لقد سمعت بأن هناك شركات تمويل فى السودان تقوم بعمليات البناء والتشييد عن طريق التقسيط (شركة تساهيل مثالاً). استفسارى عن الشروط والالتزام والمصداقية. ارجو ان اجد النصيحة الشافية منكم كما عودتمونا دائماً فى هذا الحوش الفسيح والذى اصبح منارة يهتدى بها الضالون لاننى قررت ان ابدأ فى بناء قطعتى السكنية.
وجزاكم الله الف خير
10-02-2012, 09:56 AM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
Quote: لقد سمعت بأن هناك شركات تمويل فى السودان تقوم بعمليات البناء والتشييد عن طريق التقسيط (شركة تساهيل مثالاً). استفسارى عن الشروط والالتزام والمصداقية. ارجو ان اجد النصيحة الشافية منكم كما عودتمونا دائماً فى هذا الحوش الفسيح والذى اصبح منارة يهتدى بها الضالون لاننى قررت ان ابدأ فى بناء قطعتى السكنية.
اسمع يا اللخو هاك النجيضة وجديدة لنج
انا كنت في السودان خلال اجازة عيد رمضان المنصرم - وخلال الاجازة قمت بزيارة لسوق الخرطوم للاوراق المالية . هناك التقيت بمجموعة من شركة استثمارية اسمها (سنابل) وهي شركة تابعة لبنك الخرطوم . لدى اجتماعي بهولاء اكدوا لي انهم بصدد زيارة لسلطنة عمان وجميع دول الخليج للترويج لعمليات التمويل التي سيقوم بها بنك الخرطوم او شركة سنابل نفسها .
المهم الناس ديل طرحوا علي المشاريع التي يمكنهم تمويلها وتشمل العربات والعقارا والاراضي ولو عندك بيت ناقص برضو بتموهو ليك .
الناس ديل جادين جدا جدا وما تخاف هم اكدوا لي انهم ما كيزان صوفية سااااااااى - لو المعلومة دي مهمة معاك .
الغريب في الامر في اليوم التاني طوالي كانت عندى معاملة في بنك الخرطوم - لما ذهبت ليهو لقيت ليك المحامين الاعمى شايل الكسيرة يتزاحمون امام بنك الخرطوم . سألت من الحاصل ، وقالوا لي جايين للتمويل العقاري وكمان العربات .
الناس ديل بدوك مكغترب لحدي مليار جنيه وارباحهم 15% لغير المحامين و10% للمحامين واعتقد بقية المهنيين .
لو عايز تلفون واحد صاحبي متولى هذا العمل وبديك تفاصيل اكثر اكتب لي على الايميل ادناه :
الاخ الكريم النجيضة يا اخوى اديك ليها انا ود شيقوق دا ود ضهارى ومخلوع من البندر ساى ههههههههههههه
ناس الشركات ديل مافى حد بعمل ليك شى فرى لزم بختوا ارباح عاليا و لزم ترهن ليهم الارض علشان يضمنوا رجوع المبالغ بتاعتن وفى حين عدم السداد يبلعوا البيت الحاجة التانية الكولتى بتاعت المواد البشتغلوابيها ما بتكون جيدة بكون مواد رخيصة ما بتعيش طويل علشان الربح بتاعن يكون اكتر ما بزنس
علي اخوي ود امي وابوي سلااااااااااااااااااااااام شديد كمان اسمع كلامي دي وختو خرزة في اضانك دي واسعلني انا مجرب قربة جد اولا بالتبادي انا كنت بنكرجي في السودان قول واحد تاني شي انا بنيت بيتي طينة طينة وختيت في اضاني دي طينة والتانية برضو طينة واصلو ما جاني زول دق لي الباب كو كو وقال داير القسط سمحت كلامي دا ولا ما سمحتو ات زول اخوي اصلوووووو كلو كلو ما بخليك تغرق وانا اعاين ليك شوف اكان داير القلق وعوك عوك اقع البنوك نحن لمن كنا موظفين بنوك زماااااااان والدنيا كانت بخيرا بنقول القروض زي اكل الشطة في البداية حلوة لكن خريجا حاااااااار ههههه يا زول هوي اختا الهم وغنيلو وابني بيتك قشة قشة يا قماري قشة قشة علمينا يا قماري كيف بتبني عشك قشة قشة حصل قبضت قمرية يا علي ولا قديلو ؟ ما حصل قبضا صعب خلاص والله يا علي انا تميت بيتي دا او في الحقيقة ما تم كلو كلو لكن سكنا فيهو في امان الله شوية شوية شغال فيهو بسياسة قدر لحافك لحدي ما ربنا تماهو ... صحي والله تماهو ربنا بس واسع في امان الله لا عوك عوك ولا جوك جوك غايتو دا فهمي كدي وارجو ان يفيدك واختا التلاتل والمحن مع خالص الود والتحية
10-02-2012, 10:48 AM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
غايتو اكان سمعت كلام ود البوش دا ياكا الساكن في الايجار للابد
يا ود البوش الخليج 90 % من سكانو بنوا بالتمويل العقاري كلامك صحيح ولكن ليس على اطلاقه . والقدرة في تحمل مشوار سداد الاقساط تختلف من حالة لحالة ، اي حسب مستوى دخل الفرد الشهري
بعدين هسه ود النعيم دا لو ساكن بايجار شهري 2000 مليون جنيه سوداني يعني يقعد كدا في رمادو يلقط ويكب لسيد البيت ؟
انا يا ود البوش كنت ساكن حى اب روف بايجار شهري مليون جنيه - راجعت نفسي كويس قلت سيبك ياخ امشي اخمش لي قرض من بنك وابدا ابني - بالفعل خمشت القرض واشتريت لي بيت مبني لكن ما مسقوف - وحياتك سقفتو ورحلت فيهو قبل اقفل شبابيكو وصار مليون الايجار يوجه لاكمال البنيان وقد كان لحدى والحمد لله صار بيت متكامل .
10-02-2012, 11:05 AM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
Quote: النجيضة يا اخوى اديك ليها انا ود شيقوق دا ود ضهارى ومخلوع من البندر ساى ههههههههههههه
بندر شنو البيخلع يا سجم الرماد انتى - عايزة تضيعي الزول عشان لقيتيها باااااااااردة مبنية وجاهزة وهسه تجلبي في بيوت الورثة في الاسافير وكدا.
Quote: ناس الشركات ديل مافى حد بعمل ليك شى فرى لزم بختوا ارباح عاليا و لزم ترهن ليهم الارض علشان يضمنوا رجوع المبالغ بتاعتن وفى حين عدم السداد يبلعوا البيت
يا بت دى عمليه تراضي بين ود النعيم والجهة الممولة - وكمان الجهة الممولة لازم تكون ليها ضماناتها لانهم بيقرضوك اموال مساهمين وكدا فلازم يحققوا ليهم ارباح .
Quote: الحاجة التانية الكولتى بتاعت المواد البشتغلوابيها ما بتكون جيدة بكون مواد رخيصة ما بتعيش طويل علشان الربح بتاعن يكون اكتر ما بزنس
لا ابدا الكولتي دي مش بحددوها هم بتحددها انت المقترض يا وداها .
Quote: اسمع كلام اختك ودى نصيحة لله
لو سمعت كلامها بتغطس حجرك دى مش عايزة الناس يبنوا دي عايزاهم يجوا يأجروا منها عشان كل اخر شهر تشيل مخلايتا وتجي تخمش منك الايجار شهريا .
Quote: النجيضة انك تلم قروشك وتنزل كل اجازة وتشوف مهندس كويس وتبنى وتشرف على شغلك بنفسك
وتعمل بيتك بمزاجك والالوان والمواد العاوزة ومحل ما يقيف البناء تللملم اطرافك وترجع وتعمل كل سنة كده لحدى ما تخلص بيتك دا لو مغترب
والله انت رايقة وفايقة - هو لو قادر يعمل كدا الجابرو شنو على القروض ؟
10-02-2012, 11:11 AM
وضاحة
وضاحة
تاريخ التسجيل: 01-16-2005
مجموع المشاركات: 9116
شكراً جزيلاً على مرورك البهى ونصيحتك السمحة. اظنك من اهل التجارب واتمنى ان تكونى كذلك حتى استفيد من المحاسن والمساوئ فى مثل هكذا مشاريع. وقالوا فى المثل (البخيت يشوف فى اخوهو).
مزيداً من النصائح ارجوك واخير لى اسمع كلام الزول الببكينى.
مرة اخرى شكرى لك بلا حدود وتسلمى.
10-02-2012, 11:10 AM
على احمد النعيم
على احمد النعيم
تاريخ التسجيل: 01-16-2007
مجموع المشاركات: 866
Quote: علي اخوي ود امي وابوي سلااااااااااااااااااااااام شديد كمان اسمع كلامي دي وختو خرزة في اضانك دي واسعلني انا مجرب قربة جد اولا بالتبادي انا كنت بنكرجي في السودان قول واحد تاني شي انا بنيت بيتي طينة طينة وختيت في اضاني دي طينة والتانية برضو طينة واصلو ما جاني زول دق لي الباب كو كو وقال داير القسط سمحت كلامي دا ولا ما سمحتو ات زول اخوي اصلوووووو كلو كلو ما بخليك تغرق وانا اعاين ليك شوف اكان داير القلق وعوك عوك اقع البنوك نحن لمن كنا موظفين بنوك زماااااااان والدنيا كانت بخيرا بنقول القروض زي اكل الشطة في البداية حلوة لكن خريجا حاااااااار ههههه يا زول هوي اختا الهم وغنيلو وابني بيتك قشة قشة يا قماري قشة قشة علمينا يا قماري كيف بتبني عشك قشة قشة حصل قبضت قمرية يا علي ولا قديلو ؟ ما حصل قبضا صعب خلاص والله يا علي انا تميت بيتي دا او في الحقيقة ما تم كلو كلو لكن سكنا فيهو في امان الله شوية شوية شغال فيهو بسياسة قدر لحافك لحدي ما ربنا تماهو ... صحي والله تماهو ربنا بس واسع في امان الله لا عوك عوك ولا جوك جوك غايتو دا فهمي كدي وارجو ان يفيدك واختا التلاتل والمحن مع خالص الود والتحية
العميكة ود البوش
ياخى والله الف شكر على اهتمامك بالموضوع وعلى اسدائك للنصح لكن والله انا جد محتار وخايف من الخوازيق دى. ثم انو اجازتى ضيقة جداً وما بتلقى زول يريحك هناك عشان انت تبنى قشة قشة. غايتو اخوك بعاين لكتلتو علا ود حسونة يقيف ربابة باقى اخوك فى مثل هذه المسائل عميكة خلاس . غايتو ربك يستر ويوهط القدم ما تقعلها فى هرف.
شكرى مجدداً لك بلا حدود وبرضو فى انتظار نصائحك تسلم
10-02-2012, 11:06 AM
فايزودالقاضي
فايزودالقاضي
تاريخ التسجيل: 11-27-2007
مجموع المشاركات: 10091
انا عندي ارض صراحة شغال فيها بالحتة ..اشتريتها وبعد سنوات سورتها وبعديها عملت ابواب ثم دكان وشوية شوية ببني فيها وصراحة ماحاسي بالتكلفة ..وقبل فترة اتصلت على ناس تساهيل فلقيت شروطهم تعجيزية وحسيت انهم بيبنوا لي بيتي بخمسة اضعاف سعر بناه ...يعني البيت لو بكلف 100 مليون بتلقى نفسك بتقسط 500 مليون وبعد ده زي ماقالت خالتي وضاحة المواد والشغل مابكون ذا قيمة اصلا ..
فيا قمارى ابني بيتك قشة قشة كما قال جدي ود البوش ..
تحياتي ،،
10-02-2012, 11:15 AM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
Quote: ..وقبل فترة اتصلت على ناس تساهيل فلقيت شروطهم تعجيزية وحسيت انهم بيبنوا لي بيتي بخمسة اضعاف سعر بناه
ناس تساهيل ديل وهم ساي يا ود القاضي .
انا بقول ليك التمويل هنا من قبل بنك الخرطوم مؤسسة مصرفية ليها تاريخها وسمعتها
بعدين يا على انا بقول ليك بديك رقم الراجل دا - هو دكتور اقتصادي وطيب نامن غلط وصادق نامن غلط بديك اى معلومة وليك الحق تستفسروا من كلام وضاحة دا ذاتو - استوعب كلامو كويس وامشي شاور اهل الخبرة من اهلك واصدقائك .
اما من ناحية دينية فهو حلال جدا
10-02-2012, 11:16 AM
على احمد النعيم
على احمد النعيم
تاريخ التسجيل: 01-16-2007
مجموع المشاركات: 866
Quote: يعني البيت لو بكلف 100 مليون بتلقى نفسك بتقسط 500 مليون وبعد ده زي ماقالت خالتي وضاحة المواد والشغل مابكون ذا قيمة اصلا ..
ود القاضى سلام
اها والله دا الكلام الانا خايف منو ذاتو عشان كدى طلبت الاستشارة. ومشكلتى انو اجازتى ضيقة جداً يعنى ما بقدر اعمل اى شئ هناك مالم تكن هناك جهة ما تقوم بالعمل فى غيابى.
تحياتى لك بلا حدود
10-02-2012, 11:23 AM
على احمد النعيم
على احمد النعيم
تاريخ التسجيل: 01-16-2007
مجموع المشاركات: 866
Quote: غايتو اكان سمعت كلام ود البوش دا ياكا الساكن في الايجار للابد
يا ود البوش الخليج 90 % من سكانو بنوا بالتمويل العقاري كلامك صحيح ولكن ليس على اطلاقه . والقدرة في تحمل مشوار سداد الاقساط تختلف من حالة لحالة ، اي حسب مستوى دخل الفرد الشهري
بعدين هسه ود النعيم دا لو ساكن بايجار شهري 2000 مليون جنيه سوداني يعني يقعد كدا في رمادو يلقط ويكب لسيد البيت ؟
انا يا ود البوش كنت ساكن حى اب روف بايجار شهري مليون جنيه - راجعت نفسي كويس قلت سيبك ياخ امشي اخمش لي قرض من بنك وابدا ابني - بالفعل خمشت القرض واشتريت لي بيت مبني لكن ما مسقوف - وحياتك سقفتو ورحلت فيهو قبل اقفل شبابيكو وصار مليون الايجار يوجه لاكمال البنيان وقد كان لحدى والحمد لله صار بيت متكامل .
يا ود شيقوق اها دى الجهجهة الانا خايف منها وربك يستر.
راجع ايميلك
شكرى الجم
10-02-2012, 11:25 AM
الطيب شيقوق
الطيب شيقوق
تاريخ التسجيل: 01-31-2005
مجموع المشاركات: 28804
Quote: اوعاااك تكون انت شريك فى البزنس دا وعاوز تاكل راس الراجل ههههههههههههه
انا الككو الفجخ الطين
ود النعيم السلام عليكم كلام بنت عمك وضاحه دى ما ترميه وطا بالمناسبه يا وضاحه على النعيم شغال فى مستشفى حمد فى الدوحه هذا واحد الشى التانى جعلى يعنى قريبك الشى التالت ود شيقوق بكون داير يعمل دعايه بكون لاحس ليه حاجه العريبى لووووول او كما يقولون النجيضه يا ود النعيم كلامى الفوق دا كلو خليه لكن اتصل على عشان عندى اسئله معينه اسالك ليها من ضمنها موقع القطعه وين وبعد داك ممكن اقوا ليك امشى عدل شيل تمويل او ابعد لى الشر غنيلو
10-02-2012, 11:39 AM
على احمد النعيم
على احمد النعيم
تاريخ التسجيل: 01-16-2007
مجموع المشاركات: 866
Quote: ود النعيم السلام عليكم كلام بنت عمك وضاحه دى ما ترميه وطا بالمناسبه يا وضاحه على النعيم شغال فى مستشفى حمد فى الدوحه هذا واحد الشى التانى جعلى يعنى قريبك الشى التالت ود شيقوق بكون داير يعمل دعايه بكون لاحس ليه حاجه العريبى لووووول او كما يقولون النجيضه يا ود النعيم كلامى الفوق دا كلو خليه لكن اتصل على عشان عندى اسئله معينه اسالك ليها من ضمنها موقع القطعه وين وبعد داك ممكن اقوا ليك امشى عدل شيل تمويل او ابعد لى الشر غنيلو
الاخ الكريم ود المحرب
السلام عليكم ورحمة الله كيف حالك وحال الوليدات والعروب الهناك.
شكراً والله كتير على اهتمامك البالغ بالموضوع
بكل اسف فتشت رقم تلفونك لكن اظنو راح منى فى الارقام الكتيرة دى. عليه اكون شاكراً لو ارسلت لى رقم تلفونك اليوم حتى اقوم بالاتصال بك.
ثم تقبل تحياتى بلا حدود
----------- تخريمة: ياخى ما اظن المسنوح دا يعمل كدى.
10-02-2012, 06:16 PM
على احمد النعيم
على احمد النعيم
تاريخ التسجيل: 01-16-2007
مجموع المشاركات: 866
ورت الي في بريدي الالكتروني الرسالة الاتية وهي تحمل الكثير من الارشادات المفيدة حول موضوعنا:
Quote: أستاذنا واخونا الاكبر ود شيقوق
تحيه واحترام
بقيت تجئ السودان وتصهين من السلام علينا مباري العنكوليب سقايه الليل ،،،،،، المهم أتمني ليك الصحه والعافيه ،،،،،، أنا مضيع كلمة المرور لسودانيز اون لاين ،،،،،،، وفي موضوع أخونا العاوز الاستشاره في المباني قول ليهو احذر الشركات الخاصة في مجال المباني للأسباب الآتية
اولا : التكلفة العاليه لنسبه التمويل حيث انهم يأخذون الأرباح حتي من المقدم الذي يدفعه وهذا ربا صريح حمانا الله واياك
ثانيا : ان أقساطهم تبدا من الشهر الاول دون فتره سماح
ثالثا : هم الذين يختارون لك المواد وليس لك الحق في اختيار اي نوع منها سواء سيخ او أسمنت او حتي بوهية
رابعا : هم من يحددون المقاول الذي يبني لك وهنا تري العجب من طول فتره اكمل المباني او جودتها
خامسا : من الناحيه الشرعية وانت سيد العارفين يجب ان تلتزم الشركه بالبناء وفقا لمواصفات الزبون وتستلم المبني ثم يتم بعدها توقيع عقد الاستصناع مع الزبون وهذا ما لايحدث عادة ،،،،،،،،،
نظام البنوك يجنبك كل ما اشرنا اليه اعلاه عدا التكلفه العاليه للتمويل والتي تصل في بعض الاحيان لاكثر من ١٢ في المائه للعام الواحد وللبنوك فنون في زياده هذه النسبه يعني لو صاحبك عاوز يبني بمائه مليون ويسددها في سته سنوات فهنا عليه ان يدفع مائه وستون مليونا غير مصاريف التسجيل والرهن والدمغه وغيرها من دفعيات
أؤكد علي العمل بتجربه الاخ ود القاضي (قشه قشه)
وكذلك يجب اتباع نصائح الدكتوره وضاحه فتجربتها حقيقه معاشه
لك التحايا والود وللعنكوليب اشواقنا حتي أوان الحصاد
اخوك : عبدالقادر مصطفي مستشار بنك تنميه الصادرات يمكن تكون نسيتنا عشان كده فصلنا في التعريف صلاح غريبه الا ربع
10-03-2012, 03:13 PM
فيصل محمد خليل
فيصل محمد خليل
تاريخ التسجيل: 12-15-2005
مجموع المشاركات: 26041
صوفيـة معسكرين فى سـوق الأوراق الماليـة ويسلفوا بالربـا..
ينعطبوا ويتسختو إن شـاء الله ببركـة الشيـخ الكباشى..
المكاشفى يوصى الترزى ما يخيط جيب فى قميصو.. ولما المفتش الإنجليزى عرض عليه اراضى زرعيـة وطلب منه تحديد مساحتها، قال له أن له فى الأرض شبـر واحد (ود اللحد) ولو تعرف اين هو الان فحدده لى..
هؤلاء هـم الصوفيـة، ويا اخ صاحب البوست، لو فى سبب واحد يخليك تبعـد من الناس ديل هم تسويقهـم لإرث الصوفيـة فى ســوق الإستهبال التجارى.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة