يوم .. في مدرسة البنات !!

في البداية :
لا أحكي هذا الموقف تفاخرا به أو إعجابا بما حدث معي ولكن هي تجربة على غرابتها أردت من سردها أن أعرف هل ما قمت به خطأ أم صواب
وما هو الصواب .. فربما قد يمر أحدكم بمثل هذه التجربة

تحياتي

معظم الطلاب الجامعيين في سنين الدارسة لا يعلمون بما ينتظرهم بعد التخرج ..
أكاد أجزم أن جميع الطلاب كانو يعتقدون بسهولة العمل
بمجرد التخرج وان فرص العمل على قفا من يشيل
وجميع الطلاب (بما فيهم أنا) ملؤوا آذان الجكس عن وعود زائفة بالزواج القريب
سنة واحدة .. وبجيك يا السمحة واطلبك من ناس بيتكم رسمممييييييي ..
سنة واحدة بس أكون نفسي واعمل حاجاتي وبجيك .. والله العظيم بجيك
ترى كم من قسم مغلظ رفع إلى السماء بوعد لم يوفى ..

المهم .. أخيرا اتخرجنا ..
ما عارف لكن الزول بجيهو احساس عجيب جدا بالفراغ بعد التخرج ..
بتحس زي كان في كومر كبير مصدي جوا راسك وفجأة بقى مافي
لمن راسك زاتو يضرب .. وين الشغل ؟؟ وين الشركات ؟؟
والخدمة الإلزامية ، معظم الخريجين في الزمن داك بتكون ضاعت منهم
ستة شهور لي سنة وإنت ساكي ليك كم واحد محتال قال إنو بطلعك منها ..
وما عارف بجيب ليك البطاقة لحدي عندك في البيت ...
والشهادة لله في ناس محظوظين بكونو إتخارجو بي وهمات زي دي
لكن أنا ماااا كنت من الناس المحظوظين ..
سنة كدا ضاعت من عمري ساااااي هباءا منبثا ..
لا قضيت الخدمة ولا لقيت لي بطاقة مضروبة
في النهاية أيقنت وتأكدت من إني ماشي المعسكر لا محالة ...
انتهت فترة المعسكر واتوزعت في وزارة الداخلية ..
طبعا ماهية طالب الخدمة الإلزامية الوقت داك كانت 50 ألف
اللهي خمسين جنيه هسي ..
المفروض تركب بيها المواصلات وتفطر منها وتعيد ترتيب نظرية المنطق والمستحيل تاني ..
وطبعا بما إنك كبرت (وبقيت راجل يعني) فعيب بعد دا تاني تمشي تمد يدك لي ناس بيتكم ..
موش كفاية واقفين معاك لحدي ما اتخرجت ..

طبعا الدامة بتكون خلاص طارت زماااان أول ما سمعت بيك خشيت الإلزامية .. امال ايه ..
يعني ها تنتظرك لحدي متين ؟؟ سنة خدمة إلزامية .. سنة شغل سبهلل ساي
سنتين تاني بتساعد ناس بيتكم ..
يعني لمن تبقى زول عرس بتكون هي زااااتا الجمال والسحر الكنت شايفهم أيام الجامعه طاروا مع الغراب إياه
غايتو كان في ناس معانا في الجامعة مفتحين شوية وأصحاب نظرة عميقة ..
يعني موضوع الارتباط الجاااادي دا إتأجل لحدي ما بقو خلاص في السنة الأخيرة
وقووموا يا السناير عزلو أحلى برالمة ..

كنت محظوظ شوية لأنو دوامي في الخدمة الإلزامية كان ببدا الساعة 2 عصرا لحدي 7 بالليل فاااا شنو الحاجة دي ادتني فرصة أفتش شغل بالصباح
سمعت عن شركة متعاقدة مع عدد كبير جدا من المدارس الخاصة عشان توفر للمدارس دي مدرسين كمبيوتر وتجهيز لابات الكمبيوتر ..
مشيت قدمت ورقي وبعد اسبوعين تلاته كنت موزع في مدرستين (أولاد وبنات) ماسك حصص الكمبيوتر والحصة بعشرة جنييييه والحسابة بتحسب
طبعا مدرسة الأولاد كان بالنسبة لي التعامل معاها سااااهل جدا وما عندي أي مشاكل
لكن مدرسة البنات ؟؟!!! ياللهول ..
أصلا بطبعي زول خجول جدا قدام أي انثى وممكن أتكلم مع زولة نص ساعة عديل كدا وأنا ما شايف إذا كانت لابسة نضارة وللا لأ
ياخ مرة من ذات المرات (والكلام دا حكيتو قبل كدا في المنبر هنا)
راكب في القطر جاي من الشمالية .. والقطر فااااضي ما فيهو ناس كتار .. أها ربك رب الخير ركبت معانا في نفس العربة
بت من عطبرة .. بت ! لا إله إلا الله منها ياخ
وكيف كيف حبيت أفتح معاها موضوع ما متذكر سألتها من شنو لكن قالت لي هي قطعت إجازتها وراجعة الخرطوم عشان جاتا ملاريا
وعشان أكمل معاها الونسة داير أسألها من نوع العلاج الأخدتو فـ ... عايز أقول ليها أخدتي حقن وللا حبوب (علاج الملاريا)
شبكتها ليك أدوك حقون وللا حبب .. آآآآآ حبب وللا حقون ... آآآحقون وللا حبب
يمين بالله الجملة أبت تتباصر معاي كلو كلو .. لحدي ما انفقعت هي بالضحك وقالت لي حبوب ياخ حبوووووووووب

المهم نرجع لموضوعنا ..
طبعا أنا لا خريج تربية ولا عندي الحد الأدني من المعرفة البتخليني أفهم التركيبة النفسية للطالب ولا كيف أتعامل معاهو
ولا أي حاجة ، اللهم زول مسكوهو الطبشيرة وأدخل درّس الناس ديل .. زي ما قلت فوق .. ما عندي مشكلة كان في تدريس الأولاد
بالعكس كنت مستمتع جدا بالموضوع دا لكن الخجل من الجكس دا .. إضافة لي إني أكون مدرس يعني أكون واقف قدام الفصل وزي خمسين بت كدا بعاينوا لي
لا حول ولا قوة
إذ أنسي لا أنسى ... أول يوم .. وأول حصة
كانت الحصة في الصف الثالث .. يعني أكبر البنات الموجودات في المدرسة
قريت سورة العصر كمممم مرة كدا وجيت خاشي الفصل .. باب الفصل قصاد السبورة طوالي والبنات علي إيدي اليمين
السسلااااام عليكم .. وخاشي وبعاين للبنات كدا نظام الود صوتو جهوري وداير أشوف البنات واقفين احتراما للمدرس الجديد دا
قدام السبورة كان في مسطبة عالية وطبعا مع الكبكبة ما شفتها .. إتعترت في المسطبة واتفنقلت لحدي نهاية الفصل .. ما سبتتني إلا الحيطة البهناك
هاج الفصل وماج من الضحك وانا وشي بقى أحمر من الطماطم
أول ما قمت وإتنفضت من الغبار مسكت الطبشيرة وكتبت في السبورة بخط كبييييير
هم ألبسوكِ دثار خزي ناعم الأسلاك منغوم الحفيف
ودعوك تاج العز .. مجد العز .. شمس العز .. عز العز
وصبوا في دماك عصارة الكذب المخيف ..
وإتلفت عليهم سائلا .. مين قال الكلام دا
لوووووووووووووول

سوري يا شباب
نرجع للموضوع
المهم لاحظت في نفس الفصل أعلاه في بت طووااااالي بتكون سرحانه في الحصة
ودايما بتعاين بالشباك وقدر ما ألكزها وأسألها أي سؤال بتكون ما ناقشة أبو النوم
في يوم من الأيام وأثناء فسحة الفطور جاتني البت الما بتغباني دي وجابت لي عصير في اللاب
المرة الأولى قبلت الموضوع على مضض () وأخدت العصير
تاني لمن جاتني في نفس المواعيد اتحججت بأني فاطر هسي وبطني مليانة وشكرتها وبكل تهذيب قلت ليها تاني ما في داعي تتعبي نفسك وتعملي كدا
طبعا علاقتي اتوطدت شوية بالمعلمين الموجودين من زمان في المدرسة واستفدت جدا من نصايحهم في كيف إني احسم أي بت عندها حركات أو ميول عاطفية
بعد كم يوم.. والامتحانات خلاص فاضل ليها شوية جاتني نفس الزولة دي .. قالت عندها حاجات ما فاهماها وعايزاني أشرحها ليها .. على انفراد
الوقت داك كان بين الحصص وقلت ليها خلاص مرّي على آخر اليوم ..
فعلا .. انا قاعد في اللاب .. والباب فاااااتح على مصراعيه .. بس حركة الطالبات في المدرسة قلت .. وعدد الاساتذة برضو ..
المهم لحدي الوقت داك أبدا ما جا على بالي
الزولة دي في راسا في شنو ..
والحاجة المطمناني شديد إنو لسة في أصوات بنات برة وإنو الباب فاتح ..

البت سؤالها كان عن كيف الزول بدس ملف الكمبيوتر
الحركات الكنا بنعملها زمااااان ديك ..
جرت كرسي وقعدت جمبي في الجهاز
مع إنو السؤال ما كان عندو أي علاقة بالحاجة الكنت بدرس فيها
لكن شرحتها ليها في الكمبيوتر الحاجة دي بتتعمل كيف
ولاحظت فيما يلاحظه الاستاذ وأنا بشرح ليها ..
إنو البت دي مااااا قاعدة تعاين للجهاز قدامي وقدامها
لكن بتعاين لي أنا دا ..
وأنا أشرح في الجهاز
تفتح الملف .. وتخش بروباراتيز .. وتعمل شنو
وهي .. ولااااا شايفا حاجة .. بتتأمل في شنو ما عارف
والله لمن أسكت من الكلام كنت بسمع صوت نفسها في أضاني جوووة
فجأة ..
وبدون أي مقدمات إذ تقوم البت المفعوصة دي تنط في رقبتي
كنكشت فيني كنكيشة .. التقول عندها فيني نص ..
وبقوة عجيبة جددددا .. ويدينها زي إتخشبوا كدا وللا شنو ما عارف
لدرجة إني بقيت بيدي الشمال متكي على الأرض من فوق الكرسي وباليد التانية
بحاول أزحها مني ..
ودا كلو وأنا خايف يجي زول ماري بالباب يشوف المنظر دا ..
طبعا موش لو حلفت يمين غموس .. لو عملت السبعة وذمتها ما في زول شاف اللقطة دي
كان هايصدق الحاجة البحكي فيها دي .. طوالي ها اكون أنا المتهم وهي الضحية
شوية شوية وبراحة لحدي ما نزلت الكرس الأرض ..
لزيتها بي يديني الإتنين وقمت على حيلي .. وأول ما قامت هي زاتها
طططططرررررخ .. أديتها كف من النوع البتندم عليهو داك
وطلعت من اللاب ..
ما عارف أتصرف كيف وللا أمشي لي منو .. وللا أحكي الموضوع دا وللا اموت بيهو ساي
المهم .. طلعت من اللاب من غير هدف واضح .. لقيت نفسي جمب الزير .. ومليت الكوز موية
وجبتو للبت دي جوة اللاب ..
والصراحة لله لقيتها بتبكي بكى شديد جدا وبحرقة شديدة .. ما عارف من الكف وللا من العمليه العملتها دي
اديتها الموية وخليتها شربت .. بعد داك قلت ليها أنا داير أقفل اللاب .. وأمرتها بالخروج

..
اها التصرف دا كان صاح ؟

لوووووووول
أني هاو ..
التصرف الفوق دا ما كان صاح مني
كان المفروض أصعد الموضوع شوية وأوصلو لأدارة المدرسة
لي أهلها في البيت
لأنو بعد كم شهر .. شوهدت البت وهي منتفخة البطن وحامل في شهورها الأخيرة

بعد فترة عرفت من أحد الزملاء إنها أجهضت حملها وما عارف حصل ليها شنو بعد كدة

توتة توتة .. خلصت الحدوتة

Quote: اها التصرف دا كان صاح ؟

تصرفك صاح يا محمد عمر 100%
ناس كتيرة بتكون مرت بي مواقف زي ده ...
البت دي مسكينة ما لقت زول يخت ليها راسها في محله ...
وهي في عمر زي ده
بس كان تتم جميلك وتوريها انه الكلام ده ممكن تجيب ليها مصايب لي قدام وشكله ده الحصل

الفرصة لاتتطرق بابك مرتين...

المهم عملت شنو مع الدامة الاصلية....

Quote: الفرصة لاتتطرق بابك مرتين... المهم عملت شنو مع الدامة الاصلية....

أبو حميد ..
معليش الرد الأول كان شكلو متسرع شوية
عموما يا باشا لو قاصد بالفرصة إنو الطالبة المسكينة دي جات ومارست جزء من مراهقتا معاي
فوالله دي فرصة الله الغني عنها
برغم صغر سني الوقت داك وقلة خبرتي وتجربتي في الحياة .. لكن كان عندي إحساس أبوي تجاه كل البنات
والمدارس يا حبيب فيها أخواتنا وبناتنا وبنات أهلنا .. والشي الما بنرضاهو لي ديل ما بنرضاهو برضو لي بنات الناس
.....
سبب لتعديل .. كباية قهوة بي وش
:)

Quote: تصرفك صاح يا محمد عمر 100% ناس كتيرة بتكون مرت بي مواقف زي ده ... البت دي مسكينة ما لقت زول يخت ليها راسها في محله ... وهي في عمر زي ده بس كان تتم جميلك وتوريها انه الكلام ده ممكن تجيب ليها مصايب لي قدام وشكله ده الحصل

كونت يا حبيب..
مواقف كتيرة فعلا .. بس زي ما قلت أنا ما كنت مؤهل للقيام بالدور دا على أكمل وجه
ودا برضو بسبب إدخال كادر غير مؤهل لمجال التعليم .. والتربية قبل التعليم !

تحياتي ليك

Quote: البت دي مسكينة ما لقت زول يخت ليها راسها في محله ...

دي النجيضة رقم واحد يا معلم!!
باقي الخطوات ح أنتظر معاكـ ..
الواحد يكمن تجور عليهو الظروف ويرجع الإلزامية

يا اسق جبريل
مسكاقمي
تعرف المواقف الظريفة عند المدرسين كتيرة
انا اشتغلت مدرس في مطلع السبعينات
وانا جاي جديد لنج من اقصى الشمال ورطاني وما بكره في الدنيا غير اتكلم بالعربي
تعرف انا بتضايق كنت لمن اتكلم بالعربي بحب الرطانة شديد ولمن القى لي محسي ارتاح راحة شديدة
اقعد افتح معاه مواضيع بسبب وبدون سبب واقعد ارطن وارطن
علي شلاقة حظي ما كان في فرص متاحة الا التدريس ومشيت اشتغلت مدرس ... انا بعرف اكتب عربي وبعرف القواعد والنحو
وكنت بنجح في اللغة العربية والوقت داك انت لو ما ناجح في اللغة العربية ما كانوا بيعطوك الشهادة السودانية
ساقط عربي يعني ساقط في الشهادة والحمد لله انا نجحت في العربي
بس المشكلة كان عندي في التحدث بالعربي وبالذات مع بنات الخرطوم ( بتكلمن جنس عربي بنات الزين دووول )
وبالذات بيضايقني قصة المؤنث والمذكر دا انا ما عارف عاملنها لي شنو
أها على الشلاقة العلينا ناس اليونسيف كان عندهم نظام اسمو التدريب اثناء الخدمة كان يوم في الاسبوع
وكان لازم اشترك عشان اجد فرصة في الترقيات واكون مدرس مؤهل
كنت بمشي ولقيت واحد من اولاد كيكا وواحد تاني حلفاوي كانوا مشتركين معاي في الدورة ضمن الدفعة كنت بقعد اتونس معاهم
المدرسين الباقين طبعاُ فرصة ونسات وقفشات وعلاقات مع المدرسات وانا اصلاً ما عندي قضية مع اي واحدة
علي حظي العاثر في واحدة كانت بتجلس جنبي بحكم الحروف الابجدية وهي سمحة ولكن ما كنت بتونس معاها غير السلام عليكم واهلاً
ما كنت بزيد ... ولكن بامانة كنت بعاين لي رجليها لغاية فوق حاجة تمام
بت الزين دي نقشت اني ما بعرف اتكلم عربي مع البنات وطوالي استقصدتني لمن نكون متجمعين طوالي تقوم تفتح معاي موضوع
وبالذات لمن نتجمع في الفطور في البوفيه (كنا بنأكل مع بعض الفول) تقوم تسألني اسئلة محرجة
وانا اتحرج عشان لازم ارد عليها مااقدر اطنشها ... وانا اتعلثم واصب عرق بلساني وحالتي تكون حالة .. والشلة مفتكرين
انه في استلطاف بيننا وانا هايم بيها ... ما عارفين انو ديني طالع
بقيت لمن نمشي القاعة اترجاها يا استاذة يا بت الناس عندك كلامي قولي معاي هنا بلاش هناك الله يخرب بيتك ... وهي تضحك
ولمن تضحك انا اتغاظ زيادة واقوم اسب ليها مكعب حلفاوي
شوف باالله الدفعة كلها ما لاقين فرصة يتونسوا معاها وهي مطلعة زيتي
الله يطراها بالخير

الأخ صاحب البوست تحياتي
طبعا الطلبه والطالبات بكونو في مرحله خطره وبحتاجو النصيحه وطبعا البت دي بتكون حبتك وشافت فيك فارس احلامها بس يا ريت لو كان انت صاحبتها وقعدت تديها جرعات هدايه وتوعيه وتوريها الطريق الصاح
عارف كان بدري شويه كدا شباب الحله قالو يعملو جرعات تقويه للاولاد والبنات الممتحنين شهاده اساس وثانوي عمل خيري كدا بعدين قالو لي تجي تشتغلي معانا لغه انجليزيه وكورس مجاني وحاجه كانت جميله خلاص الوقت داك انا في الجامعه دخلت اول يوم الحصه طلبة شهاده فعاكسوني معاكسه شديده وهم اصغر مني طبعا وكان في واحد جري شديد كل ما اقول كلمه يرددها بي نفس طريقتي ويجرها قلت ليهو بليز يقوم يقول بلييييييييييز ويكتل لي في عيونو من اليوم داك بقيت لما اجي الحصه يجي معاي شاب من المتعاونين اي واحد يعمل حركه كدا ولا كدا ينجلد
الله المستعان

Quote: ولمن تضحك انا اتغاظ زيادة واقوم اسب ليها مكعب حلفاوي

المكعّب الحلفاوي يوازي 13 ضعف المكعب العادي!!

Quote: لأنو بعد كم شهر .. شوهدت البت وهي منتفخة البطن وحامل في شهورها الأخيرة

الأخ: محمد عمر .. سلامات ..
طيب الحمل حصل قبل الكنكشة ولا بعدها ..بإختصار يعني هي كانت حامل وعايزة تحملك المسؤولية ..
ولا المقابضة دي كانت من ضمن مساعيها للإنتفاخ ..عشان تبريء ساحتك ما يكون الإتفاخ وليد الكنكشة ..
مين عارف البت يافعة وكل شي وارد (قالوا تزوج رجل إمرأة حبول، تعامل معها برقة فحبلت ..تعامل معها
بقسوة فحبلت، سافر بعيداً وأرسل لها خطاب غرامي يبث فيه أشواقه فحبلت).،،


تحياتي ..

Quote: الأخ: محمد عمر .. سلامات .. طيب الحمل حصل قبل الكنكشة ولا بعدها ..بإختصار يعني هي كانت حامل وعايزة تحملك المسؤولية .. ولا المقابضة دي كانت من ضمن مساعيها للإنتفاخ ..عشان تبريء ساحتك ما يكون الإتفاخ وليد الكنكشة .. مين عارف البت يافعة وكل شي وارد (قالوا تزوج رجل إمرأة حبول، تعامل معها برقة فحبلت ..تعامل معها بقسوة فحبلت، سافر بعيداً وأرسل لها خطاب غرامي يبث فيه أشواقه فحبلت).،،

سلامات يا بشير وكيف حالك ياخ ..
يا عزيزي موضوع الحمل دا كلموني بيهو بعد سنيييين من خليت موضوع التدريس
بالصدفة لاقيت واحد من الزملاء الكانو معاي في المدرسة ومن ضمن الونسة حكى لي القصة

تحياتي

Quote: الأخ صاحب البوست تحياتي طبعا الطلبه والطالبات بكونو في مرحله خطره وبحتاجو النصيحه وطبعا البت دي بتكون حبتك وشافت فيك فارس احلامها بس يا ريت لو كان انت صاحبتها وقعدت تديها جرعات هدايه وتوعيه وتوريها الطريق الصاح عارف كان بدري شويه كدا شباب الحله قالو يعملو جرعات تقويه للاولاد والبنات الممتحنين شهاده اساس وثانوي عمل خيري كدا بعدين قالو لي تجي تشتغلي معانا لغه انجليزيه وكورس مجاني وحاجه كانت جميله خلاص الوقت داك انا في الجامعه دخلت اول يوم الحصه طلبة شهاده فعاكسوني معاكسه شديده وهم اصغر مني طبعا وكان في واحد جري شديد كل ما اقول كلمه يرددها بي نفس طريقتي ويجرها قلت ليهو بليز يقوم يقول بلييييييييييز ويكتل لي في عيونو من اليوم داك بقيت لما اجي الحصه يجي معاي شاب من المتعاونين اي واحد يعمل حركه كدا ولا كدا ينجلد الله المستعان

هويدا شرف الدين ..
وأنا بقرا في كلامك دا وحركة الطالب في ترديد كلامك البتقوليهو اتذكرت التطبيق بتاع Talking Tom برضو بردد الكلام بنفس طريقة الطالب
أهو يا ستي .. نوع من أنواع الكبت الاتفرض على بناتنا وأولادنا ديل .. زمااااااان لمن كان التعليم مختلط ما كان بنلقى زي الممارسات دي بتحصل
الطالب ومعلمته .. أو الطالبة ومعلمها ..
التطور الطبيعي بتاع أي بني آدم سواء كان بت وللا ولد بمر بالمرحلة دي ..
ولو ما كانت في قنوات (طبيعية) أكيد ها نلقى تفلتات زي دي في واقعنا اليومي
المؤلم إنو ما كل الاساتذة دارسين تربية او خريجين كليات التربية .. بقى في جزء كبير جدا هو في الأصل فاقد تربوي
ولقى بيئة زي دي أكيد النتيجة ما ها تكون كويسة على الإطلاق
تحياتي ليك .. وشاكرين المرور

عمنا حمزاوي ..
سرقنمي .. سكر فيك *
ذكريات الأيام الأولى في كل حاجة بتكون جميلة وحميمة لي نفس الزول
عشان كدا دايما بنحن لي أيام زمان وحاجات زمان
التدريس يا عمنا أظنو من أكتر المهن بكون فيها تواصل وتفاعل إجتماعي
ما زي باقي الوظائف .. بس قاعد في مكتب وقدامك ورق وللا كمبيوتر
مهنة التدريس بالجد من المهن الممكن تدخل الزول الجنة
الايام ديك حصل لي برضو موقف ظريف جدا في مدرسة الأولاد..
حصل في أول حصة لاب ..
وأكيد في الزمن داك .. كان في مجموعة كبيرة من الطلاب ما شافو الكمبيوتر دا قبل كدا
المهم .. بعد ما وريتهم دي شاشة .. ودي اسمها ماوس ودا كيبورد
بعد شوية قلت ليهم .. يالله أي زول يمسك الماوس يختو في ماي كمبيوتر الفي ركن الشاشة الشمال
إنت قايل مافي واحدين شالو الماوس بييييي عضمو ختوهو في الشاشة ..
غايتو كانت أيام
تحياتي ليك وين ما كنت
________
* بسمعكم بتقولوها كدا في السلام
لكن ما عارف معناها شنو

Quote: سرقنمي .. سكر فيك

حالتكـ مدرس!
أعد .. أعد ياخ!!





_
ثم قهوتكـ أبو وش ظريفة عديل!!

Quote: حالتكـ مدرس! أعد .. أعد ياخ!! _ ثم قهوتكـ أبو وش ظريفة عديل!!

صايمون ..
يا زول إنتو بتخجلو من كلامكم وللا شنو ؟؟
كان ما ياها قريييييبة منها

بعدين العلم إتطور ياخ .. القهوة بقت تجي الزول إن باينري سيستم

إزيك يا دفعة ..

سلام يامحمد عمر جبريل بتاع CMC

Quote: طططططرررررخ .. أديتها كف من النوع البتندم عليهو داك

إحتمال يكون دا الجاب النفاخ زاتو!!البعيد شنو!!

جارين تكفتو بس,,

بوست محول لحكومتك المحلية عشان تراجع معاك فترة خدمتك الإلزامية

_____________________________________ شايف الشخيت دا؟؟

تحياتى ..

أيمنوف ..
والله الواحد خجلان منك عديل .. ياخ بالله عليك تلقانا لينا العذر
فترة إجازتك الأخيرة دي الواحد كان مزحوم بي حاجات الدنيا الما بتكمل دي لييييي رقبتو والله
والكلام دا ما كلام والسلام لكن بالجد نستسمحك ياخ والجايات أكتر كان ربنا مدّ في العمر ..

الحكومة المحلية ما تجازف ليها باسويرد من بكري بعد دا !!
جنكم تزجّو بي الاسر في الخلافات الشخصية

تيسير يا تيسير ..
حالك وأحاويلك .. النبي فيك ما تزيدي حاجة فوق يا دفعة دي