جَابَنُو وأولادا السبعة والكلــب الضكر

جَابَنُو وأولادا السبعة والكلــب الضكر


09-30-2012, 01:05 PM


  » http://sudaneseonline.com/cgi-bin/sdb/2bb.cgi?seq=msg&board=410&msg=1349006739&rn=1


Post: #1
Title: جَابَنُو وأولادا السبعة والكلــب الضكر
Author: عبدالله ود البوش
Date: 09-30-2012, 01:05 PM
Parent: #0

جابنو كـلبـة عمي علي ود بله ولدت سبعة من ضكر لنتاية وكل يحمل اسمه
ومعاهم الكـلـب الكبير الضكر واسمه جاموس
جابنو وجاموس عشرة عمر مع فريق عمي علي ود بله وحبوبتي حرم مدينة
جابنو بتعرف ناس الفريق كلهم نفر نفر وناس الفريق يبادلوها المعرفة والاحترام
نسلم عليها زيك يا جابنو وترد السلام وتكاد تسمع تحياتها وتشوف الابتسام في وشها
وويل لكل من يمر بالفريق وهو غريب تشم ريحتو من بعيد وتلبد ليهو في فرقة وتلحسو المرقة
وقولة هووووو غريبك ينط وقلبو اطير فر وتكاوشو جابنو تحت كرعيه وعلالتو تقيف تُكل
علا احلو عمي علي ود بله ولا حبوبتي حرم مدينة بعبارات معروفة لديها ...
جابنو البلا اللياخدك قطعتي قلب الضيف
وهنا تَتَبْتِب ضنبها معتذرة للضيف الكريم مع تَعْوِيصَة الترحيب والاحترام
جابنو كان يومنا معها اسودا حين قتلها البوليس بالبندق دلللللل
حتى هذه اللحظة كاني اسمع صوت البندق دلللللل في قلب جابنو واتكرفست في صمت للابد
اصلو البوليس دخل الحلة في نهارٍ يدخل القمرية في الراكوبة نصت نهار سَكًتْ عِمَي
مشى لشيخ الحلة طوالي في بيتو عشان يدلوا علي الكلاب الضالة والسعرانة ليعدمها بالرصاص
شيخ الحلة جبد عراقيهو المشرور في الحر وطنطن كتال الكلاب جانا قبل رشاش الزفت الله كفينا شرو
واسترني معاهو ومع ناس الحلة
رحب بيهو شيخ الحلة وجاب ليهو موصا بارد قبل ما يعوسو كسرة الغدا يغديهو ويمسكو درب الله واخليهو
وفي هذا الاثناء تجمع ناس الحلة كبار وصغار وبنات ونسوان كلهم يهمهمون ويطنطنون
وكل منهم خوفا على ضنب كـلبـو واخبروا شيخ الحلة بان لاكـلـب سعران او ضال بيننا ليقتل رميا بالرصاص
وائ رصاصة في قلب واحد من كـلابـنا هي رصاصة في حشانا كـلابـنا عاشت بيننا ولها كبد رطبة مثلنا
وكادت ان تقوم مظاهرة عارمة امام ديوان شيخ الحلة والبوليس كلامهم فايتو اضانو
بعد اخذ ورد توصل شيخ الحلة معهم لاتفاق بان يمشوا لـ علي ود بله كلابو كتار اكتلو منهم واحد ولا اتنين
عشان يرضو البوليس قال اصلو ما بمش فاضي بدون قتل كـلب او اثنين من كل حلة
والشيخ يرى انه من العيب ان يسمع من المعسولين بان شيخ الحلة غير متعاون في حملة قتل الكلاب الضالة
والسعرانة رغم اقتناعه بان لايوجد في حلته كـلب سعران او ضال فهو في حرج من امره بين مطرقة
الحيكومة وسندان ناس الحلة وبقى ليهو زي دق الوتد في الدلجا
نواصل .....

Post: #2
Title: Re: جَابَنُو وأولادا السبعة والكلــب الضكر
Author: عبدالله ود البوش
Date: 09-30-2012, 01:23 PM

إتفق شيخ الحلة مع جمهور الناس المتجمهرة بان يتغدى البوليس ويمشوا الحلة القدامية
لعلي ود بله باقي كـلابو كتار بالحيل اكان الله اهديهو وادينا واحد ولا اتنين نكتلن ونرتاح
من لخمة البوليس دي العملت لينا سافوتا
وانطلق بعض الصبية امامهم لبيت عمي علي ود بله واخبروهو الخبر الصاعق فتبسمل وتعوذ
وتشهق وتمطق ونادى حبوبتي حرم مدينة ... شفتي يا فالحة ناس حلتك الورا حسادتن
انا عندي كـلاب ؟ .... شن عندي انا غير جابنو واولادا السبعة والكـلب الضكر ....
ودمه يفور في عروقو وقبل ان يجف ريقو وقف امامه شيخ الحلة والبوليس بندقو في كتفو
وشفع الفريق ورجالو ونسوانو عجاجتن رابطة بعر حمير وغنم .......

Post: #3
Title: Re: جَابَنُو وأولادا السبعة والكلــب الضكر
Author: عبدالله ود البوش
Date: 09-30-2012, 01:41 PM
Parent: #2

وقف عمي علي ود بله واو احمر ووقفت حبوبتي حرم مدينة نون نسوة نجيضة وفالحة
ووقفنا نحن الشفع معاهم نكتح التراب اكان يعمي عين البوليس من جابنو
سمعنا الشيخ قال نكتل جابنو العجوز عشان نرضي الحيكومة
الحيكومة طايرة في السماء وات ماسك في كرعيها يا شيخ الحلة والبوليس ماسك في كرعيك
جابنو علا اموت انا معاها

Post: #4
Title: Re: جَابَنُو وأولادا السبعة والكلــب الضكر
Author: عبدالله ود البوش
Date: 09-30-2012, 02:06 PM
Parent: #3

هكذا ردد عمي علي ود بله

الحيكومة طايرة في السماء وات ماسك في كرعيها يا شيخ الحلة والبوليس ماسك في كرعيك
جابنو علا اموت انا معاها

Post: #5
Title: Re: جَابَنُو وأولادا السبعة والكلــب الضكر
Author: حمزه بابكر الكوبي
Date: 09-30-2012, 02:08 PM
Parent: #3

ودالبوش الله يبارك فيك وانت تمتعنا بالحكاوي الشيقة دي
عييييييييييييييك رجعتنا لزمن الطفولة وايام كتال الكلاب وحملاته
وازكر انهم بارعين في التنشين لا تخطئ رصاصتهم ابدا وكنا صغار
نكون سعداء ولا شمارات ماعارف المهم لما يجي تلقى البلد كلها في رجاه
وخاصا نحن الصغار

بالجنبة
انت بوست العمايك اتأرشف ولا شنو ؟ لانه قبل يومين اتزكرت لي حكاية
وجيت اكتبها فيه فتشت له سما واطة مالقيته

Post: #6
Title: Re: جَابَنُو وأولادا السبعة والكلــب الضكر
Author: عبدالله ود البوش
Date: 09-30-2012, 02:19 PM
Parent: #5

شكرا صديقي الكوبي
واتمنى والاسرة ان تكونوا بخير
.
.
Quote: انت بوست العمايك اتأرشف ولا شنو ؟


اعتقدت بانه اخذ نصيبه ومافيه الكفاية فلم انقله ولاغيره
ولكني تفأجات بطلبه من بعض الاخوة العمايك ههههههه بعد ان راح في الارشفة
اسع كان قريب اكون في قروانة من قروانات الارشفة متلببا عميكة لكة
.
.
تحياتي وتقديري الذي تعلم ومرورك دائما يسعدني

Post: #7
Title: Re: جَابَنُو وأولادا السبعة والكلــب الضكر
Author: عبدالله ود البوش
Date: 10-01-2012, 07:35 AM
Parent: #6

قتلت جابنو بقوة السلاح امام اعين كل احبابها
وراحت في صمت للابد وتركت حسرة في نفوس محبيها
!!!!!!!!!!!!!!!!!!!!!!!!!!!!!!!!!!!!!!!!!!!

Post: #8
Title: Re: جَابَنُو وأولادا السبعة والكلــب الضكر
Author: عبدالله ود البوش
Date: 12-20-2012, 12:29 PM
Parent: #7

.