Post: #1
Title: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-12-2012, 06:28 PM
Parent: #0
لقد شهدت أغلب ولايات السودان التي تمارس فيها الزراعة المطرية ، بحمد الله ، موسما زراعيا متميزا لم يشهده السودان خمسين عام مضت وقد استطاع المزارعون رغم سياسات التقشف من توسيع المساحات المزروعــــــــــــــــــــة من الذرة والسمسم وغيرهما من المحاصيل النقدية .
تبقت ايام قلائل ليقبل المزارعون الى حصاد السمسم . وبعد ان افتقدنا جزءا كبيرا من بلادنا افتقدنا معه ، من بين ما افتقدنا ، القوة العاملة الجنوبية . والسمسم معروف عنه محصول سريع الضياع او التشتت برة ان لم تتوفر الايدي العاملة لحصاده لحظة اصفرار شجرته وان لم يتم تلافيه بالحصاد خلال تلك الفترة فسيضيع اى مجهود بذل لانتاجه وإن تأخر حصاده فمصيره التراب ( الشتيت برة ساى ) ويبقى المزارع يقلب كفيه على ما أنفق فيه وهو خاو على عروشه .
عليه فإنني أدعو للآتي :-
اولا : اعلان حالة استنفار كبرى وسط قوات الدفاع الشعبي والخدمة الالزامية وغيرهم من الفئآت التي تتعاطى رواتب بدون عمل للمشاركة في حصاد سمسم هذا الموسم .
ثانيا : ان تقفل جميع المدارس والجامعات ويوجه الطلاب اما للمشاريع للمشاركة في عملية الحصاد وهذا حتما سيحقق دخلا مجزيا للطالب قد يصل الدخل اليومي للطالب المجتهد في الحصاد 200 الف جنيه و ان يسمح للطلبة مشاركة اسرهم في حصاد السمسم فهو الامل الذى تبقى لمقابلة مصاريفهم الدراسية .
ثانيا : الوقاية ضد الافات فللسمسم آفاته الفتاكة مثل الكعوك والعنتت التي يمكن ان تقضى على كل المساحات المزروعة خلال ايام قلائل .
ثالثا : ان خريف هذا العام قد شهد ظهور كمية كبيرة من الثعابين لا سيما من نوع الوشاش فخلال زيارتي للدندر ايام عيد رمضان المنصرم شهدت اصابة اربعة صبية من قرية واحدة (البردانة) بلدغات ثعبانية كادت ان تقتلهم لولا لطف المولى ورعايته ، وحتما ستزيد حوادث لدغات الثعابين خلال موسم حت السمسم( حت السمسم هو المرحلة الاخيرة والتي يقوم فيها العمال بضرب الحزم مع بعضها بعد تنشيفها بحرار الشمس لتفريغ الثمرة منها فمكان تجميع شجيرات السمسم بعد قطعه تعتبر بيئة محببة للثعابين ) وهذا يقتضى جاهزية المؤسسات الصحية بامصال الثعابين و عمل معسكرات او تايات طبيّة داخل مواقع الانتاج .
ارجو الا يكون حديث الدولة منصرفا الى زيادة الجبايات على المزارعين فحسب وإنما بإسنادهم بتلك النفرة المدفوعة الأجر من قبل المزارعين انفسهم وتوفير سبل الوقاية من الافات الزراعية وهذا سيزيد من حجم الايرادات للخزينة العامة او الخاصة !!
|
Post: #2
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-12-2012, 06:35 PM
Parent: #1
فوق حتى لا يتدفق في الارض
|
Post: #3
Title: Re: حتى لا يتشتت برة ساي - توجد وجهات نظر عملية
Author: فيصل محمد خليل
Date: 09-12-2012, 06:45 PM
Parent: #2
جنك حت
الكاس الكاس
بختو في نصي
و من نصي هدية لشعبي
وراء وراء وراء
|
Post: #4
Title: Re: حتى لا يتشتت برة ساي - توجد وجهات نظر عملية
Author: معاذ الفحل
Date: 09-12-2012, 07:13 PM
Parent: #3
قريبنا ود شيقوق
اقطع دراعى لو ما انت السنة دى زارع بلادك سمسم وخايف عليهو يشق
ده لو ربنا نجاهو من الشرابة
وكمان الاسبوعين الجايات ديل فيهن قمر طالع ( القمرة)
شيل شيلتك بس
دمت بخير
|
Post: #5
Title: Re: حتى لا يتشتت برة ساي - توجد وجهات نظر عملية
Author: خالد علي محجوب المنسي
Date: 09-12-2012, 07:18 PM
Parent: #4
ههههههههههههههههه
لقيت مافي فايدة من دولاد الأسواق
قلتا اخير لي خدمة أهلي
وزي ما قال الاخ
انت السنة دي يا مسنيح زارع
ايوا اخير ليك السمسم
العيش لما المطر يكون كتير ببوص وما بمرق ليك هين
بسم رسل لي زكاته يوم حصاده
عنواني بتعرفوا يا السجم ما تقول راح مع التلفون مكنة كل متهرب
ههههههههه
تحياتي ومودتي وان شاء ما يتشتت كان يرقع أهلنا الطيبين
|
Post: #13
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 05:36 AM
Parent: #5
خالد ود المنسي
انت ما جاياك التحكتحة انا حالف اجهز لي مخلاية سمسم مليانة دكاك ( الدكاك هو السمسم الابيض الخالي من الشوائب - الشرح دا لناس ود القاضي الافندية ) وكمان زيت سمسم لوضاحة اختي باقي لي الحاجات دي في الدوحة مافي .
| Quote: تحياتي ومودتي وان شاء ما يتشتت كان يرقع أهلنا الطيبين |
هههههههههههها خلاص جنك قام عليك تااااااااااااني؟ ههههههههههههههههههها
|
Post: #12
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 05:31 AM
Parent: #4
ود الفحل قريبي
كيفك
Quote: اقطع دراعى لو ما انت السنة دى زارع بلادك سمسم وخايف عليهو يشق
ده لو ربنا نجاهو من الشرابة
وكمان الاسبوعين الجايات ديل فيهن قمر طالع ( القمرة)
شيل شيلتك بس |
غايتو من كلامك دا ظاهر عليك مزارع تفتيحة مش زى ناس فيصل هليل المواسير ديلاك
|
Post: #6
Title: Re: حتى لا يتشتت برة ساي - توجد وجهات نظر عملية
Author: Siham Elmugammar
Date: 09-12-2012, 07:42 PM
Parent: #3
الاخ الطيب سلامات و تحياتى
والله قالوا من شاهد ليس كمن سمع..
و من خبر ليس كمن تبختر فى الفارغة
ومن اوصى ليس كم صم خشموا
ومن سمع الوصية ليس كمن لايسمع
ومن عمل بها ليس كمن عمل اضان الحامل طرشا
نسأل الله الا يكونوا طرش!!!!!!!!!!!!
|
Post: #7
Title: Re: حتى لا يتشتت برة ساي - توجد وجهات نظر عملية
Author: ابوبكر قسومة
Date: 09-12-2012, 07:56 PM
Parent: #6
Quote: ان تقفل جميع المدارس والجامعات ويوجه الطلاب اما للمشاريع للمشاركة في عملية الحصاد وهذا حتما سيحقق دخلا مجزيا للطالب قد يصل الدخل اليومي للطالب المجتهد في الحصاد 200 الف جنيه و ان يسمح للطلبة مشاركة اسرهم في حصاد السمسم فهو الامل الذى تبقى لمقابلة مصاريفهم الدراسية .
|
سلام....
كلامك عين العقل
لكن يا خوي زي التقول قريت لي كلام قبل كم يوم كده
في (بنبركم) ده يناهض ما تذهب اليه هنا....
ما لاقيهو هسع دي
بغتس وبطلع ليك بيهو.....
قالو في المثل يتكلم المجنون
ويتصنت العاقل..
(رجعتني زي 35 سنة لا ورا)
تسلم الطيب أخوي.
|
Post: #8
Title: Re: حتى لا يتشتت برة ساي - توجد وجهات نظر عملية
Author: سلمى الشيخ سلامة
Date: 09-12-2012, 08:08 PM
Parent: #7
قلبى على جناى وقلب جناى على حجر
اجد ان هذا القول الاكثر تعبيرا عن الامر الذى كتبته يا صديقى
اتمنى ان يجد ما كتبته اذنا وعينا تراف به
تحياتى واحترامى
|
Post: #9
Title: Re: حتى لا يتشتت برة ساي - توجد وجهات نظر عملية
Author: حامد بدوي بشير
Date: 09-12-2012, 08:23 PM
Parent: #8
جاييكم اخوتي واخواتي فسماؤنا مقمرة في مدينة مسقط
|
Post: #10
Title: Re: حتى لا يتشتت برة ساي - توجد وجهات نظر عملية
Author: rummana
Date: 09-12-2012, 08:42 PM
Parent: #9
والله يا أستاذ الطيب بالغت شديد خلاص
الوشاش مالي البلد وإنت عايز حكومة الانقاذ تقلع مننا أولادنا الفي الخدمة الالزامية والمدارس وتمنعهم الدراسة وترسلهم عشان يشاركوا في حت السمسم؟
هسه الفرق شنو بين دعوتك دي وارسالهم لخطوط التماس بينهم وبين معارضيهم المسلحين عشان يحاربوا بالنيابة عنهم؟
نحن حنلقاها منهم ولا منكم يا ناس الزراعة...
|
Post: #18
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 06:08 AM
Parent: #10
عزيزتي رمانة
سلام وكل عام وانت بالف خير
Quote: الوشاش مالي البلد وإنت عايز حكومة الانقاذ تقلع مننا أولادنا الفي الخدمة الالزامية والمدارس وتمنعهم الدراسة وترسلهم عشان يشاركوا في حت السمسم؟
هسه الفرق شنو بين دعوتك دي وارسالهم لخطوط التماس بينهم وبين معارضيهم المسلحين عشان يحاربوا بالنيابة عنهم؟
نحن حنلقاها منهم ولا منكم يا ناس الزراعة... |
هههههههههههها والله يا استاذة رمانة كلامك ضحكنى وكلام زول عارف كل السيناريوهات المتوقعة
فعلا الخطورة على الاولاد واردة لا سيما لاولاد البندر الما بيعرفوا الحت بالبصارة - الواحد فيهم يتلهم الحزمة اعمى واطرش ويكون الوشاش نائم جواها.
ربنا يحفظ اولادنا من السوابح يا رب
|
Post: #17
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 06:02 AM
Parent: #9
استاذنا حامد بدوى
| Quote: جاييكم اخوتي واخواتي فسماؤنا مقمرة في مدينة مسقط |
الف مرحب بيك وفي انتظار عودتكم - دعهم يا عزيزي ينعمون بضؤ القمر في البنادر ولا يدرون فعائله في اهلنا المزارعين .
|
Post: #16
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 05:59 AM
Parent: #8
سلومة بت الشيخ يا صديقتي
Quote: قلبى على جناى وقلب جناى على حجر
اجد ان هذا القول الاكثر تعبيرا عن الامر الذى كتبته يا صديقى
اتمنى ان يجد ما كتبته اذنا وعينا تراف به
تحياتى واحترامى |
انا يا سلمى اختى مزارع ود مزارعين قبل ان اكون محاميا - مع المزارعين بكل حواسي في افراحهم واشجانهم ومآسيهم
ما قلته لن يمر بخاطر علماء الزراعة في البندر يا ام عزة اختي
|
Post: #15
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 05:51 AM
Parent: #7
قسومة
Quote: كلامك عين العقل
لكن يا خوي زي التقول قريت لي كلام قبل كم يوم كده
في (بنبركم) ده يناهض ما تذهب اليه هنا....
ما لاقيهو هسع دي
بغتس وبطلع ليك بيهو.....
قالو في المثل يتكلم المجنون
ويتصنت العاقل..
(رجعتني زي 35 سنة لا ورا) |
انت يا صديقي زول بندر سااااااااااااى كلامي دا ما بتكون ناقش فيهو حاجة
الله يطول عمركم يا ناس الرفيرا وحدائق الشاطئ واحلام مستغانمي والجلكسي تاب
قال سمسم قال - زيت سمسم يمسحوك بيهو من ضفرك لرأسك قول آمين
|
Post: #14
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 05:48 AM
Parent: #6
عزيزتي سهام المجمر
الف تحية
Quote: والله قالوا من شاهد ليس كمن سمع..
و من خبر ليس كمن تبختر فى الفارغة
ومن اوصى ليس كم صم خشموا
ومن سمع الوصية ليس كمن لايسمع
ومن عمل بها ليس كمن عمل اضان الحامل طرشا |
والله يا سهام انا بحكي كلام جاد جدا خليك متابعة بس و بعد ايام بس حتشوفي ردود افعال المزارعين اذا لم يؤخذ بهذه النصائح
اطيب امنياتي
|
Post: #11
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 05:28 AM
Parent: #3
فيسل هليل
Quote: الكاس الكاس
بختو في نصي
و من نصي هدية لشعبي
وراء وراء وراء |
وحياة النبي انت فاطي سطر عديل فاقد رباط بس
|
Post: #19
Title: Re: حتى لا يتشتت برة ساي - توجد وجهات نظر عملية
Author: حسن طه محمد
Date: 09-13-2012, 06:31 AM
Parent: #11
الطيب
سلام
وسؤال :
انت جنيت ... ما كنت كويس
آل دفاع شعبي آل
ياخي ديل فاضين ليك ... ديل عندهم مهمات تانية .. وبرضو آل سمسم آل
وانت لو زارع ليك سمسم .. اقترح عليك تشوف البتان والنيبال
والثعابين تشوف ليهم هنود .. احسن من يروضوا الثعابين
وبعدين بعد ما يحصدوا السمسم
النتيجة شنو وحقو حيروح وين
ما انت عارف وانا عارف والشعب السوداني كوووووووووووووولو عارف
ما السودان بيمتلك اكبر عدد من الماشية في افريقيا كوووووووووووووووووولها
وبعد دا كيلو اللحمة السودانية في السودان أغلي من دول الخليج
وبعد دا تقول لي سمسم
ومن هنا اهدي لك اغنية سمسم القضارف لعلها تنتشلك من الانت فيهو
الحق يا قريبي ابو الفياصل ود الخليل
صاحبك جن عديل ...
قال دفاع شعبي قال
|
Post: #20
Title: Re: حتى لا يتشتت برة ساي - توجد وجهات نظر عملية
Author: Alshafea Ibrahim
Date: 09-13-2012, 06:48 AM
Parent: #11
أخي الطيب
بالله عليك شفت كمية العساكر الموجودين في أبوحجار ... وقس على ذلك باقي المحليات الأخرى ... قاعدين في الضللة لا شغل ولا مشغلة يلعبوا في السيجة ويشربوا في الشاي وموية الأزيار الباردة .. أها ديل بس يجب إرسالهم بدفارتهم السمحة دي للخلاء والعائد النقدي للمحلية ووحداتهم العسكرية ( عسكري استثمار) ... لكن الخوف من العساكر شغلتهم فيها ( المضرة) والفوضى عايز ليك كم صول بين كل عشرة عساكر عشان الضبط وكده .. صدقني أولاد المدارس والجامعات هم الأصلح والأفضل خاصة ابناء القرى منهم يعني الإجازة طيلة لمدة شهرين ضرورة قصوى ...
نقص العمال معضلة كبرى تسبب في إرتفاع أسعار الطوب الأحمر مثلا وجعل اسعاره خرافية وغير منطقية ، والآن يهدد بفشل أفضل المواسم الزراعية على الإطلاق على الحكومة التفكير الجاد إن كان فيها خير في الاستفادة من محاصيل هذا الموسم ...
الشفيع
|
Post: #21
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 07:27 AM
Parent: #20
خالي ود البوب
امانة الشوق ليك بلا حدود
هههههههههههههههههههها مسنوووووووووووح نامن غلط
Quote: ياخي ديل فاضين ليك ... ديل عندهم مهمات تانية .. وبرضو آل سمسم آل
وانت لو زارع ليك سمسم .. اقترح عليك تشوف البتان والنيبال
والثعابين تشوف ليهم هنود .. احسن من يروضوا الثعابين
وبعدين بعد ما يحصدوا السمسم
النتيجة شنو وحقو حيروح وين |
يا خال الشرائح القلتها دي والجنسيات القلتها دي ما بتعرف تسوي البني كربو ( البني كربو هو عصيدة الذرة او الدخن وفطيرة حلاتا بملاح السمك الكوركي او السمك الجاف ) ولا بتأكل السمك الفسيخ - الفسيخ آل .......
Quote: ما السودان بيمتلك اكبر عدد من الماشية في افريقيا كوووووووووووووووووولها
وبعد دا كيلو اللحمة السودانية في السودان أغلي من دول الخليج |
يا زول ان شاء الله الخروف يبقى بخمسة ملايين وكيلو الضأن ب 200 الف . انتو يا ناس البندر عارفين الخروف بربوهو كيف؟ و بساهروا معاهو كيف؟ وبسربوا معاهو بالليل في الدبايب كيف ؟ ولا بكنّوهو كيف ؟ الكنّان انساهو مالكم بيهو يا البرابرة . الله يكنكم انتو بسلبة . يعني تغلوا لينا في العطور والهامبيرقرات وعايزين نديكم لحومنا وحطب طلحنا بالرخصة ؟ الرخصة ال ...
|
Post: #22
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 07:33 AM
Parent: #21
الشفيع ود ابراهيم
السنة ايامكم ساكوبيس سعر التور حصل خمسة ملايين والقش راااااااقد السنة دى بلاقي الجاية
Quote: بالله عليك شفت كمية العساكر الموجودين في أبوحجار ... وقس على ذلك باقي المحليات الأخرى ... قاعدين في الضللة لا شغل ولا مشغلة يلعبوا في السيجة ويشربوا في الشاي وموية الأزيار الباردة .. أها ديل بس يجب إرسالهم بدفارتهم السمحة دي للخلاء والعائد النقدي للمحلية ووحداتهم العسكرية ( عسكري استثمار) ... لكن الخوف من العساكر شغلتهم فيها ( المضرة) والفوضى عايز ليك كم صول بين كل عشرة عساكر عشان الضبط وكده .. صدقني أولاد المدارس والجامعات هم الأصلح والأفضل خاصة ابناء القرى منهم يعني الإجازة طيلة لمدة شهرين ضرورة قصوى ...
نقص العمال معضلة كبرى تسبب في إرتفاع أسعار الطوب الأحمر مثلا وجعل اسعاره خرافية وغير منطقية ، والآن يهدد بفشل أفضل المواسم الزراعية على الإطلاق على الحكومة التفكير الجاد إن كان فيها خير في الاستفادة من محاصيل هذا الموسم ... |
غايتو البوست غيرك والفحل ما في حد ناقش فيهو حاجة - ناس البندر ( حسن طه وفيسل هليل وغيرهم ) متلهمنو ساي وما ناقشين فيهو التكتحة .
انا يا الشفيع اخوى اعني مثل هولاء العساكر البلعبوا في السيجة - كلامك مليون المية صاح ديل لو مشوا السمسم بكسروهو ساي وبتوطوا فيهو ساي وبيعملوا عمل الضر .
|
Post: #23
Title: Re: حتى لا يتشتت برة ساي - توجد وجهات نظر عملية
Author: Abdlaziz Eisa
Date: 09-13-2012, 07:57 AM
Parent: #22
Quote:
حتى لا يتشتت برة ساي - |
قدر ما حاولت اتخيلك برئ ما قدرت!!!!!!!!!!!!!!
|
Post: #24
Title: Re: حتى لا يتشتت برة ساي - توجد وجهات نظر عملية
Author: حامد بدوي بشير
Date: 09-13-2012, 08:34 AM
Parent: #23
ود شيقوق الفنان،
كلامك كلو في محلو.
خايف على السمسم البغنو عليه في الرادي "ياسمسم القضارف ..." معاك حق. السمسم ثروة قومية وآلاف الأسر من مزارعين وعمال زراعيين وستات شاي وستات كسرة وستات مريسة وجنقجورا وعتالين وجمالين وحمالين وأصحاب لواري وسواقين ومساعدية و و و، كلهم عايشين على الله وعلى محصول السمسم.
وعلاقة القمرا بحصاد السمسم، علاقة علمية، مثل علاقتها بالمد والجذر. القمر لمن يكتمل بدر بعد 14 منزلة (شبه بها الأستاذ الشهيد محمود محمد طه منازل ركعتي الصلاة - كل ركعة سبعة مقامات - نعم القمر لمن يكتمل بدر بتقوى جاذبيتو على الأرض وكبسولات السمسم عندما تنضج بتكون مسبلة ودايرا ليها اي سبب او حركة أو دفعة عشان تطرشق (وتشتتو بره ساي).
وأهلك قالو عن السمسم: أب تقاة دلقان، الزرعك ندمان والما زرعك ندمان.
|
Post: #27
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 09:02 AM
Parent: #24
ود البدوي
Quote: خايف على السمسم البغنو عليه في الرادي "ياسمسم القضارف ..." معاك حق. السمسم ثروة قومية وآلاف الأسر من مزارعين وعمال زراعيين وستات شاي وستات كسرة وستات مريسة وجنقجورا وعتالين وجمالين وحمالين وأصحاب لواري وسواقين ومساعدية و و و، كلهم عايشين على الله وعلى محصول السمسم.
وعلاقة القمرا بحصاد السمسم، علاقة علمية، مثل علاقتها بالمد والجذر. القمر لمن يكتمل بدر بعد 14 منزلة (شبه بها الأستاذ الشهيد محمود محمد طه منازل ركعتي الصلاة - كل ركعة سبعة مقامات - نعم القمر لمن يكتمل بدر بتقوى جاذبيتو على الأرض وكبسولات السمسم عندما تنضج بتكون مسبلة ودايرا ليها اي سبب او حركة أو دفعة عشان تطرشق (وتشتتو بره ساي).
وأهلك قالو عن السمسم: أب تقانة دلقان، الزرعك ندمان والما زرعك ندمان. |
يا استاذنا والله ما قصرت ابدا في التفسير العلمي لعلاقة القمر - الكثيرون يظنون ان الشتيت بيكون في الايام المظلمة وليس العكس
يطول عمرك ويديك العافية
|
Post: #25
Title: Re: حتى لا يتشتت برة ساي - توجد وجهات نظر عملية
Author: أبوعبيدة محمد الأمين
Date: 09-13-2012, 08:55 AM
Parent: #23
حباً وكرامة يا أستاذ الطيب
وياليت قومي يسمعونك
|
Post: #28
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 09:04 AM
Parent: #25
Quote: حباً وكرامة يا أستاذ الطيب
وياليت قومي يسمعونك |
تسلم يا ابا عبيدة ان اضعف الايمان
|
Post: #26
Title: Re: حتى لا يتشتت برة ساي - توجد وجهات نظر عملية
Author: الطيب شيقوق
Date: 09-13-2012, 08:58 AM
Parent: #23
عزو
النية تؤثر في اليمين تخصيصا وتعميما، والسبب يقوم مقامها عند عدمها، ويدل عليها فيؤثر ما تؤثره، وهذا هو الذي يتعين الإفتاء به.
ما بتخلي سناحتك اصلا
|
|