شرفت الحلاوين-عمر مصطفى-ريحة البن(يوجد ابداع)

ليك الف تحية يا عمر يا مبدع
وشكرا جزيلا

انا لسة مُصِر

علي انو (الريد) و(الهم) اخوان

(الريد) ود (بت الشوق) و(اللهفة)

(اللهفة) ال بت عم (الاشجان) ..

و(الهم) اكبر اولاد (الغم)

و(الغم) معروف ود (الاحزان) ..

أها ...

(اشجان الريد)..و(احزان الهم)

في حسبة كل انساب (الدم)

اخوان من نفس الابو والام

ومذاقم وااحد نفس الطعم

واتشابهو في كل الالوان ..

وانا لسة مصر

على انو (الريد) و(الهم) اخوان

***

الخوة ال بين (الريد) و(الهم)

ما جات من محض فراغ وعدم

جات بي امشاج من لحم ودم

بي قصة حب كانت سيرة ــ

يوم (بت الشوق) ادوها (الغم) ..

و(الغيرة) ملت قلبها غيرة

قالت حررم كضاب (الغم )

كان يقدر يعرّس بت غيرا ــ

و(الحزن) حلف ب(الدمعة) طلاق

لو ما (الغم) عرس (بت الشوق)

كان يملا عقاب (الريدة) فراق

و(الغم) كان راجلا فقري وشين

بس كان واضح ما زول وشين

و(الشوق) عارف كيفن بتّو

بي حب (الغم) كانت اسيرة ــ

قال احسن يلم بين القلبين

ويرتاح من سيرة ها السيرة ــ

و في ليلة اختلفت عن غيرا

(الغم) زفوو للسمحة عريس

في اجمل موكب زفة وسيرةــ

فرحو الاطفال

واتلمت كل الحلة هناك

نسوان و رجال

والحفلة بدت

قام غنّا (الفال)

و(الفرحة) رمت ل(الشوق) شبال

و(الخوف) طرباااان

وكان اول يوم تدخل افراح

بيت (الاحزان) ..

كانت ايام

زي اجمل عيد ــ

واتلمّ (الغم) علي (بت الشوق)

و(الغيرة) هناك في نارا تقيد ــ

وعاشو الاتنين زي احلى اتنين

بككرو بي ود سموهو (الريد) ــ

و(الريد) قررب بين القلبين

كل ما الاقدار كانت بتكيد ــ

اها (بت الشوق) في يوم عادي

زي عادة كل نسوان الحلة ــ

لفحت توبا وقالت تمرق

تدي الجارات في الحي طلة ــ

غِشت (الاهة) تكففر ليها

وهاك يا حق الله و بق الله ــ

يا (بت الشوق) هي يا الفالحة

ماك عارفة سجم ــ

جدك في الحسبة دا خالي لزم ــ

((حبوبة عمة خال بت عمك

جابت خالة حبوبتي

جابْت (اللهفة) الجابت امك

وجابْت (الحسرة) الجابتني))

دي حسبة طوييلة عليك يا بتي

وشجرة كبيرة

وفي غمرة هاتيك السيرة

جات (الغيرة)

(قققن )

وكان اول يوم يتلاقو

(الغيرة) و(بت الشوق)

كان (بت الشوق) بالجد خايفة

لاكين (الغيرة) ب خبث شديد

و بي بسمة وش كانت زايفة

قدرت تقلع منها خوفا ــ

و غَمَزن همسن نسوان الجن

في القصة البينم معروفة ــ

يا (بت الشوق) ما يهمك عااادي

كلْ زولا قسمتو بيشوفا ــ

و الاقدار مكتوبة علينا

نرضابا و نرضخ لظروفا ــ

وانا هسة الفات ما واجعني

الفات اوراقو بقت مكشوفة ــ

واجعني (الغم) الما مهتم

شايفاو شايف غيرك شوفة ــ

وقبال ما تواصل في كلاما

النار انطلقت في جوفا ــ

قامت وما شايفة القداما

ما بين موجوعة وملهوفة ــ

قالت ل(الغم) بس طلقني

ما دايرة معاك دنيا اشوفا ــ

يا مرة مالك

بس طلقني

كدي ياخ اهدي

بس طلقني

ياخ استهدي

بس طلقني

بس طلقني

بس طلقني

ياخ طلقانة

ما دام بتشككي في ريدي

الريدة معاك تب حرمانة

واتفارقو (بت الشوق) و(الغم) ــ

واتمزّق اقوى نسيج من دم ــ

وامتن بنيان ريد اتهددم ــ

و(الغيرة) هناك نصبت صيدا

ووقع في شرك (الغيرة) الغم ــ

وجابولم ود سموهو (الهم) ــ

كدا صِبح (الهم) و(الريد) اخوان

من نفس الاب ..

ومن داك الحين ول حد الان

ما اتفارقو تب ..

بقى ما فيش (ريد) على وجه الارض

من غير احزان

وهموم وتعب ..

و مااسي وصد ــ

وعوازل تبقى قصادك سد ــ

وفتوق من فرقة ولا بتنسد ــ

وبدون ما تضوق في الريد احزان

ما بتعرف طعم الريد الجد ــ

وبقى في العشاق مفهوم راسخ

(من كدد هموم الريدة وجد) ــ

وانا لامن كنت مُصِر جدا

و مصمّم جد ــ

علي انو الريد والهم اخوان

والنسب ال بيناتم ممتد ــ

ما كان من محض فراغ وعدم

كان بي امشاج من لحم ودم

الخوة ال بين الريد والهم

شكرًا يا ود شرفت
إبداع حقيقي



زين العابدين

Quote: شكرًا يا ود شرفت إبداع حقيقي زين العابدين

زين العابدين ود الحليلة
رمضان كريم يا ابن العم
واسعدنى مرورك

في اجمل موكب زفة وسيرةــ
فرحو الاطفال
واتلمت كل الحلة هناك
نسوان و رجال
والحفلة بدت
قام غنّا (الفال)
و(الفرحة) رمت ل(الشوق) شبال
و(الخوف) طرباااان
وكان اول يوم تدخل افراح
بيت (الاحزان) .

بقى ما فيش (ريد) على وجه الارض
من غير احزان
وهموم وتعب ..
و مااسي وصد ــ
وعوازل تبقى قصادك سد ــ
وفتوق من فرقة ولا بتنسد ــ
وبدون ما تضوق في الريد احزان
ما بتعرف طعم الريد الجد ــ

انا لسة مُصِر
علي انو (الريد) و(الهم) اخوان
(الريد) ود (بت الشوق) و(اللهفة)
(اللهفة) ال بت عم (الاشجان) ..
و(الهم) اكبر اولاد (الغم)
و(الغم) معروف ود (الاحزان) ..