أعذرونى يا ناس ...... وحنّو على .... والكاتب بشرى مبارك ود السقاى

الاخوان الاعزاء بجمييييع المنتديات التى أشارك فيها تحياتى وأشواقى ولاشك أن غيابى عنكم (أضنانى ) ورأيت أن تجدوا لى العذر من خلال هذا البوست . ثالث أيام العيد فى بيرمنجهام بيريطانيا الثلاثاء قدّم لنا الاخ والجار السابق أبوبكر بشرى السيد الدعوة للغداء بمناسبة زيارة صديق له مع أسرته من النرويج وبالفعل قضينا وقتاً طيباً وقد أقترح بكرى أن ندوّر لينا عشرة أربعتاشر فأشترطت على الاخوان الاربعة أن لاينفّوت الصلاة فى المسجد المجاور لشقة أبوبكر بشرى خمسة دقائق بالارجل وقد كان ، للأسف الاسيف كانت العشرات تلاته عشرات كلها شلتها أنا ولم أكتفى بذلك بل جريت بكرى صاحب المنزل خمسين مرتين عندما لعبنا رأس فى أخر العشرة التالتة بعد أن حرق الاخوان يعقوب الضيف وأبوبكر محمد على الشيخ وقد أشتاط أبوبكر بشرى السيد غضباً ومازال يتوعدنى بالرد . اليوم التانى كانت العزومة عندى وكاد أبوبكر أن يتسدى ولكن أخذ عشرة واحده وأخذت أنا عشره وأتسدى خمسين واحده !!!!!، اليوم الثالث لم نلعب فى شقة أبوبكر محمد على الشيخ وأكتفينا بالونسة عن تجاربنا فى أروبا ومستقبل وجودنا وحلول المستقبل والتى كانت مع الوضع الراهن فى السودان كلها تشير الى البقاء أطول فترة فى المهاجر الاوربية ونسأل الله أن ينصلح حال السودان . الامر لم يقتصر بالانشغال بالضيوف والعوازيم والعشرات الكوشتينية فقد وصلنى (الرقم الوطنى من الاخ بكرى أبوبكر ) صاحب موقع سودانيز أون لاين وقلت كدى دخلت فى الموقع الدخول الماخمج واتجدعت فى اليوم الاول ب20 موضوع والحالة وقفنى الحاسب الالى وكنت ناوى (اخفّس ) التلاتين موضوع فى اليوم كعادتى حسب ما تعرفونى عندما أشارك فى المنتدى الجديد !!!. صراحة المنتدى حوش كبير تسلم وترد على كل أهل السودان نامن تقول أنا لاقييت السودان كلو فى حوش بكرى أبوصلعة !! عشان كدى والله ما أدس عليكم (رطبت ورخمت ورديت وما خليت !!!!) شىء كورة وشىء حبييب نورة ..... وشىء هيثم مصطفى وشىء الباترا وشىء شرطة قديمة وجديدة ولواءات وتحيات وحكمدارات، وشىء حكومة مؤقته !! وحتى بين السُره والركبة فى!!!!! ولكن ما فى داعى أجييب سيرتو أصلو الناس هناك تكتب ماتشاء وترد ماتشاء وماخده راحته بالكامل أظن مافى مقص رقيب ولا نقيب!!!!!! . لذلك قلت أوريكم الحاصل على وعشان تعذرونى لان الجديد شديد وأسع عندى فى سودانيز أون لاين بس 60 موضوع تقريباً !! فى 5 أيام علماً بأن أقل مواضيع عندى فى المنتديات الاخرى والتى فى جملتها تصل ال30 منتدى من 400 ومافوق وأعلى مواضيع فى منتدى السقاى ما يفوق ال6000 خليتكم عافية وتعليقكم وردودكم تهمنى ومن بيرمنجهام سلام سلام سلام .

Quote: الاخوان الاعزاء بجمييييع المنتديات التى أشارك فيها تحياتى وأشواقى ولاشك أن غيابى عنكم (أضنانى )

هلا
ولكن
ارجو ان لا تكون( كاتب ، ومسرحى ، ومخرج وممثل وصحفى مقيم فى بريطانيا )
كما اخر لان البلد لا تحتمل ( غايتو المراقة هى غيابى عنكم اضنانى ) دى المراقة وحيات الرب
عموما باقى الموضوع عبارة عن حريق فى حريق غايتو الله يستر من الجايات
ولا كــــــــــــــيف









قاسم المهداوى

Quote: [ هلا ولكن ارجو ان لا تكون( كاتب ، ومسرحى ، ومخرج وممثل وصحفى مقيم فى بريطانيا ) كما اخر لان البلد لا تحتمل ( غايتو المراقة هى غيابى عنكم اضنانى ) دى المراقة وحيات الرب عموما باقى الموضوع عبارة عن حريق فى حريق غايتو الله يستر من الجايات ولا كــــــــــــــيف

والله لاعلاقة لى بالمسرح ولا الاخراج ولا صحفى لكن لى علاقة سابقة بفتح البلاغات وختم الجوازات وعمل التأشيرات وتصديق الضمانات !! والان عملى برضو له علاقة بالامن وحفظ النظام فى شركات الامن الخاص فى بيريطانيا وشكراً على مرورك !!! الكتابة عند ضباط الشرطة السابقين هواية وليست مهنه وأتمنى أن تكون هوايتى غير مزعجة لكم وتحياتى مره أخرى .

جنابو
ما تحصل صلاح غريبة ...:)

مبارك ود السقاي
سلامات
ومرحبا بك واافرحتنا بيك
قلم مميز
تقبل تحياتي

جنابو
ما تحصل صلاح غريبة...:)

ما شاء الله يا سعادتك عينا باردة
ومعذرة على الترحيب المتأخر

واتجدعت فى اليوم الاول ب20 موضوع
_________________________________

20 موضوع ولا 20 مداخلة؟؟

غايتو لو صح كلامك بيكون عندك مكتبة في سودانيزاونلاين علي يوم 20 أكتوبر..


مرحب بك..

يا منى خوجلى تحياتى ما تزيدى الحكاية يوم وتخليها يوم 21 إكتوبر !! وشنو مواضيعى فى الراكوبة ما عاجباك والله شنو ؟؟ ما علقت نامن فترتى !!! قصدى 20 موضوع مع المداخلات لاننى لا أريد أن أكتب مواضيعى دون أن أتداخل مع الاخرين !! زى يوم العيد الواحد بياكل (لقيماتو ولقيمات الجيران وكذلك الشاى ده عندنا فى السقاى فى صالون المبارك ود إدريس ) وكل سنه وإنتو طبيببن !! بمناسبة الزيادة بتاعة اليوم دى يا منى خوجلى أقول ليكم نكته !! عندنا واحد فى الحله بتاع محن وعندو بقالة وشعال معاهو عامل إسمو (خميس ) فمره واحد من الزباين دخل فى غلاط من صاحب الدكان فقال له القروش سلمتها لى جمعة !! فرد عليه يا زوول الزول زدتو يوم !! أوعه تكون القروش جبتها زايده كمان !!!!.

يا حافظ أنقابو تحياتى !!! يا أخوى إنت صلاخ غريبة ديل (تيمان )!!!؟؟؟!! شنو شابكنى مرتين ما تحصل صلاح غريبة؟؟؟ حتى هممت أننى سوف أحصل لى (تيمان عطبرة ) بعدين إنت ما كنت معانا فى بوست الباترا (تضرع ساكت ) ما قلنا ليك تلت التلاته كم !! والله أرفع الموضوع لسعادة اللواء عمر على حسن !!! قال صلاح غريبة قال !! .

باسط المكى لك عاطر تحياتى ... مرورك الرائع دايماً يشجعنى على المواصله فبارك الله فيك ، فهل فعلاً إضافة حقيقية أم الحكاية لاتعدو تشجيع من جانبك لكل ضيف جديد وبرضو لك ودى وتحياتى وأتمنى أن أكون عند حسن ظنك بى ومن بيرمنجهام سلام سلام سلام .

اهلا بود السقاى ..
هذا المتميز فيه شئ من صديق مهدى و بعض من زهير عثمان ..
اضافة حقيقية لكن يا اخوى خفف العيار شوية ..
خليك من ( بين السرة و الركبة ) و خليها مستورة ..

شكلنا كدة موعودين بصديق مهدي جديد

مبدئيا كده حبابك في هذا الحوش بس نصيحة أخوية كثرة البوستات وكثرة الردود لا تدل علي أن العضو كاتب مرموق

أو مثقف والناس هنا جنها وجن الزول المعاط معليش أعذرني لصراحتي أسع نحن دخلنا شنو يعزموك ولا تلعب سكج بكج؟

دا أسموا إهدار باندويث في الفاضي ، لو كل عضو دا جاء فتح ليهوا بوست واحد في اليوم يحكي فيها مغامراتوا

ماحنخلص فبليز راعي في ناس هنا عندهم أرتفاع في ضغط الدم وسكري وفشل كلوي .

والله يا أخى عادل الباهى رأيك جدير بالاحترام ومراعاه المرضى واجبه ولك تحياتى .

يا مرحب يا اهلا وسهلا
مرحب بك بن عمي
حللت اهلا ونزلت سهلا

ماشاء الله اي ريح طيبة حملت الينا

يا اخي انا سعيد جدا وصدقني ينبغي ان اكون اول من يرحب بك

اكرر سعادتي بوجودك بيننا في سودانيزاون لاين ونشكر الاخ بكري وكل من اتى بكم الينا الاخ بشرى بن عمي مرحبا بك

الاخ الكريم ود السقاي الف مرحب بيك في سودانيز وان شاء الله يطيب لك المقام وعذرا للترحيب المتاخر

ـــــــــــ

لدي ملاحظة بسيطة علي عناوين مواضيعك , وهي كتابتك اسمك في عناوين مواضيعك , وللاسف هي عادة تنفر الناس من قراءة المواضيع لا حاجة للشخص لوضع اسمه واقحامه اقحاما في عناوين مواضيعه لان الاسم تلقائيا ينزل مع الموضوع وعند فتح الموضوع يكون الاسم علي يمين الشاشة , لذا لا داعي لكتابته مرة ثالثة داخل العنوان , البعض علق علي هذا الامر سابقا بانها عادة نرجسية
, اظن ان الامر لديك بسيط وتلقائي لذا اعذرني علي هذه الملاحظة

ود السقاي مرحب بيك و كل سنة و انت طيب

انت ياخوي داير الحق و الله الجنبو

اولا اذا كانت دي عينة بوستاتك اسمح لي اقول ليك انت بالجد اضافه عددية و ليست نوعية لهذا البورد و أصحابك
ديل بيجاملوك ساكت.

ثانيا في ناس هنا ليهم اكثر من عشرة سنوات و ما فتحوا 20 بوست لكنهم أثروا حياتنا الإسفيرية و استفدنا
من مواضيعهم غاية الفائدة يعني القصة كيف و لا حوجة هنا للكم.

ثالثا و الله أنا مستغرب إنت بتلقي الزمن دا كلو وين عشان تفتح البوستات دي كلها
غايتو أنا ما لاقي زمن أمر حتي علي العناوين و بحتاج كتير ( أصرج ) من بعض البراميل الفارغة التي
تحدث جلبة عشان أكسب زمني في المفيد من البوستات.

فبالله يا أخوي اتوهط كدا و روق المنقة و حضر موضوعك و جهز ردودك و كشّف ما يكون في زول سبقك عشان أنا و غيري
ما ( نصرج ) و طوالي نجي خاشين ودا بديك مشاهدات زيادة.

أنا عندي معيار لجودة البوستات ( حقي براي ) و هو إنو لو كان البوست غير خبري وعنوانه خالي من الإثارة و التشويق
و الصور و الفيديو طوالي أضرب عدد الردود في 20 عشان تديك عدد المشاهدات فلو كانت أقل من حاصل الضرب أعلم أن هنالك
ما يجب مراجعته.

و تاني مرحب بيك

ود السقاي

ضرستنا

اسمعني

تعال لينا عمرة في جدة

عشان نجرك خمسين تنسيك الكتشينة ذاتو



نحن مرجب بك يا عزيزي

شكراً لكم جميعاً على مروركم ولاشك أن التعليق على الموضوع يساعد الكاتب كثيراً على معرفة الامزجة والاذواق !! فتجد من يقدّم لك الدعوة للحضور لجدة لكى (يجرك خمسين )!!!! وتجد من يقول لك ذنبنا شنو تحكى لينا برنامج العيد عندكم وتلعب سكج بكج أو سيجة أو كشتينة ما عندنا بيك شغله وما فى داعى (تهرينا )!!!!! ومنهم من يقول عندو معيار خاص يزن به البوستات وعلى العموم كلو يصب فى خانة الاطلاع والتعليق ومنكم نستفيد !! وختاماً لا أغادر إلا أن أشكركم جميعا على المرور والذى بمقياس المواضيع مرور مقدر ومشكورين عليه وبارك الله فيكم .