مسطلح رياضي جديد في السودان ( قصير القامه ) ....

بعد المصطلحات ...
مان تو مان
الهجمه المرتده
والمنطقة المظلمة
والكاونتر اتاك
والافر لاب
لعب مفتوح ومقفول
علو كعب
بعد مشاهده تحليل الحارس السابق عبد العزيز في لقاء مباراة المريخ والهلال تكرر وهو يقول جمعه جينارو قصير القامه
وايضا سمعت اخونا وحبينا كابتن الساده وهو يقول بله جابر قصير القامه
سؤال هل قصر القامه يعتبر مشكلة في الملاعب وفي رياضة كرة القدم خاصة ؟
زمان عندنا واحده في الحله ظريف جدا لمن واحد يضرب كورة راسية وماتمشي تمام او ما تدخل هدف بقول ليه دا عدم الشعر ياولدي
ولكن لا اتفق مع كلام كل من الحارس السابق عبد العزيز والكابتن الساده بان مشكلة القامه هي مشكلة كبيره بالنسبة للاعب كرة القدم
بجي اوريكم ناس فرنسا كان فهمهم شنو في شكل تكوين اللاعب الجسماني وليه غيروا هذه الفكره ...

الريس يكون عمل فينا خير لو عدل العنوان من مسطلح الى مصطلح

في ميدان ابوعنجة يا وليد الناحية الشمالية في وسط الميدان بالضبط ..
مرتضى قلة .. كان بلعب في المريخ .. قصير القامة جدا ..
كان يعقوب موسى ود حلتنا يعتبر اطول لاعب يشبه بالحد البعيد في الحجم سقراط البرازيل على حجم روبرتو كارلوس حاجة كدا ضخمة جدا .. بيلعب استوبر
في المباراة دي بالذات كان عامل فيها ماسك مرتضى قلة ..
دقة مرتضى دق شديد جدا ..
المهم مرتضى لقى ليهو فرصة وطلع على الجناح بعيد من الناس ومن الزحمة .. قوم يا يعقوب تعال جاري ليهو من الاستوبر وكورك .. مايييين بي فهم انو الود قطعه ليهو في راسو ..
قام قلة دردق الكورة قدام يعقوب .. يعقوب لي شلاقتو مد رجلو الطويلة عشان يخطف الكورة .. وعشان يضرب مرتضى ..
المهم نحن شفنا (غبار) قايم زي القلوبية لما تخبط ليها طيرة .. وشفنا ايضا مما شفناه يعقوب موسى دا بيقع ويقوم . يقع ويقوم . وشفنا برضو يعقوب موسى بي طولو دا .. اتلفلف في بعضو زي سير البلاستيك ..
جرى مرتضى بالجناح .. لحدت ما وصل الشجرة بتاعت اللالوب بتاعت ناس نادر كتكوت .. وتااني جا راجع لي يعقوب موسى عشان كان قام حيلو يتمو
....
زمان برضو لما كنا صغار كان في لاعب في ابوعنجة اسمو .. (حبـة) تم تسمية منتصر حبة عليهو ..
حبة دا قصير جدا .. لكن احسن جناح بيرفع الكورة وهي ماشة .. عكس العديد من الاجنحة لي وقتنا هذا .. الواحد لما الكورة تكون متحركة يرفعه ويرفع معاها جردل بتاع تراب

يا مرحب بالكباتن.. وليد وتمبس..
قصر القامة ليس عيباً في لاعب كرة القدم..
هناك الكثيرين جدا من قصار القامة محلياً وعربياً ودولياً..
ولكنهم مميزين جداً في الأداء..
في الهلال:
محمد عبدالقيوم أبوشامة..
محمد حمدان
مصطفى كومي..
خالد بخيت
عمر بخيت

عربياً مهاجم الامارات الدولي
اسماعيل مطر..

ودولياً البرتغالي ديكو لاعب برشلونة الاسباني..

يا علاء الدين ياخ أسعد حبة ..أسعد حبة ..
منتصر حبة شنو كمان البيعرفوهو ليك الناس

Quote: أسعد حبة ..أسعد حبة ..

تجيد قراءة ما بين السطور يا عمر ..
حسع كان ما وقفت لي في حلقي كان جاسفته مع وليد ومررناها

Quote: يا علاء الدين ياخ أسعد حبة ..أسعد حبة .. منتصر حبة شنو كمان البيعرفوهو ليك الناس

هههههههههه غايتو هجمتني يا تامبا
ياخي ابو السعود حبيبي ( اسعد حبه )

Quote: تجيد قراءة ما بين السطور يا عمر .. حسع كان ما وقفت لي في حلقي كان جاسفته مع وليد ومررناها

عارف يا تامبا انا علاقاتي مع اولاد ابوعنجه واولاد امدرمان خاصه جميله جدا
لان كثيرا كان يقدمون لي الدعوات لكثير من التحديات والدافوري في ازقة امدرمان وامكن في يوم كان
اوقع لفريق اوعنجه بواسطة تبيدي رحمة الله عليه و صلاح دولار واكيد كان بكون شرف لي اللعب مع كل الحبايب
بقيادة على مكوه وعصمت عبد الرحمن وشوشه
الغريبة اسعد حبه وجد فرصة جميله جدا بان ينال شرف لبس شعار المورده
ولكن لم يوفق لعب بها قليلا كان بينا تواصل بس سفرتي الاخيره لم استطيع مقابلته هو و مغربي ...
امدرمان عالم جميل فيهو عشاء اسماعيل الكوتش والمرحوم صلاح ليبيا ووجدت به كل الاحترام والتقدير
تعرف يا تمبس ذكرتني في هذا الملعب بعد ان اصيب الكوتش صلاح ليبيا بمرض الفشل الكلوي
قالوا زهج وطلع قاعد بالقرب من العارضه جات واحده اظن بتتعلم السواقه ضربت العارضة فوقعت عليه
وكانت سببه تخيل ... الف رحمه ونور تنزل عليه وان يتقبله قبولا حسنا
ومن فاكهاته كان دائما يقول الشيب دا كله فاكرنو فيزياء ولا كيمياء دا كله دي دقت ودي مرقت بالله ادعوا له بالرحمه والمغفره
الى ان نعود لموضوعنا وقصة اي محلل يجي يمسك في اشياء معينه مكرره بين الناس حتى ولو كانت غلط وهو نفسه غير مقتنع بها
.
.
ياخي زمااااااااااان ياتامبا قصة كنت بتشرك للطير في الملعب فاكرها ولا انت قاصد نفس الملعب اخر

تعريجه
عمر الفاروق دا ممكن يكون مرجع لانه متابع جيد الصباح جيت لقيتو فاتح بوست قريتو كويس وبه نفس فكرة المحلل الحارس العملاق عزيز

Quote: ولكن لا اتفق مع كلام كل من الحارس السابق عبد العزيز والكابتن الساده بان مشكلة القامه هي مشكلة كبيره بالنسبة للاعب كرة القدم

أخونا وليد هل قالوا بأنها مشكلة كبيره ؟ لأنو بتفرق ياخ ...

مارادونا : زيدان سيستحيل إيقافه لو كان أقصر 20 سنتيمتراً فقط!
المصدر: هنا
بمعنى أن قصر القامة يُساعد في التخلّص من الخصوم ...

أمّا مشكلة قصر القامة الأولى هي الكرات العالية ...

احتمال واحد يقول لي وهل في مُشكلة تانية غير دي ...
حأقول ليهو الكراعو طويلة بتكون لاحقة خاصة للمدافعين ...



ـــــــــــــ

عارف يا وليد انا عندي فهم غريب جداً ..ما قاعد أسمع المحللين بين الشوطين في المباريات عشان أستفيد منهم..عندي قناعة إنو نحن المشجعين الساي ديل بنعرف نقرا الكورة أحسن منهم عشان كده ما بركز شديد..الكلام ده انا بخص بيهو تحليل قناة الجزيرة تحديييدا
حقيقة ما سمعت حديث الكباتن بين الشوطين ولا بعد نهاية الكورة ..بس كونو يكونو فكرتي طابقت فكرة حارس مرمى قدير فدي حاجة والله رييحتني أقلاه إني ما طشيت برة الشبكة..
بالنسبة لي ابو عنجة وما أدراك ما ابوعنجة فالواحد عد ليهو فترة من أجمل فترات حياته في متابعة فريقين من الدرجة التانية الزهرة وابوعنجة وهم في عز مجدهم في دورته الثانية بعد الأجيال القديمة ..
تابعت الزهرة وحضرت كل مبارياتها أيام ابشر والبياز وبعوضة والسادة وسيرجلي وود الجنيد وشاخور..
وتابعت ابو عنجة ايام ناس مالك وود حليمة وايمن بايتة وشوشة
يا سلام عليها ايام وإنت بتشاهد فريق بيتلم اللاعبين فيهو قبل الكورة بي 10 دقايق لأنهم ببساطة أولاد حلة وااحدة ..ووالله بعد تنتهي الكورة تشوفهم مارقين بي كرعينهم بي شارع الفيل عشان يجو بعد صلاة المغرب يتلمو في نادي ابو عنجة ..
ياخ الإحتراف ده عولق كورتنا والله ..

Quote: يا مرحب بالكباتن.. وليد وتمبس.. قصر القامة ليس عيباً في لاعب كرة القدم.. هناك الكثيرين جدا من قصار القامة محلياً وعربياً ودولياً.. ولكنهم مميزين جداً في الأداء.. في الهلال: محمد عبدالقيوم أبوشامة.. محمد حمدان مصطفى كومي.. خالد بخيت عمر بخيت عربياً مهاجم الامارات الدولي اسماعيل مطر.. ودولياً البرتغالي ديكو لاعب برشلونة الاسباني..

والله كلامك سليم وجبت نموزج فعلا للاعبي قامتهم قصيره كان لوجدهم اثر واضح مع انديتهم اما اسماعيل مطر دا كمان ود حكايه

اعظم لاعبى كرة القدم على مر التاريخ كانوا من ذوى القامات القصيرة ومارادونا خير مثال.
بيليه لم يكن ذا طول فارع, برونو كونتى صاحب القدح المعلا فى فوز ايطاليا بكأس العالم 82 كان قصير القامة والارجنتينى ارديلس كان (سوبر شورت) والامثلة كثيرة.