محجوز ! . شكرا سيف الجامعة ، لكـ الراية قريباً " بوست عيد "

أضان عمر الفاروق ما بكرهه ، مقتنع بونستو مرات كتيرة
وحقيقي كنت عاوز أسمي البوست سيف الجامعة ( نجض) بس خفت أكون فاكيها في نفسي في التنظير بتاع الناس البتعتمد على أضانه بس .
أها أنا الليلة حاجز سيف الجامعة كفنان مفضل ( soon )
واحتراماً لوفاة زميلة المنبر المهندسة منيرة حمد النيل ننتظر إلى أن يخف الحزن قليلاً في ذاكرة أحبابها

وضع الوحدة الليلة لا يحتمل " والشكر للإله " فقد أعطتنا التقنيات عدت خيارات للمشاهدة
وعليه كنت بهرب لامن السادة ( المعارضين الموالين ) يجو ينظرو
كانت ليلة سيف الجامعة فقط دون توتر .

كنت أنيق المنظر يا سيف يا فنَــان .
البدلة ، دون بشتنة الفنايل والطاقية البتشوه بيها الشي القدمتو الليلة ، كمَلت حاجاتكـ .
حتى ونستكـ الشوية كنت فيها أنيق
كامل الدسم قعلاً
ونستني حد الثمالة

كل سنه وانت طيب يا عمران

علاقتي بسيف منذ كنا طلبه بجامعة الخرطوم حيث

اتيحت لي فرصة العزف معه كثيرا والعاجبني فيه

مش مظهره الذكرته

بل تخليه مؤخرا عن الكاب الذي ليس له اي داعي

من فنان كبير ومتعلم

وانت طيب أخي الباشمهندس الجميل طارق
شكلكـ " روحتَ " مع الطيِب عبد الله وما حضرت الحلقــة ؟
ده كان صوت ( لايف )
صوت بي إحساس حسي
..
الطيب عبد الله تعابير وشو زمان وهو بيغني ما زي حسي
فعلاً كنت محتاج لإحساسو أكتر من ترديدو المزيف

أخونا عمران ..

العيد مبارك عليك وعلي أسرتك وأهلك أجمعين..
ما حضرت سهرة سيف الجامعة يا ريت تنزلوا لينا أغنية منها..

Quote: خفت أكون فاكيها في نفسي في التنظير بتاع الناس البتعتمد على أضانه بس .

لو أنا فهمتك صاح مع الدبل (في) الفوق دي، فبقول ليك البيعتمد على أضانو ما بتخذلو
وغالباً بتديك القراية - والسمع - الصاح، وطبعاً دي بتعتمد على مدى نضافة الأضان..
ما تخاف فنبوءتك عن سيف صاح ، سيف زول غناااااي ..


يلا سمِّعّونا..

Quote: لو أنا فهمتك صاح

وفهمتني معاكـ كمان يا صلاح يا فنان
..
بس أغاني الحلقة نخليها شوية خاطر حزن الزملاء يا صلاح .
وأكيد متفق معاي

.....
عزيزكـ المُشاهد استمتع يا حسين خوجلي
وشكراً للحلقة الذكية ( باعتبار مهنيتكـ العالية )
ولذكائك ، وانت توعدنا بحلقة ثانية .





____________________
بس إن غيرت سيف راحت حلقتكـ

عزيزي عمران

لا شك في ان سيف كما ذكر صديقي العزيز والفنان صلاح عبد الله

يمتاز بصوت جميل وكما ذكرت انفا اني عزفت معه كثيرا ايام الشباب

في النصف الثاني من السبعينيات

لكن تعليقي كان عن الكاب الليلو وليست عن صوته

فهمتكـ أخي طارق
لكـ الود

حلقة تشحتف الروح زي زولة جمال حسن سعيد ..
تفتح الروح مية ضلفة حنين ،
صوت سيف يشحتف الروح ،
خلفية العود منسابة خلف صوتو تشحتف الروح وتفتِح ضِلفه كلها

سيف الدين محمد الحاج

الدفعة القدامي في كلية التربية - الخرطوم

تخرج من قسم اللغة الانجليزية في العام 1983 م وكان ايامها في بداياته الرهيبة والساحة ملئى بالابداع والمبدعين في كل المجالات

برز بصورة لافتة وردد الناس معه لو معنعن قول كلموني ، وايضاً الايام عرفوني يوم شنو كدا ويم شنو برضو ماعارف
ثم ابدع في عذبة انت كالطفولة كالاحلام واجاد الكثير من ااغنيات وملك الساحة الفنية في الجامعة وكان فنان كل الفعاليات


تنبأنا له بمستقبل قوي خصوصاً انه كان ذا ملكة صوتية متفردة ومتمكن من العزف على العود بصورة مذهلة وموهوب في تخير الاغنيات والكلمات الجميلة

هو فنان بالفطرة وقد حافظ على اسلوبه الجاد وكانت حصيلته ممتازة من الاغنيات الخاصة وتعامل مع شعراء لهم صيتهم النخلي - حلنقي - ازهري محمد علي .......

-----
عمران حسن صالح ، صديقي العزيز ، نثق في ذوقك بشدة ، اجمل مافي كاب سيف الجامعة انه اتى مرة في حلقة بشعار رييال مدريد ههههههه قلت انعل ابو الصلعة
زاتها ،،،
تذكرتك والله هذا اليوم وتمنيت لقاءاً يجمعنا بذلك الموسوعة الرهيب وهو يكتنز حقيبة بها كل اغنيات السودان!!! كنز موجود بكل الصدق فلا تفصح عنه الا في حملة ترويجية كاملة نعول عليك في قيادتها


فهلا عجلت؟

عيدك سعيد ، وفي انتظار الحلقة - بالمناسبة حسين خوجلي هو اوبرا السودان بلا منازع - وما ح ابعد عن سلمى سيد ههههه

حضرتها تب يا سيد عمران
كانت عيدية سمحه اعاده
الله علينا وعليك بالخير
يازول سيف عجييييب شديد
و لو ربنا اكرمك و سمعته
عبد الغني محمد الحاج
بيغني بيعزف عصافير عقلك
بتطير كلو كلو .

!!!!

Quote: و لو ربنا اكرمك و سمعته عبد الغني محمد الحاج

لو أخو سيف الصغير خليفة محمد الحاج .!! زول رهيب وعجيب قرب يتفوق على سيف الجامعة ..!!

وخليفة هو اللحن لي سيف أغنية (صوتك رنة) يا سفيان .!

شكرا عمران .. ما حضرت الحلقة يا ريت لو نزلتوها لينا ..

Quote: لو أخو سيف الصغير خليفة محمد الحاج .!! زول رهيب وعجيب قرب يتفوق على سيف الجامعة ..!!

يا ناذر (مدير اعمال غريبة و شنو شنو غريبة)
عبد الغني ذااااتو عجيب خليهو خليفة .

فهمتكـ أخي طارق

ما عارف ليه يا عمران في الحته دي

ذكرتني زين العابدين بن علي ...!!!!

الاخ عمران

كل سنة وانت طيب

غايتو انا حاجز لى كرسى للاستماع.

قبل اسبوعين كنت اتحدث مع صديقى عزيز على جدا واتفقنا نحن الاثنين ان سيف الجامعة يخطو بخطوات حثيثة ومركزة لتسيد مكانته فى طابور الغناء.
سيف الان لديه اعمال قوية على شاكلة زولة لجمال حسن سعيد.



تخريمة

ما مريت علينا ببوست
ابواللمين -زورق الالحان- قناة الشروق- اغنيات وذكريات نادرة
فلقد اوردت فى فقرة الحديث عن طائر الاحلام بوستيك وتسجيلك الرائع باليوتيوب.

بالمناسبة يا سفيان وعمران ...

سيف عندو ألبوم جديد نزل قبل فترة أسمو سفر المعاني فيهو أغاني جديدة حلوة وكم اغنية قديمة بي توزيع جديد ..

أشتريهو وما بتندم ..

سيف محمد الحاج
او سيف الجامعة
الفنان المنحاز للناس والجمال والانسانية
عشت فى بيته حين كنت فى القاهرة اختا معززة مكرمة
فلقد كان بيت سيف قبلة من القبلات العديدة فى القاهرة
كان بيته وبيت السنى لا يمكن ان تجدهما دون ان تجد عشرات الناس النايمين فى الواطة وفى الكنبات
يعيشون كبشر عالى القيمة
اعود لسيف
سيف من اكثر الفنانين الذين يحفظون الغنا السودانى
"من ببكى وبنوح وبصيح للشوفتن بتريح "التى ورد فى الاثر انها اول اغنية حقيبة والله اعلم
فسيف محمد كما يحلو لى مناداته صوت يستطيع ان يغنى لكل فنان دون ان يكون مقلدا لذاك الفنان
فنان له خاصية انه يمكن له ان يغنى الى الابد دون ان ينخدش صوته
فصوته له ملامح خاصة به
فى ذات مساء من الثمانينات كان جدى ساهرا يومها ، كان سريرى الى جواره فى بيتنا فى امبدة
كنا نتسامر نحكى ونضحك
فجاة صمت جدى حيث "جاب النسيم صوت سيف " قال جدى
ـ الولد دا صوته سمح بلحيل
قلت له
ـ دا سيف الجامعة
ضحك جدى وقال كيف يكون اسم ابوه الجامعة ؟
حكيت له عن معرفتى بسيف الذى كان قد عرفنى اليه العميرى
وانه كان حينها يشتغل فى دار النشر فيما ازعم والله اعلم
دارت الايام وحط رحالى فى الاذاعة ، فى العام 89 من القرن الفات
كان على ان اعد برنامجا كاملا ليوم كامل فى الاذاعة من "القران الى القران " فوقع اختيارى على سيف الجامعة كواحد من الضيوف
يومها كان عميرى قد غادرنا وما تزال احزاننا ولن تبارح لعمرى
مشيت لسيف فى دار النشر واتفقت معاهو عشان يجى يسجل برامج للعيد
واستضفته كان المضيف صديقى طارق كبلو مقدما للبرنامج وكان معه من ابناء جيله شاويش ، مجذوب اونسة
كانت سهرة لن انساها غنى فيها سيف كما لم يغن من قبل
وبعد ان اكملنا السهرة سجل لى سيف الجامعة ساعة كاملة كانت اغنيات جديدة "هريت بيها السادة المستمعين "
لاعجابى بها
ياعمران الكلام عن سيف طويل ودى صداقة عمر ، من العام 83 والى الابد
سيف الجامعة ياخ احبك جدا وكل سنة وانت طيب يا ابو اشرقت
عمران كل سنة وانت طيب وعيالك بالف خير

والله ياعمران كان ما عناية ربك ما كان تسمعو من سيف الجامعة ده غير اغنية احرمونى
والكلام ده كان سنة 82 وانا اقود سيارتى فى شارع النيل من الشرق الى الغرب واتعديت
قاعة الصداقة وعايز اعمل يو تيرن من قصاد المتحف القومى ومؤشر وكان وقتها الفنان
سيف حديث عهد بقيادة السيارة ومعه اللواء اوقرون وخلفه يجلس الفنان وزميل المنبر ورئيس
مركز اصدقاء البئية الاخ عادل التجانى ولم اشعر الا ان شخصاً اصطدم برفرف السيارة
الامام الايسر وذهب الى الناحية الثانية من الطريق وربك ستر وكان هناك مجروس اتياً من جهة
امدرمان الا ان سائقه لم يكن متعجل واصطدمت سيارتهم بعمود على الجنبة الاخرى من الشارع
وكانت سيارة سيهان بيرد بيضاء و اظنها تخص اللواء ابوقرون ..
وكنت اعرف وقتها الاخ عادل التجانى اذا التقيته فى منزل صديقى ودفعتى حامد المعتصم وهو
بقى جبارتهم وسيف غلطان 100% ولكن اللواء ابو قرون حاول يهرشنى وما انهرشت وقلت له
قلت كده اذن ننتظر بتاع الحركه ووقفت تحت شجرة من لبخ شارع النيل وجاءنى عادل التجانى
وقلت له ان الاخ الذى يلبس البدله الافريقيه كلامه استفزازى وقال لى ده العقيد او العميد لا اذكر
الان ابوقرون وده الفنان سيف الجامعه ولم اكن شاهدته من قبل ولكنى كنت قد سمعت احرمونى
وكان سيف قد بعث بها من جديد فقلت للاخ عادل حصل خير فقلت له خير ..
ياربى فى مناسبة لكلامى ده ؟ فى واللا مافى بعد ده ما بمسحه يعنى اصلو هو عمران الشناف
العالمى عمر الفاروق؟؟

سلمى سلامة ..

Quote: فى ذات مساء من الثمانينات كان جدى ساهرا يومها ، كان سريرى الى جواره فى بيتنا فى امبدة

يا هو بيتكم الجيناهو في عرس بتك وجا سيف في الحنة وأجبرتوني امسك الدلوكة وأعزف بيها لي سيف ولا واحد تاني ..

صديق الموج ..

Quote: وكان وقتها الفنان سيف حديث عهد بقيادة السيارة

سيف دا عشان أنحن بنحبو ربنا بيحبو .. لأنو في رجعتو الأخيرة للسودان عمل ليهو حادث حركة جمب حديقة القرشي كسر العربية مرة واحدة .. بس الحمد لله ربك لطف وسيف طلع منها سليم ..

ناذر ازيك
كل سنة وانت طيب
ياهو نفسه بيتنا الابيت تغنى فيهو
قايلنى بنساها ليك دى
تحياتى وامنياتى بعيد سعيد

Quote: ياربى فى مناسبة لكلامى ده ؟

إنت يا خال كمان لامن تنضم فوق ناس الغنا في زول يقدر يقول بغم ؟؟
شايل تاريخ غنانا فوق شيبكـ وحايم بيهو في السهلة ساااااااااااااي
ياخي انت قربت تموت خلاص * ما تلحق تسجل لينا حاجات زمان ديكـ
حرام عليكـ يا موج




_________________________
* هوي والله أنا خواف ، إستغفر الله العظيم

وآه لامن تزورنـا ست الكل سلمى بت الشيخ سلامة وتقول :

Quote: الفنان المنحاز للناس والجمال والانسانية

ويبقى كده سيف حا يجلس فوق قريباً
أصلو مصطفى ما بصاحب من طرف
صاحب كل الناس بس الأداهو لحنو ده مميز عندو أكتر .

Quote: سيف عندو ألبوم جديد نزل قبل فترة أسمو سفر المعاني فيهو أغاني جديدة حلوة وكم اغنية قديمة بي توزيع جديد .. أشتريهو وما بتندم ..

وصية ناس القراية والأضان
حاضر يا ناذر ياخي بس إن شاء الله نلقاهو

Quote: ما مريت علينا ببوست ابواللمين -زورق الالحان- قناة الشروق- اغنيات وذكريات نادرة فلقد اوردت فى فقرة الحديث عن طائر الاحلام بوستيك وتسجيلك الرائع باليوتيوب.

أخونا ابراهيم ياخي مراحب وكل سنة وانت طيب
الحوش ده بجيهو دايش ، بغيب بسبب عصرة الشغل وبجي فايتني كتيرو السمح
فاعزرني يا حبيب

Quote: ذكرتني زين العابدين بن علي ...!!!!

ما عصرت عليا شديد يا طارق بالزول ده :) هههههههههههههه

Quote: حضرتها تب

هاهاها يا سفيان إنت الدرر ما بتفوتكـ
غايتو لو في زول جنمبكـ بروح يشتريلو تلفزيون ورسيفر حقاتم براهو
بتكون شغال بين القنوات الكم بقو ما عارف تفتش في الصيد

Quote: ذا ملكة صوتية متفردة ومتمكن من العزف على العود بصورة مذهلة وموهوب في تخير الاغنيات والكلمات الجميلة هو فنان بالفطرة وقد حافظ على اسلوبه الجاد وكانت حصيلته ممتازة من الاغنيات

يا ريس ناس حصاد في بداية لملمتم لحاجات الناس ديل قبل ما تضيع سيف ده طلَع وصتني وصيته
بتوزيع للموصلي وألحان من مصطفى " شوف الكلام ده كيف ؟ " ، أنا متأكد ده كان أكثر شريط سوداني سمعتو
وصدقني فوق لامن قلت سيف نجض لأنو في أغنية للعميد أحمد المصطفى
غناها قبل فترة في حفلة وغناها أمس وكان الفرق واضح
بمعنى إنو الجمال الفي شريط شركة حصاد تضاعف مرات ومرات حتى صار سيف الحالي
سيف الجميل

ترتبت الردود كما أرادت
حرصت أن يكون الرد أسفل المداخلة ولكن حوش بكري على كيفو !

امي الرطانيه الله يرحمها دائما بتقول اهم شي ثقة النفس بالنفس شفت الكلام
دا حسيت بيهو في سيف الجامعه في هذه الحلقه يعني الزول دا لبس الكاب بخليك ما تسمع كويس
مرات لان بديك احساس انه ما واثق من نفسه ومن شكله
سيف الجماعه صوت قوي وجميل ومخارج حروفه واضحه
.
.
عمران كل سنة وجميع ضيوفك طيبين

Quote: دا حسيت بيهو في سيف الجامعه في هذه الحلقه يعني الزول دا لبس الكاب بخليك ما تسمع كويس مرات لان بديك احساس انه ما واثق من نفسه ومن شكله

وده كان يا ولي التناقض الأخير فيهو
أصبح يحس بمكانتو أكثر
حاكي الأساتذة يا سيف فقد كانو كلهم في أناقة حسن عطية
وتشابهت أناقتهم مع ما يقدموهو

شكرا وليد

Quote: الفنان سيف الجامعة قدم فقرة قوية خالص وحلوة. واضح عليه التطور والثبات فى ما يقدمه وكذلك فى تغيره الشكلى والاناقة بدون طاقيته المعهودة. اعمال سيف الاخيرة مثل زولة ويانديدى فعلا ملفتة .

سيف الجامعة بنريدك اسبارك سيتى 18 رمضان