الله ينعل ابوك يا Ben 10

Post: #1
Title: الله ينعل ابوك يا Ben 10
Author: سامى عبد الوهاب مكى
Date: 10-01-2012, 08:13 PM

يوم الجمعة كان اليوم القبال عيد ميلاد الصغير أحمد سامي والراجل كالعادة والشهادة لله شاطر و مجتهد جداً ومن الصعب تقدر توعده بحاجة وما تنفذها..

قبلها بفترة طويلة طلب أن تكون هدية عيد ميلاده شنطة المتعوس المكتوب في العنوان دا Ben 10وانا شخصيا عمك 10 دا ما عارفو (كجول ولا زول) لكن متأكد واحد من شياطين الكرتون البيحضروهم الشفع الزمن دا...هييييييييييييه يا حليل زمنا لمن كانت الشخصيات الكرتونية يبربمبها المثل...سندباد الراجل الكلس اب حسا زي السخيل... (ولو لو الصغيرة) التفتيحة ودحروج والاغنية الاشهر في وقتها لو لو الصغيرة لولو حلقتاتها مثيرة لووووولو إلى اللقاء يا لولو لووووولو في الحلقة القادمة يا لو لو لووولو.. والاغنية التانية نادي نفيخة يانادي يا اجمل النوادي نادي نفيخة يا نادينا يا اجمل نوادينا (ما متذكر أسمه نفيخة ولا دحروج المهم حاجة كدا مدردمة كنا متكيفين منها)

المهم انا وعدت ولازم أنفذ...

غايتو بصراحة حكاية القى نفسي ملزم بتنفيذ حاجة زي دي بتضايقني لكن مرات بخاف إني اضرب مثل بطال لشفعي في حكاية عدم الوفاء..

ونسيت كمان الزول دا قال عاوز جزمة تنفع للمدرسة وللكورة (يعني خلاااااااس الود موسى الزومة) وطبعاً لا يفوت على فطنتك إيها الاب العزيز حكاية إنك لو جبت لاي واحد من شفعك شي حتى ولو لمناسبة خاصة بيه لازم تجيب للباقين ولا حا تعيش نكد من النوع الممكن يطفشك..ما علينا عملت حسابي معناها يا أبو السيم في الزمن الصعب دا شنطة للوهم دا وشنطة للوهمة اخته والصغيرة ديك اجيب ليها كيس جيلاني ولا اي شي احنكها بيه..

المهم صاحبي عكليت صحى من النوم قبل ما يتسوك قال لي نمشي.

خير نمشي..

طلعنا عدل على السوق وبديناها من خلف المحطة الوسطى دكاكين الجزم والشنط (الجملة والقطاعي) ودكان دكان بسطة بسطة فرشة فرشة مافي شي يستاهل والمعروض عبارة عن شنط غاية في التفاهة والعولاق شي مرسوم فيها عربات وشي بنات وشي كدايس وشي سادة (سليقا ساكت) وكل المعروض يتفق في رداءة الخامة والخلق المعولقة المطبوعة فيها..

السلام عليكم عندكم شنطة Ben 10 كبيرة بي عجلات.

أبدا شوف جيرانا وانا من جيران ديل لجيران ديك لحدي ما طلعنا في البوسطة مرورا بميدان الاسكلا لا صاحبي داير يقنع لا أنا قادر انفعل (كاتم في حناني) وانا زول صاحب عيا.

المهم قنعنا قلت ليه يا ابو حميد نشتري الجزمة وانا حا اتصرف في موضوع الشنطة دا ..كويس؟

صاحبنا العيون كورمن واتنفخن وحمرن وقعد يكرج في سنونه (عاد الاخلاق الحميدة يجيبا من وين)

خلاص اتفقنا يا أحمد ؟..

ماعاوز خلااااص ..

يا زول الله يهديك الساعة ماشة على 12 ونحن فتشنا اي مكان..

قلت ليك ما عاوز..

يا احمد قول اي شي تاني انساك من بن 10 دي شوف بن علي بن رخيصة بن بيا بن فرناس (عاوز اتظارف) ها ولا اشتغل بي دمي البخفف فيه دا وقفل وعارفه لمن يقفل حمار بس.

كنا موقفين العربية في مكان بررررررة السوق جنب استوديو الوادي..

رجعنا تنقش تنقش تنقش وركبنا قلت نمشي شارع الجلود اشيل سعوط الاسبوع ونمر على الجزم وأمشي الجزارة الحق (أم فت فت) قبل تكمل و(جوز كوارع) وبن ال######ة ولا بن 10 حا الم فيه في مكان ضيق واجره من شعره الطوال دا واجيبوا للمعفن دا إن شاء الله ينفع فيه..

بالله في زنقة شارع الجلود ديك مجرد ما دخلنا قوم يا بتاع ركشة كيييييييييييييييك حك العربية..

قوم يا بطل (اللهو انا أنزل قبل ما أقيم الموقف انزل واعمل فيها داير أقل الركشة بسواقها عشان أبعدا من العربية وأفك حرقتي في الشافع المفروض يكون سايق الركشة دا..)

مسكت الركشة هيييييييييع اييييييييع بالله ابت تتقلا لي ملمتر..

الله يا سامي انت زول ما شاء الله في شنو شفع الزمن ديل غير انهم بيسطلو بياكلو شنو؟

المهم قلت خلاص نتجاوز مرحلة قل الركشة نمشي لموضوع الطقطقة..

بالله تاوقت جوا الركشة لمن شفت السواق لمن غمضت عيوني..

تقول لي الرجل الاخضر ولا عمليق بتاع سندباد داك ولا اقول ليكم شنو..

غايتو الدركسون بتاع الركشة ما ظاهر ..بصراحة الركشة بي جوة ذاتا ما ظاهرة ومضلمة عديل من الجتة الجواها..

اقول ليكم شي الزول دا ما كان حاسي اساسا انه في سوبر مان كان بيحاول يرفع الركشة..

اتشدعت وقلت ليه يا اخي ما تحاسب !!

المخلوق الغريب دا طلع صوت زي الشخير المهم حاجة كدا فيها نفس شهيق وزفير في نصها معرلييش..

لقيت ليك روحي انا بقدم ليه في كمية إعتذارات عجيبة كدا ..لا مافي مشكلة اصلاً بسيطة بسيطة..

صاحبنا كركركرركرك حرك المكنة الاسمها الركشة المحشورة تحت كرعينو دي... ومن وراء الركشة تقرب تشوف الكلوتين بالجنبات... وانا يدي مجروحة من محاولة رفع الركشة ومصدوم من ناس الحركة كيف يسمحوا بالمعاملة اللا إنسانية البتلقاها الركشات في بلادي..ما شافو الركشة والفيران البسوقوها في الهند..

كيف يسمحوا للغول دا يركب الكائن البريئ اب تلات ترتارات دا.

الله ستر علي لكن ما ستر على الركشة

قبلت على حيطتى القصيرة اللهو اب رويس دا أحمد..كدا ارتحت يدي اتجرحت وعربتي اتجرحت وكرامتي ذاتا اتجرحت وشنطة ما لقيناها الله ينعل ابو بن تن لابو الزول السمين بتاع الركشة دا يلا البيت يلا والله تبرطم اناديه ليك هسي يطقطقك

Post: #2
Title: Re: الله ينعل ابوك يا Ben 10
Author: محمد البشرى الخضر
Date: 10-01-2012, 09:28 PM
Parent: #1

ههههههههههههههه
والله ياسامي بن تن دا عامل فينا عما يل وقبالو كان في سبايدر مان و بوكيمون و الخلاقات بتاعين البي بليد وواحد كدا اسمو يمان عندو بلبل اجارك الله دا كلو يوم وانت جاي راجع لازم تلفون بابا جيب كندر يمان
غايتو حالة يتخيل لي اليابانيين ديل بعملو مسلسلات الكرتون دي عشان يبيعوا على حسها الهتش بتاعهم دا
بس الميزة عندنا الحاجات دي راقدة هنا في البقالات في الحلة بتتلقي

Post: #3
Title: Re: الله ينعل ابوك يا Ben 10
Author: سامى عبد الوهاب مكى
Date: 10-01-2012, 09:44 PM
Parent: #2

ههههههههههههههه

Post: #4
Title: Re: الله ينعل ابوك يا Ben 10
Author: عمر الفاروق
Date: 10-02-2012, 06:11 AM
Parent: #3

تعرف يا سامي انا قصتي مع بن 10 ده قصة مضحكة مبكية ..وقبل فترة كنت عايز أجي أكتب نفففس عنوانك ده والله..
محمد ولدي الله يديهو العافية وبما إنو الولد البكر وبي فهمنا بتاع الرجالة داك وإنو نحن في الغربة فلازم وبي القوووة كده نعملهم رجال وضكرانين وكأنهم عمرهم 40 سنة !!!
أها يا عمك محمد مشكلته إنو معظم أولاد خالاته الفي عمرو من البنات ..وانا طبعاً نظام الولد عمرو تلاتة سنوات كان ولسة مصصصر إنو مفروض ما يقعد مع البنات ديل عشان يطاع ولد راجل !!!! أها يوم جاني وبي حنييية كده قال لي بابا ..بابا ..عايز لعبة البنتين!!!
عارف يا سامي نهرتو ليك نهرة كده وقلت ليهو يا محمد أووووعك تاني تقول لي عايز لعبة بنتين قول لي عايز لعبة ولدين !! إنت راجل والراجل ما بيقول عايز لعبة بنات!!!
الولد مشى مكسور خاطر وحزين بي صورة لممن تقطع القلب..
أها يوم تاااني جاني قال لي يا بابا انا عايز لعبة البنتين ممكن ؟؟
تاااني قمت ليك فيهو يااا محمد الله يهدييك إنت ولد الولد راااجل والراجل ما بيقول عايز لعبة بنتين ..انا بجيب ليك لعبة ولدين خلاص؟؟؟ وتاني إياااك تجيب سيرة لعبة البنات ديل ...
وبرضو مشى مني ووشو حزين بي صورة لممن تقطع القلب وما أكضب عليك انا ضعيف جدا جدا جدا قدام مطالب اولادي حالي حال كل الاباء وخلاااص قربت اناديهو اشتري ليهو لعبة البنات البيقولا دي واليحصل يحصل ..بس تاني قويت قلبي وقلت عييب لازم الولد يطلع راجل!!!
أها يا عمك قووومي يا أمهم قبل كم شهر كده مشت بيهم المول واشترت ليهم جزم وشباطة ..انا قاعد بحضر في التلفزيون محمد جاني جاااري وفرحااان بابا بابا ..ماما إشترت لينا شبط البنتين!!!! وجاني شايل ليك شبط البنتين الما بيغباني !!!
واقوووم كده أشوف ليك صورة ولد ومكتوب في الشبط Ben 10!!!!!!
والله يا سامي انا البكا البكيتو اليوم داك ما اظن بكيتو قريب!!!!
بالله دي البنتين؟؟؟ Ben 10
والزول طلع راااجل؟؟؟
وما لعبة بنات؟؟؟
وماف ولدين بدل بنتين؟؟؟
تعرف يا سامي مننن قعدتي ديك وبعد ما حضنتو كده واعتذرت ليهو إمكن زي مليووون إعتذارا كده ..قمت مشيت على السوق وهو معاي وأيييي منتج مرسوم فيهو هذا الBen10 (البنتين) مشيت إشتريتا ليهو..
شنطة..جزمة..بسكويت..تيشيرتات..قمصان..حلاوة..ساعة...أييي ش فيهو هذا البنتين ممكن تتصورو انا جبتو ليهو ..عسى أصلح كسرة خاطر الولد الما كان قادر يعببر لي أبوهو إنو البنتين ده بطل مسلسلات اطفال ولا علاقة له بي البنات والأولاد..
عارف القصة دي أدت ليك درس في التربية بي المجاااان..وبقا عندي زمن مخصص لحضور مسلسلات الأطفال معاهو هو واخوهو عشان اكون مواكب ..
وبالجد برضو ادتني درس في قصة وجوب مراجعة الحسابات في قصة زحمة راس الشافع والنقة عليهو والتفرقة بين ده ولد ودي بت وده عيب وده لأ وما تقعد مع دي و و ..ياخ الأطفال ديل براءة ولسة قصة نملاهم بي قصص العادات الزمان ديك مفروض تكون إنتهت..

تخريمة :
بعد تقرا النقة دي بجي أحكي ليك قصة الشنطة الحصلت معاي اول امبارح!!!!

Post: #25
Title: Re: الله ينعل ابوك يا Ben 10
Author: سامى عبد الوهاب مكى
Date: 10-02-2012, 06:30 PM
Parent: #4

يا جماعة إنتوا ملاحظين أنكم كلكم ركزتوا على ال######## بن 10 وزول قال لي حمد لله على سلامتك وبركة بتاع الركشة الما عرف إنك كنت ناوي تقلبوا بي ركشتو...يبدوا انو بن 10 راكب حظ الجميع وفي اي مكان..

لاحظوا جنس تخلف عمر الفاروق دا لا عارف بن 10 لعبة ولا ام لعاب..هههههههه

Post: #5
Title: Re: الله ينعل ابوك يا Ben 10
Author: أيمن الطيب
Date: 10-02-2012, 06:22 AM
Parent: #3

يا سامى سلامات يا عزيز..

الزول الإسمو Ben 10 دا لو لحق دخل البيت ما بمرق بأخوى وأخوك والقصة حا تبقى مسلسل تركى بس,,
غير الشنطة فى تى شيرت و ساعة وجزمة وطاقية وعيييييييييييك طابور من مشاوير السوق أنسى بس,,

الله يقطعو ويقطع يومو زاتو,,,

ما قادر أنسى قصة المجنونة والفيران..

تحياتى,,

Post: #6
Title: Re: الله ينعل ابوك يا Ben 10
Author: omer osman
Date: 10-02-2012, 06:38 AM
Parent: #5

ياجماعة ما تبوظوا لينا السوق يعني نبيع ليكم شنو نحن !!!!!!!!

جنابو عمر عثمان صاحب مكتبة فيها حاجات Ben 10

هههههههههههههههههههههههههه

Post: #7
Title: Re: الله ينعل ابوك يا Ben 10
Author: محمد عبد الماجد الصايم
Date: 10-02-2012, 06:44 AM
Parent: #6

ههههههههههههههههههههه
جنابو يا مفتّح!!

ثم ..
Quote: والله يا سامي انا البكا البكيتو اليوم داك ما اظن بكيتو قريب!!!!

أعجبني .. أعجبني ياخ!!

Post: #8
Title: Re: الله ينعل ابوك يا Ben 10
Author: محمد عبد الماجد الصايم
Date: 10-02-2012, 06:46 AM
Parent: #7

غايتو بن 10 دا لو جاب ليكم معاهو دورا .. تكون قصّتكم جاطت!!

Post: #9
Title: Re: الله ينعل ابوك يا Ben 10
Author: عمار عبدالله عبدالرحمن
Date: 10-02-2012, 06:57 AM
Parent: #7

ما ينعل ابو بن 10
ينعل ابو mbc3 و الاسبيتووووووووووووون

Post: #11
Title: Re: الله ينعل ابوك يا Ben 10
Author: mohmmed said ahmed
Date: 10-02-2012, 07:24 AM
Parent: #9

هوى يا سامى هوى ابعد دمك

والله مازن ولدى يسمع انك تكلمت بسوء عن الزول دا
الا يمرقنك كرعيك

الحمد لله من محل واحد لفينا شنطة بن عشرة دا والكراسات وساعة يد والزمزمية وعمود الاكل

امس القريبا دى دخلت محل لقيت ساعة حائط ماركة بن عشرة اشتريتا ليهو

Post: #30
Title: Re: الله ينعل ابوك يا Ben 10
Author: سامى عبد الوهاب مكى
Date: 10-02-2012, 07:19 PM
Parent: #11

هوى يا سامى هوى ابعد دمك

والله مازن ولدى يسمع انك تكلمت بسوء عن الزول دا
الا يمرقنك كرعيك

الحمد لله من محل واحد لفينا شنطة بن عشرة دا والكراسات وساعة يد والزمزمية وعمود الاكل

امس القريبا دى دخلت محل لقيت ساعة حائط ماركة بن عشرة اشتريتا ليهو

اهو اخوكم محمد سيد احمد دا مثال للاب البقى اتوماتيك يعني يلقى الحاجة يجيب طوالي ودي مرحلة شكلنا داخلين عليها قريب..

تعرف يا محمد بعاين لبتي الصغيرة واقول في روحي هييييييييي دي كمان لسة ما ورتنا فنونا ماالقاها بقت زول وتقول لي شتة ابييييرة (دي بدتا بالحجم الله يستر من النوع وربنا يجعله خفيف علينا)

Post: #12
Title: Re: الله ينعل ابوك يا Ben 10
Author: عمر الفاروق
Date: 10-02-2012, 07:31 AM
Parent: #9

اها القصة التانية حصلت لي أول امبارح مع شنطة الأنقري بيرد Angry Bird ولا هي إسمها العصافير الغاضبة ما بعرفو ليكم ..
المهم برضو الأستاذ ابو حميد الله يديهو العافية نظام الولد خلاص بقا بتاع كي جي وما ادراك ما الروضة ..وبما إنو البكر وبرضو نظام ابوهو فرحان بيهو قمنا مشينا مكتبة جرير (بالله يا جنابو ارخينا من مكتبتك دي ..) ونظام يا محمد شوف الشنطة العجبتك ..قوووم كده قول لي يا بابا عايز زي شنطة الإنقري بيرد دييك..ومشينا ونظام بي ثقة كده نززل لينا الشنطة ديك ..وطلع بتجي معاها شنطة سغمبروتية كده حقت الفطور..وقووومي كده يا الشنطة اطلعي بي 300 ريال مع ملحقاتها ..
قلنا ما مشكلة فرحة أول سنة والإندهاشة بي إنو ولدك كبر..
أها يلا أول امبارح قلت أرجعو من المدرسة لي بيت ناس خالتو ..وخالتو ساكنة ليها في راقية وناسا حناكيش ..قووم يا محمد إنت نازل خت الشنطة في الـــــواطة ولمن تطلع أنساها فييي واطاتها ديك ..
اها بعد ساعة الجماعة فقدو الشنطة ويين ويين ويين ..ضربو لي قلت ليهم كدي شوفوها تحت العمارة يكون نساها ..
قام ولد خالتو نزل ما لقاها ..قام سأل حارس العمارة ما لاقتك شنطة هنا؟؟؟
إتخيييلو الهندي قال ليهو شنو ؟
أيوة هذا في شنطة انا يرمي في زبالة !!!!
وفعلاً الولد مشى لقاها ليك مرمييية في برميل الزبالة

إتخيل يا سامي شنطة انا لمن جيت اشتريها خشيت ليها صندوق عدييل يجي غفير منطقى راقية يرميها لي في الزبالة ..
انا الزعلني إنو الهندي ولااا فكر يشيلا لي نفسو ..شنطة جديييدة ما تمت اسبوعين ..يقوم يرميها؟؟؟

Post: #14
Title: Re: الله ينعل ابوك يا Ben 10
Author: فيصل نوبي
Date: 10-02-2012, 08:10 AM
Parent: #9

Quote: غايتو بن 10 دا لو جاب ليكم معاهو دورا .. تكون قصّتكم جاطت!!
دورا و موزوووووووووو
و اضف كمان معاهم المصيبة القايم لينا فيها محمد اليومين ديل
انا سونيك هيييييييييييييييييييع
و اقرب حاجة جنبو بيكون طار و نط فيها و طبعاً ممكن تكون دي كرشك

Post: #15
Title: Re: الله ينعل ابوك يا Ben 10
Author: محمد عبد الماجد الصايم
Date: 10-02-2012, 08:25 AM
Parent: #14

Quote: و اقرب حاجة جنبو بيكون طار و نط فيها و طبعاً ممكن تكون دي كرشك

هيااااا نوبي .. هي وينا الكرش دي!!
قول لحمودي دا يعمل حسابو ..
لو جا ناطي فوقكـ شديد عادي ممكن يدق في السلسلة الفقرية!!

_
هسي عمكـ موزو دا جادي في حياتو!
اليوم كلو (عوعوعوعو) فوق راسنا!!

Post: #29
Title: Re: الله ينعل ابوك يا Ben 10
Author: سامى عبد الوهاب مكى
Date: 10-02-2012, 07:07 PM
Parent: #9

ما ينعل ابو بن 10
ينعل ابو mbc3 و الاسبيتووووووووووووون

امسك اعصابك يا عمار والله حاسي بيك ...كلها عشرة سنين والحكاية دي تعدي

ههههههههههه

Post: #28
Title: Re: الله ينعل ابوك يا Ben 10
Author: سامى عبد الوهاب مكى
Date: 10-02-2012, 06:59 PM
Parent: #7

أعجبني .. أعجبني ياخ!!

شفت كيف يا ود الصايم عمر صاحبي ؟

أب حنون مية المية

ونعم الاب الحنون عمر

هههههههه

Post: #10
Title: Re: الله ينعل ابوك يا Ben 10
Author: عمران حسن صالح
Date: 10-02-2012, 07:15 AM
Parent: #6

ياخي ليه يا سامي ؟ البتاع ده فاتح بيوت ياخي
طبعاً ثقافة أسماء الشنط والحاجات دي بدت مع السنة التانية للسيد محمد عمران بالمدارس
أول سنة مشيت أول مكتبة قابلتني في الرياض وجبت الشنطة للولد الأخده وبفرح ظاهر باعتباره أول شنطة
سعرها كان عادي وممكن
السنة البعديها بدت معاي حكاية ثقافة أسامي شنط المدرسة " شاهد الله أنا شلت دمورية وحديد أيام الإبتدائي "
أجمل هدية كانت من وكيل إستيراد الحاجات دي من مكان بسووها ، صار عميلاً لدينا ويقوم بعمل حملة إعلانات العودة للمدارس كل سنة
ومع شيكـ التنفيذ بنطلع لينا بي عدة مدرسة تشمل شنطة الأقلام وشنطة الساندوتش وزمزمية ويا حبي للـ Ben 10 وسبايدر مان
مريحني ليكـ العميل " الصديق :) " في كل عام وماسح من ميزانيتي تكلفتها
بل والواد مواكب كمان
..
صورة من آخر تنفيذ لإستاندات تم وضعها بفروع تويس آر أص " بالمملكة

أها راعي شعورنا ياخي :)

Post: #13
Title: Re: الله ينعل ابوك يا Ben 10
Author: nazar hussien
Date: 10-02-2012, 07:38 AM
Parent: #10

Quote: أي منتج مرسوم فيهو هذا الBen10 (البنتين) مشيت إشتريتا ليهو..
شنطة..جزمة..بسكويت..تيشيرتات..قمصان..حلاوة..ساعة...أييي ش فيهو هذا
البنتين ممكن تتصورو انا جبتو

يا سامي وعمر...

نحن دخلنا في مرحلة وحوش BEN 10
الوحش الناري...والوحش الذبابة
وال4 Arms
والوحش النطاطي...الخ الوحوش

وعارفهم وحش وحش....

Post: #16
Title: Re: الله ينعل ابوك يا Ben 10
Author: محمد عبد الماجد الصايم
Date: 10-02-2012, 08:31 AM
Parent: #13

Quote: وعارفهم وحش وحش....

الحمد لله!
مع البنات أمورنا (رقيقة) شوية!!

Post: #17
Title: Re: الله ينعل ابوك يا Ben 10
Author: فيصل نوبي
Date: 10-02-2012, 08:45 AM
Parent: #16

ماف واحد يرسل الرابط ده لحاتم المكي عشان يدخل بن تن ده في قصة الكفيل القافل و عن يمينه واحد بي 14 جوكر

Post: #18
Title: Re: الله ينعل ابوك يا Ben 10
Author: فيصل نوبي
Date: 10-02-2012, 08:54 AM
Parent: #17

كمان في جماعة ( شون زي شيب )
ديل ما خلو لينا مكان نقعد فيهو من كترتم ياخ

Post: #19
Title: Re: الله ينعل ابوك يا Ben 10
Author: الفاتح خليل الفكي
Date: 10-02-2012, 08:55 AM
Parent: #13

الأخ / سامي

غايتو BEN 10 عمل لينا وجع راس عديل كدا

نحن لو مشينا اي محل الزول دا متابعنا

يعني الملابس والشنطة والجزمة والبيت برضو ملصقات الزول دا تقابلك في اي ركن في البيت

والله اليوم وانا والشاب كريم طالعين الصباح عشان اوديهو المدرسة قال لي بعدين تجيب لي معاك CD BEN 10

والله كلام الاخوان صحيح الزول دا لو دخل البيت تاني ما بيطلع بالهين

وربنا يحفظهم لينا ويوفقهم وينور طريقهم

أبو كريم

Post: #20
Title: Re: الله ينعل ابوك يا Ben 10
Author: عمران حسن صالح
Date: 10-02-2012, 09:17 AM
Parent: #19

يداً واحدة مع بنتين وكافة وحوش العالم المجتمعة في شنط صغارنا
وتباً وهلاكاً لكل شنط الدمورية " الخريتة " والحديد أبو طبلة ولونه ظهري

Post: #21
Title: Re: الله ينعل ابوك يا Ben 10
Author: امينة عيسى
Date: 10-02-2012, 10:07 AM
Parent: #20

ربنا يديكم العافية ويخلى ليكم عيالكم ويخليكم ليهم
بكرة يكبروا الصغار ويزيلوا الغبار
اسالوا مجرب ههههههههههههههه

Post: #22
Title: Re: الله ينعل ابوك يا Ben 10
Author: الامين موسى البشاري
Date: 10-02-2012, 10:33 AM
Parent: #21

تحياتي لصاحب البوست وضيوفه

غايتو اتثقفنا للدنيا والزمان
Quote: " شاهد الله أنا شلت دمورية وحديد أيام الإبتدائي "

وإن شاء الله عايز محمد عمران يشيل ليك الحاجات البيئة دي ياخ؟!
قولوا الحمد لله وربنا يقدركم عليها كلها ويحفظهم ليكم
عارفين بعرف لي واحد سعودي مليونير عدييييييييييييييييل
وقروشه مدفقه من كترتها
الراجل دا عندو 14 بت ما شاء الله
ومتزوج 3 نسوان ورغم دا ربنا ما أكرموا بالولد
هو كان ولد واحد وتوفي في حادث عليه رحمة الله
أها لما يقعد يتونس معانا يقعد يقول: ياخ قروشي كلها رايحه حفاضات

يقول الله تعالى: " وما بكم من نعمة فمن الله"

Post: #33
Title: Re: الله ينعل ابوك يا Ben 10
Author: عمران حسن صالح
Date: 10-02-2012, 08:58 PM
Parent: #22

Quote: يقول الله تعالى: " وما بكم من نعمة فمن الله"
ونعم بالله أخي البشاري
بس ما فهمت العلاقة ؟؟
طاري شنط زمان القصد منو عدم وجود الهاجس في تلكـ الأيام لهذه الأشياء بالنسبة لي " ومن أرافق في ذلك الزمان " رغم وجود أشياء حولنا تقول ان الدنيا فيها شنط غير العندنا .

________________
منو الرايح ليهو الدرب

Post: #34
Title: Re: الله ينعل ابوك يا Ben 10
Author: الامين موسى البشاري
Date: 10-02-2012, 09:46 PM
Parent: #33

Quote: ونعم بالله أخي البشاري
بس ما فهمت العلاقة ؟؟
طاري شنط زمان القصد منو عدم وجود الهاجس في تلكـ الأيام لهذه الأشياء بالنسبة لي " ومن أرافق في ذلك الزمان " رغم وجود أشياء حولنا تقول ان الدنيا فيها شنط غير العندنا .

عمران حســـن صالح

ازيك مرة تانية ياخ وابداً الدرب ما رايح لي
المال والبنـــون زينة الحياة الدنيا يا عمران
والحمد لله ربنا انعم على الذين مروا بهذا البوست بالمال والبنون
وتعيشوا وتجيبوا ليهم يا عمران
ودي العـــلاقة يا حبيب
تعبنا وشقانا دا كلو عشان منو يا عمران؟
مش عشانهم؟
زمان كانت دي امكانيات أهلنا وبهذه الامكانيات البسيطة صنعوا مننا رجال

Post: #23
Title: Re: الله ينعل ابوك يا Ben 10
Author: بكري عباس علي
Date: 10-02-2012, 10:42 AM
Parent: #21

سامي

الزول الحكاي

ياخي الله يخلي ليك ابو حميد ويخلي لينا بن تن عشان طلعك من علبك وجيت حكيت لينا

بالمناسبة ما زلت اتابع بوستك عن الدراسة في الهند في موقع المسافرون العرب

وتذكرت كلامك عن مقالب السناير الخشنة في البرالمة الهنود بعد مشاهدتي لفيلم 3 idiots والذي جلب رابطه الاخ محمد قرشي

مبالغة بالذات حتة البول في العتبة ما عارف قصتها مع الهنود شنو

Post: #24
Title: Re: الله ينعل ابوك يا Ben 10
Author: Hisham Ibrahim
Date: 10-02-2012, 11:17 AM
Parent: #23

الحمد لله BEN 10

وباربي وفُــــلـــه

وإسبونج بوب

وحفاضات والحمد لله ...............

يعني كل واحد عندو صديق ليهو من الكرتون ...

مافي حاجه للأم في القنوات دي والا شنو ..؟

ربنا يحفظ ما عندنا وما عندكم يا شباب ....

Post: #48
Title: Re: الله ينعل ابوك يا Ben 10
Author: سامى عبد الوهاب مكى
Date: 10-03-2012, 07:56 PM
Parent: #23

شكرا يا بكري عباس علي الإطراء الجميل..

لكن الهنود حكاية

Post: #50
Title: Re: الله ينعل ابوك يا Ben 10
Author: عبدالله احيمر
Date: 10-06-2012, 10:19 AM
Parent: #21

Quote: الحمد لله!
مع البنات أمورنا (رقيقة) شوية!!

ود الصايم

من قبيل و انا متحير في الناس ديل قافلين على بن عشـرة

ونحنا قرينا يوم باكر , إضافة لناس سـابق ولاحق و بن عشـرة

عندنا ناس باربي و كل فسـاتينها و جزمتها و شـنطتها

والعجب زمن ناس فلة

ياخي دا تعب ما معقـول , حليل زمن سـوبر مان و الوطواط

Post: #27
Title: Re: الله ينعل ابوك يا Ben 10
Author: سامى عبد الوهاب مكى
Date: 10-02-2012, 06:49 PM
Parent: #6

جنابو عمر يا إنتهازي عاوز تغنى على حساب صحتنا هههههه

تتذكر شكل الشنطة زمان؟

حكاية عجيبة والله انا بي شنطتي بتاعة الركابية الابتدائية دي مفروض اكون هسي سايق عربية نفايات في امان الله..

يا اخي انا كنت خامي لي كوشة كل يوم من البيت للمدرسة والعكس..

الشنطة بالاضافة للكراسات والكتب ممكن عادي يكون فيها باقي (حشوة امبارح) وباقي كيس قنقليز بالشطة معصور في كتاب المطالعة وحلاوة قصب ملصقها بين صفحتين عليمك الله مكتوب فيهن شتو (انا اي صفحتين يتلصقن زمان كنت بعتبرهن برة المقرر) ههههه

Post: #26
Title: Re: الله ينعل ابوك يا Ben 10
Author: سامى عبد الوهاب مكى
Date: 10-02-2012, 06:36 PM
Parent: #5

هههههههه

يا ايمن الطيب دا إنت القريت القصة في النت متذكرها فما بالك بالنسوان الحضروها لايف على الهواء ...يتخيل لي يكونوا شايفني كديس كديس ولو ما خايفات من اللوم يقولن لي بِس عديل.

هههههههه

Post: #31
Title: Re: الله ينعل ابوك يا Ben 10
Author: Kostawi
Date: 10-02-2012, 07:46 PM
Parent: #26

Post: #32
Title: Re: الله ينعل ابوك يا Ben 10
Author: Safia Mohamed
Date: 10-02-2012, 08:19 PM
Parent: #31

سامي ازيك ياخي
لا حولا انت يادوبك دخلت في المعمعة دي

بالمناسبة فقدتك في العزا كنت مسافر ولا شنو

بعدين يا ناس امدرمان
بن تن شنو البتلقاها في سوق العناقريب
امسك في كلا جنابو
دة كويس
اقطع البحر وامشي نمرةاتين العمارات اي حتة
تلقاها بالكوم
لكن سوق العناقريب دة الله اعلم

المهم
النحكي ليك دي
شفعي الصغار
الكلام دي قول قبال كم سنة كدة
عبودي وايثار والق
محومني ومللفني اسواق القاهرة سوق سوق
بيفتشو
اسمها شني هي
ياخي النصيبة ديك
سكووتر
كل واحد عاوز معاها
شكل محدد
المهم دخلنا محل كدة اي زول لقى حاجته
وشي شنط بن تن
واسطوانات اصلية للبلاي ستايشن
والجزم امات عجلات اسمهن شنو ياخي المهم
وبن تن وبن زيرو
وهانا مونتانا

همتارو
والبت ديك المهم
القصة لمن جينا للحساب

هو اتاري المحل "ماركة"
اقل حاجة بخمسين دولار لاوالله الاسطونات الواحدة بخمستاشر دولار

اعصابي باظت
كيف الشورة الله
امانة ما وقعتي

المهم قلت يا شباب كل واحد يختار حاجة واحدة بس ميزانية مافي
الاقتنع اقتنع وبرطم برطم
من يومي داك ما بسوق لي شافع لمحل لعب
من البيت عاوزين
اجيبه وخلاص عينهم بتطير لمن يشوفو الحاجات

لكن بيني بنك الطلبات ماشة في زيادة استعد
شنطة وشنو مقدور عليهن بعد شوية
موضة لابتوب واكس بوكس وما بعده

وغشوك ياماما دة ما اخر موديل

المهم الله يدي العافية بس

يلا سلام

Post: #35
Title: Re: الله ينعل ابوك يا Ben 10
Author: محمد البشرى الخضر
Date: 10-03-2012, 04:19 AM
Parent: #32

حتوت عملوا ليهم برنامج في المدرسة كل واحد يجيب يونيفورم بتاع what I want to be
من البيت قال عايز نجيب ليه يونيفورم يا طبيب يا كبتن طيارة و مشينا على الأساس دا اول ما دخلنا المحل شاف لبس اللي ما يتسماش طوالي راسو و ألف سيف لأ إلاّ ياخدو طيب يا ود الناس ما الفكرة انو لما تكبر عايز تشتغل شنو ؟ بكل الجدية الفي الدنيا : أيوة .. عايز أشتغل بن تن !!

Post: #36
Title: Re: الله ينعل ابوك يا Ben 10
Author: omer osman
Date: 10-03-2012, 05:48 AM
Parent: #35

Quote: جنابو عمر يا إنتهازي عاوز تغنى على حساب صحتنا هههههه

بقينا زي اثرياء الحرب هههههههههههههه

Post: #37
Title: Re: الله ينعل ابوك يا Ben 10
Author: محمد عبد الماجد الصايم
Date: 10-03-2012, 06:48 AM
Parent: #36

Quote: أيوة .. عايز أشتغل بن تن !!

خلي بالكـ دي ح تكون الكلمة الحركية الجديدة لـ (أمنجي)!!

Post: #38
Title: Re: الله ينعل ابوك يا Ben 10
Author: nazar hussien
Date: 10-03-2012, 07:15 AM
Parent: #37

Quote: خلي بالكـ دي ح تكون الكلمة الحركية الجديدة لـ (أمنجي)!!

أنا غايتو حاجز بن تن الكبير...نكاية في جورج بوك

Post: #39
Title: Re: الله ينعل ابوك يا Ben 10
Author: محمد أبوالعزائم أبوالريش
Date: 10-03-2012, 07:48 AM
Parent: #38

Quote: بس الميزة عندنا الحاجات دي راقدة هنا في البقالات في الحلة بتتلقي

بالله يا ود البشرى الواحد ما يلم ليك في حتوت ده عشان يحرّشو؟
شكلك بتتخارج بالمحلات الرخيصة ...... في الدكان جنب بيتكم تلقى المنتج بي عشرة ريـال (عشرة دراهم) وفي < تويز آر أص > بي 80 ريـال. الغريبة بعد يومين حيتلهي بي شئ تاني سواء كان جبت المنتج الغالي والا الرخيص.

Post: #40
Title: Re: الله ينعل ابوك يا Ben 10
Author: عمر الفاروق
Date: 10-03-2012, 07:59 AM
Parent: #38

طبعاً انا عندي الكارثة الولد الصغير صلاح..محمد داك تراهو هدي ورضي ..
أها انا ما عارف لكن أظنننو في حاجة كده حقت اطفال كان مسلسل كان شخصية كرتونية إسمها فاندوك أو فاندوق أو حاجة بي الشكل ده..
غايتو صلاح ولدي وبما إنو لفففاح جداً جداً فاول امبارح جا قال لي باااباااا..باااباااا..أنا عااايز آآآآآكوول فاندوق!!!
وقدددر ما ما وديتا يمين شمال ما عرفتها ..وسألت أخوهو يا محمد اخوك صلاح ده الحاجة بيقول فيها دي شنو؟؟ ومحمد يقول لي دي البيجيبوها في التلفزيون دييك حقت الأطفال يابابا إنتي ما بتعرفا؟؟
أها أمبارح بناكل في بيتزا وكان فيها هوت دوق..أنقرو صلاح ما كوورك وقال أيييي فان دوق..فان دووق!!
.......
هذا الصلاح فاجأني قبل كم يوم وانا نظام بتعاور معاهو عوارة كده بعملا ليهو كل يوم وهي دعاية إ متي إن حقت يازوول ما تضرب!!! أها كل يوم بجيهو ليك واقول ليهو يا زووول ما تضرب..لو جيت أأكلو بقول ليهو يا زووول ما تاكل ..ولو جيت اشربو بقول ليهو يا زووول ما تشرب!! اها بقولا ليهو بي نفس النغمة بتاعت الدعاية ..
أها قبل كم يوم وهو شكلو مزاجو رااايق وقاعد ممحن وبيحضر في التلفزيون جيتو وقلت ليهو يا زووول ما تحضر!!
رد لي بي سرعة شديييدة جداً وهو متابع في التلفزيون وقال لي بي نفس النغمة :
يا زوووول ما تسكككت ..

'طبعاً انا لحدي أسة بضحك..

تخريمة :
لحدي أسة بضحك دي إهداء لي ود الصايم عشان أوازن بيها قصة البكا ديك

Post: #41
Title: Re: الله ينعل ابوك يا Ben 10
Author: عمر الفاروق
Date: 10-03-2012, 08:03 AM
Parent: #40

بالمناسبة هذا الصلاح عمره لم يتجاوز السنتين وخمسة شهور ربنا يديهو الصحة والعافية ..
وبيقول لي أبوهو يا زووول ما تسكت ..

Post: #42
Title: Re: الله ينعل ابوك يا Ben 10
Author: فيصل نوبي
Date: 10-03-2012, 08:52 AM
Parent: #41

حفظ الله أطفالكم و أطفالنا

Post: #43
Title: Re: الله ينعل ابوك يا Ben 10
Author: محمد البشرى الخضر
Date: 10-03-2012, 11:55 AM
Parent: #42

طبعا يا ابو الريش حتوت ادلّع على حس اول ولد وكدا العابه من البيبي شوب و التويز آر أص وانت ماشي
لكن الحاجة البتجيبها كان بالغت بتقعد لبكرة العصر من ما يقول عايز يشوف البطاريات وين وبتشتغل كيف بنقنع منها
بعد شوية اكتشفنا ليك حاجة كدا اسمها الدراجون مارت مبالغة بتمن لعبة واحدة من البيبي شوب بتجيب ليك خرتمية وشوية مصيبة زمان صينية وقت كلو ديسبوزال و ما بتم التمانية واربعين ساعة بقيت اسوقو و اخواتو كل شهر شهرين منها يتفسحو و يخمو في الهتش الصيني لمن يقولوا بس هم ينبسطوا و انا انبسط و الأشقاء الصينيين ينبسطوا يعني win / win :)

حموودي .. يعني هو لا زمن ناس حتوت يشتغلوا احنا ح نكون لسة في العوارة دي أمنجي و مناضل و مش عارف إيه !! الله غالب بس

Post: #44
Title: Re: الله ينعل ابوك يا Ben 10
Author: محمد البشرى الخضر
Date: 10-03-2012, 12:18 PM
Parent: #43

بالمناسبة يا ود الفاروق البقول ليك اسكت يا زوول دا ما يطلع مريخابي وبسمع لي شروق :)

Post: #45
Title: Re: الله ينعل ابوك يا Ben 10
Author: محمد أبوالعزائم أبوالريش
Date: 10-03-2012, 12:22 PM
Parent: #43

Quote: بعد شوية اكتشفنا ليك حاجة كدا اسمها الدراجون مارت مبالغة بتمن لعبة واحدة من البيبي شوب بتجيب ليك خرتمية وشوية مصيبة زمان صينية

لالالالالالا يا أبو حتوت ..... معليش ....... أبداً ما مهم إنك (تكتشف) ..... المهم إنو (حتوت) بتاعك و(رامي) بتاعي هم الـ(يكتشفوا) ..... لأنو إكتشافاتنا ما ليها أي قيمة لو هم ما إقتنعوا.

عارف ..... كل مرة رامي يجيني بي إسم جديد (جديد علي أنا طبعاً) .... أقول ليهو لقيتو وين ... يقول لي أم بي سي3. مرات أعمل فيها حريف واجيب ليهو النسخة الرخيصة من نفس المنتج ... يصر وشو ويقول لي (دي ما الأصلية ..... الأصلية في تويز آر أص).

Post: #46
Title: Re: الله ينعل ابوك يا Ben 10
Author: عمر الفاروق
Date: 10-03-2012, 12:50 PM
Parent: #45

Quote: بالمناسبة يا ود الفاروق البقول ليك اسكت يا زوول دا ما يطلع مريخابي وبسمع لي شروق :)

تعرف يا ود البشرى وده ما كلام هظار..انا جادي فيهو والله..
اووول كلام بعلموا لي أولادي بعد ما بكون أذنت ليهم في إضنينهم بعد الولادة هم جملتين ..
الهلال سيييد البلد ..
المريخ..عوووووع..
عارف محمد ما أخد معاي ساعة وكان إستوعب الدرس وبقا من اناديهو واسالوا محمد الهلال؟ توووشك يقول لي سييد البلااااد..
المريخ؟ عووووووووع..
أها يا عمك ابو صلاح ده عذبني عذاب السنييين والله ..إمكن قعدت معاهو شهر أوقع ليهو الحاجات عشان ما يلخبط ....
بسألوا ليك يا صلاح الهلال؟؟
يقول لي أووووع ..
المريخ ؟ يقول لي سيد أأأ بلاااد..
أخيييراً والحمد لله قدر يستوعب إنو المريخ عووع واللون الأحمر عوووع واللون الأصفر عوعيين..والهلال سيييد البلد..
بالجد القصة دي كانت مأرقاني ليك جداً بس الحمد لله إتجاوزناها ..

بالنسبة لي شروق فالنصييييحة كل الأسرة مرييحاني من الجانب ده والجميع متفق دون تدريبات..:)

Post: #47
Title: Re: الله ينعل ابوك يا Ben 10
Author: سامى عبد الوهاب مكى
Date: 10-03-2012, 07:51 PM
Parent: #46

البركة فيكم وفينا في أم الجميع يا صفية..

كنت موجود انا والمدام بس فعلاً ما أتقابلنا..

لسة ما سافرت..عليك الله لو سافرت كنت لفيت للشنطة في الملجة وسوق العناقريب

Post: #49
Title: Re: الله ينعل ابوك يا Ben 10
Author: سامى عبد الوهاب مكى
Date: 10-03-2012, 08:01 PM
Parent: #46

بطل عوارة يا عمر الفاروق وخلي الود يختار الفطرة وزول من هسي بسكتك وعارف الهلال عوووع رغم التلقين قطع شك مريخابي.

ابعد من الود ولا حا نضطر نقلع ولدنا اصلوا بقينا متخصصين نقلع منكم بمزاجنا

Post: #51
Title: Re: الله ينعل ابوك يا Ben 10
Author: عبدالله احيمر
Date: 10-06-2012, 10:40 AM
Parent: #49

يا سـامي

دخلنا توش من غير مانسـلم و نهنيء البطـل بعـيد ميلادو

اها بالله بلغو التهاني و عقبال 100 سـنة من السـعادة ومني شـنطة ( ســفنج بوب ) هدية

وبالله شـوف اغلب الناس ديل ممكونين كيف , وكل واحد قايل نفســو براه الممكون

يا جنابو عمران بيهدي ليهو ( صديق )

بس ما تكون بتشـيل من المكتبة من غير ماتدفع الحسـاب

Post: #52
Title: Re: الله ينعل ابوك يا Ben 10
Author: Salah Abdulla
Date: 10-06-2012, 11:32 AM
Parent: #51

Quote: مع البنات أمورنا (رقيقة) شوية!!

رقيقة شنو يا ودالصايم ياخ مع دورا وأسبونش بوب ديل !!

Post: #53
Title: Re: الله ينعل ابوك يا Ben 10
Author: saif massad ali
Date: 10-06-2012, 11:33 AM
Parent: #51

يا اخوي انت تحمدالله مش بقو ليك عصابة في البيت كدي جات سليمة

والله انا حقني عندهم جنس نضموت بالانجليزي يجيرك الله الما بفهمو انا

Post: #55
Title: Re: الله ينعل ابوك يا Ben 10
Author: سامى عبد الوهاب مكى
Date: 10-06-2012, 05:17 PM
Parent: #53

ماشاء الله ياسيف ربنا يحفظهم..

الصغيروني يبدوا إنه شيطان ومفتح.

Post: #54
Title: Re: الله ينعل ابوك يا Ben 10
Author: سامى عبد الوهاب مكى
Date: 10-06-2012, 05:14 PM
Parent: #51

يا سـامي

دخلنا توش من غير مانسـلم و نهنيء البطـل بعـيد ميلادو

اها بالله بلغو التهاني و عقبال 100 سـنة من السـعادة ومني شـنطة ( ســفنج بوب ) هدية

وبالله شـوف اغلب الناس ديل ممكونين كيف , وكل واحد قايل نفســو براه الممكون

يا جنابو عمران بيهدي ليهو ( صديق )

بس ما تكون بتشـيل من المكتبة من غير ماتدفع الحسـاب

مشكور يا زعيم على الهدية والتهنئة

Post: #56
Title: Re: الله ينعل ابوك يا Ben 10
Author: Dr. Ahmed Amin
Date: 10-06-2012, 07:23 PM
Parent: #54

تحياتي يا سامي وكل المتداخلين ...

Quote: الفكرة انو لما تكبر عايز تشتغل شنو ؟ بكل الجدية الفي الدنيا : أيوة .. عايز أشتغل بن تن !!

تعرف يا ودالبشرى ولدكـ ده ذكرني أيام طفولتي ..
كنت بشوف الموكب بتاع (نميري) ماري والشرطة والمواتر ومنظرمهيب ما بنساه للآن..
والحكاية ده كانت مكيفاني شديد .. وطبعا لا كنت بعرف شنو رئيس ولا يحزنون ..

فلمن كان يسألني أي زول لمن تكبر عايز تشتغل شنو ؟ من دون تردد بجاوب : عايز أشتغل نميري

أما قصة شنط المدارس وما تسببه من صداع لينا.. حليتها بصوره ديمقراطية
اول ما تبدأ أيام Back to school أسوقهم للمول وكل واحد يختار الشنطه العاجباه ويتحمل مسئوليته
عشان ما يجي بعدين يقول لا لا انا ما كنت عايز دي ...

___________________________________________

ولينا مده بدينا في موال تاني كمان إسمه IPad 2 و IPad 3

ياخي عيال الزمن ده غايتو الله يسترنا معاهم بس ...

Post: #57
Title: Re: الله ينعل ابوك يا Ben 10
Author: عمر الفاروق
Date: 10-08-2012, 08:30 AM
Parent: #56

يا ابو السيم ..
هاك دي واحدة من جدعات ولدي الصغمبروتي صلاح (ابو صلاح كما اناديه)..وزي ما قلت ليك هو عمرو سنتين ونص..
أها طبعاً هو عندو حركة كده كللل ما يكون بيحضر في قنوات الأطفال دي ويجيبو دعاية حقت شنط يقوم وبي صررة كده يقلب وشو ويمد بوزو ويقول لي :
بااابا بااابا إشتري لي سنننتة ..

أها يجيبو دعاية سيارات اطفال يقوم بي نفففس الصرة يقول لي:
باابا ..بااابا إشتتتري لي سيييااارة..

وهكذا ..
أها امبارح بيحضر قناة في طيور الجنة قاموا جبوا البت الإسمها ديمة ديك شكلها بتروج لي يوم ترفيهي بتقول مسباقاات ومسابقااات..
مد بوزو وبي صرررتو ديك قال لي:
بااابا ..بااابا..إشتتتري ليي مسابقاااات ..

Post: #58
Title: Re: الله ينعل ابوك يا Ben 10
Author: عبدالله احيمر
Date: 10-08-2012, 10:37 AM
Parent: #57

Quote: ولينا مده بدينا في موال تاني كمان إسمه IPad 2 و IPad 3

وكمان play station 3 و X box

قال الصغير وقد رأى ** في الليلِ نجماً قد تلهّب
أبتِ بربكَ هاتِهِ لي ** كيما أســرُّ بهِ وألعبْ
فأجبته هذا بعيدٌ ** ليسَ كل مناكَ يُــطلب
فمضى ، ولاحت دوننا ** سيارةٌ للأرضِ تنهب
حمراء تجتذب العيون ** كأنها في الآرض كوكب
قال الصغير: إذاً فهذه ** كيما اســر بها أركب
فوجمتُ ثم أجبته ** يا بني النجم كان أقرب

Post: #59
Title: Re: الله ينعل ابوك يا Ben 10
Author: سامى عبد الوهاب مكى
Date: 10-09-2012, 06:30 PM
Parent: #58

شكرا يا دكتور على المرور ومشاركة تجربتك الناجحة لكن صدقني لو قلت ليك الشفع ديل الشنطة بتصرفها ليهم المدرسة والاستيشينيري كلها بشتريها ليهم قبل الحكم يصفر وبعد دا بيكون في زي اقل حاجة 4 شنط تاني خلال السنة ووالله انا هسي بكتب وشنطهم مرصوصة قدامي ستة علما بانهم بدو شهر 8 خليها على الله بس

Post: #60
Title: Re: الله ينعل ابوك يا Ben 10
Author: سامى عبد الوهاب مكى
Date: 10-09-2012, 06:41 PM
Parent: #57

يا عمارة دنقس اياك تقصر في طلبات سيد البيت والزعيم المريخابي صلاح