حـكـايـة ود الـمـامُـوّر مـع ود الـكـرآر ...

التساب كان غير عادي في ذلك العام.
النيل طمح حتي إمتلأ حوضه ليهدد القرية
الوديعة المرتمية في أحضانه. تمرة بحر النيل
بت شيخنا الفوق القيفة وشتلاتا التلآتة لم
يقون علي الصمود امام الموج المتلآطم والهدآم،
فستسلمنَ للعِرِق العنيف ليكسحن شمالاً مع التيار.
مُنتصف النهار. النيل في هيجانه، والأرض تنفث
بوخ حار من احشاءها مع رائحة البرسيم.
الكون كله في حالة مقيل وسكون. الفراشات
مرتخية فوق نوآر البرسيم، ودحش الجقود
متمدد تحت تمرة ود الحاج، والزرازير مختبئة
بين أغصان الأشجار، وكل فجاج الأمكنة قابعة
في كهف السكون عدا النِعمة بت ود المامور،
فقد كانت تنهب الأرض نهباً تحت أشعة الشمس
الحارقة التي تقيها لفح سمومها الأشجار بين
الفينة والأُخرى. البخار المنبعث من حيضان
البرسيم يتخلل جسم النِعمة مثل الساونا وقد بدأت
تتصبب عرقاً وهي تخب فوق تقانت الحيضان
وتحاول جاهدة أن تتجنب الجضوّل ودُرآب الحرِت
وهي تقطع إنقاية وِلآد بابكُوّر، بينما صوت ساقية
ود البدوي يطرق سمعها آتٍ من الضفة الغربية
كأنه يندب حظها. وآصلت النِعمة سيرها إلي أن
دخلت ضُل الحرازة لتجد الضأن والماعز مسترخيات
في المُرآح من شِدة وهج الهجير...

توجهت النِعمة مباشرةً إلي التُكُل لتجد أُمها قاعدة فوق
الصاج تعوس في كِسرة الغدا.
حسينة: بِسسسسسم الله ... النِعمة !!! يا بِت الجابك
شنو في القلآية دي ؟؟؟
النِعمة: يا يُمة أنا ود الكرار دا ماني دايرا، ماني دايرا، ماني دايرا.
حسينة: كدي يا بِتي، قولي يا الرسول . ود الكرار مالو ؟؟؟
النِعمة: أنا ود الكرار دا من يوم عرستوني ليهو وقّف رقبتي دي عصا،
ونشّف ريقي. يعلم الله.
حسينة: يا بِت كدي قولي يا ود حمدتو ... في شنو ؟؟؟
النِعمة: يا يُمّة خسمتك بالله تفكوني من ود الكرار دا.
قُتلِك ماني دايرا، ماني دايرا، ماني دايرا.
حسينة: جي يا يُمّة... إنت ود الكرار الِيلكم ما اتعرف !!!؟،
ونحن فترنا من مناقرتكم.
النِعمة: بس خلآس، فكوني مِنّو انا ماني دايرا، ماني دايرا، ماني دايرا.
حسينة: كِدي قنِبي اشربيلِك موّية، و وريني الحاصل شنو؟؟؟.
بلآ ماني دايرا !!!.
النِعمة: هو كان في التِحتانية مع الرُجال، برفعو في ساقية
ود النفاري من التساب. أها، جا البيت وفات علي الزير
التحت الجوآفة يشرب، لِقالو سِوسِيّوة وآقعة في الزير،
وقال كدي من يومو إتنفض فوقي.
حسينة: اوّل إنت خليتِ الزير كاشف فِشآن شنو ؟؟؟
النِعمة: أنا ما خليتو كاشف. مغتياهو، وقِحف الجداد
مالياهو موّية لي ود عينو، عِلآ ظنيت جنوّن الجقود
جو لقطو الجوآفة، وشربو، وفاتو خلوهو كاشف.
حسينة: نان إنت ما كان تفقديهو!!!.
النِعمة: نان أنا فايقة ؟، مِياني كنت في التُكُل بسوي في
ملآحي... أكان جا خافِس فوقي وإتنفض!!!. وكت فتحت
خشمي رديت عليهو قال لي، هسّع دي تمرقي تمشي أهلِك!!!.
حسينة: خلآس... كدي اصبري لآمن يجي ابوك.
النِعمة: أنا غايتو ود الكرار دا، ماني دايرا، ماني دايرا، ماني دايرا...

حسينة: أها أبوكِ تراهو جا. حِس حمارتو تحت الحرازة.
ود المامور: يا حسينة... غداك جاهز ؟؟؟
حسينة: أها، خلآس قربت... بس اللكمل الطرقات ديل.
ود المامور: النِعمة!!! يا بت الجابك من بيتك شنو ؟؟؟
حسينة: بري يا يابا، تراها جات شاكية من ود الكرار.
ود المامور: في شنو كمان؟؟؟. نحن بس تبقى شغلتنا
إنت و ود الكرار ؟؟؟!
حسينة: يعلم الله فترنا !.
ود المامور: كدي سويلنا تُرمة ناكُلآ.

بعد أن شهقت النِهارية إستعداداً للزفير مرةً أُخرى، وبِقت
الوآطة العِصيّر، وإعتدل الجو بعض الشي درع ود المامور
جلآبيتو ولفّ عِمّتو، وحقب سيفو في كتفو الشمال، والعنجاوي
المُو خمج في إيدو اليمين، قال كدي كورك للنِعمة.
ود المامور: النِمعة ... يا بِت.
النِعمة: هووي يا ابوي.
ود المامور: تعالي مِنسلّة لا جاي.
النِعمة بصوت مُنخفض لأُمها: ما ود الكرار دا. أنا ماني دايرا،
وماني دايرا، وماني دايرا.
الشمس مائلة جهة الغروب في الطريق إلي مخبئها، وبعض
نسمات تداعب أشجار النخيل من حِينٍ إلي آخر، وقد بدأ النشاط
يدِب في نفوس الكائنات الحيّة، فخرج الناس إلي حواشاتهم ومُشهادهم.
ود المامور والنِعمة متوجهين نحو بيت ود الكرار عبر حواشات البرسيم
وقد إستعادت الفراشات حيويتها وراحت تتنقل بين زهور البرسيم.
الماحي: ود المامور كيف حالكُم ؟؟؟ ماشين وين ؟؟؟ نعال ما عندكم عوجة ؟؟؟.
ود المامور: لا، لا... ما عندنا عوجة. عليك الله اجدع لي قبضة برسيم
لنعجاتي تحت الحرازة. أنا وآصل ود الكرار وجاي.
الماحي: خير تب... بس إنتو نعال ما عندكم عوجة ؟؟؟.
ود المامور: قُتلك ما عندنا عوجة !!!.
الماحي: سمح خير أها...
العوض: عارف، ود المامور دا الليلة مُو برآهو!!!... والله صحي.
الماحي: مِيا الجماعة مِتكاتلين... آ زول والله ود الكرار دا جَنب بالحيل.
العوض: حتان كمان بت ود المامور ماها قاعدة تقصّر... والله صحي.
الماحي: الزول دا الليلة دآرع سيفو وحاقب سوطو!!!. الله يستُر.
العوض: غايتو بس النرمي اضانآ، والله يسوي الفيها خير...

بدأ ود المامور يدُق في الباب، فستجاب له صوت ود الكرار من الدآخل.
ود الكرار: مرحبا... حبابك... ابقى لآ دآخل.
مرّت ثوانٍ ولم يدخل أحد...
ود الكرار متوجهاً نحو الباب: لآ حولآ... يا زول ما قُنالك ادخُل...
باب السجم دا فاتِح...
فتح ود الكرار الباب ليجد ود المامور أمامهُ وجهاً لِوجه...
ود الكرار: مر... مرحبا... ادخل... ادخلو، ابقا لا داخل.
ود المامور: لا، لا ماني داخل... شوّف يا ود الكرار، دِي النِعمة،
وامسك السوط دا في إيّدك. تاني كان قالت بِغِم ما عليك إلا تجيب
لي لحما في قُفّة... النِعمة، يا بِت فُوتِي ادُخلي علي بيتك، امشي...
ود الكرار: سمِح كدي ادخل اشربلك موية.
ود المامور: لا، لا أنا صآد فوق دربي دا.
ود الكرار: سمِح اللقدِمك لآ قدآم!!!.
ود المامور قفل رآجع دون أن يرد علي ود الكرار، و ود الكرار
ظلّ سائر بجانبه. مرّت دقائق ظلّ ود المامور صامت لا يتكلم بينما
كانت هذه الدقائق كأنها سنين بالنسبة لود الكرار، حتي ظنّ أنّ
ود المامور فقد القُدرة علي الكلآم. فجأةً توقف ود المامور، وقبض
بيده علي السيف ثمّ إلتفت نحو ود الكرار.
ود المامور: اسمع يا ود الكرار... شُوّف... علي بالطلآق بالتلآتة
يا ود الكرار النِعمة دي تجي شاكية مِنّك تقول رفَعَتَ عليها السوط
ساكت بالغلت، إلا يا ود الكرار أقطّعِك بالسيف دا حِتّة، حِتّة...
أمِش أرجع بيتك، وامسِك خشمك دا عليك...

حِكمة ود المامور كانت عِلآج ناجع لحالة ود الكرار
والنِعمة المستعصية، حيث لزما الوسطية في عِلآج
العكنيبة التي كانت تدور بينهما. النِعمة بخوفها من
السوط، و ود الكرار بخوفه من السيف. إستمرّت
الحياة هادئة بين الطرفين حتي بعد رحيل
ود المامور للدار الآخرة.
دقش ولآد ود الكرار ديار الغربة كحال أهل البلد مِن
جم، واوّل مُرسال مع الجواب كان تلفزيون ومسجل
لود الكرار والنِعمة بت ود المامور، فأصبحو من تغيب
الوآطة ينشدهو في المسلسل، و ود الكرار النِهاريّة كلها
في الحوآشة مستمتع بي شريط بابكر ود السافل.
الغناي يردد:
الجدي العام وإنفدع يا بِنتنا
شوف عيني السُكّر نقع،
و ود الكرار يعقِب:
هلآ، هلآ، سِمِعت دي يا الماحي ؟؟؟
قال، السِنون برآقِن شلع
200 جِنيه غير القِطع !!!
هلآ، هلآ يا حليل زمنك يا ود الكرار...
.
.
.
ود المدير ...

يا سلاااااااااااااااام بالجد يا استاذ معاوية متعه متناهية وبلا حدود فقد عشت مع القصة حتى تخيلت نفسي انني احد شهودها وشخوصها بالجد قمة في الروعة ومتعه في السرد وفي التصوير وفي الصياغه وفي التعبير ،، إن جاز لي التعبير ,, وبالله عليك لا تحرمنا من هذه ال اشياء الجميلة ما دمت حياً ... ونحن في انتظار باقي السرد ...
تحياتي : ياسر العيلفون

متعة حد الثمالة

ود المدير
كيف الحال..

يازول القصي سمحي تأأأأأأأأب
الا عليك امان الله طويراتك الدايرات القافة ديل
شتتن نضرنا.. يا خي ديل لخباتات خلاص،
ما كفاهن العيين عليك الله جاريات وراهن
للبلكونة.عليك الله تقول عرضا لي تور الجر.
دي محنة شنو دي؟

Quote: الجدي العام وإنفدع يا بِنتنا شوف عيني السُكّر نقع،

ما داير اقوليك الله اجننك يا ود المدير زي ما جننتني
دي جبتها من وين يا البخيت بالحال
.
.
ابداع مجنون جن واسوي كحاًً بو
.
.
ود المدير
الله اديك العافية ياخي



.
.
ارخي لي اضانك جاي
بس خليك في امتاعنا وما تباري اللالاية
سمحت كلامي دا ولا اديتو الخلا ؟

يا معاوية..

إنت وكت بتعرف قدر دا مالك !!
كان خليت سك الفراطيق والسمبر وكترت لينا من جنس دا ما أخير لينا وليك!!

العوافى يا مدير..

شكراً يا معاوية

رجعتني بالذكرة الي هناك تحت الحراز وفوق القيف مع القمري و(الفكي أب إبريق)

Quote: بعد أن شهقت النِهارية إستعداداً للزفير مرةً أُخرى، وبِقت الوآطة العِصيّر

كلام !!

Quote: يا سلاااااااااااااااام بالجد يا استاذ معاوية متعه متناهية وبلا حدود فقد عشت مع القصة حتى تخيلت نفسي انني احد شهودها وشخوصها بالجد قمة في الروعة ومتعه في السرد وفي التصوير وفي الصياغه وفي التعبير ،، إن جاز لي التعبير ,, وبالله عليك لا تحرمنا من هذه ال اشياء الجميلة ما دمت حياً ... ونحن في انتظار باقي السرد ... تحياتي : ياسر العيلفون

أخي ياسر العيلفون،
السلآم يغشاك محِل قبّل.
يا ياسر فتشت للكلآم عشان اعبّر عن شكري ليك
لكن تب عِجزت. يا زول كتّر خيرك كتير، وتجدني
مدين لك بالكثير عسى اوفيك ولو القليل من حقك
علي شحصي الضعيف.

شكراً...

Quote: متعة حد الثمالة

تسلم يا إدريس الخليفة،
وربنا يمتعك بالصحة والعافية...

Quote: ود المدير كيف الحال.. يازول القصي سمحي تأأأأأأأأب الا عليك امان الله طويراتك الدايرات القافة ديل شتتن نضرنا.. يا خي ديل لخباتات خلاص، ما كفاهن العيين عليك الله جاريات وراهن للبلكونة.عليك الله تقول عرضا لي تور الجر. دي محنة شنو دي؟

اريت حالك زين يا جمال.
ناس اتبرا كيفِنهُن ؟؟؟

عاجبولك الزرزيرات بيدورن السكناب.


مشكور يا جمال.
التحايا ليك ولناس البلد من جم...

Quote: ما داير اقوليك الله اجننك يا ود المدير زي ما جننتني دي جبتها من وين يا البخيت بالحال . . ابداع مجنون جن واسوي كحاًً بو . . ود المدير الله اديك العافية ياخي

ود البوش يا صديق.
ما شفت يوم كدباس رفع عنقرتو، قال الجدي العام وإنفدع يا بنتنا،
وقال كدي عبد الخالق ملص بدلتو وركز في نُص الدآرة
والزغاريت قجت، واخوان أُم شلخ إنكبو في الدارة وركزو
للسوط. وكدباس حسو بقى يجيب الضهبان. أها، عارف وكت
الضرب أصبح شديد اسما بت عوض الكريم قالت للعريس:
عاد يا عبد الغفار الجنون الركزو ديل، أريتك بعدين تنستر
معاهم. قال كدي عبد الغفار جدع جلآبيتو هناك، وركز، وقال
طلقانة ما يحجزوهو إلآ يخلي ضهرو شقوق.

جبتها من هناك آ ود البوش. من الزمن الجميل.
والله صحي.

الله يجبُر بخاترك يا عبد الله أخوي.


أصبر يا ود البوش،
باقي المدآخلة ماني ناسيهو...

Quote: يا معاوية.. إنت وكت بتعرف قدر دا مالك !! كان خليت سك الفراطيق والسمبر وكترت لينا من جنس دا ما أخير لينا وليك!! العوافى يا مدير..

العوافي يا ايمن.

قلت كدي ؟؟؟
سمح، بس خلني القضى من الفي
إدي حتي بعدين اتوب...

Quote: شكراً يا معاوية رجعتني بالذكرة الي هناك تحت الحراز وفوق القيف مع القمري و(الفكي أب إبريق)

سلآمات يا عيدروس.

دومة حبوبتك بت ابزيد كانت زي دومة ود حامد.

اللهل نعلهم طيبين ؟؟؟

حكاويك طاعمة وما بتنفات

كل واحدة أروع من التانية

باقى شاربات عذوبة نيلنا السلسبيل

تحياتى

Quote: حكاويك طاعمة وما بتنفات كل واحدة أروع من التانية باقى شاربات عذوبة نيلنا السلسبيل تحياتى

مهيرة أُختي،
سلآمات.
ألف شكر علي الحضور، وإهداء الكلآم الجميل.

مودتي...