Post: #1
Title: ريكاردو الهلالابي!!
Author: الامين موسى البشاري
Date: 09-22-2012, 07:45 AM
Parent: #0
لم أجد وصفاً أفضل من هذا لأصف به ريكاردو
فقد كان المريخ يلعب ضد الهلال وريكاردو في الوقت ذاته
..
..
___
من حق الهلالاب أن يفرحوا بالتعادل
ويجب أن لا تنسيهم الفرحة حال فريقهم الهلكان
|
Post: #2
Title: Re: ريكاردو الهلالابي!!
Author: الامين موسى البشاري
Date: 09-22-2012, 07:52 AM
Parent: #1
ريكادو الذي لا يثق في قدرات لاعبيه
أهدى بطولة الدوري الممتاز في طبق من ذهب الى الهلال
بطريقته الدفاعية البائسة في الشوط الثاني أمام فريق هزيل مثل الهلال
والدليل عندما تخلى عنها في آخر 5 دقائق ارتعب كل الاهلة
وظهر شكل فريق المريخ ومدى تفوقه على الهلال ولو امتدت المبارة ل 5 دقائق أخرى
لهزم الهلال شـــر هزيمة .... فقط الفترة الأخيرة يجب أن تكون درساً لادارة المريخ
في أن ريكاردو ليس المدرب المناسب للمريخ
وأن المريخ يلعب دائماً ضد الفرق المنافسه وضد ريكاردو الهلالابي
|
Post: #3
Title: Re: ريكاردو الهلالابي!!
Author: صبري طه
Date: 09-22-2012, 08:06 AM
Parent: #2
| Quote: والدليل عندما تخلى عنها في آخر 5 دقائق ارتعب كل الاهلة |
بل الهلال هو الذي تراجع للحفاظ على نتيجة تعتبر في صالحه !!!
ثمّ أنّ إصابة سانيه بعد إحرازه للهدف .. جعلت مُدافعي المريخ مُرتاحين ...
|
Post: #4
Title: Re: ريكاردو الهلالابي!!
Author: الامين موسى البشاري
Date: 09-22-2012, 08:18 AM
Parent: #3
Quote: بل الهلال هو الذي تراجع للحفاظ على نتيجة تعتبر في صالحه !!!
ثمّ أنّ إصابة سانيه بعد إحرازه للهدف .. جعلت مُدافعي المريخ مُرتاحين ... |
صبري يا حبيب كيفك
غايتو البعرفو أنا انو صعب جدا تقنع ليك هلالابي
ومن زمان معرفين ما بتغالطوا ....... والله صحي 
خلينا من الفات صدقني لو بتقول الهلال تمام وكويس
وحالو عاجبك لا بتعرف تشجع كورة ولا لعبته كورة من قبل
المريخ بدأ الموسم الحالي بداية سيئة جدا بمدرب جديد
يا داب الأمور بدأت تظبط في المريخ
خطط وتكنيك اللعب وثبات التشكيلة ..... الخ
وعشان كدا شكل المريخ أحسن وماشي في تقدم
مشكلة المريخ الاساسية (ريكاردو) فهو مدرب لا يؤمن بقدرات فريقه
ولا يثق في نفسه حتى ...........
عكس الهلال بدأ الموسم بداية جيدة والآن يتراجع للخلف
كن بخير
|
Post: #5
Title: Re: ريكاردو الهلالابي!!
Author: عمر الفاروق عبد الله الشيخ
Date: 09-22-2012, 08:24 AM
Parent: #4
سانية كانية مانية
|
Post: #9
Title: Re: ريكاردو الهلالابي!!
Author: الامين موسى البشاري
Date: 09-22-2012, 08:46 AM
Parent: #5
أجمل ما في المباراة يا (عمر الفاروووووووغ )الهدفين
الهدف بتاع رمضان عجب ملعوب تمام والباص اتجدع بدقه
هاك يا رمضان جيب قون وقد كان بعد أكثر من 5 نقلات
..
..
هدف سانيه برضو جميل وملعوب واجمل ما فيهو الباص برضو
كورة معكوسة بمزاج وهاك جيب قون ياخ
والباص أحلى من الهدف نفسه ......... والله صحي
وعشان كدا الهدفين حلوات شديد بالجد والله
هدف سانيه عجبني جدا عشان طنقعة الحضري واستفزازه للاعبي الهلال
ياخ أنا اتمرضته خليهم لاعبي الهلال :))))))))))))
الحضري ياخ العب كورتك وبطل الحركات البايخة دي
|
Post: #6
Title: Re: ريكاردو الهلالابي!!
Author: صبري طه
Date: 09-22-2012, 08:27 AM
Parent: #4
عشان ما تبقى الحكاية تنظير ساي يا بُشاري أخوي ...
| Quote: عكس الهلال بدأ الموسم بداية جيدة والآن يتراجع للخلف |
اتراجعنا للخلف وين ؟
يعني انهزمنا من منو يا بُشاري ...
ياخي حتى تعادلنا مع الأهلي شندي جاء في بداية الموسم ...
خروجنا بركلات الترجيح من الشلف الجزائري جاء في بداية الموسم تقريباً ...
تعادلنا مع إنتركلوب في أرضه في مُباراة الذهاب ...
وهزمناه بثلاثية في مُباراة الإيّاب ...
يعني يا بُشاري مؤشر الهلال حسب النتائج ماشي لي قدّام ...
حتى نتيجة التعادل مع المريخ تعني تقريباً فوزه بالممتاز ولو إنهزم في مُباراتين قادمتين لأنه بحساب المواجهات المُباشرة لو تساوي الهلال والمريخ في عدد النقاط سيكون الحسم في صالح الهلال ...
بس إنت تعال أشرح لي إتراجعنا دي كيف ؟ ووين ؟ والنتيجة السيئة كانت في بداية الموسم والإيجابية في نهايته ...
ياخي نحن خرجنا من دوري الأبطال في بداية الموسم وهسي على أعتاب نصف النهائي في الكونفدرالية ... يعني حيكون دة تراجع ؟
ـــــــ
غايتو جنس غايتو
|
Post: #8
Title: Re: ريكاردو الهلالابي!!
Author: الامين موسى البشاري
Date: 09-22-2012, 08:38 AM
Parent: #6
| Quote: بس إنت تعال أشرح لي إتراجعنا دي كيف ؟ |
سلام تاني يا صبري
برجع ليك وأرد ليك على كلامي
وقطعاً أنا ما بتكلم عن نتائج فقط ودا الفرق بيني وبينك
أنا بتكلم عن شكل الفريق وتنظيمه وطريقة لعبه
يا صبري امسك دفاعك بس وشوفه
الوسط حقك وينه؟
الهجوم يوجد به لاعب ممتاز اسمه سانيه لكن سانيه دا
منو البوصل ليهو الكورة؟
الدوري دا نحن قنعانين منو منذ بداية الموسم يا صبري
لأن الفارق كبير وحتى لو هزمناكم من الصعب أن نكسب الدوري منكم
لأنو التفريط كان في الاول وسته نقاط فرق كبير ياخ
وبرجع افصل ليك أكثر
|
Post: #11
Title: Re: ريكاردو الهلالابي!!
Author: صبري طه
Date: 09-22-2012, 09:20 AM
Parent: #8
سلام يا بُشاري ...
Quote: سلام تاني يا صبري
برجع ليك وأرد ليك على كلامي
وقطعاً أنا ما بتكلم عن نتائج فقط ودا الفرق بيني وبينك
أنا بتكلم عن شكل الفريق وتنظيمه وطريقة لعبه
يا صبري امسك دفاعك بس وشوفه
الوسط حقك وينه؟
الهجوم يوجد به لاعب ممتاز اسمه سانيه لكن سانيه دا
منو البوصل ليهو الكورة؟
الدوري دا نحن قنعانين منو منذ بداية الموسم يا صبري
لأن الفارق كبير وحتى لو هزمناكم من الصعب أن نكسب الدوري منكم
لأنو التفريط كان في الاول وسته نقاط فرق كبير ياخ
وبرجع افصل ليك أكثر |
1- شكل فريق الهلال ومستواه أمام المريخ في مباراة ذهاب الممتاز والتي فاز فيها بهدف بشة .. ورغم فوز الهلال لم يكن أفضل من المُباراة الأخيرة التي تسيّد فيها الهلال شوطها الثاني ...
2- شكل فريق الهلال ومستواه أمام إنتركلوب في مُباراة ذهاب الكونفدرالية والتي انتهت تعادلية لم يكن فيها الهلال أفضل من مُباراة الإيّاب !!!
3- مُباراة الهلال أمام المريخ في ذهاب الكونفدرالية لم يكن الهلال فيها أفضل من مُباراة الدوري الممتاز الأخيرة .. والدليل أنّ المريخ لعب مُباراة الكونفدرالية ناقصاً بعد طرد قلق وكان شكل المُباراة وكأنّ الهلال هو الذي لعب ناقصاً ...
يا بُشاري عليك الله بدون تنظير حسب المُعطيات أعلاه ... دا اسمو تراجع ولاّ تحسن ياخ ؟!
|
Post: #12
Title: Re: ريكاردو الهلالابي!!
Author: الامين موسى البشاري
Date: 09-22-2012, 09:59 AM
Parent: #11
| Quote: يا بُشاري عليك الله بدون تنظير حسب المُعطيات أعلاه ... دا اسمو تراجع ولاّ تحسن ياخ ؟! |
بالنسبة لي تراجع في الاداء
أي مدرب أجنبي ومحترف بكون مهتم بالنتائج أكثر
وبالنسبة ليك تقدم لحظي سرعان ما ينكشف في الكونفيدرالية
سؤال يا صبري صريح وأتمنى اجابته
ما الذي اضافه غارزيتو للهلال منذ قدومه؟
هسي في ذمتك مباراة القمة شكل الهلال كان عاجبك يعني ولا شنو؟
يا صبري المعايير مختلفة بيني وبينك
انت بتقيس بالنتائج فقط وأنا عايز النتائج والاداء
|
Post: #7
Title: Re: ريكاردو الهلالابي!!
Author: الامين موسى البشاري
Date: 09-22-2012, 08:30 AM
Parent: #4
الهلال في الشوط الاول بس مفروض تستقبل شباكه 3-4 أهداف
المريخ مسيطر على الكورة تماماً ويشن الهجمات من الاطراف والعمق
وكل الطرق كانت سالكه في الوصول لشباك جمعة جينارو
بينما الحضري كان يستمتع بمتابعة المبارة فقط
حيث لم تشكل هجمات الهلال أي خطورة عليه
تناقل سهل للكرة انتشار جيد في الملعب
حتى قون رمضان عجب جاء بعد خمسة أو سته نقلات بين لاعبي المريخ
والقون زاتو (شـــرط ) قون ولد صبي يا قولات الرشيد عبيد
بينما الهلال دفاع مهلهل ووسط تاه وهجوم معزول تماماً
والمدرب غارزيتو عاجز عن فعل شئ ازاء هذا المد المريخي
|
Post: #10
Title: Re: ريكاردو الهلالابي!!
Author: الامين موسى البشاري
Date: 09-22-2012, 09:18 AM
Parent: #7
نرجع للهلالابي ريكادو
يا إدارة المريخ ريكادو مشى من الهلال ما مطرود المرة الماضية
ياهو دا حالو وعشان المرض البسوي فيهو دا مرض ناس الهلال
الحذر الكثير عند ريكادو دا لا مبرر له عندما كان في الهلال زمان
وهســـي وهو مدرب في المريخ
اصلا ما ممكن تسجل هدف واحد وتركن للدفاع بحجة انك تدافع عنه
وتبقى الحكاية دي أكثر مرارة لو كان فريقك كويس
وبامكانك مضاعفة الغلة والحصيلة مش تقعد تدافع عن هدف واحد
وتسمح للفريق المنافس انو يهاجمك بكلياته
مهما كانت قوة دفاعك وتنظيمه لا يمكنك المراهنة بالمحافظة على هدف واحد
المريخ الشوط الثاني ما ادانا احساس انو عايز يجيب قون تاني
كان ممكن تبدأ الشوط الثاني بنفس بداية الشوط الأول مهاجم لأول ربع ساعة
بغية تسجيل هدف لقتل المباراة وبعدين دافع زي ما انت عايز ياخ
ورضو دافع ياخ براحتك لكن على الأقل درّب اللاعبين على سرعة الهجمات المرتدة
عشان تخطف ليك هدف تاني يريحك
مش تلعب شوط كامل للحفاظ على هدف واحد ومعروف انو الهدف الواحد ممكن يتعوض
وممكن الفريق التاني يجيب فيك هدف تعادل في أي لحظة وبأي سبب من الاسباب
سرحان وتوهان المدافعين (زي باص القون بتاع سانيه)
خطأ من المدافع أو الحارس أو حتى الحكم ياخ
مهارة لاعب من الفريق الخصم
الخ
الخ
وممكن الفريق التاني يجيب هدف التعادل في وقت قاتل ما يسمح ليك بالتعويض
وهذا ما حدث بالفعل
|
Post: #13
Title: Re: ريكاردو الهلالابي!!
Author: الامين موسى البشاري
Date: 09-22-2012, 03:43 PM
Parent: #10
الله يجازي الكان السبب (ريكاردو) فقد منحكم الفرصة للتعادل
بالتراجع الكامل في الشوط الثاني للدفاع عن هدف وحيد
وبدون الاعتماد على الهجمات المرتدة السريعة
والتي كان يمكن أن يخطف بها المريخ هدف ثاني
الهلالاب فرحانين بالنتيجة لأنهم ما مصدقين التعادل
..
..
___
بالرغم من دا كلو عجبني شكل المريخ في الدفاع
وطبق اللاعبين المطلوب منهم بحذافيره
انضباط تكتيكي عالي وتنظيم دفاعي ممتاز جدا
العيب الوحيد انهم منحوا الهلال كامل حريته للضغط عليهم
يعني انضبط وما تنكمش خالص وتتخندق في الدفاع للدفاع عن هدف وحيد
يمكن تعويضه في أية لحظة
آخر كورتين هلال مريخ كنا المبكرين بالتسجيل ولكن لم يستفد ريكاردو
من التسجيل المبكر لتجيير النتيجة لصالحة
ريكاردو عيبه ما بعرف يدير المباريات كويس أثناء سير المباراة
|
Post: #14
Title: Re: ريكاردو الهلالابي!!
Author: محمد البشرى الخضر
Date: 09-22-2012, 06:38 PM
Parent: #13
سلامات يا ود البشاري
تعليقا على حتة انضباط لاعبي الدفاع المريخي
بصفة عامة مهمة لاعب الدفاع اسهل من المهاجم إذ كل العليه تشتيت الكورة وعندو مساحة واسعة لذلك و منع دخولها في مساحة محدودة عكس المهاجم المطلوب منو ادخال الكورة في المساحة المحدودة دي ة التغلب على وجود مدافعين وحارس كمان
اها عشان كدا و عشان سهولة مهمة المدافع مقارنة بالمهاجم يختلف التقييم
لو اجاد المدافع مهمتو خلال تسعة وتمانين دقيقة و فرط خلال دقيقة واحدة نتج عنها هدف بتشوفوا كأنو ما عمل حاجة و فشل خلال التسعين دقيقة كاملة
قلبي دفاع المريخ سرحانهم في آخر المباراة للحظة كفلت لسانيه احراز الهدف و قبلها سرحانهم عن سادومبا بداية الشوط التاني ضيعت كامل مجهودهم
عكس سانيه الشفع ليه الهدف في نسيان غيابه شبه الكامل عن المباراة
عشان كدا ما تقدر تشيد بتألق المدافعين و انضباطهم طالما ما كان 100%
|
Post: #27
Title: Re: ريكاردو الهلالابي!!
Author: الامين موسى البشاري
Date: 09-24-2012, 09:58 AM
Quote: عكس سانيه الشفع ليه الهدف في نسيان غيابه شبه الكامل عن المباراة
عشان كدا ما تقدر تشيد بتألق المدافعين و انضباطهم طالما ما كان 100% |
أوووووووووو حبيبنا ود البشرى
أولاً مبروك التعادل وكدا
بتفق معاك في الكثير مما جاء في المداخلة أعلاه
وبختلف معاك في حتة عدم الاشادة بالمدافعين والفريق ككل
شكل المريخ واللاعبين انهم كانوا قاعدين ينفذوا في تعليمات من بره
دائما بتجد 4 مدافعين وقدامهم 2 ارتكاز
الانضباط التكتيكي دائما بحد من حركة وحرية اللاعبين
الخطأ مش خطأ المادفعين الانت ختيت عليهم اللوم ولكن الخطأ من المدرب
بانو حاول يحافظ على هدف يتيم يمكن تعويضه في اية لحظة
والخطأ الثاني انو انكمش بالكامل وسمح لكل لاعبي الهلال بالاشتراك في الهجوم
عكس الشوط الاول حيث كان ظهيري الهلال في اماكنهم ولم يتحركوا كثيرا
واصلا دي سنة الكورة وكدا ، المهاجم هدف واحد يرفعو السماء
والمدافع خطأ واحد يخسف به الارض
المهم الله مرقكم مننا
|
Post: #15
Title: Re: ريكاردو الهلالابي!!
Author: سفيان بشير نابرى
Date: 09-22-2012, 06:51 PM
Parent: #13
الأمين يا صفوة سلام
يا حبيب انت عايز تقنع هلالابي!!!
يا عمنا ياخ انسى و قول ليهم فريقكم دا تمااام مافيهو إي شق
لا طق و حيجيب ليكم كاس بطولة خارجية و خليهم يهيصوا .
بس للضمان و بالجد السواها ريكاردو رقدت
ياخ معقول مدرب ما بيعرف يقرأ الخصم !!؟
|
Post: #16
Title: Re: ريكاردو الهلالابي!!
Author: abas
Date: 09-22-2012, 07:14 PM
Parent: #15
ريكاردو هلالابي
الورجغه في شنو اطردوه في شنو تاني
|
Post: #17
Title: Re: ريكاردو الهلالابي!!
Author: منتصر صلاح
Date: 09-22-2012, 07:40 PM
Parent: #16
الامين اخوي
المشكلة ما في ريكاردو
مشكلتكم في لعيبتكم .. ياخي كورة نضيفة خمسة دقايق ما بتقدرو تقدموها
فاولاتكم كتيرة والمفروض مصعب عمر ياخد كرت احمر
احتجاجاتكم كتيرة وما بتحترمو الحكم نهائي
غايتو حتفقدو اكتر من لاعب بالطريقة دي في الكونفدرالية
مش ريكاردو .. لو جيبتو السير فيرغسون ياهم بلة جابر والزومة
تحياتي
|
Post: #18
Title: Re: ريكاردو الهلالابي!!
Author: شرف الزاكي
Date: 09-22-2012, 07:50 PM
Parent: #17
الدلقان الامين البشاري
تحياتي
ما جبت حاجة جديدة
طمبل هلالابي
كليتشي هلالابي
وتحت تحت الوالي ظااااااااااتو هلالابي
وكلهم ما يلزموناش بلهجة الراقصة الحضري
وبرضو والله صحي
|
Post: #19
Title: Re: ريكاردو الهلالابي!!
Author: حيدر بشير
Date: 09-22-2012, 10:24 PM
Parent: #18
الامين البشارى
لك التحية
يا خينا اطمئن و طالما المستشار الاول عندكم السيد مزمل ابوالقاسم طالب بطرد ريكاردو فانه مطرود لا محال حتى و لو اتى بكاس الكونفدرالية
الغريبة انه كل ناس المريخ يتكلموا عن انه طالما انهم فى الشوط الاول كنا كويسين مفروض نكون غالبين طيب ما كان يلغوا الشوط التانى دا
و بنفس المنطق نحن كمان نقول الهلال فى الشوط التانى لقى فريق منتهى كان مفروض يغلبوا بى نتيجة تشلعه و تسرح لعيبته
و ما معظم الفرق الحايمة دى بتنتفض زى ما بيقولوا فى الشوط التانى اذا كانوا متاخرين
و يا الله ريكاردو نزل لامن كان الباقى 5 دقايق و قال ليهم اتخلوا عن الدفاع و امشوا هاجموا
الموضوع اصلا انه لاعبى الهلال جوا الشوط التانى و مصرين يغلبوكم و بالتالى اجبروكم على الدفاع
و بعد ما جابوا التعادل هم اتراجعوا و ادوكم فرصة الحركة لكن بعد ما جبتوا الزيت عشان كدة كانت حركتكم ما فيها فايدة
|
Post: #20
Title: Re: ريكاردو الهلالابي!!
Author: محمد عمر الفكي
Date: 09-22-2012, 10:58 PM
Parent: #19
تعرف يا الامين
انا لما اكون في السودان ما قاعد افوت كورة للمريخ وبخش مسطبة جانبية يعني بقعد وراء دكة احتياط المريخ
قطع شك اليوم داك لو كنت هناك كنت رجعت حفيان لانه الحتة ديك مافيها طوب للاسف كلها كراسي
|
Post: #21
Title: Re: ريكاردو الهلالابي!!
Author: Hassan Senada
Date: 09-23-2012, 05:07 AM
Parent: #20
سلامات البشارى
ريكاردو اسو مدرب فى تاريخ المريخ
مفروض كان يحسم النتيجة فى الشوط الاول 5/ صفر
لاكن الله غالب
|
Post: #22
Title: Re: ريكاردو الهلالابي!!
Author: Mohammed Ibrahim Othman
Date: 09-23-2012, 06:57 AM
Parent: #20
الامين ياصفوة ..
بصراحة انا شعرت لو أني دربت المريخ في المباراة دي كنت ح اكون افضل من ريكاردو ،ماتضحك انا بتكلم بجد ..
مدرب الهلال ادار التغييرات بصورة اعادته للمباراة اما مدرب المريخ تشعر انه بس جاري سبحة ..
ثم ثانياً الفريق ما فيهو واحد يعرف كيف يحرك اللعيبة من داخل الملعب ،يعني يفتقد القائد البيعرف يدير اللعيبة وقت الحوجة لهدف ،عند الانتصار ،متين تهدئة اللعب ..
الله يرحم سامي عزالدين وياحليل زمن كمال عبد الوهاب ،وبشارة..
|
Post: #23
Title: Re: ريكاردو الهلالابي!!
Author: شعبان شريف
Date: 09-23-2012, 07:22 AM
Parent: #22
هنالك حقيقة مرة في امر هيرون ريكاردو بان الهلال هو الذي بني له اسما ورسما في عالم التدريب وعندما أحس بأنه صار مدربا معترفا ومتخرجا من كلية الهلال جني الملايين من عرب الخليج ولانه لم يجد مدرسة كالهلال ترنح في امره .. الحقيقة الثانية بأن الهلال هو من صنع أسما لريكارود والمريخ هو من دمره ومرمط به الأرض ...حدسي يقول بان المريخ يخطط لاصطياد غارزيتو الناجح مع الهلال الآن ولكن سيكون توجههه الي المريخ وبالا عليه.. لانك لاتعرف من هو الذي يدير الأمور في المريخ الصحافة ام المنتفعيين لان الادارة غائبة حقا فجمال الوالي بنك للكاش ولايعرف كيف ينفقه ثم انه لايعرف الفباء الادارة الرياضية والمنتعفيين يروقهم هذا ...يسمسرون في اللاعبيين وبعضهم نكاية بالهلال ويسمسرون في المدربيين فقط لانه نجح مع الهلال..ولكن الهلال لايلتفت لسقط المتاع حتي وان قدر لريكاردو المغضوب علي ان يحقق بعض النجاح مع المريخ مع ان الامور تسير به نحو الاسواء فان الهلال ماكان سيعيد الكرة ويتعاقد معه مرة اخري لانه استنفذ اغراضه في الهلال ...فالهلال يكشتف ثم يترك العظم للاخرين يتصارعون حوله... ريكارود ليس هلالابيا ولكن الهلال هو من صنعه ثم تركه يهيهم مع المريخ الأن...
|
Post: #24
Title: Re: ريكاردو الهلالابي!!
Author: فتحي الصديق
Date: 09-23-2012, 10:38 AM
Parent: #23
صدقتا يا الأمين .
ريكاردو أهدى التعادل للهلال ..
-----------------------------------------------------
ريكاردو خويويف يا البشاري ... من زمنو الكان معانا نحنا عارفنو خويويف .
|
Post: #25
Title: Re: ريكاردو الهلالابي!!
Author: طلحة عبدالله
Date: 09-23-2012, 11:02 AM
Parent: #24
البشاري السلام عليك
ريكاردو دا من زمنو الكان بدرب في الامارات انا عارفو هلالابي لكن ما عايز أقول ساي ..
|
Post: #26
Title: Re: ريكاردو الهلالابي!!
Author: waleedi399
Date: 09-23-2012, 12:09 PM
Parent: #25
| Quote: ريكاردو دا من زمنو الكان بدرب في الامارات انا عارفو هلالابي لكن ما عايز أقول ساي .. |
قوية وشديدة دي يا طلحة.. عجبتني شديييد .. هاهاها
|
Post: #32
Title: Re: ريكاردو الهلالابي!!
Author: الامين موسى البشاري
Date: 09-26-2012, 07:27 AM
Parent: #26
| Quote: قوية وشديدة دي يا طلحة.. عجبتني شديييد .. هاهاها |
يا وليد لو ما عجبتك كيف يكون كاتبها طلحة عبد الله ياخ
|
Post: #29
Title: Re: ريكاردو الهلالابي!!
Author: الامين موسى البشاري
Date: 09-24-2012, 04:01 PM
Parent: #16
Quote: ريكاردو هلالابي
الورجغه في شنو اطردوه في شنو تاني |
يا عبس شدو حيلكم في الكونفيدرالية
ريكاردو خلاص بقى كراع بره وكراع جوه
ودجوليبا منتظركم في دور الاربعة والله صحي
-------
Quote: مشكلتكم في لعيبتكم .. ياخي كورة نضيفة خمسة دقايق ما بتقدرو تقدموها
فاولاتكم كتيرة والمفروض مصعب عمر ياخد كرت احمر
احتجاجاتكم كتيرة وما بتحترمو الحكم نهائي |
وانتوا وين كورتكم
غايتو عندكم وهمة كبيرة ما حتفيقوا منها الا بصدمة خماسية من دجوليبا
تحياتي يا منتصر
-----
Quote: الدلقان الامين البشاري
تحياتي
|
يا برلوم دلقان شنو وكهنة شنو كمان؟
ياخ من أول مرة تجي داخل توووووووووش كدا في الزول شمال
غايتو الله في ياخ
بس بالجد اثبته إنك هلالابي 100% ......... والله صحي
-------
Quote: الموضوع اصلا انه لاعبى الهلال جوا الشوط التانى و مصرين يغلبوكم و بالتالى اجبروكم على الدفاع
و بعد ما جابوا التعادل هم اتراجعوا و ادوكم فرصة الحركة لكن بعد ما جبتوا الزيت عشان كدة كانت حركتكم ما فيها فايدة |
مصرين شنو يا حيدر ياخ
الهلال كان مافي عديييييييييييييييل كدا
والتراجع كان بأمر ريكاردو
كن بخير
-------------
Quote: تعرف يا الامين
انا لما اكون في السودان ما قاعد افوت كورة للمريخ وبخش مسطبة جانبية يعني بقعد وراء دكة احتياط المريخ
قطع شك اليوم داك لو كنت هناك كنت رجعت حفيان لانه الحتة ديك مافيها طوب للاسف كلها كراسي |
مالك بتلف وتدور يا محمد عمر
ما تقول عدييييييل كدا حتديهو بالجزمة القديمة يا عملات المصريين
وهو يستاهل اليوم داك ........... والله صحي
ياخ العب كورتك واتغلب عادي يعني
---------
Quote: سلامات البشارى
ريكاردو اسو مدرب فى تاريخ المريخ
مفروض كان يحسم النتيجة فى الشوط الاول 5/ صفر
لاكن الله غالب |
والله يا حسن سناده الحاجة لغاية هسي واجعاني ياخ
غايتو الله دائماً غالب
------
Quote: ثم ثانياً الفريق ما فيهو واحد يعرف كيف يحرك اللعيبة من داخل الملعب ،يعني يفتقد القائد البيعرف يدير اللعيبة وقت الحوجة لهدف ،عند الانتصار ،متين تهدئة اللعب ..
الله يرحم سامي عزالدين وياحليل زمن كمال عبد الوهاب ،وبشارة.. |
محمد ابراهيم
كيف حالك ... والجماعة مكتفين ياخ
-----
| Quote: الحقيقة الثانية بأن الهلال هو من صنع أسما لريكارود والمريخ هو من دمره ومرمط به الأرض ...حدسي يقول بان المريخ يخطط لاصطياد غارزيتو الناجح مع الهلال الآن ولكن سيكون توجههه الي المريخ وبالا عليه |
غايتو خيالك خصب بشكل
وغارزيتو زاتو عمل شنو للهلال لغاية هسي
العبرة بالخواتيم يا شعبان
-------
Quote: صدقتا يا الأمين .
ريكاردو أهدى التعادل للهلال ..
|
ودي ما بتغالطوا فيها 2 ياخ
يا فتحي الزول مرضنا مرض اليومداك
-------
Quote: البشاري السلام عليك
ريكاردو دا من زمنو الكان بدرب في الامارات انا عارفو هلالابي لكن ما عايز أقول ساي .. |
يا طلحة دا هلالابي على السكين
مرضنا الله يمرضوا ياخ
|
Post: #30
Title: Re: ريكاردو الهلالابي!!
Author: شرف الزاكي
Date: 09-25-2012, 06:52 PM
Parent: #29
Quote: يا برلوم دلقان شنو وكهنة شنو كمان؟
ياخ من أول مرة تجي داخل توووووووووش كدا في الزول شمال
غايتو الله في ياخ
بس بالجد اثبته إنك هلالابي 100% ......... والله صحي
|
ههههههههههههههه
شكرا يا اللمين اخوي علي روحك الرياضية
بس كمان غريبه اول مره اشوف لي مريخابي روحو طيبه ورياضية
غايتو اكان ما اخاف الكضب احلف طلاق انك هلالابي وسيد بلد
بس طلعت مريخابي وده عيبك
مودتي
|
Post: #28
Title: Re: ريكاردو الهلالابي!!
Author: الامين موسى البشاري
Date: 09-24-2012, 10:02 AM
Parent: #15
Quote: بس للضمان و بالجد السواها ريكاردو رقدت
ياخ معقول مدرب ما بيعرف يقرأ الخصم !!؟ |
وعليكم السلام يا سفيان
الزول دا كتلنا بالوجييييييييييع ياخ
والحذر الشديد من شنو زاتو أنا ما عرفته السبب
الهلال تعبان وراقد رز وهو بدافع عن هدف وحيد
غايتو الله غالب
|
Post: #31
Title: Re: ريكاردو الهلالابي!!
Author: Ashraf el-Halabi
Date: 09-25-2012, 11:36 PM
Parent: #28
سمعت تحت تحت يا ود البشاري إنو الجماعة بيحاولوا ليكم في ولدنا (ميشو) للموسم الجديد..
عقدة ربنا يشفيهم منها
|
|