الجمعة الي قندهار

الجمعة الي قندهار


08-20-2012, 12:19 PM


  » http://sudaneseonline.com/cgi-bin/sdb/2bb.cgi?seq=msg&board=400&msg=1345461576&rn=26

Post: #1
Title: الجمعة الي قندهار
Author: العوض المسلمي
Date: 08-20-2012, 12:19 PM
Parent: #0

ندعوا بورداب الخارج وقراء سودانيز اون لاين الي لقاء بورداب الخرطوم ، علي الغداء عقب صلاة الجمعة 24 اغسطس في ( قندهار ) ..
Post: #2
Title: Re: الجمعة الي قندهار
Author: Ahmed musa
Date: 08-20-2012, 12:53 PM
Parent: #1

جاهزين يا ريّس ....
ودي فرصة طيبة نلتقي بكثير من بورداب الخارج
Post: #3
Title: Re: الجمعة الي قندهار
Author: ناذر محمد الخليفة
Date: 08-20-2012, 01:03 PM
Parent: #2

كل عام وانت بخير يالعوض وأحمد موسى ..

حضور إنشاء الله ومعاي مفاجأة عرفتوهو منو ؟!!









ناذر خليفة مدير مكتب صلاح غريبة ونائب رئيس منظمة السياحة السودانية ونائب رئيس تحرير مجلة ظلال التبلدي ..
Post: #4
Title: Re: الجمعة الي قندهار
Author: محمد المسلمي
Date: 08-20-2012, 01:10 PM
Parent: #3

Quote: ناذر خليفة مدير مكتب صلاح غريبة ونائب رئيس منظمة السياحة السودانية ونائب رئيس تحرير مجلة ظلال التبلدي ..
كل سنة والجميع بخير وعافية

-----------
ياناذر حبوبته معاهوا والابراهه
Post: #5
Title: Re: الجمعة الي قندهار
Author: مزمل خيرى
Date: 08-20-2012, 01:27 PM
Parent: #4

لالالالالا ياناذر علييييييك الله لا
Post: #7
Title: Re: الجمعة الي قندهار
Author: بدر الدين اسحاق احمد
Date: 08-20-2012, 01:37 PM
Parent: #4

اهــا واحمد حنين وين ...؟
Post: #6
Title: Re: الجمعة الي قندهار
Author: عماد حسين
Date: 08-20-2012, 01:33 PM
Parent: #3

Quote: ناذر خليفة مدير مكتب صلاح غريبة ونائب رئيس منظمة السياحة السودانية ونائب رئيس تحرير مجلة ظلال التبلدي ..


الخرطوم- سوق ليبيا وبالعكس

العفش داخل البص على مسئولية صاحبه




_____________

تقبل الله يا ناذر
Post: #8
Title: Re: الجمعة الي قندهار
Author: بدر الدين اسحاق احمد
Date: 08-20-2012, 01:55 PM
Parent: #6

اها يا محمد عادل كان حلفنا عليك طلاق بتجئ ولا بتجدع لينا طلاقنا فى الخور ؟







اها وين الكبكابة بتاع المريخ زعيم البورداب الاحرار ؟
Post: #9
Title: Re: الجمعة الي قندهار
Author: ناذر محمد الخليفة
Date: 08-20-2012, 02:04 PM
Parent: #6

والله يا عماد في صفات كتيرة مفروض أكتبا زايد كمية من النواب لكن بس تواضعا مني ما كتبتها زي نائب رئيس بورداب القاهرة ونائب رئيس بورداب القاهرة ونائب رئيس منتدى السياحة والأثار ونائب رئيس جمعية كردفان الحضارة وإييييييييك !!!

يا خي من شدة الهنا الأنا فيهو دا سنوني كلها وقعت فجأة وقاموا بدلا نوائب . دا غير لقيت روحي مرشح في الحلة نائب في المجلس التشريعي وغايتو ..!!


بس البوص صلاح غريبة علمنا التواضع وحاجات زي دي ما بنقولا هنا ..


المسلمي ومزمل خيري والباقين ..!!

بالله لمن تحمرو الشية ما تنسوا انو حبيبنا صلاح غريبة عندو مرارة ومبادئ قرحة وارتفاع في الضغط فالشية بالله لا زم تكون خالي بهارات وخالي شطة وتوابل وخالي ملح وخالي زيت ..!!

يعني زي أجدادنا القدماء جيبوا اللحمة وغزغزوها في العصايات واشووها في نار مووقدة في اثناء بتلفوا فيها وتتونسوا ..!!
Post: #10
Title: Re: الجمعة الي قندهار
Author: ناصر البطل
Date: 08-20-2012, 02:49 PM
Parent: #1

Quote:
ناذر خليفة مدير مكتب صلاح غريبة ونائب رئيس منظمة السياحة السودانية ونائب رئيس تحرير مجلة ظلال التبلدي ..
-----------
ياناذر حبوبته معاهوا والابراهه



كااااااك
لا لا لا
دى قويه

بعدين الصور يا قوم ما تنسوا بالله :)
Post: #11
Title: Re: الجمعة الي قندهار
Author: محمد عادل
Date: 08-20-2012, 03:12 PM
Parent: #10

الاستاذ بدرالدين
طلاقك ماتحلفو
انا اتخذت قرار بمقاطعة كل مناشط بورداب الخرطوم
Post: #12
Title: Re: الجمعة الي قندهار
Author: محمد عبدالحفيظ
Date: 08-20-2012, 03:21 PM
Parent: #11

محمد عادل كل سنة وانت طيب اذا انت ما جيت يبقي بورداب الخرطوم قصروا معاك
نحن بنتابع نشاطهم عشان بنحبك لله في الله
Post: #13
Title: Re: الجمعة الي قندهار
Author: العوض المسلمي
Date: 08-20-2012, 03:23 PM
Parent: #12

سلام للجميع
محمد عادل عشان خاطرنا ترجع :)
وكل سنة وانت يا امير بخير
Post: #14
Title: Re: الجمعة الي قندهار
Author: saif massad ali
Date: 08-20-2012, 03:31 PM
Parent: #13

حاج العوض


كل سنة وانت طيب


اسمع ده الكيان القديم ولا الجديد

ولا تحالف صلاح غريبة
Post: #16
Title: Re: الجمعة الي قندهار
Author: محمد عادل
Date: 08-20-2012, 03:45 PM
Parent: #14

الحبيب العوض خاطرك على راسنا
ولكن لايشرفنى بان اتواجد فى مكان مع شخص يرفض حتى ان يكون هناك تضامن مع زملاء كانو معتقليين فى سجون هذا النظام
Post: #15
Title: Re: الجمعة الي قندهار
Author: ناذر محمد الخليفة
Date: 08-20-2012, 03:44 PM
Parent: #13

محمد عادل أول حاجة كل عام وأنت بخير ..

Quote: انا اتخذت قرار بمقاطعة كل مناشط بورداب الخرطوم


تاني حاجة قرارك ما بناباهو .. لكن في حاجة اعرفا ..

مشية قندهار دي ما نشاط .. نحن ماشين ناكل ..!! عارف ناكل يعني شنو ؟! ماشين نضبح حمل ونشويهو ونمنجرو مع البصل والشطة وخلطة الزبادي بالسفن أب ..!!

من متين الأكل بقى نشاط ..!! هو يا والله الأكل بيخلي الزول يرخم وينعس وداير ينوم ..

فتعال مطمن وقرارك جو جيبك .. بس المشكلة إنك تجي وتخلي خشمك يتنشط !! وتعلن في أثناء ما نحن بناكل دعمك للمعتقلين وتطالب بي تحرير حلايب وتطالب بي الحوار مع الحركة الشعبية قطاع الشمال ..!!

يعني لو داير تنشط خشمك أفتحو بس لمن نقعد في الصينية عشان الشية والكبدة غير كدة ما تفتحوا نهائي ..!!

يلا منتظرينك ...!
Post: #17
Title: Re: الجمعة الي قندهار
Author: محمد عادل
Date: 08-20-2012, 03:57 PM
Parent: #15

التحيه لكل الثوار معتقلى المنبر


خالد خليل بحر
فتحى البحيرى
محمد حسن عالم بوشى
مروة التجانى
بكرى العجمى
فيصل شبو
احمد عبدالله
معتصم مصطفى الجبلابى
التحيه لتلك النخله الشامخه نجلاء سيداحمد
التحيه لبخارى الامين
Post: #18
Title: Re: الجمعة الي قندهار
Author: ناذر محمد الخليفة
Date: 08-20-2012, 04:04 PM
Parent: #17

!!!

Quote: ولكن لايشرفنى بان اتواجد فى مكان مع شخص يرفض حتى ان يكون هناك تضامن مع زملاء كانو معتقليين فى سجون هذا النظام


محمد عادل مين قالك أنا رفضت ..!!
أنا رفضت محاولتك مصادرة رأي التانين الانت قاعد معاهم وبتتكلم بي اسمهم !!

حاول أفهم يا خي ...!! الله ....!!

Quote: التحيه لكل الثوار معتقلى المنبر


خالد خليل بحر
فتحى البحيرى
محمد حسن عالم بوشى
مروة التجانى
بكرى العجمى
فيصل شبو
احمد عبدالله
معتصم مصطفى الجبلابى
التحيه لتلك النخله الشامخه نجلاء سيداحمد
التحيه لبخارى الامين


وين محمد الأسباط ..!! إنت ليه ما كاتب أسمو مع الكانوا معتقلين ديل ..!!
ولا عشان ما بتعرفوا ؟!!


















شفت خطورة الزول يتصرف براو ؟!!
Post: #19
Title: Re: الجمعة الي قندهار
Author: محمد عادل
Date: 08-20-2012, 04:12 PM
Parent: #18

سقط اسم الاسباط سهوا
امشى اسال الاسباط قول ليهو محمد عادل حمدل ليك السلامه وين
التحيه للاستاذ الكبير محمد الاسباط
Post: #20
Title: Re: الجمعة الي قندهار
Author: صديق الموج
Date: 08-20-2012, 04:18 PM
Parent: #18

Quote:
لالالالالا ياناذر علييييييك الله لا


مزمل خيرى................عيدك مبارك

ماتتعب ساكت طالما فى لحمه لابد من ضبان
شوف ناس اصحاح البئية، وللضمان شيل معاك بف باف،،،
Post: #21
Title: Re: الجمعة الي قندهار
Author: ناذر محمد الخليفة
Date: 08-20-2012, 04:23 PM
Parent: #20

!!!!!

Quote: امشى اسال الاسباط قول ليهو محمد عادل حمدل ليك السلامه وين


كلي نظر والحمد لله ..!!

طيب يا خي اسأل الأسباط قول ليهو ناذر حمدل ليك السلامة وين ..!!
Post: #22
Title: Re: الجمعة الي قندهار
Author: وضاحة
Date: 08-20-2012, 04:28 PM
Parent: #21

غايتوا لو ما جاكم تايفويد ولا كوليرا ما بطيروا

انا ما بعرف بتاكلوا فى حتات زى دى كيف!!!!!!!!!!!!
Post: #23
Title: Re: الجمعة الي قندهار
Author: وليد محمد المبارك
Date: 08-20-2012, 04:33 PM
Parent: #22

بناكل
نّجم نّجم نّجم نّجم نّجم نّجم


كده ..!
Post: #24
Title: Re: الجمعة الي قندهار
Author: ناذر محمد الخليفة
Date: 08-20-2012, 04:45 PM
Parent: #23

اهو فرجت والحمدلله يا محمد عادل ..!!


هسي ضرب لي فردتي علي كدايس سواق الحافلة الهايس القبل كدة كتبت عنو في كم بوست .. (علي دا بالمناسبة فردتي صاقعة كان مختفي من يوم الوقفة وظهر لي بعد فطور اخر رمضان سألتو قال لي كان مربوط !!.. بس ما وراني كانوا رابطينو وين !!) ،

المهم .. قال لي أجهز نفسي يوم الجمعة لي رحلة كاربة لي جبل اولياء .. ماشين مع فردنا أولاد الحلة شايلين معانا ساوند سيستم وأورقن وفنانين وفنانات وبتاعات ودنيا حلوة وحاجات زي دي ..!!

حاولت أعتذر لكن لقيت روحي اساسي وما في طريقة ، قلت لي روحي يا أبو النيز أنت طالع من رمضان ومعدتك ما بتستحمل الشية وكبدة الجمل النية !!.. لازم (ننشط) المعدة بي أكلات ما تكون تقيلة عليها .. والبلطي في جبل اولياء اليومين ديل مع الفيضان ما شاء الله .. زي البسبوسة !! يمين ترفع البلطاية كدة تحشرا كلها بي راسا جو خشمك !!

تفتح خشمك تلقى الشوك كلو إتنفش طالع براهو زي ابو القنفد لمن يشعر بالخطر ..!!

بس ما تسألني تققول لي : طيب الراس مشى وين ..!!

غير كدة لقيت قندهار بعيدة خلاص .. قلت جبل اولياء اقرب !!


المهم يا شباب .. ما مشكلة لو أنا مافي جاييكم صلاح غريبة إنشاء الله ..!!
Post: #25
Title: Re: الجمعة الي قندهار
Author: صديق الموج
Date: 08-20-2012, 05:05 PM
Parent: #24

Quote:
المهم يا شباب .. ما مشكلة لو أنا مافي جاييكم صلاح غريبة إنشاء الله ..!!


ناذر يا سغيل .... عيدك سعيد
اخوانك يقولوا ليك انزل تقوم تجدع ليهم البايظ!!!
Post: #26
Title: Re: الجمعة الي قندهار
Author: Waly Eldin Elfakey
Date: 08-20-2012, 05:11 PM
Parent: #24

ناذر كل سنة و انت طيب

Quote: وفنانين وفنانات وبتاعات ودنيا حلوة وحاجات زي دي ..!!


بتجيبو الهوا لي نفسكم براكم هسع لو جوكم ناس النظام العام علي حس البتاعات دي
Post: #27
Title: Re: الجمعة الي قندهار
Author: حافظ انقابو
Date: 08-20-2012, 06:06 PM

كامل تضامني مع عمبلوكات قندهار
ولا للابادة الجماعية من قبل مليشيات
العوض المسلمي
Post: #28
Title: Re: الجمعة الي قندهار
Author: ناذر محمد الخليفة
Date: 08-20-2012, 06:51 PM
Parent: #27

هههههههه كل سنة وإنت طيب يا ود الموج ..

Quote: اخوانك يقولوا ليك انزل تقوم تجدع ليهم البايظ!!!


يوماتي في سيرتك أنا وصلاح غريبة .. الزول دا بيحبك جدا جدا وبيعتبرك مثلو الاعلى ..

طواااااااالي ضاربك كمثل ..!!

الزول دا بيضربك كمثل ضرب نضيف ..!!

صدق أنا لمن شعرت بالغيرة ..!!
Post: #29
Title: Re: الجمعة الي قندهار
Author: ناذر محمد الخليفة
Date: 08-20-2012, 06:54 PM
Parent: #27

دكتور والي الدين كيفك ..

يا زول حمدلا على سلامة الوصول .. غنتوا البلد دي كلكم سقتوا أولادكم وطشيتو منها وأغتربتو وعامليني غفير عليها ..!!

هو إنتو بعد ما خليتوها تاني أحرسا ليكم في شنو ومن منو .. !! بالغتو ..

Quote: بتجيبو الهوا لي نفسكم براكم هسع لو جوكم ناس النظام العام علي حس البتاعات دي


ناس النظام العام هينين وبيتفاهموا أعمل حسابك من ناس الهيئة بي هناك .. ديل أتجاهم واحد . خليك حريف يا دوك ..!!
Post: #31
Title: Re: الجمعة الي قندهار
Author: احمد محمد بشير
Date: 08-20-2012, 07:10 PM
Parent: #29

Quote: الجمعة 24 اغسطس في ( قندهار ) ..

يا ود المسلمي
نحن طالعين في اليوم داااك لي جمعة لحس الكوع2
وانت شابكنا لحمة في قندهار ؟؟

غايتو صلاح غراب مما جاء الخرطوم اي حاجة حا تبوظ!!

صلاح غراب ده زول شووووووم ,
Post: #32
Title: Re: الجمعة الي قندهار
Author: احمد محمد بشير
Date: 08-20-2012, 07:11 PM
Parent: #29

اللمة دي بكون بتخطيط من الجاسوس صلاح غريبة .
ليضرب الثوار في مقتل
Post: #30
Title: Re: الجمعة الي قندهار
Author: صلاح غريبة
Date: 08-20-2012, 07:03 PM
Parent: #27

وانا جاي انشاء الله ومعاي طبعا

حبوبتي ومفاجاة الموسم

معاي عضوة قديمة

سهام موسى ستجي معاي

فمرحب بها

وبعد انتهاء الغداء سنقوم بتكوين

بورداب الخرطوم ( جناح التغيير )
Post: #33
Title: Re: الجمعة الي قندهار
Author: احمد محمد بشير
Date: 08-20-2012, 07:18 PM
Parent: #30

ياهوووو الغراب ظهر في المداخلة اعلاه
وصدقت توقعاتي .

يا غراب إنت طير من الخرطوم دي , و امشي شوف ليك كرتة في الرياض او القاهرة .
غريبة الشوم قال سهام قال .







.
Post: #34
Title: Re: الجمعة الي قندهار
Author: صلاح غريبة
Date: 08-20-2012, 07:42 PM
Parent: #33

طبعا ومؤكد انا جاااااااااي

ومعاي حبوبتي

ومعاي المرة دي مفاجة العمر

بعد غيبة

جاياكم الاخت سهام موسى

في ثوب جديد

وانشاء الله في الجلسة دي حنكون

بورداب الخرطوم ( التغيير )

صلاح غريبة - رئيس اللجنة التمهيدية لبورداب الخرطوم ( التغيير )
Post: #35
Title: Re: الجمعة الي قندهار
Author: Ahmed musa
Date: 08-20-2012, 08:19 PM
Parent: #34

Quote:
الحبيب العوض خاطرك على راسنا
ولكن لايشرفنى بان اتواجد فى مكان مع شخص يرفض حتى ان يكون هناك تضامن مع زملاء كانو معتقليين فى سجون هذا النظام


محمد عادل يا الحبيب
بالمناسبة انا كنت من الحاضرين
والحصل ده سوء تفاهم
انا من لحظتها فهمت وجهة نظر ناذر
هو ما قال انا ضد التضامن
ولا حتى قال هو معاه
هو قال حاجة محددة وانا بتفق معاه فيها
انو من حق اي زول يعمل اي حاجة كشخص
لكن ليس من حق اي زول يتكلم باسم مجموعة والمجموعة دي قاعدة وما فوضته
يا محمد انا متابع نشاطك السياسي وعارف حبك للديمقراطية والمؤسسات
وحتى تحديك السافر لقيادات حزبك لاجلها
دي وجهة نظر ناذر الوضحها ليك وانا بااكد عليها لاهميتك بيننا
وانا(كاحمد موسى) ما كبورداب بتضامن معاك لاجل زملائي وزملائك
اها ... جاي ؟؟؟ ولا نرمي البتاع بتاع بدرالدين داك
يا كسبنا جيتك يا كسبنا حريتنا :)
Post: #38
Title: Re: الجمعة الي قندهار
Author: بدر الدين اسحاق احمد
Date: 08-20-2012, 08:43 PM
Parent: #35

Quote: يا كسبنا جيتك يا كسبنا حريتنا :)




انا من زمان قاعد أفتش على معنى يجسد كلمة إنتهازى والحمد لله وجدتها
وكمان من زول قانونى ..
كسبنا حريتنا (الضمير راجع ليك براك يا احمد موســى ) شفت كيف




________
وبرضو كل عام وانت بخير والتبريكات لكاتم الحريات وصحبه الميامين ناس العشرة
Post: #36
Title: Re: الجمعة الي قندهار
Author: بدر الدين اسحاق احمد
Date: 08-20-2012, 08:37 PM
Parent: #30

ما كان العشم يا محمد عادل ...
Post: #37
Title: Re: الجمعة الي قندهار
Author: ناذر محمد الخليفة
Date: 08-20-2012, 08:42 PM
Parent: #36

!!!!

Quote: جاياكم الاخت سهام موسى

في ثوب جديد


والثوب دا سادة ولا مشجر ؟ وطاقاهو عند منو ؟!!
Post: #39
Title: Re: الجمعة الي قندهار
Author: ناذر محمد الخليفة
Date: 08-20-2012, 08:50 PM
Parent: #37

غايتو المرة دي عينا انشرطت عديل يا بورداب الخرطوم وجابت ليها شماتة ..!!

وهسي يجي سيف مساعد يقول : ما قلت ليكم جهاز الأمن هو الفرتق بورداب الخرطوم ..!!


كبورداب ما قادرين نتفق في لماتنا .. معقولة كمان ماشين ناكل وبرضو ما قادرين نتفق ..!!

يا خي الطقتنا دي ما عين ..!! دي راس الخيمة عديل ..!!

يا بدر الدين ويا أحمد موسى عليكم الله بطلوا تحانيس .. محمد عادل دا ما عندو علاقة بالعمل العام ولا حصل أشتغل شغل مؤسسي عشان كدة يا أحمد موسى كلامك وكلامي الأبن محمد عادل داير ليهو 10 سنوات ضوئية عشان يفهم الحاصل حواليو شنو ..!!

الداير يجي يجي والمادير عنو ما يجي ..!!

يا محمد عادل أنا شخصيا ما جايي .. خلاص تعال أتسمم ..!!
Post: #40
Title: Re: الجمعة الي قندهار
Author: Ahmed musa
Date: 08-20-2012, 08:51 PM
Parent: #37

Quote:
ما كان العشم يا محمد عادل ...


بدالردالين اسحق في حال كونه في خطر ..!! :)
تضامنوا مع بدرالدين اسحق ...



ـــــــــ
بدرالدين انا ده كله هين
خوفي يقوم يعز البتاع ويجي
تكون البتاعة راحت شمار في عز محمد عادل ليها
Post: #41
Title: Re: الجمعة الي قندهار
Author: قاسم المهداوى
Date: 08-20-2012, 09:05 PM
Parent: #30

Quote: غايتو صلاح غراب

ظلمت الغراب النبيه
Quote: وبعد انتهاء الغداء سنقوم بتكوين
بورداب الخرطوم ( جناح التغيير )

جاكم اعصار كاترينا المدمر








قاسم المهداوى
Post: #42
Title: Re: الجمعة الي قندهار
Author: الزبير صالح الزبير
Date: 08-21-2012, 00:23 AM
Parent: #41

Quote: في اثناء بتلفوا فيها وتتونسوا ..!!



شنو يا ناذر البلفوها دي ؟ اوع تقول لي سمبوسه
Post: #43
Title: Re: الجمعة الي قندهار
Author: Waly Eldin Elfakey
Date: 08-21-2012, 01:17 AM
Parent: #42

Quote: صلاح غريبة - رئيس اللجنة التمهيدية لبورداب الخرطوم ( التغيير )

مبروك يا ناذر منصب اخر ليك

ناذر الخليفة نائب رئيس اللجنة التمهيدية لبورداب الخرطوم - جناح التغيير
Post: #44
Title: Re: الجمعة الي قندهار
Author: ناذر محمد الخليفة
Date: 08-21-2012, 10:26 AM
Parent: #43

الزبير سمبوسة شنو ياخي ..!! إنت قايل روحك في دمشق ولا شنو ؟!!

Quote: شنو يا ناذر البلفوها دي ؟ اوع تقول لي سمبوسه


البلد دي فيها حاجات كتيرة بتتلف وتخلي راسك يلف معاها ... إنت بس تعال قندهار ..!!

دكتور والي الدين ..

Quote: مبروك يا ناذر منصب اخر ليك


فعلا مع صلاح غريبة مش هاتأدر تغمض عينيك .!!

من كترة نوائب الدهر ومناصبها مع صلاح غريبة لمن عدد المناصب غتلخبط علي ..!!

لحدي قبل ما أنوم أمبارح كانو سبعطاشر ما بين نائب رئيس ونائب امين عام وهسي صحيت من النوم لقيت عندك واحد تمنطاشراوي !!
Post: #45
Title: Re: الجمعة الي قندهار
Author: MOHAMMED ELSHEIKH
Date: 08-21-2012, 11:02 AM
Parent: #44

كل عام وانتم بخير.فيالطريق من بورسودان للخرطوم ونأمل لقياكم. ود الشيخ- مستشار ناذر
Post: #46
Title: Re: الجمعة الي قندهار
Author: Waly Eldin Elfakey
Date: 08-21-2012, 11:12 AM
Parent: #45

Quote: ود الشيخ- مستشار ناذر


تقصد مستشار نائب صلاح غريبة
Post: #47
Title: Re: الجمعة الي قندهار
Author: سفيان بشير نابرى
Date: 08-21-2012, 11:36 AM
Parent: #46

السلام عليكم جميعاً
و عيد سعيد

رايكم شنو بمقترح يغير البرنامج
و يغير المكان و برضو يدينا فرصة
عظيمة بأننا نكسب اجر نحنا و ضيوفنا
البورداب ؟
Post: #48
Title: Re: الجمعة الي قندهار
Author: ناذر محمد الخليفة
Date: 08-21-2012, 03:00 PM
Parent: #47

سفيان .!!


أوعوا تكونوا لاحقيني جبل أولياء ومعاكم محمد عادل !!!!
Post: #49
Title: الجمعة الي قندهار
Author: العوض المسلمي
Date: 08-21-2012, 04:03 PM
Parent: #48

محمد عادل بطل حركات ، انت عارف ناذر قصده شنو ، وما محتاج نكرر كلام احمد موسي
وشوف بعد مناشداتنا ليك اهو ضيعت علي ناذر عضة ما بتتعوض ، يعني هسي ناذر اكبر مضرر من كلامك ده :)
المهم
سيكون الغائب هو الخاسر :))
Post: #50
Title: Re: الجمعة الي قندهار
Author: ناذر محمد الخليفة
Date: 08-21-2012, 04:33 PM
Parent: #49

العوض ..

Quote: سيكون الغائب هو الخاسر :))


الله لا جاب الخسارة ..!!

محمد عادل حا يجي في حالة غياب ناذر وناذر غايب ماشي الجبل مع علي كدايس ...!!

انا ما جايي لكن يا العوض رسل لي نصيبي لأنو لو وصيت محمد عادل حا يجيب لي العُضام والشحم ..!!

وما مشكلة ببادلك بي تلاتة سمكات بلطي ونص كيلو بيض سمك تحمروا نظام كافيار ينفعوك بالليل ...!!
Post: #51
Title: Re: الجمعة الي قندهار
Author: العوض المسلمي
Date: 08-21-2012, 05:15 PM
Parent: #50

اها قول جبت ليك اللحمة ! مع العلم انه اللحمة وقتما تبرد ما بتكون حلوة ولو سخنتها بتكون انتهيت منها زاتوووو !
اها شرابنا الابيض الحلال داااااك البظبطوا ليك منو يا ناذر ؟
Post: #52
Title: Re: الجمعة الي قندهار
Author: ناذر محمد الخليفة
Date: 08-21-2012, 05:22 PM
Parent: #51

!!!

Quote: اها شرابنا الابيض الحلال داااااك البظبطوا ليك منو يا ناذر ؟


شرابكم دا مع الجبل والبحر والبلطي ما بينفع معاي ..!!

صحبي علي كدايس جايب لي معاهو شرابو الابيض .......... !!
Post: #53
Title: Re: الجمعة الي قندهار
Author: بدر الدين اسحاق احمد
Date: 08-21-2012, 11:56 PM
Parent: #52



الطارة جاهزة (الراجل يصل هناك )
Post: #54
Title: Re: الجمعة الي قندهار
Author: الزبير صالح الزبير
Date: 08-22-2012, 00:01 AM
Parent: #52

Quote: صحبي علي كدايس جايب لي معاهو شرابو الابيض .......... !!


ناذر الخليفة
شراب ابيض وسمك بياض وفي بحر ابيض
بس غايتو ناقصكم الجاز الابيض

الزبير صالح الزبير
صاحب ناذر الخليفة نائب منو داك كدة
Post: #55
Title: الجمعة الي قندهار
Author: العوض المسلمي
Date: 08-22-2012, 08:20 AM
Parent: #54

الحضور سيكون كبيرا ومنوعا رجال ونساء حسب ما تلقيت من اتصالات تلفونية
Post: #56
Title: Re: الجمعة الي قندهار
Author: Ahmed musa
Date: 08-22-2012, 08:33 AM
Parent: #55

Quote: وما مشكلة ببادلك بي تلاتة سمكات بلطي ونص كيلو بيض سمك تحمروا نظام كافيار ينفعوك بالليل ...!!


ناذر ..في الأثر ...المؤمن أخو المؤمن
لايبع على بيعه ولا ....إلخ الأثر
أها لو العوض رفض ... أو إتاخر في الرد ... أو إتردد ... كلمني
وتبقى نقطة لقاءنا (أبوحمامة) المغيرب ... نتبادل المصالح
وكل زول يمشي من سُكات ... (إستبينا) ..؟!!!
Post: #57
Title: Re: الجمعة الي قندهار
Author: Ahmed musa
Date: 08-22-2012, 08:33 AM
Parent: #55

Quote: وما مشكلة ببادلك بي تلاتة سمكات بلطي ونص كيلو بيض سمك تحمروا نظام كافيار ينفعوك بالليل ...!!


ناذر ..في الأثر ...المؤمن أخو المؤمن
لايبع على بيعه ولا ....إلخ الأثر
أها لو العوض رفض ... أو إتاخر في الرد ... أو إتردد ... كلمني
وتبقى نقطة لقاءنا (أبوحمامة) المغيرب ... نتبادل المصالح
وكل زول يمشي من سُكات ... (إستبينا) ..؟!!!
Post: #58
Title: Re: الجمعة الي قندهار
Author: ABUHUSSEIN
Date: 08-22-2012, 10:19 AM
Parent: #57

Up
Post: #59
Title: Re: الجمعة الي قندهار
Author: Hani Arabi Mohamed
Date: 08-22-2012, 10:35 AM
Parent: #58

برجاء من الآن. إن اتى غريبة كعضو من المنبر فله ما لنا من حق وعليه ما علينا. ولكن برجاء ألا يستفزّني بأي من أحاديثه عن تشكيل ولجان. أنا جاي أسلّم عليكم ونتشارك عيش وملح وأمشي. ما جاي لزيادة استفزاز :)
Post: #60
Title: Re: الجمعة الي قندهار
Author: Ahmed musa
Date: 08-22-2012, 10:50 AM
Parent: #59

تصدقوا ..؟!!
بديت أشم ريحة الشية
وبيلاوز لي صحن سلطة دكوة
وشطة مباشرة ...وبصل (أخضر) مجدّع في صينية
يكون ده جنون اللحمة ..؟!!


ــــــــــــــ
ياريس ياخ قنهار دي ما منشط إجتماعي
ماتكرمنا بعنوان رئيسي زي يومين ينوبك ثواب
Post: #61
Title: Re: الجمعة الي قندهار
Author: ahmed haneen
Date: 08-22-2012, 11:01 AM
Parent: #59



اها يا بدرالدين ...


انا بايعت صلاح غريبة .. لكن بشرط يطرد نازر الخليفة ويعين محمد عادل

ولو نازر رفض الإقالة.. يركبوا طيارة جبل اولياء..


ثم ثانيا..

الدعوة والعضة دي باسم منو ؟؟؟(حنين مركب مكنة نازر)

وياتو جسم دا البقدم الدعوة..

هل هم البورداب الأحرار..

ولا قروب المسلمي..

ولا جماح صلاح غريبة

ولا جناح نازر المؤسسية
Post: #62
Title: Re: الجمعة الي قندهار
Author: محمد عادل
Date: 08-22-2012, 11:18 AM
Parent: #61

Quote: البورداب الأحرار..

لم تصلهم اى دعوه
Post: #63
Title: Re: الجمعة الي قندهار
Author: Ahmed musa
Date: 08-22-2012, 01:01 PM
Parent: #62

Quote:

Quote: البورداب الأحرار..


لم تصلهم اى دعوه


هذه هي العوجة
وتلكم هي الإقصائية التي لا نحبذها بل ونمقتها
فنحن (أحرار) ...في أراءنا وطعامنا ومن نتضامن معهم*


ـــــــــــ
نتضامن معهم دي أضافتها غرعية الغمز واللمز بالحزب



محمد عادل ... (الأحرار) ديل منو ..؟!!!
Post: #64
Title: Re: الجمعة الي قندهار
Author: بدر الدين اسحاق احمد
Date: 08-22-2012, 02:29 PM
Parent: #63

Quote: الحضور سيكون كبيراومتنوعا



كدا بالهداوة عشان بكره ما يجينا عنوان بوست ( جمعة قندهار فاشلة )

اها يا للعوض ..

الحضور سيكون كبير بمعنى ( كم هو العدد المطلوب ليكون الحضور كبيراً) ؟
هل اذا حضرت بوردابية واحدة والباقى بورداب ( هل يشكل ذلك التنوع المقصود .. ولا العدد المطلوب من البوردابيات كم ؟
دا كلو عشان نحدد لينا معيار ( كمي ) و ( كيفي ) لقياس نجاح / فشل هذه العضــة




Post: #65
Title: Re: الجمعة الي قندهار
Author: بدر الدين اسحاق احمد
Date: 08-22-2012, 02:39 PM
Parent: #64

البورداب الاحرار ديل زعيمهم عمر عثمان (عشان الاختصاص )



انا المحيرني هم احرار من منو ومن شنو (علاقة الحرية بشية الضان شنو )
Post: #66
Title: Re: الجمعة الي قندهار
Author: Ahmed musa
Date: 08-22-2012, 03:09 PM
Parent: #65

Quote: (علاقة الحرية بشية الضان شنو )


ياسعادتك ...
الشية ممكن تتأكل بدون ما تكون (حارة) ..؟!!
أفهمومها بأة ...
Post: #67
Title: Re: الجمعة الي قندهار
Author: ناذر محمد الخليفة
Date: 08-22-2012, 03:58 PM
Parent: #66

سفيان نابري قلت شننو ؟!!

ما سامعنك كويس علي صوتك شوية ..!!!




ما دام ما كتبت أقتراحك ولا في واحد سألك منو أقترح بصياغة الاقتراح وتقديمه لصلاح غريبة للنظر فيه ..!!
Post: #68
Title: Re: الجمعة الي قندهار
Author: العوض المسلمي
Date: 08-22-2012, 06:33 PM
Parent: #67

اها يا ناذر موضوع السمك والكافيار ده خليه بهد يجي ودالقريش من الدويم :)
Post: #69
Title: Re: الجمعة الي قندهار
Author: سفيان بشير نابرى
Date: 08-22-2012, 07:27 PM
Parent: #68

و الله يا ناذر طنشوني طنيش خليهو ساااي
لما اكلتها في حناني ذاتو .
الناس دي مركوه في الشيه شديد لا شنو؟؟
Post: #70
Title: Re: الجمعة الي قندهار
Author: بدر الدين اسحاق احمد
Date: 08-22-2012, 07:53 PM
Parent: #67

إنتو الزول دا ناذر محمد الخليفة مش قال ماشى جبل اولياء متين جيت راجع ؟
كملت البلطى والبياض والكبروس كمان جاي تلحق الشية أم شطوط دا ؟
Post: #71
Title: Re: الجمعة الي قندهار
Author: ناذر محمد الخليفة
Date: 08-22-2012, 08:48 PM
Parent: #70

العوض ..

Quote: اها يا ناذر موضوع السمك والكافيار ده خليه بهد يجي ودالقريش من الدويم :)


ما دام فيها ود القريش أجلناهو تب ..

سفيان :

Quote: الناس دي مركوه في الشيه شديد لا شنو؟؟


هي لكن اقتراحك الماقلتو دا أكيد ما فيهو شية ولا سمك .. ناوي تودينا ناكل تبش بالشطة في توتي ولا شنو ؟!!

خليك مستشار لي نائب صلاح غريبة ومعاك المهندس محمد الشيخ .. الزول دا جايي من بورتسودان هسي بيكون دخل القضارف ..!!

Quote: إنتو الزول دا ناذر محمد الخليفة مش قال ماشى جبل اولياء متين جيت راجع ؟


ناس جبل أولياء ناس علي كدايس قرروا ياجلوا جبل أولياء ويجوا معاي قندهار معاهم الفنان فتحي الفتيحاب عندو غنية حا يغنيها بالمناسبة دي إسمها : الليلة جينا كية للمابينا ...!!
Post: #72
Title: Re: الجمعة الي قندهار
Author: كمال سالم
Date: 08-22-2012, 10:00 PM
Parent: #71

Quote: هل اذا حضرت بوردابية واحدة والباقى بورداب ( هل يشكل ذلك التنوع المقصود ..

فى حاله واحده فقط يابدر الدين إذا كانت تلك البوردابيه هى ( دينا خالد ) .
وإذا تم ذلك فسوف يكون النصاب قد إكتمل واللقاء من أنجح اللقاءات على الإطلاق .
ولا داعى لوجود ناذر أو محمد عادل أو حتى شيخ العوض نفسه .
. وحينها سوف نكون بطرفكم أنا وود الصائم وربما آخرون .
وسنغنى ما أحلى الجمعه فى قندهار .

سلام ياحلوين وكل سنه وإنتو طيبين
وبالهناء والشفاء .
Post: #73
Title: Re: الجمعة الي قندهار
Author: ذواليد سليمان مصطفى
Date: 08-22-2012, 11:05 PM
Parent: #72

نص جديد
غناء ناذر خليفة
وقائد الكورال (عبدالوهاب على الحاج(وهبه)
Post: #74
Title: الجمعة الي قندهار
Author: العوض المسلمي
Date: 08-23-2012, 09:28 AM
Parent: #73

يعني يا ناذر ذواليد بقول ليك لازم تجيب العود معاك !!!
بالمناسبة يا ناذر انت ذو اليد بدفع حق التلحين ولا شغال بس باخوي واخو انقابو :))))
Post: #75
Title: Re: الجمعة الي قندهار
Author: ahmed haneen
Date: 08-23-2012, 11:56 AM
Parent: #74



يا شباب يا منشقين..

السيد مدير ادارة الهجرة .. ورئيس بورداب الخرطوم المرتقب ..

يعدكم بان يعمل جاهدا لتخصيص بعضا من وقته المزدحم بالبرامج والتسجيلات ..

وذلك لكي يتمكن من مشاركتكم .. في جمعة قندهار..

ولكن يقول حاول مرارا وتكرار..بالنائب نازر .. ولم ينجح ..


ولذا يطالبكم.. بوصف دقيق لمنطقة قندهار .. ويا حبذا ..لو نزلتوا كروكي..

حتي لا تضيعوا فرصة مقابلة المهندس صلاح غريبة وجها لوجهه ..
Post: #76
Title: Re: الجمعة الي قندهار
Author: عصام الدين نصر ابراهيم
Date: 08-23-2012, 12:07 PM
Parent: #75

يجمع هذا المكان -وأعني سوق قندهار أو سوق الناقة - كل المفارقات ... فتجد فيه الغني والفقير .. الصغير والكبير ... العامل والعاطل، كلهم توجهوا صوب هذا المكان من أجل الاستمتاع بوجبة لا تنسى من الشواء الطازج والذي يتم تجهيزه وشواه أمام عينيك وحسب الطريقة التي تريدها. مختلف أنواع البشر تراهم في هذا المكان، وسيارات يبدو عليها الترف وهي تربض أمام محلات الشواء المنتشرة في منطقة السوق.يقع سوق الناقة أو قندهار كما أطلق عليه حديثاً غرب مدينة أم درمان، حوالي 40 كيلو متر من مدينة الخرطوم. وقد أكتسب السوق شهرة واسعة حيث يؤمه مختلف الناس من كافة المناطق خاصة نهاية الأسبوع أو في فترات الإجازات الرسمية.. وبعضهم يجد قندهار مكاناً مفضلاً لتنظيم رحلة مع بعض الأصدقاء لتزجية الوقت والاستمتاع بالشواء الممتعة. لم تقف شهرة السوق عند حدود السودانيين، بل تعدى ذلك للأجانب الذين يزورون السودان بانتظام. في إحدى المرات سألني احد الأجانب الذين زاروا السودان لفترة فيما إذا كنت زرت سوق الناقة.. استغربت من معرفة هذا الرجل عن السوق وخباياه وأسراره المختلفة كما حكي لي. يبدو أن للسوق سحر خاص يجذب الناس إليه من كل مكان
Post: #77
Title: Re: الجمعة الي قندهار
Author: ناذر محمد الخليفة
Date: 08-23-2012, 12:22 PM
Parent: #76

ذو اليد ..

Quote: نص جديد
غناء ناذر خليفة


المرة الفاتت النص كان بي مناسبة وداع شول بالله المرة دي أحرص النص يكون بمناسبة أستقبال صلاح غريبة ..!!

العوض ..


صدق ما بيدقع أي شي ولا حتة كباية شاي أو قهوة أو جنزبيل نظبط بيها راسنا دا ..!!


يا ذو اليد ياخي إنشالله كباية فاضية انا بملاها من عندي ..!!
Post: #78
Title: Re: الجمعة الي قندهار
Author: عبدالرحمن الحلاوي
Date: 08-23-2012, 04:02 PM
Parent: #77

حضور إن شاء الله لو وجدنا فرصة مواتية شكرا لشيخ العرب وبورداب الخرطوم
Post: #79
Title: Re: الجمعة الي قندهار
Author: Hani Arabi Mohamed
Date: 08-23-2012, 08:38 PM
Parent: #78

الشيرنق كم؟
Post: #80
Title: Re: الجمعة الي قندهار
Author: العوض المسلمي
Date: 08-24-2012, 08:03 AM
Parent: #79

كلما زاد الحضور قل الشيرنق ..
ونتوقع حضورا مقدرا ..
ونتلاقي بعدين باذن الله
Post: #81
Title: Re: الجمعة الي قندهار
Author: osman righeem
Date: 08-24-2012, 08:57 AM
Parent: #80

بورداب الخرطوم ........... كيس حلاوة ... صحن خبيز ؟؟
Post: #82
Title: Re: الجمعة الي قندهار
Author: العوض المسلمي
Date: 08-24-2012, 09:12 AM
Parent: #81

ملحوظة هامة جدا ...
ليس مهما عندك شيرنق او لا فقط المهم مشاركتك مع احوانك