سِــتــي نُــوُّر ...

مدينة إدمنتون... صيف العام 1992.
إدمنتون مدينة جميلة خاصةً في الصيف. قضيت فيها جزء من غربتي
وسط أصدقاء صارو أهل بحمد الله.

william hawrelak park
إتفقنا علي أن نقضي بعض الوقت في هذه الحديقة. كنا فئة قليلة
من السودانيين في ذلك الوقت. حضرت هي بصحبة والدها، وكانت
أوّل مرّة أراها، وبمجرّد أن رايتها إنسحبت كلّ أفكاري من ذلك
المكان وتوجهت نحو البلد، فالبنت ذآت الأربعة عشر ربيع في
ذلك الوقت كانت في ملآمحها قروية لا تخفى علي من عاش مع
بنات القرية. كأنها حضرت للحديقة من قرية في أقصى الشمال،
وزادها إلتصاقاً بالقرية إسمها عندما عرفنا عليها والدها قائلاً:
دي بِنتي سِتي نُوّر.

ستي نوُّر ...
شتلة من أرض الشمال
قايمة فوق كيمان جليّد!!!؟
شوفو كيف القسمة جابت
بِذرة من بلداً بعيد
شايلة روح ترهاقا جُبة
وإنكست في العم سآم
وإنبلج من صدرو نوُّر
يحكي لكلَّ الدِهوّر
قصة الشتلة المفرهدة ستي نوّ...
نابعة من أعرق حضارة
لونها خلطة
من سمار أهلي البيرهج
ومن صِبيات النصارى
حاملة طِيبة أرض طاهرة
خلّت الألباب حيارى
تايهة تسأل، آيه تكون؟؟؟
بس ملآك؟؟؟
واللآ من الجنّة حُوّر؟؟؟
فوقو يا عقول يا سُكارى
دي سِتي نُوّر...

بطبايعا بصفاتا،
ستي نُوّر قريتنا زآتا
إبتسامتا نُور صباحا
بتبعث الأمل الجميل
في نفِس تربال مكافِح
خلآ شتلتو فوق طرف
جدول بيمرح
مآخدة رآحة
ووسّد الراس الضُرآع
أخدلو دقسة تحت ضراها
وصوتا صوّت قمرية حآنة
علي الصغار ضمّت جناحا
نظّمت عُشا الصغير
فوق شتلة التربآل براها
وخلّت النسمة الرقيقة
بِشيش تطوُّف
سابحة في وسط الجروف
تلثُم أكمام الزهور
وتمسح احزآن اليتامى
لمّ تبقى النسمة زآتا
هي ستي نُوُّر...

ستي نور اسم واحدة حبوتنا في دنقلا
شكلنا داخلين على موضوع دسم ذو شجون
بانتظارك يا مدير

وجهِك المُشرق وحآتِك
صافي يلصِف زي رِمال
لمّ يعكس فيها نُور القمرا
تلمع في التلآل
يحكي لي عن صُفرة القمح
المصوبر في التقاوي
وشعرك المجدول ظلآم حِلتنا
والحبوبة سرحت في الحكاوي
تحكي فاطنة السمحة
لي وكت السحُوّر
وفاطنة يا حبوبة في غربتنا
بِنتِك سِتي نُوّر...
فيك بشوق كُلّ الأهل
داقسين تِحِت هدب الفريق
وفيك بشوف كلما التسآب
هدم البيوت نجدة غريق
فيك ملآمح من بيوتنا
الرآسخة تمثال للبساطة
في ضِليلآ الرآمي مجلس جبنة
وآخر إنبِساطة
وناس نفوسهم طيّبة
ما فيهُم ضجوّر
ديل أهلك الصامدين هناك
يا سِتي نُوّر...
نُخبة من فرسان
مسرّجة فوق ضُهور الصبر
في زمناً صعيّب
شاقة تيار الزمن رغم القساوة
خايضة في وسط اللهِيّب
تترك الشقى في قفاها
لو صِبِح في الدآر غريب
وتبدو بسمة مرآبضة فوق
كُلّ الثغوّر زي بِسيمتِك
يا ملآمح من بلآدنا
يا سِتي نُوّر...

هادي طبعِك
زيو زي النيل في
ساعات المغارِب
صافي مُتقطّعِ دوآير
والطيور الطايرة فوقو
تدآعبو بي جِنحينا
يستمتع ويتشكل دوآير
في ملآمحِك خُدرة
زي خُدرة جُروفنا
كلما حاولتَ اوصِف ودآعتِك
خِجلت إتوآرت حُروفنا
إنت يا أجمل صبيّة
فايحة زي ريحة
البرم عِزّ الخريف
شالتا النسمة الوديّعة
وعطّرت كُلّ الجنايِن
إزدهت أقبل ربيعا
وحلّت اسرآب الفراش
زي مهرجان الوآن
تغازل في الزهور
فتّحت كل البرآعم
وإنفجر شلآل عطّوّر
ضمّخ القرية
البترمُزي ليها إنت
يا سِتي نُوّر...

عانقت افريقيا قِمم الروكي،
فتفاعلت سُحُب الحرآرة والبُرُودة
واعتلت في الجو،
فصطخب الفضاء
بلآمع البرق
وأصوآت الرُعُودة،
فجاش صدر الأرض
بالماء الزُلآل،
فأنبت شتلة آية من الجمال
في لآفح الحر والهجير
تهِب النسيم، تهِب الظِلآل
في موجة البرد الفظيع
هي الدثار من الجليّد
في وآقع الغُربة الأليم
تصبح القلب الرحيم
إنها بلدي الحبيب
عِزّ الموآسِم
في زفّة الأفرآح تشارك،
وبرضو لألآم تقاسِم
إنها حلفا ونِمُولي
إنها الخرطوم تنضح بالجمال
إنها القرية الصغيرة الحُلوة
في أرض الشمال
وهي رمز الحُب
في أرض الجذور
أحلى شتلة من بلآد النيل وحآتكُم
زيّنت أرض البراري
هي سِتي نُوّر...
.
.
.
.
ود المدير...

Quote: ستي نور اسم واحدة حبوتنا في دنقلا شكلنا داخلين على موضوع دسم ذو شجون بانتظارك يا مدير

أهلاً بيك يا مهدي صلآح في سودانيز،
وعاطر التحايا لحبوبتك في دنقلا.

مودتي...

وناس ستي نور
كتلو ال######
كتلوهـو مجبورين غصب
مـامن نياحتو ولاسعــر
ظنو ال######...
بين الفريق حـامي البطينين اللعب
آخـر الليالي من البيوت
قافل الطـريق سـادي الدرب
لاخواتهـا قالت ستي نــور
مــادام في امــان
والناس بخير
سعي الكلاب في الحله شـــر
هـوهيـوا بعزاق للأجــر
أحسن تعيــش بي راحتها
تمشي الجنـاين .. يالبحــر
إن كان تطفش للصبـار
واب عفنه تشغـل للورر
الحله يكفيهـا الولاد
يكفي البهيمـات..الجـداد
يكفي الطيـور
الفي الشدر
الحله يكفيهـا البشر
كان جـاها شر
الحله يكفيهـا الحصانه الفيهـا
مـادارت كجـر
حـرس الزرائب؟
شِن فضـل
فِطـن الزرائب غير بعـر؟!
صنت شويتين ستي نـور
شالت حجـر وجدعـت حجـر
جدعـت حجـر وشالت حجـر
وقـالت:-
قرايبهـا ذات ليل
يمكـن يجـوها من السفر
أو زول غريب
حـاربو الدليـل
عـابر سبيـل زنقـو المطـر
يقصـد رواكيبهم جَـوَر
أول شـي يتلقى ال######
أللا بيرحـب لا بيبش
وليشن يتـورنا ال########
وليش ال###### يبقالـنا وش؟؟؟
وكان ال###### لازم يمـوت
الطفشوهـو حـرن يطِش
وكان ال###### لازم يمـوت
شـان المحبه الفي القلـب
تحيـا
وخيوط زمـن الوصـال
لا تنسلب لا تنقلب
ومـــات ال######؟

http://www.postpoems.org/authors/sudan/poem/804506

شكراً معاوية إذ جعلتني أعود لقراءة حميد مرة أخري

Quote: شكراً معاوية إذ جعلتني أعود لقراءة حميد مرة أخري

سلآمات يا خضر.
سنظل نقرأ حميد علي مرّ الدهور والأجيال،
له الرحمة.

أهديك هذا النص:



يا عازة، كيف الشوّرة عاد؟
هم السنين الليلة زآد!
رضينا بعِيشة الكفآف
داهمنا سيل من غير مِيعآد!
البرقا شالها معاهو فآت
خلآنا بايتين القوا
بين الحياة وبين الممات...
يا محمد احمد تعترض!
ورِزِقنا عِن خالق العباد!؟
يا ربي تلزمنا السُكآت...
استغفر الله العظيم
يالعازة ما قصدي اعتراض

بس عارفة كان السيل
نزل وادينا خدّر للنبات
والعيش فدع قندولو
فرحو بي الجِنآت
والطير شِبِع من نقدو
فوق قصباتو بآت
والبرقا درّت وولدت
والخير غمر وادينا زآد...
كان جونا حُكآم السجم
كان جونا حُكآم الرماد
نهبونا في وضح النهار
حتي اللبن قسموهو
مع السخل الصغار
خدمة يمين
وعرق جبين
في لحظة من إِيدينا طآر
وحاكم البلد داقلوا طآر
يعرض تملي ومنتشي
ماراعى لطفالنا الصغار...
عآد شِن نسوي يالخزين؟
ظُلماً وقع فوق راسنا
من حُكماً ضنين
نصبر مِتِل ايوب صبر
يمكن نواتي الصابرين
يمكن نرافق الصالحين
ما قالوا حُكامنا بيجو
يفقدونا يا دُخري السنين!؟
يالعازة ماظنيتو فايقين
شان يوم يفكروا
في الغلآبا الكادحين
شان يطرو ناس
في السهلة قاعدين

ايّه يعني زينا لو يموت؟!
ويعيشو سادة مُنعمين!
ومُدللين!،
وممسحين!،
ومنعمين!
ايّه يعني زينا لو يموت!؟
ويكونوا فيها مُخلدين؟
مُترفعين،
ومقندفين،
ومهندمين،
ومنفخين!
يالعازة مافرقت معاهم
لو كان نعيش فوق البسيطة
مشردين،
ومقطعين،
ومبشتنين،
ايّه يعني تفرق
لو نموت؟
ماهُم بيرقصوا مُنتشين!

يالدُخري بس لينا الكريم
شاحدآهو رب العالمين
يلفى الغلآبة الكادحين،
ويهِد حُصون الظالمين،
ويقصِّر اجل الحاكمين،
ويكفينا شر حُكماً لعين...
يا العازة ما عرفنا الحرآم
بيقبل دُعآك خالق الأنآم
لا تدعي يا بنت الكِرآم...
استغفر الله العظيم
يا ربي تغفر لينا
ذنبنا يا كريم،
وتلزِمنا صبر المُرسلين،
وتكفينا شر حُكماً لعيّن.
استغفر الله العظيم.
استغفر الله العظيم.
استغفر الله العظيم...
.
.
.
ود المدير...

الشريف معاوية
من العنوان أحسست أنت سوف تفتح أحد الكنوز الموروثة من حبوباتنا المديرات
وجدتك رأيتهن في نفحة منهن جاءتك تحدثك بحديثهن
جعلها الله من الصالحات

حبوبتنا الشريفة ستي نور والدة الحسيب النسيب السيد علي الميرغني
وفي عهدها الشريفة ستي مريم
والشريفة ستي نفيسة
وكل الأسامي بعدهن أصبحت ستي نور وستي مريم وستي نفيسة وستنا
وكل الأماني صلاح يكافئ صلاحهن ونعمة أسبغها الكريم...


مرة مشينا نطلع جنسية جواز لبنت عمتي ستنور عشان تحصل زوجها في الخارج
في الجوازات اقترح الضابط أن يكتب الأسم نورة لسبب عدم اعتماد أسماء مركبة
قلنا ليه ده اسم واحد مش مركب ( ستنور ) قال يعني قايلين أول مرة نسمعو عشان تورونا ليه هو كل يوم جايننا بيه ناس دايرين نطلع ليكم جنسية وجواز باسم نورة بنطلعو ليكم دايرين تجيبو اسم تاني امشو جيبو اوراقكم ... قلنا ليه خلاص نورة نورة ... عرفنا خلاص ... يانورة تعالي جاي وقعي هنا..

Quote: الشريف معاوية من العنوان أحسست أنت سوف تفتح أحد الكنوز الموروثة من حبوباتنا المديرات وجدتك رأيتهن في نفحة منهن جاءتك تحدثك بحديثهن جعلها الله من الصالحات حبوبتنا الشريفة ستي نور والدة الحسيب النسيب السيد علي الميرغني وفي عهدها الشريفة ستي مريم والشريفة ستي نفيسة وكل الأسامي بعدهن أصبحت ستي نور وستي مريم وستي نفيسة وستنا وكل الأماني صلاح يكافئ صلاحهن ونعمة أسبغها الكريم...

المسافر سِري،
سلآمات.

لقد أصبت كبد الحقيقة.
ستي نور دي أبوها شايقي وأُمها كندية، وأبوها سماها علي أُمو،
وأُمو مسمينها علي حبوبتنا والدة السيّد علي المرغني.
من الباوقة اذكر ستي نور بت عبد الله.
إسم ستي نور إسم جميل، وحتي عندما يُخفف إلي نور أو نورا
برضو جميل.

لك كامل مودتي وإحترامي...