ر يت لو اديتونا تلخيص للعروض او ارقام تواصل لوفد البنك واذا في جلسة تعريفية تانية يكون مية مية

تسلم يا حبيب

شكرا لك الأخ كمال سالم فقد كان اللقاء ناحجا ، والأخوة عرضوا ما عندهم عرضا جيدا ، والحضور كان كبيرا

ونشوف عاد نسووى شنو ؟؟؟

اعتقد ان الاستاذ محمد مصطفي قد لخص المشكلة تماما....فالكثير من البنوك تحاول وتعمل علي تطوير خدماتها ولكن في التهاية ترضخ لقرارات البنك المركزي
والذي يتدخل في كل صغيرة والكبيرة..لذلك البنوك كلها تتشابة في السؤء ..والوعود البراقة ...جربت التعامل مع اكبر بنكين في السودان .رغم تواضع قدرتي المالية
الا انهما فشلا تماما في ابسط انواع التعامل..

اوصي الذين يودون المخاطرة بالحذر الشديد وعدم المخاطرة بالتزامات كبيرة مع البنك وبالعدم يكون افضل

قالو بدوك خمسمية الف وقالو بترجعا ليهم خمسمية كم واربعين بس

القسط الشهري 5696 في ستة سنة اضربا بتمرق كم
زيد عليها المقدم الانتا بتدفعو
زيد عليها التامين الانتا بتدفعو
شوف انتا دفعتا كم؟؟
وشوف انتا رجعتا كم؟؟

وشوف هم قالو بترجعا ليهم كم؟؟

نامل التوضيح ياكيمو حتى تعم الفائدة لو الافتراضات حقت التضريبات الفوق دي غلط,,واكيد غلط لانها مامنطقية

سلامات يا خال,,

تجارب المغترب السودانى مع المؤسسات المصرفية السودانية أغلبها سيئة ومحاولات تسويق منتجات هذه البنوك
قد لا تنجح إلا مع شرائح محددة وذات دخول عالية,,,

إذا كان إقتصاد الدولة نفسه غير مستقر ويتعرض لهزات عنيفة فى فترات متقاربة فمن الصعب أن تقنع الناس
فى الوثوق ببنوك مرتبطة بإقتصاد ضعيف وعرضة للهزات التى قد تضيع فيها أموال ومدخرات وكما أسلف ألأستاذ
محمد مجذوب أنها فى أغلب الأحيان لا تملك الكثير من أمرها وعرضة لأمزجة أمثال صابر محمد الحسن!!!!!!

زد على ذلك فقدان الثقة فى النظام المصرفى السودانى ومعرفة كثير من الناس أن البنوك ومرابحاتها ورهوناتها
وسلفياتها وتمويلاتها كانت مجتمعة أو منفردة من أسباب خراب بيوت كثيرة ووجود عدد ليس بالقليل داخل السجون
وآثار سالبة كثيرة إجتماعية وإقتصادية كلها كانت محصلات عبث البنوك بالإقتصاد واللعب بأموال المودعين وتهرب
البنوك من إلتزاماتها تجاه المقترضين أو المُمُولين..

للأسف الشديدالثقة تكاد تكون معدومة بكل ما هو مرتبط بأى شكل كان بالمؤسسات المصرفية داخل السودان.

تحياتى,,

مثال بنك البركة لتمويل شراء عقار ..

(1)مبلغ التمويل : 500,000 أو 500.000.000 بالقديم، يقوم العميل بإحضار فاتورة بهذا المبلغ من صاحب العقار
(2) يقوم البنك بشراء العقار من صاحبة الأصلي وبيعه للعميل بمبلغ 546,000 أو 546.000,000 بالقديم ..
(3) يقوم العميل بدفع مقدم بنسبة 25% من سعر البيع، أي مبلغ 136,000 أو 136,000,000 بالقديم ..
(4) يقوم البنك بإضافة مبلغ 364,000 أو 364,000,000 بالقديم لمبلغ المقدم الذي دفعه العميل ليصبح إجمالي المبلغ 500,000 أو 500,000,000 لدفعها لصاحب المنزل ..لغاية هنا كويسين ..
(5) فترة السداد 6 سنوات ..أي 72 شهر .. القسط الشهري 5696×72 شهر الناتج = 410.112 أو 410,112,000 بالقديم
(6) التأمين القسط الشهر 214×72= 15,408 أو 15,0408,000 بالقديم ..
(7) إجمالي ما يدفعه العميل من أقساط لمدة 72 شهر + المقدم+ التأمين = 410,112+136.000+15,408 = 561.520 أو 561,520.000 بالقدم ..(8) إجمالي ما يدفعة البنك = 364.000 أو 364.000,000
(8)أرباح البنك = إجمالي مايدفعه العميل - إجمالي ما يدفعه البنك = 561,520 - 364,000 = 197.520 أو 197,520.000 بالقديم ..
(9)أرباح النبك بالنسبة المئوية = المبلغ الحقيقي الذي دفعة النبك × 55÷ 100 تقريباً أي نسبة أرباح البنك 55% من المبلغ الذي دفعه وهو فقط 364000 أي أرباح البنك + التأمين أكثر من نصف المبلغ خلال الستةسنوات ..وشكرا ..

كتر خيرك ياجبريل
وضحتا التساؤل القتو فوق وكفيت الناس بيان بالارقام..

بالمختصر جبريل عايز يقول انو ارباح البنك خلال خمسة سنة بتساوي 197 مليون جنيه سوداني.. يعني تقريبا ميتين مليون..


ستة خرفن وتيس ماكفن...