ماذا يعنى وزيرالصحة بمقولة الباعوض المتواجد حاليا ليس ناقلا للملاريا

اصابتنى الدهشة وانا اقرا ما نسب الى وزير الصحة من قول

مفادة ان الناموس والباعوض المتواجد فى ولاية الخرطوم حاليا

غير ناقل للملاريا.

دهشتى نابعة من الكيفية التى عرف بها وزير الصحة هذة المعلومة

صاحبتها رغبة فى تفسير جادى لهذا التعليق من اصحاب العقول.

سلام


الباعوض الحائم ده جت ذكور ساكت انثي انوفلس مافيهو يعني

وثانيا انثي الانوفلس الحائمة دي عاقر ماعايزة ليها راجل عشان تتغذي للولادة

من ناحية علمية كلامو (صاح ) معظم البعوض الحايم دا من نوع الكيولكس غير الناقل للملاريا( بعوضة كبيرة وشينة) بعوض الانوفلس صغير و نحيف ورشيق وراقي و بحب الموية النظيفة و المكان النظيف يعني مثلا مامكن بتلقى في موية بلاعة ولا مجاري لكن ممكن يتلقى في ماسورة موية مكسورة - مكيف ماء مهمل - صهريج او برميل منسي او موية مطرة متجمعة في حتة فيها ضل على شوية شمس -بركة جنب النيل.
دا ما بنفي انو بعوض الانوفلس موجود وحايم وظروف تواجده في الخرطوم متوفرة
لم اسمع كلام الوزير لكن ان كان قال ذلك بهذه الصيغة فقد اخطأ وكان يجب ان يستخدم كلمة (معظم) في بداية الجملة
]دي صورة بعوض الكيولكس


ودي صورة بعوض الانوفلس

طريقة بسيطة للتفريق بين النوعين وهما على سطح الجدار (مع ملاحظة انها تنطبق فقط على البعوض الذ ي يرتاح داخل المنازل) توضحها الصورة ادناه
)

Quote: ماذا يعنى وزيرالصحة بمقولة الباعوض المتواجد حاليا ليس ناقلا للملاريا

كله ضكر ما فيهو إنتاية أنوفليس
جنى

ناموس قوات صديقة .. !!

بيعضى ولا ما بعضى ؟ الإجازة الفاتت بالسودان الناموس حرمنا نوم الليل
يزن فى راسنا ويعضى الليل كلو عذبنا عذاب .. بنوم بعد صلاة الصبح
بنقل ما بنقل ملاريا مسؤولى صحة البيئة مفروض يعملوا اللازم للقضاء
على الناموس.

زي ما اي شي باظ في البلد البعوض برضو بقى ما عندو ذمة
الملاريا دي بطل ينقلها و شغال زن ساي :)

معليش احتليت البوست بدون سلام لان مهتمة بموضوع الملاريا شديد فلك التحية
-------------
ليست كل الحميات ملاريا - ودا بخلي التشخيص السليم معمليا وسريرياُ عملية مهمة في المكافحة
حتى في حالة تواجد بعوض الاونوفليس كثافة تواجد الطفيل المسبب للملاريا (البلازموديوم) في بعوض الانوفلس مهمة في وبائية المرض يعني ممكن يكون عندنا انوفلس وما عندنا بلازموديوم حال العديد دول العالم- الانوفلس دا في القطب الشمالي بتلقى
دا ما بنفي انو مكافحة الانوفلس والبعوض عامة هي حجر الزاوية في القضاء على الملاريا لاانها اضعف الحلقات
الملاريا في حد ذاتها مرض ابعاده الاقتصادية و الاجتماعية مهمة جدا في انتشاره ودا الممكن نفسر بيه انتشاره في البلدان الفقيرة اكثر و الاقل وعيا اكثر وبين الفقراء و منخفضي الدخل اكثر من وجوده وسط الاغنياء مع وجود استثناءات بالطبع
مرض الملاريا من ناحية وبائية (وليست سريرية ) معقد جدا دا ما بتفي انو سريريا برضو مرض معقد وعندو مضاعفات ومشاكل في العلاج
ادي مثال بسيط
يعني مثلا لو عايزين نستخدم مبييد ضد الانوفلس في منطق معينة لازم ندرس اولا سلوك الحشرة بترتاح داخل المنازل ولا برا المنازل لانو دا حيحدد نوع المبيد (ذو اثر متبقيى residual في الحالة الاولى و فوري instant في الحالة الثانية) وحساسية الحشرة للمبيد المختار ودا شغل معمل بقوموا بيه ناس علم الحشرات الطبية medical entomology مع ضباط صحة البيئة
اماكن التوالد- كثافة الحشرة نفسها -عدد السكان في المنطفة
وجود الحيوانات (توفر مصدر غذاء للاناث احيانا)
و عدد اخر من العوامل
سلوك الناس- نشاطهم الاقتصادي -شكل منازلهم ونوع المباني - بنوموا بدري ولا بساهروا (بعوض النوفلس ينشط عادة بعد التاسعة مساء في السودان) - برا ولا جوة عندهم مراوح ولا - بستخدموا ناموسيات ولا لا- فئاتهم العمرية -مهنهم - التغير في سلوك الحشرة نفسه المناخ - اشهر السنة......الخ الخ

العيار اللي ما يصيب يدوش
جنى

Thnks to Nazik Eltayeb for the useful information...

mohamed elgadi

باعوض لنقل الشمارات لجهاز الامن
نازك بالمناسبة انا اخصائ براسيد ومدكل انتمولجي شايفك متجدعة

Quote: صاحبتها رغبة فى تفسير جادى لهذا التعليق من اصحاب العقول.

الملاريا انتشرت ومأمورية النقل انتهت وأصبح الباعوض عمالة زائدة وأحيل للصالح العام

بس الوزير ماكان يعمل كدا يفشي أسرار الحكومة بالشكل ده

تحياتي،
المشكلة في الفساد الإداري..
تُرصد عشرات الملايين من الدولارات
لمكافحة الملاريا,, والحال في كل سنة أسوأ
عن سابقتهــا.

شكراً نازك للمعلومات القيمة.. البعض لضيق
ذات اليد يأخذ علاج الملاريا دون فحص، والحال
يزداد سوءاً لأنه مصاب بالتايفويد.

ولماذا يكون في البلد باعوض سواء كان ناقلا للملاريا أو ناقلا للنفط ؟؟؟
أليس من واجبات الدولة محاربة القوارض والقوارص بأنواعها ؟؟؟
كلام غريب ومخجل إن ثبت ما قاله هكذا !!!
تحياتي

شكراً نازك الطيب على المعلومات القيمة

الأخ محمد الأمين محمد

Quote: نازك بالمناسبة انا اخصائ براسيد ومدكل انتمولجي شايفك متجدعة

أخصائي براسايد بالدا دجاجي يلقط الحب؟؟

الاخوة المتداخلون عاطر التحايا وجزيل الشكر على المعلومات القيمة

اذا سمحتم لى باضافة سؤال اخر فى ذات الصياغ!

اذا كيف نفسر تفشى اصابات الملاريا فى السودان الان ؟

Quote: نازك بالمناسبة انا اخصائ براسيد ومدكل انتمولجي شايفك متجدعة

ههههههه محمد الامين عليك الله خليني اتجدع وكان غلطت صلحي يمكن ننفع الاثنين ننفع الناس

----------------------

Quote: اذا كيف نفسر تفشى اصابات الملاريا فى السودان الان ؟

اخي هشام انشاء الله احتل ليكم في البوست دا و ادعو كل المختصين ان يتجدعوا بما فيهم اخي محمد الامين( the medical entomologist and the parasite specialist)
الموضوع كبير وكل الناس مفروض تشارك فيه مهندسين -اطباء- -معلمين- اختصاصي علم نفس وسلوك -اختصاصي علم المجتمع و السكان - اختصاصي الصحة العامة- مهنييين كل الناس (لمم اذكر الا القليل منهم ) عندها دور في مكافحة الملاريا
-------
مثال تاني هل لاحظتوا انو كل مكيفات الموية المصنعة في السودان ما عندها فتحة تصريف يمكن التحكم فيها بسهولة غير الفتحة اسفل المكيف- اي زول ممكن يتذكر صعوبة نظافة مكيف البيت من التراب و الطين بسبب صعوبة فتح و اغلاق هذه الفتحة الا بادوات خاصة (مفتاح انجليزي)
كان بيضر شنو لو في فتحة جانبية عندها قفل screw cap
.زي بتاع الغسالة مثلا ، دا حيخلي عملية النظافة سهلة و روتينية وبكدا ممكن اي زول في فترة عدم استخدام المكيف (الشتاء مثلا يفضي من الموية ) و بالتاي نتخلص من عشرات آلاف اماكن التوالد المنسية لبعوض الانوفلس وقس على ذلك دا في الحضر زائد توصيلات المياه العمومية المهترئة مثلا
في الريف خاصة الزراعي المشكلة اعمق و اكبر ولها علاقة بالنشاط الزراعي

الأخ هشام أمين وجميع المتداخلين

احتمال الوزير قاصد ان الباعوض بقى ينقل عســـل؟

معليش يا. جماعة. بس رد سريع لأخى فتحى

لو كان صحى. الناموس بينقل عسل الوزير كان كتم على الموضوع وعمل توكيل حصرى ليهو

هههههه
والله يا هشام الوزير ده حيرنا يوم يقول الدكاتره زادو عن الحاجة وخليهم يهاجروا ويوم ثاني يطلع لينا بالباعوض ما ينقل ملاريا
إحتمال بكره يجيب سيرة الجراد حيقل شنو؟