Post: #1
Title: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-22-2012, 10:17 AM
Quote: بسم الله الرحمن الرحيم
بيان للقيادات والجماهير الرياضية
لقد تابع الوسط الرياضي بالسودان وخارجه التداعيات المؤلمة التي صاحبت مباراتنا في الدوري الممتاز ضد نادي الهلال يوم الخميس 20/9 والتي إنتهت بتدمير شامل لإستاد المريخ والتي لولا لطف الله وعنايته ووعي جماهيرنا الأبيه وحرص قيادتنا على التواجد مع الجماهير ومنعها من ردود الافعال لتطورت لكارثة تزهق فيها الارواح وتتكرر مأساة بورسعيد التي ظللنا ننبه الناس والقيادات لها ولخطورة أن تحدث في بلادنا .
لقد كانت قيادة المريخ وإدارته مستوعبة تماماً لهذه المعاني ولهذا فقد سعت مبكراً منذ بداية الموسم لتخفيف الاحتقان والشحن الزائد وسعت للاتفاق الثنائي مع قيادة الهلال والذي اصبح واقعاً وجنى السودان ثماره منذ بداية الموسم وحتى قبل هذا اللقاء ممامكن من العبور بالموسم لبر الأمان .
أن إدارة وجماهير المريخ حينما فكرت في البينيات التحتية وبذلت الجهد والمال في سبيل انشائها لم تكن تفكر في المريخ وحده وانما كانت نظرتها شاملة للسودان كله حتى صار أستاد المريخ مفخرة لكل أهل السودان ولم يكن غريباً أن يصبح قبلة للداخل والخارج فكل الانشطة الداخلية تقام فيه وكل المباريات الدولية الكبيرة ولعل افريقيا كلها تذكر مباراة مصر والجزائر والتي لولا أستاد المريخ لما أقيمت في السودان .
لقد كنا نتابع وللاسف الشديد الحملة المنظمة والمعلنة والتي كانت تحرض جماهير الهلال لتخريب إستاد المريخ كرد فعل لما حدث باستاد الهلال خلال مباراتنا في الكنفيدرالية والتي حدث فيها بعض التخريب كرد فعل للظلم والتجني الذي مارسه الحكم في تلك المباراة على فريق المريخ والذي مهدت له الحملة الكبيرة التي سبقت المباراة والتي كانت تروج زوراً وبهتاناً بأن المريخ قد أثر على الحكم وان مبلغاً مالياً محدداً قد دفع لهذا الحكم دون أن يحرك أحدا سواء الاتحاد العام او الوزاره او السلطات الامنية ساكنا وكأن الاتهام عادي وبسيط .
لقد ظل مجلس إدارة نادي المريخ ينبه لهذا التحريض وخلال الاجتماع التقليدي للمباراة ركز ممثلي المريخ على ضرورة حماية الارواح والممتلكات وقد التزم الاتحاد العام بذلك في حضور الاجهزه الأمنية واوضح انه قد وضع خطة كاملة لذلك . ولكننا وللاسف الشديد فوجئنا بهذه الجماهير تدمر الاستاد تدميراً منظماً شاملاً تحت مسمع ومرأى قيادات الاتحاد والقيادات الشرطية دون اي تدخل منها ودون اي محاولة لردع هذا العمل البربري الامر الذي يرفع علامات أستفهام كبيره تواجهنا وتواجه جماهيرنا وتفتح الباب على مصرعيه للتأويل !!!!
أن التحريض الواضح وماظلت تسود به الصحف صفحاتها من اساءات وتجريح واسفاف امر خطير يشكل مهدداً كبيراً لأمن وسلامة الحركة الرياضية وقد ظللنا نجأر بالشكوى ورفعنا عشرات القضايا في المحاكم وعشرات الشكاوي للمجلس القومي للصحافة ولكن لاحياة لمن تنادي !!
أن مجلس إدارة نادي المريخ وانطلاقاً من مسئوليتة التاريخية نحو المريخ المؤسسة ونحو السودان فانه بصدر هذا البيان لينبه قيادات الامة وكافة الاجهزة الامنية والشرطية والرياضية وكل الرياضيين بالبلاد الي الدرك السحيق الذي وصلت اليه الحركة الرياضية والمآلات الخطيرة التي هي مقبلة عليها مالم تنتبه القيادات وتتخذ من الاجراءات مايحفظ سلامة المجتمع وامنه ومالم يتحمل كل قائد مسئوليته بعيداً عن الانتماءات الضيقة .
كما أن المجلس قد قرر الاتي : تكوين وفد بقيادة رئيس النادي ونائبه والامانة العامة للاجتماع بالسيد وزير الداخلية ومدير عام قوات الشرطة والاجتماع بالسيد رئيس الاتحاد العام وقيادة الاتحاد .
الاستمرار في مناشدة جماهير المريخ العظيمة بضبط النفس ولعب دورها التاريخي في التهدئة كجمهور قائد .
تعبيراً عن الاستياء الكامل والتجاهل المستمر لكل المذكرات والنداءات والتحامل والانحياز الفاضح فأن مجلس ادارة نادي المريخ سيتقدم باستقالة جماعية عقب نهاية الموسم مباشرة ويدعو الجمعية العمومية لاختيار مجلس بديل وهو حين يقدم على هذه الخطوة ليس هروباً من المسئولية ولكن ليكون تنبيهاً واضحاً للقيادات وللمسئولين كافة بأن بيئة العمل الرياضي أصبحت طارده وأن جهودنا للاصلاح لم تثمر نتيجة لسكوت هذه القيادات وكأن الامر لايعنيها .
والله من وراء القصد
عصام الحاج عثمان
الامين العام لنادي المريخ بأمر مجلس الادارة
مصدر |
|
Post: #2
Title: Re: بيان للمريخ، بعد أحداث القمة، لا يخلو من "دغمسة"
Author: محمد البشرى الخضر
Date: 09-22-2012, 07:23 PM
Parent: #1
حلبينا البيان مخجل والله يصدر من نادي كبير مثل نادي المريخ
و الأسوأ انو يكون ممهور بتوقيع الأستاذ عصام الحاج الإداري المهول ذو التاريخ و القدرات المعروفة
بيان يشبه اولاد اليومين ديل النطّو في إدارات الأندية حين غفلة و يتعاملو بعقلية المشجعين و كتاب الأعمدة
|
Post: #3
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-22-2012, 08:01 PM
Parent: #2
سلامات ود البشرى
بالظبط، بيان حيقود لمزيد من الاحتقان وحيزيد سرعة وصولنا للكارثة الكبرى
بعض كتاب المريخ قبل هلال مريخ الكونفدرالية كتبوا "الحكم لو ظلم المريخ لا نضمن ردة فعل الجمهور" (!) ودا حريش بالدرب العديل
إذا الناس ما لحقت عالجت مسببات الاحتقان دا (أعمدة ديوك عدة الصحافة الرياضية) علاج جذري الكارثة الاستادية جاية جاية
|
Post: #4
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-22-2012, 08:04 PM
Parent: #3
| Quote: لقد كنا نتابع وللاسف الشديد الحملة المنظمة والمعلنة والتي كانت تحرض جماهير الهلال لتخريب إستاد المريخ كرد فعل لما حدث باستاد الهلال خلال مباراتنا في الكنفيدرالية والتي حدث فيها بعض التخريب كرد فعل للظلم والتجني الذي مارسه الحكم في تلك المباراة على فريق المريخ والذي مهدت له الحملة الكبيرة التي سبقت المباراة والتي كانت تروج زوراً وبهتاناً بأن المريخ قد أثر على الحكم وان مبلغاً مالياً محدداً قد دفع لهذا الحكم دون أن يحرك أحدا سواء الاتحاد العام او الوزاره او السلطات الامنية ساكنا وكأن الاتهام عادي وبسيط . |
يا أخوانا هل الكلام دا عنده معنى غير إنو في حالة الحكم ظلم تيمك كسير استاد التيم المنافس مبرر!؟
|
Post: #5
Title: Re: بيان للمريخ، بعد أحداث القمة، لا يخلو من "دغمسة"
Author: محمد البشرى الخضر
Date: 09-22-2012, 08:13 PM
Parent: #4
تخيل يا حلبينا لو كانت إدارة المربخ اصدرت بيان اعتذار عن تدمير جماهيرها لكراسي استادالهلال و اعلنت التكفل بالمساهمة في اصلاحها
لكن لو كان عملوا كدا ما كان سلموا من السلق بالسنة كتاب الاعمدة و الحديث عن ضعفهم و عدم محافظتهم على مكتسبات الفريق و مش عارف ايه
واسي البيان دا ليس للاتحاد ولا لوزارة الداخلية البيان مقصود به تهدئه خواطر الغوغاء و خوفا من كتاب الاعمدة الفعلا بدؤا مهاجمة المجلس ووصفه بالضعيف
وطبعا الحال في الهلال ليس بأفضل برضو ديوك العدة الزرقاء بدؤوا الكتابة عن رد الفعل و التبرير بل و الفخر
الطرش الكسرو الكراسي ديل من الجانبين ناسين انهم هم البجلسوا عليها؟
|
Post: #6
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-22-2012, 08:40 PM
Parent: #5
| Quote: واسي البيان دا ليس للاتحاد ولا لوزارة الداخلية البيان مقصود به تهدئه خواطر الغوغاء و خوفا من كتاب الاعمدة الفعلا بدؤا مهاجمة المجلس ووصفه بالضعيف |
لقيتك شفت يا ود البشرى
 (العدة) 
المشكلة يا بو حميد العدة بين ديكين!
آخر خبر: أجعلوا ديوك عدة الصحافة الرياضية هديكم في العيد الفوقنا دا وإلا.. وسانيه ولدنا 
|
Post: #7
Title: Re: بيان للمريخ، بعد أحداث القمة، لا يخلو من "دغمسة"
Author: طلحة عبدالله
Date: 09-22-2012, 08:50 PM
Parent: #6
أشرف يا حلبي السلام عليك
للأسف الأسيف أتفق مع المدعو جرجير الملقب بود البشرى بخصوص بيان المريخ.. والمشكلة الأكبر بل والكارثة
عديل كدا هي اتفاقي معاهو في إستنكارو وإستغرابو كون أن البيان ممهور بتوقيع الأستاذ عصام الحاج أحد
إداريي الزمن الجميل ..
البيان حنجوري لا يصلح إن لم يفسد وينطبق عليه بالتفصيل الممل قول الشاعر : جاء يكحلا قد عينا .
الديوك دي تبيع ؟؟؟؟؟
|
Post: #8
Title: Re: بيان للمريخ، بعد أحداث القمة، لا يخلو من "دغمسة"
Author: محمد البشرى الخضر
Date: 09-22-2012, 08:55 PM
Parent: #7
الي قارئ بشاشا العزيز
اعلن و كلي اسف تغييري لرأيي الاول في البيان
البيان تمام وقوي وما فيه اي حاجة و الوالي رئيس طوالي
كلو ولا الاتفاق مع العنصري تنظير :)
|
Post: #9
Title: Re: بيان للمريخ، بعد أحداث القمة، لا يخلو من "دغمسة"
Author: صبري طه
Date: 09-22-2012, 09:02 PM
Parent: #8
يا أخوان ... الكُرة في ملعب مجلس إدارة الناديين .. بالاجتماع وإصدار بيان مُشترك لجمهور الناديين ...
وعفا الله عمّا سلف ...
|
Post: #10
Title: Re: بيان للمريخ، بعد أحداث القمة، لا يخلو من "دغمسة"
Author: طلحة عبدالله
Date: 09-22-2012, 09:06 PM
Parent: #9
صبري طه
وين السؤال ؟
|
Post: #13
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-22-2012, 09:30 PM
Parent: #10
| Quote: الديوك دي تبيع ؟؟؟؟؟ |
لو سكينك جاهز شيلن براس مالن يا طلحة
يا ود البشرى لتفادي الكارثة ما عندك حل غير تقبل مبادرة طلحة
خصوصا إنو طلحة من أول الناس القالوا "ألحقوا: الديوك فوق العدة!"
يا صبري "بيان مشترك" دا ياهو المشاط بالقمل ذاتو!
لا بد من السيطرة على وقود إشعال الحريقة بدل طفي النيران
آخر خبر: احتمال كبير جهاز الأمن يستدعي (ولدنا)
|
Post: #11
Title: Re: بيان للمريخ، بعد أحداث القمة، لا يخلو من "دغمسة"
Author: قيقراوي
Date: 09-22-2012, 09:10 PM
Parent: #8
خذلتني يا طلحة
-------
خذلتني شديد
كنت عاوزك ترش الرشاشات ديل
|
Post: #12
Title: Re: بيان للمريخ، بعد أحداث القمة، لا يخلو من "دغمسة"
Author: طلحة عبدالله
Date: 09-22-2012, 09:14 PM
Parent: #11
قيقا الراوي
معليش ياخ
خذلتك لأنو صبري طه الفوق دا خلعني عديل كدا ..
رد أو مداخلة أو بوست لصبري بدون سؤال ؟
من يكتب بإسم صبري طه ؟
|
Post: #14
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-22-2012, 09:33 PM
Parent: #12
Quote: خذلتني شديد
كنت عاوزك ترش الرشاشات ديل |
لا يفوت على فطنتك يا طلحة إنو صاحبنا دا أكبر رشاشة
|
Post: #15
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-22-2012, 09:39 PM
Parent: #14
Quote: على كل بيان المريخ أنا ما قريتو ولكن حسب كلامك الفوق دا فأعتقد أن الوصف الدقيق للبيان هو الهروب ...
مجلس المريخ هرب من المسؤولية بإستقالات وشكوي لوزير الداخلية وكان عليه أن يكون شجاعا وعلى قدر
المواقف والأزمات ليتحمل نتيجة إنسياقه وراء هتافية صحافة المدرجات لأن ما فعلته جماهير الهلال بإستاد
المريخ هو رد فعل متوقع لما فعلته جماهير المريخ باستاد الهلال وكلو بسبب صحافة التعصب والإنتماء الضيق
التى ظلت تصب الزيت على النار لتحرق روح السماحة الأخلاق والمبادىء التى قامت عليها الرياضة وذلك
بمباركة وتأييد مباشر أو غير مباشر من إداريي الأندية وتحديد الهلال والمريخ .
الواقع ينذر بكارثة مخيفة ستحيق بالرياضة مالم يتم تدارك الأمور بتجريد سيف الحسم أولا لقطع رأس الفتنة المتمثلة
في صحافة المشجعين ومن ثم تحجيم المتفلتين .Re: جمال الوالي يهدد .... الهلال !]
|
Post: #16
Title: Re: بيان للمريخ، بعد أحداث القمة، لا يخلو من "دغمسة"
Author: طلحة عبدالله
Date: 09-22-2012, 09:52 PM
Parent: #14
يا أشرف حاشا أن تفوت على فطنتي حركات قيقا دي
فطنتي التى تعرف يا حلبي ظلت تحدثني منذ فترة أن قيقا يحاول ان يتعلم فيني الجبيد دون أن تحدثه
فطنته هو أنه أمام قشاش شرس عادي جدا ممكن يطرف بيهو جمب اللاين قبل أن يردمو ليك يوديهو
الكشافات .
لا تستفز فطنتي يا قيقا الراوي .
|
Post: #18
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-22-2012, 10:14 PM
Parent: #16
Quote: فطنتي التى تعرف يا حلبي ظلت تحدثني منذ فترة أن قيقا يحاول ان يتعلم فيني الجبيد دون أن تحدثه
فطنته هو أنه أمام قشاش شرس عادي جدا ممكن يطرف بيهو جمب اللاين قبل أن يردمو ليك يوديهو
الكشافات |
يعني "أنقلب السحر على الساحر!"
أردم .. هههههه
يا طلحة قالوا ولد من أولادنا بتاعين الخرطوم بلعب مدافع، مشى سجل في تيم عند أهلنا الرطانة،
وطوالي تاني يوم تيمه لاعب ماتش قمة جايبين ليهو حكم من برة (ما بفهم رطانة)
المدرب، على حس قالوا ليهو دا ود ناس فلان (الرطانة الفي الخرطوم) قايلو بيرطن،
أها لما تركيز الحكم يكون في الناحية التانية من الملعب يشبك ليك الود (بالرطانة: أدي راس الحربة بونية، أديو بونية)
كررها زي عشرين مرة كدة، الود من الأشارات خمن المطلوب وحب يتأكد سأل الكوتش "قصدك أديهو بونية؟"
الكوتش قال ليو "تلأ ديشو"
طبعا برضو لا يفوت على فطنتك (الديش) عند أهلنا الرطانة عامل كيف
|
Post: #17
Title: Re: بيان للمريخ، بعد أحداث القمة، لا يخلو من "دغمسة"
Author: صبري طه
Date: 09-22-2012, 10:01 PM
Parent: #12
| Quote: من يكتب بإسم صبري طه ؟ |
ياخي بطّل أسئلة
|
Post: #19
Title: Re: بيان للمريخ، بعد أحداث القمة، لا يخلو من "دغمسة"
Author: قيقراوي
Date: 09-22-2012, 11:19 PM
Parent: #17
بالمناسبة دي (النصيحة مناسبات كتيرة هي)
انو الصهاينة ديل ببطلوا واي واي دي متين!؟
-------
ياخي من زمني الكنت بشجع الهلال، اجيال المريخاب المتعاقبة شغالة واك واك ..العمل صعب
بتكسروا استادات الناس مالكم وتجوا تكوركوا!؟
|
Post: #20
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-23-2012, 00:24 AM
Parent: #19
البكوركوا أسي ديل يوم تكسير استاد الهلال كانوا وين؟
ولا تكسير "المفخرة" أحر من تكسير "المعبرة"؟
آخر خبر: فرق يا قيقاهيم!
آمل أن يعاقب الاتحاد العام نادي الهلال عقاب رادع، لأن الاعتداء وقع في بطولة من تنظيمه
|
Post: #21
Title: Re: بيان للمريخ، بعد أحداث القمة، لا يخلو من "دغمسة"
Author: طلحة عبدالله
Date: 09-23-2012, 08:11 AM
Parent: #20
يا حلبي قلتا لي الشغلانية جابت ليها حركات ديش ..
ديش هلال مريخ وديش صحافتم وديش البشجعم .
وديش قيقراوي الفوق دا ..
يا صبري طه وين السؤال ؟
|
Post: #22
Title: Re: بيان للمريخ، بعد أحداث القمة، لا يخلو من "دغمسة"
Author: صبري طه
Date: 09-23-2012, 09:13 AM
Parent: #21
| Quote: يا صبري طه وين السؤال ؟ |
هنا
|
Post: #23
Title: Re: بيان للمريخ، بعد أحداث القمة، لا يخلو من "دغمسة"
Author: طلحة عبدالله
Date: 09-23-2012, 09:18 AM
Parent: #22
يا صبري طه أنا عايز نانسي عجاج ياخ ..
|
Post: #26
Title: Re: بيان للمريخ، بعد أحداث القمة، لا يخلو من "دغمسة"
Author: صبري طه
Date: 09-23-2012, 09:40 AM
Parent: #23
| Quote: يا صبري طه أنا عايز نانسي عجاج ياخ .. |
شقي ومجنون هنا
|
Post: #24
Title: Re: بيان للمريخ، بعد أحداث القمة، لا يخلو من "دغمسة"
Author: MOHAMMED ELSHEIKH
Date: 09-23-2012, 09:28 AM
Parent: #22
تكرار
|
Post: #25
Title: Re: بيان للمريخ، بعد أحداث القمة، لا يخلو من "دغمسة"
Author: MOHAMMED ELSHEIKH
Date: 09-23-2012, 09:30 AM
Parent: #22
وقع الأعتداء على استاد الهلال من بعض جماهير المريخ التي شعرت بالأستفذاذ(provocation) من حكم المباراه والذي حسب القانون الجنائي يمكن أن يمثل سبب مباشر لألغاء عقوبة الاعدام أو تخفيفها لأقصى حد.
لكن ماحدث من جماهير الهلال كان عمل منظم أعد له على نار هادئة لفترة ليست بالقليلة وهو يقع تحت طائلة "سبق الأصرار والترصد" حيث لاشبهة استفذاذ ولايحزنون خاصة وان الحكم صرف ضربة جزاء وهدف واضحان لفرقة الصفوة.
والفرق واضح بين الحدثين المدانيين.
هل تتدخل رئاسة الجمهورية لحل العراك خصوصا وانو بقى ماعندها شغل غير الكورة اليومين ديل وأطالب بتعيين مستشار السيد الرئيس لشئون العك الكروي وبناء المدينة الرياضية وتكون هلال مريخ في المدينة ومافي زول يقول عايز اكسر حاجة
والله الموفق
|
Post: #27
Title: Re: بيان للمريخ، بعد أحداث القمة، لا يخلو من "دغمسة"
Author: طلحة عبدالله
Date: 09-23-2012, 09:55 AM
Parent: #25
صبري طه حرف البوست يا حلبي ..
الزول دا (اللى هو صبري ) طبعو شين يخش أي بوست إما عشان يسأل أو عشان يحرفو
شوف شغلك معاهو يا حلبي الزول دا غلبنا البنسويهو معاهو .
صبري طه وين السؤال ؟
|
Post: #28
Title: Re: بيان للمريخ، بعد أحداث القمة، لا يخلو من "دغمسة"
Author: صبري طه
Date: 09-23-2012, 09:57 AM
Parent: #27
Quote: صبري طه حرف البوست يا حلبي ..
الزول دا (اللى هو صبري ) طبعو شين يخش أي بوست إما عشان يسأل أو عشان يحرفو
شوف شغلك معاهو يا حلبي الزول دا غلبنا البنسويهو معاهو .
صبري طه وين السؤال ؟ |
دة سؤالي:
ليه شايفني شايل لي موز أخدر .. ولافّي بيهو البوستات ؟
|
Post: #29
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-23-2012, 03:07 PM
Parent: #28
| Quote: وديش قيقراوي الفوق دا .. |
دا طلع ديشو..هههه
بس صبري دا أرخيو موقتا
الزول عريس ومحروس بكتيبة ملائكية
لكن بعد المدام تجي بتجارخوا .. ههههه
ساعتا أديو في حنانو :)
|
Post: #30
Title: Re: بيان للمريخ، بعد أحداث القمة، لا يخلو من "دغمسة"
Author: خالد عبد الله محمود
Date: 09-23-2012, 03:20 PM
Parent: #29
بمناسبة ولدنا دي يا أشرف
طبعاً الجماعة قالو عايزين يلغو الإتفاقية و يسجلو سادومبا و عمر بخيت
واحد كاتب ليهم إنو أحسن حاجة في فريق المريخ إنهم زي بيت العزابة
بنومو و بابهم فاتح لا في حرامي بجيهم و لا عندهم حاجة يشيلوها
|
Post: #31
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-23-2012, 04:18 PM
Parent: #30
سلامات أستاذنا ود الشيخ
Quote: وقع الأعتداء على استاد الهلال من بعض جماهير المريخ التي شعرت بالأستفذاذ(provocation) من حكم المباراه والذي حسب القانون الجنائي يمكن أن يمثل سبب مباشر لألغاء عقوبة الاعدام أو تخفيفها لأقصى حد.
لكن ماحدث من جماهير الهلال كان عمل منظم أعد له على نار هادئة لفترة ليست بالقليلة وهو يقع تحت طائلة "سبق الأصرار والترصد" حيث لاشبهة استفذاذ ولايحزنون خاصة وان الحكم صرف ضربة جزاء وهدف واضحان لفرقة الصفوة.
والفرق واضح بين الحدثين المدانيين.
هل تتدخل رئاسة الجمهورية لحل العراك خصوصا وانو بقى ماعندها شغل غير الكورة اليومين ديل وأطالب بتعيين مستشار السيد الرئيس لشئون العك الكروي وبناء المدينة الرياضية وتكون هلال مريخ في المدينة ومافي زول يقول عايز اكسر حاجة
والله الموف |
هل معنى كدا أي جمهور النتيجة تكون ما في صالح فريقه، وحسب تقديره الحكم ظلم تيمه، يبقى معذور في تصرفه!؟
يا ود الشيخ في أتيام طلعت من الأدوار النهائية في كاس العالم بسبب أخطاء تحكيمية!
لا أظن أن فيه حكم في الدنيا أدار مباراة من غير أخطاء
حكاية الحكم ظلم فريقك عن عمد دي عندها آلية حل ما ليها أي علاقة بتكسير استاذ التيم المنافس
كتاب مريخيين كتبوا قبل مباراة هلال مريخ الكونفدرالية "لو الحكم تحامل على المريخ أحذروا غضبة جمهور الأحمر" (!).. هل في ترصد وتعبئة أكتر من كدا؟
لا زلت مصر إنو صحافتنا الرياضية، المليانة بمشجعين متعصبين بدرجة كتاب رياضيين، ليها الدور الأكبر في العنف الدخل ملاعبنا بالكثافة الحصلت مؤخرا دي
رأيي إنو الحل ممكن يكون في إنشاء أكاديمية للصحافة الرياضية، أول شي سنة أولى كلها تكون تعليم إنشاء بس!.. عشان يعلموا الكتاب ديل طريقة كتابة المقال (مقدمة، موضوع وخاتمة) ياخي ديل بكتبوا سطور كل سطر بتكلم عن موضوع مختلف عن السطر السابق!!.. (عمدان) سطورها كلو فردة من بلد!!
بعد يعلموهم الإنشاء (والإملاء برضو) يبتدوا، على يد أخصائيين نفسيين، يخلصواهم من الأمراض النفسية القادتهم للتعصب الأعمى..
حتين بعد داك يسمحوا للواحد فيهم يكتب
|
Post: #32
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-23-2012, 04:31 PM
Parent: #31
Quote: طبعاً الجماعة قالو عايزين يلغو الإتفاقية و يسجلو سادومبا و عمر بخيت
واحد كاتب ليهم إنو أحسن حاجة في فريق المريخ إنهم زي بيت العزابة
بنومو و بابهم فاتح لا في حرامي بجيهم و لا عندهم حاجة يشيلوها |
يا أبو عبد الله (راعي الضان في الخلا ) يعرف إنو التنقلات الكبيرة بين هلال مريخ تتم عبر القصر الجمهوري
يعني البشير لو ما صادق على الانتقال الوالي ما يقدر
ما سمعت الوالي قبل يومين صرح قال "لا ننوي ضم سادومبا"؟
يا بو الخلد هلال مريخ دي شايلة عن الحكومة بلاوي!
حكمة القصر: أي هزة بتفوق المساطيل ديل ما حبابها
شايف الجماعة قالوا عمك الفي القصر ذاتو طلع رشاشة!
آخر خبر: بشبش (ولدنا)
|
Post: #33
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-24-2012, 07:22 PM
Parent: #32
الآن يذاع برنامج في قناة الشروق عن دور الصحافة الرياضية في الحاصل
والضيفين نفس الحاصل برة (هلال مريخ)
احتمال كبير تدور بلنجة
|
Post: #34
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-24-2012, 07:41 PM
Parent: #33
تم، عبر الهاتف، استضافة علي شمو رئيس المجلس الأعلى للصحافة والمطبوعات فقال في ديوك عدة الصحافة الرياضية ما لم يقل مالك في الخمر
وقال (في ما معناه) "لو كان الأمر بيدي لأوقفت جميع الصحف الرياضية لحين تنظيمها وفق أسس جديدة تضمن تنقيتها من ديوك العدة"
آخر خبر: "ديك الصحافة الرياضية: يكشنو في بصلتو وهو يعوعي"
|
Post: #35
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-24-2012, 09:13 PM
Parent: #34
أحد ضيوف الحلقة ياسر المنا (ثاني إثنين إذ هما مزرزرين في إدارة الإعلام بجهاز الأمن والمخابرات اللاوطني)
|
Post: #36
Title: Re: بيان للمريخ، بعد أحداث القمة، لا يخلو من "دغمسة"
Author: Ashraf el-Halabi
Date: 09-25-2012, 06:12 PM
Parent: #3
|
|
|