ما بنَكْسِر الْقَلَم الْبِقِيفْلَكْ في الْحَلِقْ

ما بنَكْسِر الْقَلَم الْبِقِيفْلَكْ في الْحَلِقْ

“A good pen can also remind us of the happiest moments in our lives, bring noble ideas into our dens, our blood and our souls. It can turn tragedy into hope and victory.”- Nelson Mandela

أكتِبْ أسَامِينا،
وسَمِّينا الْبِشِقُّو عَصا السُّكُوت
سَجِّلْ وقولْ:
ديلْ الْبِمُرْقُو على نوامِيس الْخُضُوع
كانْ جُوَّه ما خْتِينا الثَّبَاتْ
أو بَرَّا في الْمنفى / الرُّجُوع
ما بنَكْسِر الْقَلَم الْبِقِيفْلَكْ في الْحَلِقْ
"والنِّيِلْ مِدَادْ
النِّيِلْ مِدَادْ" هذي الْحُروف
الْما بتَهَادْنَكْ
لو يطُول بينا النِّزالْ
وما بنِنْكَسِرْ
مهما التَّنابْلَة تشِذْ
وتَفْجُرْ في الضَّلالْ

قَدْر الفي إيدينا بنغرِسُو
شَتلَةْ عَزِمْ
نخلَةْ نضالْ
وتَبَلْدِي صامِد زي جِبالْ

عَلِّقْ مشانْقَك
لَيْ قصايدنا الأَبَتْ
تدخٌلْ بيوت الطاعة
أوْ
تِتضارى مِنْ سوطك
ولا
تِتجارى في رَكْبَكْ
أَبَتْ
غير تمسِك الْجَمْرَة
وتقِيدْ
الْفِكْرَة لَيْ بُكْرَة
وتجالِدْ في الْمُحالْ
لامِنْ يِلين لَينا الْحَجَرْ
لامِنْ يِبين لَينا الْفَجُرْ

نَكْتِبْ نَرَتِّبْ حَرْفَنا
راكْزِين نَنظِّمْ صَفَّنا
شَايفِينْ سقُوطَكْ زي رجوع الطَّرْفِ
أوْ
شَايفِينْ مُرُوقْنا على الشَّمِسْ
أولاد حياةْ
وبَنات أمَلْ .......
هِمَّتْنَا أعلى مِن النَّشيد
ومَدَدْنا في كُلّْ يومْ بِزِيد
وبلَدْنا ناهْضَة مِنْ الرَّماد
أجمَل بِلاد
أَهُو دا الْحِلِمْ
البيهو شاهْرِين الْقَلَمْ
نكتِبْ ويِكتِبْنا الصباحْ
نفتح عيونَّا على حَدَايقو،
على بلَدْ
حَدَّادي فارِد كَمْ جَنَاحْ
مَدَّادي لَيْ آخِر بَرَاحْ
أَهُو دا الْقَلَمْ
البيهو شاهْرِين الْحِلِمْ
أَهُو دا الْقَلَمْ
أَهُو دا الْقَلَمْ
أَهُو دا الْقَلَمْ .......

عصام عيسى رجب
الخميس 23 أغسطس 2012 م

Quote: شَايفِينْ مُرُوقْنا على الشَّمِسْ أولاد حياةْ وبَنات أمَلْ ....... هِمَّتْنَا أعلى مِن النَّشيد ومَدَدْنا في كُلّْ يومْ بِزِيد وبلَدْنا ناهْضَة مِنْ الرَّماد أجمَل بِلاد أَهُو دا الْحِلِمْ البيهو شاهْرِين الْقَلَمْ نكتِبْ ويِكتِبْنا الصباحْ نفتح عيونَّا على حَدَايقو، على بلَدْ حَدَّادي فارِد كَمْ جَنَاحْ مَدَّادي لَيْ آخِر بَرَاحْ أَهُو دا الْقَلَمْ البيهو شاهْرِين الْحِلِمْ أَهُو دا الْقَلَمْ أَهُو دا الْقَلَمْ أَهُو دا الْقَلَمْ .......

عصام انت ما شاعر اديب وبس
انت تشكيلي وموسيقي ومهندس وطبيب
وياسلام عليك ياخ

الموسيقار الجميل جَدْ يوسف الموصلي،

الله يديك العافية على قدر جمالك ومحبّتك

تعرف لما فنّان جميل زيك يحِب قصيدة بكل هذا الصِدق والدفء، تاني القصيدة ما دايرة شيْ تَبْ .... اللهم إلا كان الغُنا .... إن شاء الله تنقرش فيك وتر جوَّاني و .....

محبّتي يا جميل: You Made My Day

Quote: الموسيقار الجميل جَدْ يوسف الموصلي، الله يديك العافية على قدر جمالك ومحبّتك تعرف لما فنّان جميل زيك يحِب قصيدة بكل هذا الصِدق والدفء، تاني القصيدة ما دايرة شيْ تَبْ .... اللهم إلا كان الغُنا .... إن شاء الله تنقرش فيك وتر جوَّاني و .....

الحبيب عصام
عندما يكون النص جميلا فان اللحون تتدفق مثل
نهر المولداو آو النيل الازرق في موسم الامطار
تحياتي

حبيب اللحن والنَّمةالموصلي،
اللحن، وإنتَ سِيد العارفين، زي الذِّكْر للإنسان، عُمر تاني وتالت كمان ..... وفي إنتظار المطَر والنَّهْر .....

Quote: ديلْ الْبِمُرْقُو على نوامِيس الْخُضُوع كانْ جُوَّه ما خْتِينا الثَّبَاتْ أو بَرَّا في الْمنفى / الرُّجُوع ما بنَكْسِر الْقَلَم الْبِقِيفْلَكْ في الْحَلِقْ

>
>
>
استاذ رجب ...
لك التلويح وانت تستشرف اليقين

عصام يا جميل

كدأبك دوماً تنشد الغد.

إلى أن أعود

كل عام وأنت أشعر/أصَح ومعافى.

تحياتي

اها دي قصيدة و رب الكعبة و عكاظ و عبقر والحاردلو
وتستحق يا استاذنا الموصلي تلحينك

تمام ياقصي
ويشرفني ذلك
تحياتي لك وله

شكراً بجمالِك يا قُصي،

دي محبَّة تخلِّي القلم يطرب ويكتب كمان وكمان

مش في عاشق زمااااان قال:

وَإِنِّي لَتَعْرُونِي لِذِكْرَاكِ هِزَّةٌ .... كَمَا انْتَفَضَ العُصْفُورُ بَلَّلَهُ القَطْرُ

هكذا إذاً انتفض قلبي وقلمي ..... وبَسْ

ياااااااا مدني،
وينك ياااااخ .....!!!!!
كل سنة وأنتَ أبهى قصيدة .... وأجمل روحاً أيُّها الشاعِرُ الجمييييل

Quote: شَايفِينْ مُرُوقْنا على الشَّمِسْ أولاد حياةْ وبَنات أمَلْ ....... هِمَّتْنَا أعلى مِن النَّشيد ومَدَدْنا في كُلّْ يومْ بِزِيد وبلَدْنا ناهْضَة مِنْ الرَّماد أجمَل بِلاد

يديك ألف جذوة أمل .. وأبواق تصلصل بالنشيد
ووعد... ليك علينا ..يا بلد ..
عيونا تلقط من الأرض بصيص نهارا الإنكسر
وبكرة بعين قوية نحدق جوة عين الشمس

تسلم يا رجب على هذا النص البديع ...الملئ بالأمل والتفاؤل ...

نَكْتِبْ نَرَتِّبْ حَرْفَنا
راكْزِين نَنظِّمْ صَفَّنا
شَايفِينْ سقُوطَكْ زي رجوع الطَّرْفِ
أوْ
شَايفِينْ مُرُوقْنا على الشَّمِسْ
أولاد حياةْ
وبَنات أمَلْ .......



وانا اصدق نبوءة الشاعر شكرا عصام

العزيز محمد سِيد أحمد،

يا اااااارب، وصَدَق الشاعر والمُغني لمَّا غَنُّوا:

نِحنا الْبِنحقِّقْ أمانِينا .......

"وبكرة بعين قوية نحدق جوة عين الشمس ....."

نحدِّق أخوي إبراهيم ونُص وخمسة كمان ....

زمان قبل ما يزيد من عِقدين من الزمان، كتبت قصيدة اسمها: سِتُ حِكاياتٍ لكي ينامَ الوطَن في كتابي الشِعري الأول: الخروج قبل الأخير ...... قلت فيها:

قِيلَ أنَّ فارِساً قد صارَ في الإسار
فخيَّرُه:
مِيتَةٌ بليلِنا،
أَمْ صَرْعَةُ النَّهار ....؟!
فحدَّثَ السَّماء:
في موطِني
يُبارِكونَ مِنْ يموت
وطَرْفُهُ يغازِلُ الشٌّمُوش .....

الحبيب طاهر بدر،

ولك التلويح مثنى ورٌباع يا صاحب الإسم الجميل: طُهْرٌ وبَدْر .....

سلام يا عصام
تحياتي وشوق مطر
كيفكم والرياض التي وحشتنا بشمسها الحارقة وبردها الجاف
لك المحبة
والسلام للعزيز ناصر
وين الحي بيهو

حبيبنا الجميل عصام عيسي رجب

أولا كل عام وانت أخضر وانبل يا صاحب

فعلا

Quote: أَهُو دا الْقَلَمْ

ومخاض ميلاد لغد اجمل

سلمت أيها الشاعر الجميل

استاذنا الموصلي هذا النص يحتاج توقيع لحن منك

،،،،أبوقصي،،،،

عصام .. العيد مبارك عليك والاسرة والاصدقاء (وإلى اللقاء)
(وليسعد الشعر إن لم يسعد الحال) قصيدة تبعث الأمل حتى في
عصر التيه ..

الحبيب محمَّد عبد الجليل،

الخيارات ماها كتيرة، يا نقاوم ونظل قابضين على نشيد الأمل والصباح ..... أو نمشي بين الناس نبشِّر بالهزيمة والإنكسار ....

وأهو الحمد لله إنتَ والأحباب المداخلين هِنا وكتيريييين وكتيراااات واقفين في صف الثبات والمجالدة، وإن طال الطريق إلى الشمس .... لأنو بُكرة جاي جاي .... جاي بالعزيمة وحلم الخلاص .....

Quote: حبيبنا الجميل عصام عيسي رجب أولا كل عام وانت أخضر وانبل يا صاحب فعلا Quote: أَهُو دا الْقَلَمْ ومخاض ميلاد لغد اجمل سلمت أيها الشاعر الجميل استاذنا الموصلي هذا النص يحتاج توقيع لحن منك ،،،،أبوقصي،،،

حبيبنا مجدي ياللمصادفه
القصيده آنا سيفتها عندي بعنوان
آهو ده القلم

وبالنسبه للتلحين ولا على كيفي ده آمر النص نفسه

كل الود

Quote: شَايفِينْ مُرُوقْنا على الشَّمِسْ أولاد حياةْ وبَنات أمَلْ

عليك الله يا استاذنا الموصلي، لما تجي للتلحين، عندي اقتراح بسيط
البيت اعلاه والتعبير اعلاه في اعتقادي ذروة سنام القصيدة
وفتح من الفتوحات الربانية عديل كده
وبحتاج لتأكيدات دايمة من الجمل الموسيقية بتاعتك
------------------------------------------------

Quote: شَايفِينْ مُرُوقْنا على الشَّمِسْ أولاد حياةْ وبَنات أمَلْ عليك الله يا استاذنا الموصلي، لما تجي للتلحين، عندي اقتراح بسيط البيت اعلاه والتعبير اعلاه في اعتقادي ذروة سنام القصيدة وفتح من الفتوحات الربانية عديل كده وبحتاج لتأكيدات دايمة من الجمل الموسيقية بتاعتك

ياسلام عليك يا قصي ياخ
نمسك الخشب علي بصرك وبصيرتك
تمام

ليك المحبَّة حبيبنا مجدي

If we don't have crazy derams, we will do nothing - One of Mandela's comrades

الحبيب خالد العبيد

سلامين تلاتة وعشرة كمان

كيفكم في بلدكم السقَط لقَط ديك ....؟
ناصر تمام لِسه مُرابِط في الصحراء

وكل سنة وأنت وأحبابك بألف خير ومحبّة

Quote: ياااااااا مدني، وينك ياااااخ .....!!!!! كل سنة وأنتَ أبهى قصيدة .... وأجمل روحاً أيُّها الشاعِرُ الجمييييل

.
.
.
من لنا بهذا (الحبوب) ...
بح صوتنا ونحن نستجديه ان يزهر ...هنا ... او هناك
.
.
محمد مدني ... يا (حبوبنا)
ارتع هنا ...هنا ماء وظل واوانس
.
.
. قم حرك تحرك

صديقي عصام
لطالما كان، وظل شعرك يعبر عني.
لك التحايا

Quote: في موطِني يُبارِكونَ مِنْ يموت وطَرْفُهُ يغازِلُ الشٌّمُوش .....

تحير الجلاد ..وهاج ..
أشاروا عليه..فجيش الجيوش
أعلن الجرائد .. والمنابر ..
والمكاتب ..وجلاس البروش ...
كسر كل الأقلام ..
محو كل الكلام ..
منذ فتح الخرطوم
إلى إكسوم ..
حد كوش

وشق لحد بحجم الضياء
حذو ..حفرة النحاس ..
يضم الشمس ..بعد الأصيل
ونزع الشوف ..من مقل الحقيقة
وزرع الخوف .. جوف السليقة
وسلخ الشرف .. من جلد "الوشوش"

مقل ..بلادي ..ما انكسرت
كم فقئت...ما إنطفأت ..
ولا سقطت منها الرموش
وفي المساء
أزهرت نجوم ..شديدة البهاء
تضئ.. قبة السماء ..
تغازل الشمس ..
في قبرها المضاء ..

------------------------------------------------
أستاذي عصام ، الأصل منك ...وهذا فرعه ، الضوء منك ..وهذا نوره ،
فشكرا لك الإمتاع ، وشكرا لك التحفيز ...دم متصلاً ...

عشان الْهّمّ والْحلم وااااحِد حبيبنا خالد عويس،

بالله إتخيِّل الجماعة المطاميس ديل، قال أيه: راصدين أسامينا ومستهدِفين كتاباتنا وصفحاتنا ...!!!!
نوع من الخيابة الإلكترونية البائسة زيَّهم ..... وكأنَّنا بعد الْعُمُر دا كلو في القِرطاس والقلم، حنكسِر أقلامنا ونقول: أها سكتنا ....

حنسكُت في حالة واحدة بَسْ: لما يسكُت نفَس الحياة فينا .... أمَّا ونحنا ما زالنا على ظهر الأرض، ما نا ساكتين، ولا بنكسر أقلامنا ولا بنرمي ألواحنا وشَرَافاتنا أو ندفِّق دواتنا ......