عيـــــــــــدية : بَاديَة كُردفَانْ فوقَا البِروق إتواتَــن

بَاديَة كُردفَانْ فوقَا البِروق إتواتَــن
إتقَلَبَن سِيولَها أحيَن عِروقَها المَاتِـــن
فَحَل أُم قٌجِي هاج حَبَس البِكَار وأُماتِـــن
وطَعم أم روبة وابوطريقيعة والتول فاتِـــن

* الأخيرة : اسماء اماكن

" سماك إتسبل آ الغرا وطلق واريبك
نَوَر كِترك إتنايا وفتح شذى محريبك
كم خلصتِ دركان من خزاين جيبك
دايما جاهلة كضاب البقول شاف شيبك "

-نواصل-

لسَــارِي آلبِتــُكْ رَعَدُو وطَلَق وآآريبتُـو
مٌشهَاد بَرقُــو فوق خور الجَوَاد و عِنِيبتُــو *
عَانِس آلــ-بي شِمَال تيقَا طَالَت غِيبتــُو
رَشَشَو نَاسًــا والحَارِس الخَلِيجْ وآآآ سيبْتــٌو
-نواصل-

* خوار الجواد ـ العنيبة- تيقا - الخليج اسماء اماكن

B]أبشري يا الغرا بي خيرك ، سحابك رعَد!!
بَرقِك شَــــــال .... وسال وادي العداريب صَعَدْ
شرب كترك بعد عطش السموم إسَعَدْ
وخرف زول تقيلتك حول المَحَاس ما بَعَدْ

Quote: أبشري يا الغرا بي خيرك ، سحابك رعَد!! بَرقِك شَــــــال .... وسال وادي العداريب صَعَدْ شرب كترك بعد عطش السموم إسَعَدْ وخرف زول تقيلتك حول المَحَاس ما بَعَدْ

يا أم خيراً في لب ترابك رقد وعلاك في الجو
مربط عجيلك لاح براقو مطرتو تسوي الشو
بهمك شبعن والخلوق ، ونقاقيرك في الليالي بتدو
كل الزارك ، حرن ما بي المرقة ، محال بتن كو
------------------------------------------------
شكرا يا محمد المبروك ، لهذه الرباعيات
البديعة التي أتحفتنا بها ...وعذرا على هذا الإقتحام الفطير من جانبي
واصل ...وأتمنى أن يمر من هنا أخي وصديقي محمد كبر ...الذي لا أشك
بأن لديه الكثير الجميل ليرفد به هذا الخيط ...ويحمل معك حبل المجادعة الشعرية الجميلة ...

أهلاً بالأستاذ محمد الأمين مبروك.
وشكراً على هذه الرباعيات الأصيلة والصورة الفوتقرافية البديعة، التي أعادت لي كثير من الذكريات.
ما أجمل أن ينعم أهلنا الأحرار في بادية كردفان وبقية بوادي السودان بخريف عميم يعيد لهم ولأرضهم الحياة.

هذه الغَنْوِي لشاعر نسيت اسمه:

الليلي الصعيد بَرَّاقُو وَلْوَل وُ دودا
حرَّكْ ساكِن القلبْ، وَلَّع الماقُوده
الحَسَس القِبيل في جوفي قايْلُو بْرُوده
هُوْ تاريهُو ديْفْة القاطِع الرادوده؟

اللهم اجعلها خير وبركة على كل السودان

حدثنى زوج شقيقتى(حسن ابو الحسن) بأن اهلهم فى الخوى قد أخبروه بأن أمطار هذه السنة

غير مسبوقة وأن الناس مبسوطة لهذا الخير.

يا قريبى كل عيد وانت وكردفان وكل السودان وبودادى السودان بالف خير


يا زول ما دام جبت سيرة البوادي ، شد جملك وارح لى عربك اللى غرب
وهاك من بادية الزّياديّه ... والشاعر عبد الرحمن مكين ( ابو شوقي )


البرق البشيل شق السحاب الداكن
مطرو مغيب القلع ابو جباها ماكن
الارام تعج بعد الهدوء الساكن ..
من تيقا ومشت ..شمال غرب متراكن ..


__
تيقا: اسم منطقة

من بادية الزّياديّه ... والشاعر عبد الرحمن مكين ( ابو شوقي )


خريفك زينه ..حنتوتك شبك متطارح
بدان بقرك ..تورهن بجعر قارح
معزول بهمك ..مخيل من ضباع وجوارح
رتع بى الوعر غنمك نباتك صالح


____
لحنتوت : نوع من النبات
الجعير : صوت الثور
مخيَل : الخيال قماش قديم يوضع لتخويف الحيوانات المفترسه
رتع : سرح فى الخلاء ليأكل العشب .

من بادية الزّياديّه ... والشاعر عبد الرحمن مكين ( ابو شوقي )


تحنَى وترزمى ..وتحمى الحوار اللين
سحابه مقنطره ..وعكاز سراتك بين
يصول فحلك يحادى وبالمصاع متطين
يا ام ضرعا مكبس بالحليب متحين..

___
تحنًى وترزمى : الحنين هو صوت الابل المفارقه ..الرزم هو الحنين لكن بصوت منخفض
سحابه مقنطره :يقصد السنام
السراة :الشحم الذى يغطى الضلوع .
المصاع : الهياج ..وفى موسم الهياج يرش الجمل البول على ظهره..
متحين : التحين هو امتلاء شطر الناقه بالحليب الى اقصى درجه ..

من بادية الزّياديّه ... والشاعر عبد الرحمن مكين ( ابو شوقي )

بدر خريفك ..حنتوتك تشابك نوًر ..
مرح طربان غزالك ..بالعتامير شوًر..
فوق قمم الجبال نفش اقطانو هرعك دوًر ...
زاهيه جميله ..جلً البارى ابدع ..صوًر


____
العتمور :مفرد عتامير ..وهى الكثبان الرمليه ذات الارتفاع المنخفض
الهرع :سحاب سريع الحركه يظهر فى صباحات الخريف بارتفاع منخفض

الاخ الكريم ابراهيم فضل الله

Quote: يا أم خيراً في لب ترابك رقد وعلاك في الجو مربط عجيلك لاح براقو مطرتو تسوي الشو بهمك شبعن والخلوق ، ونقاقيرك في الليالي بتدو كل الزارك ، حرن ما بي المرقة ، محال بتن كو

من لب ترابك ، وبتان كو ... دعنا نستنتج ان هذا الشعر حمري اصيل !!
لك الود شَــــــو !!
وفي إنتظــــار الاخ محمد كبر

Quote: شكراً على هذه الرباعيات الأصيلة والصورة الفوتقرافية البديعة، التي أعادت لي كثير من الذكريات. ما أجمل أن ينعم أهلنا الأحرار في بادية كردفان وبقية بوادي السودان بخريف عميم يعيد لهم ولأرضهم الحياة. هذه الغَنْوِي لشاعر نسيت اسمه: الليلي الصعيد بَرَّاقُو وَلْوَل وُ دودا حرَّكْ ساكِن القلبْ، وَلَّع الماقُوده الحَسَس القِبيل في جوفي قايْلُو بْرُوده هُوْ تاريهُو ديْفْة القاطِع الرادوده؟

مرحب بربيع الكتابة الاستاذ الكبير موسى أحمد مروح
بلغني ان ديوانك قد طبع ويجوس خلال الديار .. كيف السبيل لوصوله لنا ..هنا بين الدخول فحومل ..من ارض الحجاز

من بادية الزّياديّه ... والشاعر عبد الرحمن مكين ( ابو شوقي )

جادت دفقت ..سحبك سماكى انقدً
سيلك مشط الوادى وزحف بى شده
زايد فوق حدودو .انفرش واتمدً
اخد يومين كرب ..وأفقك يعد العدًه..

___
انفرش : اتسع

من بادية الزّياديّه ... والشاعر عبد الرحمن مكين ( ابو شوقي )

جادت دفقت ..سقت التراب الصايم
من تيقا وتغشت البلد المسمى وخايم
يجوب الافق طربا طيرك مصيدح حايم
يغوص يطفح يسابق الموجه وزك عايم ..


___
تيقا ؛؛ الوخايم :اسماء مناطق ..

كدي نلحق نجاري محمد ولدالمختار
الصحفي الألمعي و ابن بادية الزيادية .... " كبيرة القٌلي دايرا اسياد __ مهاجرين كيف عيل زياد " ... ولا كيـــف !!

ثم اعود للرد على الاخوة الكرام المتداخلين ... ردودي مربط عجيل فترقبوها !!

السَارِي البِــتُك رَعَدو ورَدَمـلُو سَحَابْ
صَبَ وشَبَبْ المَحَرِيبْ بَعَد ما شَابْ
عَرَبـَا بِكِرمُو الضَيِف لا عدَد لا حسَابْ
نَزَلُو ورصُو فُرقَانهُن عَلٍي( أٌم دَرَابْ)

* ام دراب .. هي تبلدية تقع في مجرى وادي العداريب شرق فوجا ، ام خضار جنة ...من بادية حمر !!
وبذلك يكون هذا البوست قد شوقر مِصَعِد !!

الأخ الحبيب الأديب الأستاذ محمد أمين مبروك.
شكراً على كلماتك الكريمة، التي أعتز بها كثيراً.
الديوان موجود الآن فقط في مكتبتين بالخرطوم (الدار السودانية، ومروي)، وعلى الإنترنت.
لكنني سأتشرف بإرسال نسخة موقعة منه إلى أي عنوان بريدي تختاره أنت. إيميلي موجود في البروفايل.
......
طربتُ كثيراً لهذه الأشعار البليغة التي أتحفتنا بها.
تحية محبة صادقة لك. كذلك التحية والتقدير للأستاذ الأديب محمد المختار الزيادي ولجميع قرائك في هذا الخيط.

B]أبشري يا الغرا بي خيرك ، سحابك رعَد!!
بَرقِك شَــــــال .... وسال وادي العداريب صَعَدْ
شرب كترك بعد عطش السموم إسَعَدْ
وخرف زول تقيلتك حول المَحَاس ما بَعَدْ

كل سنة وانت بألف خير
الاخ الاديب محمد أمين

يا حليل أيام الخريف في جوف دياري...
ولمعان البروق في الليل ساري مو مضاري...
وتمرح الظعائن في بطون المراحيل والمساري..
ألبـــــل صعدن طلبــن بروق الساري...
ناشقات دار حمر حدرن على البقارى.....
حليل الشلخو في سيف الحنك متباري....
لا لحـــاقي ولا زولا بجيب الطــاري...
في كردفان خيرانه جرت سداري...

مودتي
شـــــــــــــــطة

Quote: كبيرة القٌلي دايرا اسياد __ مهاجرين كيف عيل زياد

__
كبيرة القٌلي: الابل القلي السناب ويعني انها تحتاج دائما للنجوع والهجرة
عيال زياد: الزيادية وهم مشهورين كأبالة

يا محمد بس قلنا نشرح للمارة والمستمتعين بهذه العيدية الجميلة

Quote: و ابن بادية الزيادية

والله يا محمد ما تغشك القبة ما فيها ولى ولا حاجة.. وبالرغم من فهمى ما عنيته، الا اننى للاسف لم اسعد بتلك البوادى طوال حياتي
بس انا طبعا مهموم بالتراث والعادات والتقاليد العربية الاصيلة... ههههه عليك الله رايك شنو فى "مهموم" دى عجيب ولا ما عجيب؟؟
لكن
اينما طاب الحديث لنا.... فعودنا فى البوادى والحواضر راكب

يا حليل أيام الخريف في جوف دياري...
ولمعان البروق في الليل ساري مو مضاري...
وتمرح الظعائن في بطون المراحيل والمساري..
ألبـــــل صعدن طلبــن بروق الساري...
ناشقات دار حمر حدرن على البقارى.....
حليل الشلخو في سيف الحنك متباري....
لا لحـــاقي ولا زولا بجيب الطــاري...
في كردفان خيرانه جرت سداري...

العزيز الأكـــرم خالد احمد شطة
سعيد بهذه المداخلة الرائعة والتي -لحسن الصدف - ذهبت للبوست صعيداً بعيداً حتى تخوم ارض البقارة
نرجعو كيف مسفل ؟
تبقى دي الحكاية !!

برقاً في الصعيد
بلدو لي بعيد
قالو لي لا وراء عثمان جوابو جاء

هنا فهيمة الخضراء كما الخريف .. تنغم الصعيد بصوت منغم شجي .. ام ترانا نتعصب للوجه الصبوح !!

استمع

http://www.youtube.com/watch?v=XXVH2WXO3h4&feature=share

Quote: حدثنى زوج شقيقتى(حسن ابو الحسن) بأن اهلهم فى الخوى قد أخبروه بأن أمطار هذه السنة غير مسبوقة وأن الناس مبسوطة لهذا الخير.

العزيز شمس الدين ساتي .. عيد سعيد
الخـــوي ... من بدع الخالق في الخريف
لو رأيتها الخوي
لطويت اليها الارض طــــي

دوبيت عن بادية شمال كردفان

غرام الصَوف في الراس جَاليتين وقَناصِلْ
صَبَح قَلبِي مِن نَبضْ الشَرَايِين فَاصِلْ
جُود ياعَالِم الأسرَار وعَارف الحَاصِلْ
أَشُوف الدِيسُو لِي تِحت الفَنايِد وَاصِلْ

الصَوف في الراس : كناية عن الشيب ويعنى ان شعر راسه شاب من التفكير في حبها .. وليس وحده بل جاليتين بقناصلها !!
جاليتين مرة واحدة وعدد من القناصل لا السفراء !!

Quote: جادت دفقت ..سقت التراب الصايم من تيقا وتغشت البلد المسمى وخايم يجوب الافق طربا طيرك مصيدح حايم يغوص يطفح يسابق الموجه وزك عايم .. ___ تيقا ؛؛ الوخايم :اسماء مناطق ..

شكرا الاستاذ محمدالمختار لهذه المختارات من بادية الزيادية ...
ولاحظت ان جبال تيقا يكثر ذكرها كثيراً في الشعر البدوي لقبائل شمال كردفان رغم انها _في ظني_ تقع في شمال دارفور !!

التحية والتقدير للأستاذ الأديب محمد المختار الزيادي ولجميع قرائك في هذا الخيط.


----------

الاستاذ موسي احمد مروح كل عام وانت بالف خير

سعدت بمرورك الانيق وكلماتك الطيبة، وشكرا للبوادى وهي تجمع اسيادها ولو على الاسافير


تحياتي

محمد الامين مبروك ..
وضيوفه الكرام في شجرة الضرا الضليلة ..مبروك العيد وكل سنة وانتو طيبين

بادية كردفان خريفها السنه دي سمح وارضها رويانة ومخضرة .
والبهائم وناسها شبعانين بأذن الله...

وقيل الصورة نصف المشاهدة




يا القوز المخضِر في الخريف رويان
يا قميرية بتقوقي وبتسهر في الفريق حِبان
ويا المعروش ويا المقشوش ضرا الاجوادي للضيفان
سقاك الله وطراك بالخير ..طـــــــراك فنان

http://www.reverbnation.com/c./poni/130475272

و

صباح الغرة يا اهل الديار البرة
بيضة الرملة منشرة..
وداك الصيد في لُب الوادي انزرة
غزال شاردة وفحل جاموس رقد قره
نمر كاتل ضنيبه حارس ام غرة
اسد رقد قاطع الطريق ..الشافه داير يبراه
ابو جقم سيد الرجالة الداير الدواس الـ ينفرز برة
داك التيتل ابو قرنين قصع جُره
ريحة المرفعين الكوك، خمش تره
ترك حملا صريع سيده انقلب صره

http://www.reverbnation.com/c./poni/130478443


.

هلا ومرحب بالحبيب حسن محمود

Quote: يا قميرية بتقوقي وبتسهر في الفريق حِبان ويا المعروش ويا المقشوش ضرا الاجوادي للضيفان

دا كان كلام بقارة ما تقول بوست وسقط*
------------------
سقط تعني راح بعيدا بعيدا

ده بوست داير قعده

لنا عوده

الشيخ/ احمد عباس وهو من الشناقيط الذين عاشوا فى كردفان وفى بادية الكبابيش، ومن المغرمين بام بادر
استمعوا لهذا الشيخ وكيف يذكر السودان وبادية الكبابيش......

http://www.youtube.com/watch?v=GwnEDj4Zzs8

Quote: لشيخ/ احمد عباس وهو من الشناقيط الذين عاشوا فى كردفان وفى بادية الكبابيش، ومن المغرمين بام بادر استمعوا لهذا الشيخ وكيف يذكر السودان وبادية الكبابيش...... [/QUOT يا سلام وقصيدته في امبادر من اجمل ما سمعت انصح بمشاهدة هذا الفيديو الرائع شكرا ولد المختار

---

Post: #33 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: محمد المختار الزيادى Date: 08-26-2012, 11:44 PM Parent: #32 هذا الرجل يحتاج الي توثيق وزمن برنامج اطول لكن الله غالب.....

---

Post: #34 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: munswor almophtah Date: 08-27-2012, 03:44 AM Parent: #33 رتعن عند شقل محريبو فرهد فوح وجضن فوقو طير عجلن حداهن بوح قناصن قمح جبخانو جلى وروح وحراسن نبح من تال صفاحهن نوح كردفان لا تعليق منصور

---

Post: #35 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: محمد المختار الزيادى Date: 08-28-2012, 00:26 AM Parent: #26 [quate]شكرا الاستاذ محمدالمختار لهذه المختارات من بادية الزيادية ... ولاحظت ان جبال تيقا يكثر ذكرها كثيراً في الشعر البدوي لقبائل شمال كردفان رغم انها _في ظني_ تقع في شمال دارفور !![quate] نعم جبال تيقا تقع فى شمال دارفور او بالاصح اقصى شمال دارفور.. اما لماذا يكثر ذكرها نسبة لكثرة الجزو حيث ينشق العرب الى هناك وكذلك هناك الوخايم حيث يوجد العديد من الكبابيش والزيادية فيها... بالاضافة الى جبال العنز والتيس وكذلك العفنات، وهى مناطق عادة ما تذكر فى شعر الزيادية خذ مثلا ما قيل فى العمدة صالح على محكر يا ابو موسى ريــس الديش .... زملك بجرد العيش وسمك شوالق ام قيس .... فى سدور العنز والتيس حاشية __ ابو موسى: المقصود به العمدة صالح ود على ود محكر وابنه موسى يعمل ضابط الشوالق: ما تلبسه المرأة من حلى على صدرها ام قيس: لازمة بت حسب من اجمل جميلات الزيادية وتمتاز بالجمال وطول الشعر (هى جدتى اخت جدى جمعة ود حسب والنور ود حسب وهم اقرب الزيادية لنظار الكبابيش صداقة وللكبابيش عموما) سدور: يعنى صدور العنز والتيس: اسماء جبال وايضا ما قالته فاطنة بت ادم فى العمدة صالح ابو زينب علق مارق... بام رسماً شوالق نشوف ونقيبو يجالق... فوق النايبو يزارق ولنا عوده

---

Post: #36 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: munswor almophtah Date: 08-28-2012, 00:52 AM Parent: #35

---

Post: #37 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: محمد المختار الزيادى Date: 08-28-2012, 01:21 AM Parent: #36 ما فتح معاى يا منصور اقرف وكب ادونا من ودبانها وقيعانها

---

Post: #38 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: محمد المختار الزيادى Date: 08-28-2012, 11:03 PM Parent: #37 فى انتظار الابالة وغيرهم

---

Post: #39 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: محمد امين مبروك Date: 09-05-2012, 08:15 PM Parent: #38 Quote: رتعن عند شقل محريبو فرهد فوح وجضن فوقو طير عجلن حداهن بوح قناصن قمح جبخانو جلى وروح وحراسن نبح من تال صفاحهن نوح استاذ منصور المفتاح .. لا يُفتى ومالكُ في المــــدينة! تراهو شعر الخريف بكون تريان ومليان الحان كأنه صدى لفرهدة المحريب وتغريد العصافير !

---

Post: #40 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: محمد المختار الزيادى Date: 09-05-2012, 11:28 PM Parent: #39 فى انتظار المزيد

---

Post: #41 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: البحيراوي Date: 09-06-2012, 08:30 AM Parent: #40 ود مبروك حبابا والبوست حبابا ولع فينا نيران الشوق لي كردفان تُقابا مرحب بالزيادي والحمري والكباشي في مُضرابا سعيد اليوم بخيت الإدلى في فريقنا نسابا وفي طاري الخريف والمطر نتلاقى وكان في الخاطر نرحل لكردفان ولي بروق الصباح نتشابا تحياتي ود مبروك والزيادي وشطة ود المفتاح وكافة متابعي البوست الجميل بحيراوي

---

Post: #42 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: محمد امين مبروك Date: 09-06-2012, 08:35 PM Parent: #41 ابدع اًالبحيراوي حين انشد قائل Quote: سعيد اليوم بخيت الإدلى في فريقنا نسابا وفي طاري الخريف والمطر نتلاقى وكان في الخاطر نرحل لكردفان ولي بروق الصباح نتشابا يعني كردفان واقول : وحات ريدتنا وحيات الهوى الأول بنرجع تاني لو زاد الهوى وطـــول !

---

Post: #43 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: Shinteer Date: 09-06-2012, 11:29 PM Parent: #40 Quote: السَارِي البِــتُك رَعَدو ورَدَمـلُو سَحَابْ صَبَ وشَبَبْ المَحَرِيبْ بَعَد ما شَابْ عَرَبـَا بِكِرمُو الضَيِف لا عدَد لا حسَابْ نَزَلُو ورصُو فُرقَانهُن عَلٍي( أٌم دَرَابْ) ياااااااااا، يا سلام. ده كلام بِعرفوهو "التلوب وكزاعِر".

---

Post: #44 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: محمد امين مبروك Date: 09-08-2012, 09:10 PM Parent: #43 Shinteer سلام وسلام للتلوب وكذاعر تسلم ع المرور !

---

Post: #45 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: munswor almophtah Date: 09-08-2012, 10:46 PM Parent: #44 عبيد الطيب (ودالمقدم) رحيل زيقاني الكبابيش وشوقارة بروفسير عبدالله والمهندس الشقليني .. بقلم: عبيد الطيب (ودالمقدم) الخميس, 06 أيلول/سبتمبر 2012 19:52 لا تستهويني سياسة الخراب والسراب (والهَبُّود الازرق) ودباغة اساطينها لاديم البلاد وجلود العباد ولا احزاب العفار والكجار ولعبة غميدة السياسة لانني لا استطيع ان "اسردب" كما يقول بروفسير عبدالله علي ابراهيم ولكن الذي اعرفه جيدا عند جدب الحروف وجفافها وعندما تكون مَدامِر الكتابة مُمْحِلةٌ وقاحلة ابدأ بثلاثة اشياء الاولي ارحلُ وانشقُ جنوبا بحثا عن شوقارة يَرْتَعُ فيها عقلي و تستأنس بها روحي فاجدها في عتامير وتلال ومراعي وسهول بروفسير عبدالله علي ابراهيم والمهندس عبدالله الشقليني الممتدة ووديانهم الوارفة الظلال وحروفهم وجروفهم الخضراء فيطيب المَقَامُ وترتاح النفس وتعود عصافير ذهني بعد هجرتها وتقوقي قمريَّات روحي بعد ان كانت مشبوبة القُوقاي فمحبتي لهم لانهم اثملوا روحي برحيق ازهارهم الشذية وامتناني لهم لتزويدهم ذهني وعقلي بالمعرفة والمهارة والدربة ودعواتي ليراعهم بمداد نورٍ وابداع ابدي ولشخصهم بدوام العافية مع راحة البال والثانية انبش الزكريات الدفينة حيث تغويني وتطربني جلسات الرفاق والصحاب والندايد وليلها المُقْمِر وأُنْسِها الجميل ان كانت بالذي مدحه صديقنا المورتاني حين سخر من الذين يتعاطون الخمر عامة وخاصة مصنوع الذرة ولونه الذي يشبه هبوب المطر (الرياح )ويتركون مصماص بطون عمتنا الطويلة الشُّوح النخلة (البلح الرما الطَّقِع ابو جرحاً ما برَّقِع )حيث قال:- (لو كنتُ اشربُ لشربت هذا النَّقي الصّافي) وشيخنا العالم الورع الصالح لا يتعاطي الخمر مطلقا ولكنه عندما وجد في طريقه بعض الشباب علي ضفاف وادي ابوبسمة وهم في رحلة خريفية ولاحظ بعضهم يتعاطي مشروب الذرة واخرين يتعاطون صنف غير ولكنه اكثر نقاءً واصفي لونا وهو علي القوارير وعرف ان المقام لم يكن مقام وعظ ومقال فقال قولته التي تداولها المجانين، (لو كنت اشربُ لشربت هذا النقيُّ الصّافي ) اوقد تكون جلسات السمر بدون هذا النقي وشخصي من الذين لا يتعاطونه ولكن بعض اصدقائي من رواد رواكيب الحيكومة اومويلح الوجيه ود رحمة ذلك الانسان الذي صلّي بعربان السافل صلاة العيد عندما قدموه اماما بطلع البدر علينا لانه لم يتزكر سورة واحدة وقال ساخرا من البدو:- (اقسم إن ما ربك رحمني بطلع البدرُ علينا كان العرب سوني مضحكة) وكلهم يتمثلون بقول الشقيُّ مظفر النواب (اشربها دمثاً كريماً واعلم ان النار تستحي من الكِرام) يا له من قول حين كان الزمان صبيٌّ (بِعُرفِه) وهذا ما جعل صديقنا ود المُر وهو لِعُمري من اجمل الحلوين أُنْساً عندما يكون خريف البادية مكتمل (خريف شُرِّي اللِّتْبَاشَرن قبايلو) واقواهم عودا واكثرهم جلدا ايام الشَّقا وشقَّت العود والسنين الطوارح فعندما سمِعَ بطرفة الشيخ الشنقيطي و النقي في لمّة صحاب قال:- مجنون ليلي حالتو اقلَّ من مجنونك وزي ما ليلي كانت في المحاسن دونك اصفي من المدام في كاسو لمحة لونك واخطر من فراق الروح عليَّ عيونك وحديث شيخنا الجليل اصبح متداولا خاصة عند المجانين والبسطاء ملح الارض اصحاب المواهب والابداع والوان قوس قزح امثال صديقنا وصاحبنا معروف ود عبدالله (الزيقاني) ابو حواء الذي رحل عن دنيانا قبل شهر فبكته حسان الحمراء بزفرات حري بل بعضهن حثين الرماد علي رؤوسهنّ وتركن القرون مُسدلات ومبعثرات بلا دايوق ولا ضمخنهُنّ بكَرْكَار كلونيا (الفي القزاز ظاهر) ولا حتي بِطَرَق الخريق وامثال ابو حواء الزيقاني رحليهم له وقع خاص في قلوب دقاقات الشّتم والسيرة وستّات اللَّكيك وحكامات الجراري بالحمراء وتحديدا حي الشوِّيط وكل عشاق المروث الشعبي وابداعاته التي تنقلنا لعالم لايوصف الا بالسمح والزين . كيف لا فهو وصاحبه احمد نادي كانا يشكلان ثنائيا خطيرا يستهوي العزاري ويجعلهن يتهادين ويمدن اعناقهن ويتمايلن بالرقص في رشاقة وحبور علي ايقاع الكرير وضربات الايادي والارجل حتي نجد احداهُنَّ تشدو قائلة:- جراري ناس نادي ونَدْماني الما جات لي مقطوع الطّاري الصديق الشاعر دكتور جمعة البري رسم المشهد في لوحة زاهية:- ودالعمدة قالو الليلة عندو طَهُور وفي قمرة وخريف عِز الشباب طمبور لي الصفقة ام رسيس وقفَنْ بنان الحُور ؤ كيف رص القزاز بِتلامَعَنْ في النور كفل البرمي سيدو وبي اللِّجام مهجور فِيهِن بينة كيف شُوفت المنلرة أم سُور مرقت مِنَّهِن راخيا القدم في فتور وبِتْوازن رزيز الهزَّة والحنجور الدّيس جرَّ فوق حِجْلَن رطَنْ معصور وشُبَّال ام سماح حرَْمان علي البزُّور تِتمايح فِريع بانة وحرير مجرور وتتفدَّع تقول دابي وصديرها نفور فاصوات حلقوم وحناجر الزيقاني وتنيده نادي تعتبر من الشجن الدفين فلذا نجد ايقاع ضربات ايديهم وارجلهم تعزفان علي اوتار قلوب الحسان بعزوبتها وحمحمتها التي تشبه هديل الحمام فتأتي الجميلات مسرعات ويتمايسن كما الخيزران ويدخلن حلبة الرقص بعد ان يرخين اقدامهنّ في فتور ويشرئبن باعناقهن فتنقصم وتنفدغ ظهورهنّ وتنفدع خصورهنّ التي تصبح كحجاب المتصوفة الذي يجيد صنعه اهلنا الفلاتة :- رقيص الزول ابو ريشيمات خبيب شناق زماننْ فات وضمير الزول ابو ريشيمات حجاب فلاتة ابو طيَّات عِيون الزول ابو ريشيمات قلوتَنْ في الحجر واقعات وسنون الزول ابو ريشيمات بيض القوقا في فريعات وايدين الزول ابو ريشيمات سيطان بي النايلو مجدولات ومصابع الزول ابو ريشيمات ظروف التلفض الظرفات وكفل الزول ابو ريشيمات الفلوة الكوركولها وجات فرقيصها كخبب بعيره شناق –وخصرها كحجاب فلاتة –وعيونها كماء الجبال وسنونها كبيض القمري وايديها كصياط العنج –وبنانها كظروف البندقية واردافها ككفل المهرة لمرتجة الارداف هيفٌ خصورها عزابٌ ثناياها عجافٌ قيودها وصفرٌ تراقيها وحمرٌ اكفها وسودٌ نواصيها وبيضٌ خدودها (الحسن بن مطير) فكل الشبالات تكون من نصيب الزيقاني وصاحبه نادي (شُبَّال ام سماح حرمان علي البزور) وعندما يفلت شُبَّالٌ واحد من العزاري ويكون فال البيرق لأحد الطمبَّاري فتجدهن يغمزن باعينهن ويبتسمن في مكر ونجد الطمباري صاحب الشُّبَّال يَهِزُّ ضراعه في نشوة وسعادة تعانق عنان السماء وكأني اري الزيقاني ابوحواء يهز حِجباته ويلوح بسوطه القِرَّاوي ويضرب به الارض ويصيح بعفويته المعهوده (جغلف ...جغلف الليلة بنطهِّر اللَّغلف..........! مخاطبا الشباب الذين دخلوا حلبة الشّتم لِتَوّهم يبشرون ويتمايلون مع ايقاع ضربات النحاس او الدلوكة وهنا تصيح المجنونة البت العناق ام قنفة:- .(.وَقَعْ... ..وقَعْ.......هَيْ لي الخصيم كَيْ وغياظة....وكراعهم ماها فزَّازة.....دَقُر عيني يا أم تيلة) فتبلغ الحماسة زروتها وهنا تسمع رزمي حناجر الجنيات كحمحمات الخيل وفيهم المعلَّم والممرض والتاجر والمحاسب والراعي والطالب... فالكل يخلع جلبابه بحماسة ونشوة في اعلي زروتها ويحكم رباط العمامة علي ظهره وتحديدا فوق مربط التكة ويركز كما يصفه ودبادي:- اخو البت اللّقَعن قرن الخمرة النازةعلي وردان الصبوة الراكزة الجنيات الهازة صدورهن لازة والزيقاني يمسك بسوطه جيدا ويضرب رجله وينهال ضربا علي ظهورهم والكل( يستعزي) بحسناء يلهج ويردد اسمها بمعزة وحميمية وبصوتٍ جهير ولكن بكنيتها فهذا يقول: ام نفل ام نفل وذاك يقول : (الهمَّل جمل القيد وهيَّن للفهيم وقاسي ليك يا وليد) اي اسمها امنة والاخر( يستعزي) بام عروض واخر بالويحيدة وثاني ببت الصُّرة وهي رابعة اخواتها فتتفجر الزغاريد وتتقدم الحسان بتيه ٍ وزهو وينثي القوام اللادن لمنح شبّال فخرٍ ومعزة علي ظهور الشباب ...فكأنّهُنّ وضعن الملح علي الجرح اوكما يصور المشهدالرائع ود بادي العكودابي :- واخوان ام شلخ ينكبوا جوه الداره زي صقرَنْ نزل من فوق ضرب الصوط والركزة بفرق الناس عشان زينوبا ما بتحوق وبعد ان يشملهم كلهم هنا يأتي دور ابو حواء فيخلع جبة الكاكي التي يرتديها دائما وهي ترمز لخفراء الناظر او الشيخ او المجلس المحلي يا قلبي اللِّنْهَرَد وكيف فشفاش المرض ابوجبة كاك كان ورَد با بقضالْكُن غرض (الكتراب ) فحينما يصل صاحب جلابية قماش الكاكي الي المورد يتركن العزاري عملهُنّ ويسارقن النظر (يتاوقن) نحو الزيقاني فهنالك نجد الزيقاني اشعل الحماسة وهنا اوقف الحركة تماما وهنا يرزم ويزوم ويتخنَّق الزيقاني كأنه اضليم نعام عندما يلتف حول ربداءه ويصيح قائلا:- (اني صاقعةالسواري اني وادي كاروشا الشايل الهشُّوم اني الزلقيبة التَّكِسر ال######) وابوحواء لا يرتكز علي عكازته كما يفعل الشباب بل يقف مستقيما معتمدا علي قوته ومهارته ولا(يستعزي) مثل العامة ولكنه يذهب بعيدا ويلج ( الخزنة الزقاقها مطبَّل )كما المنخل اليشكري ويدلف بعفويتة المعهودة الي ممنوعات و محميات النعمان بن المنزر حيث الي الخورنق والسرير وبرحيل معروف اظننا فقدنا ايضا احد طقاقين توية وحزاقها وهي من الفنون الجميلة ومن موروثات الكردفانيين وتختلف عن الدوبيت في طريقة اداءها ولحنها فشاعر الدوبيت يمكن ان يلقيه دون لحن وكثيرٌ من شعراءه المجيدين لم يكن صوتهم جميلا ولكن طقاق تويه ينبغي ان يكون صوته جميلا ويمكن له ان يُغني بغناء غيره من الشعراء ومعروف عبدالله له صوت اجمل من صوت القمري واتزكره جيدا عندما يغني بصوت طقاق توية الشهير عوض (ننّه) النورابي وتكون عصاة تويته دائما جرَّاس ام روب عمل قيرة ورحل واتعني ابو شديرة ام روب الفتاة صاحبة الهودج – قيرة اي كضحك البزر وصياحهم –اتعني ابوشديرة اي يمم نحوها وابوشديرة منطقة ومشرع شمال غرب حمرة الشيخ اه يا دمعتي السّايلة والبوب يا غُربتي الطايلة عرب ام جبهةً نايرة نزلو الفودة لي القايلة الفودة مورد ماء شهير – ولا القايلة كناية علي تاخير نزول مرحالهم اي عند منتصف النهار آح يا نار العلوشة الخلَّت كبدي مقروشة ضهيبة الزّم المنقوشة وضميرها القبضة بتحوشة العلوشة اسم فتاة- الزم نوع من الذهب –الضمير الخصر والقبضة ملتقي اصابع اليدين بتحوشة اي تطوقه كناية علي ان خصرها نحيلا كمّا يقولو عوض جَنْ بقيف في بيتها وأتَّنْتَن فليل دمور وبت الفَن ونفس الوالدو عمِّي حسن اتنتن اي امشي بزهو- فليل دمور وبت الفن نوع من العطور السودانية ويطربني حد الثمالة حين يغني الزيقاني بتوية الراحل الاستاذ طريبيش دقَّاقين توية في ازمة وفي السوق لا شِدة لا جَزمة لقيت فلانة والكزمة وحاجات حساسة منتظمة شأبيب الرحمة تتنزّل عليك يا ابو حواء وعلي استاذي ومعلمي محمد منصور طريبش بقدر ما زرعتم الفرحة في قلوب الحزانا والمهمومين و لقاطني الحمراء وما جاورها سلامي ولاخدان الروح ناس سالم ود حمد والجملين ملح الارض موسي ودالحاج وودالمر والبيه وابوجيبين وموسي ودجامع اشواقي وحيّاهم الغمام الاربد وقتل الله الغربة وليلها الخازي البهيم والذي يشبه في قساوته وطوله دينق الور فليل الغربة وانعدام النجيمات الحنان ما جعلني ان الجأ الي الخيار الثالث وهو قراءة شعر الرائع الكتيابي والترديد معه: حسبي احبك ايها الوطن الذي... من شمسه نسج الظلالا ياقُبة الالوان والشّجن المطلسم...... ايُّها المهووس بالعُنقِ المقسّم.. والصلاة علي النبيِّ وعشق عاشقه تعالي... عبيد الطيب (ودالمقدم) بادية الكبابيش aubaid magadam [[email protected]

---

Post: #46 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: عبيد الطيب Date: 09-09-2012, 04:58 AM Parent: #45 شكرا للصديق وابن العم المبروك وجزيل سلامي للجميلين ابراهيم فضل الله وودساتي ود المختار وودشطه وحسن محمود والبحيراوي وتلب الشيل شنيتر وخريف رتوعنا ود مروّح وشكرا الصديق الجميل المفتاح لعرض كلمة الزيقاني في مكانها المناسب لم يكن لدي حساب للتعليف في الزمان ولذا سوف نرفد هذا البوست بالرعود والبروق والهسيس والشّتم.....وبابداعات الزيقاني واخرون ولكن نبدا بالخريف والرعود.واليكم الليلة الصّعيد شال وانخلف براقو والفرع لولتو الزيفة وكرس نقناقو تري الليل اتّلت ورقدو المساهرين راقو وحن قلب المشارف لي بلود عشاقو المقطع الثاني الفرع لولتو الزيفة وكرس نقناقو دي والله كلام وكلام...........

---

Post: #47 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: ibrahim fadlalla Date: 09-10-2012, 12:52 PM Parent: #46 Quote: الليلة الصّعيد شال وانخلف براقو والفرع لولتو الزيفة وكرس نقناقو تري الليل اتّلت ورقدو المساهرين راقو وحن قلب المشارف لي بلود عشاقو يا سلام يا ود المقدم على الكلام ...نعم الوصف ..وأبدع تصوير ... هاكم دي ..، بعد إذنك يا المبروك ...، محاولة نجر ، ومجادعة ، أحسبها شائهة ، للمربوع الفوق : هبوبك هبت و رعدك كركر كريرو تبلديك إتدودر وقردك لبد لب كراكيرو ليلك دقش الدغش ونايمك علا شخيرو كايس المحنة صنقع يكوس النجم وطيورو

---

Post: #48 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: عبيد الطيب Date: 09-11-2012, 09:40 AM Parent: #47 ليلك دقش الدغش ونايمك علا شخيرو كايس المحنة صنقع يكوس النجم وطيورو الشاعر ابراهيم فضل الله شكرا علي المرور وليلك دقش الدغش يا سلام والبدوي ان نام وشخر معناه ارتاح من تعب الرشاش وسعبتو شبعك .... وكمان مصنقع لي النجم وبدور لي المحن....! وهاك دي بتوصف اُنس الحسان والعزاري في الخريف والليل المقمر الليلة الصعيد امسَنْ بِروقو بِوجَّن وشال المرزنة فوق سحبو الكبار ما بِفِجَّن اساع ناس عاشة ديفة البي الصّنَقَّر دجَّن وقاعدان برة فوق تنية بعض بِتحجَّن شوف تنية بعض بتحجَّن.....في شاعر وصف ونسة نسوان الريف بهذه الصورة تسلم شاعرنا الكبير

---

Post: #49 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: ibrahim fadlalla Date: 09-11-2012, 10:12 AM Parent: #48 Quote: الليلة الصعيد امسَنْ بِروقو بِوجَّن وشال المرزنة فوق سحبو الكبار ما بِفِجَّن اساع ناس عاشة ديفة البي الصّنَقَّر دجَّن وقاعدان برة فوق تنية بعض بِتحجَّن يا سلام عليك يا ود المقدم ..ويديك ألف عافية وخير على النضم الزين ومجيه ... ده الشعر وده الكلام العلى السجية ..ده الوصف كأروع ما يكون ، بلاغة السهل الممتنع ... ورسم بالكلمات كأبدع ما يكون .... بالله واصل مع ود المبروك ...وبقية الفطاحل ....أكيد منكم حنتعلم كتير وكتير ... شكرا تاني ...على الإمتاع ....

---

Post: #50 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: ibrahim fadlalla Date: 09-11-2012, 11:09 AM Parent: #49 وهاكم ...جدعة ......يا ود المقدم وود المبروك ...وكل الكرام ، جدعة ...من حلاوة القافية الفاتت وحلاوة التصوير جميرات شوقي الليلة هبت رياحن، هَجَّن شَتَّن فوق قيزان قلبي ، هَجَّت نيقان هٌجَّن شوف عينيا والسمع بي ملامحو تب عَجَّن يا اللين يا المفدع خلقة فريع بانة إتعَجَّن ------------------------------------------------ وأعفو لي جوبكة الكلام ...يا ها القديرة ...

---

Post: #51 Title: Re: عيـــــــــــدية : بَاديَة كُردفَانْ فوقَا البِروق إتواتَــن Author: خليفة موسى حمدان Date: 09-12-2012, 05:08 AM Parent: #50 النم الجــميل دخّل فى قلوبنا مسرة مسح الحزن من جلدى داوى العرة شوقر قلبى , فّرهد بطينو إخــــضر بحر المحيط ما شوقنا ليك يا الغرة تظل كردفان الغرة ملهمة الشعراء بجمال تلالها ووديانها وعذوبة روح انسانها..ومعذرة ايها الجهابيذ ان اقتحمت عليكم ضراكم العامر بمفردات الدوبيت البديعة , بهذا الارتجال الذى اراه لا يرقى الى وصف سحر كردفان . وحتى لا انقص كردفان حقها نترككم مع سليمان ود الابيض . الرابط اذا لم يفتح الفيديو: http://youtu.be/cePQOBGrU5k